Përmbajtja:

• Holkeri nuk ka nënshkruar asnjë marrëveshje sekrete me Beogradin lidhur me planin serb për Kosovën

• Ministri Osmani përgëzoi pjesëmarrjen e fëmijëve të Qendrës së Pionierëve të Prishtinës në një festival në Turqi

• N. Baliq: Vatan është i gatshëm të punojë me ata që kanë qëllim përparimin e Kosovës

• Shoqata e grave "Hanimeli" nderoi ministren Mumxhi me mirënjohjen "Nëna e vitit"

• Në Bernë të Zvicrës u mbajt një akademi përkujtimore kushtuar profesor Fehmi Aganit

• Komesioneri i BE-së për Politikë të Jashtme, Kris Paten sot viziton Kosovën

• Dita e Evropës u festua edhe në Kosovë

• Në Butovc të Prishtinës u gjet i vrarë Burim Spanca

• Në Kosovë brenda 24 orëve në ka ndodhur një vetëvrasje dhe ka humbur një djalë 20 vjeçar

• Ministrat e brendshëm të Shqipërisë dhe Maqedonisë diskutuan për bashkëpunimin në luftë kundër krimit të organizuar

• Kuvendi komunal i Preshevës studentëve me kushte të rënda materiale u ka ndarë 102 bursa

• Kroacia është e detyruar ta ekstradojë Boshkovskin në Maqedoni

• Paralajmërimet serbe për ndërtimin e bazës ushtarake në Luginën e Preshevës shkaktojnë shqetësime te popullata shqiptare

• Në Kirkuk janë vrarë një jugafrikan dhe një irakian, kurse një zelandas është plagosur

• Policia italiane ka arrestuar një imam algjerian dhe 4 tunizianë

• Ushtarët izraelitë kanë vrarë 2 palestinezë të armatosur

• Në Kabul janë therur dhe pastaj janë mbytur me gurë 2 burra të huaj

• Në Çeçeni është varrë presidenti prorus dhe 6 persona të tjerë

• Autoritetet amerikane japin urdhër për hapjen e procesit në çështjen e abuzimeve

• Sharon do ta ndryshojë planin e hedhur poshtë për tërheqje nga Rripi i Gazës

• Administrata shpreh mbështetje të fortë për sekretarin Ramsfeld

• Arafat thotë se krijimi i shtetit palestinez vitin e ardhshëm është real

• Bler u ka kërkuar falje të burgosurve irakianë

• Janë vrarë edhe 16 pjesëtarë të Armatës së Mehdiut të Moktada Sadrit

• Kryengritësit kanë vrarë 2 nga truprojet e guvernatorit irakian të provincës Dijala

• Trupat izraelite kanë shkatërruar 13 shtëpi palestineze në Gaza

Holkeri nuk ka nënshkruar asnjë marrëveshje sekrete me Beogradin lidhur me planin serb për Kosovën

 

Prishtinë, 10 maj 2004 - UNMIK-u konstaton se kryeadministratori i Kosovës Hari Holkeri gjatë vizitës në Beograd nuk ka nënshkruar asnjë marrëveshje sekrete me qeverinë e Koshtunicës lidhur me planin serb për decentralizimin e pushtetit në Kosovë. Kështu është shprehur zëdhënësi i UNMIK-ut Xhejms Billi.

"Nu ka asnjë marrëveshje të re me Beogradin dhe nuk është formuar asnjë trup, formë apo organizëm i përbashkët UNMIK-Beograd për decentralizimin e pushtetit në Kosovë.

 

Ky ishte vetëm një takim i Holkerit më kryeministrin serb Koshtunica dhe në mesin e shumë temave të diskutuara ishte edhe ajo për planin e Serbisë për Kosovën. Holkeri është pajtuar për ta informuar Serbinë për zhvillimet në Kosovë", ka thënë Billi.

 

 

Ministri Osmani përgëzoi pjesëmarrjen e fëmijëve të Qendrës së Pionierëve të Prishtinës në një festival në Turqi

 

Prishtinë, 10 maj 2004 - Rexhep Osmani, ministër i Arsimit, Shkencës dhe Teknologjisë, priti fëmijët e Ansamblit të Valleve të Qendrës së Pionierëve të Prishtinës, të cilët morën pjesë në Festivalin Ndërkombëtar të mbajtur në Turqi prej 22 deri më 27 prill.

Paraqitja e fëmijëve të Kosovës në këtë festival u vlerësua shumë e suksesshme dhe në nivel të lartë. Fëmijët lanë përshtypje të shkëlqyeshme në vallëzim, njohje të gjuhës angleze dhe sjellje në familjet ku ata ishin të vendosur.

Ministri Osmani pasi përgëzoi paraqitjen e suksesshme të këtyre fëmijëve në Turqi, premtoi se Ministria e Arsimit do t'i përkrahë gjithmonë aktivitetet e tilla, të cilat e përfaqësojnë Kosovën në dritën e tyre të vërtetë.

 

 

N. Baliq: Vatan është i gatshëm të punojë me ata që kanë qëllim përparimin e Kosovës

 

Prishtinë, 10 maj 2004 - Koalicioni boshnjak Vatan është i gatshëm që së bashku me ata që kanë qëllim përparimin e Kosovës të punon në krijimin e aleancave të mëdha dhe të reja, të cilat do të ndryshonin ardhmërinë e Kosovës.

 

Kështu u shpreh Numan Baliq në tubimin promovues të koalicionit boshnjak "Vatan" dje në Prishtinë. Në këtë tubim morën pjesë edhe mysafirë nga Bosnja e Hercegovina dhe anëtarë të partive politike vendore. Në fjalën e tij Baliq u shpreh se nevojitet dituri e madhe për të arritur sukses dhe për të ecur përpara.

 

Duke e kritikuar administratën e UNMIK-ut dhe kaosin i cili mbretëron në tregun kosovar, veçanërisht në importin e mallrave të kontrabanduara me shmangie nga pagesa e doganës, Baliq tha se e gjithë kjo ka bërë që në Kosovë të shiten produktet e huaja dhe jo prodhimet vendore.

 

 

Shoqata e grave "Hanimeli" nderoi ministren Mumxhi me mirënjohjen "Nëna e vitit"

 

Prishtinë, 10 maj 2004 - Me rastin e festës "Dita e nënave të botës", në një ceremoni rasti shoqata e grave "Hanimeli" me seli në Prishtinë, e nderoi ministren e Shëndetësisë Resmie Mumxhi me mirënjohjen "Nëna e vitit".

Në arsyetimin e Shoqatës për ta nderuar zonjën Mumxhi me këtë mirënjohje ishin marrë parasysh aktivitetet, puna dhe përkushtimi i saj si nënë dhe Ministre e Shëndetësisë së Kosovës.

 

 

Në Bernë të Zvicrës u mbajt një akademi përkujtimore kushtuar profesor Fehmi Aganit

 

Bernë, 10 maj 2004 - Në në Bernë të Zvicrës u mbajt një akademi përkujtimore me rastin e 5-vjetorit të vrasjes së Akademik Fehmi Aganit, ku pos shumë aktivistëve të LDK-së dhe bashkatdhetarëve tanë në Zvicër, mori pjesë edhe bashkëshortja e profesor Aganit, Sadije Agani, si dhe kryetari i Kuvendit të Prishtinës Ismet Beqiri dhe ai i Kuvendit të komunës së Podujevës Agim Veliu.

Për veprimtarinë politike e shkencore të profesor Aganit foli anëtari i kryesisë së Degës së LDK-së Gani Demi.

Ndërkaq, Ismet Beqiri, kryetar i kuvendit të Komunes së Prishtinës, foli për figurën e madhe të profesorit si në rrafshin shkencor ashtu edhe në atë politik. Poashtu foli edhe Agim Veliu, kryetar i Komunës së Podujevës, i cili përshkroi punën e palodhshme politike të profesor Aganit dhe personalitetin e tij të madh në të gjitha rrafshet.

Më fjalime të shkurta u paraqitën edhe Shaip Latifi dhe Nazmi Peci, anëtarë të kryesisë së Degës, të cilët evokuan kujtimet e tyre për profesor Aganin. Poashtu u recituan edhe poezi nga nxënësit kushtuar profesor Aganit dhe dëshmorëve të tjerë të cilat emocionun të pranishmit.

Zonja Sadije Agani falenderoi Degën e LDK-së në Zvicër për organizimin e kësaj akademie dhe foli për unitetin e shqiptarëve në rrugën drejt Pavarësisë së Kosovës.

Në fund sekretari i Degës së LDK-së për Zvicë Hajdar Sadria shpalosi kujtime për Fehmi Aganin.
Në fund u lexua një telegram përshëndetës dërguar nga ky tubim Presidentit Rugova.

Në fund u shfaqën disa pjesë filmike nga takimet e profesor Aganit në Zvicër që nga viti 1990 deri në vitin 1998.

 

 

Komesioneri i BE-së për Politikë të Jashtme, Kris Paten sot viziton Kosovën

 

Prishtinë, 10 maj 2004 - Komesioneri për Politikë të Jashtme i Bashkimit Evropian, Kris Paten sot do të vizitojë Kosovën. Paten do të takohet me zyrtarë ndërkombëtarë e vendorë me të cilët do të bisedojë për zhvillimet e fundit në Kosovë.

Njoftimet nga Brukseli thonë se Paten gjatë qëndrimit në Kosovë dëshiron personalisht të vërtetohet sa ka përparim në rindërtimin e objekteve të shkatërruara në Kosovë gjatë trazirave të marsit.

Në komunikatën për shtyp të lëshuar para nisjes së tij, përpos vlerësimit se dhuna e marsit ishte kthim serioz prapa, Paten citohet të ketë thënë se në Evropë nuk ka vend për ata të cilët dhunën dhe kërcënimet i konsiderojnë si instrumente legjitime të politikës.

Komisioni Evropian ka konfirmuar se gjatë këtyre takimeve, Paten do të nënvizojë rëndësinë e përmbushjes së standardeve për Kosovën, të cilat janë gjithashtu të përfshira në mekanizmat përcjellëse të stabilizim - asociimit.

 

 

Dita e Evropës u festua edhe në Kosovë

 

Prishtinë, 10 maj 2004 - Dita e Evropës është festuar edhe në Kosovë. Kjo ditë u kujtua një ditë më parë me organizimin e konferencës ndërkombëtare me përqëndrim në integrimin ekonomik dhe zhvillimin e Kosovës dhe rajonit.

 

Në këtë konferencë, ku morën pjesë përfaqësues të institucioneve vendëse dhe ndërkombëtare, si dhe ligjërues e studentë kosovarë e ndërkombëtarë, u tha se Kosova synon familjen e bashkimit evropian. Andaj shënimi i kësaj dite në Kosovë është ndjenjë gëzimi, sepse shënon afirmimin e paqes, bashkëpunimit, zhvillimit ekonomik dhe demokracisë.

Në Kosovë Agjencioni Evropian për Rindërtim është përgjegjës për menaxhimin e programeve kryesore të asistencës së bashkësisë evropiane. Duke punuar në partneritet me vendorët dhe me Kombet e Bashkuara në strukturën e UNMIK-ut, Shtylla e Katërt e Bashkimit Evropian është duke punuar drejt ringjalljes dhe modernizimit të strukturës ekonomike të Kosovës.

 

 

Në Butovc të Prishtinës u gjet i vrarë Burim Spanca

 

Prishtinë, 10 maj 2004 - Në fshatin Butovc të Prishtinës ka ndodhur një aksident tragjik, kur tre shokë kishin dalë në gjueti. Pas disa orësh dy shokët kanë gjetur të vdekur shokun e tyre Burim Spancën.

 

Burimet e policisë kanë thënë se ai është vrarë me armë zjarri dhe se një armë është gjetur në lokacionin ku është gjetur kufoma e tij. KFOR-i dhe policia kanë dalë në vendin e ngjarjes dhe janë duke i kryer hetimet lidhur me këtë rast.

 

 

Në Kosovë brenda 24 orëve në ka ndodhur një vetëvrasje dhe ka humbur një djalë 20 vjeçar

 

Prishtinë, 10 maj 2004 - Në Kosovë brenda 24 orëve në ka ndodhur një vetëvrasje. Kështu policia ka gjetur trupin e pajetë të Jakup Hajzerit, rreth të dyzetave, i cili ka jetuar në lagjen "Kodra e Trimave. Policia ka konstatuar se është fjala për vetëvrasje, por mënyra se si është kryer ajo nuk është bërë e ditur nga zyrtarë të policisë.

 

Po ashtu policia ka informuar për një djal të humbur 20 vjeçar nga Prishtina. Njoftohet se ai kishte dalë nga shtëpia e tij më 6 maj të këtij viti dhe prej atëherë nuk dihet asgjë për të.

 

 

Ministrat e brendshëm të Shqipërisë dhe Maqedonisë diskutuan për bashkëpunimin në luftë kundër krimit të organizuar

 

Ohër, 10 maj 2004 - Ministrat e brendshëm të Shqipërisë dhe Maqedonisë diskutuan në Ohër forcimin e bashkëpunimit në luftë kundër krimit të organizuar dhe trafiqeve. Ministrat e brendshëm Ilir Toska dhe Hari Kostov vendosën të intensifikojnë shkëmbimin e informacionit, të ndërmarrin hetime të përbashkëta, si dhe trajnime për parandalimin dhe goditjen e trafiqeve ilegale të mallërave dhe personave.

 

Në këtë takim u bisedua edhe për sigurinë në rajon në kuadrin e zhvillimit të lojrave olimpike në Athinë. Njëherësh u theksua se Maqedonia dhe Shqipëria angazhohen për krijimin e kufijëve të atillë, ku do të mundësohej lëvizja e lirë e njerëzve, ideve, mallërave dhe vlerave kulturore ndërmjet dy vendeve.

 

 

Kuvendi komunal i Preshevës studentëve me kushte të rënda materiale u ka ndarë 102 bursa

 

Preshevë, 10 maj 2004 - Kuvendi komunal i Preshevës studentëve me kushte të rënda materiale u ka ndarë 102 bursa. Sipas Zijadin Nuhiut përgjegjës i Fondit humanitar të Kuvendit komunal të Preshevës këto bursa u janë ndarë studentëve shqiptarë, të cilët studiojnë në Universitetin e Prishtinës, të Shqipërisë dhe atë të Tetovës. Konkurrenca e kandidatëve për këto bursa që do të jenë nga 30 euro, ishte mjaft e madhe.

 

 

Kroacia është e detyruar ta ekstradojë Boshkovskin në Maqedoni

 

Shkup-Zagreb, 10 maj 2004 - Deklaratat e zëdhënësit të Ministrisë së Brendshme të Kroacisë se Vllado Boshkovski është shtetas kroat dhe Kroacia nuk do ta ekstradojë, por ai do të gjykohet në Kroaci, nuk janë të vërteta.

 

Kroacia është nënshkruese e marrëveshjeve ndërkombëtare dhe ky vend është i obliguar që Boshkovskin ta ekstradojë në Maqedoni, në mënyrë që ai të dalë para drejtësisë për veprat për të cilat akuzohet, ka thënë ministri i Drejtësisë së Maqedonisë Hixhet Mehmeti.

 

 

Paralajmërimet serbe për ndërtimin e bazës ushtarake në Luginën e Preshevës shkaktojnë shqetësime te popullata shqiptare

 

Preshevë, 10 maj 2004 - Paralajmërimet e shefit të Shtatëmadhorisë së ushtrisë së Serbisë dhe Malit të Zi, gjeneralit Branko Kërga për vazhdimin e ndërtimit të bazës ushtarake në rajonin e Luginës së Preshevës, kanë shkaktuar shqetësime të popullatës shqiptare.

 

Siç bëhet e ditur kompleksi i bazës ushtarake përfshin një hapësirë prej 52 hektarësh dhe në të do të vendoseshin rreth 1000 pjesëtarë të ushtrisë dhe policisë serbe, të ngarkuar për sigurimin e kufirit shtetëror me Maqedoninë dhe me Kosovën.

Për përfaqësuesit politikë dhe institucional shqiptarëd të Luginës, është provokim i interesit të stabilitetit dhe zhvillimeve të gjithëmbarshme të këtij rajoni.

Përfekti i komunës së Preshevës, Riza Halimi thotë se paralajmërimet e tilla nuk janë në interesin e stabilitetit dhe të zhvillimit të gjithëmbarshëm të këtij rajoni. Ai shtoi se mjetet që janë paraparë të investohen në ndërtimin e bazës ushtarake do të ishin më produktive po të shfrytëzohen për zhvillim ekonomik dhe infrastrukturë. Z. Halimi tha se militarizimi i këtij rajoni do të prodhonte tensione në të ardhmen.

 

 

Në Kirkuk janë vrarë një jugafrikan dhe një irakian, kurse një zelandas është plagosur

 

Kirkuk, Irak, 10 maj 2004 - Të pakten një i huaj është vrarë sot (e hënë) pasi personat e armatosur kanë hapur zjarr në një automjet në qytetin verior irakian, Kirkuk, njofton BBCWorld. Policia ka thënë se një jugafrikan dhe një irakian janë vrarë, kurse një zelandas është plagosur në një breshëri zjarri, që ka ndodhur deri sa po hynin me makinë në qytet. Të huajt ishin inxhinierë, kurse irakiani ishte shofer, ka thënë policia.

 

 

Policia italiane ka arrestuar një imam algjerian dhe 4 tunizianë

 

Romë, 10 maj 2004 - Policia italiane ka thënë se ka arrestuar një imam algjerian dhe katër tunizianë të dyshimtë për planifikimin e sulmeve vetëvrsëse kundër caqeve perendimore në Irak, njofton BBCWorld.

 

Ata janë kapur gjatë një serie operacionesh në Florancë dhe në provincën e Liguria, të cilat ende po vazhdojnë. Operacionet ishin pjesë e hetimeve ndaj një grupi militant islamik, Ansar al-Islam, ka thënë policia.

 

 

Ushtarët izraelitë kanë vrarë 2 palestinezë të armatosur

 

Gaza, 10 maj 2004 - Ushtarët izraelitë kanë vrarë dy palestinezë të armatosur, të cilët, të kamufluar si gra kanë, hapur zjarr në kolonët izraelitë, që po kryenin një ceromoni memoriale të një familjari të vrarë javën e kaluar në Rripin e Gazës, kanë bërë të ditur burimet e sigurimit, njofton Rojter.

 

Forcat izraelite kanë vrarë të armatosurit në mbrojtje të kësaj familjeje të sulmuar izraelite, që përbëhej nga një grua dhe katër fëmijët e saj.

 

 

Në Kabul janë therur dhe pastaj janë mbytur me gurë 2 burra të huaj

 

Kabul, 10 maj 2004 - Dy burra të huaj, njëri zvicëran, janë therur dhe pastaj janë mbytur me gurë në kryeqytetin afgan, Kabul, kanë bërë të ditur zyrtarët qeveritarë, njofton Rojter.

 

Trupa e viktimave kanë qenë të mbështjellë me shallvare, këmisha të gjata dhe kapela leshi. Ambasada zvicërane në Kabul ka thënë se janë njoftuar për këto vrasje dhe kanë kërkuar detaje nga autotiritetet. Për vrasjen e tyre fajësohen militantët talibanë.

 

 

Në Çeçeni është varrë presidenti prorus dhe 6 persona të tjerë

 

Grozni, 10 maj 2004 - Një shpërthim i fuqishëm në stadiumin e kryqytetit çeçen Grozni shkaktoi vdekjen e presidentit prorus, Ahmad Kadirov dhe të paktën të 6 personave të tjerë.

Presidenti rus, Vladimir Putin, konfirmoi vdekjen e presidentit Kadirov, të cilin ai e cilësoi si hero, që punoi shumë për popullin çeçen. Kryeministri çeçen, Sergei Abramove, u emërua në postin e presidentit të përkohshëm.

Deri tani, askush nuk ka marrë përgjegjësinë për shpërthimin, i cili plagosi më shumë se 50 veta. Por presidenti Putin fajësoi për sulmin persona, që ai i cilësoi si terroristë. Me këtë term ai ka mundësi t'u referohet separatistëve myslimanë, që e kishin akuzuar zotin Kadirov për tradhëti dhe kishin bërë më parë disa përpjekje për ta vrarë.

 

 

Autoritetet amerikane japin urdhër për hapjen e procesit në çështjen e abuzimeve

 

Uashington, 10 maj 2004 - Autoritetet ushtarake amerikane dhanë urdhër për hapjen e procesit të parë gjyqësor këtë muaj kundër njërit prej ushtarëve të akuzuar për abuzimin e të ndaluarve në burgun Abu Graib të Bagdadit.

Një zëdhënës i ushtrisë amerikane tha dje se ushtari Jeremy Sivits nga Pansilvania do të dalë në gjyq më 19 maj në Bagdad.

Mes të tjerash, zoti Sivits është akuzuar për keqtrajtimin e të burgosurve dhe për mosmbrojtjen e tyre nga keqtrajtimi, aktet mizore dhe abuzimi. Në se gjehet fajtor, ai mund të dënohet deri me një vit burg dhe do të shkarkohet nga detyra për sjellje të papërshtatshme.

 

 

Sharon do ta ndryshojë planin e hedhur poshtë për tërheqje nga Rripi i Gazës

 

Gaza, 10 maj 2004 - Kryeministri izraelit, Ariel Sharon, deklaroi se do ta ndryshojë planin e hedhur poshtë për tërheqjen nga Rripi i Gazës dhe tha se po e shtynë një vizitë që kishte në plan të bënte javën tjetër në Uashington, për t'i dhënë vetes kohë të hartojë një propozim të ri.

Radio Izraeli njoftoi se Sharon u tha dje anëtarëve të kabinetit si ai do ta paraqesë planin e ri brenda 3 javësh.

Plani origjinal i zotit Sharon për çangazhim u hodh poshtë javën e kaluar nga afro 60 përqind e anëtarëve të Partisë Likud. Plani parashikonte tërheqjen e të gjitha vendbanimeve hebraike nga Rripi i Gazës, ku jetojnë rreth 75 mijë izraelitë të rrethuar nga më shumë se një milionë palestinezë.

 

 

Administrata shpreh mbështetje të fortë për sekretarin Ramsfeld

 

Uashington, 10 maj 2004 - Administrata e Presidentit Bush po shpreh mbështetje të fortë për sekretarin e Mbrojtjes Donald Ramsfeld, megjithë thirrjet që ai të japë dorëheqjen ose të shkarkohet nga detyra për shkak të skandalit rreth abuzimit të të burgosurve irakianë.

Sipas gazetës "Nju Jork tajms", këshilltarja për sigurinë kombëtare, Kondaliza Rajs, tha se Presidenti Bush vazhdon të shprehë mbështetjen më të fortë për zotin Ramsfeld. Nën-presidenti Dik Çeni e cilësoi zotin Ramsfeld si Sekretarin më të mirë të Mbrojtjes që kanë pasur ndonjëherë Shtetet e Bashkuara.

 

 

Arafat thotë se krijimi i shtetit palestinez vitin e ardhshëm është real

 

Ramallah, 10 maj 2004 - Presidenti palestinez Jaser Arafat tha se beson që krijimi i shtetit palestinez vitin e ardhshëm është i mundshëm edhe pse presidenti Bush sygjeroi se një gjë e tillë nuk është më reale.

Arafat tha se populli i tij kishte pritur për krijimin e një shteti të pavarur para pesë vjetesh bazuar në marrëveshje të nënshkruara më parë me Shtetet e Bashkuara. Ai tha se krijimi i një shteti të tillë në vitin 2005, siç kërkohet në marrëveshjen e paqes, është më se realist.

 

 

Bler u ka kërkuar falje të burgosurve irakianë

 

Londër, 10 maj 2004 - Kryeministri britanik Toni Bler u ka kërkuar falje të burgosurve irakianë që mund të jenë keqtrajtuar nga ushtarët britanikë.

Në një intervistë në televizionin francez, Bler tha se akte të tilla ishin plotësisht të papranueshme, dhe kushdo që do të gjendej fajtor do të ndëshkohej.

Megjithatë, zoti Bler tha se këto njoftime nuk duhet të largojnë vëmendjen nga puna e mirë që po bëhet nga mijëra ushtarë të tjerë britanikë në Irak.

 

 

Janë vrarë edhe 16 pjesëtarë të Armatës së Mehdiut të Moktada Sadrit

 

Bagdad, 10 maj 2004 - Të paktën 16 pjesëtarë të dyshimtë të Armatës së Mehdiut të Moktada Sadrit njoftohet të jenë vrarë gjatë luftimeve të sotme (e hënë) me forcat e koalicionit amerikan në Bagdad, njofton BBCWorld.

 

Ushtria amerikane ka shkatërruar zyret e klerikut luftënxitës në kryeqytetin e provincës së Sadrit, kanë thënë dëshmitarët. Po kështu, njoftohet se trupat amerikane kanë vrarë të dielen në Bagdad 19 përkrahës të Sadrit, një ditë pasi është arrestuar një ndihmës i lartë i klerikut.

 

 

Kryengritësit kanë vrarë 2 nga truprojet e guvernatorit irakian të provincës Dijala

 

Bakuba, Irak, 10 maj 2004 - Kryengritësit kanë bombarduar autokolonën e guvernatorit irakian të provincës Dijala dhe kështu kanë vrarë dy nga truprojet e tij dhe plagosur tre të tjerë, ka bërë të ditur policia, njofton Rojter. Sulmi ka ndodhur në dalje të kryeqytetit provincial Bakuba.

 

Guvernatori ka shpëtuar i palënduar. Në të njëjtin njoftim thuhet se ndërkohë ka vdekur edhe një oficer policie i plagosur të dielen në Bakuba nga persona të armatosur.

 

 

Trupat izraelite kanë shkatërruar 13 shtëpi palestineze në Gaza

 

Gaza, 10 maj 2004 - Trupat izraelite kanë shkatërruar sot (e hënë) 13 shtëpi palestineze në Gaza, njofton BBCWorld. Incidenti ka ndodhur vetëm një ditë pasi palestinezët e armatosur kanë hapur zjarr nga prita në një familje ebraitësh, që po kryenin një ceremoni përkujtiomore.

 

Ekskavatorët kanë demoluar shtëpitë përgjatë rrugës. Ishte rrënuar edhe një bllok banesash katërkatëshe dhe kështu u lanë pa shtëpi 75 palestinezë.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |