|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Piktorët vlonjatë në atelietë e Vjenës

10 maj 2004 / TN

 

Nga Vasil QESARI

 

… Mes interesimit dhe pjesëmarrjes së një publiku të gjerë, në Sallën e Emblemave të Bashkisë Nr.1 të kryeqytetit austriak këto ditë, nenë patronazhin e Forum Weltoffen International u hap ekspozita e dy artistëve vlonjatë, piktorit Agron Dine dhe grafistit Arben Meksi. Për ketë veprimtari u shpreh interesim i  veçantë qysh para çeljes së saj, jo vetëm mes shumë miqve e dashamirësve të Shqiperisë, por edhe prej shumë shqiptarëve që jetojnë në Austri, jo vetëm në Vjenë por edhe në krahina e qytete të ndryshme të këtij vendi, të cilët kishin ardhur posaçërisht për të marrë pjesë në të.

 

( Ndriçim e Greta Metaj nga Villach, gati 420 km larg nga Vjena. Ilir e Vasilika Kotori nga Salzburgu, Andrea Minga me familjen nga Mondsee, Pellumb Halili dhe e shoqja,  Zana, nga Zellamsee, gati 550 km nga Vjena, ndërkohë që atyre do t’i u duhej të ktheheshin përsëri duke udhëtuar tërë natën, për të qenë të nesërmen në vendet e tyre të punës ).

 

Në ceremoninë e hapjes së kësaj ekspozite, të cilën Fatmir Velaj, kryetar i forumit të njohur artistik Weltoffen International e kish titulluar "Im Blau des Südens" ( Në Blunë e Jugut ), merrnin pjesë gjithashtu edhe shumë artistë të huaj nga Gjermania, Japonia Kroacia, Franca etj.

 

 Para çeljes së ekspozitës, delegacioni i ardhur nga Vlora, në të cilin përveç artistëve Agron Dine e Arben Meksi, benin pjesë edhe anëtaret e Dhomës së Tregetisë në Vlorë Eduard Leli e Ferdinad Xhaxho si edhe drejtori i TV lokal "Amantia" Genc Demiraj,  u prit në një takim të veçantë nga krytari i Bashkisë Nr.1 të Vjenës z.Franz Grundwalt. Në këtë takim, delegacioni nga Vlora mbasi falënderoi kryetarin e Bashkisë për mundësine që ju dha atyre e nëpërmjet tyre edhe artit e kulturës shqiptare për paraqitjen e saj në metropolin vjenez, i dorëzoi atij disa dhurata simbolike, mes të cilave një bust të Skenderbeut, flamurin shqiptar e një punim artistik që paraqeste Monumentin e Pavarësisë në Vlorë. Në bisedën e zhvilluar me këtë rast, u fol për historinë e popullit tonë, kulturën shqiptare e atë vlonjate si edhe për marrëdhenjet e mira ekonomike e kulturore që zhvillohen mes Austrisë e Shqipërisë. Arkitekti, piktori e grafisti i njohur vlonjat, Arben Meksi, nënë cilësinë e kryetarit të delegacionit duke shprehur dëshirën edhe të paraqitjes së artit vjenez ne qytetin e tyre bregdetar e ftoi kryetarin e Bashkisë Franz Grundwalt për një vizitë në Vlorë, gjë të cilën ai e pranoi me mjaft kenaqësi.

 

Pastaj, Artan Canaj, atashe kulturor i ambasadës së Shqipërisë në Vjenë bëri një ekspoze të marrëdhenjeve të mira shqiptaro-austriake si edhe të shkëmbimeve tregtare e kulturore mes dy vendeve. Ai vuri në dukje ndihmesën që Austria i ka dhenë Shqiperisë në momente të caktuara historike, në të kaluarën e në të tashmen. Ai foli edhe për marrëdhenjet në fusha ekonomike midis dy vendeve, në sistemin bankar nëpermjet Raiffeisenbank dhe OMV, e cila do të bëjë kërkime nafte në Vlorë.

 

… Zoti Franz Grundwalt, mbasi falendëroi grupin e miqve për paraqitjen që ata i benë qytetit të tyre, bëri një prezantim të bashkisë së tij e gjithë qytetit të Vjenes. "Bashkia Nr.1 e Vjenës - theksoi ai - ose siç i thonë ndryshe Zemra e Kulturës Vjeneze e austriake, për vetë vlerat e saj të çmuara për mbarë njerëzimin, qysh prej vitit 2002 është venë nenë mbrojtjen e Unesco-s dhe gjithë departameti Nr.1 është shpallur pasuri kulturore botërore. Këtu ndodhen pothuajse gjithë muzetë më të rendësishëm të Austrisë e, përveç tyre dhe  shumë vepra arti të shquara si edhe institucione të  njohura artistike, tregetare e bankare ".

 

Pas këtij takimi u bë përurimi i ekspozitës. Në fjalën e hapjes, kryetari i Bashkisë Franz Grundwalt theksoi edhe një herë kenaqësinë që, pikërisht në Bashkinë e drejtuar prej tij ai kish kenaqësinë e veçantë të prezantonte disa nga përfaqësuesit e artit e kulturës së qytetit të Vlorës. Pastaj, ai falënderoi të pranishmit e shumtë në salle dhe u uroi atyre shikim të kendshem të ekspozitës. Më pas, të ftuarve u  foli Fatmir Velaj, kryetar i Forum Weltoffen, i cili ishte edhe nismëtari i organizimit të kësaj veprimtarie. Ai, mbasi falënderoi krytarin e  Bashkisë për mundësinë që ju krijoi për paraqitjen e kulturës vlonjate në Vjenë tha:

 

 " Forum Weltoffen International ka krijuar tashmë një përvojë të madhe në fushën e shkëmbimeve kulturore mes popujve të ndryshëm. Me veprimtaritë e shumta dhe të sukseshme që ka realizuar në Austri, Belgjikë, Egjypt, Greqi, Maqedoni etj. ai ka arritur të krijojë një emër të njohur e të vyer në fushen e artit e të kulturës. Si kryetar i këtij forumi, jam përpjekur t’u krijoj mundësi njohje, shkëmbimi e bashkëpunimi shume artisteve nga vende të ndryshme të botës, që nga Kolumbia, Peruja, Argjentina, Japonia, Koreja, Kina e gjer në Iran, Irak e Egjipt. Nga Anglia, Franca, Gjermania, Italia e deri në Turqi, Maqedoni, Kraoci, Sloveni e Shqipëri. Por unë, prej kohësh kam dashur të paraqes e të bëj të njohur, ndër të tjera, edhe artin dhe kulturën e qytetit tim të lindjes - Vlorës. Kështu, u bë e mundur ardhja këtu në Vjenë, e dy artistëve vlonjatë, të cilët unë do t’i emërtoja "DOC"( emërtim me origjinë të kontrolluar ), dy artistë të cilët i kanë ngelur besnik qytetit të tyre e nuk morrën rrugën e mërgimit, por preferuan të jetojnë e të krijojnë në qytetin e tyre, për të dhenë kështu mesazhin e bukur se edhe vendi yne do të bëhet e shembëllin e parë për këtë gjë do t’a japin së pari njerëzit e dijeve e të arteve".

 

….Gjatë vizitës të eksponanteve të ekspozitës, e morri fjalën dhe kryetari i delegacionit, artisti e arkitekti vlonjat Arben Meksi i cili foli për artin e kulturën vlonjate e atë shqiptare. Ai foli gjithashtu edhe për zhvillimet në qytetin e Vlorës si edhe për të ardhmen e saj, veçanërisht në fushën e turizmit. Pas tij foli piktori dhe drejtori i shkolles së mesme artistike të qytetit të Vlorës, Agron Dine: "  Kjo natë vjeneze do të ngelet e paharruar në kujtesën tonë si një natë magjike. Ne jemi mjaft të impresionuar nga organizimi i përkryer gjer në detajin më të vogël të kësaj veprimtarie e, për këtë, falënderojmë artistin e mikun tonë vlonjat Fatmir Velaj, i cili bëri ç’është e mundur që kjo veprimtari të kurorëzohet me sukses. Në Vjenë, ne do të kemi fatin të shohim edhe mjaft vepra të artisteve të shquar e me famë botërore si Salvator Dali, Vasili Kandisky e Rembrand …". Por, në këto momente, fjalën e tij e ndërpreu Fatmir Velaj, i cili i’u drejtua të pranishmëve duke u thenë :

 

-  Ja pse, Agroni ja ka venë emrin djalit të vet, Rembrand…

  

Të gjithë të pranishmit qeshën duke duartrokitur.

  

Pastaj, te ftuarit, miqtë e dashamirësit e shumtë e përfunduan ceremoninë e përurimit me një buffet me embëlsira e pije të ndryshme. Gjatë saj, pjesëmarrësit e shumtë, patën mundësinë të bisedonin nga afër me artistët e talentuar vlonjatë e të jepnin mjaft mendime impresionante për punimet e talentin e tyre. Dr. Wolfgang Kladnig, ndër të tjera tha se : "shikoj pikturat e Agron Dines dhe me kujtohet Marc Shagall, ndërkohë që grafisti e karikaturisti Arben Meksi, të fut  në botën e madhe të karikaturës austriake e atë të të madhit Paul Flora". Shumë artdashës e kritikë arti u shprehen se kjo ekspozitë ishte ndër më të suksesshmet e cilësoret që ata kishin ndjekur gjatë këtyre muajve të fundit në kryeqytetin austriak,Vjenë …