Ramush Haradinaj u zgjodh kryeministër i Kosovës

Ramush Haradinaj u zgjodh kryeministër i Kosovës

Prishtinë, 3 dhjetor 2004 - Pas zgjedhjes së Presidentit të Kosovës, deputetët e Kuvendit të Kosovës me vota të hapura zgjodhën kryeministrin dhe kabinetin qeveritar. Pasi më parë Presidenti Ibrahim Rugova para deputetëve nominoi në këtë post Ramush Haradinajn nga AAK-ja, ai mori votëbesimin e Kuvendit dhe u zgjodh kryeministër i ri i Kosovës si dhe 11 ministrat nga radhët e koalicionit. Për kabinetin qeveritar votuan 72 depuetët, kudnër ishin 2 dhe pesë abstenuan.
Pasi mori votëbesimin Haradinaj i njoftoi deputetët me pëbërjen e kabinetit të tij qeveritar.
Pas votimti të qeverisë kryeparlamentar Daci tha se në një seancë të veçantë kryeministri i ri do ta paraqesë programin e tij dhe në të cilën do të diskutojnë edhe deputetët e Kuvendit.
Përbërja e Qeverisë së Kosovës

Ramush Haradinaj (AAK): Kryeministër
Ramush Haradinaj ka lindur më 3 korrik të vitit 1968 në Gllogjan të Deçanit. Ka mbaruar Fakutetin Juridik në Prishtinë. Në krye të AAK-së si kryetar, ai është që nga themelimi i saj, në qershor të vitit 2000.
Gjatë luftës, Ramush Haradinaj ka qenë komandant i UÇK-së për Zonën e Dukagjinit, ndërsa pas luftës, deri në kalimin e tij në politikë dhe me themelimin e AAK-së, ka qenë zëvendëskomandant i SHP të TMK-së në Prishtinë. Në mandatin e kaluar të Kuvendit të Kosovës, Haradinaj ka qenë deputet dhe anëtar i Komisionit për Bashkëpunim Ndërkombëtar.
Adem Salihaj (LDK): Zëvendëskryeministër
Adem Salihaj ka lindur më 25 dhjetor të vitit 1950 në fshatin Duraj të komunës së Kaçanikut. Ka studiuar gjuhën dhe letërsinë shqipe dhe ka punuar si gazetar në Radio Televizionin e Prishtinës prej vitit 1975 deri në vitin 1981. Prej vitit 1981 deri më 1999 Adem Salihaj është arrestuar dhe gjykuar tri herë nga regjimi serb duke i vuajtur rreth 12 vjet burgim. Prej vitit 1992 e deri më sot ai është kryetar i degës së LDK-së në Ferizaj, ku në dy mandate, më 2000 dhe 2002 ai është zgjedhur kryetar i Kuvendit Komunal, post ky prej të cilt ai propozohet për zëvendëskryeministër të Kosovës.
Është anëtar i Kryesisë së LDK-së dhe anëtar i Këshillit të Përgjithshëm të kësaj partie.
Lufti Haziri (LDK): Vetëqeverisja Lokale
Lutfi Haziri ka lindur në vitin 1969 në fshatin Llovcë, komuna e Gjilanit. Ka mbaruar fakultetin e shkencave natyrore, drejtimi i biologjise. Ka qenë më herët kryetar në dy mandate në Forumin e Rinisë së LDK-së, e pastaj edhe në degën e LDK-së në Gjilan, ku ka qenë anëtar kryesie dhe zëvendëskryetar deri në zgjedhjet e fundit në këtë subjekt politik.

Aktualisht është kryetar i komunës së Gjilanit, në të cilin funksion është zgjedhur në vitin 2000 dhe rizgjedhur më 21 nëntor 2002. Po ashtu, ai udhëheq edhe Asociacionin e Komunave të Kosovës (AKK) dhe në këtë cilësi ka prezentuar pushtetin lokal të Kosovës në disa kongrese e forume ndërkombëtare.
Haki Shatri (LDK): Ekonomia dhe Financat
Haki Shatri ka lindur në vitin 1953 dhe e ka të kryer Fakultetin Ekonomik në Prishtinë, si dhe studimet pasuniversitare dhe magjistraturën në Fakultetin Ekonomik në Zagreb, në drejtimin zhvillimor ekonomik. Ka qenë bashkëpunëtor i lartë profesional në Entin për Planifikim të Kosovës, anëtar i Këshillit Qendror për Financim të Kosovës, kryetar i Komisionit Financiar dhe që nga viti 1995 edhe menaxher i Projektit në Institutin për Kërkime Zhvillimore "Riinvest". Në mandatin e kaluar të Kuvendit të Kosovës Haki Shatri ka qenë deputet dhe kryesues i Komisionit për Buxhet dhe anëtar i Komisionit për Ekonomi dhe Financa.

Agim Veliu (LDK): Arsimi, Shkenca e Teknologjia
Agim Veliu ka lindur në vitin 1960 në fshatin Bradash të Podujevës. Me profesion është jurist i diplomuar, kurse prej vitit 1990 ka qenë në poste udhëheqëse të degës së LDK-së në Podujevë, kryetar i së cilës është edhe tani. Më 1998 ka qenë deputet i Kuvendit të Republikës së Kosovës, ndërsa në vitin 2000 zëvendëskryetar i Bordit Administrativ të Komunës. Agim Veliu ka qenë kryetar i Komunës së Podujevës prej 2000 - 2002, në të cilin post është rizgjedhur edhe në vitin 2002, post ky të cilin ai e mban edhe aktualisht.

Melihate Tërmkolli (LDK): Shërbimet Publike
Melihate Tërmkolli ka lindur në vitin 1965 në Bardh të Madh të Fushë-Kosovës. Ka kryer Fakultetin Juridik në Prishtinë dhe deri tash ka qenë deputete e Kuvendit të Kosovës në disa mandate: 1986-1989, 1992-1998, 1998-2000. Është anëtare e Kryesisë së LDK-së dhe kryetare e Forumit të Gruas të LDK-së. Në mandatin e kaluar të Kuvendit të Kosovës, zonja Tërmkolli ka qenë kryesuese e Komisionit për Barazi Gjinore si dhe anëtare e Komisionit për Shërbime Publike dhe e Komisionit për Çështje Gjyqësore, Legjislative dhe Kornizë Kushtetuese.

Qemajl Ahmeti (LDK): Transporti dhe Postëtelekomi
Qemajl Ahmeti ka lindur më 27 shkurt të vitit 1959 në Përlepnicë të Komunës së Gjilanit. Ka të kryer Fakultetin Elektroteknik, dega e Elektronikës në Prishtinë, më 1983. Ka qenë këshilltar politik për telekomunikacion i ministrit Zef Morina prej 1 majit të vitit 2002, drejtor i Seksionit Teknik dhe Konkurrimit të Rrjeteve, Drejtorati për Infrastrukturë Telekomunikuese prej 01.02.2002 - 30.04.2002; përgjegjës për Telekomunikacion, Departamenti i Postës dhe Telekomunikacionit si dhe ka ushtruar shumë poste e detyra në shkollën e mesme elektroteknike "Gjin Gazulli" në Prishtinë. Është anëtar i LDK-së prej themelimit të saj dhe gjatë kësaj kohe ka qenë kryetar i Aktivit, kryetar i nëndegës, anëtar i kryesisë së degës etj.; aktualisht është kryetar i Degës së Dytë të LDK-së në Prishtinë dhe anëtar i Këshillit të Përgjithshëm të LDK-së.

Astrit Haraçia (LDK): Kultura, Rinia, Sporti dhe Çështjet Jorezidente
Astrit Haraçia ka lindur në Gjakovë në vitin 1974. Ka kryer Fakultetin e Drejtësisë në Shkodër. Ai është zgjedhur më 2002 kryeshef ekzekutiv në Gjakovë, në mandatin e dytë qeverisës të LDK-së me parnterët e saj. Haraçia që për nga mosha do të jetë ministri më i ri në Qeverinë e Kosovës. Është anëtar i Kryesisë së LDK-së.

