|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Nekibe Kelmendi: Forumi politik është anashkalim i institucioneve në kohën më vendimtare për të ardhmen e Kosovës

Prishtinë, 3 maj 2005 - Deputetja e Kuvendit të Kosovës nga radhët e LDK-së, Nekibe Kelmendi, nëpërmjet një deklarate shpreh shqetësimin e saj të thellë në lidhje me propozimin për formimin e një forumi politik për të cilin thotë se është "organizëm paralel i institucioneve të Kosovës".

 

Deputetja Kelmendi është e mendimit se cilsimi i forumit këshilldhënës apo vendimmarrës "është rrënim i institucioneve demokratike, ose anashkalim i tyre në kohën më vendimtare për të ardhmen e Kosovës", dhe sipas saj, po krijohet "forumi" si parlament paralel i këtij të tashmit.

Në vijim po japim deklaratën e plotë të Nekibe Kelmendit dhënë QIK-t.

"Forumi joformal politik, i propozuar nga shefi i UNMIK-ut Soren Jesen Petersen, nën presionin e vazhdueshëm të opozitës, për mua si deputete do të thotë, krijim i një organizmi paralel institucioneve të përkohshme vetëveqeverisëse të Kosovës të dala nga zgjedhjet e lira dhe demokratike.

 

Çfarëdo përmbajtjeje që do të ketë ky forum (këshilldhënës apo vendimmarrës) për mendimin tim është rrënim i institucioneve demokratike, ose anashkalim i tyre në kohën më vendimtare për të ardhmen e Kosovës.

 

Nëse do të jetë ky forum këshilldhënës, atëherë rezulton se institucionet e Kosovës nuk i paskan këshilltarët e vet. Nëse ky forum do të jetë vendimmarrës, siç pretendohet nga opozita, atëherë kjo do të thotë gushtshtet ndaj institucioneve vendimmarrëse të Kosovës që është parlamenti, i cili më nuk e ka autoritetin e vendimmarrjes sepse këtë po ia "grabit" forumi i propozuar.

Po flitet se ky forum do të merret vetëm me disa çështje të rëndësishme për Kosovën, siç janë decentralizimi, komisioni për negociata eventuale për statusin politik të Kosovës etj. Por, shtrohet pyetja a nuk e paskan autoritetin institucionet e Kosovës që të merren me këto çështje kapitale dhe ku qëndruaka rëndësia e krijimit të tyre, meqë po krijohet "forumi" si parlament paralel i këtij të tashmit.

Të gjitha subjektet politike, të cilat, siç po thuhet, do të përfshihen në këtë forum, janë të përfaqësuara në parlament dhe aty e kanë vendin që t'i shprehin qëndrimet e veta lidhur me çështjet për të cilat po formohet ky forum.

Nga ana tjetër, me formimin e këtij forumi do të krijohet një përçarje edhe më e madhe midis subjekteve politike të përfaqësuara në parlament, sepse secili subjekt synon që të ketë rolin kryesor në këtë forum, me të cilin në fakt po ndrydhet vullneti i popullit i shprehur me votën e lirë në zgjedhjet e mëparshme dhe këto të fundit.

Ndoshta dikush këtë opinion timin do ta konsiderojë shumë të ashpër, mirëpo një opinion të tillë ma imponoi shqetësimi im i madh përse mu në këtë kohë të anashkalohen institucionet ekzistuese qendrore të Kosovës dhe ato të zëvëndësohen me një organizëm paralel.

Kam frikën se me krijimin e këtij forumi do të ndodhë ajo që në popull thuhet "prish shtëpi, ndërto hajat"!