|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | NJOFTIME |  

Shqipëri: Banka Botërore, grant për vetqeverisjen lokale

14 maj 2004 / TN

 

Çerçiz LOLOÇI

 

Në Zyrën e Bankës Botërore u bë prezantimi i një projekti pilot për buxhetimin me pjesëmarrjen e qytetarëve. Ky projekt synon të nxisë përfshirjen e qytetarëve në vendimmarrje në nivel lokal dhe veçanërisht në hartimin, ekzekutimin dhe monitorimin e buxhetit.

 

Projekti, i mbështetur financiarisht nga një grant i administruar nga Banka Botërore, është hartuar dhe do të zbatohet nga Instituti i Kërkimeve Urbane.  Projekti do të nxisë forcimin e dialogut midis qytetarëve dhe pushtetit lokal, i cili do të rrisë përfshirjen e qytetarëve në procesin e vendimmarrjeve financiare dhe do të forcojë qeverisjen.

 

Përmes këtij projekti pushteti lokal dhe qytetarët do të krijojnë një dialog të qëndrueshëm për procesin e buxhetit. Ky projekt pilot do t’i lejojë pjesëmarrësit të testojnë mekanizma që e bëjnë procesin e buxhetit transparent, gjithëpërfshirës dhe të përgjegjshëm. 

 

Projekti do të zbatohet në katër njësi të pushtetit lokal: Elbasan, Përrenjas, Kashar dhe Baldushk dhe do të përfshijë administratën lokale, komunitetin e këtyre zonave, grupe të shoqërisë civile dhe median. Në ceremoninë e prezantimit të projektit u bë edhe nënshkrimi i memorandumit të bashkëpunimit me këto bashki.

 

Në ceremoninë e prezantimit morën pjesë dhe folën Përfaqësuesi i Perhershëm i Bankës Botërore në Tiranë, Nadir Mohammed, Zëvendës Ministrja e Ministrisë së Pushtetit Lokal, Natasha Paco, Kryetarët e bashkive të përzgjedhura në projekt, ekspertë të Bankës Botërore dhe të institutit të kërkimeve urbane.  

 

 

Përse bëhet ky projekt

 

Nadir Mohammed

Përfaqësuesi i Perhershëm i Bankës Botërore në Tiranë

 

Është kënaqësi për mua t’ju uroj mirëseardhjen në Seminarin mbi Programin Pilot të Buxhetit me Pjesëmarrje në Shqipëri. Siç mund ta dini, aktivitetet e këtij projekti kanë për qëllim: 

 

1) ngritjen e kapacitetit te zyrtarëve të pushtetit vendor dhe grupeve të shoqërisë civile për t’u angazhuar në konsultime të fokusuara, me synim zgjidhjen e problemeve të komunitetit; dhe  

 

2) futjen e një procesi buxheti me pjesëmarrje dhe monitorimin për institucionalizimin e zërit të qytetarëve në procesin e vendim-marrjes së qeverisë. Ky projekt do të iniciohet në fillim në disa zona pilote.  

 

Ky është një moment i rëndësishëm për të punuar bashkërisht me ju dhe palët e interesuara për të testuar mekanizma të reja që i vijnë në ndihmë pushtetit vendor dhe qytetarëve për tu angazhuar në një dialog konstruktiv.

 

Ky projekt do të nxisë pjesëmarrjen e qytetarëve nga posht-lart në problemet e qeverisjes nëpërmjet një aktiviteti konkret pilot 2 vjeçar. Kjo është në vazhdën e mbështetjen sonë për SKZHES-në, përpjekjeve për fuqizimin e të varfërve, decentralizimin dhe shërbime më efektive. 

 

Shqipëria ka bërë hapa përpara në procesin e decentralizimit dhe në dhënien më shumë pushtet dhe zgjerimin e mandatit të pushtetit vendor. 

 

Në këtë kontekst është me rëndësi që qytetarët të kuptojnë përgjegjësitë dhe mandatin e pushtetit vendor me qëllim që të jenë realistë në atë që presin nga pushteti vendor. Po kaq i rëndësishëm është edhe angazhimi aktiv nga ana e pushtetit vendor të qytetarëve në një dialog konstruktiv për t’u siguruar që shqetësimet e qytetarëve janë marrë parasysh në vendim-marrjen publike, sidomos në lidhje me procesin e hartimit të buxhetit. 

 

Na gëzon pamasë fakti që Kryetarët e Bashkive të pranishëm sot kanë shprehur gatishmërinë dhe janë zotuar të përfshijnë bashkitë e tyre në këto program novator. Shpresojmë që këto bashki të mund të shërbejnë si model për angazhimin e qytetarëve në një dialog që përqëndrohet në trajtimin e prioriteteve të komunitetit dhe shkëmbimin e eksperiencës së tyre nga ky projekt me bashki të tjera.  

 

Gjithashtu jemi të kënaqur që Ministria e Pushtetit Vendor dhe Decentralizimit dhe Drejtoritë e SKZHE-së dhe Buxhetit në Ministrinë e Financave kanë shprehur mbështetjen e tyre për këtë projekt dhe kanë rënë dakord të shkëmbejnë eksperiencën e tyre nga ky aktivitet në nivel kombëtar për t’i dhënë një shtysë tjetër procesit të decentralizimit dhe transparencës fiskale. 

 

Duke e mbyllur, dëshiroj t’ju falenderoj për pjesëmarrjen në këtë seminar, si edhe për angazhimin tuaj në këtë projekt.