|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

OPINIONE

Kur demokracia vlerësohet me dy kute nga ndërkombëtarët

16 korrik 2004 / TN

 

Shkruan: Muzafer LUMA* / Kaçanik

Shoqëria kosovare dhe popolli i Kosovës gjithmonë janë dhe do t'u jenë mirënjohës institucioneve ndërkombëtare, për kontributin dhe punën që kanë dhën dhe po japin për ndërtimin e Kosovës në të gjitha sferat.

Mirëpo, ndodh që shpesh vullneti i ndërkombëtarëve dhe rregulloret e tyre të bien ndesh mes veti dhe kjo të prodhon efekte kundërproduktive tek institucionet kosovare në miniaturë dhe një mosbesim akoma më i madh krijohet, kur këto institucione, zhvillimin demokratik institucional, nëpër komuna të ndryshme, me rregullore njëjta, e vlerësojnë me kute të dyfishta. Kësaj do t'ia shtoja edhe mospërputhjen e disa rregulloreve për ndërtimin e kapaciteteve njerëzore, demokratike dhe institucionale me realitetin kosovar në këtë periudhë të tranzicionit.

Me sa kam lexuar, parë dhe dëgjuar, seancën e fundit të Asamblesë komunale të Gjilanit, ku u zgjodh qeveria komunale, zyrtarët regjionalë të UNMIK-ut e kanë kritikuar dhe konsideruar si të kontestuar, ngase vota e dyfishtë e Kryetarit, në favor të qeverisë së re, paska qenë 'jo' demokratike dhe 'jo' parimore.

A ju kujtohet, zotërinjë të UNMIK-ut, zgjedhja e qeverisë komunale të Kaçanikut me 14 shtator të vitit të kaluar, gati pas një viti të bllokadës institucionale. Në këtë seancë, pjesëmarrës ishit edhe ju, ku qeveria komunale u zgjodh nga vota e dyfishtë e kryetarit të Asamblesë komunale. Të gjithë kandidatët e LDK-së të rekomanduar nga paneli intervistues, u eliminuan nga kjo votë dhe ju kurrë, as në përfundim të seancës dhe as më vonë, nuk e ngritët zërin ashtu siç po e ngritni tash në rastin e Gjilanit.

Apo mos vallë zgjedhja e qeverisë komunale në Kaçanik ishte "demokratike" ngase grupi parlamentar i LDK-së nuk e bojkotoi këtë seancë?. A do të ndodhte kontestimi i kësaj seance, sikur ky grup ta bojkotonte seancën?

Pse demokracia dhe ndërtimi i institucioneve komunale të vlerësohen dhe gjykohen me dy kute, nga njerëz, misioni i të cilëve është të ndërtojnë kapacitetet institucionale të shëndosha dhe të qëndrueshme në Kosovë?

Rruga e bojkotit nuk ka vend në filozofinë politike të LDK-së, në të gjitha nivelet e organizimit institucional të sajë, prandaj, duke u nisur nga ky parim, ne kemi respektuar "fer-plejin" në politikë dhe nuk kemi zgjedhur destruktivitetin në asamble me mjetin e bojkotit. Jo rastësisht flet e dhëna që, në të gjitha asambletë komunale ku udhëheq LDK-ja, opozita ka zgjedhur rrugën e bojkotit dhe rrallë ndonjë seancë përfundon me të gjithë asambleistët.

Të nderuar zotërinjë, rregullorja mbi zgjedhjet, ku thuhet se deputeti bartë mandatin e fituar nga partia që e zgjedh dhe bënë me të si të dojë, është kancer për ndërtimin edhe ashtu të brishtë të institucioneve tona.

Si bën që deputeti i cili merr votat nga një parti, favorizon partinë tjetër, që me këtë përpos që shkilet verdikti i votuesit, i hapet rruga anarkisë, destruktivitetit dhe bllokadave në funksionimin e punës së institucioneve. Falë kësaj rregullore, Asambleja komunale e Kaçanikut ishte peng i disa të rebeluarve që për interesa të ngushta prsonale, nepotiste etj. luajtën lojën e dreqit gati për një vit, ku gjatë gjithë kësaj katrahure, humbësit më të mëdhenj ishin ata që i kishin zgjedhur - qytetarët.

Prandaj, nga e gjithë kjo që u tha më sipër shtrohen pyetjet që kërkojnë njëkohësisht edhe përgjigjie.

Dashtë e pa dashtë, kjo rregullore lejon që të bëhen transfere apo oferta të deputetëve për të kaluar në subjekte të tjera, ngase marrin mandatin me vete apo edhe kërcënohen, për të kaluar në subjektet e tjera, ngase kanë mandatin me vete?

Me rregullore të tilla nuk mund të ndërtohen institucione stabile, demokratike dhe funksionale, por do të kemi organe legjislative, qoftë të nivelit komunal apo edhe atij qendror, si trupa prej qelqi, që do të thyhen në çdo kohë dhe moment, sa herë që të joshet ndonjë i rebeluar. Fatkeqësisht, shembuj të tillë kemi në disa komuna të Kosovës.

Për fund zotërinj të nderuar, kisha dashur që të shfrytëzoni atoritetin tuaj dhe të ndikoni që të ndryshohen rregulloret e tilla të cilat jo që nuk do t'i ndihmojnë proceset demokratike, por do të jenë gurë mbi qafë për mbarëvajtjen dhe forcimin e këtyre proceseve, për të cilat bashkarisht jemi duke punuar.

_________

*Autori është shef i grupit të këshilltarëve të LDK-së në AK në Kaçanik