Përmbajtja:

• Presidenti Rugova vizitoi komunën e Ferizajt

• Holkeri dhe Rexhepi kanë biseduar për implementimin e standardeve dhe procesin e privatizimit

• Përfaqësuesit e Grupit Përkrahës për Kosovën u takuan me përfaqësues institucionalë e politikë

• Presidenti Rugova priti ministren e Shëndetësisë

• Ministrat e jashtëm të BE-së aprovuan konkluzionet lidhur me zhvillimet në Ballkan

• Holkeri ka deklaruar se status quoja është armiku kryesor i Kosovës

• Grupi Përkrahës për Kosovën takohet sot në Prishtinë

• Kolë Berisha dhe Fatmir Sejdiu biseduan me udhëheqjen komunale të Mitrovicës

• Në Prishtinë u mbajt një tribunë për Ukshin Hotin

• Afër Kërçovës janë gjetur katër trupa të shqiptarëve të vrarë gjatë konfliktit më 2001

• Në Athinë filluan hetimet për rrjetin ndërkombëtar të trafikut të fëmijëve shqiptarë

• Konrad thotë se nuk ka të dhëna të mjaftueshme për të pohuar apo mohuar trafikun e fëmijëve

• Korrupsioni dhe shteti i dobët ligjor pengesat kryesore në Shqipëri

• Në luftimet në Irak janë vrarë të pakten 8 irakianë

• Kryengritësit çeçenë kanë vrarë të paktën 12 ushtarë rusë

• Në një burg të Hondurasit kanë humbur jetën të pakten 103 njerëz

• Bush thotë se vrasja e Izedin Salimit akt brutal i terrorizmit

• Të paktën 12 palestinezë të vrarë nga raketat izraelite

• Në qytetin Rafah izraelitët kanë vrarë 15 palestinezë

• Një aeroplan i Azerbajxhanit është rrëzuar në veri të Kinës dhe kanë humbur jetën 7 pjesëtarët e ekipazhit

• Ushtarët amerikanë kanë gjetur në Bagdad një bombë që përmbante substancë nervore sarin

• Një terrorist, që kishte mbajtur peng vjet 32 evropianë në shkretëtirën e Saharës, është kapur në Çad

Presidenti Rugova vizitoi komunën e Ferizajt

 

Ferizaj, 18 maj 2004 - Presidenti i Kosovës Ibrahim Rugova, me bashkëpunëtorët e tij të ngushtë, vizitoi sot komunën e Ferizajt. Fillimisht Presidenti Rugova në praninë e shumë qytetarëve të kësaj ane, përuroi rrugën e re të asfaltuar të fshatit Prelez të Muhaxherëve. Duke folur në një ceremoni të përurimit të kësaj rruge, të financuar nga buxheti i komunës dhe nga qytetarët, Presidenti Rugova shprehu kënaqësinë për prosperitetit e përgjithshëm që po shënohet në vendin tonë, duke vlerësuar me këtë rast sidomos ndërtimin e infrastrukturës rrugore që është e rëndësishme për qytetarët dhe ekonominë e vendit.

 

"Është kënaqësi dhe shenjë e prosperitetet të përgjithshëm të Kosovës. Ndërtimi i infrastrukturës rrugore të vendit tonë është me rëndësi për jetën e njerëzve dhe për ekonominë tonë, për lidhjet e brendshme dhe të jashtme.

 

Ky është kontribut për ndërtimin e lirisë, pavarësisë të vendit tonë dhe për integrime evropiane", tha Presidenti Rugova, duke theksuar se për integrime evropian nevojiten edhe rrugë të mira. Duke cituar një fjalë të urtë popullore "kur hapim rrugë, punët i kemi më mirë", Presidenti tha se Kosovës nuk i duhen veprimet që mbyllin rrugët.

Presidenti Rugova tha se së shpejti do të fillojë ndërtimi i rrugës Prishtinë -Durrës.

 

Më pastaj Presidenti Rugova në qytetin e Ferizajt zbuloi edhe bustin e dëshmorit Ahmet Hoxha në oborrin e shkollës fillore, e cila mban emrin e këtij dëshmori. Në këtë solemnitet merrnin pjesë arsimtarë, nxënës, familjarë të dëshmorit dhe me mijëra qytetarë të Ferizajt. "Zbulimi i bustit të dëshmorit të Kosovës Ahmet Hoxha është një gjest yni i vogël për veprën e tij të madhe të tij dhe për jetën e tij të flijuar për lirinë e pavarësinë e vendit tonë të shtrenjtë.   Kjo është shenjë se populli dhe shteti i Kosovës nuk do t'i harrojnë bijtë e vet kurrë", tha Presidenti Rugova, duke zbuluar bustin e dëshmorit Ahmet Hoxha dhe duke përgëzuar për ditën e shkollës.

 

Presidenti Rugova zhvilloi edhe një takim me përfaqësuesit vendorë dhe ata ndërkombëtarë të komunës së Ferizajt, të KFOR-it, TMK-së dhe SHPK-së, në të cilin u njoh me situatën aktuale në komunë si dhe me punën dhe aktivitetet në zhvillimin e saj. Fillimisht në këtë takim foli kreu i komunës Adem Salihaj, i cili me shumë shënime paraqiti arritjet dhe perspektivën zhvillimore të komunës.

 

Presidenti Rugova duke folur në këtë takim vlerësoi pozitivisht angazhimet e pushtetit vendor, duke premtuar edhe ndihmën e institucioneve qendrore me fonde e forma të ndryshme në infrastrukturë dhe në projekte të tjera. "Ne gjithsesi do të ndihmojmë përmes organeve qendrore shtetërore, që të gjejnë mjete nga buxheti dhe forma të tjera që të ndihmojmë komunat në realizimin e projekteve, sidomos të infrastrukturës së rrugëve dhe projekteve të tjera me interes për qytetarët", tha Presidenti Rugova. Poashtu ai tha se pushtetit lokal duhet të ketë kompetneca më të mëdha për të qenë më efikas, duke shtuar se këto çështje do të diskutohen edhe me UNMIK-un. Me këtë rast Presidenti apeloi për mbrojtjen dhe përkrahjen e minoriteteve, por tha ai, edhe ato duhet të tregojnë vullnetin për t'u integruar në shoqërinë kosovare.

  

Ai vlerësoi hapat që ka marrë komuna e Ferizajt për rindërtimin e objekteve të shkatërruara gjatë ngjarjeve të masrit.

 
Poashtu Presidenti Rugova edhe me këtë rast theksoi se njohja formale e pavarësisë së Kosovës do të përshpejtonte shumë proceset që zhvillohen në Kosovë dhe do ta qetësonte këtë pjesë të Evropës Juglindore. Në këtë mënyrë të përmbushen më shpejt edhe standardet, tha Presidenti.

Pasdite Presidenti Rugova, i cili është edhe kryetar i LDK-së, do të marrë pjesë në solemnitetin e shënimit të 14-vjetorit të formimit të Degës së LDK-së në Ferizaj.

 

 

Holkeri dhe Rexhepi kanë biseduar për implementimin e standardeve dhe procesin e privatizimit

 

Prishtinë, 18 maj 2004 - Kryeadministratori i Kosovës Hari Holkeri, para shkuarjes së tij në Finlandë është takuar sot me kryeministrin Bajram Rexhepi. Çështje kryesore për të cilat është biseduar në këtë takim ka qenë hapja e katër zyrave të reja, procesi i privatizimit dhe ai i përmbushjes së standardeve.

Kryeministri Rexhepi bëri të ditur pas takimit se është arritur pajtimi që zyra për planifikim strategjik dhe implementim, ajo për integrime evropiane dhe për energjetikë e resure natyrore do të filllojnë nga puna në kuadër të qeverisë, ndërkohë që do të bëhet edhe zyrtarizimi i funksionimit të zyrës për siguri publike.

 

Funksionimi i këtyre zyrave do të mundësohet në bazë të një urdhërese administrative e cila pritet të nxirret nga UNMIK-u.

Poashtu Rexhepi tha se me Holkerin ka biseduar për çuarjen përpara të procesit të implementimit të standardeve, duke shtuar se deri në takimin e radhës së Grupit Përkrahëse për Kosovën duhet të shënohen rezultate konkrete në këtë proces.

"Duhet të shqyrtohet ideja që strukturat tona, ministria e shërbimeve publike, kryeministria, ekspertët nga UNMIK-u dhe ekspertë të jashtëm të fillojnë të bëjnë disa propozime për reformat në administratën lokale. Kjo është kompetncë jona dhe duhet të propozojmë një draft propozim", tha Rexhepi.

Ai tha se sa më shpejt duhet të debllokohet edhe procesi i privatizimit. "Ne mund të presim eventualisht deri në fund të muajit dhe duhet ta zgjedhim këtë problem", ishte kategerik Rexhepi, duke theksuar se nuk do të ketë kurrfarë justifikimi për vonesat e mëtejshme.

Kryeministri i Kosovës nuk deshi të komentojë spekulimet nëse kryeadministratori aktual mund të largohet nga posti i tij, por megjithatë ai tha se shkuarja e Holkerit do të shkaktonte pengesa në proceset politike në Kosovë.

 

 

Përfaqësuesit e Grupit Përkrahës për Kosovën u takuan me përfaqësues institucionalë e politikë

 

Prishtinë, 18 maj 2004 - Sot në Zyrën italiane në Prishtinë është mbajtur një takim i përfaqësuesve të SHBA-ve, BE-së dhe NATO-s, me përfaqësuesit e institucioneve vendore dhe subjekteve politike.

Përfaqësuesit ndërkombëtarë kërkuan nga lidershipi kosovar një angazhim më të madh në riparimin e dëmeve të shkaktuara gjatë trazirave të marsit.

Kryeministri Bajram Rexhepi tha se ky takim ishte një parapërgatitje për takimin e Grupit Përkrahës për Kosovën, i cili pritet të mbahet më 8 qershor.

Rexhepi tha se në këtë takim kishte njoftuar se ç'është bërë që nga takimi i fundit dhe shtoi se së bashku do të përgatitet një raport në mënyrë që përfaqësuesit e Grupit që do të vijnë më 8 qershor të njihen me rezultatet që janë arritur deri më tash dhe çka do të bëhet më tutje: për standardet, rindërtimine e objekteve të shkatërruara, dialogut të brendshëm etj.

Në këtë takim kanë marrë pjesë edhe liderët e PDK-së dhe AAK-së.

Gjatë ditës, anëtarët e Grupit Përkrahës do takohen edhe me përfaqësuesit e tjerë të institucioneve të Kosovës.

 

 

Presidenti Rugova priti ministren e Shëndetësisë

 

Prishtinë, 18 maj 2004 - Presidenti i Kosovës Ibrahim Rugova priti dje në një takim ministren e Shëndetësisë së Kosovës Resmije Mumxhi.

Ministrja e njohu Presidentin me gjendjen në shëndetësi, të arriturat dhe punën e deritashme në shëndetësi si dhe vështirësitë që e përcjellin këtë fushë të rëndësishme shoqërore.

Presidenti Rugova e përkrahu punën e deritashme e do ta përkrahë edhe në ardhmen Ministren dhe Ministrinë në avansimin e shërbimeve shëndetësore të Kosovës në të mirë të të gjithë qytetarëve të saj, thuhet në një njoftim të Minsitrisë së Shëndetësisë.

 

 

Ministrat e jashtëm të BE-së aprovuan konkluzionet lidhur me zhvillimet në Ballkan

 

Bruksel, 18 maj 2004 - Ministrat e jashtëm të BE-së në takimin e djeshëm në Bruksel aprovuan disa konkluzione të veçanta për Ballkanin.

Sa i përket Kosovës, opinionet dhe konkluzionet e BE-së nuk kanë ndryshuar pothuajse fare pas ngjarjeve të marsit. Nga udhëheqësit e Kosovës, si dhe nga UNMIK-u kërkohet që të punojnë më me përkushtim për krijimin e një Kosove demokratike dhe shumetnike, ku të gjithë të kenë mundësi të jetojnë të qetë dhe të sigurtë.

Këshilli i ministrave të BE-së edhe gjatë takimit të djeshëm ka diskutuar për dhunën e marsit dhe sërish u vlerësua se këto ngjarje janë kthim prapa për Kosovën.

 

Nga stabiliteti afatmesëm apo afatgjatë në Kosovë varet gjithashtu edhe zhvillimi ekonomik në vend, thanë 25 ministrat e jashtëm të BE-së. Për këtë arsye konsiderohet se politika e standardeve para statusit është e rëndësisë së veçantë dhe kërkohet sukses konkret në implementimin e këtyre standardeve.

Sipas një dokumenti të miratuar nga ana e shefave të diplomacive evropiane, institucioneve të Kosovës u sugjerohet që të shfrytëzojnë maksimalisht kompetencat që janë të transferuara në duart e tyre dhe që të marrin përsipër përgjegjegjësi më të madhe për reforma dhe për implementimin e standardeve.

Përfaqësuesi i lartë i BE-së për Politikë të Jashtme dhe Siguri, Havier Solana ka vlerësuar se situata në Kosovë u zhvillua dhe krahas saj duhet të zhvillohet këtu edhe misioni i UNMIK-ut. Varësisht nga ajo se si zhvillohet situata, duhet të përshtatet misioni i OKB-së në Kosovë, ka porositur Solana.

 

Ai ka nënvizuuar se për çfarëdo ndryshimi vendos Sekretari i Përgjithshëm i OKB-së. Ai gjithashtu theksoi se edhe BE është i gatshëm dhe është i interesuar që të marrë më shumë përgjegjësi në Kosovë, sepse siç tha Solana, "Kosova është në fqinjësinë tonë".

 

 

Holkeri ka deklaruar se status quoja është armiku kryesor i Kosovës

 

Prishtinë, 18 maj 2004 - Shefi i Misionit të UNMIK-ut, Hari Holkeri me të kthyer dje në Prishtinë nga Strasburgu, ku ishte i shtruar në spital, ka thënë se armiku i parë për Kosovën është status quoja.

 

"Ne kemi nevojë për progres, nëse nuk mund ta bëjmë këtë atëherë nuk do të zgjidhim asgjë në një afat të shkurtër apo të mesëm", ka thënë Holkeri. "Ndiehem shumë mirë, por dua të shohë mjekun tim personal. Me mjekët francezë nuk kam arritur të komunikoj si duhet, sepse nuk e flas mirë frengjishten".

Ndërkaq, zëdhënësja e UNMIK-ut Matilda Heneke tha se Holkeri sot do të udhëtojë për Helsinki për kontroll të mëtejshëm mjekësor.

Zëdhënësja tha se shefi i UNMIK-ut pritet të rikthehet në Kosovë përafërsisht pas dy javësh për të vazhduar mandatin e tij.

 

 

Grupi Përkrahës për Kosovën takohet sot në Prishtinë

 

Prishtinë, 18 maj 2004 - Grupi Përkrahës për Kosovën, i cili përbëhet nga Shtetet e Bashkuara të Ameikës, Bashkimi Evropian dhe NATO-ja prite të takohet sot në Prishtinë. Ky grup do të kërkojë nga institucionet e Kosovës dhe UNMIK-u të paraqesin raportet e tyre rreth masave të ndërmarra pas trazirave të marsit në Kosovë.

Zyrtarë të amdinistratës së UNMIK-ut kanë pohuar se misioni i OKB-së do të prezantohet në këtë takim nga zëvendëskryeadministratori i Kosovës, Çarlls Brajshou. Sipas këtyre zyrtarëve shefi i UNMIK-it, Hari Holkeri pavarësisht se është kthyer dje në Kosovë, ai me gjasë nuk do të marrë pjesë në takimin e sotëm të Grupit Përkrahës për Kosovën.

 

 

Kolë Berisha dhe Fatmir Sejdiu biseduan me udhëheqjen komunale të Mitrovicës

 

Mitrovicë, 18 maj 2004 - Nënkryetari i LDK-së, Kolë Berisha dhe Fatmir Sejdiu, anëtar i Kryesisë së Kuvendit të Kosovës, vizituan dje pasdite Kuvendin e Komunës së Mitrovicës ku biseduan me zëvendëskryetarin Mursel Ibrahimi dhe drejtorët e administratës komunale.

Z.Ibrahimi dhe bashkëpunëtorët e tij i kanë njoftuar z.Berisha dhe Sejdiu me gjendjen e përgjithshme në komunë dhe përpjekjet që po i bënë pushteti lokal për stbilizimin e plotë të gjendjes dhe zgjidhjen e problemeve të ndryshme në komunë.

Duke folur për situatën politike e të sigurisë, zëvendëskryetari Ibrahimi, ka thënë se, falë angazhimit të vetë qytetarëve në radhë të parë, por edhe të Kuvendit të Komunës, udhëheqëjes së saj, subjekteve politike dhe angazhimit të faktorëve ndërkombëtarë të pranishëm në komunë, ajo aktualisht është e qetë, pa ekscese e incidente dhe me tendencë të përmisimit të vazhdueshëm.

Ibrahimi ka thënë me këtë rast se komuna e Mitrovicës, aktualisht është një ndër komunat e vendit, ku janë grumbulluar më së shumti probeleme të natyrës së ndryshme, para së gjithash për shkak të ndarjes së qytetit, por edhe për shkak mosaktivizimit të kapaciteteve prodhuese industriale dhe mungesës së mjeteve materiale për invesstime në projektet zhvillimore.

Kolë Berisha dhe Fatmir Sejdiu kanë mbështetur këto përpjekje të pushtetit lokal, duke vlerësuar pozitivsht angazhimin dhe aktivitetet për tejkalimin e gjendjes dhe evitimin e pasojave të trazirave të mesmarsit.

Duke premtuar ndihmën e tyre për Mitrovicën, në të gjitha rastet ku u jipet mundësia, Berisha dhe Sejdiu kanë kërkuar nga udhëheqja komunale, që të gjitha forcat, kapacitet dhe energjitë pozitive t'i kanalizojnë në drejtim të zgjidhjes së problemeve ekzistenciale të qytetarëve, të infrastrukuturës nëpër mjedise, si dhe të problemeve të tjera që i preokupojnë qytetarët.

 

 

Në Prishtinë u mbajt një tribunë për Ukshin Hotin

 

Prishtinë, 18 maj 2004 - Të organizuar nga të rinjtë e UNIKOMB-it në Prishtinë u mbajt një tribunë për jetën dhe veprën e intelektualit të shquar shqiptar Ukshin Hoti. Tribuna e titulluar:

 

"Atëherë kur iu duhem shqiptarëve, më kërkoni", kishte për qëllim sensibilizimin e opinionit kombëtar dhe ndërkombëtar për ndriçimin e fatit të Ukshin Hotit, i cili pas përfundimit të burgut serb prej pesë vjetësh është dashur të lirohej më 17 maj të vitit 1999, por regjimi serb ende nuk e qartëson fatin e tij.

 

 

Afër Kërçovës janë gjetur katër trupa të shqiptarëve të vrarë gjatë konfliktit më 2001

 

Kërçovë, 18 maj 2004 - Autoritetet maqedonase kanë konfirmuar se në një mal afër Kërçovës janë gjetur katër trupa, për të cilët besohet se janë të shqiptarëve të zhdukur gjatë konfliktit në vitin 2001. Obduksioni duhet të tregojë identitetin e tyre.

 

Terrenin ku janë zbuluar këto trupa po e ruan policia, kurse gjatë nxjerrjes së trupave ka marrë pjesë gjykatësi hetues, si dhe përfaqësuesit e misionit të BE-së, Proksima.

 

Ekshumimi ka filluar pas marrjes së një letre anonime në polici, në të cilën përshkruhet vendi ku ishin lënë trupat. Gropa është e thellë 55 metra dhe e gjerë katër metra dhe deri më tash është nxjerrë një trup dhe ekshumimi vazhdon edhe sot.

 

 

Në Athinë filluan hetimet për rrjetin ndërkombëtar të trafikut të fëmijëve shqiptarë

 

Athinë, 18 maj 2004 - Në Athinë filluan hetimet fillestare lidhur me trafikun e mundshëm me organet e fëmijëve ndërmjet Greqisë dhe Shqipërisë. Prokurori i hetimeve, Kosta Samaras, javën e kaluar në një klinikë private në Athinë ka konfiskuar dokumentat e një mjeku, por ato nuk dëshmojnë përzierjen e tij në këtë rrjet të trafikut ndërkombëtar të fëmijëve shqiptarë. Prokurori Samaras pritet që javën e ardhshme ta marrë raportin e plotë nga Ambasada greke në Tiranë.

 

Konrad thotë se nuk ka të dhëna të mjaftueshme për të pohuar apo mohuar trafikun e fëmijëve

 

Vjenë, 18 maj 2004 - Zyrtarje e lartë e OSBE-së me seli në Vjenë, Helga Konrad, ka thënë se nuk ka të dhëna të mjaftueshme për të pohuar apo mohuar trafikun e fëmijëve me qëllim transolatim organesh. Ajo ka shtuar se ky është një trafik që ende nuk dihet sa duhet dhe duhet të shtohen hetimet për të zbuluar informata më konkrete.

"Ne nuk kemi të dhëna rreth trafikut të organeve. Duhet të bëjmë hetime të mëtejshme për këtë trafik se si funksionon jo vetëm me fëmijë, por edhe me të rritur, të cilët shpesh i shesin organet për qëllime financiare për të mbijetuar", thotë zonja Konrad.

Ajo i bëri këto komente në një intervistë për "Zërin e Amerikës", duke i bërë thirrje Qeverisë shqiptare të jetë më e qartë në luftën kundër trafikut.

 

 

Korrupsioni dhe shteti i dobët ligjor pengesat kryesore në Shqipëri

 

Uashington, 18 maj 2004 - Në raportin e Departamentit amerikan të Shtetit, të titulluar Mbështetja për të Drejtat e Njeriut dhe Demokracinë, thuhet se gjendja vazhdon të jetë më pak se ideale në Ballkan dhe Turqi.

Në raport thuhet se gjendja në Shqipëri vazhdon të jetë e rëndë në disa fusha, ku korrupsioni dhe shteti i dobët ligjor mbeten pengesat kryesore në përpjekjet për përmirësimin e të drejtave të njeriut. Përsa u përket zhvillimeve pozitive në Shqipëri, raporti thekson se zgjedhjet vendore të vitit të kaluar u vlerësuan si më të drejtat dhe më transparentet në historinë e saj demokratike.

Në Bosnje Hercegovinë, theksohet në raport, brutaliteti policor, kërcënimet politike, diskriminimi fetar dhe trafiku me qenie nnjerëzore vazhdojnë, megjithë përmirësimet që nga nënshkrimi i marrëveshjes së paqes për Bosnjën në vitin 1995.

Në raport thuhet se gjendja në Maqedoni është përmirësuar. Numri i abuzimeve nga qeveria ka rënë dhe veprimet shtetërore për të luftuar trafikun me qenie njerëzore janë shtuar. Por, Departamenti i Shtetit thotë se korrupsioni në sistemin gjyqësor vazhdon të jetë problem.

 

 

Në luftimet në Irak janë vrarë të pakten 8 irakianë

 

Qerbela, 18 maj 2004 - Forcat amerikane dhe ato kryengritëse të klerikut shit Moktada al-Sadër kanë zhvilluar luftime sot (e martë) në qytetin e shenjtë Qerbela, ku janë vrarë të pakten 8 irakianë dhe janë plagosur 13 të tjerë, kanë bërë të ditur dëshmitarët, njofton Rojter.

 

Derisa po zhvilloheshin luftimet, në rrugët e qytetit ishin dhjetëra mijëra haxhilerë muslimanë nga Irani dhe bota tjetër islame. Në të njëjtin njoftim thuhet se një zyrtar ushtarak amerikan ka thënë dje se forcat amerikane kanë vrarë 51 guerilë në jug të vendit.

 

 

Kryengritësit çeçenë kanë vrarë të paktën 12 ushtarë rusë

 

Moskë, 18 maj 2004 - Kryengritësit seperatistë çeçenë kanë vrarë të pakten 12 ushtarë ruse në dy prita të veçanta, ka bërë të ditur një zyrtar ushtarak rus, njofton BBCnews. Xhipi i Ministrisë ruse të Punëve të Brendshme ka rënë në një minë tokësore afër qendrës së qytetit Urus-Martan.

 

 

Në një burg të Hondurasit kanë humbur jetën të pakten 103 njerëz

 

San Pedro Sula, Honduras, 18 maj 2004 - Nga flaka e zjarrit, që shpërtheu dje në agim në në një burg të Hondurasit kanë humbur jetën të pakten 103 njerëz, kurse 27 te tjerë janë lënduar, kanë bërë të ditur autoritetet, njofton Rojter.

 

 

Bush thotë se vrasja e Izedin Salimit akt brutal i terrorizmit

 

Uashington, 18 maj 2004 - Autoritetet amerikane në Irak thonë se shpërthimi vetëvrasës me makinë bombë në Bagdad, që la të vrarë kryetarin e Këshillit Qeverisës Irakian të caktuar nga Shtetet e Bashkuara, mban të gjitha shenjat klasike të sulmeve të organizuara nga ekstremisti Abu Musab al-Zarqawi, i cili ka lidhje me al-Kaidën.

Izadin Salimi dhe 6 persona të tjerë u vranë në sulmin vetëvrasës tek një postbllok në Bagdad. Një grup i panjohur ka marrë përgjegjësinë për sulmin. Hetuesit amerikanë po përpiqen të përcaktojnë nëse grupi është si maskë për përkrahësit e al-Zarkawit.

Presdienti Bush e dënoi vrasjen duke e cilësuar atë si akt brutal të terrorizmit, por theksoi se kjo nuk do të shtyjë kalimin e planifikuar të sovranitetit në duart e irakianëve më 30 qershor.

 

 

Të paktën 12 palestinezë të vrarë nga raketat izraelite

 

Rafah, 18 maj 2004 - Dëshmitarë palestinezë thonë se të paktën 7 veta humbën jetën dhe mbi dhjetë të tjerë u plagosën kur raketat izraelite goditën të martën në mëngjes kampin Rafah të refugjatëve në Rripin e Gazës.

 

Ata thonë se mes të vrarëve ishin të paktën tre palestinezë të armatosur.

Sulmi i parë u krye pak pas mesnate, kur një helikopter luftarak hapi zjarr kundër një grupi ekstremistësh palestinezë që ishi fshehur pas një muri në kamp.

Pak orë më pas, helikopterët hapën zjarr përsëri ndërkohë që trupat tokësore të mbështetura nga tanke dhe buldozerë hynë në lagjen Tel al-Sulltan në perfieri të kampit të refugjatëve.

Sipas palestinezëve, sulmi i dytë u krye pranë një xhamie, kur besimtarët ishin mbledhur për lutjet e mëngjesit.

 

 

Në qytetin Rafah izraelitët kanë vrarë 15 palestinezë

 

Qyteti i Gazës, 18 maj 2004 - Rreth 100 tanke dhe buldozerë izraelitë sot herët në mëngjes kanë hyrë në kampin e refugjatëve afër kufirit Gaza-Egjipt, të shoqëruar nga sulmet me raketa të helikopterëve izraelitë Apaç, duke vrarë 15 palestinezë, njoftojnë burimet palestineze dhe spitalore, bën të ditur CNN.

Në këtë sulm janë plagosur 33 të tjerë, 8 prej tyre seriozisht.

Sulmi i fundit me raketa ka ndodhur sot herët në mëngjes në lokalitetin Tal Sulltan afër qytetit Rafah.

 

 

Një aeroplan i Azerbajxhanit është rrëzuar në veri të Kinës dhe kanë humbur jetën 7 pjesëtarët e ekipazhit

 

Peking, 18 maj 2004 - Një aeroplan transportues i Azerbajxhanit është rrëzuar sot (e martë) në rajonin Ksinjiang në veri të Kinës, ku kanë humbur jetën 7 pjesëtarët e ekuipazhit, njofton AFP. Aeroplani është përplasur 10 km larg nga aeroporti dhe vetëm 2 minuta pasi është nisur prej tij. Shkaku i rrëzimit ende nuk dihet.

 

Dëshmitarët kanë thënë se kanë dëgjuar një mori shpërthimesh dhe kanë parë tym të dendur që fill pas aksidentit ka mbuluar qiellin.

 

 

Ushtarët amerikanë kanë gjetur në Bagdad një bombë që përmbante substancë nervore sarin

 

Bagdad, 18 maj 2004 - Ushtarët amerikanë kanë gjetur dje skaj rrugës në Bagdad një bombë, që përmbante substancë nervore sarin, njofton AP. Mjeti, pjesërisht i shpërthyer, me siguri ka mbetur nga arsenali i Sadam Hyseinit.

 

Nuk është e qartë nëse gjenden në duart e kryengritësve më shumë armë të tilla. Ushtarët, që e kanë zhvendosur bombën kanë ndier ekspozimin e nivelit të ulët të substancës nervore.

 

Asnjëri syresh nuk ka pësuar lëndime, kanë thënë zyrtarët amerikanë. Zbulimi i këtij mjeti është prova e parë për armët e ndaluara, që kur ka filluar lufta në Irak. Administrata e Bushit e ka bazuar shkasin për luftë në ekzistencën e armëve të tilla.

 

 

Një terrorist, që kishte mbajtur peng vjet 32 evropianë në shkretëtirën e Saharës, është kapur në Çad

 

Berlin, 18 maj 2004 - Një terrorist, që kishte mbajtur peng vjet 32 evropianë në shkretëtirën e Saharës, është kapur në Çad, ka bërë të ditur sot (e martë) zyra e prokurorit federal gjerman, njofton CNN.

 

Amari Saifi, që është i njohur si Abdrrezak al-Para, është dërguar së bashku me një person tjetër në burg në Çad, thotë ky burim. Informacione të tjera më të hollësishme nuk janë dhënë. Pengjet janë rrëmbyer në mars të vitit 2003 dhe janë mbajtur prej tre deri në gjashtë muaj.

 

Ata janë zënë në incidente të veçanta duke udhëtuar për Algjeri. Komandosët alegjerianë kanë liruar 17 pengje në maj 2003 dhe kishin vrarë tre pengje. Ndërkaq, për 14 pengje të liruara më vonë, Gjermania kishte paguar 6 milionë dollarë.

| KULTURË | HISTORI | POLITIKË | OPINIONE | ADRESARI | ARKIVI | NJOFTIME |