Devalvimi i vlerave të luftës!!!

OPINIONE

Koment

19 maj 2004 / TN

Këto vërtet janë devalvuar. Për këtë jemi të vetëdijshëm të gjithë. Po jo nga LDK-ja, as nga populli. Janë devalvuar nga vetë ata që thirren si mbrojtës të tyre. Këtu qëndron dhimbja jonë që sëmbon shpirtin e popullit. Dhimbja që duhet të shuhet çdo ditë me sjellje të matura të partive “të dala nga lufta”, me sjellje të mira të ushtarakëve të ish-UÇK-së, me mosmanipulimin e protestuesve etj. Ky edhe është obligim i këtyre partive, i ish-ushtarakëve të UÇK-së, edhe i protestuesve të manipuluar për të pasur një Kosovë të pavarur dhe demokratike, ku liria e ka kuptimin e vërtetë. Në një liri të këtillë, vlerave të luftës u rikthehet dinjiteti, që e meritojnë.

Shkruan: Nazmi LUKAJ

Shpeshherë mediat e majta kanë shkruar se UNMIK-u po i devalvon vlerat e luftës!!! Po ashtu, nëpër protesta që organizohen në Kosovë kundër arrestimit të ish-ushtarakëve të UGK-së, arrestimi i tyre konsiderohet si devalvim i këtyre vlerave! !! Edhe pas Zgjedhjeve të Para Parlamentare dhe atyre Lokale, kur fitoi LDK-ja, akuzohej populli se nuk i ka respektuar këto vlera, që ka votuar për këtë parti!!! Edhe po të bie rasti të rrish me njerëz të përcaktimeve të tjera politike, këtë sllogan e përsërisin si papagallët. Edhe vetë ushtarakët që po lirohen nga arrestimi, këtë konotacion ia japin arrestimit të tyre!!!

Të gjithë këta, pra edhe mediat, edhe protestuesit, edhe vetë ushtarakët që po arrestohen e lirohen, edhe partitë opozitare që nuk i fituan votat e dinë se kjo nuk përkon me realitetin, por duke akuzuar se populli i devalvoi vlerat e luftës, se këtë e bëri dhe po e bën edhe UNMIK-u ! duan me çdokusht t’ia imponojnk atij se kujt duhet t’ia japë votën. Siç e dinë këtë, janë të vetëdijshëm se kush vërtet janë ata që i kanë devalvuar këto vlera. E dinë se të parët që i devalvuan ishin shërbimet sekrete që u krijuan nga partitë që deklarohen si “parti të luftës”, shërbime këto që vranë atdhetarë të shquar të këtij kombi, për ta frikuar LDK-në që t’ua lëshojnë pushtetin këtyre. Vlerat e luftës i devalvuan “partitë e luftës” edhe duke u përpjekur që t’ia mohojnë LDK-së kontributin kombëtar.

Edhe kryetarit të Kosovës, dr. Rugovës. Edhe duke i trajtuar për tradhtarë të kombit të gjithë ata që i mbeten besnikë LDK-së. Vlerat e luftës i devalvuan edhe disa ish-ushtarakë të UÇK-së, të cilëve sot u vjen çudi pse po burgosen, ngase kanë menduar se mund t’a heqin këdo nga kjo jetë, mund ta maltretojnë këdo, pra mund të bëjnë çkado në emër të luftës! Këto ishin veprimet që i devalvuan këto vlera të çmuara, për të cilat përgjegjësinë e mbajnë edhe “partitë e luftës”, edhe disa ish-ushtarakë të UÇK-së që u implikuan në krime dhe në gjëra të tjera të këqija, si në uzurpime, në korrupsioni etj. Këto ishin veprimet që i devalvuan edhe vetë “partitë e luftës”, edhe vetë ish-ushtarakët që po arrestohen e lirohen, edhe ata që po e vuajnë dënimin, edhe protestuesit që brohorasin për ruajtjen e këtyre vlerave.

Këto ishin edhe veprimet që s’është dashur kurrë të ndodhnin në Kosovën e pasluftës, veprime që i shkaktuan dëm të madh çështjes së saj. Por, a kanë fuqi ta thonë këtë? Jo, sepse pushteti është i ëmbël. Ai nuk të lë ta pranosh të vërtetën. Jo, se burgu është i vështirë. Jo, se apriori do të thoshte t’i humbnin edhe zgjedhjet e tjera. Jo, se më askush nuk do të mund të manipulonte me askë. Jo! Jo! Jo... Ka shumë jo-ja pse s’pranohet prej tyre se kush vërtet është fajtori për devalvimin e vlerave të luftës. E, si do të ruheshin këto vlera. Së pari, kur u formuan “partitë e dala” nga lufta, duhej t’ia pranonin LDK-së meritën kombëtare, për të qenë vetë të respektuara nga populli. Së dyti, meqë veg i kishin krijuar shërbimet sekrete, ato është dashur t’i urdhërojnë të përcjellin çështje të tjera në Kosovë, e jo që t’i vënë në shënjestër atdhetarët për t’u likuiduar, si edhe ndodhi.

Pastaj, të mos e kuptonin politikën si lojë të ashpër, por t’i respektonin rregullat e paszgjedhjeve: ta respektonin fitoren e LDK-së dhe t’i bëheshin krah në angazhimin e saj për çështjen madhore-për pavarësinë e Kosovës. Tjetër. Të mos hapnin propagandë se LDK-ja dhe dr. Rugova kanë për qëllim ta shpien Kosovën në Serbi, sepse kjo jo vetëm që s’ka hije si parti, por edhe s’pi ujë në popull, me çka e kanë devalvuar veten para secilave zgjedhje. Etj. Etj. Nuk do të devalvoheshin vlerat e luftës sikur të mos manipuloheshin protestuesit që të kërkonin lirimin e ushtarakëve, për të cilët dihet se janë të implikuar në gjëra shumë të pahijshme , po edhe në krime, sepse duhet ta dinë se çdokush që e bën një vepër të ligë duhet të burgoset.

As po të mos manipuloheshin që të bërtasin slogane kundër UNMIK-ut. As! As! Nuk do të devalvoheshin vlerat e luftës as sikur ish-ushtarakët që arrestohen e lirohen, por edhe ata që janë duke e vuajtur dënimin, ta pranonin se kanë gabuar që i kanë bërë veprimet e liga, sepse, në radhë të parë, atyre u ka takuar t’i ruajnë këto vlera, me sjelljet e veta të mira, me të cilat do ta kishin ruajtur gjithmonë autoritetin që e kishin në popull. Pra, vetëm kështu nuk do të ishin devalvuar vlerat e luftës. E këto vërtet janë devalvuar. Për këtë jemi të vetëdijshëm të gjithë. Po jo nga LDK-ja, as nga populli. Janë devalvuar nga vetë ata që thirren si mbrojtës të tyre! .

Këtu qëndron dhimbja jonë që sëmbon shpirtin e popullit. Dhimbja që duhet të shuhet çdo ditë me sjellje të matura të partive “të dala nga lufta”, me sjellje të mira të ushtarakëve të ish- UÇK-së, me mosmanipulimin e protestuesve etj. Ky edhe është obligim i këtyre partive, i ish-ushtarakkve të UÇK-së, edhe i protestuesve të manipuluar për të pasur një Kosovë të pavarur dhe demokratike, ku liria e ka kuptimin e vërtetë. Në një liri të këtillë, vlerave të luftës u rikthehet dinjiteti, që e meritojnë.