Përmbajtja:

• UNMIK-u raportin e "Amnesty international" e cilson "skajshmërisht të pamatur"

• Rexhepi e Buçkovski kanë biseduar për çështjen e kufirit Maqedoni-Kosovë

• UNMIK-u dhe KFOR-i kundërshtojnë raportin e AI për pjesëmarrjen e pjësëtarëve të tyre në trafikimin e femrave

• Në Klinë u formua rrjeti i organizatave rinore

• Konferencë për këmbimin e përvojave në sferën e menaxhimit dhe të inxhinieringut

• Nga Bordi i Drejtorëve në Dardanë kërkon hapjen e një pike kufitare

• Në Prishtinë sot mbahet një konferencë për menaxhimin, inxhinieringun dhe teknologjinë e biznesit

• Sot në Prizren i zhvillon punimet konferenca me temën "Nxënësit kosovarë dhe Bashkimi Evropian"

• Çështja e mjedisit në Kosovë duhet të trajtohet si prioritare

• Njoftim i Bashkimit të Intelektualëve Shiptarë në Zvicër

• Në Tiranë vdiq ambasadori Bashkim Dino

• Shkup: Islami e Mitreva biseduan për hapjen e dy pikave të reja kufitare ndërmjet Maqedonisë dhe Shqipërisë

• Përfekti i Bujanocit Nagip Arifi thotë se janë shënuar disa përirësime në drejtim të situatës ekonomike dhe politike

• Policia ka informacione se ku fshehet Boshkovski, por pret që ai të dorëzohet vetë

• M. Halili: Pika kufitare Kosovë - Maqedoni duhet përcaktuar ndërmjet kosovarëve dhe maqedonasve

• Komisioni hetimor i Maqedonisë konstaton se piloti nuk është përgjegjës aksidentin e presidentit Trajkovski

• Shpërthimi i një bombe në Karaçi ka shkaktuar vdekjen e 5 vetëve

• Bin Ladeni ofron 10 kg ar për vrasjen e Bremerit, Ananit dhe Brahimit

• Në Bangladesh është plagosur rëndë një veprimtar i lartë i opozitës

• Agjentët e FBI-së kanë arrestuar një avokat në lidhje me bombëvëniet në trenat e Madridit

• Janë vrarë 2 reporterë të televizioneve nga Polonia dhe Algjeria

• Ministria britanike e Mbrojtes po heton akuzat e reja për keqtrajtim të të burgosurve në Irak

• Tre të vdekur në Ukrainë nga shpërthimi i një depoje armësh

• Ushtarët izraelitë kanë vrarë sot tre palestinezë në Bregun Perëndimor

• Militantët e fisit kristian kanë vrarë të pakten 500 njerëz në Nigeri

• Bahreini ka arrestuar 5 aktivistë të opozitës

• Aeroplanët izraelit kanë bombarduar pozicionet e milicisë hezbollahe në jug të Libanit

• Sekretari i mbrojtjes Rumsfeld dëshmon sot para kongresit

• Bush kërkon falje publikisht për abuzimin e të burgosurve irakianë

• Forcat amerikane marrin nën kontroll zyrën e guvernatorit në Naxhaf

• Gjykata libiane dënon me vdekje gjashtë bullgarë për infektimin e fëmijëve me SIDA

• Në shpërthimin në një xhami në Karaçi kanë humbur jetën 10 vetë

• Në shpërthimin në Karaçi janë vrarë 13 njerëz

• Nga plagët e marra në një atentat vdes anëtari opozitar i Parlamentit të Bangladeshit

UNMIK-u raportin e "Amnesty international" e cilson "skajshmërisht të pamatur"

 

Prishtinë, 7 maj 2004 - UNMIK-u hedh poshtë akuzat e organizatës "Amnesty international" në lidhje me trafikimin e femrave dhe prostitucionin në Kosovë. Përmes një komunikate UNMIK raportin e cilson shumë të pabalancuar dhe që nuk trajton si duhet situatën tragjike dhe reale me të cilën përballen viktimat e trafikimit në rajonin e Ballkanit.

Poashtu UNMIK-u vlerëson se raporti është skajshmërisht i pamatur, se përmban vlerësime të përgjithësuara dhe se nuk paraqet gjendjen e vërtetë, si dhe përpjekjet e misionit ndërkombëtar civil e ushtarak dhe të shumë organizatave joqeveritare që të luftojnë këtë formë kriminaliteti.

 

 

Rexhepi e Buçkovski kanë biseduar për çështjen e kufirit Maqedoni-Kosovë

 

Shkup, 7 maj 2004 - Kufiri Maqedoni-Kosovë do të shënohet dhe çështjet eventuale kontestuese do të zgjidhen sa më shpejt, pa ngritur tensione për përmirësimin e marrëdhënietve të ndërsjella dhe për lëvizjen e lirë të qytetarëve të dy palëve. Kështu deklaroi sot në Shkup kryeministri Bajram Rexhepi.

"Presim që deri në fund të vitit përfundimisht të përcaktohet vija e demarkacionit", tha minisitri maqedonas i Mbrojtjes Vllado Buçkovski pas takimit me Rexhepin. Poashtu në këtë takim është folur edhe për hapjen e zyrave të ndërlidhjes në Shkup e Prishtinë.

Kryeministri Rexhepi është takuar edhe me nënkryetarët e Qeverisë maqedonase Jovan Manasievski dhe Musa Xhaferi.

 

 

UNMIK-u dhe KFOR-i kundërshtojnë raportin e AI për pjesëmarrjen e pjësëtarëve të tyre në trafikimin e femrave

 

Prishtinë, 7 prill 2004 - Organizata ndërkombëtare për mbrojtjen e drejtave dhe lirive të njeriut "Amnesty International" thotë se në shfrytëzimin e femrave janë përzier edhe pjesëtarë të misionit civil dhe ushtarak në Kosovë.

Mirëpo, zëdhënësja e UNMIK-ut Metilda Haneke në lidhje me raportin e Amnesty International thotë se ai është shumë i pabalancuar dhe nuk e trajton si duhet situatën tragjike dhe reale me të cilën përballen viktimat e trafikimit të femrave në rajonin e Ballkanit. Haneke thotë se faktet e vërteta tregojnë të kundërtën e kësaj, duke theksuar se UNMIK-u ka vepruar fuqishëm kundër trafikimit dhe prostitucionit në Kosovë gjatë katër viteve të shkuara.

 

Sipas zëdhënëses, vetëm në vitin 2003 një njësit i veçantë ka kryer mbi 2000 operacione bastisje në bare dhe në vendet ku dyshoheshin se zhvilloheshin aktivitete të trafikimi të njerëzve dhe prostitucionit. "UNMIK-u merr masa të menjëhershme kundër stafit të vet që gjendet në ndërtesa ku dyshohet se zhvillohet prostitucion dhe në vende ku ata nuk lejohen që të shkojnë.

 

Gjatë kësaj periudhe vetëm një polic ndërkombëtar dhe tre nga personeli ndërkombëtar janë gjetur në ndërtesa ku atyr u ndalohet që të shkojnë", thotë zonja Heneke.

Ndërkaq zëdhënësi i KFOR-it, Xhejms Moran thotë se politika e komandantit aktual Kamerhof është në mënyrë që askush nga ushtarët nuk ka të drejtë të largohet nga vendi dhe nuk lejohet të shkojë në bare apo vende nate.

 

Po ashtu secili nga vendet që përfaqëson KFOR-in duhet të japin informacione ushtarëve të vet se cilat janë ligjet dhe çfarë rregullash duhet ndjekur. Po ashtu secili vend ka përgjegjësi për ushtarët e vetë dhe nëse ushtarët e tyre futen në telashe, ata duhet që të marrin masa ndaj tyre.

 

 

Në Klinë u formua rrjeti i organizatave rinore

 

Klinë 7 maj 2004 - Përfaqësuesit e organizatat rinore të Klinës në një takim pune, të përkrahura edhe nga Departamenti i Rinisë si dhe drejtorisë për Kulturë Rini dhe Sport nga KK i Klinës, kanë formuar rrjetin e organizatave rinore të Klinës.

Takimi u zhvillua më një lloj agjende pune dhe konsultimi për shumë nga arsyet dhe motivet që shtuan keto organizata për një hap të tillë.

Në këtë takim u diskutua edhe statusi në të cilin do të bazohet ky rrjet rinor. Duke u shfaqur edhe vërejtjet nga përfaqësuesit e organizatave të pranishme për çdo pikë të caktuar të këtij statusi, të gjithë shprehen përkrahjen për këtë organizim të ri rinor duke potencuar faktin se ky organizim për ta do të jetë një ndihmesë shumë e madhe drejt një ardhmërie më të shkelqyeshme të këtyre organizatave.

Të pranishën në këtë takim ishin edhe strukturat udheheqëse komunale të cilët premtuan përkrahje të plotë edhe të parezervë për organizatat rinore, si dhe përfaqësuesi i OSBE-së, ai i GTZ-së të cilët gjithashtu shprehën një gatishmëri për t'u ndihmuar këtyre organizatave rinore.

 

 

Konferencë për këmbimin e përvojave në sferën e menaxhimit dhe të inxhinieringut

 

Prishtinë, 7 maj 2004 - Në organizim të Institutit për Menaxhim dhe Inxhiniering të Ndërmarrjes (IEME),në Prishtinë po i zhvillon punimet një konferencë dyditore ndërkombëtare me temën "Ndërmarja moderne: menaxhimi, inxhinieringu, teknologjia e informacionit".

Kjo konferencë ka si qëllim këmbimin e përvojave në sferën e menaxhimit dhe në inxhinieringun e teknologjisë aplikative.

U tha se përfshirja e biznesit në sistemet moderne të menaxhimit dhe komunikimit është synim parësor i ekonomisë së Kosovës. Ndërkaq diskutimet në këtë temë u vlerësuan shumë të nevojshme, nga pjesëmarrësit.

Kryetari i IEME-së, Edmond Hajrizi tha se teknika e metodologjive bashkëkohore që kanë të bëjnë me menaxhimin dhe me teknologjinë, kanë për qëllim gjetjen e një rruge më efektive drejt zhvillimit të ekonomisë dhe industrisë së Kosovës dhe njëherit harmonizimin e saj me trendet bashkëkohore.

 

 

Nga Bordi i Drejtorëve në Dardanë kërkon hapjen e një pike kufitare

 

Dardanë, 7 maj 2004 - Bordi i drejtorëve në Dardanë ka kërkuar hapjen edhe të një pike kufitare te Kapia mes komunës sëë Dardanës dhe të Medvegjës. Kjo çështje u mbështet edhe nga përfaqësuesi i UNMIK-ut Shtefen Felbrih e sidomos nga majori Uilson në emër të KFOR-rit amerikan. "Komanda e KFOR-it këtë kërkesë e ka përcjellë në nivelet më të larta, ndërsa të enjtën e ardhshme në një mbledhje do ta ngrisë këtë çështje".

Me hapjen e kësaj pike banorët e fshatrave të Gallapit do të mund të përfitonin dhe me siguri që gjendja e tyre ekonomike do të përmirësohej.

Bordi i drejtorëve u njoftua me propozimin e Drejtorisë së Urbanizmit dhe të Rindërtimit për caktimin e lokacionit të objektit për personat me nevoja të veçanta.

I një rëndësie të veçantë do të ishte ndërtimi i objektit të banimit kolektiv, me ç'rast drejtorisë së urbanizmit dhe zyrës së prokurimit iu caktua afati, që deri të hënën më 10 maj të shpallet tenderi.

 

 

Në Prishtinë sot mbahet një konferencë për menaxhimin, inxhinieringun dhe teknologjinë e biznesit

 

Prishtinë, 7 maj 2004 - Instituti për Menaxhim dhe Inxhiniering të Ndërmarrjes në bashkëpunim me Universitetin Teknik të Vjenës sot në Prishtinë organizojnë një konferencë, në të cilën do të diskutohet për shkëmbimin e njohurive, përvojave dhe informatave për ndërmarrjet. Në fokus do të jetë menaxhimi, inxhinieringu dhe teknologjia e biznesit, shëndetësia, gratë në biznes dhe në teknologji.

Konferenca do të përfshijë idetë shkencore, teknologjike dhe praktike. Qëllimi është që të ofrohet një mundësi e veçantë për ekspertët dhe njerëzit e interesuar të takohen dhe të këmbejnë idetë.

 

 

Sot në Prizren i zhvillon punimet konferenca me temën "Nxënësit kosovarë dhe Bashkimi Evropian"

 

Prizren, 7 maj 2004 - Me rastin e Ditës së Evropës, Ministria e Arsimit, e Shkencës dhe e Teknologjisë në bashkëpunim me Qendrën Evropiane B Kosovë organizon konferencën me temën "Nxënësit kosovarë dhe Bashkimi Evropian". Konferenca do t'i zhvillojë punimet sot në Prizren.

Në këtë konferencë marrin pjesë afër 200 nxënës maturantë të dalluar nga e gjithë Kosova, përfaqësues nga të gjitha grupet etnike, së bashku me arsimtarët e tyre, zyrtarë të Komisionit Evropian, - DG Edukim dhe Kulturë, OSBE, Zyra pranë Kryeministrisë për Mekanizmin e Përcjelljes së Procesit të Stabilizim Asociimit, Këshilli i Evropës etj.

Konferenca do të vazhdojë punimet me diskutime mbi Bashkimin Evropian, rrugën e Kosovës drejt Evropës dhe Politikat e Edukimit Sekondar në BE. Pasdite do të diskutohet dhe dilet me konkluzione mbi tema evropiane me të veçanta që kanë ndikim të drejtëpërdrejtë mbi nxënësit kosovarë.

 

 

Çështja e mjedisit në Kosovë duhet të trajtohet si prioritare

 

Prishtinë, 7 maj 2004 - Strategjia e Kosovës për mbrojtjen e mjedisit dhe zhvillimin e qëndrueshëm synon krijimin e një baze për zgjidhjen e çështjeve kryesore të mjedisit në Kosovë, në afat prej 10 vjetësh. Kështu u tha në një debat të organizuar sot në Prishtinë nga Ministria e Mjedisit dhe Planifikimit Hapësinor.

Në hapje të debatit, ministri i Mjedisit e Planifikimit Hapësinor, Ethem Çeku tha se gjatë kësaj periudhe duhet të zgjidhen problemet më parësore të mjedisit. Sipas tij, zgjidhja e problemeve të mjedisit do të jetë në harmoni me zhvillimin ekonomik të Kosovës.

 

Çeku tha se mbrojtja e mjedisit është përgjegjësi e të gjitha institucioneve qendrore e lokale, por edhe e qytetarëve, ndërkaq Qeveria dhe institucionet finaciare ndërkombëtare në Kosovë, tha ai, çështjen e mjedisit duhet ta trajtojnë si çështje prioritare.

Në debat morën pjesë përfaqësues të institucioneve shkencore e të pushtetit lokal, të kompanive të biznesit e të organizatave joqeveritare dhe shumë qytetarë.

 

 

Njoftim i Bashkimit të Intelektualëve Shiptarë në Zvicër

 

Bernë, 7 maj 2004 - Me rastin e 5-vjetorit të çlirimit të Kosovës dhe 126-vjetorit të Lidhjes Shqiptare të Prizrenit, Bashkimi i Intelektualëve Shiptarë, në Zvicër do të organizojë një tryezë të rrumbullakët me veprimtarët, intelektualët shqiptarë dhe gazetarët nga Zvicra në temat:

roli i Lidhjes Shqiptare të Prizrenit, roli i UÇK-së, roli i mërgatës shqiptare në Zvicër gjatë 25-viteve të fundit në afirmimin e çështjes së Kosovës.

Tryeza do të mbahet më 12 qershor 2004, në lokalet e Qendrës shkollore për arsimim profesional "Formazione" në Bernë.

Për informata më të hollësishme përmes email: ahmet.xhigoli@bishz.ch ose përmes postës së zakonshme në adresën: BISHZ-VAIS, Sekretariati, Bahnstrasse 92, 3008 Bern. (Më tepër shiko www.bishz.ch)

 

 

Në Tiranë vdiq ambasadori Bashkim Dino

 

Tiranë, 7 maj 2004 - Dje në Tianë, pas një ataku në zemer u nda nga jeta në moshen 66-vjeçare, ambasador Bashkim Dino.

Ambasadori Dino ka qenë një nga diplomatët me të suksesshëm të Shqipërisë, i cili ka përfaqësuar vendin me dinjitet dhe profesionalizëm për më shumë se një çerek shekulli.

Dino ka qenë ambasador i Shqipërisë në Suedi, Greqi, Itali, perfaqësues i Shqipërisë në FAO dhe Maltë dhe së fundi sapo kishte përfunduar misionin e tij si ambasador i Republikës së Shqipërisë në Izrael.
Dino ka qenë pedagog në Universitetin e Tiranës, Dega Histori-Filiologji.

 

 

Shkup: Islami e Mitreva biseduan për hapjen e dy pikave të reja kufitare ndërmjet Maqedonisë dhe Shqipërisë

 

Shkup, 7 maj 2004 - Hapja e dy pikave të reja kufitare ndërmjet Maqedonisë dhe Shqipërisë dhe takimi i ardhshëm i drejtorëve konsullorë të ministrive të jashtme të të dyja vendeve për liberalizimin e qarkullimit të lirë të qytetarëve, ishin dy nga çështjet kryesore të bisedimeve ndërmjet shefave të diplomacisë së Shqipërisë dhe Maqedonisë në Shkup, përkatësisht Kastriot Islamit dhe Ilinka Mitrevës.

 

Ata shprehën pikëpamjet e njëjta lidhur me integrimet evroatlantike dhe presin që në një takim të shpejtë në Shkup me nënshkruesit e Kartës së Adriatikut të formulohet një qëndrim që do t'i sjellë ato sa më afër anëtarësimit në NATO.

Ministri i jashtëm shqiptar Kastriot Islami ka thënë se marrëdhëniet e mira midis dy vendeve janë bërë një model shumë i mirë për gjithë rajonin.

Ministri Islami u prit edhe nga z. Branko Cërvenkovski, kryeministër në dorëheqje dhe fitues i zgjedhjeve presidenciale, si dhe nga ushtruesi i detyrës së presidentit, Lubço Jordanovski.

 

 

Përfekti i Bujanocit Nagip Arifi thotë se janë shënuar disa përirësime në drejtim të situatës ekonomike dhe politike

 

Uashington, 7 maj 2004 - Një grup zyrtarësh vendës nga Lugina e Preshevës ndodhet në Uashington me një program të Departamentit amerikan të Shtetit për të diskutuar mbi reformat në këtë rajon, i cili vetëm para pak vitësh ishte një pikë konflikti në Ballkan.

 

Prefekti i Bujanocit Nagip Arifi, i cili ndodhet në këtë delegacion, i deklaroi "Zërit të Amerikës" se kjo vizitë është shumë me rëndësi për Luginën e Preshevës, sepse është biseduar me përfaqësuesit e USAID-it i cili po punon në përmirësimin e infrastrukturës në Komunën e Bujanocit dhe në përgjithësi në Luginën e Preshevës.

Duke shfaqur qëndrimin e tij në lidhje me pozitën e komunitetit shqiptar pas ndryshimeve në Serbi, z. Arifi ka thënë se gjatë qëndrimit në Uashington e kanë njoftuar Departmentin e Shtetit se janë shënuar disa përmirësime në drejtim të situatës ekonomike dhe politike.

 

Por ka ngecje sidomos me ndryshimin e pushtetit qeveritar të Serbisë sepse siç dihet në zgjedhjet e vitit 2003, shumicën e deputetëve republikan në Serbi për fat të keq e fituan rryma radikale e Koshtunicës dhe e Sheshelit.

 

 

Policia ka informacione se ku fshehet Boshkovski, por pret që ai të dorëzohet vetë

 

Shkup, 7 maj 2004 - Ministri i Brendshëm maqedonas Hari Kostov thotë se policia ka informacione se ku fshet pararendësi i tij Lube Boshkovski, por nuk do të ndërmarrë ndonjë veprim për arrestimin e tij. Ai ka theksuar se policia do të presë që Boshkovski të dorëzohet vetë, siç kishte premtuar, ose ai do të arrestohet nëse përpiqet të largohet nga vendi.

Kundër ish-ministrit të Brendshëm Boshkovski ëshë lëshuar një urdhërarresti ndërkombëtar. Ai akuzohet të ketë thënë urdhër për vrasjen e shtatë shtetasve aziatik në vitin 2002, kur mbante postin e ministrit të Punëve të Brendshme të Maqedonisë.

 

 

M. Halili: Pika kufitare Kosovë - Maqedoni duhet përcaktuar ndërmjet kosovarëve dhe maqedonasve

 

Shkup, 7 maj 2004 - Pika kufitare Kosovë - Maqedoni duhet përcaktuar ndërmjet kosovarëve dhe maqedonasve, e jo mes maqedonasve, serbëve e malazezëve, thotë diplomati dhe eksperti i marrëdhënieve ndërkombëtare në Shkup, Muhamet Halili.

 

Ai i ka deklaruar radios "Evropa e lirë" se kjo është një marrëveshje e njohur nga bashkësia ndërkombëtare dhe Kombet e Bashkuara, si marrëveshje valide.

 

Por në të ardhmen e afërt duhet të gjendet një gjuhë e përbashkët midis autoriteteve të UNMIK-ut, institucioneve të Kosovës dhe autoriteteve të Maqedonisë në mënyrë që të eliminohen disa keqkuptime ose mosmarrëveshje që kanë të bëjnë në lidhje me shënimin e linjës kufitare ndërmjet Maqedonisë dhe Kosovës.

 

Z. Halili tha se është pjekur koha, por edhe vetë të dy palët: pala maqedonase, ajo e UNMIK-ut dhe ajo kosovare, konsiderojnë se këto çështje mund të zgjidhen.

 

 

Komisioni hetimor i Maqedonisë konstaton se piloti nuk është përgjegjës aksidentin e presidentit Trajkovski

 

Shkup, 7 maj 2004 - Piloti që drejtonte aeroplanin me të cilin udhëtonte presidenti i Maqedonisë Boris Trajkovski dhe tetë bashkëpunëtorët e tij në ditën e aksidentin tragjik, nuk ishte përgjegjës për aksidentin.

 

Kjo është bërë e ditur nga anëtarët e Komisionit hetimor të Maqedonisë mbi aksidentin në fjalë, pas deklaratës së ministrit boshnjak të Transportit se gabimi i pilotit kishte shkaktuar përplasjen e aeroplanit.

 

 

Shpërthimi i një bombe në Karaçi ka shkaktuar vdekjen e 5 vetëve

 

Karaçi, Pakistan, 7 maj 2004 - Një bombë ka shpërthyer fuqishëm sot (e premte) në një xhami të muslimanëve shitë brenda një shkolle fetare në qytetin jugor portual Karaçi dhe kështu ka shkaktuar vdekjen e pesë vetëve dhe plagosjen e të pakten 35 të tjerëve, kanë bërë të ditur dëshmitarët dhe policia, njofton AP.

 

Sulmi ka ndodhur vetëm një orë pas faljes së xhumasë, ka thënë një hetues i lartë policie. Ai nuk dha hollësi të tjera. Nuk është i qartë motivi i sulmit.

 

 

Bin Ladeni ofron 10 kg ar për vrasjen e Bremerit, Ananit dhe Brahimit

 

Dubai, 7 maj 2004 - Lideri i organizatës terroriste Al Kaida Osama bin Laden ka ofruar 10 kg ar për vrasjen e administratorit amerikan në Irak Pol Bremer, të sekretarit të përgjithshëm të OKB-së Kofi Anan dhe të dërguarit të tij në Irak Lahdar Brahimit, është publikuar sot në një faqe interneti islamik.

Ndërkohë Kombet e Bashkuara kanë forcuar shkallën e sigurisë për Kofi Ananin, pas kësaj oferte të liderit të Al Kaidës.

Bin Ladeni në mesazhin e tij bën thirrje për luftë të shenjtë kundër qeverisë kalimtare e cila duhet të formohet në Irak deri më 30 qershor.

 

 

Në Bangladesh është plagosur rëndë një veprimtar i lartë i opozitës

 

Daka, Bangladesh, 7 maj 2004 - Veprimtari i lartë i opozitës në Bangladesh, Ahsan Ullah Master, është plagosur rëndë nga personat e armatosur dhe po lufton për jetë, njofton BBCWorld.

 

Policia ka thënë se Z. Master, i cili i takon Ligës opozitare Avami, është sulmuar sot (e premte) në vendbanimin e tij në qytetin Tongi, 20 km në veri të kryeqytetit Daka.

 

Në këtë incident janë plagosur edhe disa persona të tjerë që besohet të jenë të kësaj partie. Pas atentatit, Z. Master është dërguar në spitalin e qytetit Daka dhe gjendet në gjendje kritike.

 

 

Agjentët e FBI-së kanë arrestuar një avokat në lidhje me bombëvëniet në trenat e Madridit

 

Uashington, 7 maj 2004 - Agjentët e FBI-së kanë arrestuar një avokat nga shteti amerikan Oregon në lidhje me bombëvëniet në trenat e Madridit, ku patën vdekur 191 njerëz, njofton BBCWorld. Avokati Brandon Mejfild nga Portlandi, i konvertuar në musliman, është personi i parë i shquar në SHBA, që është burgosur për këto sulme.

 

Në njoftim thuhet se gjurmët e gishtrinjve të të arrestuarit janë gjetur në trastën, me të cilën janë bartur mjetet shpërthyese, të përdorura në sulme.

 

 

Janë vrarë 2 reporterë të televizioneve nga Polonia dhe Algjeria

 

Varshavë, 7 maj 2004 - Dy reporterë të televizioneve nga Polonia dhe Algjeria janë vrarë sot (e premte), kurse një kameraman polak është plagosur në një sulm në pjesën qendrore të Irakut, ka bërë të ditur një burim i afërt me televizionin polak, njofton Rojter.

 

 

Ministria britanike e Mbrojtes po heton akuzat e reja për keqtrajtim të të burgosurve në Irak

 

Londër, 7 maj 2004 - Ministria britanike e Mbrojtes thotë se po heton akuzat e reja për keqtrajtim të të burgosurve në Irak, pasi një ushtar i tretë ofroi dëshmi.

Ushtari së pari i dorëzoi akuzat në gazetën "Dejli miror", e cila thotë se ai posedonte një dosje të hollësishme të asaj që e quan, "abuzim serioz nga një element i keq".

Ajo thotë gjithashtu se ushtari ka edhe emrat e atyre që janë përgjegjës.

 

 

Tre të vdekur në Ukrainë nga shpërthimi i një depoje armësh

 

Kiev, 7 maj 2004 - Një zjarr ka shkaktuar shpërthimin e një depoje armësh duke vrarë së paku 3 vetë në Ukrainën juglindore.

Fshatarët janë paralajmëruar për gjendjen emergjente. Rreth 10 mijë vetë janë evakuar nga një zonë prej 10 km në jug-lindje të Ukrainës.

Depoja që mori flakë përdorej për magazimin e raketa hedhësve, minave anti-tank dhe municonit për marinën. Menjëherë pasi u shfaq flaka, u dëgjuan shpërthime të fuqishme që shkatërruan ndërtesat brenda një zoneje me rreze 3 km të bazës ushtarake që gjendet në rajonin, Zaporizhja.

Sipas dëshmitarëve okularë orë pasi filloi flaka, shpërthimet dëgjoheshin pas çdo disa sekondash. Ministria e çështjeve urgjente ka thënë se mbeturina nga shpërthimi kanë shkuar 10 km tutje duke shkaktuar zjarre të tjera.

 

 

Ushtarët izraelitë kanë vrarë sot tre palestinezë në Bregun Perëndimor

 

Tulkarem, 7 maj 2004 - Ushtarët izraelitë kanë vrarë sot (e premte) tre palestinezë në Bregun Perëndimor, dy prej të cilëve i takonin lëvizjes radikale Xhihadi islamik, kanë bërë të ditur burimet palestineze dhe izraelite.

Dy aktivistë, të cilët kërkoheshin për pjesëmarrje në sulmet antiizraelite, janë vrarë pasi kishin hapur zjarr ndaj forcave që kishin rrethuar shtëpinë e tyre në një kamp afër Turkalemit.

Pjesëtari i tretë i Xhihadit, që ndodhej në shtëpi, është doërzuar.

Poashtu është vrarë edhe një pelestinez në një incident tjetët në qytetin Nablus nga zjarri i ushtarëve izraelitë.

Gjikthashtu njoftohet se një automobil-bombë me 100 kg eksploziv është zbuluar po sot në një fshat afër Nablusit, ka bërë të ditur policia izraelite.

 

 

Militantët e fisit kristian kanë vrarë të pakten 500 njerëz në Nigeri

 

Jelva, Nigeri, 7 maj 2004 Militantët e fisit mbizotërues kristian kanë vrarë të pakten 500 njerëz në dy sulme në qytetin musliman në pjesën qendrore të Nigerisë, ka bërë të ditur një zyrtar i lartë i Kryqit të Kuq, njofton AP. Kryqi i Kuq kishte nxjerrë këtë shifër të vrarësh nga intervistat që u kishte marrë dëshmitarëve dhe familjarëve të viktimave.

 

 

Bahreini ka arrestuar 5 aktivistë të opozitës

 

Manama, Bahrein, 7 maj 2004 - Bahreini ka arrestuar pesë aktivistë të opozitës, të cilët kanë bërë thirrje për reforma demokratike dhe kështu kanë ngritur në 19 numrin e të arrestuarëve në javën e kaluar, njofton BBCWorld. Të dyshimtët janë akuzuar për përpjekje të ndryshimit të sistemit politik.

 

 

Aeroplanët izraelit kanë bombarduar pozicionet e milicisë hezbollahe në jug të Libanit

 

Bejrut, 7 maj 2004 - Aeroplanët izraelit kanë bombarduar edhe sot (e premte) pozicionet e milicisë hezbollahe në jug të Libanit, kanë bërë të ditur burimet e sigurimit libanez, njofton BBCWorld. Sulmet në zonën e fermave Sheba duket të jenë përgjigje e sulmeve raketore të hezbollahëve në bunkerët ushtarak izraelitë.

 

Hezbollahët kanë thënë se kanë vrarë disa infiltratorë të armatës izraelite në këtë zonë, që është trekufiri izraelit, libanez dhe sirian. Sot është dita e tretë e luftimeve në këtë zonë.

 

 

Sekretari i mbrojtjes Rumsfeld dëshmon sot para kongresit

 

Uashington, 7 maj 2004 - Sekretari amerikan i Mbrojtjes, Donald Ramsfeld, do të dëshmojë sot para kongresit lidhur me abuzimin e të burgosurve irakianë, ndërkohë që disa senatorë bënë thirrje për dorëheqjen e tij.
Senatori republikan Xhon Mekejn tha se Ramsfeld duhet të bëjë shumë sqarime kur të dëshmojë para komisionit të senatit për forcat e armatosura.

Senatori demokrat, Tom Harkin, tha se sekretari Ramsfeld duhet të japë dorëheqje, siç u shpreh ai, për të mirën e vendit dhe për sigurinë e trupave amerikane nëpër botë.

Edhe kandidati i Partisë Demokrate për president, Xhon Keri, kërkoi dorëheqjen e zotit Ramsfeld.

Dje, presidenti Bush hodhi poshtë këto thirrje, duke thënë se zoti Ramsfeld do të vazhdojë të qëndrojë në kabinetin e tij.

 

 

Bush kërkon falje publikisht për abuzimin e të burgosurve irakianë

 

Uashington, 7 maj 2004 - Presidenti amerikan Xhorxh Bush ka kërkuar falje publikisht për herë të parë për abuzimin e të burgosurve irakianë nga trupat amerikane.

Duke qëndruar përkrah mbretit Abdullah të Jordanisë në një konferencë për shtyp, presidenti Bush tha se i kishte shprehur keqardhje mbretit arab për vuajtjet dhe poshtërimin që i është bërë të burgosurve.

Por ai hodhi poshtë sugjerimet se sekretari amerikan i mbrojtjes, Donald Ramsfeld duhet të japë dorëheqje apo të hiqet nga posti mbi skandalin që ka shkaktuar zemërim ndërkombëtar, sidomos në vendet arabe.

 

 

Forcat amerikane marrin nën kontroll zyrën e guvernatorit në Naxhaf

 

Naxhaf, 7 maj 2004 - Forcat amerikane morën nën kontroll zyrën e guvernatorit në Naxhaf, ndërkohë që nga përleshjet në periferi të qytetit të shenjtë humbën jetën 41 milicë të klerikut radikal shiit, Maktada al-Sadër.

Tanket amerikane hynë në një zonë të qytetit për herë të parë që nga fillimi i përlesshjeve para një muaji me përkrahës të armatosur të klerikut të kërkuar al-Sadr, që fshihet në këtë qytet.

Luftimet u intensifikuan, ndërkohë që administratori civil amerikan për Irakun, Paul Bremer, caktoi një guvernator të ri për rajonin e Naxhafit.

 

 

Gjykata libiane dënon me vdekje gjashtë bullgarë për infektimin e fëmijëve me SIDA

 

Tripoli, 7 maj 2004 - Një gjykatë libiane dënoi me vdekje gjashtë punonjës bullgarë mjekësie dhe një mjek palestinez, pasi i shpalli ata fajtorë se kishin infektuar me qëllim me virusin e HIV-it qindra fëmijë libianë.

Gjykata e qytetit të Bengazit në veri të Libisë tha se shtatë të huajt do të ekzekutoheshin nga një skuadër pushkatimi. Gjykata dënoi gjithashtu një mjek bullgar me katër vjet burg për rolin në këtë çështje.

Ministri bullgar i drejtësisë Anton Stankov tha se ishte tronditur nga dënimi dhe kërkoi një apel. Një zëdhënës i qeverisë bullgare e quajti vendimin "të papranueshëm". Edhe Bashkimi Evropian e ka kundërshtuar vendimin.

 

 

Në shpërthimin në një xhami në Karaçi kanë humbur jetën 10 vetë

 

Karaçi, 7 maj 2004 - Autoritet në Pakistan kanë bërë të ditur se të pakten 10 vetë kanë humbur jetën në shpërthimin e sotëm (e premte) në një xhami në lagjen e bizneseve në Karaçi, njofton BBCWorld.

 

Burimet spitalore kanë thënë se në këtë incident janë plagosur edhe të paktën 50 të tjerë, shumë syresh rëndë. Në momentin e shpërthimit, xhamia ishte përplot besimtarë shitë, që falnin xhumanë. Dëshmitarët kanë thënë se sulmi mund të jetë kryer nga sulmues vetëvrasës me bombë, por një gjë e tillë nuk është konfirmuar nga policia.

 

 

Në shpërthimin në Karaçi janë vrarë 13 njerëz

 

Karaçi, 7 maj 2004 - Autoritet në Pakistan kanë bërë të ditur se të paktën 13 njerëz janë vrarë nga shpërthimi që e ka shkkatuar një sulmues vetëvrasës sot (e premte) në një xhami në lagjen e bizneseve në Karaçi, duke plagosur edhe 80 të tjerë njofton Rojter.

Mbi 100 vetë ndodheshin në momentin e shpërthimit në xhami duke falur xhumanë. Edhe policia e ka konfirmuar vrasjen e 13 njerëzve dhe plagosjen e 80 të tjerëve, ndërkohë që burimet spitalore thonë se mbi 20 veta ndodhen nën kujdesin intensiv.

Një zyrtar lokal tha se ky është sulm terrorist i kryer nga armiqtë e paqes.

 

 

Nga plagët e marra në një atentat vdes anëtari opozitar i Parlamentit të Bangladeshit

 

Daka, Bangladesh, 7 maj 2004 - Anëtari i lartë opozitar i Parlamentit, Ahsan Ullah Master, i cili ishte plagosur rëndë në një atentat të sotëm (e premte) në qytetin Tongi, 20 km në veri të kryeqytetit Daka, njoftohet se ka vdekur nga plagët e marra në spitalin e kryeqytetit, ku ishte dërguar fill pas atentatit, njofton BBCnews.

 

Policia ka thënë se ai i përkiste Ligës opozitare Avami. Në këtë incident ishin plagosur edhe disa persona të tjetë, që besohet se ishin të së njëjtës parti.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |