Përmbajtja:

• Holkeri mbështet standardet para statusit dhe hedh poshtë propozimin për kantonizimin e Kosovës

• KFOR-i do të vazhdojë me operacionet e kontrollit

• Zëdhënësi Hamiti mirëpret paralajmërimin e UNMIK-ut prej rolit administrues në rol monitories

• Në Ferizaj janë pezulluar tetë policë shqiptarë kurse në Shtërpcë dy policë serbë

• Agjencitë shpenzuese kërkojnë 236 milion euro, kurse suficiti buxhetor është vetëm 37.2 milion euro

• Bordi i AKM-së do të mblidhet atëherë kur të janë të gatshëm anëtarët e tij

• Mitrovicë: Shoqata e Familjeve të Dëshmorëve kërkojnë të caktohet Dita e dëshmorëve

• Dega LDK-së për Beneluks ngrit cilësinë e organizimit për realizimin e qëllimeve kombëtare

• Ministrat e arsimit të Maqedonisë dhe Shqipërisë nënshkruan programin e bashkëpunumit

• U zbulua një rrjet i trafikantësh shqiptarë, grekë e italianë me organet njerëzore në klinikat e Shqipërisë dhe Greqisë

• Agjencitë shpenzuese kërkojnë 236 milion euro, kurse suficiti buxhetor është vetëm 37.2 milion euro

• Maqedenia ka mbështetur propozim-tekstin për bashkëpunim në fushën e arsimit me Kosovën

• Ekstremistët në Irak vrasin një civil amerikan duke i prerë kokën

• Keqtrajtimet në burgun irakian, "dështim i udhëheqjes" mes ushtarakëve amerikanë

• Grupet palestineze mbajnë trupat e 6 ushtarëve izraelitë

• Kleriku radikal shiit Sadër kërkon bisedime me koalicionin

• SHBA vendos sanksione ndaj Sirisë

• Trupat amerikane kanë vrarë të pakten 20 milicë të Al-Sadrit

• Në një shpërthim në një fabrikë plastmasi në Glasgou kanë humbur jetën 7 persona

• Një person është vrarë dhe të pakten 3 të tjerë janë plagosur nga një shpërthim në Filipine

• Djali i akademikut saudit të burgosur është arrestuar për denoncimin e trajtimit të babait të tij

• Në Gaza janë vrarë 3 palestinezë dhe janë plagosur 8 të tjerë

• Në një sulm me mortaja në Irak janë vrarë 4 filipinas

• Më 8 qreshor do të ndodhë një fenomen i rrallë astronomik

• Një kolumbiane ka kontrabanduar në vaginë një bombë në burg

• Të pakten 7 trupa të pajetë janë numëruar në qytetin nigerian Kano

• Të pakten 7 trupa të pajetë janë numëruar në qytetin nigerian Kano

Holkeri mbështet standardet para statusit dhe hedh poshtë propozimin për kantonizimin e Kosovës

 

Nju-Jork, 12 maj 2004 - Në një fjalim që mbajti dje në Këshillin e Sigurimit të OKB-së, kryeadministratori i Kosovës Hari Holkeri kritikoi udhëheqësit politikë të Kosovës, përfshirë këtu edhe kryeministrin Bajram Rexhepi, të cilët tha ai, u treguan të ngadaltë në dënimin e sulmeve kundër objekteve fetare.

 

Z. Holkeri tha se vrasjet e muajit mars, e kanë tronditur në themel misionin e OKB-së në Kosovë dhe kanë sfiduar vazhdimësinë e përpjekjeve të komunitetit ndërkombëtar për ndërtimin e një Kosove shumetnike. Ai ka mbështetur standardet para statusit dhe ka hedhur poshtë propozimin e Beogradit për kantonizimin e Kosovës.

Holkeri tha se prokurorët në Kosovë kanë marrë në shqyrtim 130 raste që lidhen me dhunën e marsit dhe më shumë se 50 raste serioze u janë dorëzuar prokurorëve ndërkombëtarë. Ai tha se shpejtësia me të cilën u përhap dhuna në Kosovë në muajin mars e detyroi personelin e OKB-së atje që t'i bënte një analizë vetvetes.

 

Ai tha se Kombet e Bashkuara duhet të shikojnë ndoshta mundësinë e riorganizimit të strukturës së UNMIK-ut, por nuk dha hollësi të tjera. Holkeri kritikoi edhe zyrtarët e Qeverisë së Kosovës dhe mediat që nxorën përfundime të nxituara lidhur me shkaqet e mbytjes së fëmijëve shqiptarë, gjë që zemrojë banorët dhe luajti rol në shpërthimin e dhunës etnike. Holkeri tha se kushtet në Kosovë ende nuk janë pjekur për t'i detyruar pjesëtarët e pakicave që të kthehen në shtëpitë e tyre.

 

Ai tha se duke llogaritur në bazë të popullatës, misioni i OKB-së në Kosovë është më i kushtueshmi i këtij lloji në botë dhe se rezultatet e tij kanë qenë të kufizuara. Holkeri u bëri thirrje përfaqësuesve serbë që të marrin pjesë në procesin e zbatimit të standardeve për Kosovën dhe shtoi se do të bëjë të pamundurën që të rifillojë sa më shpejt që të jetë e mundur dialogu ndërmjet Prishtinës dhe Beogradit.

 

 

KFOR-i do të vazhdojë me operacionet e kontrollit

 

Prishtinë, 12 maj 2004 - Zëdhënësi i KFOR-it Xhim Moran tha sot para gazetarëve se dy muaj pas trazirave të marsit situata në Kosovë është e qetë. Tani ka ardhur koha që të shkohet përpara. Sipas zëdhënësit Moran shumë organizata kanë dalë me vlerësime, duke fajsuar të tjerët, por jo edhe veten për trazirat, tha ai.

 

KFOR-i do të vazhdojë me operacionet e kontrollit të shtëpive dhe veturave. Do të vazhdojë dhe me arrestimin e secilit që shkel ligjin, pavarësisht nga statusi që ka.

Ndërkaq zëdhënësja Matlde Heneke, po sot, tha se edhe administrata e UNMIK-ut po shqyrton me seriozitet qëndrimin e vet gjatë trazirave. "UNMIK-u ka analizuar atë që ka ndodhur në mars. Ne kemi pyetur veten nëse përggigjja jonë ishte ajo e duhura. A kemi bërë sa duhet për parandalimin e asaj që ndodhi"?, tha ajo.

 

Zonja Heneke tha se tashmë është themeluar një mekanizëm i veçantë që do ta analizojë atë që ka ndodhur dhe UNMIK-u do të marrë parasysh vlerësimet e këtij mekanizmi.

 

 

Zëdhënësi Hamiti mirëpret paralajmërimin e UNMIK-ut prej rolit administrues në rol monitories

 

Prishtinë, 12 maj 2004 - Raporti i përfaqësuesit Special të Sekretarit të Përgjithshëm Harri Holkeri paraqitur në Këshillin e Sigurimit ditën e martë ka dhënë evidenca me vlerë për gjendjen në Kosovë, për punët dhe sprovat e mëdha që dalin para UNMIK-ut dhe institucioneve të Kosovës, - thotë Muhamet Hamiti, zëdhënës i Presidentit të Kosovës Ibrahim Rugova.

"Na vjen mirë që po njihet gjithnjë e më shumë nevoja për partneritet të administrates ndërkombëtare dhe institucioneve kombëtare në Kosovë, për bartje të kompetencave dhe domosdo të përfshirjes së institucioneve të Kosovës edhe në pushtetet që njihen si të 'rezervuara', me synimin që të ketë qeverisje më efektive në vend.

 

Për këtë kanë ngulur këmbë institucionet tona për një kohë të gjatë", tha zoti Hamiti në një prononcim, duke komentuar fjalimin e djeshëm të Hari Holkerit para Këshillit të Sigurimit të OKB-së.

Zëdhënësi Hamiti tha se mirëpret edhe "paralajmërimin e PSSP-së për mundësinë e rikonfigurimit të UNMIK-ut, të strukturës së tij, i cili duhet të kalojë prej rolit administrues në rol monitories ndërsa po afrohet koha për përcaktimin e statusit përfundimtar të Kosovës, që do të jetë pavarësia".

"Në përgjithësi, diskutimi në Këshillin e Sigurimit dëshmoi se ky trup i lartë i OKB-së është mbështetës për Kosovën", tha Muhamet Hamiti, zëdhënës i Presidentit Rugova.

 

 

Në Ferizaj janë pezulluar tetë policë shqiptarë kurse në Shtërpcë dy policë serbë

 

Ferizaj, 12 maj 2004 - Në Ferizaj janë pezulluar nga detyra tetë pjesëtarë të SHPK-së, ka bërë të ditur zëdhënësi i policisë rajonale të UNMIK-ut në Gjilan, Ramjet Parmanand. Sipas fjalëve të tij kundër tetë policëve shqiptarë po zhvillohen hetimet për shkak të disa dyshimeve.

Më herët ishte njoftuar se edhe në stacionin policor në Shtërpcë janë pezulluar dy policë të përkatësisë serbe, komandanti dhe ndihmësi i tij. Zëdhënësi Parmanand ka thënë se ata janë pezulluar për shkak se nuk kanë dashur të punojnë me kolegët e tyre shqiptarë. "Kjo është e papranueshme", ka thënë ai.

 

 

Agjencitë shpenzuese kërkojnë 236 milion euro, kurse suficiti buxhetor është vetëm 37.2 milion euro

 

Prishtinë, 12 maj 2004 2004 - Në mbledhjen sotme të Komisionit Ndërqeveritar për Buxhet, që e kryesoi ministri i Ekonomisë dhe Financave Ali Sadriu, u trajtuan çështjet që kanë të bëjnë me trajtimin e prioriteteve për ndarjen e suficitit buxhetor të vitit të kaluar si dhe kërkesat e agjencive shpenzuese dhe hulumtimi i burimeve financiare shtesë.

Ministri Sadriu tha se kjo është hera e tretë që Komisioni për buxhet po shqyrton çështjen parësore të ndarjes së suficitit buxhetor, por sipas tij, ende nuk janë përcaktuar fushat e ndarjes së suficitit.

Ndërkaq, drejtori i Departamentit të Buxhetit Agim Krasniqi foli për nevojat dhe kërkesat e parashtruara nga agjencitë shpenzuese buxhetore, të cilat pretendojnë të përfitojnë mjete nga fondi i këtij suficiti.

Ministri Sadriu tha se kërkesat e agjencive shpenzuese janë shumë më të mëdha në krahasim me shumën e mbetur të suficitit që realisht është 37.2 milion euro. Prandaj ai propozoi para anëtareve të Komisionit që në këtë takim të përcaktohen prioritetet e prioriteteve, të atyre fushave që mund t'u ofrohet ndihmë.

Pjesëmarrësit e këtij takimi vunë në pah se ndarja e mjeteve nga suficiti për Trepçën, Aeroportin është bërë në mënyrë të njëanshme dhe pa konsultime paraparake me përfaqësuesit e institucioneve të Kosovës. Më këtë rast u potencua se është dashur me herët që të bëhet një planifikim se si do të shfrytëzohen këto mjete dhe kush do të ketë qasje në menaxhimin e tyre. U tha se suficiti është më mirë të përdoret nga institucionet e Kosovës dhe në dobi të qytetarëve të Kosovës.

Ministri Sadriu njotoi se kufijtë buxhetorë të vitit 2004 janë diskutuar dhe harmonizuar me PSSP-në dhe përfaqësuesit e Shtyllës së Katërt, porse ministria që ai drejton do të jetë shumë e kujdesshme ndaj agjencive shpenzuese në mënyrë që buxheti i vitit të ardhshëm mos të ketë suficit.

 

Ai permendi rastet e ndarjes së mjeteve nga suficiti që janë bërë më hërët pa pjesëmarrjen e MEF-it në takimin ku është vendos që të ndahen mjete për Aeroport, Trepçë etj. Nuk mund të anashkalohet ministria, pohoi ministri para anëtareve të Komisionit për buxhet.

Sadriu shfaqi brengën e tij dhe të institucionit që drejton, për kompanitë publike që menaxhohen nga AKM-ja, e që kanë mjete rezervë por nuk shfrytëzohen apo regjenerohen siç është rasti me PTK-në.

Vetëm nga raporti i vitit të kaluar shihet se rezervat e PTK-së janë 140 milionë euro, ndërkaq investimet në PTK për vitin 2004 nuk e kalojnë shumën prej 10 milion eurosh. Ndërsa shumat e tjera ruhen në bankat jashtë vendit.

 

Ministri pyeti se a do të thotë kjo se Kosova nuk ka nevojë për investime në fushën e
telekomunikacionit? Ai kërkoi nga pjesëmarrësit që bashkarisht të identifikojnë fushat ku mund të ndërhyhet me mjete nga suficiti.

 

Sadriu përmendi shumën fillestare të kërkesave që janë bërë nga agjencitë shpenzuese prej mëse 236 milion eurosh, ndërsa mbetja nga suficiti është vetëm 37.2 milionë euro.

 

Ai tha mbetet si obligim shuma prej 10 milion euro që i është premtuar Ministrisë së Punës dhe Mirqënies Sociale, ku nga kjo shumë duhet të kryhen obligimet ndaj pensioneve. Këtë e ka quajtur si domosdoshmëri sepse është bërë rritja e pensiove nga 35 në 40 euro si dhe është shtuar numri në listën e pensionistëve.

Ministri identifikoi si prioritet numër dy mbulimin e humbjeve nga ndërhyrjet e politikave fiskale, të cilat kapin shumën rreth 5 milionë euro, por që kjo çështje është prioritare dhe domosdoshmëri, vlerësoi ai.

Prioritet tjetër, sipas ministrit, është financimi i projekteve të komunave prej 21 milion eurove, pastaj projektet e TMK-së 4 milionë euro, kërkesat e KEK-ut janë 30 milionë euro dhe kërkesat e Ministrisë së Transportit dhe Telekomunikacionit 11 milion euro. Shuma e gjithëmbarshme e projekteve prioritare është 81 milionë euro, ndërsa shuma e suficitit është 37.2 milionë euro.

Të gjitha këto propozime për investime nga suficiti në projekte prioritare u përkrahën unanimisht nga të gjithë pjesëmarrësit e takimit. Por në fund u vendos që mbledhja e ardhshme e Komisionit të Buxhetit të mbahet më 15 maj, kur pritet të bëhet edhe identifikimi përfundimtar i projekteve prioritare që do të marrin vizën e financimeve nga suficiti i vitit 2003.

 

Vendimet nga ky takim do t'i kalojnë për shqyrtim qeverisë më 26 maj dhe më 27 maj në takimin e radhës të Këshillit Ekonimik Fiskal do të marrin formën e prerë.

 

 

Bordi i AKM-së do të mblidhet atëherë kur të janë të gatshëm anëtarët e tij

 

Prishtinë, 12 maj 2004 - Zëdhënësi i Shtyllës së Katërt të UNMIK-ut që udhëheqë me procesin e privatizimit, Kris Litier thotë se shefi i tij Nikolas Lambsdorf ka marrë kërkesën e anëtarëve vendorë të Bordit të AKM-së.

 

"Po ai ka marrë kërkesën dhe siç janë pajtuar në mbledhjen e 29 prillit me kryeministrin dhe anëtarët vendorë të Bordit z. Lamsdorf ka sygjeruar të mbahet mbledhja informuese e Bordit të AKM-së", tha Litier. Sipas tij Bordi i AKM-së do të mblidhet atëherë kur të janë të gatshëm anëtarët e tij.

 

 

Mitrovicë: Shoqata e Familjeve të Dëshmorëve kërkojnë të caktohet Dita e dëshmorëve

 

Mitrovicë, 12 maj 2004 - Zëvendëskryetari i Kuvendit të Komunës, Mursel Ibrahimi, priti një grup përfaqësuesish të Shoqatës së Familjeve të Dëshmorëve të UÇK-së, që udhëhiqej nga Alije Tmava, me të cilët bisedoi për çështje të ndryshme me të cilat përballet shoqata në punën e saj.

Anëtarët e shoqatës në bisedë me zëvendëskryetarin Ibrahimi paraqitën kërkesën e familjarëve të dëshmorëve të rënë në luftë, që institucionet e pushtetit lokal, në bashkëpunim me institucionet dhe subjektet e tjera, të përcaktojnë në nivel komune Ditën e dëshmorëve, në të cilën do të përkujtoheshin përnjëherë të gjithë dëshmorët e kombit nga territori i komunës. të rënë në luftë për çlirimin e vendit.

Zëvendëskryetari Mursel Ibrahimi pasi përshëndeti dhe përkrahu kërkesën e shoqatës, tha se Kuvendi i Komunës, në bashkëpunim me të gjitha subjektet relevante në komunë, do të shtrojë në procedurë të rregullt kërkesën e tyre, duke shpresuar se kjo do të hasë në mirëkuptim te të gjithë dhe se do të realizohet.

Poashtu, Ibrahimi premtoi se me rastin e emërtimeve të institucioneve, shesheve dhe rrugëve të komunës, emrat e dëshmorëve të rënë në luftë do të kenë prioritet dhe se asnjëri prej tyre nuk do të harrohet.

Z.Ibrahimi tha se Kuvendi i Komunës, organet e administratës dhe udhëheqja komunale do të angazhohen maksimalisht për të ndihmuar shoqatën dhe familjarët e dëshmorëve, në kuadër të mundësive dhe kompetencave që kanë.

 

 

Dega LDK-së për Beneluks ngrit cilësinë e organizimit për realizimin e qëllimeve kombëtare

 

Bruksel, 12 maj 2004 - Në Bruksel u takua Kryesia e degës së LDK-së për Beneluks, e kryesuar nga Gani Azemi, kryetar, e në të cilën u trajtuan disa çështje me interes, si edhe u morën disa qëndrime lidhur me aktivitetin e gjithëmbarshëm për periudhën e ardhshme dymuajshe.

Fillimisht z. Azemi i njoftoi anëtarët e Kryesisë për situatën aktuale në Kosovë e në veçanti shprehu mbështetjen e fuqishme për Kryesisë qendrore të LDK-së në Prishtinë dhe institucionet shtetërore të Kosovës, përkitazi me projektet serbe, tashmë të njohura, të cilat e kanë vetëm një qëllim, destabilizimin e Kosovës në keto momente vendimtare.

 

Andaj, pikërisht mbeshtetur në këto të dhëna, u tha se dega LDK-së për Beneluks duhet ngritur cilësinë e organizimit për realizimin e qëllimeve tona kombëtare deri në arritjen e qëllimit final, pra të njohjes formale të pavarësisë së Kosovës me në krye me Presidentin e Kosovës, Dr. Ibrahim Rugova.

Në vazhdim u fol edhe për disa çështje tjera që kanë të bëjë drejtpërdrejt me organizimin e brendshëm të vetë degës LDK-së për Beneluks, si përtëritja e komisioneve përkatëse me anëtarë të rinj, pastaj vizitë pune (aktivave dhe nëndegeve në Antwerpen, St. Niklaas, Luksemburg, Brugge etj.).

 

Poashtu u mor qëndrimi që gjatë dy muajve të ardhshëm (maj - qershor) të mbahen tubime informative në disa qendra të Belgjikës, kryesisht me anëtarët e rregullt dhe simpatizuesit e LDK-së.

Anëtarët e Kryesisë u njoftuan për parapërgatitjet rreth organizimit të shënimit të 5-vjetorit të çlirimit të Kosovës që do të mbahet më 14 qershor 2004 në qytetin Namyr.

 

 

Ministrat e arsimit të Maqedonisë dhe Shqipërisë nënshkruan programin e bashkëpunumit

 

Shkup, 12 maj 2004 - Në Shkup ministrat e arsimit të Maqedonisë dhe Shqipërisë Aziz Pollozhani dhe homologu i tij, Luan Memushi, kanë nënshkruar dje në Shkup programin bilateral të bashkëpunumit në fushën e arsimit dhe të shkencës.

 

Me këtë marrëveshje studentët dhe profesorët nga Maqedonia dhe Shqipëria tash e tutje do të mund të qëndrojnë në studime reciprokisht në universitetet e të dy vendeve. Ky bashkëpunim shënon një hap të rëndësishëm drejt integrimit evropian dhe rajonal të këtyre dy vendeve, si dhe do të mundësojë unifikimin e standardeve universitare.

Të dy ministrat kanë informuar se në kuadër të parimit të reciprocitetit deri më tash në Maqedoni janë nostrifikuar rreth 60 diploma të qytetarëve të Maqedonisë që kanë mbaruar studimet në universitetet e Shqipërisë.

 

 

U zbulua një rrjet i trafikantësh shqiptarë, grekë e italianë me organet njerëzore në klinikat e Shqipërisë dhe Greqisë

 

Tiranë-Athinë, 12 maj 2004 - Autoritetet gjyqësore greke kanë në duar të tyre një raport sekret të Ambasadës greke në Tiranë për një rrjet trafikantësh shqiptarë, italianë dhe grekë, që pasi u heqin fëmijëve organet nëpër klinikat mjekësore në Shqipëri dhe Greqi, i trafikonin për Itali ku edhe bëhej transplantimi i tyre për shuma të mëdha.

 

Raporti bazohet në një informacion të shërbimeve të fshehta italiane dhe shqiptare dhe shoqërohet me rekomandimin e Ambasadës greke për investigimin e çështjes dhe nga pala greke, kusht ky për shpalljen në vazhdim të ndjekjeve penale të personave të inkriminuar.

 

Në ditët e ardhshme çështja do të merret në dorë nga prokurori i Selanikut dhe në shënjestër të tij do të hyjë një klinikë mjekësore në Greqinë qendrore dhe një mjek gjinekolog grek. Në këtë trafikim thuhet të jenë implikuar 8 mjekë grekë. Në klinikën greke përfundonte që në vitin 1994 një pjesë e fëmijëve shqiptarë të Tiranë për "operacion" ku hiqeshin edhe organet.

Trafikantë gjenin fëmijë të hendikepuar apo fëmijë të familjeve të varfëra dhe i kalonin ilegalisht nëpërmjet pikëkalimit kufitar të Kapeshticës, ose kufirit Greqi - Shkup me qëllim të operimit të tyre, pra heqjen e organeve, ndërkaq në disa raste e njëjta gjë bëhej në Shqipëri. Në këtë rol, thuhet se hynin klinikat në Durrës dhe Fier.(më tepër)

 

 

Agjencitë shpenzuese kërkojnë 236 milion euro, kurse suficiti buxhetor është vetëm 37.2 milion euro

 

Shkup, 12 maj 2004 - Branko Cërvenkovski sot edhe zytarisht është shpallur president i Maqedonisë. Ai sot ka dhënë betimin në një seancë solemne të Kuvendit maqedonas dhe është inauguruar president i tretë i Republikës së Maqedonisë që nga pavarësimi i saj më 1991. Në seancën solemne merrnin pjesë shumë mysafirë të jetës publike e politike të vendit si dhe përfaqësues të huaj në Maqedoni.

Opozita zgjedhjet presidenciale i ka shpallur si falsifikat dhe jo të rregullta dhe prandaj nuk mori pjesë në në këtë seancë.

 

 

Maqedenia ka mbështetur propozim-tekstin për bashkëpunim në fushën e arsimit me Kosovën

 

Shkup, 12 maj 2004 - Ministri i Arsimit të Maqedonisë Aziz Pollozhani konfirmoi se Qeveria e Maqedonisë ka mbështetur propozim-tekstin për bashkëpunim të përgjithshëm në fushën e arsimit ndërmjet Maqedonisë dhe Kosovës. Kjo marrëveshje do të hyjë në fuqi pas firmosjes nga autoritetet e Shkupit dhe Prishtinës.

 

Ai ka thënë se me pranimin e këtij teksti nga ana e Qeverisë maqedonase ajo marrëveshje faktikisht ka hyrë në fuqi.

"Presim që në një takim rasti që do të realizohet ndërmjet ministrit të Arsimit dhe Shkencës së Maqedonisë dhe të Kosovës në bashkëpunim me autoritetet e UNMIK-ut, kjo çështje të zyrtarizohet në një formë ceremoniale", ka thënë ministri Pollozhani.

 

 

Ekstremistët në Irak vrasin një civil amerikan duke i prerë kokën

 

Bagdad, 12 maj 2004 - Një videokasetë e botuar në një faqe islamike interneti paraqet vrasjen e një personi duke i perë kokën. Viktima e identifikon veten si civil amerikan i kapur nga ekstremistët në Irak.

Personat që paraqiten duke kryer vrasjen, thonë se ata po hakmerren kundër abuzimit të të burgosurve irakianë që mbahen në burg nga forcat e koalicionit të udhëhequr nga Shtetet e Bashkuara.

Videokaseta paraqet pesë persona duke qendruar mbi robin e lidhur, i cili e identifikon veten si Nik Bergu, një civil amerikan, trupi i të cilit u gjet të shtunën në afërsi të Bagdadit.

Familja e 26 vjeçarit Nik Berg në Shtetet e Bashkuara thotë se është pikëlluar nga vdekja e tij. Anëtarët e familjes thonë se ai kishte qendruar në Irak nga dhjetori deri në shkurt, duke kërkuar punë në procesin e rindërtimit të infrastrukturës së atij vendi dhe se kishte shkuar për të dytën herë atje në mars.

 

 

Keqtrajtimet në burgun irakian, "dështim i udhëheqjes" mes ushtarakëve amerikanë

 

Uashington, 12 maj 2004 - Gjenerali amerikan i cili u mor me hetimin e abuzimeve me të burgosurit irakianë në Irak, tha se këto keqtrajtime pasqyronin atë që ai e quajti "një dështim të udhëheqjes" midis oficerëve ushtarakë amerikanë.

Duke dëshmuar të martën përpara Komisionit të Senatit për shërbimet e armatosura, gjeneralmajori Antonio Taguba tha se në burgun Abu Graib të Bagdadit ka patur mungesë disipline si dhe mungesë ose të kualifikimit stërvitor, ose të mbikqyrjes.

Ai tha se abuzimet ishin të kufizuara vetëm tek disa ushtarë dhe kontraktues civilë dhe se nuk ekzistonte ndonjë politikë për keqtrajtimin e të burgosurve.

 

 

Grupet palestineze mbajnë trupat e 6 ushtarëve izraelitë

 

Gaza, 12 maj 2004 - Grupet ekstremiste palestineze thonë se mbajnë trupat e gjashtë ushtarëve izraelitë të vrarë gjatë një ditë luftimesh në Qytetin Gaza, në të cilat humbën jetën edhe tetë palestinezë.

Televizioni transmetoi pamje në të cilat ekstremistët shihen duke paraqitur triumfalisht trupat e 6 ushtarëve. Xhihadi Islamik dhe Brigadat Martire Al-Aksa thonë në një deklaratë të përbashkët se do t'i bëjnë të njohura kushtet për kthimin e trupave.

 

 

Kleriku radikal shiit Sadër kërkon bisedime me koalicionin

 

Bagdad, 12 maj 2004 - Kleriku radikal Shiit, Moqtada al-Sadr, thotë se është gati t=i japë fund ballafaqimit me forcat e koalicionit në disa pjesë të Irakut jugor dhe qendror, nëse forcat e koalicionit të udhëhequra nga Shtetet e Bashkuara bien dakord për bisedime.

Nuk ka patur komente nga ana e zyrtarëve amerikanë për ofertën e sotme, por ata kanë përsëritur më parë se nuk do të zhvillojnë bisedime të drejtëpërdrejta me klerikun, i cili kërkohet për vrasjen e një figure fetare kundërshtare vitin e kaluar.

 

 

SHBA vendos sanksione ndaj Sirisë

 

Uashington, 12 maj 2004 - SHBA ka ndaluar të gjitha eksportet amerikane në Siri pas ankesave të Uashingtonit se Damasku përkrah terrorizmin. Presidenti Bush tha se veprimet e qeverisë siriane përfaqësonin një kërcënim të jashtëzakonshëm për sigurinë kombëtare, politikën e jashtme dhe ekonominë e SHBA-së.

Masa e re gjithashtu përmban edhe ndalim të fluturimeve nga dhe për në SHBA, autorizim për të ngrirë pasuritë e shtetasve sirianë dhe kufizime në marrëdhëniet bankare midis të dy shteteve.

Disa orë pas njoftimit, qeveria siriane tha se sanksionet ishin të pajustifikuara. Por kryeministri sirian, Mohamrd Naji Otri tha se sanksionet nuk do të kishin ndonjë efekt mbi Sirinë.

 

 

Trupat amerikane kanë vrarë të pakten 20 milicë të Al-Sadrit

 

Qerbela, Irak, 12 maj 2004 - Trupat amerikane, të mbështetura nga tanket dhe automjetet e tjera të blinduara, kanë vrarë të pakten 20 milicë lojalë të klerikut kryengritës, Moktada al-Sadër, në luftimet e ashpra në qytetin e shenjtë shit, Qerbela, ka bërë të ditur një zyrtar i lartë ushtarak amerikan, njofton Rojter.

 

Banorët kanë thënë se luftimet kanë shpërthyer mbrëmë dhe po vazhdojnë edhe sot (e merkurë). Pjesëtarët e milicisë së Armatës së Mehdiut të Al Sadrit gjenden brenda në një xhami të rrethuar nga forcat amerikane. Zëdhënësi ushtarak në Bagdad thotë se janë vrarë 20 deri në 25 milicë dhe janë plagosur 7 ushtarë amerikanë.

 

 

Në një shpërthim në një fabrikë plastmasi në Glasgou kanë humbur jetën 7 persona

 

Gllazgou, 12 maj 2004 - Konfirmohet se në një shpërthim në një fabrikë plastmasi në Gllazgou kanë humbur jetën shtatë persona, kurse janë plagosur me dhjetëra të tjerë, njofton BBCWorld. Ekipet e shpëtimit kanë punuar gjithë natën me shpresë për të gjetur të gjallë të shpëtuar nga shpërthimi.

 

 

Një person është vrarë dhe të pakten 3 të tjerë janë plagosur nga një shpërthim në Filipine

 

Manila, Filipine, 12 maj 2004 - Një person është vrarë, kurse të pakten tre të tjerë janë plagosur nga një shpërthim në ujdhesën Jolo të Filipineve, kanë bërë të ditur zyrtarët e sigurimit, njofton BBCWorld.

 

Mjeti shpërthyes është hedhur në automjetin e policisë, por nuk ia ka qëlluar cakut, kështu që i ka goditur kalimtarët e rastit. Nuk është e qartë nëse sulmi ka lidhje me zgjedhjet e së hënës, të cilat kanë shkaktuar zgjerimin e dhunës. Grupi militant islamik Abu Sajaf vepron atje që prej shumë vitesh.

 

 

Djali i akademikut saudit të burgosur është arrestuar për denoncimin e trajtimit të babait të tij

 

Riad, 12 maj 2004 - Djali i akademikut sdaudit të burgosur njoftohet se është arrestuar për denoncimin e trajtimit të babait të tij, njofton BBCWorld. Akademiku i linjes së fortë islamiste, Said bin Zair, është arrestuar muajin e kaluar për nxitjen e bombëvënieve vetëvrasëse në stacionin televiziv al-Xhazira të Katarit.

 

I biri Mubarak është arrestuar një javë më vonë për përhapje të "deklaratave të rreme" në të njëjtin televizion.

 

 

Në Gaza janë vrarë 3 palestinezë dhe janë plagosur 8 të tjerë

 

Gaza, 12 maj 2004 - Një helikopter izraelit ka hapur zjarr raketor afër një xhamie në qytetin Gaza dhe kështu ka vrarë sot (e mërkurë) tre palestinezë dhe ka plagosur të paktën tetë të tjerë, kryesisht gra dhe fëmijë, kanë bërë të ditur dëshmitarët dhe burimet mjekësore, njofton Rojter.

 

Atrmata izraelite ka thënë se ka shkrepur në një grup që po vendoste mjete shpërthyese kundër forcave izraelite në afërsi të Zejtounit, ku militantët palestinezë kishin vrarë me një shpërthim gjashtë ushtarë izraelitë gjatë një sulmi të djeshëm.

 

 

Në një sulm me mortaja në Irak janë vrarë 4 filipinas

 

Bagdad, 12 maj 2004 - Katër filipinas janë vrarë nga një sulm me mortaja në një kamp ushtarak amerikan në Irak, ka bërë të ditur sot (e mërkurë) presidentja Gloria Masapagal Arroho, njofton BBCnews.

 

Të katër të vrarët kanë qenë kontraktues civilë, që kanë punuar në kampin Anakonda në rajonin sunit në veri të Bagdadit. Vlerësohet se në Irak punojnë tremijë civilë filipinas, së bashku me 100 policë, ushtarë dhe personel mjekësor.

 

 

Më 8 qreshor do të ndodhë një fenomen i rrallë astronomik

 

Lankshir, Britani, 12 maj 2004 - Evropa, Lindja e Mesme dhe një pjesë e Azisë dhe Afrikës në qershor mund të përjetojnë një fenomen të jashtëzakonshsm astronomik, i cili nuk ka ndodhur ka 122 vjet. Fjala është për kalimin e Venerës përtej Diellit.

Nëse koha lejon, astronomët dhe qytetarët më 8 qershor do të mund të vëzhgojnë sesi planeti i quajtur sipas perëndeshës romake të dashurisë dhe bukurisë, kalon saktësisht midis Tokës dhe Diellit.

Ky është një rast unik, sepse ky fenomen herën e fundit ka ndodhur më 6 dhjetor të vitit 1882, ndërkaq herën tjetër mund të shihet më 6 qershor 2012.

"Diçka e mrekullueshme dhe pasionuese do të ndodhë më 8 qershor dhe do të mund të dëshmojnë me miliona njerëz anembanë botës", ka thënë Gordon Bromaxh, profesor i astronomisë në Universitetin Central Lancashire. "Fjala është për fenomenin shumë të rrallë astrologjik", ka shtuar ai.

Kalimi i Venerës, e cila në atë moment do t'i ngjajë sferës së zezë, në mëngjes mund të shihet në Britani, në pjesën më të madhe të Evropës dhe Afrikës, e diçka më vonë në Lindjen e Mesme dhe në në Rusi e Indi, kurse kah fundi i ditës në Lindjen e Largët.

Shkencëtarët paralajmërojnë qytetarët të mos shikojnë drejt Diellit pa mbrojtjen e syve ose nëpër teleskop ose kamerë, sepse mund të verbohen dhe këshillojnë përdorimin e filterëve për diell.

 

 

Një kolumbiane ka kontrabanduar në vaginë një bombë në burg

 

Bogota, 12 maj 2004 - Një kolumbiane ka kontrabanduar në vaginë një bombë në burg, e cila ka shpërthyer dhe ka vrarë tre të burgosur.

Kjo grua kishte kontrabanduar një granatë gjatë vizitës në burgun e meshkujve Villa Hermosa në qytetin Kali, kurse bomba kishte shpërthyer nga pakujdesia e të burgosurve, ka deklaruar zëdhënësja e burgut Luina Maria Hojos.

"E kishte futur në vaginë", ka thënë Hojos, duke shtuar se gardianët nuk kanë guxuar të kontrollojnë gjenitalet e gruas, e cila e ka lënë bombën dhe e papenguar është larguar nga burgu.

Burgjet e Kolumbisë janë në zë të keq për nga dhuna dhe anarkia. Në disa syresh, të burgosurit janë të armatosur, shfrytëzojnë shërbimet e prostitutave dhe porosisin ushqim nga restoranet.

 

 

Të pakten 7 trupa të pajetë janë numëruar në qytetin nigerian Kano

 

Kano, Nigeri, 12 maj 2004 - Qyteti nigerian Kano ka kaluar natën me orë policore, ngase policia po përpiqet të pengojë dhunën e të rinjve muslimanë, të cilët kërkojnë të hakmirren për një masakër të javës së kaluar, njofton BBCnews. Policia ka konfirmuar se dje ka pasur vrasje kur një turmë ka sulmuar jomuslimanët në rrugët e pjesës veriore të qytetit.

 

Dëshmitarët kanë numëruar të pakten shtatë trupa të pajetë nëpër rrugë, disa syresh të djegur. Liderët muslimanë i janë bashkuar liderit të Nigerisë në qetësimin e situatës. Që nga përfundimi i qeverisjes ushtarake më 1999, mbi 10 mijë njerëz janë vrarë në dhunën etnike, fetare dhe politike në vend.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |