|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

  Presidenti Rugova kërkoi sot në Senatin e Belgjikës njohje sa më të shpejtë të pavarësisë së Kosovës

Bruksel, 26 prill 2005 - Presidenti i Kosovës, Dr. Ibrahim Rugova, i cili po qëndron për një vizitë në Belgjikë, mbajti sot një fjalim në Senatin belg, ndërsa nesër paradite takohet me kryeministrin e Belgjikës, Guy Verhofstad (Gi Verhofstad) dhe me ministrin e Jashtëm flaman, Geert Bourgeois.

Në fillim të fjalës së tij Presidenti Rugova, pasi falenderoi Senatin belg për nismën për një dabet për zgjidhjen e çështjes së Kosovës, tha se kjo "është një temë e qëlluar dhe shtrohet në kohën e duhur".

Në vazhdim ai vlerësoi progresin e arritur në Kosovën e pasluftës në të gjitha fushat, ndërkaq për gjendjen e përgjithshme tha se është stabile, sikurse edhe ajo e sigurisë.

Presidenti Rugova për institucionet demokratike të vendit tha se janë gjithnjë e më shumë funksionale, sidomos pas zgjedhjeve të dyta nacionale të vitit të kaluar. Ai theksoi se UNMIK-u, pas zgjedhjes së z. Petersen në krye të tij, "është më dinamik dhe po bëhet partner i institucioneve të Kosovës".

Duke folur për transferin e kompetencave ai tha se në fushën e ekonomisë janë bartur disa prej tyre, ndërkohë që priten edhe në fushën e sigurisë, si u shpreh, në formë graduale. Ndërkaq Presidenti lavdëroi veçmas punën e KFOR-in, duke thënë se "po bën një punë të shkëlqyeshme në mbrojtjen dhe sigurinë e Kosovës".
Presidenti i Kosovës në vazhdim të fjalës së tij në Senatin belg veçoi disa objektiva të institucioneve të Kosovës si:

zhvillimin ekonomik, vlerësimin e progresit të Kosovës, apo të standardeve prioritare, mbrojtjen dhe integrimin e minoriteteve dhe reformën e pushtetit lokal.

Pasi vlerësoi progresin në fushën e zhvillimit ekonomik, Presidenti Rugova theksoi se çështja e transferit të më shumë kompetencave tek institucionet e Kosovës, lidhet shumë me njohjen e pavarësisë, që siç u shpreh "mundëson dhënien e garancive për investimet dhe marrjen e kredive nga insitucionet financiare evropiane e ndërkombëtare", duke përshëndetur me këtë rast edhe paralajmërimin e Bankës Evropiane për Zhvillim që t'i lejojë Kosovës kredi edhe në këtë fazë.

Ndërkaq, duke folur për integrimin e minoriteteve, ai tha se në Kosovë ekziston një klimë më e mirë, sidomos në planin administrativ, ku ato janë integruar:

"Nga 120 vende sa ka Parlamenti i Kosovës, 20 janë të rezervuara për minoritetet: 10 për grupin serb dhe 10 për minoritetet e tjera: boshnjakë, turq, romë, ashkali dhe egjiptianë. Ndërsa, në Qeveri, nga 13 ministri sa janë tani, 3 u takojnë minoriteteve si ministri të rezervuara: 2 minoritetit serb dhe 1 të tjerëve. Në komunat ku kanë fituar shumicën, udhëheqin minoritetet. Pastaj, gjuhët e minoriteteve janë në përdorim, ndërsa përkrah gjuhës shqipe, të shumicës, gjuha serbe është gjuhë zyrtare në Kosovë".

Në vazhdim Presidenti Rugova theksoi përgatitjet për reformën e pushtetit lokal si fazë provuese, ndërkaq për legjislacionin e Kosovës tha se është kompatibil me legjislacionin evropian, sepse po e punohet bashkë me ekspertët ndërkombëtarë.

Duke folur për temën e shtruar në Senatin belg, Presidenti Rugova tha se në bazë të rrugës ndërkombëtare fillimisht do të vlerësohet progresi i arritur e pastaj do të bisedohet për të ardhmen e Kosovës:
"Unë insistoj që pavarësia e Kosovës të njihet drejtpërdrejt nga Bashkimi Evropian dhe SHBA-të, që do të njihej edhe nga fqinjët e vendit tim. Një Kosovë e pavarur, demokratike e paqësore, e integruar në BE, në NATO dhe në miqësi permanente me SHBA-të është vullneti politik i popullit dhe i qytetarëve të Kosovës.

 

Pavarësia do të qetësonte këtë pjesë të Evropës e të botës dhe popullin Kosovës. Po ashtu, pavarësia e Kosovës do të përshpejtonte integrimin e vendeve të tjera të rajonit në BE dhe në strukturat evro-atlantike. Njëherësh, do thënë se me këtë akt të lartë do të përshpejtoheshin proceset e brendshme ekonomike e demokratike të Kosovës dhe do të hapej e stabilizohej perspektiva e vendit tim në planin ndërkombëtar, në bashkësinë e kombeve të lira", nënvizoi Presidenti Rugova dhe shtoi se "Kosova është e aftë të ekzistojë e të funksionojë si vend i pavarur".

Në vazhdim ai foli për resurset e mëdha natyrore të Kosovës, sidomos në fushën e energjetikës ku, siç tha, disponon me 16 miliardë tonë linjit. "Ka edhe rezerva të uraniumit. Kurse në fushën e resurseve minerale është shumë e pasur me minerale të ndryshme që kanë vlerë ekonomike, siç janë argjendi, plumbi, zinku, ari, nikeli, boksiti, magneziumi, dhe shumë minerale të tjera të çmueshme e të rralla. Shpesh e them me shaka se Kosova është 'Afrikë e Jugut' e Evropës, apo 'Afrikë e dytë e Jugut' në botë".

Pasi vlerësoi se Kosova prodhon ushqimin për vete, ai tha se vendi ka edhe resursin e çmueshëm njerëzor, një popullsi të re e të kultivuar, që mund t'i çojë proceset përpara, por shtoi se popullsisë duhet ofruar shansin. "Kosova është në gjendje të marrë obligimet ndërkombëtare, të jetë një vend stabil dhe prosperues", tha Presidenti Rugova dhe vazhdoi:

"Shfrytëzoj rastin që edhe nga ky debat të apeloj për njohje sa më të shpejtë të pavarësisë së Kosovës. Kjo është zgjidhja optimale. Është zgjidhje moderne, në frymën evropiane. Të jemi zot në vendin tonë, të bashkuar me kombet e tjera në selinë e Unionit Evropian, këtu në Bruksel".

Në fund të fjalimit të tij, Presidenti Rugova i shprehu mirënjohje Belgjikës "për ndihmën që i ka dhënë Kosovës në planin ushtarak e civil, në rindërtimin e vendit" dhe veçanërisht falënderoi kryetaren e Senatit An-Mari Lizen për angazhimin e saj për Kosovën para, gjatë dhe pas luftës dhe shprehu bindjen se Kosova do të ketë përkrahjen e saj në çështjen e njohjes së pavarësisë.