Përmbajtja:

• Ndërkombëtarët dhe vendorët po diskutojnë në Prishtinë për mekanizmin përcjellës të asociim-stabilizimit

• Banka Botërore do të ndihmojë rindërtimin e Kosovës, thotë presidenti i saj

• Lambsdorf thotë se procesi privatizimit në Kosovë është tepër i ndërlikuar

• Suedia për 190 trupa zvogëlon numrin e ushtarëve në përbërje të forcave paqeruajtëse në Kosovë

• Kosova duhet të jetë pjesë e proceseve integruese të Bashkimit Evropian

• Të punojmë për të rikthyer besimin mes komuniteteve, - tha Rexhepi në Lipjan

• FR i LDK-së nesër organizon një tribunë me temën "Familja e shëndoshë - themel i shoqërisë"

• Kryetari i Prishtinës, Ismet Beqiri sot udhëton për në Romë

• Hari Holkeri është shtrirë në një spital të Strasburgut

• Nesër mbahet Kuvendi i Katërt Zgjedhor i Forumit të Gruas së LDK-së

• Mjetet e grumbulluara gjatë tremujorit në Kosovë janë 126 milionë euro dhe janë nën nivel të planit

• Kryeministri Rexhepi ngushëllon familjen e policit të vrarë Ilir Llapatinca

• Analizë: Dhjetra mijëra njerëz në Shqipëri aplikojnë çdo vit për të emigruar jashtë vendit

• Abu Musab al-Zarkavi është ekzekutori i kontraktuesit amerikan, Nikolas Berg

• Forcat amerikane kanë liruar dhjetëra irakianë nga burgu Abu Graib

• Trupat amerikane përshëndesin sekretarin Ramsfeld gjatë vizitës në Irak

• Administrata amerikane kërkon edhe një fond prej 25 miliardë dollarësh për operacionet ushtarake në Irak dhe Afganistan

• Ish-ministrja austriake Helga Konrad përfaqësuese e posaçme e OSBE-së për trafikun njerëzor

• Luftime të ashpra në Naxhaf

• Gandi kërkon "qeveri të fortë" në Indi

• Presidenti i Koresë së Jugut rikthehet në post

• Në Pakistan është vrarë një familje muslimane shite 6-anëtarëshe

• Në Gaza janë plagosur tre ushtarë izraelitë

• Ekskavatorët izraelitë kanë rrënuar 10 shtëpi palestineze në Gaza

• Një lider i Al Kaidës thotë se grupi i Bin Ladenit ndihmon militantët muslimanë në Irak

• Një grup i panjohur grek merr përgjegjësinë për shpërthimet e bombave në Athinë

• Pauell: Të zbulohen përgjegjësit për abuzime

Ndërkombëtarët dhe vendorët po diskutojnë në Prishtinë për mekanizmin përcjellës të asociim-stabilizimit

 

Prishtinë, 14 maj 2004 - Përfaqësues të Komisionit Evropian, të UNMIK-ut, të zyrave diplomatike në Prishtinë, të institucioneve vendore dhe ekspertë në një takim dyditësh po diskutojnë për zhvillimin ekonomik, standardet dhe forcimin e rolit të mekanizmit përcjellës të procesit të asociim - stabilizimit për Kosovën.

 

Mekanizmi përcjellës i asociim-stabilizimit është një kornizë e Bashkimit Evropian për bashkëpunim me Ballkanin Perëndimor, ku përfshihet edhe Kosova.

Zëvendësshefi i UNMIK-ut, Çarlls Brajshou mirëpriti mbajtjen e këtij takimi. Ai tha se trazirat e marsit që shkaktuan vonesë dymuajshe për mbajtjen e takimit janë ende të freskëta në mendjet tona. Dëmi i madh që i shkaktuan ato trazira Kosovës është një kthim i madh prapa, por duhet ecur përpara, tha Brajshou në fjalën hyrëse.

Edhe kryeministri i Kosovës, Bajram Rexhepi ka vlerësuar se trazirat kanë krijuar një imazh të hidhur për Kosovën, por sipas tij ato nuk kanë arritur të pengojnë punën për avancimin e proceseve politike dhe ekonomike. Ai përmendi përpjekjet e insitucioneve për shoqëri të barabartë për të gjitha komunitetet.

 

Kryeministri Rexhepi tha se qeveria e Kosovës është e përkushtuar edhe për përmbushjen e standardeve. Ato do ta bëjnë Kosovën vend demokratik, të zhvilluar ekonomikisht, shumetnik, vend që reflekton paqe dhe siguri në rajon.

 

 

Banka Botërore do të ndihmojë rindërtimin e Kosovës, thotë presidenti i saj

 

Mynih, 14 maj 2004 - Presidenti i Bankës Botërore, Xhems Uolfenson, i cili mori pjesë në Forumin e shtatë të kësaj banke në Mynih, në një prononcim për media në lidhje me ndihmat për Kosovën ka thënë:
"Kam qenë në Kosovë në kohën më të keqe për të, tani jemi atje në një kohë rindërtimi dhe përparimi.

 

Po përpiqemi të mos përfshihemi në diskutimin politik, por të ndihmojmë në rindërtimin e vendit, duke krijuar një klimë për investime, duke ndihmuar fushën e arsimit, të shëndetësisë dhe të shërbimeve. Kjo është mënyra më e mirë për të ndihmuar", citohet të ketë thënë drejtori i Bankës Ndërkombëtare.

Uolfenson ka theksuar se ndihma për Kosovën po jepet në një kohë, kur pozicioni i saj është tepër i veçantë dhe shprehu bindjen se zgjidhja do të gjendet.

 

 

Lambsdorf thotë se procesi privatizimit në Kosovë është tepër i ndërlikuar

 

Mynih, 14 maj 2004 - Në Forumin e Mynihut Kosova është përfaqësuar nga drejtori i Shtyllës së Katërt të UNMIK-ut, Nikolas Lambsdorf, i cili pasqyroi gjendjen e rëndë ekonomike në të cilën gjendet aktualisht vendi ynë.

 

Ai vuri në dukje se të ardhurat e fundit kapin vetëm gjysmën e atyre të Shqipërisë dhe Bosnje e Hercegovinës, vende këto që edhe vetë nuk dallohen për të ardhura të larta.

Eksportet e Kosovës, tha Lambsdorf, përbëjnë vetëm katër për qind të importeve dhe janë të punësuar më pak se 50 për qind e fuqisë së aftë për punë. Ai nënvizoi rëndësinë e zgjidhjes së statusit për zhvillimin ekonomik.

Në lidhje me ngecjen e proceseve të privatizimit të ndërmarrjeve shoqërore, Lambsdorf, tha se të gjithë pajtohen që privatizimi i ndërmarrjeve në pronësi shoqërore është me rëndësi, por shtoi se ky proces është edhe tepër i ndërlikuar në Kosovë. "Vështirësitë janë si politike, ashtu edhe ligjore", tha Lambsdorf.

 

 

Suedia për 190 trupa zvogëlon numrin e ushtarëve në përbërje të forcave paqeruajtëse në Kosovë

 

Stokholm, 14 maj 2004 - Qeveria e Suedisë ka vendosur që për 190 trupa të zvogëlojë numrin e ushtarëve në përbërje të forcave paqeruajtëse, KFOR në Kosovë.

Në një komunikatë të qeverisë së këtij vendi thuhet se kontigjenti suedez në qershor do të zvogëlohet nga 520 në 330 pjesëtarë, njofton AP.

 

 

Kosova duhet të jetë pjesë e proceseve integruese të Bashkimit Evropian

 

Prishtinë, 14 maj 2004 - Në përfundim të takimit të katërt të Mekanizmit Përcjellës të Stabilizim-Asociimit (MPSA) të Kosovës me Bashkimin Evropian, kryeministri Bajram Rexhepi tha se ky mekanizëm është arterja kryesore e cila e lidh Kosovën me BE-në dhe "shpresojmë që një ditë pasi që të jetë zgjidhur statusi politik i Kosovës dhe pasi që Kosova të përmbushë kriteret për antarësim në BE, qytetarët e Kosovës të bëhen qytetarë të UE dhe Kosova anëtare e këtij unioni gjigant dhe modern".

Ndërkaq për ngjarjet e marsit, Rexhepi tha se vërtet "kanë sjellë një imazh të hidhur për Kosovën, por nuk kanë arritur të pengojnë punën tonë për të avancuar proceset politike dhe ekonomike në Kosovë".

Sipas Rexhepit, në rrafshin politik suksesi më i rëndësishëm i arritur është operacionalizimi i Standardëve për Kosovën dhe shpallja e Planit Implementues. Tani është shumë më e qartë, tha ai, sepse detyrat dhe obligimet që duhet të përmbushen janë precizuar në detaje dhe ka filluar puna në implementimin e tyre.

Kryeminisri theksoi se qeveria që ai drejton mbetet e angazhuar dhe ka përqëndruar tërë potencialin e saj për realizimin e standardeve për Kosovën, duke qenë e vetëdijshme thellë se këto standarde e bëjnë Kosovën vend demokratike dhe të qytetruar.

Rexhepi tha se është bindur se Kosova do t'i arrijë objektivat dhe kjo do t'i mundësojë të jetë shumë afër anëtarësimit në BE. "Në këtë drejtim, formimi i Grupit Përkrahës për Kosovën paraqet një ndihmë konkrete në planin e përmbushjes së standardeve", tha Rexhepi. Ai më tutje theksoi se Mekanizmi Përcjellës është dhe do të mbetet prioritet për kosovarët, duke ritheksuar përkushtimin maksimal të Qeverisë në suaza të këtij Mekanizmi.

Vazhdimi i privatizmit paraqet parakusht thelbësor drejt krijimit të tregut të lirë e funksional, si një ndër kriteret themelore të Bashkimit Evropian, theksoi kryeministri Rexhepi.

Përfaqësuesi i Komisionit Evropian, Rajnhard Pribe tha se Kosova duhet të jetë pjesë e proceseve integruese të Bashkimit Evropian.

"Ne nuk duam që Kosova të mbetet jashtë proceseve integruese, pavarësisht nga problemet politike për shkak të statusit të pazgjidhur. Prandaj, kemi mekanizma që do të mundësojnë integrimin e Kosovës", tha Pribe.

 

 

Të punojmë për të rikthyer besimin mes komuniteteve, - tha Rexhepi në Lipjan

 

Lipjan, 14 maj 2004 - Kryeministri Bajram Rexhepi gjatë një vizite në Lipjan u bëri thirrje serbëve lopkalë që ta ndihmojnë Qeverinë e Kosovës në përpjekjet për të riparuar dëmet dhe pasojat e trazirave të marsit. Ai tha se i kuptonte vështirësitë me të cilat po përballen serbët e Kosovës pas dhunës së marsit, por të gjithë së bashku duhet rikthyer besimin mes komuniteteve në Kosovë.

 

Kryeministri tha se kjo është rruga e vetme drejt Evropës. "Po qe se ne ndërtojmë marrëdhënie të mira shumë shpejt do të bëhemi qytetarë të Bashkimit Evropian. Nëse nuk mund të durojmë njëri tjetrin apo nëse e vrasim njëri tjetrin, askush nuk do të na dëshirojë në Evropë", tha kryeministri në bisedë me disa serbë në qendër të Lipjanit.

 

Rexhepi u premtoi serbëve angazhimin e qeverisë për rindërtimin e shtëpive të shkatërruara gjatë marsit. Disa banorë lokalë serbët u shrehën se kanë besim të plotë në deklaratat e Kryeministri.

Rexhepi gjatë qëndrimit në Lipjan takoi edhe udhëheqjen komunale.

Duke komentuar një deklaratë të tij të mëhershme për nevojën e krijimit të një shërbim intelegjent, Bajram Rexhepi tha se këtë e ka përmendur si domosdoshmëri. "Ngjarjet tragjike na kanë zënë të painformuar në lidhje me to, sepse nuk kemi pasur asnjë informacion se do të ndodhë diçka e tillë. Kjo është nevojë imanente për të funksionuar institucionet shtetërore", tha Kryeministri Rexhepi.

 

 

FR i LDK-së nesër organizon një tribunë me temën "Familja e shëndoshë - themel i shoqërisë"

 

Prishtinë, 14 maj 2004 - Kryesia e Degës IV e Prishtinës e Forumit të Rinisë të LDK-së, nesër organizon një tribunë të hapur me temën "Familja e shëndoshë - themel i shoqërisë".

Për të trajtuar këtë temë në këtë debat dhe sidomos rastet e shkurorëzimeve në Kosovën e pasluftës, që tanimë ka kaluar në dukuri, do të flasin dy ligjerues: dr.Ismajl Hasani (sociolog) dhe mr.Hysamedin Abazi (teolog).

Tribuna do të mbahet në amfiteatrin e Bibliotekës Kombëtare dhe Universitare në Prishtinë dhe fillon në orën 14.00.

 

 

Kryetari i Prishtinës, Ismet Beqiri sot udhëton për në Romë

 

Prishtinë, 14 maj 2004 - Me ftesë të prefektit të Romës, Valter Veltroni, kryetari i Komunës së Prishtinës, Ismet Beqiri sot udhëton për në kryeqytetin e Italisë në Romë.

Ismet Beqiri do të marrë pjesë në Konferencën e Tretë Ndërkombëtare për të Rinj, e cila do të mbahet nga 16 deri më 18 maj në Romë.

Së bashku me kryetarin e Prishtinës, do të udhëtojnë edhe dy të rinj nga Prishtina, të cilët po ashtu do të jenë pjesëmarrës të kësaj konference.

 

 

Hari Holkeri është shtrirë në një spital të Strasburgut

 

Strazburg, 14 maj 2004 - Për shkak të orarit të ngjeshur të punëve ditëve të fundit në KS dhe në Këshillin e Evropës, kryeadministratori i Kosovës, Hari Holkeri është shtruar në një spital të Strasburgut dhe gjendet nën kujdesin intensiv. Ai është ndier keq në një darkë diplomatike, ku merrte pjesë.

 

Sipas këshillës së mjekëve, Holkeri pritet të qëndrojë në spital disa ditë. Zëdhënësja e OKB-së në Prishtinë, Matilda Honeke ka thënë se z. Holkeri është fizikisht i plogësht dhe do të jetë nën vëzhgimin e mjekëve për disa ditë. Ai është sëmurë pas një darke parmbrëmë në Këshillin e Evropës. Zëdhënësja tha se gjendja e z. Holker është pasojë e një plani të ngarkuar pune.

 

 

Nesër mbahet Kuvendi i Katërt Zgjedhor i Forumit të Gruas së LDK-së

 

Prishtinë, 14 maj 2004 - Forumi i Gruas i LDK, nesër, më 15 maj, në hotelin "Grand" në Prishtinë, mban Kuvendin e Katërt Zgjedhor. Kuvendi mbahet pasi në të gjitha degët e Forumit të Gruas së LDK-së paraprakisht janë mbajtur kuvendet zgjedhore.

Forumi i Gruas i LDK-së ka bindjen e thellë se edhe ky kuvend do të jetë në funksion të forcimit të mëtutjeshëm të Forumit të Gruas dhe të LDK-së në drejtim të zhvillimit sa më të mirë të zgjedhjeve nacionale dhe përshpejtimit të procesit të njohjes së Pavarësisë së Kosovës, thuhet në një njoftim të FG së LDK-së.

 

 

Mjetet e grumbulluara gjatë tremujorit në Kosovë janë 126 milionë euro dhe janë nën nivel të planit

 

Prishtinë, 14 maj 2004 - Mjetet e grumbulluara gjatë tremujorit të parë kanë qenë 126 milionë euro, që paraqesin 20.4 për qind të të hyrave të planifikuara vjetore për buxhetin e përgjithshëm, ose afro 80 për qind e planifikimit për tremujorin e parë.

 

Zyrtarët e Ministrisë se Ekonomisë dhe Financave thonë se niveli më i ulët i të hyrave në krahasim me planin nuk është brengosës, sepse zakonisht të hyrat e tremujorit të parë janë më të ulta se të periudhave të tjera. Shpenzimet megjithëse janë më të larta se të hyrat dhe sillen mbi 130 milionë euro, janë nën nivel të planit për këtë periudhë, njoftoi këshilltari i ministrit Sadriu.

Zyrtarët e Buxhetit të Kosovës u kanë bërë thirrje agjencive shpenzuese që t'i shfrytëzojnë në mënyrë racionale mjetet e buxhetit, sepse Qeveria dhe shefi i UNMIK-ut kanë marrë vendim që të zvogëlojnë buxhetin nëse nuk realizohet në planin e paraparë.

 

 

Kryeministri Rexhepi ngushëllon familjen e policit të vrarë Ilir Llapatinca

 

Prishtinë, 14 maj 2004 - Kryeministri i Kosovës Bajram Rexhepi ka ngushëlluar familjen e policit të vrarë Ilir Llapatinca dhe kolegët e tij.

"Ilir Llapatinca, me punën dhe angazhimin e tij dhe me vetë aktin e rënies në krye të detyrës, dëshmoi përkushtimin dhe dinjitetin moral të pjesëtarit të SHPK-së.

Familja e Ilirit duhet të jetë krenare për birin e vet dhe të mburret me shembëlltyrën e tij, ndërsa kolegët e tij të vazhdojnë më tutje në angazhimin dhe përkushtimin e tyre për kryerjen e detyrave në SHPK", thuhet në ngushëllimet e Kryeministrit Rexhepi.

 

 

Analizë: Dhjetra mijëra njerëz në Shqipëri aplikojnë çdo vit për të emigruar jashtë vendit

 

Bon, 14 maj 2004 - Emigracioni ka shoqëruar me shekuj jetën e shqiptarëve dhe nuk ka pothuajse asnjë vend fqinj të Shqipërisë dhe asnjë vend në Evropë ku të mos ekzistojnë kolonitë shqiptare, por edhe drejt vendeve të largta si në Shtetet e Bashkuara të Amerikës, në Argjentinë, Kanada e gjetkë, thuhet në një analizë të emetuar në radion "Dojçe vele".

Ajo që konstatohet në këtë lëvizje masive të shqiptarëve, është fakti se nuk bëhet me largimin vetëm të njërëzve më të varfër dhe të pakualifikuar të shoqërisë. Përkundrazi një pjesë e mirë e intelektualëve me ambicie jo vetëm për një jetë më të mirë, por edhe për kushte më të përshtatshme për karrierë profesionale, kanë marrë rrugët e emigracionit.

"Humbja e trurit" quhet dukuria me të cilën përballen kryesisht vendet në zhvillim, veçanërisht vendet postkomuniste të tranzicionit në Evropën Juglindore. Kështu dhjetra mijëra njerëz në Shqipëri aplikojnë çdo vit për të emigruar kryesisht drejt Shteteve të Bashkuara të Amerikës dhe Kandasë, nënvizon Dhimitër Doka, profesor në katedrën e Fakultetit Filologjik të Tiranës.

 

Sipas vlerësimeve brenda institucioneve më të larta shkencore në Shqipëri, rreth 40 për qind e itelektiualëve, ose punonjësve të këtyre instituteve janë përfshirë në këtë dhjetvjeçar nga fenomeni i emigracionit.

 

Krahasuar edhe me vendet tjera të Evropës Juglindore, sepse ky nuk është vetëm një fenomen shqiptar, megjithatë nisur nga numri i popullësisë, Shqipëria është në vend të parë me këtë përqindje kaq të madhe të intelektualëve, ose të elitës të trurit të larguar nga Shqipëria, thuhet në këtë analizë.

 

 

Abu Musab al-Zarkavi është ekzekutori i kontraktuesit amerikan, Nikolas Berg

 

Uashington, 14 maj 2004 - I dyshimti i Al Kaidës, Abu Musab al-Zarkavi, si duket është kryerësi i heqjes së kokës së kontraktuesit amerikan, Nikolas Berg, në Irak, ka thënë një zyrtar i CIA-s, njofton BBCWorld.

 

Agjencitë amerikane të inteligjencës kanë analizuar videon e ekzekutimit, të paraqitur në vebsajtin me bazë në Malajzi dhe ekziston mundësia e lartë se ekzekutori është Zarkavi, i cili tundte thikën, ka thënë zyrtari amerikan i CIA-s.

 

 

Forcat amerikane kanë liruar dhjetëra irakianë nga burgu Abu Graib

 

Abu Graib, Irak, 14 maj 2004 - Një ditë pasi sekretari i amerikan i Mbrojtjes vizitoi burgun Abu Graib afër Bagdadit, forcat amerikane kanë liruar sot (e premte) dhjetëra irakianë nga ky burg, ku u bë skandali i abuzimeve të të burgosurve, njofton Rojter.

 

Zyrtarët amerikanë kanë thënë se sot do të lirohen rreth 300 të burgosur dhe ky numër është vetëm një pjesë nga programi mujor i lirimit të të burgosurve të këtij burgu, që pritet të lirohen nga komandanti i sapo emëruar i burgut. Deri nga fundi i këtij muaji, në këtë burg do të mbeten rreth 1,500-2000. Ndërkaq, javën e kaluar në këtë burg kanë qenë rreth 3,800 të burgosur.

 

 

Trupat amerikane përshëndesin sekretarin Ramsfeld gjatë vizitës në Irak

 

Bagdad, 14 maj 2004 - Sekretari i Mbrojtjes dje në Irak u takua me ushtarë amerikanë dhe vizitoi burgun Abu Graib, ku janë fotografuar keqtrajtime të të burgosurve irakianë nga ushtarë amerikanë.

I pritur ngrohtë nga trupat, Sekretari i mbrojtjes u përpoq të ngrinte moralin e tyre pas skandalit për keqtrajtimin e të burgosurve, të cilin ai e cilësoi si një goditje ndaj të gjithë forcave të armatosura.
Gjatë qëndrimit në Irak, Sekretari i Mbrojtjes iu përgjigj për shtatë orë pyetjeve për të ardhmen e misionit amerikan atje.

"Do të kemi një rrugë të vështirë përpara, e dimë këtë. Nuk është e lehtë të kalohet nga një diktaturë shtypëse në një vend të qëndrueshëm, të begatë dhe të suksesshëm", tha zoti Ramsfeld.

 

 

Administrata amerikane kërkon edhe një fond prej 25 miliardë dollarësh për operacionet ushtarake në Irak dhe Afganistan

 

Uashington, 14 maj 2004 - Një zyrtar i lartë i Departamentit amerikan të Mbrojtjes u bëri thirrje ligjvënësve që të miratojnë një fond prej 25 miliardë dollarësh për operacionet ushtarake në Irak dhe Afganistan, megjithë kritikat e disa anëtarëve të kongresit për këtë kërkesë.

Nënsekretari amerikan i Mbrojtjes, Pol Uolfowic i tha dje një komisioni të senatit se ky fond do të ndihmojë në mbulimin e shpenzimeve ushtarake të paparashikueshme dhe në afatin e shkurtër si në Irak ashtu edhe në Afganistan.

 

Ai tha se Pentagoni ka të ngjarë të kërkojë një shumë më të madhe për operacionet ushtarake në ato dy vende në fillim të vitit të ardhshëm, duke e çuar shumën e 2 kërkesave në më shumë se 50 miliardë dollarë.

Pritet që kongresi ta miratojë kërkesën. Por disa senatorë e kritikuan kërkesën e Pentagonit për të kontrolluar mënyrën se si shpenzohen fondet.

 

 

Ish-ministrja austriake Helga Konrad përfaqësuese e posaçme e OSBE-së për trafikun njerëzor

 

Vjenë, 14 maj 2004 - OSBE-ja emëroi ish-ministren austriake Helga Konrad si përfaqësuesen e saj të posaçme për trafikun njerëzor.

Ministri i jashtëm bullgar Solomon Pasi, vendi i të cilit ka kryesinë e radhës së OSBE-së, e bëri të ditur këtë emërim në Vjenë.

Zonja Konrad, eksperte në luftën kundër trafikut njerëzor, i tha Këshillit të përhershëm të organizatës se synon të luftojë jo vetëm trafikun për shfrytëzim seksual por edhe për punë të detyruar, në veçanti trafikun e fëmijëve.

Ajo vuri gjithashtu në dukje se organizata kishte aftësinë të ndihmonte në përpjekjet për të ndaluar kontrabandën, pasi 55 vendet e saj anëtare përfshijnë vende origjine, tranziti dhe destinacioni të mallrave të kësaj tregëtie.

 

 

Luftime të ashpra në Naxhaf

 

Naxhaf, 14 maj 2004 - Në qytetin e shenjtë të Naxhafit në Irak kanë shpërthyer luftime të ashpra mes forcave amerikane dhe militantëve irakianë, mbështetës të klerikut Moktada al-Sadr.

Të paktën dy tanke amerikanë i janë afruar një varreze pranë një vendi të shenjtë. Luftime njoftohet se po zhvillohen në një rrugë në jug të qytetit.

Mes militantëve të Moktada al-Sadr dhe forcave amerikane ka patur përleshje të herëpashershme që nga muaji i kaluar, kur militantët filluan një kryengritje në jug të Irakut.

 

 

Gandi kërkon "qeveri të fortë" në Indi

 

Nju Delhi, 14 maj 2004 - Partia kryesore e opozitës në Indi, ajo e Kongresit, po fillon punën për formimin e një qeverie të koalicionit pas fitores së papritur në zgjedhjet e përgjithshme.

Udhëheqja e partisë, me origjinë italiane, Sonia Gandi, ka filluar takimet me aleatët kryesorë në Delhi, por ende nuk ka lënë të kuptohet nëse ajo do të jetë kryeministrja e re e vendit.

Nëse kjo ndodh, ajo do të jetë anëtarja e katërt e dinastisë legjendare Nehru-Gandi që do të mbajë këtë post.
Ajo ka premtuar se do të përpiqet të fomojë "një qeveri të fuqishme, të qendrueshme dhe shekullare".

 

 

Presidenti i Koresë së Jugut rikthehet në post

 

Seul, 14 maj 2004 - Presidenti i Koresë së Jugut, Roh Moo-hyun është rikthyer në post dy muaj pasi parlamenti i vendit votoi për ta ndjekur atë penalisht.

Gjykata Kushtetuese hodhi poshtë vendimin e parlamentit dhe pse arriti në përfundimin se presidenti kishte shkelur ligjet elektorale.

Por ajo vendosi se këto shkelje nuk ishin aq serioze sa të justifikonin vendimin e parlamentit për ta ndjekur penalisht presidentin. Gjykata hodhi poshtë dhe akuzat e tjera për korrupsion dhe inkompetencë.

 

 

Në Pakistan është vrarë një familje muslimane shite 6-anëtarëshe

 

Lahore, Pakistan, 14 maj 2004 - Gjashtë anëtarë të një familjeje muslimane shite është vrarë sot (e premte) me armë zjarri, në distriktin Mugalpura të Lahores, në Pakistan, njofton BBCnews. Të vrarët janë 2 burra, gratë e tyre, një djalë 17-vjeçar dhe një vajzë e njërit nga burrat.

 

Para se të vriten, viktimat kanë qenë të lidhura dhe të bëra grumbull. Motivi i vrasjes duket të jetë urrejtja sektare fetare, por policia nuk përjashton as opsionin e terrorizmit. Askush deri tash nuk e ka marrë përgjegjësinë për këtë rast tragjik.

 

 

Në Gaza janë plagosur tre ushtarë izraelitë

 

Gaza, 14 maj 2004 - Një palestinez i armatosur ka plagosur disa ushtarë izrealitë në një sulm në kampine refugjatëve në jug të Rripit të Gazës, thanë militantët palestinezë dhe radioja izrealite.

Grupi militant Hamas thotë se sulmuesi ka qëlluar një ushtar dhe pastaj edhe dy të tjerë kur erdhën të ndihmojnë atë në kampin e refugjatëve Rafah.

 

 

Ekskavatorët izraelitë kanë rrënuar 10 shtëpi palestineze në Gaza

 

Gaza, 14 maj 2004 - Ekskavatorët izraelitë kanë filluar sot (e premte) rrënimin e shtëpive në kampin e refugjatëve palestinezë Rafah në Gaza, njofton Rojter. Ky operacion ka për qëllim të zgjerojë korridorin e kontrollit izraelit të kufirit egjiptian dhe Gazës.

 

Njoftohet se deri tash janë rrënuar 10 shtëpi dhe pritet të rrënohen edhe shumë të tjera. Banorët, sapo kanë parë afrimin e izraelitëve, kanë filluar të ikin në panik, disa syresh me flamur të bardhe të ngritur, kanë thënë dëshmitarët. Armata izraelite nuk ka dhënë ende komente.

 

 

Një lider i Al Kaidës thotë se grupi i Bin Ladenit ndihmon militantët muslimanë në Irak

 

Dubai, 14 maj 2004 - Një lider i lartë i Al Kaidës në Arabinë Saudite ka thënë se grupi i Osama bin Ladenit është duke ndihmuar militantët muslimanë në luftë për dëbimin e forcave amerikane nga Iraku, bëhet e ditur sot (e premte) në një deklaratë në vebsajtin islamik, njofton BBCnews.

 

Grupi i tij, gjithashtu, e merr përgjegjësinë për sulmin e këtij muaji në Arabinë Saudite, ku u vranë 5 perëndimorë dhe zotohet për sulme të tjera të përgjakshme në Arabinë Saudite dhe në shtetet e tjera muslimane.

 

 

Një grup i panjohur grek merr përgjegjësinë për shpërthimet e bombave në Athinë

 

Athinë, 14 maj 2004  - Një grup i panjohur grek, i cili e quan veten Celula e Rezistencës merr përgjegjësinë për shpërthimet e bombave në Athinë dhe kërcënimet e sponsorëve të Lojërave verore olimpike, njofton AFP. Policia ka thënë se nuk ka dëgjuar më parë për këtë grup dhe nuk mund të verifikojë autencitetin e kumtesës së tij.

Ditë më parë e kishte marrë përgjegjësinë edhe një grup tjetër i quajtur Lufta revolucionare, që ishte zotuar edhe për sulme të tjera në kryeqytetin grek dhe u kishte tërhequr vërejtjen vizitorëve të mos marrin pjesë në olimpiadë.

 

 

Pauell: Të zbulohen përgjegjësit për abuzime

 

Londër, 14 maj 2004 - Sekretari amerikan i Shtetit Kolin Pauell ka deklaruar se SHBA-të nuk do ta kthejnë shpinën dhe të ikin nga Iraku, përkundër protestës së fundit me rastin e abuzimeve të të burgosurve irakianë.

 

Në një intervistë dhënë BBC-së Pauell ka thënë se me rëndësi është të zbulohen përgjegjësit për abuzime. "Ky është lëshim i udhëheqjes. Kështu diçka nuk është dashur të ndodhë kurrë.

 

Asnjë rreshter nuk është dashur të tolerojë këtë nëse ka ditur për këtë, asnjë kapiten, kolonel, gjeneral, asnjë zyrtar. Ministri Ramsfeld e ka pranuar përgjegjësinë, por ajo më e rëndësishmja për ne është që të zbulohet se kujt i takon përgjegjësia", ka thënë sekretari Pauell.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |