Përmbajtja:

• Kris Paten tha në Prishtinë: Bashkimi Evropian dëshiron të shohë Kosovën si simbol të demokracisë

• Filip Goldberg do të jetë shefi i ri i Misionit të SHBA-ve në Prishtinë

• Kosovarët fitojnë 14 medalje në garat e karatesë në Shkup

• Basketboll: BpB Prishtina është fituese e Kupës së "Ligës Profesioniste të Basketbollit të Kosovës (LPBK)"

• Gjenerali Erlandson tha se Kosova nuk kërcënohet nga terroristët

• BE hap zyrën e Tempusit në Kosovë

• Janë kryer përgatitje për organizimin e zgjedhjeve parlamentare në Kosovë

• Deri në fund të këtij muaji Beogradi dorëzon rreth 30 trupa të shqiptarëve të ekshumuar në Batajnicë

• Uejn Meri: Kosovarët e respektojnë vetëm praninë amerikane

• Kryeparlamentari Daci priti kryetarin e Gjykatës Supreme të Kosovës

• Kosova do ta ketë ligjin më të mirë të shëndetësisë në rajon, u tha në një seminar të sotëm

• Zhvillohen debate publike për sfidat e zhvillimit hapësinor

• Holkeri flet sot në KS të OKB-së për gjendjen në Kosovë

• Zyrtarë të UNMIK-ut thonë se Kuvendi i Kosovës nuk mund të bëjë ndryshime në Kornizën Kushtetuese pa pëlqimin e OKB-së

• Misioni i OSBE-së do të fillojë një seri takimesh me drejtuesit e gjykatave në çdo komunë të Kosovës

• Është shumë më vështirë të rikthehet besimi ndërmjet etniteteve se sa sanimi i dëmeve të shkaktuara

• Prishtina tash ka edhe Asamblenë komunale të fëmijëve

• Paten paralajmëron Beogradin: ose me BE-në ose refuzimi i Hagës

• Trupat amerikane kanë vrarë 13 pjesëtarë të Armatës së Mehdiut

• Nga një shpërthim në Kirkuk, kanë humbur jetë 3 persona

• Në një shpërthim në Rripin e Gazës kanë humbur jetën 6 ushtarë izraelitë

• Në një sulm në Bagdad është vrarë një rus dhe janë rrëmbyer peng dy të tjerë

• Në një sulm të një autokolonë prej 21 automjetesh furnizuese, janë zhdukur disa persona

• Vazhdojnë dëshmitë rreth abuzimeve në Irak

• Që nga e diela në Irak janë vrarë 35 përkrahës të klerikut al-Sadër

• Presidenti Bush viziton Pentagonin

• Bush thotë se vendet në zhvillim duhet të ndërmarrin reforma ekonomike dhe politike

• Amnesty International kritikon Britaninë

• Në një marsh protestues në Naxhaf është kërkuar që al-Sadri të largojë milicinë e tij nga qyteti

Kris Paten tha në Prishtinë: Bashkimi Evropian dëshiron të shohë Kosovën si simbol të demokracisë

 

Prishtinë, 11 maj 2004 - Komisioneri i BE-së për Politikë të Jashtme, Kris Paten gjatë qëndrimit të tij dje pasdite në Prishtinë tha se dëshiron të shohë që liderët shqiptarë dhe serbë të bashkëpunojnë mes tyre për riparimin e asaj që u dëmtua gjatë trazirave të marsit.   Paten tha se vetëm me një bashkëpunim ndërmjet komuniteteve mund të krijohet një shoqëri shumetnike në Kosovë, që e dëshiron edhe bashkësia ndërkombëtare.

 

Ai theksoi se Kosova duhet të jetë simbol i demokracisë, përparimit, harmonisë dhe i tolerancës, duke shtuar se vetëm kështu Kosova mund të tërheqë investime të jashtme, ndryshe askush nuk do të investojë.

 

Komesioneri Paten i bëri këto komente pas takimeve që i zhvilloi me udhëheqësit kryesorë politikë të Kosovës dhe siç theksoi, ngjarjet e turpshme të marsit dëmtuan shumë imazhin e Kosovës para bashkësisë ndërkombëtare.

 

Por, megjithatë Paten tha se është i kënaqur me planet për rindërtimin e objekteve të dëmtuara dhe me përpjekjet për vënien para drejtësisë të atyre që kanë qëndruar prapa ngjarjeve të marsit.

Paten e quajti me rëndësi për Kosovën edhe debatin mbi reformen e pushtetit vendor, që pritet të hapet gjatë javëve dhe muajve të ardhshëm.

 

Presidenti i Kosovës Ibrahim Rugova pas takimit me Kris Paten tha se gjendja pas trazirave të marsit ka filluar të normalizohet dhe konsolidohet, duke kërkuar fillimin e investimeve në Kosovë dhe kyçjen e Kosovës në marrëveshjen e asociim -stabilizimit në Bashkimin Evropian.

"Ne do të fillojmë rindërtimin e objekteve që janë dëmtuar dhe po ashtu do të shikojmë t'i integrojmë të gjithë në këtë projekt dhe që të shkojmë më shpejt përpara. Biseduam për mundësinë e investimeve në Kosovë, që z. Paten na ka ndihmuar shumë.

 

Sivjet kemi një vit të zgjedhjeve dhe ne do të angazhohemi të kemi zgjedhje të lira, që të kemi institucione stabile dhe do të punojmë në stabilitetin e Kosovës", tha Presidenti Rugova. Poashtu ai theksoi pas takimi me z. Paten se me njohjen e pavarësisë së Kosovës do të kishin ecur përpara proceset e brendshme dhe integrerative.

 

"Ky është një imperativ i kohës dhe është një kërkesë e popullit të Kosovës dhe kjo do të qetësonte këtë pjesë të Evropës", tha Presidenti Rugova.

Ndërkaq, kryeministri Bajram Rexhepi gjatë takimit me z. Paten premtoi vazhdimin e përkushtimit të Qeverisë së Kosovës për kryerjen e të gjitha obligimeve të marra nga ana e Qeverisë. Ai premtoi se do të rindërtohen të gjitha objektet e banimit dhe ato të kultit.

"Ajo çka diskutova unë sot me Kryeministrin, paraqet një fillim pozitiv dhe mendoj se edhe ai e di shqetësimin tonë që ky fillim pozitiv duhet të vazhdojë edhe më tutje", tha Paten.

Më herët Kris Paten është takuar me delegacionin e koalicionit serb "Kthimi". Oliver Ivanoviq citohet të ketë thënë se është i pakënaqur me gjendjen e sigurisë dhe zvogëlimin e trupave të KFOR-it pas ngjarjeve të marsit. Ai thotë se serbët nuk do të marrin pjesë në institucionet e Kosovës derisa para drejtësisë nuk do të sillen organizatorët e trazirave të marsit.

Paten është takuar edhe me kryeparlamentarin Nexhat Daci, si dhe me zëvendësadministratorin e Kosovës, Çarls Brajshou. Mbrëmë vonë Paten ka udhëtuar për një vizitë në Beograd.

 

 

Filip Goldberg do të jetë shefi i ri i Misionit të SHBA-ve në Prishtinë

 

Prishtinë, 11 maj 2004 - Shefi i ri i Misionit të SHBA-ve në Prishtinë do të jetë Filip Goldberg, i cili në këtë detyrë do të zëvendësojë zonjën Marsi Ris, e cila së shpejti i jep fund mandatit njëvjeçar në Kosovë, shkruan sot gazeta e përditshme "Zëri". Goldberg është "një diplomat i shkëlqyeshëm dhe njohës shumë i mirë i rrethanave në Ballkan, prandaj ardhja e tij në Prishtinë do të jetë një konfirmim tjetër i preokupimit të Uashingtonit me çështjen e Kosovës", shkruan gazeta në fjalë, duke u mbështetur në burimet e saj në Uashington.

 

   

Kosovarët fitojnë 14 medalje në garat e karatesë në Shkup

 

Shkup, 11 maj 2004 - Në pallatin e sporteve "Rasadnik" në Shkup të dielen u mbajt Kampionati i hapur evropian i Asociacionit Ndërkombëtar të Karatesë (International Karate Association-IKA). Në këtë garë morën pjesë afro 90 garistë, përfaqësues të disa shteteve: Shtetet e Bashkuara të Amerikës, Italia, Bullgaria, Maqedonia, Kosova dhe disa shtete të tjera.

 

Kosovarët janë përfaqësuar me 11 karateistë nga klubi "Iliria" të Prishtinës, të cilët kanë fituar 14 medalje: 6 të arta, 4 të argjendta dhe 4 të bronzta. Garat janë zhvilluar në kumite dhe në kata në konkurrencën individuale për juniorë dhe seniorë në kategorinë absolute për femra dhe meshkuj dhe në konkurrencën ekipore.

Në konkurrencën e junioreve, Fjona Beqiri u bë kampione evropiane në kumite, ndësa në kata fitoi medaljen e argjendtë, kurse te junorët Jetmir Rexhepi u bë kampion i dyfishtë, në luftra dhe në kata, Linditrim Gashi në luftra fitoi medaljen e argjendtë, kurse në kata të bronztën, ndërsa Esat Lika në luftra u stolis me medaljen e bronztë, kurse në kata me të argjendtën.

Në konkurrencën e senioreve, titullin e kampiones evropiane të Asociacionit Ndërkombëtar të Karatesë në kumite (luftra) e fitoi Ermira Statovci, e cila njëherësh zuri edhe vendin e tretë në kata, nënkampione u shpall Marigona Beadini, kurse me medaljen e bronztë u stolis Ardiana Rexhepi.

Në konkurrencën e seniorëve në luftra Besart Vitia ishte pakrahasueshëm më i mirë se të gjithë kundërshtarët e tij, kështu që me meritë të plotë u shpall kampion, ndërsa medaljen e artë kosovarët u stolisën edhe në konkurrencën ekipore në kumite, ngase Besart Vitia, Besim Ilazi, Esat Lika dhe Asdren Myrtaj në gjysmëfinale ishin më të mirë se ekipi i Maqedonisë, kurse në finale e mundën bindshëm me 3:0 ekipin përfaqësues të Italisë.

Në këtë kampionat drejtësinë e ka ndarë edhe Safet Ramadani, gjyqtar kryesore në garat eliminatore dhe në pjesën finale.

Këtij kampionati i ka paraprirë seminari dyditor, i udhëhequr nga Soke Takajuki Kubota, 10 Dan. Këtë seminar e ndoqën edhe katër përfaqësues nga Kosova: Ermirë Statovci, Ardiana Rexhepi, Safet Ramadani dhe Mustafë Statovci.

Asociacioni Ndërkombëtar i Karatesë është një nga federatat më të vjetra ndërkombëtare, e themeluar në vitin 1953 nga mjeshtri i madh, Takajuki Kubota, i cili njëherësh është edhe themelues i stilit të karatesë Gosoku Rju, si dhe i sistemit të vetëmbrojtjes Kubotan, të cilin e demonstroi edhe të dielen para shikuesve, të cilë e ndoqn Kampionatin e hapur evropian të IKA në Shkup.

 

 

Basketboll: BpB Prishtina është fituese e Kupës së "Ligës Profesioniste të Basketbollit të Kosovës (LPBK)"

 

BpB Prishtina - Dukagjini 73:65 (27:17, 14:18, 15:18, 17:12)

Prishtinë, 11 maj 2004 - Mbrëmë në Qendrën e Rinisë dhe Sporteve në Prishtinë në një atmosferë madhështore sportive, para më se 2500 shikuesve u zhvillua ndeshja finale e Kupës së Ligës Profesioniste të Basketbollit të Kosovës (LPBK). U takuan dy skudrat momentalisht më të mira të LPBK-së, BpB Prishtina dhe Dukagjini i Pejës.

Pas një drame të vërtetë të zhvilluar në parket plot 40 minuta lojë, në fund ndeshjen me plot meritë e fitoi skuadra nga kryeqyteti, BpB Prishtina me rezultat 73:65.

Kupën, kapitenit të BpB Prishtinës, Florian Miftarit, ia dorëzoi kryetari i KK të Prishtinës, Ismet Beqiri, ndërsa medaljet e argjendta për basketbollistët e Dukagjinit i ndau Sami Hamiti, kryeshef e Ekzekutivit të KK të Prishtinës.

U zgjodh edhe basketbollisti më i mirë i turneut final, Samir Shaptahoviqi (BpB Prishtina), dhe koshashënuesi më i mirë i këtij turneu, Acie Earl (Dukagjini) me 36 pikë të shënuara.

 

Këtyre dy basketbollistëve u takuan shpërblimet nga 300 euro. Ndërkaq për skuadrën fituese shpërblimi ishte 3.000 euro, ndërsa Dukagjini, si finalist mori shpërblimin prej 1.500 euro.

 

 

BE hap zyrën e Tempusit në Kosovë

 

Prishtinë, 11 maj 2004 - Në Kosovë hapet zyra e Tempusit, një projekt i Bashkimit Evropian që synon bashkëpunimin e institucioneve vendore të arsimit të lartë me ato të BE-së. Kjo u vlerësua si çështje shumë e rëndësishme nga zyrtarët e arsimit në një ceremoni me rastin e hapjes së kësaj zyre.

"Ky projekt i Bashkimit Evropian është një interes i madh për universitetin, për arsimin në përgjithësi, sidomos për të rinjtë tanë të cilët kanë mundësi të qarkullojnë më tepër nëpër universitetet e Evropës që vlen edhe për profesorët tanë", tha rektori i UP-së Zenel Kelmendi.

Ndërkaq, Brigita Barç nga Komisioni Evropian theksoi rolin e madh të programit Tempus në përkrahjen e reformave të arsimit të lartë dhe në zbatimin e procesit evropian të Bolonjës.

 

 

Gjenerali Erlandson tha se Kosova nuk kërcënohet nga terroristët

 

Kampi Bondstill afër Ferizajt, 11 maj 2004 - Komandanti i Brigadës Shumëkombëshe të Lindjes, gjenerali amerikan Rik Erlandson tha në një konferencë për media se KFOR-i nuk ka indikacione se në Kosovë mund të ketë ndonjë aktivitet apo sulm të mundshëm terrorist.

 

Ai tha se terrorizmi është propblem global. Nuk mund të jeni qind për qind të sigurt se sulmet terroririste nuk janë të mundshme në Kosovë, por indikacione të tilla nuk ka, tha Ërlandson.

Erlandson tha se megjithatë kur ka paqëndrueshmëri në Ballkan dhe në Kosovë, gjithnjë ekziston mundësia që terroristët të depërtojnë.

Gjenerali Erlandson vlerësoi se në Kosovë po arrihet përparim drejt normalitetit të gjendjes, duke shtuar se shpresa për një të ardhme të ndritshme qëndron në të gjitha komunitetet që jetojnë në Kosovë. Erlandson u bëri thirrje liderëve dhe qytetarëve të Kosovës për të marrë rol më aktiv në përkrahjen e një të ardhme paqësore dhe pozitive përmes bashkëpunimit shumë etnik.

 

 

Janë kryer përgatitje për organizimin e zgjedhjeve parlamentare në Kosovë

 

Prishtinë, 11 maj 2004 - Sekretariati i Komisionit Qendror të Zgjedhjeve thotë se ka kryer të gjitha përgatitjet për organizimin e zgjedhjeve parlamentare në Kosove në muajin tetor të këtij viti.

 

Sipas zyrtarëve, OSBE-ja në këto zgjedhje do të ketë vetëm rol keshillëdhënës dhe monitorues. Në një konferencë për media u tha në zgjedhjet e sivjetme do të aplikohet sistemi proporcional, ndonëse ka pasur kundërshtime sidomos nga shoqëri civile.

Ushtruesi i detyrës së shefit të misionit të OSBE-së në Kosovë, Brajan Hopkins, tha se funksionimi i SKQZ-së është në përputhje të plotë me ligjet në fuqi. Ai paralajmëroi se gjatë dy javëve të ardhshme do të fillojë të bëjë certifikimin e subjekteve politike që marrin pjesë në zgjedhjet e vjeshtës.

Sipas një parallogarie të OSBE-së, këto zgjedhje do të kushtojnë 10 milionë euro dhe gjysma e tyre do të financohet nga buxheti i Kosovës.

 

 

Deri në fund të këtij muaji Beogradi dorëzon rreth 30 trupa të shqiptarëve të ekshumuar në Batajnicë

 

Beograd, 11 maj 2004 - Autoritetet serbe deri në fundi të këtij muaji do t'ia dorëzojë UNMIK-ut rreth 30 trupa të shqiptarëve të ekshumuar në varrezën masive në Batajnicë afër Beogradit, njoftojnë mediat serbe.

 

 

Uejn Meri: Kosovarët e respektojnë vetëm praninë amerikane

 

Pragë, 11 maj 2004 - "Dhuna në Kosovë sinjalizon se paqja në rajonin, që para pak kohësh ishte arenë e një konflikti, përkatësisht lufte, ishte mashtruese. Konfliktet dhe dhuna nganjëherë mashtrojnë. Mund t'ju duket se keni arritur shumë për zgjidhjen e problemeve të natyrës politike dhe pastaj mjafton një incident, për shpërthimin e sërishëm të dhunës.

 

Këtë fare mirë e kuptojnë përfaqësuesit e bashkësisë ndërkombëtare në Kosovë, por jo edhe qeveritë që janë larg kësaj hapësire", tha Uejn Meri, ekspert në Këshillin amerikan për Politikë të Jashtme, duke folur për trazirat e fundit në Kosovë.

Ndërkaq, duke folur për mundësinë e zgjidhjes së çështjes së statusit të Kosovës, ai tha se nuk e di se si do të zgjidhet ky status, por e di se shumica e vendeve perëndimore nuk do të donin fare të merreshin me këtë çështje, tha Uejn Meri.

Në lidhje me idenë për zëvendësimin e mundshëm të trupave të NATO-s në Ballkan me kontingjentin e forcave evropiane, Uejn Meri thotë se në Kosovë roli i NATO-s ka peshë specifike në planin politik dhe ushtarak. "Në Kosovë ka shumë të tillë që respektojnë vetëm praninë ushtarake amerikane", tha ai.

I pyetur nëse në një të ardhme të afërt mund të realizohet synimi i Serbisë që të bëhet anëtare e plotëfuqishme e NATO-s, Uejn Meri tha: "Nëse me një të ardhme të afërt mendoni në 5 vitet e ardhshme, përgjigjia e ime është jo. Unë këtë nuk mund ta paramendoj".

"Konsideroj se jo vetëm për Shtetet e Bashkuara të Amerikës, por edhe për shumë vende të tjera të NATO-s, 5 vjet janë periudhë minimale që gjërat vërtet të ndryshojnë në Beograd", tha mes tjerash për radion "Evropa e lirë", Uejn Meri, ekspert në Këshillin për Politikë të Jashtme të SHBA-ve.

 

 

Kryeparlamentari Daci priti kryetarin e Gjykatës Supreme të Kosovës

 

Prishtinë, 11 maj 2004 - Kryeparlamentari Nexhat Daci priti kryetarin e Gjykatës Supreme të Kosovës, Rexhep Haxhimusa, me të cilën biseduan rreth problemeve në lëmin e gjyqësisë në Kosovë.

Haxhimusa tha se është e pakuptimtë që Kuvendi i Kosovës të mos ketë autorizime më të mëdha për emërimin e gjykatësve dhe prokurorëve. Ai tha se në procesin e kalimit të kompetencave, duhet adresuar edhe këtë çështje.

Sipas Haxhimusës, gjyqësori në Kosovë është plotësisht i pavarur dhe ka përmbushur në tërësi obligimet që ka ndaj qytetarëve.

 

 

Kosova do ta ketë ligjin më të mirë të shëndetësisë në rajon, u tha në një seminar të sotëm

 

Prishtinë, 11 maj 2004 - Zyrtarët e Ministrisë së Shëndetsisë thanë sot në një seminar se Kosova do të jetë një ndër vendet që do ta ketë ligjin më të mirë të shëndetsisë në rajon. Sipas tyre, pacientët do të kenë të drejtën e ankesës dhe me këtë përmbushet edhe një nga standardet e BE për të drejtat e qytetarëve.

Ferit Agani, kryesuesi i Komitetit për elaborimin e draft- ligjit të shëndetësisë tha se qëllimi kryesor është që të përqendrohet vëmendja e institucioneve dhe e popullatës në sektorin e shëndetësisë.

Qytetari do të ketë të drejtën e ankesës nëse nuk janë kryer shërbimet cilësore shëndetësore, thotë Kadir Hyseni, këshilltar i lartë i Ministreshës së Shëndetsisë.

U tha se Ligji për shëndetësi së shpejti pritet të miratohet nga Kuvendi i Kosovës.

 

 

Zhvillohen debate publike për sfidat e zhvillimit hapësinor

 

Prishtinë, 11 maj 2004 - Ministria e Mjedisit dhe Planifikimit Hapësinor në bashkëpunim me HABITAT-in, Programin për Qeverisje dhe planifikim zhvillimor të përkrahur nga Instituti për Studime të Banimit dhe Zhvillimit Urban, Holandë, Instituti Rajonal për Hulumtime Riinvest do të organizojnë konsultime publike për sfidat e zhvillimit hapësinor të Kosovës.

 

Kështu u njoftua sot në një konferencë për gazetarë në Ministrinë e Mjedisit dhe Planifikimit Hapësinor.

Ministri i Mjedisit Ethem Çeku tha se aktivitetet e zhvilluara janë të lidhura ngushtë me hulumtimin e gjendjes ekzistuese dhe kanë për qëllim konstatimin e shkaqeve për problemet e shfaqura, njohjen e rrezikut që na kanoset nëse këto dukuri negative vazhdojnë, resurset dhe potencialin aktiv në hapësirën e Kosovës.

Përfaqësuesi për çështje teknike i HABITAT-it Gert Ludeking, shprehu përkrahjen e organizatës së tij gjatë dy vjetëve të ardhshme në sferën e planifikimit hapësinor në Kosovë.

 

 

Holkeri flet sot në KS të OKB-së për gjendjen në Kosovë

 

Nju-Jork, 11 maj 2004 - Kryeadministratori i Kosovës Hari Holkeri do të flasë sot në Këshillin e Sigurimit të OKB-së për gjendjen në Kosovë. Holkeri në raportin e tij do të raportojë posaçërisht për standardet për Kosovën dhe për gjendjen pas trazirave të 17 e 18 marsit.

Ndryshe Holkeri dje ka qëndruar në Uashington ku është takuar me nënsekretarin e Shtetit Mark Grosman.

 

 

Zyrtarë të UNMIK-ut thonë se Kuvendi i Kosovës nuk mund të bëjë ndryshime në Kornizën Kushtetuese pa pëlqimin e OKB-së

 

Prishtinë, 11 maj 2004 - Komisioni përkatës i Kuvendi të Kosovës i dërgoi UNMIK-ut propozimin për ndryshimet në Kornizën Kushtetuese të Kosovës. Mirëpo, zyrtarë të UNMIK-ut thonë se tash për tash mbetet në fuqi qëndrimi se Kuvendi i Kosovës nuk mund të bëjë ndryshime në Kornizën Kushtetuese pa pëlqimin e Zyrës Ligjore të OKB-së.

Zëdhënësi i UNMIK-ut Xhejms Billi theksoi se UNMIK-u vlerëson se Kuvendi i Kosovës nuk ka kompetenca të bëjë ndryshime në Kornizën Kushtetuese. Ai shtoi se këtë e ka bërë të qartë UNMIK-u në fillim të hartimit të amandamenteve në këtë Kornizë dhe ende e ka të njëjtin qëndrim.

 

 

Misioni i OSBE-së do të fillojë një seri takimesh me drejtuesit e gjykatave në çdo komunë të Kosovës

 

Prishtinë, 11 maj 2004 - Misioni në Kosovë i OSBE-së nga sot do të fillojë një seri takimesh me drejtuesit e gjykatave në çdo komunë të Kosovës. Takimet janë pjesë e punës për hartimin e raportit mbi aktivitetin e gjykatave në Kosovë në të cilin paraqiten edhe opinionet e kryegjyqtarëve mbi gjendjen aktuale në sistemin e drejtësisë dhe rrugët për përmirësimin e mëtejshëm.

 

 

Është shumë më vështirë të rikthehet besimi ndërmjet etniteteve se sa sanimi i dëmeve të shkaktuara

 

Gjilan, 11 maj 2004 - Është shumë më vështirë ta rikthejmë besimin për multietnicitet përbrenda etniteteve se sa sanimi i dëmeve të shkaktuara gjatë trazirave të marsit. Kështu u shpreh përfaqësuesi i UNMIK-ut për rajonin e Gjilanit Marsel Çindellen në një paraqitje para gazetarëve në Gjilan bashkë me përfaqësuesit e UNHCR-së dhe OSBE-së.

 

Ai shtoi se prioritet i prioriteteve të UNMIK-ut dhe agjencioneve tjera në Kosovë është që ta rivendosin besimin ndërmjet etniciteteve. Sipas tij do të jetë një dështim nëse nuk tregohet gatishmëri për t'i riparuar këto pasoja nga trazirat e marsit.

 

 

Prishtina tash ka edhe Asamblenë komunale të fëmijëve

 

Prishtinë, 11 maj 2004 - Prej dje Prishtina ka edhe Asamblenë komunale të fëmijëve, e cila përbëhet prej 51 deputetëve: 25 femra dhe 26 meshkuj, prej të cilëve dy deputetë janë të komunitetit serb, një turk dhe një person me aftësi të kufizuara.

 

Në mbledhjen e parë konstituive u miratua rregullorja e punës dhe u zgjodh kryesia e Asamblesë komunale të fëmijëve me kryetar Vigan Limanin, nxënës i klasës së shtatë të shkollës fillore "Elena Gjika".

 

Vigani tha se puna e kësaj asambleje do të përqëndrohet në bazë të konventës ndërkombëtare të fëmijëve, kurse respektimi i të drejtave të fëmijëve është detyrë kryesore e kësaj e kësaj asambleje.

 

 

Paten paralajmëron Beogradin: ose me BE-në ose refuzimi i Hagës

 

Beograd, 11 maj 2004 - Komesioneri evropian Kris Paten paralajmëroi mbrëmë Beogradin se duhet të zgjedhë nëse është për hyrje në Bashkimin Evropian ose për refuzimin e bashkëpunimit me Tribunalin e Hagës.

 

"Ose do të zgjedhni që të përkrahni ata njerëz që janë të akuzuar, dhe pastaj të heqni disa pasoja, ose do të vendosni për rrugën në BE. Por nuk mund të keni edhe njërën edhe tjetrën" - ka thënë Paten mbrëmë në Beograd.

 

 

Trupat amerikane kanë vrarë 13 pjesëtarë të Armatës së Mehdiut

 

Bagdad, 11 maj 2004 - Trupat amerikane kanë vrarë 13 pjesëtarë të Armatës së Mehdiut të klerikut kryengritës, Moktada al-Sadër, në luftimet gjatë natës afër qytetit irakian Kufa, ka bërë të ditur sot (e martë) një zyrtar i lartë ushtarak amerikan, njofton Rojter.

 

Ai ka thënë gjithashtu se edhe 14 milicë janë kapur në qytet, që është fqinj me qytetin e shenjtë Naxhaf, ku Sadri është përqendruar me mijëra luftëtarë. Zëdhënësi i Sadrit ka thënë se ushtria amerikane po e egzagjeron numrin e të vrarëve të Armatës së Mehdiut.

 

 

Nga një shpërthim në Kirkuk, kanë humbur jetë 3 persona

 

Kirkuk, Irak, 11 maj 2004 - Një bombë ka shpërthyer sot (e martë) në një treg përplot njerëz në qytetin naftëtar kurd, Kirkuk, që gjendet afër pjesës veriore të Irakut, ku kanë humbur jetë tre persona, kurse janë plagosur edhe 21 të tjerë, ka bërë të ditur policia, njofton Rojter. Sulmi ka ndodhur në mengjes, pikërisht në kohën kur tregu ishte përplot blerës.

 

 

Në një shpërthim në Rripin e Gazës kanë humbur jetën 6 ushtarë izraelitë

 

Gaza, 11 maj 2004 - Një shpërthim e ka shkatërruar sot (e martë) një automjet ushtarak në Rripin e Gazës dhe për pasojë janë vrarë disa ushtarë izraelitë, njofton Rojter. Incidenti ka ndodhur gjatë një sulmi të ushtarëve, ku u vranë tre palestinezë, kanë thënë dëshmitarët. Televizioni Al Arabia ka thënë se në shpërthim kanë humbur jetën 6 ushtarë.

 

 

Në një sulm në Bagdad është vrarë një rus dhe janë rrëmbyer peng dy të tjerë

 

Moskë, 11 maj 2004 - Rusia thotë se një rus është vrarë dhe dy të tjerë janë rrëmbyer peng gjatë një sulmi të djeshëm në Bagdad, ka bërë të ditur sot (e martë) zëdhënësi i Ministrisë së Jashtme ruse, njofton AFP. Ai ka thënë se ata ishin punëtorë të një kompanie shërbyese energjetike dhe janë sulmuar kur po ktheheshin nga puna në Bagdad.

 

 

Në një sulm të një autokolonë prej 21 automjetesh furnizuese, janë zhdukur disa persona

 

Bagdad, 11 maj 2004 - Guerilët kanë sulmuar sot (e martë) një autokolonë prej 21 automjetesh furnizuese, që shkonte rrugës nga Jordani drejt Bagdadit, ka bërë të ditur një zyrtar i lartë ushtarak amerikan, njofton Rojter. Në këtë incident, që ka ndodhur afër qytetit Rutba dhe afër kufirit me kufirin jordanez, janë zhdukur disa persona, janë shkatërruar disa automjete. Nacionaliteti i të zhdukurve nuk është treguar.

 

 

Vazhdojnë dëshmitë rreth abuzimeve në Irak

 

Uashington, 11 maj 2004 - Gjeneral Majori Antonio Taguba, i cili shkroi një raport me hollësi rreth abuzimit të të burgosurve irakianë nga trupat amerikane do të dëshmojë të martën para komisionit të Senatit amerikan për forcat e armatosuara.

Në raportin 53 faqesh të gjeneralit Taguba radhiten një numër incidentesh që cilësohen si abuzime kriminale sadiste e të shfrenuara në Irak.

Në raport, i cili u përgatit në muajin mars, thuhet se disa prej keqtrajtimeve ishin inkurajuar nga shërbimi amerikan i zbulimit si rrugë për të ndihmuar procesin hetimor.

 

 

Që nga e diela në Irak janë vrarë 35 përkrahës të klerikut al-Sadër

 

Bagdad, 11 maj 2004 - Një zëdhënës ushtarak amerikan tha se 35 anëtarë të milicisë besnike të klerikut radikal shiit, Moktada al-Sadër, janë vrarë gjatë luftimeve në Bagdad.

Gjenerali Mark Kimit tha të hënën se përkrahësit e klerikut janë vrarë në një numër shkëmbimesh zjarri në kryeqytetin irakakin që nga dita e diel.

 

 

Presidenti Bush viziton Pentagonin

 

Uashington, 11 maj 2004 - Në atmosferën e thirrjeve të vazhdueshme për dorëheqjen e sekretarit amerikan të Mbrorjtjes Donald Ramsfeld lidhur me skandalin e të burgosurve, Presidenti Bush shkoi në Pentagon për t'i shprehur një mbështetje të fortë dhe personale sekretarit të mbrojtjes. "Ti po bën një punë të shkëlqyer, ti je një sekretar mbrojtjeje i fortë dhe vendi ynë ta ka borxh mirënjohjen", tha Presidenti Bush.

Por në të njëjtën kohë, Bush premtoi një hetim të plotë si dhe ndëshkim për ata që mbajnë përgjegjësi për keqtrajtimin e të burgosurve.

 

 

Bush thotë se vendet në zhvillim duhet të ndërmarrin reforma ekonomike dhe politike

 

Uashington, 11 maj 2004 - Sipas programit të ri, vendet që mund të provojnë se po zbatojnë reforma, mund të bëjnë kërkesë për financim nga një fond i posaçëm që quhet Llogaria për "Sfidën e mijëvjeçarit". Ky fond pritet të rezultojë në një rritje të ndjeshme të ndihmës amerikane në 3 vitet e ardhshme dhe është një pikë qendrore në politikën e administratës amerikane për ndihmat.

Megjithëse krijimi i fondit ishte njoftuar nga Presidenti Bush para dy vitesh, vendet e para që përfitojnë prej tij, u shpallën javën e kaluar. Gjatë një ceremonie në Shtëpinë e Bardhë, Presidenti Bush u transmetoi sot personalisht urimet e rastit këtyre vendeve gjatë një ceremonie, ku merrnin pjesë ambasadorët e tyre në Uashington dhe zyrtarë të tjerë.

 

 

Amnesty International kritikon Britaninë

 

Strasburg, 11 maj 2004 - Amnesty International ka publikuar një raport ku Qeveria britanike kritikohet se nuk ka bërë asgjë për të hetuar lidhur me akuzat për vrasje të civilëve irakianë të pafajshëm prej ushtarëve britanikë.

Në raportin e Amnesty International citohen një seri shembujsh që kanë të bëjnë me vrasjen e civilëve të pafajshëm irakianë që nuk përbënin asnjë kërcënim për patrullat britanike.

Amnesty International thotë se hetimet edhe kur janë kryer janë bërë në fshehtësi të plotë dhe janë mbajtur të fshehuara prej familjeve, të cilave u është dhënë informacion i paqartë se si të përfitojnë nga kompesimet.

Amnesty International tha se nuk kishte kuptim që hetimet lidhur me abuzimet apo vrasjet e civilëve prej ushtarëve britanikë të kryeshin nga ushtria, dhe kërkoi që hetimet të ishin të pavarura.

 

 

Në një marsh protestues në Naxhaf është kërkuar që al-Sadri të largojë milicinë e tij nga qyteti

 

Naxhaf, Irak, 11 maj 2004 - Qindra njerëz kanë marshuar sot (e martë) në Naxhaf duke i bërë thirrje klerikut kryengritës shit, Moktada al-Sadër, që të largojë milicinë e tij nga ky qytet i shenjtë irakian, njofton Rojter.

 

Dëshmitarët kanë thënë se është marshuar në zonën qendrore të shenjtë dhe pastaj demonstruesit janë shpërndarë qetë. Disa persona të armatosur të Sadrit kanë shtënë me armë zjarri në ajër pikërisht në kohën e shpërndarjes. Demonstratat janë organizuar nga kundërshtarët politikë të Sadrit.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |