Përmbajtja:

• Presidenti Rugova: Edhe pas pesë vjetësh në liri, kemi dhembje, por edhe krenari për Profesor Aganin

• Presidenti Rugova dekoroi prof.Fehmi Aganin me Urdhërin "Heroi i Kosovës"

• Presidenti Rugova përgëzon Presidentin e ri të Austrisë

• Presidenti Rugova përgëzoi Cërvenkovskin

• Holkeri do të qëndrojë në Uashington dhe në OKB

• Daci bisedoi me kryesuesit e komisioneve parlamentare për funksionalizimin e mekanizmave të Kuvenditi

• M.Hamiti: Akti i miratimit të planeve për Kosovën që vijnë nga Beogradi është i papranueshëm

• Përfaqësuesit e Grupit të Kontaktit konstatojnë se plani i Serbisë për Kosovën mund të shkaktojë probleme

• Qeveria e Kosovës ka aprovuar projektligjin për tatimin në të ardhurat personale dhe atë për tatimin në fitim

• Holkeri ka biseduar në Beograd me kryeministrin serb rreth planit të Serbisë për Kosovën

• Alush Gashi tha se Kosova në arenën ndërkombëtare duhet ta ketë trajtimin e një shteti në ndërtim

• Të zhvendosurit e pakicës serbe në Gjilan gjatë trazirave të marsit kanë filluar të kthehen në shtëpitë e tyre

• Sali Berisha refuzoi ftesën e Nanos për të marrë pjesë në delegacionin shqiptar në takimin e NATO-s

• Hetuesit në Bosnje thanë se gabimi i pilotit e shkaktoi rrëzimin e aeroplanit të presidentit Trajkovski

• Parlamenti maqedonas ia mori mandatin e deputetit Lube Boshkovskit

• Në luftimet në disa qytete irakiene janë vrarë të pakten 15 irakianë dhe një ushtar amerikan

• Izraeli ka liruar nga burgu bashkëthemeluesin e grupit militnt palestinez Hamas

• Një bombëhedhës vetëvrasës ka vrarë 5 irakianë dhe një ushtar amerikan në Bagdad

• Dy shpërthime kanë shkatërruar selinë e Unionit Patriotik të Kurdistanit në Bakuba

• Bush thotë se personat përgjegjës do të nxirren para drejtësisë

• Bush takohet sot në Shtëpinë e Bardhë me mbretin e Jordanisë Abdullah

• Këshilltari i Pauellit sulmon kundërshtarët

• Udhëheqësi rebel i Axharisë, Abashixe ka dhënë dorëheqje

Presidenti Rugova: Edhe pas pesë vjetësh në liri, kemi dhembje, por edhe krenari për Profesor Aganin

  

Prishtinë, 6 maj 2004 - Sot në Teatrin Kombëtar në Prishtinë u mbajt një Akademi përkujtimore kushtuar profesor Fehmi Aganit, në 5-vjetorin e vrasjes, e cila u organizua nën patronazhin e Presidentit të Kosovës, Ibrahim Rugova.   Merrin pjesë anëtarë të familjes së ngushtë Agani, zyrtarë të lartë të Kuvendit të Kosovës, ministra, deputetë, zyrtarë të LDK-së, kryetarë komunash, si dhe shumë pjesëmarrës, të cilët me praninë e tyre nderuan personalitetin dhe veprën e profesor Fehmi Aganit.   Fillimisht u këndua Himni Kombëtar dhe ai "Kur n'Kosovë ra kushtrimi" dhe pastaj me një minutë heshtje u nderua profesori i ndjerë Fehmi Agani. Presidenti i Kosovës Ibrahim Rugova, duke folur për personalitetin e profesor Aganit tha në fillim të fjalës së tij:   "Jemi tubuar sot këtu, në Teatrin Kombëtar të Kosovës, në këtë Akademi Përkujtimore në kujtim të 5 vjetorit të vrasjes së Akademik Prof. Dr. Fehmi Agani, Nënkryetarit shumëvjeçar të LDK-së dhe deputetit të Kuvendit të Republikës së Kosovës".

  
"Gjendemi sot së bashku në kujtim të përjetshëm të Profesorit tonë të madh, të Profesorit tim dhe të mikut tim të çmueshëm e bashkëpunëtorit, bashkëmendimtarit dhe bashkëvepruesit tim e tonë shumëvjeçar, Profesor Aganit", tha Presidenti Rugova.

- Profesori ynë Agani, - tha Presidenti Rugova - me këtë titull që u bë emër i Tij për të gjithë ne në jetën tonë publike e private, gjithë jetën dhe veprën ia kushtoi vendit tonë Kosovës dhe popullit shqiptar. Për decenie të tëra Profesor Agani ishte i njohur për veprën e Tij arsimore universitare, shkencore e filozofike. Ishte i dashur dhe i çmuar nga të gjithë - tha ai.

 
Presidenti Rugova theksoi më tutje se me themelimin e LDK-së, që ishte njëri ndër themeluesit e saj, "Ai, dhe të gjithë ne, hyri në jetën aktive politike e shtetërore për të mbrojtur vlerat dhe ekzistencën e kombit të Kosovës dhe të popullit shqiptar".

- Profesor Agani mori pjesë aktive në aktet madhore të vendit tonë siç janë: Deklarata e Pavarësisë, Kushtetuta e Republikës së Kosovës, Referendumi për Pavarësi dhe në ndërtimin e institucioneve të Kosovës në bazë të zgjedhjeve presidenciale e parlamentare të Republikës së Kosovës të vitit 1992 - tha Presidenti Rugova, duke folur për aktivitetin politik të profesor Aganit.

"Së bashku me Profesor Aganin i vendosëm themelet e shtetit të pavarur të Kosovës dhe funksionimin e tij, që sot në botë njihet si 'shtet i shqiptarëve të Kosovës' apo si 'shtet paralel', si kontribut yni në historinë e lëvizjeve të botës për pavarësi".

Presidenti Rugova në vazhdim të fjalës së tij theksoi se Profesor Agani për një decenie të tërë ishte njeriu më aktiv në lëvizjen tonë për liri, pavarësi e demokraci. "Ai ishte gjithmonë në vijën e parë të veprimit në planin publicistik, diplomatik dhe të veprimit në terren.

 

Ishte ndër profesorët e rrallë që kishte pranuar të punonte me studentët e tij dhe me të gjithë njerëzit për të mirën e vendit të vet. Ishte i palodhshëm dhe gjithmonë i gatshëm për të gjetur zgjidhje për çdo problem të veprimit shtetëror e politik si dhe për çdo çështje të veprimit të përditshëm duke ndërtuar dhe mbrojtur lirinë dhe pavarësinë, objektivin tonë madhor". Me këto cilësi, tha Presidenti, Profesor Agani jepte kontribut të madh në formimin e kulturës politike, shtetërore e njerëzore të vendit tonë.

Ndërkaq, duke folur për një cilësi tjetër të madhe të Profesor Aganit, Presidenti Rugova tha veçoi modestinë njerëzore e morale dhe modestinë e veprimit të Fehmi Aganit. "Me këtë cilësi që e kanë vetëm njerëzit e mëdhenj, fitonte përkrahjen e miqve tanë dhe respektin për të si burrë shteti dhe për Kosovën. Po ashtu me modestinë e tij në veprimin politik fitonte përkrahjen e qytetarëve dhe të njerëzve për veprim të përbashkët", tha zoti Rugova.

Presidenti Rugova theksoi se "ne edhe sot pas pesë vjetësh në liri, kemi dhembje për Profesor Aganin që nuk është më në mesin tonë që ra nga dora e armikut, por krenarinë e kemi më të madhe, sepse e kemi veprën dhe jetën e Tij të ndritur".

"Në këtë përvjetor mund të themi se për ne është një përkujtim krenar i madh për Profesorin tonë të madh, që përmban dhembjen për humbjen e Tij fizike dhe është krenari e madhe për veprën e Tij që është fitorja e Tij. Për këtë jetojnë njerëzit. Për këtë jetoi dhe veproi Profesori ynë i madh.

 

Profesor Agani me veprën e Tij është i pranishëm në jetën e të gjithë neve. Në familjen time është i pranishëm dhe në momente të mira e të vështira gjejmë mbështetje në jetën dhe veprën e Tij, si mik i shtëpisë. Këtë na e dhurojnë njerëzit e mëdhenj", theksoi në fjalën e tij Presidenti Rugova.

- Këto ditë isha për vizitë në SHBA, - tha Presidenti Rugova. - Mund t'ju them se, si gjithmonë ishte një pritje madhështore nga miqtë tanë amerikanë dhe komuniteti shqiptar. Ishte i fortë kujtimi i mirë për Profesor Aganin.

- Mund t'ju them se tash pesë vite të lirisë së vendit tonë, në SHBA po forcohet mendimi për njohjen formale të pavarësisë së Kosovës sa më shpejt. Pra, një Kosovë e pavarur, demokratike e integruar në BE, në NATO dhe në miqësi permanente me SHBA. Ky ishte testamenti i Profesor Aganit, testamenti ynë, që jam i bindur me përkrahjen e miqve tanë do ta arrijmë së shpejti, - theksoi Presidenti i Kosovës, duke shtuar se "ky është një lajm i mirë në këtë përvjetor të përkujtimit të Profesorit tonë të dashur, Profesor Aganit dhe lajm i mirë për të gjithë ne", tha Presidenti Rugova, duke e përmbyllur fjalimin e tij me fjalët:

"Zoti e bekoftë Profesor Aganin, Zoti e bekoftë Familjen Agani.

Zoti e bekoftë Kosovën tonë të shtrenjtë"!

Në fund të Akademsië përkujtimore u shfaq një program artistik-muzikor, ku aktori Çun Lajçi lexoi fragmente nga komentet e Fehmi Aganit. Alisa Baraku këndoi një ario të Xhuzepe Verdit, kurse Lule Elezi dhe Antonio Gashi ekzekutuan pika të zgjedhura mizikore.

 

 

Presidenti Rugova dekoroi prof.Fehmi Aganin me Urdhërin "Heroi i Kosovës"

 

Prishtinë, 6 maj 2004 - Presidenti i Kosovës Ibrahim Rugova me një dekret të veçantë ka dekoruar Akademik Prof. Dr. Fehmi Aganin me Urdhrin "Hero i Kosovës", për vepra trimërie për lirinë dhe pavarësinë e Kosovës.

Dorëzimi i Urdhërit "Hero i Kosovës" për Fehmi Aganin do të bëhet së shpejti në një ceremoni solemne, bëri të ditur sot në Akademinë përkujtmore në Prishtinë, Presidenti Rugova.

 

 

Presidenti Rugova përgëzon Presidentin e ri të Austrisë

 

Prishtinë, 6 maj 2004 - Presidenti i Kosovës, Dr. Ibrahim Rugova, ka përgëzuar z. Hajnc Fisher për zgjedhjen e tij President i Austrisë.

"Me rastin e zgjedhjes Tuaj President i Republikës Federale të Austrisë, Ju shpreh urimet e mia të përzemërta dhe të popullit të Kosovës.

Kemi bindjen se nën Presidencën Tuaj, vendi im, Kosova, do të gëzojë edhe më shumë përkrahjen e vendit Tuaj të çmuar për njohjen formale të pavarësisë dhe për thellimin e marrëdhënieve tona miqësore", thuhet në përgëzimet e Presidntit Rugova drejtuar Presidentit të sapozgjedhur të Austrisë.

 

 

Presidenti Rugova përgëzoi Cërvenkovskin

 

Prishtinë, 6 maj 2004 - Presidenti i Kosovës, Dr. Ibrahim Rugova, ka përgëzuar z. Branko Cërvenkovski për zgjedhjen e tij President i Maqedonisë.

"Me rastin e zgjedhjes Tuaj President i Maqedonisë në zgjedhjet presidenciale të javës së kaluar, Ju shpreh urimet e mia të sinqerta dhe të popullit të Kosovës.

Jemi të bindur se nën udhëheqjen Tuaj, marrëdhëniet e mira fqinjësore midis dy vendeve tona do të avancohen edhe më shumë", thuhet në urimet e Presidentit Rugova dërguar Presidentit të ri të Maqedonisë.

 

 

Holkeri do të qëndrojë në Uashington dhe në OKB

 

Prishtinë, 6 maj 2004 - Shefi i UNMIK-ut Hari Holkeri ka udhëtuar në Shtetet e Bashkuara të Amerikës, ku do të ketë një sërë takimesh me zyrtarë të lartë të Departamentit të Shtetit dhe të OKB-së.

Holkeri në Uashington do të takohet me nënsekretarin e Shtetit Mark Grosman si dhe do të flasë në Akademinë Ndërkombëtare të Paqes në Uest Point në lidhje me operacionet paqeruajtëse, ka bërë të ditur zëdhënësja e UNMIK_ut Matilde Heneke, duke shtuar se Holkeri më 11 maj do të raportojë edhe në Këshillin e Sigurimit të OKB-së për gjendjen në Kosovë në tre muajt e fundit.

 

 

Daci bisedoi me kryesuesit e komisioneve parlamentare për funksionalizimin e mekanizmave të Kuvenditi

 

Prishtinë, 6 maj 2004 - Kryetari i Kuvendit të Kosovës, Nexhat Daci, ka takuar dje kryesuesit e komisioneve parlamentare dhe ka biseduar me ta për funksionalizimin e mekanizmave të Kuvendit dhe për efikasitetin më të madh të komisioneve në shqyrtimin dhe amandamentimin, por edhe për hartimin e projektligjeve.

 

Z. Daci ka shprehur brengosjen e tij për mungesën në rritje të deputetëve në seancat plenare të Kuvendit të Kosovës dhe mosmbajtjen herë-herë të komisioneve parlamentare për mungesë kuorumi.

 

Ai u ka bërë apel kryesuesve të komisioneve që deri në fund të mandatit të jenë në krye të detyrës, sepse këtë e kanë obligim nga vota e qytetarëve dhe për faktin që Grupi i Kontaktit dhe mekanizmat tjerë ndërkombëtarë do të jenë të fokusuar në Kosovë dhe në këtë vështrim pohoi se Kuvendi duhet ta kryejë me përkushtim obligimin e tij për përmbushjen e standardeve.

Shumica e kryesuesve të komisioneve parlamentare janë të shprehur të kënaqur me vëllimin dhe cilësinë e punëve të komisioneve që i udhëheqin, ndërkaq disa syresh vunë në spikam dëmet që i shkakton bojkotimi i deputetëve të koalicionit "Kthimi" dhe i ndonjë deputeti tjetër, por gati të gjithë u ankuan për kushte jo të mira të punës për mungesë zyresh, makinash, telefonash e tj.

Në këtë takim u tha se Kuvendit të Kosovës duhet t'i jepet pesha që i takon jo vetëm në planin e miratitmit të ligjeve por edhe sa i përket kontrollit të Qeverisë.

Kryesuesit e komisioneve u pajtuan që një herë në muaj të raportohet në Kuvend për përmbushjen e standardeve nga ana e legjislativit të Kosovës, kurse sa i përket ndryshimeve kushtetuese u tha se propozimet janë të gatshme, por se para nxjerrjes së tyre për diskutim a miratim, duhet të bashkëpunohet me Zyrën Ligjore të Përfaqësuesit Special të Sekretarit të Përgjithshëm të OKB-së për Kosovë, zotit Holkeri.

 

 

M.Hamiti: Akti i miratimit të planeve për Kosovën që vijnë nga Beogradi është i papranueshëm

 

Prishtinë, 6 maj 2004 - "Organizimi i brendshëm politik e administrativ në vendin tonë është punë e institucioneve qendrore të Kosovës. Reformimi i mundshëm i këtij organizimi duhet të dalë si nevojë e brendshme, assesi si imponim prej askujt, për kalim kompetencash në nivele lokale në të mirë të funksionimit më të mirë të qeverisjës dhe në shërbim të qytetarëve pa dallim etnie", tha në një prononcim për media Muhamet Hamiti, zëdhënësi i Presidentit të Kosoëvs.

Ai konsideron se "vetë akti i shpalljes a miratimit të planeve për organizim tjetërfare në Kosovë që vijnë nga Beogradi është i papranueshëm".

"Ajo që quhet bartje kompetencash në nivele lokale, apo proces decentralizimi, mund të bëhet më së miri pas përmbylljes së procesit centralizues: njohjes së pavarësisë së Kosovës. Ky do të ishte edhe procesi më i natyrshëm B bartje kompetencash në vijë vertikale, assesi mbi baza etnike", tha Muhamet Hamiti.

 

 

Përfaqësuesit e Grupit të Kontaktit konstatojnë se plani i Serbisë për Kosovën mund të shkaktojë probleme

 

Prishtinë, 6 maj 2004 - Përfaqësuesit e vendeve të Grupit të Kontaktit në Prishtinë kanë konstatuar se plani i Serbisë për Kosovën është një projekt, i cili ende është në diskutim. Mirëpo, si i tillë, ashtu siç e kanë prezentuar autoritetet serbe, sipas tyre mund të konsiderohet si shkaktar i problemeve në të ardhmen.

 

 

Qeveria e Kosovës ka aprovuar projektligjin për tatimin në të ardhurat personale dhe atë për tatimin në fitim

 

Prishtinë, 6 maj 2004 - Qeveria e Kosovës ka aprovuar projektligjin për tatimin në të ardhurat personale dhe projektligjin për tatimin në fitim, të cilët do t'i dorëzohen Kuvendit të Kosovës për amandamentim.

Po në këtë seancë të Qeverisë së Kosovës u aprovua udhëzimi administrativ për pagesën e stafit politik të komunave që rregullojnë çështjen e të ardhurave personale të kryetarëve, zëvendëskryetarëve dhe anëtarëve të asambleve komunale. Këtë vendim të Qeverisë e konfirmoi pas mbledhjes drejtori i Zyrës për informim publik të kryeministrit Sylë Ukshini.

Ndërkaq, Parlamenti i Kosovës mendon se nëse projektligji për marrëveshje ndërkombëtare financiare nuk duhet ndërruar, atëherë kjo nuk do të ndodhë. Mirëpo, nëse Parlamenti konsideron se ekzistojnë nene që duhet të ndryshohohen, sigurisht se ato do të ndryshohen, pavarësisht nga ajo çfarë thotë Qeveria e Kosovës, u tha pas takimi që e organizoi kryeparlamentari Nexhat Daci me të gjithë shefat e grupeve parlamentare, anëtarët e Kryesisë së Kuvendit dhe me kryetarët komisioneve parlamentare.

 

 

Holkeri ka biseduar në Beograd me kryeministrin serb rreth planit të Serbisë për Kosovën

 

Beograd, 6 maj 2004 - Kryeadministratori i Kosovës, Hari Holkeri ka biseduar dje në Beograd me kryeministrin serb, Vojisllav Koshtunica rreth planit të fundit të Serbisë për Kosovën mbi decentralizimin dhe pjesëmarrjen e serbëve në institucionet e Kosovës. Për momentin nuk dihen hollësitë e bisedimeve, sepse pjesëmarrësit nuk kanë bërë komente publike dhe nuk kanë pasur ndonjë njoftim zyrtar.

Mirëpo, nga kabineti i Qeverisë serbe është lëshuar një kumtesë, ku thuhet se kryeadministratori i Kosovës ka vlerësuar se plani i Qeverisë serbe për zgjidhjen politike të situatës në Kosovë paraqet një bazë të mirë nisëse për vazhdimin e dialogut, i cili do të sjellte garanci institucionale për serbët e Kosovës.

 

Në kumtesë theksohet se Holkeri ka rikujtuar masat që po i ndërmerr UNMIK-u për zbulimin e frymëzuesve dhe të pjesëmarrësve të dhunës së marsit dhe ka cekur se një numër i madh i tyre është arrestuar.

Në komunikatë po ashtu thuhet se Koshtunica ka kushtëzuar vazhdimin e dialogut ndërmjet Prishtinës dhe Beogradit me fillimin e zbatimit të decentralizimit, duke shtuar se plani i Qeverisë së Serbisë paraqet kornizën për bisedime të mëtejshme.

Ndërkaq Çoviq ka thënë se nuk dëshiron të takohet me kryeadministratorin Holkeri, ngase ai, sipas tij duhet sa më shpejt të largohet nga ky post, sepse Holkeri është fajtori më i madh për 17 marsin.

 

 

Alush Gashi tha se Kosova në arenën ndërkombëtare duhet ta ketë trajtimin e një shteti në ndërtim

 

Prishtinë, 6 maj 2004 - "Kosova i ka planet e veta, ndërkaq plani i fundit i Beogradit për ne është plotësisht i papranueshëm", tha në një intervistë për radion "Evropa e lirë", Alush Gashi, deputet i Lidhjes Demokratike të Kosovës. Ai gjithashtu tha se bashkësia ndërkombëtare nuk duhet ta trajtojë Kosovën si një konflikt i cili nuk dihet si do të përfundohet dhe kërkon që Kosova të ketë garanca ndërkombëtare për pavarësinë e saj.

"Kosova në arenën ndërkombëtare duhet ta ketë trajtimin e një shteti në ndërtim, jo të një projekti i cili nuk dihet sesi do të përfundojë. Prandaj për një mbështetje edhe më të fuqishme të qytetarëve të Kosovës në afrim të vitit 2005, apo në plotësim të të ashtuquajturave standarde, nevojitet një garancë e plotë ndërkombëtare për pavarësi të Kosovës", tha Alush Gashi.

 

 

Të zhvendosurit e pakicës serbe në Gjilan gjatë trazirave të marsit kanë filluar të kthehen në shtëpitë e tyre

 

Gjilan, 6 maj 2004 - Pjesëtarët e pakicës serbe të ikur gjatë trazirave të marsit kanë filluar të kthehen në shtëpitë e tyre në Gjilan. Por edhe mëtej një numër i tyre janë të strehuar në fshatrat përreth. Kështu ka bërë të ditur Ignjacio Mateini, përgjegjës i UNHCR-it për rajonin e Gjilanit.

 

Sipas tij në Gjilan ka pasur 107 të zhvendosur serbë, në Shillovë 63 dhe 44 në fshatra tjera serbe të Gjilanit, nga të cilët 16 të zhvendosur janë kthyer në shtëpitë e tyre, ndërkaq të tjerët janë duke i vizituar ato në përkujdesjen e një organizate daneze dhe policisë.

 

Në Viti ndërkaq janë zhvendosur 34 persona, ndërkaq në Ferizaj edhe mëtej tetë persona të zhvendosur janë duke qëndruar në kampin grek të KFOR-it, të cilët shumë shpejt do të vendosen në qytet, ka thënë z. Mateini.

 

 

Sali Berisha refuzoi ftesën e Nanos për të marrë pjesë në delegacionin shqiptar në takimin e NATO-s

 

Tiranë, 6 maj 2004 - Kryetari i Partisë Demokratike të Shqipërisë, Sali Berisha refuzoi edhe publikisht ftesën e kryeministrit socialist Fatos Nano për të marrë pjesë në delegacionin shqiptar në takimin e qershorit të Aleancës atlantike në Stamboll.

 

Ky refuzim lë pak shansë që dy forcat kryesore politike në Shqipëri të gjejnë gjuhën e kompromisit dhe të ulën në tavolinën e bisedimeve përnt çështje emergjente në krye të të cilave qëndron përmirësimi i kodit elektoral për të garantuar zgjedhje të lira dhe të ndershme parlamentare në qershorin e vitit të ardhshëm.

 

 

Hetuesit në Bosnje thanë se gabimi i pilotit e shkaktoi rrëzimin e aeroplanit të presidentit Trajkovski

 

Shkup, 6 maj 2004 - Fajtor për aksidentin ajror të presidentit maqedonas Boris Trajkovski janë pilotët të cilët nuk kanë respektuar procedurat e aterimit, është bërë në raportin e publikuar nga Ministria e Transportit dhe Lidhjeve të Maqedonisë.

Në këtë raport theksohet se shkaku pse ka humbur jetën ish-presidenti i Maqedonisë ishin gabimet procedurale të ekuipazhit të aeroplanit gjatë aterimit në Aeroportin e Mostarit.

 

Kështu ka bërë të ditur kryetari i Komisionit hetimor për ndriçimin e kësaj fatkeqësie Stallko Begiq pas takimit të realizuar dje me ministrat e Transportit dhe Lidhjeve të Maqedonisë dhe atë të Bosnjes e Hercegovinës Agron Buxhaku dhe Branko Dikiq.

 

Ky i fundit ka thënë se avioni ka qenë në në lartësi më të ulët në kohën kur ka tentuar që të zbresë në aeroportin e Mostarit. Sipas tij, nuk mund të bëhet fjalë për faje teknike, por për gabime procedurale të pilotëve deri sapo i afroheshin aeroportit të Mostarit, duke shkatuar kështu rrëzimin e aeroplanit.

 

 

Parlamenti maqedonas ia mori mandatin e deputetit Lube Boshkovskit

 

Shkup, 6 maj 2004 - Parlamenti i Maqedonisë ka miratuar vendimin e Komisionit parlamentar për çështjen e mandatit dhe imunitetit të deputetëve në lidhje me ndjekjen penale dhe paraburgosjen e deputetit të opozitës kundër ish-ministrit të brendshëm Lube Boshkovski.

 

Ai dyshohet të ketë dhënë urdhër për vrasjen e gjashtë shtetasëve pakistanez dhe një shtetasi indian në vitin 2002, kur ai ishte ministër i brendshëm. Opozita maqedonase nuk u pajtohet me procedurat e shpallura nga Gjykata Kushtetuese dhe Ministria e Rrendshme në lidhje me urdhërarrestin për Boshkovskin.

 

VMRO-DPMNE të cilës i takon ky deputet thekson se vetëm Parlamenti maqedonas mund të miratojë vendimin për ndjekjen penale, ose arrestimin e një deputeti dhe se në këtë rast gjykata hetuese nuk e ka përfillur parlamentin.

 

 

Në luftimet në disa qytete irakiene janë vrarë të pakten 15 irakianë dhe një ushtar amerikan

 

Naxhaf, 6 maj 2004 – Forcat e koalicionit amerikan kanë ndërmarrë një operacion, ndër më të fuqishmit deri me tash, kundër milicisë së klerikut radikal dhe në përleshjet e ashpra, që janë zhvilluar në varrezat më të mëdha në botë, janë vrarë të pakten 15 irakianë dhe një ushtar amerikan, njofton AP. Luftimet janë zhvilluar në Naxhaf dhe në disa qytete të tjera irakiene dhe janë sulmuar vendstrehimet e militantëve islamikë.

 

 

Izraeli ka liruar nga burgu bashkëthemeluesin e grupit militnt palestinez Hamas

 

Jerusalem, 6 maj 2004 – Izraeli ka liruar bashkëthemeluesin e grupit militant palestinez Hamas, Muhamed Taha, pas 14 muaj qendrimi në burg pa gjykim, njofton BBCnews. Z. Taha, tash 68 vjeçar, është dërguar në kampin e refugjatëve në Gaza, ku është pritur me ovacione nga ithtarët e tij. Izraeli ka vrarë dy figura të shquara të Hamasit dhe nuk e ka komentuar lirimin e z. Taha.

 

 

Një bombëhedhës vetëvrasës ka vrarë 5 irakianë dhe një ushtar amerikan në Bagdad

 

Bagdad, 6 maj 2004 - Një bombëhedhës vetëvrasës ka vrarë sot heret në mëngjes (e enjte) pesë irakianë dhe një ushtar amerikan në njërën nga hyrjet në selinë e Komandës amerikane në Bagdad, vetëm disa orë nga përpjekjet e presidentit Bush për të riparuar dëmet nga skandali i abuzimit të të burgosurve irakianë, njofton Rojter.

 

Makina-bombë, që hodhi njërën këmbë të viktimës 200 jardë larg, ka plagosur gjithashtu edhe 26 civilë irakianë dhe të pakten tre ushtarë amerikanë në hyrjen e postbllokut të ashtuquajtur Zona e Gjelbër, ka thënë zëdhënësi ushtarak amerikan.

 

 

Dy shpërthime kanë shkatërruar selinë e Unionit Patriotik të Kurdistanit në Bakuba

 

Bakuba, Irak, 6 maj 2004 - Shpërthimet e dy bombave kanë shkatërruar sot (e enjte) ndërtesën e selisë së Unionit Patriotik të Kurdistanit në qytetin irakian Bakuba, 40 mila në veri të Bagdadit, kanë bërë të ditur dëshmitarët, njofton Rojter. Burimet spitalore kanë thënë se shpërthimet kanë plagosur edhe të pakten katër vetë. UPK-në e udhëheq Xhelal Talabani, anëtar i Këshillit qeveritar të Irakut, të cilin e kanë formuar amerikanët.

 

 

Bush thotë se personat përgjegjës do të nxirren para drejtësisë

 

Uashington, 6 maj 2004 - Presidenti amerikan Xhorxh Bush dënoi fuqishëm veprimet që shikohen në fotografi të mara në burgun Abu Graib, në të cilat ushtarë amerikanë në Irak keqtrajtojnë disa të burgosur irakianë.

Presidenti i tha rrjetit arab televiziv Al-Arabija se këto veprime janë të urryera dhe se amerikanët janë tronditur nga këto incidente aq sa edhe vetë irakianët. Administrata e presidentit Bush edhe dje e përqëndroi vemendjen në përpjekjet për të riparuar dëmin e shkaktuar nga keqtrajtimet, për të cilat ushtria thotë se mund të mos jenë incidente të izoluara.

"Kjo është diçka që e pasqyron vendin tonë në mënyrë negative", tha presidenti Bush duke folur në rrjetin televiziv Al-Arabija me seli në Dubai. Ai shprehu keqardhje, megjithëse nuk kërkoi falje, për fotografitë e të burgosurve irakianë lakuriq, të cilët detyroheshin të bënin poza poshtëruese, ndërkohë që ushtarët amerikanë shikonin.

 

 

Bush takohet sot në Shtëpinë e Bardhë me mbretin e Jordanisë Abdullah

 

Uashington, 6 maj 2004 - Presidenti amerikan Xhorxh Bush takohet sot në Shtëpinë e Bardhë me mbretin e Jordanisë Abdullah për të diskutuar rreth procesit të paqes në Lindjen e Mesme.

Mbreti Abdullah shtyu bisedimet me presidentin Bush pasi ky i fundit mbështeti planin e kryeministrit izraelit, Ariel Sharon, për të tërhequr kolonët hebrenj nga Gaza dhe 4 vendebanime të largëta të Bregut Perëndimor.

 

 

Këshilltari i Pauellit sulmon kundërshtarët

 

Uashington, 6 maj 2004 - Një nga ndihmësit më të ngushtë të sekretarit amerikan të shtetit, Kolin Pauell ka sulmuar ashpër kundërshtarët e zotit Pauell brenda administratës së Bushit.

Shefi i shtabit i zotit Pauell, Lari Uilkerson, akuzoi ata që ai tha po ndërmerrnin vendime kavaliere duke dërguar djemtë dhe vajzat për të vdekur.

Kjo ishte një paraqitje e pazakontë, veçanërisht nga brenda një adminsitrate që para publikut mundohet të tregojë se ka unitet.

 

 

Udhëheqësi rebel i Axharisë, Abashixe ka dhënë dorëheqje

 

Batum, 6 maj 2004 - Udhëheqësi rebel i Axharisë, Asllan Abashixe ka dhënë dorëheqjen pasi Rusia ndërhyri për të qetësuar përshkallëzimin e krizës.

Protestuesit në rrugët e Batumit kanë kërkuar dorëheqje të udhëheqësit të rajonit dhe tani ata morën çfarë deshën. Asllan Abashixe ka arritur tashmë në Moskë. Ai dha dorëheqjen pasi mijëra demonstrues dolën nëpër rugë.

'Axharia është e lirë', ishin fjalët e para të presidentit Saakashvili. Vetëm disa muaj më parë, Mikhail Saakashvili drejtoi një revolucion paqësor që largoi nga pushteti ish presidentin, Shevarnaxe në nëntor.

Por në Axhari, roja e vjetër ishte ende në pushtet. Asllan Abashidze dhe politika e tij separatiste ishin sfida e parë për presidencën e Saakashvilit.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |