|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | NJOFTIME |  

Mirë se vjen K.F. Prishtina

ZVICËR - TURNIR NDËRKOMBËTAR I FUTBOLLIT NË MONTE (MONTHEY - VS)

18 maj 2004 / TN    Sefedin KRASNIQI / Monte (Monthey) - ZVICËR   Nën patronatin e FIFA-s në qytetin Monte (Monthey) të Zvicrës, prej datës 26 deri më 30 maj 2004, mbahet Turniri Ndërkombëtar i Futbollit i njohur me shkurtesën (TIFM).    Ky turnir, tashmë tradicional, i 34-ti  me radhë, njihet si turniri më i mirë ndërkombëtar në Evropë, ku Shpresat e ardhshme të futbollit të ekipeve të mëdha (pra futbollistët e rinj nën moshën 20 vjeçare) kanë rastin të takohen dhe afirmohen.

 

Kështu iu ka ndodhur, në këtë turnir tradicional, edhe të rinjve : Thierry Henry, Paolo Maldini, Mathias Sammer, David Trezeguet, Gianluca Vialli si dhe shumë juniorëve të ligave të para kombëtare  të vendeve të ndryshme.

 

Për Kosovën, e në veçanti për shqiptarët që punojnë dhe jetojnë në Zvicër, është knaqësi dhe e rëndësishme që sivjet në TIF në Monte (Monthey) merrë pjesë edhe Klubi futbollistik Prishtina.

 

Pjesëmarrja në këtë ngjarje sportive kaq me rëndësi është nder dhe përgjegjësi për K. F. Prishtina, sepse në këtë turnir kanë marrë pjesë vite me radhë ekipet më të njohura të futbollit botëror si: Real Madridi, Hajduku i Splitit, NK Dinama e Zagrebit, Porto e Portugalisë, Olympique Mareseille, Barcelona, Boca Juniors e Argjentinës-fituesja e TIFM për vitin 2003, etj. Veç kësaj, futbollistët e K. F. Prishtina, kanë rastin t’i kënaqin adhuruesit e shumtë të futbollit nga Kosova që jetojnë dhe punojnë në Monte (Monthey) me rrethinë.

  

Ata kanë edhe një detyrë shumë me përgjegjësi, që me fer-play të lënë përshtypje sa më të mirë te organizatori i TIFM dhe shikuesit për të siguruar pjesëmarrjen në të ardhmen. Në fund të garave zgjidhet ekipi më i diciplinuar (fer-play).

 

Meritat më të mëdha dhe të veçanta për këtë pjesëmarrje të K. F. Prishtina në këtë turnir i takojnë futbollistit të dikurshëm të Istokut,  Buduqnostit dhe Besës së Pejës - Ramush Gashit, i cili tash është trener i ekipit të juniorëve të Montesë (Monthey).

 

 

Është e vërtetë që në TIFM kanë marrë dhe marrin pjesë ekipe të futbollit dhe futbollistë që kanë lënë gjurmë në planetin tonë, por edhe K. F. Prishtina ka dhënë futbollistë  ndërkombëtar dhe ka pasur “Epokën e artë” të saj. Për lexuesit po japim një historik të shkurtër.

 

K. F. Prishtina, i themeluar në vitin 1922,  padyshim, është klubi më i famshëm i të gjitha kohërave në historinë  e futbillit të Kosovës.  Në vitin 1983, K. F. Prishtina i bashkangjitet « Elitës » së futbollit – Ligës së Parë të ish-Jugosllavisë duke u shkëputur nga Liga e Dytë ku kishte luajtur prej vitit 1970.

 

Në vitin 1984,  Prishtina fiton  midis Beogradit kundër Cërvena Zvezdës me rezulatat 3:1, kur Zvezda bënte gara për dy tituj: për kupën e Jugosllavisë dhe kupën e kampionëve të Evropës. Fitoret në vazhdim i kishin mundësuar  K. F. Prishtiina të marrë pjesë në  kupën e Evropës së Mesme (1985).

 

Në këtë periudhë kohore, që njihet si « Epoka e artë » e këtij klubi,  në K. F. Prishtina do të farkohen ndërkombëtarët : Fadil Vokrri, Edmond Rugova, Agim Cana (babai i Lorik Canës, i cili sot është shtylla kryesore në Paris St. German), Fadil Muriçi si dhe kapiteni i famshëm Ramadan Cimili etj. Me këtë rast u bëjmë nderime edhe futbollistëve të ndjerë, Favzi Ramës dhe  Domit, që aq shumë kontribuan për K. F. Prishtina dhe futbollin kosovar.   

 

 

Lufta çlirimtare (1998/99) K. F. Prishtina e gjeti me të njëjtat plagë që kishte pësuar edhe tërë Kosova dhe populli i saj. Lojtarët kishin pasur të njetin fat  sikur bashkëkombasit e tyre dhe tifozët (plisat) : dikush në luftë, dikush i deportuar, por ndonjëri kishte qëndruar në Prishtinë. Pas luftës K. F. Prishtina u konsolidua shpejt dhe fitoi radhaz disa herë titullin e kampionit të Kosovës.  Prishtina është edhe kampion i Kosovës për vitin futbollistik 2002/2003.

 

 

Pas shërimit të plagëve të luftës pjesëmarrja  në turneun e 34-të në TIFM (Turniri Ndërkombëtar i Futbollit  në Monte (Monthey), për K. F. Prishtina është një dhuratë e këndshme  që ia dhuruan përgjegjësit e futbollit në Monte (Monthey), e cila duhet t’i  sherbej këtij klubi si një nismë për një ringjallje ndërkombëtare. Kjo ngjarje është një befasi e mrekullueshme  për adhuruesit e shumtë të K. F. Prishtina.

 

Prishtina ndeshjen  e parë në TIFM e luan, më 26 maj 2004, kundër Valencisë në Shali Montrë (Chally Montreux),  i cili gjindet buzë liqenit Leman, dhe është njëri ndër qytetet më të bukura të Zvicrës. Me fat Prishtinë !

 

   

   

Pjesëmarrësit tjerë të TIFM 2004  janë :

 

Grupi A :                                     Grupi B :

 

1. UC Sampdoria (IT)                     1. Boca juniors (ARG)

2. Birmingham City (GB)                2. Velencia (ESP)

3. O. Marseille (FR)                       3. Prishtina (KOSOVË)

4. Monthye Chablais (CH)              4. Sion (CH)

Për më shumë informata - lexoni Faqen zyrtare