Ahmet Isufi (AAK): Puna dhe Mirëqenia Sociale
Ahmet Isufi ka lindur më 1 tetor të vitit 1961 në Gjyrishefc të komunës së Dardanës. Ai ka diplomuar në Fakultetin e Filologjisë, Dega e letërsisë dhe gjuhës në Prishtinë. Ahmet Isufi ka qenë sekretar i përgjitshëm i AAK-së deri në emërimin e tij për ministër të Punës dhe Mirëqenies Sociale, ndërsa tash është anëtar i Kryesisë së AAK-së. Gjatë luftës, Ahmet Isufi ka qenë komandant i UÇK-së për Zonën e Karadakut, ndërsa pas mbarimit të luftës, ai ka marrë pjesë në çmilitarizimin dhe transformimin e UÇK-së në TMK-së ku është emëruar shef i Departamentit të Personelit, detyrë të cilën e ka kryer deri në maj të vitit 2000 kur ka kaluar në jetën politike duke qenë njëri ndër themeluesit e Aleancës për Ardhmërinë e Kosovës.
Ethem Çeku (AAK): Energjetika
Ethem Çeku është nga Peja. Është i diplomuar në Fakultetin e Filozofisë, dega e Historisë në Universitetin e Prishtinës. Ai i ka ndjekur studitnet pasuniversitare nga historia, në këtë Universitet ku edhe ka magjistruar në teniën: "Mendimi politik shqiptar dhe rezistenca në Kosovë gjatë viteve 1945-1981". Gjatë luftës ka qenë epror i lartë i UÇK-së në Dukagjin, kurse pas luftës ka qenë prefekt i parë i komunës së Pejës. Gjatë mandatit të parë të Qeverisë së Kosovës, Çeku ka udhëhequr Ministrinë e Mjedisit dhe Planifikimit Hapësinor. Ministria e Energjetikës, të cilën do të udhëheqë ai, i është shtuar Qeverisë së Kosovës si ministri e re në këtë mandat.
Bajram Kosumi (AAK): Mjedisi dhe Planifikimi Hapësinor
Bajram Kosumi ka lindur në vitin 1960 në Tuxhoc, komuna e Dardanës, ndërsa ka të kryer Fa-kultetin Filologjik në Universitotin e Prishtinës. Dy vjet (1991-1993) ka punuar si gazetar, ndërsa në periudhat: 1994-1996 dhe 2000-2002 ka qenë kryetar i Partisë Parlamentare të Kosovës. Në Qeverinë e Përkohshme të Kosovës ka qenë ministër i Informimit. Aktualisht është nënkryetar i AAK-së, kurse në mandatin e kaluar të Kuvendit të Kosovës ka qenë anëtar i Kryesisë dhe anëtar i Komisionit për Çështje Gjyqësore Legjislative dhe Kornizë Kushtetuese dhe i Komisionit për Buxhet.
Bujar Dugolli (AAK): Tregtia dhe Industria
Bujar Dugolli ka lindur në vitin 1969 në Nekovc të Drenasit. Ka mbaruar fakultetin filozofik, dega e historisë, ku ka magjistruar pas luftës. Në periudhën 1997-1999 ka qenë kryetar i Unionit te Pavarur të Sudentëve të UP-së. Prej vitit 2000-2003 profesor asistent në Fakultetin Filozofik. Në mandatin e kaluar të Kuvendit të Kosovës, Bujar Dugolli ka qenë shef i grupit parlamentar të AAK-së, zëvendëskryesues i parë i Komisionit për Shërbime Publike si dhe anëtar i Komisionit për Arsim, Shkencë dhe Teknologji dhe i Komisionit për Media.
Sadik Idriz (Vatana): Shëndetësia

Ai është profesori i Fakultetit të Edukimit në Prizren dhe shef i koalicionit "Vatan". Ai thotë edhe pse nuk ka përvojë në fushën e shëndetësisë, por thekson se është i aftë për menaxhim. Ai thotë se në kyerjen e detyrës së ministrit do t'i ndihmojë zëvendësi i tij i cili do të jetë ekspert në fushën e shëndetësisë. Dy ministrat nga radhët e komunitetit serb do të zgjedhen më vonë, për t'u kompletuar qeveria.