Monolog i Nanos me rkitikat e Brukselit

OPINIONE

Koment

Monolog i Nanos me kritikat e Brukselit

12 maj 2004 / TN

Çerçiz LOLOÇI (Tiranë,11 maj)

Dje është zhvilluar mbledhja e Këshillit të Përgjithshëm Drejtues të PS-së për të analizuar raportet problematike të Brukselit dhe Uashingtonit për Shqipërinë ku lideri socialist dhe kryeministri shqiptar Fatos Nano nuk "ka përtuar" për t'ia faturuar sërish opozitës dhe për të rikthyer "gogolin" Berisha si përgjegjësit kryesorë për shkallën e lartë korruptive të zyrtarëve të lartë dhe të deputetëve, për paefikasitetin shtetëror në luftën ndaj krimit dhe trafiqeve të paligjshme dhe për një sërë dukurish të tjera që janë bërë refren dhe që përmenden përditë herë nga një institucion ndërkombëtar dhe herë nga një tjetër.

Ndryshe nga mbledhjet e tjera të KPD-së, zoti Nano u ka kushtuar një vend të veçantë edhe kamikazëve brenda partisë, strukturave drejtuese të grupit parlamentar dhe të kryesisë që gjithçka e presin prej atij, duke i kërcënuar me një sagë kongresi të jashtëzakonshëm.

Opozita, si çdo opozitë në një vend normal demokratik (natyrisht jo si vendi ynë që është vështirë të përcaktosh natyrën e sistemit, sepse pushtetet burojnë nga kryeministri dhe i takojnë atij), ka përgjegjësitë e veta që nuk mund t'i marrë nga kundërshtari politik, por nga dimensioni i saj i pazëvendësueshëm.

Opozita shqiptare dhe jo vetëm Partia Demokratike ka qenë luajale dhe ka dhënë konsensusin për shumë ligje, amendamente që kanë të bëjnë me plotësimin e kushteve dhe standardeve europiane, por është tjetër kush, në rastin më të drejtpërdrejtë qeveria si partnere kryesore që nuk ka përmbushur detyrimet e saj.

Opozita ka qenë tërësisht dakord, në parlament dhe në publik, për nënshkrimin e marrëveshjes bilaterale Tiranë-Uashington në lidhje me gjykatën e Hagës; opozita ka mbështetur dhe përkrahur unanimisht dërgimin e trupave paqeruajtëse shqiptare në Bosnjë-Hercegovinë, Afganistan dhe në Irak jo vetëm për të dhënë një provë të vokacionit të saj properëndimor, por edhe për të mos hedhur poshtë investimet në fushën e Mbrojtjes dhe të sigurisë kombëtare me aleatët euroatlantikë.

Nuk mund të ndodhë që të gjitha propozimet, draft-ligjet dhe veprimet politike të opozitës të jenë racionale për t'u marrë në konsideratë nga mazhoranca, por deri më sot nuk ka qoftë edhe një hap që të jetë mbështetur njëra prej tyre, madje edhe në rastet kur ato shkojnë në funksion të forcimit të institucioneve, në dobi të pavarësimit të disa shtyllave bazë për një shoqëri demokratike.

Autokritikat leniniste, përpjekja për t'u "hedhur hi syve" perëndimorëve, në një proces të tejmonitorueshëm dhe të kontrollueshëm prej opozitës, prej mediave dhe prej ndërkombëtarëve; shpërndarja e kritikave djathtas, ndërsa vazhdojnë vërejtjet për struktura shtetërore - kjo është edhe tabloja e djeshme e mbledhjes së KPD-së dhe e zemërimit të kryeministrit Fatos Nano.