Përmbajtja:

• Presidenti Rugova përuroi objektin e Ndihmës së Shpejtë Mjekësore në Prishtinë

• Daci bisedoi në Tiranë me Islamin, Berishën dhe Moisiun

• Rexhepi priti një grup qytetarësh shqiptarë nga Mitrovica e Veriut

• Klinë: Situata është e qetë, por ende nuk është e favorshme për kthimin e të gjithë të të zhvendosurve

• Komisioneri Feler shpreh pikëllimin e thellë për vrasjen e pjesëtarit të SHPK-së

• Banka Botërore përfundoi projektin për aftësimin e gjykatësve

• Presidenti Rugova priti këshilltarin për mbrojtje në Misionin e SHBA-ve në NATO

• KFOR-i hedh poshtë pohimet e Holkerit para Këshillit të Sigurimit

• Në takimin Daci - Pëllumbi u theksua se bashkëpunimi mes Kosovës dhe Shqipërisë është shumë i mirë

• Në rajonin e Prizrenit vritet një pjesëtar i SHPK-së

• Qeveria e Kosovës debatoi për gjendjen në QKU dhe për rindërtimin e dëmeve nga trazira e marsit

• Pomeroj thotë se komuniteti ndërkombëtar duhet ta përqëndrojë vëmendjen më shumë tek Kosova

• Sot në Prishtinë mbahet takimi i katërt i mekanizmit përcjellës të procesit të stabilizim-asociimit për Kosovën

• Shkalla e vdekshmërisë së foshnjeve para lindjes në Kosovë është 28 në 1000 foshnje

• Në Gjakovë u hap edicioni i nëntë i panairit "Kosova 2004"

• Hezbollah prerjen e kokës së pengut amerikan e vlerëson krim të neveritshëm

• Shtatë palestinezë të vrarë në Gaza

• Akuza për abuzim dhe në Afganistan

• Nga një shpërthim bombe në Falluxha janë plagosur të paktën katër marinsa amerikanë

• Edhe pas arritjes së Ramsfeldit në Bagdad, vazhdojnë luftimet e ashpra

• Bush tha se nuk ka justifikim për vrasjen brutale të civilit amerikan në Irak

• "Lufta revolucionare" greke kërcënon Lojrat olimpike në Athinë

• Palestinezët ia kanë dorëzuar Izraelit kufomat e 6 ushtarëve të vrarë në Gaza

• Të paktën 30 njerëz janë vrarë në përleshjet dyditore në Nigeri

• Mbi 30 mijë kileanë janë torturuar ose burgosur për bindje politike gjatë regjimit 17-vjeçar të Pinoçetit

• Kleriku radikal shiit Al Sadër deklaron se do të vazhdojë luftën e tij kundër forcave amerikane

• Në bombardimet raketore në Gaza Izraeli ka vrarë 10 palestinezë

• Ramsfeld mbërriti sot pa paralajmërim në vizitë në Bagdad

• Shpërthim në Athinë

• Kina ka dënuar aktivistin me banim në SHBA, Jang Xhianli, me 5 vjet burg

Presidenti Rugova përuroi objektin e Ndihmës së Shpejtë Mjekësore në Prishtinë

 

Prishtinë, 13 maj 2004 - Presidenti i Kosovës Ibrahim Rugova në një ceremoni solemne përuroi sot në Prishtinë objektin e ri të Entit për Ndihmë të Shpejtë Mjekësore, e ku mori pjesë edhe kryetari i KK të Prishtinës me bashkëpunëtorët. Duke përuruar këtë objekt, i cili ka kushtuar 800 mijë euro, mjete këto nga buxheti komunal i Prishtinës, Presidenti Rugova tha se ndërtimi i këtij objekti tregon aftësinë e kosovarëve për të ndërtuar shtetin.   "Ky objekt që po e përurojmë sot tregon aftësinë tonë për të ndërtuar shtetin dhe shoqërinë e Kosovës dhe është shenjë e mirë për njohjen formale të pavarësisë së Kosovës", tha Presidenti Rugova, duke e vlerësuar këtë objekt të Ndihmës së Shpejtë edhe një sukses për Prishtinën dhe Kosovën.

 

Objekti për Ndihmë të Shpejtë Mjekësore konsiderohet investim kapital në infrastrukturën shëndetësore i financuar nga buxheti komunal. Drejtori i Drejtoratit për Shëndetësi të komunës së Prishtinës, Musli Mehajt, tha se ky objekt dëshmon se komuna u kushton kujdes të duhur investimeve në shendetësi.

Enti për Ndihmë të Shpejtë Mjeksore është pavarësuar nga Shtëpia e Shëndetit të Prishtinës në vitin 2002 dhe në të janë të punësuar 99 persona. Zyrtarët komunalë të Prishtinës thonë se ky ekip i punëtorëve është i gatshëm të ofrojë ndihmë mjekësore edhe në qytetet e tjera të Kosovës.

 

 

Daci bisedoi në Tiranë me Islamin, Berishën dhe Moisiun

 

Tiranë, 13 maj 2004 - Kryetari i Kuvendit të Kosovës Nexhat Daci po vazhdon vizitën e tij në Shqipëri me takimet e rëndësishme me krerët e shtetit shqiptar.

Kryeparlamentari Daci u takua me shefin e diplomacisë shqiptare Kastriot Islami, me të cilën ka biseduar për gjendjen në Kosovë dhe në rajon. Pas takimit Islami ka deklaruar se me zotin Daci ndante të njëjtat qëndrime, vlerësime e pikëpamje në shërbim të dy vendeve për integrim, si dhe për plotësimin e standardeve.

Ministri shqiptar ka thënë se dhuna e marsit është e papranueshme dhe ajo nuk çon drejt proceseve të integrimeve.

Nga ana e tij Daci ka thënë se politika e jashtme e Shqipërisë po bën më të mundshmen në qendrat e vendosjes botërore për të njoftuar për gjendjen në Kosovë. Sipas Dacit, stabiliteti në Shqipëri mund të shërbejë dhe ndihmojë më shumë në këtë drejtim.

Kastriot Islami u shpreh kundër planeve të Beogradit për kantonizimin e Kosovës, por për respektimin e rezolutës 1244 të KS.

Kryeparlamentari Daci u takua sot edhe me kryetarin e PD Sali Berisha, me të cilin ka biseduar për zhvillimet në Kosovë dhe Shqipëri. Daci po sot është takuar edhe me Presidetin e Shqipërisë, Alfred Moisiu.

 

 

Rexhepi priti një grup qytetarësh shqiptarë nga Mitrovica e Veriut

 

Prishtinë, 13 maj 2004 - Kryeminsitri Bajram Rexhepi priti një grup qytetarësh shqiptarë nga Mitrovica e Veriut. Në takim u diskutua për vështirësitë që këta qytetarë i kanë me lirinë e lëvizjes, kushtet e banimit, sidomos pas ngjarjeve të mesit të Marsit, kur edhe shumë shtëpi të qytetarëve shqiptarë u dëmtuan.

Qytetarët e Mitrovicës paraqitën tri kërkesa kryesore: kthimi i të gjithë personave të zhvendosur në shtepitë dhe pronat e tyre.

rindërtimi i shtëpive të djegura dhe të shkatërruara, siguria dhe qarkullimi i lirë për të gjithë banoret e qytetit të Mitrovicës pavarësisht përkatsisë.

Kryeministri pranoi kërkesat dhe informoi qytetarët se Qeveria po bën hapa konkret që të mundësoj qarkullimin e lirë të njerëzëve dhe mallërave pa pengesë në gjithë territorin e Kosovës. Këtë duke vazhduar të ushtroj ndikimin e saj tek UNMIK dhe KFOR që të mundësohet lëvizje e lirë për qytetarët e Kosovës në tërë Kosovën.

 

Andaj, pjesa veriore e qytetit të Mitrovicës nuk mund të paraqet përjashtim. Gjithashtu, Qeveria e Kosovës është përkushtuar për të rindërtuar shtepitë dhe objektet e shaktërruar gjatë trazirave dhe kjo detyrë do të zbatohet deri në fund në menyrë të barabartë për të gjithë qytetarët e vendit.

Kryeministri gjithashtu përmendi rëndësinë për dialog të brendshëm në mes të komuniteteve, process ky që ka për qëllim primar kthimin e mirëbesimit në mes të të gjitha bashkësive etnike që jetojnë në Kosovë.

 

 

Klinë: Situata është e qetë, por ende nuk është e favorshme për kthimin e të gjithë të të zhvendosurve

 

Klinë, 13 maj 2004 - Në një atmosferë konstruktive dhe me diskutime të gjata zhvilloi punimet grupi punues për kthimin e të zhvendosurve në këtë komunën e Klinës.

Kjo është një çështje e rëndësishme për implementimin e standardeve për Kosovën, tha administratori ndërkombëtar Ylmaz, i cili shprehu kënaqësinë për mbarëvajtjen dhe konstruktivitetin e punëve të këtije takimi.

Në këtë takim përpos përfaqësuesve të pushtetit komunal, ishin të pranishëm edhe përfaqësuesit e partive politike si dhe e DRC-së, organizatë që do të kontribuojë në kthimin e të zhvendosurve në fshatin Videje.

Kryetari i komunës Ramë Manaj shprehu gatishmerinë që kontributi i KK nuk do të mungojë dhe se komuna është e barabartë para çdo qytetari të saj.

Në vazhdim administratori ndërkombëtar përmendi edhe faktin se po punohet që edhe banorët e fshatit Binxhe dhe Grapce të kenë të zgjidhura kontestet pronësore. Poashtu tha se familjarët e kthyer do të kenë mundësi që fëmijët e tyre mund të ndjekin mësimet në shkollë si të gjithë nxënësit e tjere.

Në këtë takim morën pjesë edhe përfaqësuesit e fshatit Videjë, nga të dy komunitetet, ai shqiptar dhe serb.
Përfaqësuesi i KFOR-it tha se në Klina edhe pse situata është e qetë, gjendja ende nuk është e favorshme për kthimin e të gjithë të të zhvendosurve.

Përfaqësuesit e DRC-së shpjeguan planin që bën të mundur ndërtimin e 40 shtëpive dhe infrastruktureë, duke mos e përjashtruar edhe meremetimin e disa të tjerave. Në këtë takim foli edhe përfaqësuesi i serbëve të Videjës, Vlladan Prodoviq, i cili tha se ky projekt është ndër më të mirët deri më tani.

Përfaqësuesit e partive politike përkrahën kthimin e serbëve, por kërkuan një angazhim rreth fatit të pagjeturve, një integrim në shoqërinë kosovare të pakicave, duke njohur realitetin e ri ,si dhe kundërshtuan çdo enklavizim të mundshëm.

 

 

Komisioneri Feler shpreh pikëllimin e thellë për vrasjen e pjesëtarit të SHPK-së

 

Prishtinë, 13 maj 2004 - Komesioneri i policisë së UNMIK-ut Shtefan Feler, me rastin e vdekjes tragjike të pjesëtarit të SHPK-së në rajonin e Prizrenit Ilir Llapatinca, ka shprehur pikëllimin e tij të thellë. "Me pikëllim të thellë, mora lajmin për vdekjen e policit Ilir Llapatinca", thotë Feler në një njoftim pë media.

Ai ishte nisur për të ndihmuar në një konflikt familjar në fshatin Vraniq, ku u qëllua me armë zjarri. Në këtë shkëmbim zjarri polici i SHPK-së Ilir Llapatinca ka marrë plagë vdekjeprurëse.

 

Polici i ndjerë la pas veten gruan me dy fëmijë. "Si komisioner i policisë jam i prekur thellë me këtë humbje. Polici Llapatinca sakrifikoi jetën e tij në mbrojtje të qytetarëve të Kosovës", thekson komisioneri i policisë së UNMIK-ut Shtefan Feler.

 

 

Banka Botërore përfundoi projektin për aftësimin e gjykatësve

 

Prishtinë, 13 maj 2004 - Përfundoi projekti i Bankës Botërore për aftësimin e gjykatësve kosovarë në fushën ekonomike dhe gjykatave për përmirësimin e kualitetit të shërbimeve juridike në Kosovë.

Që nga viti i kaluar Banka Botërore ka ndihmuar Departamentin e administratës gjyqësore në një projekt për përforcimin e kapaciteteve të gjykatës ekonomik dhe asaj supreme si dhe në përmirësimin e cilsive të shërbimeve juridike në Kosovë.

 

 

Presidenti Rugova priti këshilltarin për mbrojtje në Misionin e SHBA-ve në NATO

 

Prishtinë, 12 maj 2004 - Presidenti i Kosovës Ibrahim Rugova ka pritur dje në një takim z. Evand Gellbrajt, këshilltar për mbrojtje në Misionin e Shteteve të Bashkuara në NATO, i cili shoqërohej nga shefja e Zyrës amerikane në Prishtinë, Marsi Ris. Në këtë takim është biseduar për gjendjen aktuale në Kosovë dhe për perspektivën politike dhe ekonomike të vendit tonë.

Me këtë rast Presidenti Rugova ka theksuar se njohja ndërkombëtare e pavarësisë së Kosovës do të qetësonte këtë pjesë të Evropës dhe do të siguronte mundësi për zhvillim më të shpejtë demokratik e ekonomik të vendit tonë. Pavarësia e vendit do të ndihmonte edhe në përshpejtimin e proceseve integruese brenda shoqërisë, ka theksuar Presidenti Rugova.

Z.Gallbrajt, përfaqësues i sekretarit amerikan të Mbrojtjes në Evropë, ka theksuar përkushtimin e Shteteve të Bashkuara në përpjekjet e përbashkëta për të zgjidhur çështjen e Kosovës, njofton Zyra për Informim e Presidentit Rugova.

 

 

KFOR-i hedh poshtë pohimet e Holkerit para Këshillit të Sigurimit

 

12 maj 2004 - KFOR-i nëpërmjet një komunikate ka hedhur poshtë pohimet e shefit të UNMIK-ut, Hari Holkeri, se forcat e KFOR-it i kanë përforcuar radhët e veta vetëm pas trazirave të marsit.

 

Në fjalimin para Këshillit të Sigurimit të OKB-së, të martën, Holkeri në lidhje me ngjarjet e marsit rreth reagimit të bashkësisë ndërkombëtare që të parandalohet dhuna ka thënë: "UNMIK-u nuk ka pasur mjete për të përforcuar forcat e veta të sigurimit, ndërsa KFOR-i ka përforcuar trupat e tij vetëm pas dhunës së marsit".

"KFOR-i hedh poshtë një deklaratë të tillë. Dje kemi pranuar njoftimin e UNMIK-ut lidhur me fjalimin e Holkerit para Këshillit të Sigurimit. Sipas këtij njoftimi Holkeri ka thënë se KFOR-i nuk ka marrë përforcime krejt përderisa dhuna është ndaluar.

 

Mirëpo përforcimi i forcave tona ka pasur një rol kyç në ndalimin e dhunës së marsit. Në afat prej 24 orëve përforcimi i parë është gjetur në terren dhe ka marrë pjesë në qetësimin e situatës. Forcat operative rezervë kanë pasur rolin kryesor në misionin e KFOR-it që në Kosovë të sigurojnë paqe dhe qetësi dhe kështu edhe do të vazhdojmë", thuhet në komunikatën e KFOR-it.

 

 

Në takimin Daci - Pëllumbi u theksua se bashkëpunimi mes Kosovës dhe Shqipërisë është shumë i mirë

 

Tiranë, 13 maj 2004 - Kryetari i Kuvendit të Kosovës Nexhat Daci me ftesë të homologut të tij Servet Pëllumbi po qëndron në Shqipëri, ku po takohet me krerët më të lartë të shetit shqiptar me qëllim të intensifikimit të marrëdhënieve Prishtinë - Tiranë dhe bashkëpunimin më të madh ndërmjet dy vendeve për të çuar përpara zhvillimet evroatlantike.

Kryeparlamentari Daci pas takimit me kryetarin e Kuvendit të Shqipërisë Servet Pëllumbi, që ka zgjatur 90 minuta, u shpreh para gazetarëve se për sfidat që po kalon Kosova dhe rajoni, nuk ka mundur të gjejë adresë më të veçantë dhe më kuptimplote se sa Parlamentin shqiptar dhe përgjithësisht Shqipërinë për mbështetjen që në planin e sensibilizimit që po i jep çështjes së Kosovë në kancelaritë dhe institucionet vendimarrëse ndërkombëtare.

 

Daci shtoi se nuk ka asnjë dallim në qasje dhe në vizion mes tyre për Kosovën dhe Kuvendi i Kosovës ka një mbështetje të fuqishme të Kuvendit të Shqipërisë, veçmas të kryetarit Pëllumbi, tha z. Daci.

Ndërkaq, kryetari i Kuvendit të Shqipërisë, Servet Pëllumbi tha se i vinte mirë që institucionet e Kosovës dhe populli i Kosovës kapërcyen problemet e shfaqura në ngjarjet e shfaqura të 17 e 18 marsit.

 

Pëllumbi tha se në Kosovë u tregua nga të gjithë pjekuria dhe vetëpërmbajtja. Ai vlerësoi se bashkëpunimi mes Kosovës dhe Shqipërisë është shumë i mirë, por tha se duhet punuar më shumë bashkarisht për përmbushjen e standardeve, që do të çojnë në përcaktimin final të statusit përfundimtar të Kosovës.

Kryeparlamentari Daci sot do të zhvillojë takime të veçanta me presidentin Moisiu, kryeministrin Nano, me ministrin e Jashtëm Kastriot Islami dhe liderin e opozitës Sali Berisha.

 

 

Në rajonin e Prizrenit vritet një pjesëtar i SHPK-së

 

Prizren, 13 maj 2004 - Një pjesëtar i Shërbimit Policor të Kosovës ka vdekur nga plagët e marra në një sulm në rajonin e Prizrenit. Siç njoftojnë mediat lokale, polici ishte plagosur me armë zjarri mbrëmë në përpjekje për të arrestuar një person të fshatit Vraniq të Therandës, i cili po mbante peng një grua dhe fëmijët e saj. Me atë rast edhe polici ka plagosur për vdekje personin e dyshuar.

Polici i plagosur ishte dërguar në spitalin e KFOR-it gjerman, ku kishte vdekur sot në mëngjes.

 

 

Qeveria e Kosovës debatoi për gjendjen në QKU dhe për rindërtimin e dëmeve nga trazira e marsit

 

Prishtinë, 13 maj 2004 - Gjendja në Qendrën Klinike Universitare dhe puna e Komisionit për rindërtimin e dëmeve nga trazirat e marsit ishin dy çështjet kryesore të agjendës së djeshme të Qeverisë së Kosovës. Zëdhënësja Mimoza Kusari tha se kabineti i ka dhënë përkrahje të plotë ministres së Shëndetësisë Mumxhi për punën që po bën në QKU.

 

Në kuadër të raportit për këtë qendër universitare u shqyrtua edhe forma e furnizmit me barëra, si dhe u theksua se domosdoshmërisht duhet të vendoset rregulli dhe transparenca në furnizim, të jetë e njohur gjithmonë origjina e furnizimit me barna dhe menaxhimi më i mirë në mënyrë që të eliminohen mundësitë e keqpërdorimeve. Ministrat kanë diskutuar edhe për punën e Komisionit për menaxhimin e fondeve të kryesuar nga ministri Brajshori.

 

U raportua se tenderët janë hapur në komunat e Fushë-Kosovës dhe të Vushtrrisë, si dhe kontratat për kompanitë fituese në këto dy komuna dhe të nënshkruhen brenda javës. Tenderi është në procedurë e sipër në Komunën e Mitrovicës, ndërkaq pritet disa nga familjet e komunitetit serb në Komunën e Kastriotit e të Ferizajit të kthehen në shtëpitë e tyre së shpejti pasi që dëmet nuk kanë qenë të mëdha në vendbanimet e tyre.

Ndërkaq demarkacioni i vijës kufitare ndërmjet Maqedonisë dhe Kosovës, do të zgjidhet në vitin 2005 me ndërmjetësimin e një pale të tretë, ka thënë zëdhënësja e Qeverisë së Kosovës.

 

 

Pomeroj thotë se komuniteti ndërkombëtar duhet ta përqëndrojë vëmendjen më shumë tek Kosova

 

Uashington, 13 maj 2004 - Anëtari i Dhomës së Përfaqësuesve të Kongresit amerikan Erl Pomeroj thotë se komuniteti ndërkombëtar duhet ta përqëndërojë vëmendjen më shumë tek Kosova.

Kongresisti Pomeroj thotë se me problemet në Irak vëmendja e administratës amerikane ka ndryshuar, por pas dhunës së muajit mars në Kosovë është e nevojshme që komuniteti ndërkombëtar të ushtrojë më shumë presion për të garantuar se do të bëhet përparim në politikën standardet para statusit, ka thënë z. Pomeroj në një intervistë për "Zërin e Amerikës".

 

 

Sot në Prishtinë mbahet takimi i katërt i mekanizmit përcjellës të procesit të stabilizim-asociimit për Kosovën

 

Prishtinë, 13 maj 2004 - Përfaqësuesi i Shtyllës së Katërt të UNMIK-ut konfirmoi se sot dhe nesër në Prishtinë do të mbahet takimi i katërt me radhë i mekanizmit përcjellës të procesit të stabilizim-asociimit për Kosovën.

 

Takimi do të kryesohet nga zëvendësshefi i UNMIK-ut Çarls Brajshou, kryeministri i Kosovës Bajram Rexhepi dhe drejtori i Drejtoratit të Komisionit Evropian për Ballkanin Perëndimor, Rajnhard Pribe. Takimi do të përqëndrohet në standardet për Kosovën, zhvillimin ekonomik dhe bujqësinë.

 

 

Shkalla e vdekshmërisë së foshnjeve para lindjes në Kosovë është 28 në 1000 foshnje

 

Prishtinë, 13 maj 2004 - Shkalla e vdekshmërisë së foshnjeve para lindjes në Kosovë është 28 në 1000. Kjo e dhënë është publikuar në konferencën: "Gjendja perinetale në Kosovë gjatë vitit 2003". Kushtet e vështira sociale, ekonomike dhe shëndetësore u përmendën si faktorët kryesorë të vdekshmërisë perinetale në vendin tonë.

Në konferencën gjendja perinatale në Kosovë gjatë vitit 2003 u tha se vetëm me angazhimin e përbashkët të të gjitha institucioneve shëndetësore mund të ndikohet në uljen e shkkallës së lartë të vdekshmërisë së foshnjeve në Kosovë.

 

 

Në Gjakovë u hap edicioni i nëntë i panairit "Kosova 2004"

 

Gjakovë, 13 maj 2004 - Në Qendrën e Panaireve në Gjakovë dje u hap edicioni i nëntë i panairit "Kosova 2004", në të cilin po marrin pjesë dhjetra firma nga Kosova dhe jashtë saj. Mark Çulaj, organizatori i panairit, bëri të ditur se në panairin e kësaj pranvere kanë shprehur interesimin për të marrë pjesë firmat, të cilat edhe më herët kanë qenë pjesëmarrëse në panair, por sipas tij, ka edhe që për herë të parë prezentohen para stendave të këtushme.

 

 

Hezbollah prerjen e kokës së pengut amerikan e vlerëson krim të neveritshëm

 

Bejrut, 13 maj 2004 - Grupimi gueril libanez Hezbollah ka dënuar prerjen e kokës pengut amerikan të cilin e mbanin të ngujuar ekstremistët irakianë, duke e vlerësuar këtë akt krim të neveritshëm që fyen parimet e fesë islame.

"Hezbollah dënon këtë akt të tmerrshëm i cili islamit dhe muslimanëve u ka shkaktuar dëm të madh, e të cilin e ka bërë grupimi që pohon se i takon fesë së mëshirës, ngushëllimit dhe parimeve humane", thuhet në një komunikatë të këtij grupimi shiit në Liban.

 

 

Shtatë palestinezë të vrarë në Gaza

 

Gaza, 13 maj 2004 - Shtatë palestinezë janë vrarë në një sulm me raketa nga izraelitët në një kamp refugjatësh në Rripin e Gazës. Sulmi ndodhi në kufi të kampit Rafah të refugjatëve në pjesën jugore të Rripit.

Me këtë rast edhe pesë të tjerë u plagosën. Ushtria izraelite thotë se të vdekurit ishin në mes një grupi që po përgatiteshin për të vendosur mjete shpërthyese.

Në atë kohë izraelitët po kryenin një operacion të madh në zonë. Ata kishin ardhur për të marrë kufomat e pesë ushtarëve të tyre të vrarë nga shpërthimi i një bombe.

Së paku 14 palestinezë u vranë dhe më shumë se 170 të tjerë janë plagosur gjatë luftimeve në Gaza.

 

 

Akuza për abuzim dhe në Afganistan

 

Kabul, 13 maj 2004 - SHBA është akuzuar nga një organizatë e të drejtave të njeriut për abuzim sistematik të të burgosurve në Afganistan.

Human Rights Watch tha se kishte dokumentuar disa raste të keqtrajtimit, të ngjashme me ato që njoftohen të kenë ndodhur në Irak dhe ka paralajmëruar autoritetet amerikane për këto probleme.

Ato përfshinin mungesë të theksuar gjumi, rrahje të rënda dhe zhveshje e fotografim të të burgosurve.

Akuza nga Human Rights Watch vjen një ditë pasi një zëdhënës ushtarak amerikan në Kabul tha se po kryheshin hetime mbi disa akuza të abuzimit të një oficeri afgan të arrestuar vitin e kaluar si dhe dhe vdekjet e të burgosurve që nga viti 2002.

 

 

Nga një shpërthim bombe në Falluxha janë plagosur të paktën katër marinsa amerikanë

 

Falluxha, Irak, 13 maj 2004 - Një bombë ka shpërthyer sot (e enjte) afër qytetit irakian Falluxha dhe kështu ka plagosur të pakten katër marinsa amerikanë, njëri syresh rëndë, kanë bërë të ditur dëshmitarët, njofton Rojter.

 

Zëdhënësi ushtarak amerikan ka refuzuar të komentojë nëse ky sulm do ta prishë armëpushimin ndërmjet forcave amerikane dhe guerilëve. Ai vetëm tha se "aktiviteti terrrorist po vazhdon në Falluxha".

 

 

Edhe pas arritjes së Ramsfeldit në Bagdad, vazhdojnë luftimet e ashpra

 

Qerbela, 13 maj 2004 - Forcat amerikane kanë zhvilluar edhe sot (e enjte) luftime të ashpra me milicinë irakiene në Qerbela, njofton AP. Tymi i dendur ka mbuluar këtë qytet të shenjtë irakian nga shkëmbimi i zjarrit dhe shpërthimet e shumta.

 

Luftimet po bëhen pas arritjes së sekretarit amerikan të Mbrojtjes, Donald Ramsfeld, në kryeqytetin irakian, Bagdad, në një vizitë të paparalajmëruar, që ka për qëllim qetësimin, siç thuhet, të stuhisë lidhur me abuzimet e të burgosurve dhe ngritjen e moralit të trupave amerikane.

 

Ai shoqërohet me gjeneralin e Forcave Ajrore Amerikane, Riçard Mejers dhe disa zyrtarë të Pentagonit.

 

 

Bush tha se nuk ka justifikim për vrasjen brutale të civilit amerikan në Irak

 

Uashington, 13 maj 2004 - Presidenti amerikan Xhorxh Bush thotë se nuk ka asnjë lloj justifikimi për vrasjen brutale duke i prerë kokën civilit amerikan Nikolas Berg në Irak. Ndërkohë Shtëpia e Bardhë u zotua t'i nxjerrë vrasësit para drejtësisë.

Presidenti Bush bëri dje një deklaratë të shkurtër duke i shprehur ngushëllimet familjes dhe miqve të zoti Berg. Vrasësit thanë se po hakmerreshin për abuzimin e të burgosurve irakianë nga forcat amerikane.

Bush tha se terroristët që vranë zotin Berg po përpiqen të thyejnë vullnetin dhe vendosmërinë e Amerikës, por shtoi se Shtetet e Bashkuara do ta çojnë deri në fund misionin e tyre për të ndërtuar një shoqëri të lirë dhe paqësore në Irak.

 

 

"Lufta revolucionare" greke kërcënon Lojrat olimpike në Athinë

 

Athinë, 13 maj 2004 - Grupimi ekstremist i majtë terrorist grek "Lufta revolucionare" u ka drejtuar një kërcënim vizitorëve që do të shkojnë në Lojrat olimpike në Athinë dhe ka marrë përgjegjësinë për atentatin e 5 majit ndaj një stacioni policor.

"Të gjithë përfaqësuesit e kapitalit ndërkombëtar dhe njerëzit afaristë, mercenarë anembanë botës, zyrtarë shtetërorë, si dhe turistë të pasur perëndimorë që plnafikojnë të marrin pjesë në Lojrat olimpike, janë të padëshirueshëm", thuhet në një komunikatë të botuar në gazetën e përjavshme greke "Pontiki".

Ndërkohë, qeveria greke nuk i ka kushtuar vemendje të veçantë atentatit të 5 majit, duke konsideruar se autorët nuk kanë aftësi të vërtetë operative dhe se nuk kanë dëshmi për lidhje me Lojrat olimpike, njofton AFP.

 

 

Palestinezët ia kanë dorëzuar Izraelit kufomat e 6 ushtarëve të vrarë në Gaza

 

Gaza, 13 maj 2004 - Dy zyrtarë palestinezë dhe një diplomat egjiptian ia kanë dorëzuar Izraelit në vendkalimin kufitar Erez kufomat e gjashtë ushtarëve të vrarë izraelitë në qytetin Gaza ka bërë të ditur një zyrtar palestinez, njofton AFP. Izraeli nuk e ka konfirmuar këtë informacion. Një zëdhënës ushtarak izraelit ka thënë me kusht anonimiteti se "ne nuk do ta komentojmë këtë çështje".

 

 

Të paktën 30 njerëz janë vrarë në përleshjet dyditore në Nigeri

 

Kano, Nigeri, 13 maj 2004 - Qetësia është rikthyer në qytetin verior nigerian Kano pas dy ditësh dhune të përgjakshme, ka bërë të ditur sot (e enjte) policia, njofton BBCWrld. Të paktën 30 njerëz njoftohet të jenë vrarë dhe 50 të tjerë janë plagosur në përleshjet dyditore të protestuesve me policinë.

 

Protesta janë zhvilluar në shenjë hakmarrjeje kundër një masakre të muslimanëve në fillim të këtij muajiqë kishin bvërë militantët kristianë.

 

 

Mbi 30 mijë kileanë janë torturuar ose burgosur për bindje politike gjatë regjimit 17-vjeçar të Pinoçetit

 

Santiago, Çile, 13 maj 2004 - Më shumë se 30 mijë kileanë thuhet se janë torturuar ose burgosur për bindje politike gjatë regjimit 17-vjeçar të Pinoçetit në Çile, që ka përfunduar më 1990, ka bërë të ditur një komision qeveritar, që ka verifikuar abuzimet e atëhershme të të drejtave të njeriut.

 

Grupet e të drejtave të njeriut kanë kritikuar këtë komision qeveritar dhe ata besojnë se gjatë qeverimit ushtarak janë torturuar dhe burgosur mbi 100 mijë njerëz.

 

 

Kleriku radikal shiit Al Sadër deklaron se do të vazhdojë luftën e tij kundër forcave amerikane

 

Qerbela, 13 maj 2004 - Kleriku radikal Shiit, Moktada al-Sadër, thotë se do të vazhdojë luftën e tij kundër forcave amerikane në pjesët jugore dhe qendrore të Irakut, pasi të paktën 22 nga anëtarët e grupit të tij ekstremist u vranë në luftimet me trupat amerikane në Qerbela gjatë natës.

Guvernatori rajonal i Naxhafit tha se do të shtynte procedurën ligjore kundër Moktada al-Sadrit në qoftë se ai çmobilizon forcat e tij. Kleriku kërkohet nga autorietet irakiane për vrasjen e një figure rivale fetare vitin e kaluar.

 

 

Në bombardimet raketore në Gaza Izraeli ka vrarë 10 palestinezë

 

Gaza, 13 maj 2004 - Izraeli ka vrarë sot (e enjte) 10 palestinezë në bombardimet raketore në pjesën jugore të Gazës, njofton Rojter. Incidenti ka ndodhur pas vrasjeve që i shkatuan ditë më parë në prita njëra palë tjetrës, kur humben jetën 11 ushtarë izraelitë, që ishin vrasjet më të rënda që kishte pësuar ushtria izraelite në dy vjetët e kaluara.

 

 

Ramsfeld mbërriti sot pa paralajmërim në vizitë në Bagdad

 

Bagdad, 13 maj 2004 - Sekretari amerikan i Mbrojtjes Donald Ramsfeld mbërriti sot pa paralajmërim në vizitë në Bagdad, ku tashmë i ka filluar bisedimet me zyrtarët ushtarakë amerikanë në Irak.

 

Më herët sekretari amerikan i Mbrojtjes ka deklaruar se nuk ka pasur gabime të mëdha ndaj të burgosurve irakianë. Ramsfeld edhe më tutje ndodhet nën presionin e kritikave të opinionit dhe veçanërisht të anëtarëve të Partisë Demokratike për shkak të sjelljeve të ushtarëve amerikanë ndaj të burgosurve irakianë.

 

 

Shpërthim në Athinë

 

Athinë, 13 maj 2004 - Para një banke në periferi të Athinës sot në mëngjes është aktivizuar një mjet shpërthyes që ka shkaktuar dëme të vogla materiale, ndërkaq viktima nuk ka pasur, ka bërë të ditur policia. Një bombë tjetër, e vendosur para një banke tjetër nuk ka shpërthyer.

 

Ky zhvilllim ka shqetësuar edhe më tepër banorët të cilët nga frika prej sulmeve terroriste janë në pritje të Lojrave olimpike.

 

 

Kina ka dënuar aktivistin me banim në SHBA, Jang Xhianli, me 5 vjet burg

 

Peking, 13 maj 2004 - Kina ka dënuar aktivistin me banim në SHBA, Jang Xhianli, me pesë vjet burg për hyrje ilegale në vend dhe për spiunim në favor të Tajvanit, njofton BBCWorld. Jang ka shkuar nga Kina në SHBA pas demonstratave prodemokratike në Sheshin Tienanmen më 1989.

 

Ai e kishte të ndaluar hyrjen në Kinë, por ai kishte shkuar atje më 2002 me një pasaportë të një shoku. SHBA-të kanë kërkuar lirimin e tij. Sipas agjencisë zyrtare të lajmeve, ai është akuzuar për spunim në favor të Tajvanit.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |