Përmbajtja:

• Daci priti përfaqësuesit e Shoqatës me Distrofi Muskulare

• Ulqini promovoi sot në Prishtinë ofertën turistike për këtë vit

• Në Pozharan mbrëmë është vrarë një burrë 42-vjeçar

• Melihate Tërmkolli rizgjedhet kryetare e Forumit të Gruas së LDK-së

• Brengos numri i shkurorëzimeve në Kosovë, u tha në një tribunë të hapur në Prishtinë

• Familjet e ushtarëve amerikanë që shërbejnë në Kosovë mbledhin ndihma për fëmijët kosovarë

• Kryeparlamentari Daci tha se ka marrë përkrahje të fuqishme nga Tirana zyrtare për proceset në Kosovë

• ECIKS nënshkruan marrëveshje me OEK dhe Riinvest

• Në Romë të Italisë filloi punimet Konferenca Ndërkombëtare për të Rinjtë

• Në strehën kolektive në Klinë vazhdojnë të jetojnë 40 familje me mbi 170 anëtarë

• Ministrat e jashtëm të BE-së diskutojnë sot në Bruksel edhe për situatën në Kosovë

• Në Gjakovë të shtunën u mbajt Mitingu tradicional i poezisë

• Katër të rinj nga një fshat i Kukësit kanë gjetur vdekjen nga shpërthimi i një mine në kufiri me Maqedoninë

• Policia e Gjirokastrës kapi dy punonjës policie me 150 kilogram marihuanë

• Themelohet Këshilli Koncesual politik i shqiptarëve të Luginës së Preshevës

• Tri shpërthime në Turqi vetëm disa orë para vizitës së Blerit në Ankara

• Forcat izraelite kanë vrarë 6 palestinezë në incidente të veçanta

• Helikopterë izraelitë goditën zyrën e lëvizjes Fatah në qytetin e Gazës

• Pauell u bëri thirrje palestinezëve të marrin nën kontroll territoret që do t'u kthehen nga Izraeli

• Administrata amerikane mbron politikat e saj në Irak

• Papa shpall gjashtë shenjtorë të rinj katolikë

• Seancë për AIDS-in në Gjenevë

• SHBA ridislokon trupat në Korenë e Jugut

• Nga shpërthimi i një makine-bombë, nëntë të vrarë në Bagdad

• Tanket dhe ekskavatorët izraelitë kanë depërtuar në jug të Rripit të Gazës

• Janë arrestuar rreth 50 pjesëtarë të lëvizjes opozitare Vëllazëria Muslimane

• Shpërthimi i flakës në një burg në Honduras ka shkaktuar vdekjen e 90 njerëzve

Daci priti përfaqësuesit e Shoqatës me Distrofi Muskulare

 

Prishtinë, 17 maj 2004 - Kryeparlamentari Nexhat Daci priti sot përfaqësuesit e Shoqatës me Distrofi Muskulare dhe me aftësi të kufizuara.

Kryetari i kësaj shoqate Agim Vatovci e ka njoftuar zotin Daci me aktivitetet dhe planet e saj si dhe me suksesin që kanë arritur që brenda një viti e gjysmë të funksionimit të kësaj shoqate të anëtarësohen në Aleacën Evropiane, si dhe të asaj botërore, të personave me distrofi muskulare.

Kryeparlamentari Daci u ka premtuar atyre interesimin dhe përkujdesjen më të madhe të institucioneve për këtë kategori të shoqërisë kosovare.

      

  

Ulqini promovoi sot në Prishtinë ofertën turistike për këtë vit

 

Prishtinë, 17 maj 2004 - Dy ministrat e qeverisë së Malit të Zi dhe përfaqësues të pushtetit lokalë të Ulqinit promovuan sot në Prishtinë ofertën turistike "Ulqini 2004" për sezonin e ardhshëm veror.

Kryetari i komunës së Ulqini Fuad Nimani tha se pushtetit vendor ka bërë të gjitha përgatitjet e duhura që sezoni truistik të jetë i suksesshëm. Do të jetë kjo një verë më e organizuar në çdo pikëpmaje, tha Nimani, duke shtuar se Ulqini ka një kapacitet prej 60 deri në 70 shtretërish në dy sektorët, ndërkaq çmimet për banim do të jenë shumë të volitshme dhe do të sillen prej prej 4 deri në 26 euro.

Ndërkaq ministri i turizmit të Malit të Zi Predrag Neneziq tha se në fushën e turizmit janë bërë hapa përpara. Ai tha se në Kosovë ka ardhur jo vetëm për të ftuar turistët, por edhe ata që janë të interesuar të investojnë kapitalin e tyre në Mal të Zi.

Nga ana e tij zv.ministri Punëve të Brendshme Miqo Orllandiq tha se ministria që ai drejton kujdeset për kufirin me Kosovën prej korrikut të vitit të kaluar dhe deri më tash nuk ka pasur asnjë incident. Ai premtoi se policia do t'i sigurojë turistët që do të vijnë nga Kosovë në Mal të Zi në çdo pikë të këtij vendi.

Ministri për Mbrojtjen e të Drejtave të Minoriteteve të Malit të Zi Gëzim Hajdinaga tha se gjatë tërë sezonit do të ketë një kujdes për turistët. Ai tha se kosovarët nuk kanë ardhur në Ulqin vetëm për turizëm, por edhe të ndihmojnë vëllezërit e tyre financiarisht për ngritjen e standardit të tyre jetësor.

Zyrtarët e Malit të Zi do të prezentojnë ofertën e tyre turistike dhe në disa komuna të tjera të Kosovës.

 

 

Në Pozharan mbrëmë është vrarë një burrë 42-vjeçar

 

Gjilan, 17 maj 2004 - Mbrëmë në fshatin Pozhoran të Gjilanit me armë zjarri është vrarë një burrë 42-vjeçar derisa po rrinte te një pompë e benzinës. Sipas mediave lokale, bëhet fjalë për Avni Musën, baba i shtatë fëmijëve nga Pozharani.

Policia vetëm ka konstatuar vrasjen e tij, duke mos dhënë detaje të tjera. Nuk dihen motivet e kësaj vrasjeje dhe nuk ka as të arrestuar.

 

 

Melihate Tërmkolli rizgjedhet kryetare e Forumit të Gruas së LDK-së

 

Prishtinë, 17 maj 2004 - Forumi i Gruas së LDK-së në Kuvendin e Katërt Zgjedhor, i cili i zhvilloi punimet të shtunën, pasi zgjodhi kryesinë e re prej 15 anëtareve, kryetare të kësaj organizate të grave rizgjodhi Melihate Tërmkollin.

 

Ndërkaq, Samije Zeqiraj dhe Gjylshene Berisha u zgjodhën nënkryetare dhe Naxhije Doçi, sekretare, të cilat edhe deri më tash kanë ushtruar këto funksione.

 

 

Brengos numri i shkurorëzimeve në Kosovë, u tha në një tribunë të hapur në Prishtinë

 

Prishtinë, 17 maj 2004 - Në një tribunë të mbajtur të shtunën në Prishtinë me temën "Familja e shëndoshë - themel i shoqërisë", të organizuar nga të rinjtë e LDK-së, Malsore Gashi, ka theksuar se në periudhën e pasluftës është rritur në mënyrë rapide numri i shkurorëzimeve në Kosovë.

 

Për çdo dy martesa ka një shkurorëzim dhe numri i kërkesave për shkurorëzim është në rritje e sipër, ka thënë ajo, duke theksuar se shkatërrimi i familjes do të thotë edhe shkatërrim i shoqërisë, meqenëse familja është bazë e shoqërisë.

Ndërkaq dy ligjërues në këtë tribunë, dr.Ismajl Hasani (sociolog) dhe Hysamedin Abazi (teolog) kanë paraqitur pikëpamjet sociologjike dhe teologjike rreth familjes dhe dukurive nëpër të cilat po kalon ajo sot në Kosovë.

Të pranishmit kanë parashtruar pyetje të shumta të cilave u janë përgjigjur dy ligjëruesit.

 

 

Familjet e ushtarëve amerikanë që shërbejnë në Kosovë mbledhin ndihma për fëmijët kosovarë

 

Le Mars, Ajova, 17 mars - Kontigjenti i trupave të batalionit 113 të kavalerisë nga Ajova, pjesëtarë të Gardës Kombëtare, aktualisht me shërbim në misionin paqeruajtës në Kosovë, u kanë bërë thirrje familjeve të tyre në shtetin federal Ajova dhe qytetarëve të tjerë amerikanë të mbledhin ndihma për nxënësit e shkollave të Kosovës.

Shoqata e përbërë nga pjesëtarë të familjeve të ushtarakëve në Kosovë, fton të gjithë qytetarët të dhurojnë diçka për fëmijët e shkollave të ndryshme në Kosovë.

Ushtarakët i kanë kërkuar shoqatës "Grupi i burimeve familjare", që të siugrojnë sa më shumë pajisje për ambiente rekreative për fëmijë, lodra, veshmbathje sportive e pajisje të tjera sportive, për të vegjëlit, të gjitha këto për fëmijët e Kosovës në zonën ku këta po ushtarë shërbejnë.

Fushata të "Ndihmojmë fëmijët e shkollave në Kosovë" i ka dyert e hapura për këtë fushat donacionesh deri më një qershor, ditë kjo që përkon me Ditën ndërkombëtare të fëmijëve në botë.

 

 

Kryeparlamentari Daci tha se ka marrë përkrahje të fuqishme nga Tirana zyrtare për proceset në Kosovë

 

Prishtinë, 17 maj 2004 - Kryetari i Kuvendit të Kosovës Nexhat Daci është kthyer dje në Kosovë pas një vizite disaditëshe në Shqipëri ku është takuar me krerët më të shtetit shqiptar.

Kryeparlamentari Daci tha se Kosova dhe Shqipëria po realizojnë një ngritje cilësore të bashkëpunimit në të gjitha nivelet. "Do të kemi përkrahje të fuqishme nga Tirana zyrtare në proceset e integrimit në Kosovë", ka deklaruar Daci pas kthimit në Prishtinë.

Ai shtoi se Shqipëria ka një qasje të mirë në rajon dhe kjo do t'u ndihmojë proceseve integruese të Kosovës.

 

Mirëpo në këtë aspekt. Njëherit ai ka kërkuar nga Tirana zyrtare që informacionet rreth prioriteteve të Kosovës t'i bazojë në qëndrimet e institucioneve të Kosovës dhe jo nga burimet tjera.

 

"Shpeshherë ka edhe informata jo shumë të bazuara dhe të vlefshme që shkojnë nga Kosova në Shqipëri", tha kryeparlamentari Daci.

Ndërkaq, sa i përket zhvillimit më të mirë ekonomik z. Daci përsëriti edhe njëherë se të dy vendet duhet të kenë një bashkëpunim më cilësor në këtë aspekt, sepse ndërmjet Kosovës dhe Shqipërisë nuk ka dallime konceptuale.

 

 

ECIKS nënshkruan marrëveshje me OEK dhe Riinvest

 

Prishtinë, 17 maj 2004 - Nisma Ekonomike për Kosovën - ECIKS, organizatë nga Vjena, gjatë javës së kaluar ka nënshkruar marrëveshje bashkëpunimi me Odën Ekonomike të Kosovës dhe Institutin Riinvest.

ECIKS që nga themelimi i saj në prill të vitit të kaluar është angazhuar vazhdimisht në përkrahjen e ekonomisë kosovare dhe në identifikimin e zhvillimin e projekteve për stimulimin e drejtëpërdrejtë të investimeve të huaja në Kosovë dhe përmirësimin e imazhit të ekonomisë kosovare në Evropën gjermanofolëse.

Marrëveshja e nënshkruar me Odën Ekonomike të Kosovës parasheh bashkëpunimin në promovimin e përbashkët dhe stimulimin e zhvillimit ekonomik të Kosovës. ECIKS dhe OEK do të bashkëpunojnë ngushtë së bashku në zhvillimin dhe implementimin e projekteve në favor të ekonomisë kosovare dhe stimulimit të investimeve të huaja në Kosovë.

Ndërkaq Memorandumi i mirëkuptimit i nënshkruar me ECIKS dhe institutit RIINVEST, parasheh koordinimin e veprimeve dhe shkëmbimin e informatave me qëllim të stimulimit të investimeve të huaja dhe përkrahjes së zhvillimit ekonomik të Kosovës.

Përkrahja e procesit të privatizimit përmes stimulimit të investimeve të huaja, pastaj stimulimi i investimeve te huaja direkte, informimi i drejtëpërdrejtë e aktiv i investitorëve të huaj, hulumtimet e projektet e perbashketa, janë disa nga fushat e identifikuara të bashkëpunimit.

 

 

Në Romë të Italisë filloi punimet Konferenca Ndërkombëtare për të Rinjtë

 

Romë, 17 maj 2004 - Në Romë të Italisë filloi punimet konferenca e tretë ndërkombëtare për të rinjtë e cila vazhdon deri më 18 maj. Me ftesë të prefektit të Romës, Valter Veltroni në këtë konferencë po merr pjesë edhe kryetari i Komunës së Prishtinës, Ismet Beqiri si dhe dy të rinj nga kryeqyteti.

 

 

Në strehën kolektive në Klinë vazhdojnë të jetojnë 40 familje me mbi 170 anëtarë

 

Klinë, 17 maj 2004 - Në Komunën e Klinës ende ka mbetur e pazgjidhur çështja e banimit për shumë familje, ndërkaq në qendrën e banimit kolektiv, në një objekt të vjetër të papërshtatshëm, në kushte të rënda për jetesë, vazhdojnë të banojnë 40 familje me mbi 170 anëtarë.

 

Zyrtarët komunalë në Klinë thonë se ende në këtë vit asnjë organizatë humanitare ndërkombëtare nuk ka shprehur gatishmërinë për ndërtimin e shtëpive të rrënuara. Andaj shpresë e vetme për këta të pastrehë mbetet ndërtimi i një objekti prej 22 banesash për banim social, ndërtimi i të cilit ende nuk ka filluar.

 

 

Ministrat e jashtëm të BE-së diskutojnë sot në Bruksel edhe për situatën në Kosovë

 

Bruksel, 17 maj 2004 - Ministrat e jashtëm të Bashkimit Evropian do të diskutojnë sot në Bruksel edhe për situatën në Kosovë. Mëherët ishte planifikuar për zhvillimet më të reja në Kosovë të flasë edhe shefi i UNMIK-ut Hari Holkeri, por për shkaqe shëndetësore ai nuk do të marrë pjesë në këtë takim.

Në prag të takimit të sotëm të ministrave të jashtëm në Bruksel theksohet se Bashkimi Evropian është i mendimit se në Kosovë duhet të përshpejtohet aktiviteti për implementimin e standardeve.

 

Politika standardet para statusit ka ende mbështetjen të plotë të BE-së, por tash diplomatët në këtë organizëm ndërkombëtarë kanë filluar të shprehin pakënaqësi në dinamikën e implementimit të tyre.

 

Zyrtarët e BE-së tërheqin vërejtjen se nuk ka mbetur edhe shumë kohë deri në mesin e viti 2005 kur duhet të bëhet evaluimi i asaj se sa janë përmbushur standardet për të filluar eventualisht edhe diskutimet për statusin e Kosovës.

 

 

Në Gjakovë të shtunën u mbajt Mitingu tradicional i poezisë

 

Gjakovë, 17 maj 2004 - Të shtunën në Gjakovë u mbajt Mitingu jubilar i poezisë, i dyzeti me radhë. Në këtë miting tradicional, në orët e paraditës u mbajt një tribunë letrare, me temën "Poezia shqipe në dhjetë vjetët e fundit", në të cilën me kumtesat e tyre u paraqitën Qerim Ujkani, Ymer Çiraku, Kastriot Gjeka dhe Sali Bytyçi.

Gjatë Mitingut poetët lexuan vargjete veta në Pallatin e Kulturës, në shkollën fillore të Bishtazhinit si dhe në Junik.

 

Në orën letrare në Junik, u promovua libri "Kuartet poetik", kurse kumtesa për këtë vëllim poetik të shkruar nga autorët Fred Kurer, Mustafë Xhemaili, Ivo Lederberger dhe Isuf Sherifi, paraqitën Abdullah Konushevci dhe Kadrush Radogoshi. Po ashtu, u promovua edhe libri i autores nga Shqipëria, Flutura Açka, me titull "Kurth i diellit". U promovua edhe libri i Engjëll I. Berishës, "Kujtesë e dehur".

Në mbrëmje, u mbajt Ora e madhe letrare, në të cilën fillimisht poeti Din Mehmeti foli për rrugëtimin e këtij mitingu 40-vjeçar.

Poezite veta i lexuan: Enver Gjergjeku, Blerim Valla, Flutura Açka, Sabri Hamiti, Naksut Shehu, Myrteza Nura, Xhevahire Izmaku, Arif Bozaxhi, Halil Haxhosaj, Agim Vinca, Shpend Gjocaj, Ledia Dushi, Halil Matoshi, Vjollca Dibra, Shaip Emërllahu, Ledri Kurti, Jonuz Fetahaj, Adriatike Lami, Aziz Mustafa, Zejnure Salihu, Avdullah Konushevc, Brikena Ceraja, Kadrush Radogoshi, Sadik Belko dhe Albert Shala.

Me këtë rast u dhanë edhe shpërblimet tradicionale. Kështu, Drejtoria për Kulturë dha disa mirënjohje për ata që bënë qe ky manifestim poetik të bëhet tradicional. Shpërblimi për poezinë më të mirë të botuar në revistën "Fjala" iu dha poetit Sabit Gecaj, për poezinë "Pastaj vjen njeriu".

Ndërkaq, juria profesionale shpërblimin për vëllimin poetik më të mirë të botuar në mes të dy mitingjeve ia dha poetit Sabri Hamiti, për vëllimin poetik "Simpathia, testamente për Urtakun". Shpërblimi i klubit letrar "Gjon Nikollë Kazazi" të Gjakovës iu dha poetit Murteza Nura për poezinë "Përvjetorët.

Në këtë miting 19 shkrimtarë u pranuan anëtarë të rinj në Lidhjen e Shkrimtarëve të Kosovës.

 

 

Katër të rinj nga një fshat i Kukësit kanë gjetur vdekjen nga shpërthimi i një mine në kufiri me Maqedoninë

 

Kukës, 17 maj 2004 - Katër të rinj, banorë të fshatit Caja në Kukës, tre prej tyre vëllezër të familjes Rrapi, kanë gjetur vdekjen nga shpërthimi i një mine në kufirin me Maqedoninë.

 

Sipas policisë tragjedia ka ndodhur kur këta të rinj të cilët ishin duke mbledhur bimë mjekuese ranë në një minë të mbetur nga konfliktet e fundit në këtë rajon. Ky incident i rëndë që është i pari në këtë sektor kufitar e çon në 31 numrin e të vdekurve nga minat dhe 130 numrin e të plagosurve në qarkun e Kukësit brenda pesë vjetëve.

 

 

Policia e Gjirokastrës kapi dy punonjës policie me 150 kilogram marihuanë

 

Gjirokastër, 17 maj 2004 - Policia e Gjirokastrës dhe Zyra e antitrafikut kanë kapur dy punonjës policie në afërsi të kufirit shqiptaro - grek që tentonin të kalonin për në Greqi rreth 150 kilogram marihuanë. Ndonëse aktualisht janë intensifikuar masat e sigurisë në sfondin e Lojrave olimpike në Athinë, rrjetet e trafikut të drogës, ku involvohen edhe policët nuk po ndalen.

 

 

Themelohet Këshilli Koncesual politik i shqiptarëve të Luginës së Preshevës

 

Preshevë, 17 maj 2004 - Themelohet Këshilli Koncesual politik i shqiptarëve të Luginës së Preshevës. Kjo u arrit pas pajtimit të tri subjekteve politike shqiptare në Kosovën Lindore për nënshkrimin e marrëveshjes për themelimin e këtij Këshilli.

Ky këshill do të shërbejë për arritjen e vendimeve të përbashkëta për çështje të ndryshme kontestuese, me të cilat do të përballet skena politike e Luginës së Preshevës.

 

Sipas deklaratave të subjekteve politike shqiptare, ndër prioritetet e vendimeve të Këshillit koncensual të subjekteve politime shqiptare të Luginës së Preshevës, është trasimi i rrugës për formimin e Këshillit nacional të shqiptarëve të këtij rajoni.

 

 

Tri shpërthime në Turqi vetëm disa orë para vizitës së Blerit në Ankara

 

Ankara, 17 maj 2004 - Vetëm disa orë para arritjes në Turqi të kryeministrit britanik, Toni Bler, pati shpërthime jashtë tre degëve të bankës britanike, HSBC në Ankara dhe Stamboll.

Njoftimet thonë se dëmet ishin të vogla, por nuk pati viktima.

Më shumë se 60 persona vdiqën nga shpërthimet e bombave në Stamboll në nëntor, dy prej bombave ishin vënë në objekte britanike.

Kryeministri britanik do të vizitojë Ankaranë sot për një takim me homologun turk, Rexhep Tajip Erdogan.
Oferta e Truqisë për anëtarësim në BE do të jetë lart në rendin e ditës së bisedimeve pasi BE më vonë, këtë vit do të vendosë nëse të fillojë negociata anëtarësie.

Britania përkrah kandidaturën e Turqisë duke thënë se ajo është partnere strategjike e rëndësishme në mes Evropës dhe Lindjes së Mesme.

 

 

Forcat izraelite kanë vrarë 6 palestinezë në incidente të veçanta

 

Gaza, 17 maj 2004 - Forcat izraelite kanë vrarë sot (e hënë) 6 qytetarë palestinezë në incidente të veçanta në pjesë të ndryshme të territoreve palestineze, njofton Presqendra ndërkombëtare palestineze.

Ndërkohë, aeroplanët izraelitë po sulmojnë shtëpitë palestineze në Gaza. I njëjti burim bën të ditur se forcat e shumta izraelite kanë hyrë dy kilometra brenda qytetit Raf dhe po vazhdojnë të rrënojnë shtëpitë palestineze.

 

 

Helikopterë izraelitë goditën zyrën e lëvizjes Fatah në qytetin e Gazës

 

Gaza, 17 maj 2004 - Helikopterë izraelitë goditën me 5 raketa zyrën në qytetin e Gazës të lëvizjes politike Fatah të presidentit palestinez, Jaser Arafat.

Dëshmitarët thanë se ndërtesa në lagjen Zeitoun ishte bosh në kohën e sulmit dhe si rezultat nuk pati viktima.

Sulmi me raketa u krye disa orë pasi Izraeli tha se do t'i intensifikojë operacionet ushtarake në Rripin e Gazës, përfshirë shkatërrimin e shtëpive dhe intensifikimin e sulmeve ajrore, në përpjekje për të përmirësuar sigurinë përgjatë kufirit Gaza-Egjipt.

 

 

Pauell u bëri thirrje palestinezëve të marrin nën kontroll territoret që do t'u kthehen nga Izraeli

 

Uashington, 17 maj 2004 - Sekretari amerikan i Shtetit Kolin Pauell tha se diskutoi rreth planit izraelit për tërheqjen e vend-banimeve në Gaza me kryeministrin palestinez, Ahmed Kureja të shtunën në Jordani. Duke folur në programin This Week të rrjetit televiziv amerikan ABC, sekretari Pauell tha se palestinezët duhet ta mirëpresin këtë hap dhe të përgatiten për të.

"Tani, ky është eliminimi aktual i vend-banimeve, diçka që njerzit kanë kërkuar për gjithë këto vite. Dua që palestinezët të bëhen gati për këtë transferim territori, të bëhen gati për të marrë përgjegjësitë për Gazën si dhe përgjegjësitë e sigurimit në Gaza dhe të bëhen gati për t'u angazhuar përsëri në bisedimet e paqes në mënyrë që të diskutojmë rreth çështjeve të statusit përfundimtar që janë aq të rëndësishme dhe që duhen zgjidhur nga të dyja palët".

 

 

Administrata amerikane mbron politikat e saj në Irak

 

Uashington, 17 maj 2004 - Administrata e presidentit Bush po mbron si brenda ashtu edhe jashtë vendit politikat e saj në Irak. Sekretari i Shtetit Kolin Pauell u vu në krye të këtyre përpjekjeve gjatë fundjavës, duke u këshilluar me udhëheqës arabë në Jordani dhe duke dhënë intervista për një numër rrjetesh televizive amerikane.

Dhuna në Irak dhe zbulimi i keqtrajtimit të të burgosurve irakianë nga ushtarët amerikanë ishin temat kryesore në intervista. Sekretari Pauell iu përgjigj pyetjes se sa kohë do të qëndronin trupat amerikane në Irak pas 30 qershorit kur qeveria e përkohshme do të marrë pushtetin. Ai i tha emisionit Fox News se mendon që forcat amerikane do të vazhdojnë të qëndrojnë për një farë kohe pas asaj date.

 

 

Papa shpall gjashtë shenjtorë të rinj katolikë

 

Vatikan, 17 maj 2004 - Gjatë një ceremonie në Sheshin Shën Pjetri të Vatikanit, Papa Gjon Pali i Dytë kanonizoi të dielën gjashtë shenjtorë të rinj katolikë.

Shenjtëria e tij ka kanonizuar më shumë se 480 shënjtorë gjatë papatit të tij 25 vjeçar, më shumë se të gjithë udhëheqësit shpirtërorë të Kishës Katiolile së bashku gjatë 500 viteve të fundit.

Mes shenjtorëve të rinjë janë mjekja italiane Giana Bereta Molla, e cila, duke sakrifikuar jetën për të shpëtuar foshnjën e saj të palindur, u bë simbol i lëvizjes kundër abortit.

Papa Gjon Pali i Dytë kanonizoi edhe dy priftërinj italianë, një murg spanjoll, një prift manorit libanez dhe një vejushë të pasur italiane, e cila ndihmoi fëmijët e braktisur.

 

 

Seancë për AIDS-in në Gjenevë

 

Gjenevë, 17 maj 2004 - Çështja e luftës kundër AIDs-it që tani shkakton vdekjen e tetë mijë vetëve në ditë në të gjithë botën, pritet të jetë në krye të rendit të ditës, ndërsa Asambleja e Shëndetit Botëror të OKB-së hap seancën pesëditore në Gjenevë.

OBSH-ja pritet të bëjë thirrje për burime shtesë nga vendet anëtare.

Në prag të takimit, SHBA kanë bërë të ditur plane për përshpejtimin e procedurave për aprovimin e medikamenteve anti-retrovirale të cilat mund të zgjasin jetën e pacientëve me HIV.

Duke folur në Gjenevë para asambelesë vjetore të OBSH, sekretari amerikan i shëndetësisë, Tommy Thomson tha se SHBA donte të siguronte se ata që vuajnë nga HIV/AIDS në gjithë botën, të kishin mundësi të gjenin kurim efektiv dhe të sigurtë.

Ai tha se procedura e re do të siguronte shpërndarje më të shpejtë të ilaçeve te ata që kishin nevojë.

 

 

SHBA ridislokon trupat në Korenë e Jugut

 

Seul, 17 maj 2004 - SHBA po planifikon të tërheqë trupat nga Korea e Jugut dhe t'i dërgojë ato në Irak.
Ministria e jashtme e Koresë së Jugut ka konfirmuar njoftimin e gazetës se SHBA kishte propozuar të ridislokonte trupat nga vendi për t'i dërguar ato në Irak.

Një zyrtar tha se diskutimet ishin ende në fazën fillestare dhe asnjë vendim nuk është marrë ende përsa i përket forcës.

Raporti origjinal thotë se Uashingtoni po planifikonte të dërgonte një brigadë të plotë luftimi, me rreth 4 mijë trupa.

Nëse kjo konfirmohet, atëherë vendimi i marrë do të dobësojë ndjeshëm forcën e Divizionit të dytë të këmbësorisë, forca kryesore luftuese që ka mbrojtur Korenë e Jugut për gjysëm shekulli.

 

 

Nga shpërthimi i një makine-bombë, nëntë të vrarë në Bagdad

 

Bagdad, 17 maj 2004 - Kreu i Këshillit qeveritar irakian, i formuar nga amerikanët, është vrarë sot (e hënë) nga një shpërthim i fuqishëm i një makine-bombë, si dhe tetë persona të tjerë afër selisë së koalicionit amerikan në Bagdad, njofton Rojter. Izedin Salim është vrarë derisa po priste të hynte në ndërtesën e selisë, ka bërë të ditur ndihmësministri i jashtëm i Irakut.

Ndërkaq, njoftohet se gjatë natës ka pasur luftime të freskëta në jug të Irakut ndërmjet forcave amerikane dhe italine, në njërën anë dhe milicisë shite, në anën tjetër.

 

 

Tanket dhe ekskavatorët izraelitë kanë depërtuar në jug të Rripit të Gazës

 

Gaza, 17 maj 2004 - Tanket dhe ekskavatorët izraelitë, të mbështetur nga helikopterët, kanë depërtuar sot (e hënë) në pjesën jugore të Rripit të Gazës, kanë bërë të ditur armata izraelite dhe dëshmitarët palestinezë, njofton BBCWorld.

 

Një tank ka hapur zjarr derisa autokolona po hynte në paralagjen e Rafahut, afër kufirit egjiptian. Radioja izraelite ka thënë se operacioni është ndërmarrë për të vënë nën rrethim qytetin.

 

 

Janë arrestuar rreth 50 pjesëtarë të lëvizjes opozitare Vëllazëria Muslimane

 

Kajro, 17 maj 2004 - Policia egjiptiane ka arrestuar rreth 50 pjesëtarë të lëvizjes opozitare, Vëllazëria Muslimane, e cila është e ndaluar, njofton BBCWorld. Operacioni i arrestimit është kryer sot heret në agim (e hënë) në pesë qytete, përfshirë edhe Kajron. Kjo organizatë ka thënë se ndër të arrestuar ka edhe doktorë, inxhinierë, nëpunës civilë dhe biznismenë.

 

Njoftohet se xhirollogaritë e tyre në banka janë ngrirë. Zyret dhe kompanitë e disa të arrestuarëve i ka mbylllur policia. Autoritetet egjiptiane rregullisht ndërmarrin aksione kundër kësaj organizate, ngase konsiderohert si lëvizja më e madhe opozitare.

 

 

Shpërthimi i flakës në një burg në Honduras ka shkaktuar vdekjen e 90 njerëzve

 

Tegucigalpa, Honduras, 17 maj 2004 - Një kontakt i shkurtër elektrik ka shkaktuar sot para agimit (e hënë) shpërthimin e flakës në një burg në veri të Hondurasit dhe për rrjedhojë kanë humbur jetën 90 njerëz dhe janë lënduar dhjetëra të tjerë, ka bërë të ditur ndihmësministri i brendshëm i këtij vendi, njofton AP.

 

Zjarri ka shpërthyer derisa të burgosurit ishin në gjumë. Burgu gjendet në qytetin San Pedro Sula, 110 km nga kryeqyteti Tegucigalpa.

| KULTURË | HISTORI | POLITIKË | OPINIONE | ADRESARI | ARKIVI | NJOFTIME |