Përmbajtja:

• Xhonson tha se Kosova në një të ardhme mund të shihet si anëtare e institucioneve të Aleancës veriatlantike

• Forumi i Gruas do të dëshmojë përkushtimin dhe forcën e LDK-së për Kosovën e pavarur e demokratike

• Mbrëmë tërmet në Gjilan me rrethinë

• KKSHA-ja nderon ish-sekretarin e Shtetit Xhems Bejker dhe biznismenët shqiptarë Ekrem Bardha dhe Peter Kole

• Komandanti i krahut jugor të NATO-s sot po qëndron në Kosovë

• Komandanti i KFOR-it dhe ministri i ushtrisë së Serbisë dhe Malit të Zi u takuan në pikën kufitare të Merdarit

• UNMIK-u nuk do të lejojë kandidatët presidencialë të Serbisë të mbajnë tubime në Kosovë

• Sot mbahet Kuvendi i Katërt Zgjedhor i Forumit të Gruas së LDK-së

• Komisioni për Buxhet nuk bëri ndarjen e mjeteve të suficitit për shkak të kërkesave të mëdha

• Muharrem Shabani përsëri kryetari i KK të Vushtrrisë

• Hari Kostov mandatar për formimin e qeverisë së re maqedonase

• Vujanoviq ka deklaruar se Mali i Zi preferon që sa më parë të ndahet nga Serbia

• Në Ulqin partnerët e koalicionit demokratik "Shqiptarët bashkë" janë marrë vesh për bashkëqeverisje në pushtetin lokal

• Ushtarët britanikë kanë vrarë 16 guerilë irakianë

• Editori i gazetës "Dejli Mirror" është përjashtuar nga puna për shkak të publikimit të fotografive të falsifikuara

• Një aeroplan me 33 udhëtarë është përplasur në xhunglën e Amazonit

• OKB ka dënuar vrasjet gjatë përleshjeve në protestat e opozitës në Bregun e Fildishtë

• Disa irakianë të vrarë në luftimet në qytetin e Naxhafit

• Ministrat e jashtëm të Grupit të Tetëshes diskutojnë për Irakun

• Franca është e gatshme të mbështesë rindërtimin e Irakut

• Kongresi vendos për Sonia Gandin

• Helikopterët izraelitë sulmuan Gaza

• Militantët irakianë kanë granatuar me mortaja selinë e administratës amerikane në Nasiria

• Një helikoper izraelit ka shtënë me raketa në shtëpinë e një lideri të Xhihadit Islamik

Xhonson tha se Kosova në një të ardhme mund të shihet si anëtare e institucioneve të Aleancës veriatlantike

 

Prishtinë, 15 maj 2004 - Komandanti i krahut jugor të NATO-s admirali Gregori Xhonson deklaroi sot në Prishtinë se Aleanca vetritalnatike do të garantojë qetësinë dhe sigurinë në Kosovë, siguri që nuk do të ndërtohet nëpërmjet armëve, por me vendosjen e rendit dhe me zbatimin e ligjit. Xhonson këto komente i bëri pas takimit me kryeministrin Bajram Rexhepi sot në Prishtinë ku ka takuar edhe komandantin e KFOR-it Holger Kamerhof, zv.kryeadministratorin Çarlls Brajshou etj.

 

Xhonson gjithashtu ka theksuar se Kosova në një të ardhme mund të shihet si anëtare e institucioneve të Aleancës veriatlantike. Por Kosova duhet të tregojë se është e përkushutuar në ngritjen e një shoqërie ku zbatimi i ligjit do të jetë i garantuar, mu sikur edhe funksionimi i institucioneve dhe i tolerancës ndërtenike, tha ai.

Xhonson tha se 19 mijë ushtarët e KFOR-it janë të përkushtuar të garantojnë qetësinë në Kosovë, duke bërë thirrje që të ndihmohen përjekjet e NATO-s për t'u arritur këto objektiva.

Nga ana e tij Bajram Rexhepi tha se e kishte njoftuar admiralin Xhonson me situatën në Kosovë dhe me hapat që po ndërmerren në normalizimin e gjendjes. Ai theksoi vendosjen e një dialogu të brendshëm ndëretnik në Kosovë.

 

 

Forumi i Gruas do të dëshmojë përkushtimin dhe forcën e LDK-së për Kosovën e pavarur e demokratike

 

Prishtinë, 15 maj 2004 - Në Prishtinë i filloi punimet Kuvendi i Katërt Zgjedhor i Forumit të Gruas së LDK-së, me pjesëmarrjen e delegateve nga të gjitha komunat e Kosovës dhe të mysafirëve.Në hapjen solemne mori pjesë edhe Presidenti i Kosovës dhe njëherit edhe kryetar i LDK-së, Dr.Ibrahim Rugova, i cili përshëndeti punimet e këtij kuvendi. Presidenti Rugova tha se mbajtja e Kuvendit të Forumit të Gruas është moment me rëndësi, sepse kjo është oganizata më masive e gruas në Kosovë, është pjesa më vitale dhe më e rëndësishme e LDK-së që nga themeli para 15 vjetësh.

 

FG ka treguar integrimin dhe konsolidimin e rolit të gruas në shtetin dhe në shoqërinë e vendit tonë. Presidenti me këtë rast theksoi se njohja formale e pavarësisë së Kosovës është një imperativ i kohës dhe të bëhet i Kosovës në BE, në NATO dhe në miqësi permanente me SHBA-të.

Duke i dëshiruar punë të mbarë kuvendit, Presidenti Rugova tha se ka besim në këtë kuvend dhe në strukturat që sot do të zgjedhen dhe beson se ato do të jenë të afta që ta udhëheqin FG.

Ndërkaq duke folur për zgjedhjet e ardhshme e përgjithshme, zoti Rugova tha se do të bëhen të gjitha përgatitjet për këto zgjedhje, duke shtuar se ato duhet të jenë të qeta e të lira, dhe në këtë drejtim do të angazhohe edhe UNIMIK-u, KFOR-i, SHPK, etj.

"Sot po rrumbullakësojmë një proces zgjedhor i cili është zhvilluar në mënyrë të shkëlqyeshme në të gjitha degët e Forumit të Gruas dhe mund të them se gjatë kësaj kohe Forumi i Gruas i LDK-së ka dëshmuar pjekuri të lartë politike e kombëtare dhe përgjegjshmëri për të ardhmen si dhe aftësi të larta organizative", tha në fillim të fjalës së saj Melihate Tërmkolli, kryetare e FG të LDK-së.

Ajo theksoi se edhe ky Kuvend është në funksion të forcimit të mëtutjeshëm të Forumit të Gruas të LDK-së dhe të vetë LDK-së, si dhe në funksion të përgatitjeve sa më të mira për Zgjedhjet nacionale.

Zonja Tërmkolli nënvizoi se, "në Ditën Ndërkombëtare të Familjes, Forumi i Gruas e mban këtë Kuvend, si pjesë e rëndësishme e një familjeje të madhe, siç është LDK-ja dhe është e përkushtuar të mbrojë dhe të avansojë vlerat e fuqishme të LDK-së që janë vlera kombëtare, ashtu siç çdo grua mbron familjen e vet".

Ajo përkujtoi se FG i LDK-së ka zhvilluar punën e vet në frymën e përgjegjësisë së lartë për të sotmen dhe të ardhmen e Kosovës, veprimtari kjo që lidhet edhe me Zgjedhjet nacionale në të cilat, siç u shpreh, LDK duhet të ketë dhe do të ketë fitore absolute. "LDK është e aftë dhe e përgatitur të marrë përgjegjësitë për të finalizuar procesin që quhet njohje e pavarësisë së Kosovës me bartësen më të denjë të këtij procesi e që quhet LDK", theksoi zonja Tërmkolli.

Ajo tha se Forumi i Gruas është i përkushtuar të japë gjithë kontributin që edhe këto zgjedhje të jenë sa më demokratike, më transparente dhe të një niveli dhe cilësie edhe më të lartë, duke kërkuar njëherit edhe nga OSBE-ja e UNMIK-u të shënohet ngritje e transparencës, kooperativitetit dhe korigjimeve të nevojshme për ngritje më cilësore të procesit zgjedhor.

Poashtu zonja Tërmkolli theksoi se Forumi i Gruas do të dëshmojë gjithnjë aftësinë, përkushtimin dhe forcën e LDK-së për shtetin tonë, për Kosovën e pavarur e demokratike.

Kryetarja e Forumit të Gruas tha se organizata që ajo drejton do të udhëhiqet nga politika ndërtuese, si bazë e fuqishme e demokracisë, e përparimit dhe kultivimit të vlerave kombëtare.

 

"Është kultura politike kombëtare e LDK-së, e udhëhequr nga Presidenti Ibrahim Rugova dhe kjo politikë do të ketë një kurorëzim final - njohjen e pavarësisë së Kosovës, me këtë, prandaj Forumi i Gruas i LDK-së është dhe do të jetë mbështetje e fuqishme e Presidentit Ibrahim Rugova dhe politikës së tij për njohjen më të shpejtë të pavarësisë së Kosovës", tha zonja Tërmkolli në fund të fjalës së saj para delegateve të Kuvendit të Katërt Zgjedhor, i cili po i vazhdon punimet.

 

 

Mbrëmë tërmet në Gjilan me rrethinë

 

Gjilan, 15 maj 2004 - Mbrëmë rreth orës 21.00 në qytetin e Gjilanit me rrethinë është ndier një tërmet me fuqi pesëballësh të shkallës së Merkalit. Tërmeti përveç që ka shqetësuar banorët e kësaj ane, nuk ka shkaktuar dëme materiale.

Thuhet se epiqendra e tërmetit ka qenë në kufirin Kosovë-Serbi dhe ai është ndier edhe në qytetet Vranjë, Bujanoc e Preshevë.

 

 

KKSHA-ja nderon ish-sekretarin e Shtetit Xhems Bejker dhe biznismenët shqiptarë Ekrem Bardha dhe Peter Kole

 

Uashington, 15 maj 2004 - Këshilli Kombëtar Shqiptaro-Amerikan (KKSHA) do të nderojë ish-sekretarin amerikan të Shtetit Xhems Bejker (James Baker) dhe ndërmarrësit dhe filanthropistët shqiptarë Ekrem Bardha dhe Peter Kole në Darkën e Tetë Vjetore të Çmimeve që do të mbahet më 18 qershor në Nju Jork.

Bejker, sekretari i parë amerikan i Shtetit që vizitoi Shqipërinë, do të nderohet me çmimin "Duart e shpresës" për rolin e tij historik në mbështetje të përpjekjeve të Shqipërisë për të krijuar një sistem politik shumë-partiak dhe për të filluar proceset demokratike.

Darka e KKSHA-së do të mbahet në prag të 13-vjetorit të vizitës së Sekretarit Bejker në Shqipëri më 22 qershor 1991. Kjo vizitë ende kujtohet si një prej ngjarjeve më të rëndësishme në historinë moderne të Shqipërisë.

Z. Bardha dhe z. Kole do të nderohen me çmimin “Arritjet e jetës".

Z. Bardha, një anëtar themelues i KKSHA-së dhe botuesi i gazetës së vetme shqiptaro amerikane "Illyria", do të vlerësohet për përkushtimin e tij në përparimin e popullit shqiptar.

President dhe zyrtar kryesor ekkzekutiv i kompanisë "Paramount Stampim dhe Saldim" në Klivlend, OH si dhe një anëtar kryesor i Organizatës Ndima Humanitare të Anglisë së Re për Shqiptarët (New England Albanian Releif Organization), z. Kole do të vlerësohet për rolin e tij në dërgimin nga NEARO të 300 mijë librave në anglisht në Bibliotekën Publike të Pogradecit, duke krijuar kështu një ndër qendrat më të mëdha me libra në gjuhën angleze në Europën Qendrore dhe Juglindore.

Kohët e fundit z. Bardha dhe z. Kole janë emëruar konsuj nderi të Republikës së Shqipërisë në shtetet e Miçiganit dhe Ohajos, përkatësisht, në mirënjohje të punës së tyre në dobi të popullit shqiptar.

Darka Vjetore e Dhënies së Çmimeve mbahet çdo qershor për të nderuar individët që kanë dhënë kontribut domethënës për përmirësimin e popullit shqiptar. Të tjerë që kanë marrë këtë çmim dhe folës kryesorë përfshijnë Presidentin Bill Clinton, Sekretaren e Shtetit Madaleine K. Albright, Senatorët Bob Dole, Mitch McConnell dhe Charles Schumer, Asistentin e Sekretarit të Shtetit James P. Rubin, etj.

 

 

Komandanti i krahut jugor të NATO-s sot po qëndron në Kosovë

 

Prishtinë, 15 maj 2004 - Komandanti i krahut jugor të NATO-s admirali Gregori Xhonson sot po qëndron në Kosovë, ku do të takohet me përfaqësuesit e KFOR-it, të UNMIK-ut dhe ata vendorë.

Admirali Xhonson do të vizitojë edhe Mitrovicën.

 

 

Komandanti i KFOR-it dhe ministri i ushtrisë së Serbisë dhe Malit të Zi u takuan në pikën kufitare të Merdarit

 

Prishtinë/Merdar, 15 maj 2004 - Zvogëlimi i rreziqeve nga keqintepretimet që mund të bëhen me aksionet e ushtrisë Serbi dhe Mali të Zi, apo forcave paqeruajtëse përgjatë kufijve administrativ Kosovë - Serbi, ishin çështje për të cilat diskutuan dje komandanti i forcave paqerujatëse, gjenerali Holker Kamerhof dhe ministri i Mbrojtjes së Serbisë dhe Malit të Zi Përvosllav Daviniq.

 

Ky takim u zhvillua në pikën kufitare të Merdarit dhe sipas një njoftimi të KFOR-it, takimi u realizua në përputhje të plotë me Rezolutën 1244 të KS të OKB-së dhe Marrëveshjen tekniko-ushtarake. Këto dokumente sipas forcave paqeruajtëse i obligojnë të gjitha palët për bashkëpunim, garantimin e një mjedisi të qetë dhe të sigurt për të gjithë qytetarët e Kosovës.

Ministri serbo-malazez Daviniq citohet të ketë deklaruar se territori i Serbisë dhe i Malit të Zi në të ardhmen mund të jetë vatër e aksioneve terroriste.

 

 

UNMIK-u nuk do të lejojë kandidatët presidencialë të Serbisë të mbajnë tubime në Kosovë

 

Prishtinë, 15 maj 2004 - UNMIK-u thotë se nuk do të lejojë kandidatët e zgjedhjeve presidenciale të Serbisë të mbajnë tubime elektorale në Kosovë. Zëdhënësja e UNMIK-ut Metilde Heneke ka thënë se tubimet parazgjedhore të kandidatëve për kryetar të Serbisë nuk do të mbahen në Kosovë për shkaqe sigurie.

 

Ajo ka theksuar po ashtu se tubime të këtilla nuk do të lejohen as në veriun e Kosovës, të dominuar nga popullata serbe.

 

 

Sot mbahet Kuvendi i Katërt Zgjedhor i Forumit të Gruas së LDK-së

 

Prishtinë, 15 maj 2004 - Sot në orën 11.00, në mjediset e hotelit "Grand" në Prishtinë i zhvillon punimet Kuvendi i Katërt Zgjedhor i Forumit të Gruas së LDK-së. Raportin për punën dhe aktivitetin e FG midis dy kuvendeve do ta paraqesë Melihate Tërmkolli, kryetare e këtij forumi.

Forumi i Gruas i LDK-së ka bindjen e thellë se edhe ky kuvend do të jetë në funksion të forcimit të mëtutjeshëm të Forumit të Gruas dhe të LDK-së në drejtim të zhvillimit sa më të mirë të zgjedhjeve nacionale dhe përshpejtimit të procesit të njohjes së Pavarësisë së Kosovës.

Kuvendi mbahet pasi më herët në të gjitha degët e Forumit të Gruas së LDK-së paraprakisht janë mbajtur kuvendet zgjedhore.

 

 

Komisioni për Buxhet nuk bëri ndarjen e mjeteve të suficitit për shkak të kërkesave të mëdha

 

Prishtinë, 15 maj 2004 - Si pasojë e kërkesave të mëdha Komisioni për Buxhet nuk arriti të vendosë për ndarjen e mjeteve të suficitit prej 37.2 milionë euro, pasi që kërkesat nga organizatat buxhetore ishin tri herë më të mëdha.

 

Ali Sadriu, ministër i Ekonomisë dhe Financave, tha se është shumë e vështirë të vendoset se kujt duhet t'i jepet prioritet pasi mbesin shumë projekte të rëndësishme pa u përfillur për shkak të mungesës së mjeteve.

 

 

Muharrem Shabani përsëri kryetari i KK të Vushtrrisë

 

Vushtrri, 15 maj 2004 - Kryetari i shkarkuar para katër muajsh nga Kuvendi komunal i Vushtrrisë, Muharrem Shabani, është rizgjedhur në këtë post, pasi ka fituar me vota kundër kandidatit nga radhët e LDK-së. Mbledhja e djeshme e Kuvendit të Vushtrrisë, e cila në rend të ditës kishte zgjedhjen e kryetarit kaloi në një atmosferë të tensionuar dhe me debate të nxehta, sidomos mes këshilltarëve të dy fraksioneve që janë krijuar në Degën e LDK-së në Vushtrri.

 

 

Hari Kostov mandatar për formimin e qeverisë së re maqedonase

 

Shkup, 15 maj 2004 - Ministri i brendshëm maqedons, Hari Kostov dje edhe zyrtarisht ka marrë mandatin për formimin e Qeverisë maqedonase nga presidenti i Maqedonisë, Branko Cërvenkovski. Me këtë rast Kostov ka deklaruar se nuk do të ketë ndryshim të posteve ministrore midis partnerëve të koalicionit.

 

Ai ka thënë se janë me rëndësi ministritë për integrime evro-atlantike dhe ajo për furnizime publike, që janë propozuar nga Partia Liberale, por aktualisht këto ministri nuk mund të formohen pa u ndryshuar ligji për organizimin e pushtetit shtetëror.

Ndërkohë, zëdhënësja e BDI-së ka konfirmuar se kjo parti në qeverinë e re do të ketë postin e zëvendëministrit për pushtet lokal, të cilin do ta udhëheqë Xhevat Ademi, si dhe katër poste të sekretarëve shtetërorë në dikasterë përkatës.

 

 

Vujanoviq ka deklaruar se Mali i Zi preferon që sa më parë të ndahet nga Serbia

 

Podgoricë, 15 maj 2004 - Presidenti malazias Filip Vujanoviq ka deklaruar se Mali i Zi preferon që sa më parë që të jetë e mundur të ndahet nga Serbia, sepse nuk funksionon bashkësia shtetërore Serbi - Mali i Zi. Ai ka nënvizuar se Mali i Zi i pavarur do të jetë faktor integrues në rajon dhe do të integrohej sa më parë në Bashkimin Evropian. Presidenti malazez ka kërkuar mbajtjen e referendumit, por tha se është i sigurt se Mali i Zi do të fitojë pavarësinë me votën e qytetarëve.

 

 

Në Ulqin partnerët e koalicionit demokratik "Shqiptarët bashkë" janë marrë vesh për bashkëqeverisje në pushtetin lokal

 

Ulqin, 15 maj 2004 - Në Ulqin partnerët e koalicionit demokratik "Shqiptarët bashkë" janë marrë vesh për bashkëqeverisje në pushtetin lokal, duke e tejkaluar kështu krizën lokale në qeverisje të Kuvendit komunal të Ulqinit.

 

Njëherit me këtë marrëveshje u shmangën edhe zgjedhjet e parakohshme. Përveç përfaqësuesve të koalicionit "Shqiptarët bashkë", Mehmet Bardhit, Ferhat Dinoshës, Osman Rexhes në nënshkrimin e marrëveshjes mori pjesë edhe kryetari i Komunës Fuad Nimani. Me këtë rast u vendos të miratohet buxheti i Komunës së Ulqinit.

 

 

Ushtarët britanikë kanë vrarë 16 guerilë irakianë

 

Amara, Irak, 15 maj 2004 - Ushtarët britanikë kanë vrarë 16 guerilë irakianë afër Amarës në jug të Irakut, ka bërë të ditur sot Ministria britanike e Mbrojtjes.

Ushtarët britanikë kishin rënë në një pritë andaj kishin kërkuar përforcime. "Të paktën 16 guerilë janë vrarë e një është zënë rob", thuhet në kumtesën e Ministrisë britanike.

Në të njëjtin aksion janë plagosur edhe dy ushtarë britanikë.

 

 

Editori i gazetës "Dejli Mirror" është përjashtuar nga puna për shkak të publikimit të fotografive të falsifikuara

 

Londër, 15 maj 2004 - Editori i një nga gazetave më të popullarizuara është përjashtuar nga puna për shkak të publikimit të fotografive të falsifikuara të ushtarëve britanikë, që gjoja kishin abuzuar të burgosurit irakianë, njofton BBCËorld.

 

Pirs Morgan, editor i gazetës "Dejli Mirror" është përjashtuar me arsyetim se puna e trij e mëtejshme në këtë gazetë s'ka kuptim. Gazeta në fjalë ka kërkuar falje për botimin e fotomantazhit që diskrediton ushtarët britanikë.

 

 

Një aeroplan me 33 udhëtarë është përplasur në xhunglën e Amazonit

 

Manaus, Brazil, 15 maj 2004 - Një aeroplan me 33 udhëtarë është përplasur në xhunglën e Amazonit, njopfton BBCWorld. Mbeturinat e aeroplanit, i cili është zhdukur të premten në mbremje, është vërejtur sot (e shtunë) nga helikopteri afër qytetit Manaus, ku duhej të ateronte.

 

Ekipet e shpëtimit, që kanë arritur në vendngjarje, nuk kanë qenë në gjendje të thonë se sa është numri i viktimave dhe sa kanë shpëtuar nga ky aksident. Aeroplani barte 30 udhëtarë dhe tre anëtarë të ekipazhit.

 

 

OKB ka dënuar vrasjet gjatë përleshjeve në protestat e opozitës në Bregun e Fildishtë

 

Nju Jork, 15 maj 2004 - Këshilli i Sigurimit të Kombeve të Bashkuara ka dënuar shkeljen e të drejtatave të njeriut në Bregun e Fildishtë gjatë përleshjeve në protestat e opozitës në muajin mars, ku u vranë një numër civilësh dhe ka bërë thirrje për marrjen në përgjegjësi të fajtorëve, njofton BBCWorld.

 

Ky raport akuzon autoritetet për dhunë dhe vrasjen e protestuesve. Forcat e sigurimit, thuhet në raport, kanë kryerë ekzekutime dhe tortura të të arrestuarëve.

 

 

Disa irakianë të vrarë në luftimet në qytetin e Naxhafit

 

Naxhaf, 15 maj 2004 - Tanket amerikane hynë në një varrezë në qytetin irakian të Naxhafit, ku kishin zënë pozicione anëtarë të milicisë së klerikut radikal shiit Maqtada al-Sadër.

Tre milicë u vranë kur forcat amerikane hynë dje në varreza, duke thënë se milicët po hapnin zjarr me mortaja prej andej.

Luftime intensive u zhvilluan edhe në pjesën qëndrore të Naxhafit, ku 4 irakianë u vranë dhe 30 të tjerë u plagosën. Pas luftimeve, zyrtarë amerikanë dhe zëdhënës të klerikut Maqtada al-Sadrit fajësuan njeri tjetrin për dëmtimin e kupolës së artë të xhamisë Imam Ali, një prej vendeve më të shenjta të myslimanëve shiitë.

 

 

Ministrat e jashtëm të Grupit të Tetëshes diskutojnë për Irakun

 

Uashington, 15 maj 2004 - Sekretari amerikan i Shtetit Kolin Pauell tha dje se forcat e koalicionit të udhëhequra nga Shtetet e Bashkuara do të largohen nga Iraku në se një gjë e tillë kërkohet nga qeveria e përkohshme që do të marrë pushtetin më 1 korrik, megjithëse ai shtoi se një kërkesë e tillë ka shumë pak mundësi të bëhet. Sekretari Pauell diskutoi lidhur me transferimin e sovranitetit në Irak me homologët e tij të vendeve të Grupit të Tetshes dhe të Rusisë.

Takimi në Departamentin e Shtetit kishte për qëllim hartimin e planeve për takimin e ardhshëm të nivelit të lartë të Grupit të Tetshes, i cili do të kryesohet nga presidenti Bush muajin e ardhshëm në Sea Island të shtetit amerikan Xhorxhia.

Megjithatë takimi i djeshëm u mbizotërua nga diskutimet mbi Irakun dhe në veçanti kushtet e transferimit të sovranitetit nga Autoriteti i Përkohshëm i koalicionit të udhëhequr prej Shteteve të Bashkuara tek një qeveri e përkohshme irakiane deri në fund të qershorit.

 

 

Franca është e gatshme të mbështesë rindërtimin e Irakut

 

Uashington, 15 maj 2004 - Ministri i jashtëm francez, Mishel Barnie tha se qeveria e tij, e cila përjashton mundësinë për të dërguar trupa në Irak, është gati të mbështesë rindërtimin e Irakut dhe të punojë në mënyrë konstruktive për një rezolutë të re të Kombeve të Bashkuara.

Barnie tha nëpërmjet përkthyesit se Franca do të këmbëngulë jo vetëm në kalimin e sovranitetit të vërtetë qeverisë së përkohshme irakiane, por edhe në kushtet konkrete të sovranitetit, përfshirë shkallën e autoritetit mbi forcat e sigurimit në mënyrë që legjitimiteti i saj të pranohet nga populli irakian.

"Ne duhet të sigurohemi që irakianët të kenë një farë autoriteti mbi forcat e tyre nga korriku i këtij viti deri në janar të vitit të ardhshëm. Duhet të arrihet një marrëveshje se si do të veprojë forca shumë kombëshe dhe ç=do të bëjë ajo.

 

Mendoj se qeveria irakiane duhet të jetë në pozitë që të qeverisë dhe që të ndryshojë nga e kaluara". Këto komente ai i bëri në takimin e ministrave të jashtëm të vendeve anëtare të Grupit të Tetëshes në Uashington.

 

 

Kongresi vendos për Sonia Gandin

 

Nju Delhi, 15 maj 2004 - Deputetët e parlamentit nga radhët e partisë së Kongresit në Indi, si pritej, kanë zgjedhur Sonia Gandin si udhëheqësen e tyre në parlament.

Në të shkuarën, udhëheqësi i grupit parlamentar të partisë më të madhe, shpesh është bërë dhe kryeministër.

Deputetët e Kongresit votuan ashtu si ishte parashikuar.

Sonia Gandi, me origjinë italiane dhe vejusha e ish-kryeministrit Rajiv Gandi, u zgjodh unanimisht në post.

 

 

Helikopterët izraelitë sulmuan Gaza

 

Gaza, 15 maj 2004 - Në qytetin e Gazsë ka patur një seri sulmesh të reja izraelite.

Helikopterët izraelitë fluturuan shumë ulët mbi qendrën e qytetit në orët e para të mëngjesit.
Ata fluturuan në rrathë dhe pastaj lëshuan një seri predhash.

Tre prej tyre qëlluan një godinë buzëdetit. Objektivi ishte një qendër studimi islamike, e drejtuar nga një udhëheqës lokal I grupit militant islamik, Xhihad.

Shpejt pas kësaj, helikopterët qëlluan mbi një objektiv tjetër, të lidhur me një fiugurë tjetër me kontakte me Xhihadin Islamik.

Ata qëlluan zyrat ku shpërndaheshin para për familjet e sulmuesve vetëvrasës.

 

 

Militantët irakianë kanë granatuar me mortaja selinë e administratës amerikane në Nasiria

 

Nasiria, Irak, 15 maj 2004 - Militantët irakianë kanë granatuar sot gjatë natës (e shtunë) me mortaja selinë e administratës amerikane në Nasiria, ku gjendeshin brenda rreth 20 zyrtarë italianë, britanikë dhe amerikanë, gazetarë dhe pjesëtarë të sigurimit, njofton Rojter. Përpos dëmeve materiale të vogla, nuk njoftohet për viktima.

 

 

Një helikoper izraelit ka shtënë me raketa në shtëpinë e një lideri të Xhihadit Islamik

 

Rafah, Rripi i Gazës, 15 maj 2004 - Një helikoper izraelit ka shtënë sot heret në mëngjes (e shtunë) me raketa në shtëpinë e një lideri të Xhihadit Islamik në pjesën jugore të Rripit të Gazës, por janë plagosur lehtë vetëm dy këmbësorë, kanë thënë boanorët, njofton AP.

 

Në shënjestër të sulmit ishte shtëpia e Mohamed Sheik Khalil, lideri krahut ushtarak të këtij grupi radikal, kanë thënë dëshmitarët. Në momentin e sulmit, ai nuk ndodhej në shtëpi.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |  NJOFTIME  |