Përmbajtja:

• Nesër në Prishtinë mbahet një akademi përkujtimore për Fehmi Aganin, në 5-vjetorin e vrasjes

• Holkeri sot në Beograd takohet me kryeministrin e Serbisë

• Në raportin e Kofi Ananit vlerësohet se dhuna e marsit paraqet një hap prapa në Kosovë

• Gjenerali Majers thotë se Shtetet e Bashkuara mbesin të përkushtuara në Kosovë

• Kryeministri Rexhepi thotë se amdinistrata publike në Kosovë duhet të jetë më efikase dhe apolitike

• UNMIK-u thotë se po analizon planin e Serbisë për zgjidhjen e situatës aktuale në Kosovë

• Komuna e Prishtinës ka ndarë 79 bursa për studentë

• Punëtorët e Ngrohtores dhe të Tertores së KEK-ut protestuan edhe dje

• UNESKO për rindërtimin e monumenteve fetare e kulturore serbe në Kosovë

• Banka Botërore do të vazhdojë ta ndihmojë Kosovën

• Bashkëpunimi midis Serbisë dhe gjykatës së Hagës thuajse nuk ekziston

• Autoritetet maqedonase lëshuan fletarrest për ish-ministrin e brendshëm Lube Boshkovski

• Ministri i jashtëm shqiptar Kastriot Islami sot do të vizitojë Shkupin

• Në Ulqin është shpallur aksioni humanitar për vendosjen falas të 200 fëmijëve bonjakë nga Kosova

• Branko Cërvenkovski pas zgjedhjes së tij për president shteti ka braktisur postin e kryeministrit

• Parlamenti maqedonas sot po debaton për heqjen e imunitetit të Lube Boshkovskit

• Nano e Karamanlis biseduan në Athinë për legalizimin e imigrantëve dhe çështjen çame

• Grafite naciste antishqiptare dhe antisemite në Novi Sad

• Forcat izraelite kanë vrarë një palestinez në një sulm në Gaza

• Në Afganistan janë vrarë të pakten 2 perendimorë dhe përkthyesi i tyre

• Në Qerbela janë vrarë 3 luftëtarë të al-Sadërit

• Tri shpërthime tronditën sot në mëngjes Athinën

• Guerilasi më i lartë në Kolumbi është dënuar me 35 vjet burg

• Pentagoni heq dorë nga planet për të pakësuar forcën e tij në Irak

• Miller: do të shqyrtohen teknikat e marrjes së të ndaluarve në pyetje

• Katër fuqitë e mëdha afirmojnë angazhimin për planin e paqes

• Ramsfeld: "Do të marr masa ndaj amerikanëve të ndërlikuar në keqtrajtimin e të burgosurve irakianë"

• Dhjetra të plagosur në Batumi të Axharisë

• Në luftimet e sotme në Irak janë vrarë 12 kryengritës

• Bush premton të ndëshkojë abuzuesit në Irak

• Qeveria e Berluskonit më jetëgjatë në histori

Nesër në Prishtinë mbahet një akademi përkujtimore për Fehmi Aganin, në 5-vjetorin e vrasjes

 

Prishtinë, 5 maj 2004 - Në 5-vjetorin e vrasjes së Fehmi Aganit, një nga figurat më të shquara politike për çështjen e Kosovës, nesër, më 6 maj, në orën 12.00, në Teatrin Kombëtar në Prishtinë, nën patronazhin e Presidentit të Kosovës, Ibrahim Rugova, organizohet një akademi përkujtimore.

Për figurën e Fehmi Aganit do të flasë Presidenti i Kosovës Ibrahim Rugova. Poashtu me këtë rast do të shfaqet edhe një program i zgjedhur artistik.

Fehmi Agani, i cili ka qenë një nga themeluesit e LDK-së dhe për shumë vjet numri dy i kësaj partie, u ekzekutua nga forcat kriminale serbe më 6 maj të vitit 1999, ndërkaq edhe sot e kësaj dite nuk janë zbuluar autorët e vrasjes.

 

 

 

 

Holkeri sot në Beograd takohet me kryeministrin e Serbisë

 

Beograd, 5 maj 2004 - Kryeadministrarori i Kosovës Hari Holkeri sot në Beograd takohet me kryeministrin e Serbisë Vojisllav Koshtunica, njoftojnë mediat serbe.

Gjatë këtij takimi pritet që në qendër të vemendjes të jetë hapja e paradokohshme e Zyrës për marrëdhënie me jashtë në Prishtinë, si dhe plani i qeverisë së Serbisë për zgjidhjen politike të situatës në Kosovë, i cili javën e kaluar është miratuar nga Kuvendi i Serbisë.

 

 

Në raportin e Kofi Ananit vlerësohet se dhuna e marsit paraqet një hap prapa në Kosovë

 

Nju Jork, 5 maj 2004 - Mbrëmë vonë në selinë e Kombet e Bashkuara është publikuar raporti i rregullt i sekretarit të përgjithshëm, Kofi Annan, për punën e UNMIK-ut në Kosovë.

 

Në këtë raport vlerësohet se dhuna e marsit paraqet një hap prapa në stabilizimin dhe në normalizimin e gjendjes në Kosovë. Në raport, pos tjerash, theksohet se gjatë trazirave të marsit në Kosovë janë vrarë 19 persona, prej të cilëve 11 shqiptarë dhe 8 serbë, ndërsa ishin plagosur 954 persona.

 

Ndër të plagosurit, thuhet mëtutje në raport, ishin edhe 65 policë ndërkombëtarë, 58 pjesëtarë të trupave mbrojtëse të Kosovës, dhe 61 ushtarë të Kforit. Në raport shkruan se valës së dhunës i paraprinë dy ngjarje që kishin ndodhur disa ditë më parë.

 

Në incidentin e parë ishte plagosur një i ri serb në Çagllavicë ndërsa një ditë më vonë "së paku dy fëmijë shqiptarë" ishin mbytur në një lumë. "Rrethanat në të cilat ndodhi kjo fatkeqësi ende nuk janë zbuluar" - shkruan pos tjerash në raportin e sekretarit të përgjithshëm të Kombeve të Bashkuara, Kofi Anan për situatën në Kosovë.

 

Është paralajmëruar se ky raport do të jetë bazë për debat në Këshillin e Sigurimit që pritet të mbahet më 11 të këtij muaji.

 

 

Kryeministri Rexhepi thotë se amdinistrata publike në Kosovë duhet të jetë më efikase dhe apolitike

 

Prishtinë, 5 maj 2004 - Kryeministri Bajram Rexhepi ka thënë se amdinistrata publike në Kosovë duhet të jetë e qëndrueshme, efikase, apolitike dhe në shërbim të qytetarëve. Ai i bëri këto komente në seminarin e organizuar nga zyra e tij me temën: "Vendimarrësit në administratën publike".

 

Me këtë rast ai ka theksuar nevojën e angazhimit më të madh të pushtetit lokal për të ndërtuar një administratë të qëndrueshme në Kosovë. Në këtë seminar dyditësh morën pjesë përfaqësues të komunave, zyrtarë të administratës ndërkombëtare, të institucioneve qendrore dhe ekspertë të administratës nga OKB-ja.

 

 

UNMIK-u thotë se po analizon planin e Serbisë për zgjidhjen e situatës aktuale në Kosovë

 

Prishtinë, 5 maj 2004 - UNMIK-u mbrëmë përmes një komunikate ka njoftuar se plani i Serbisë për zgjidhjen e situatës aktuale në Kosovë, i miratuar nga Kuvendi i Serbisë është duke u analizuar së bashku me partnerët ndëkombëtarë, përfshirë edhe Grupin e Kontaktit.

 

Në komunikatë UNMIK-u thotë se pajtohet plotësisht me ftesën e Këshillit të Sigurimit për më shumë qeverisje efektive lokale përmes bartjes së kompetencave të parezervuara në autoritetet lokale dhe komunitetet e Kosovës.

Gjithashtu UNMIK-u konsideron se forcimi i vetëqeverisjes lokale është kyç për qëndrueshmëri ekonomike, siguri dhe qeverisje transparente lokale për të gjithë qytetarët e Kosovës.

 

Vendosja e rajoneve autonome në territorin e Kosovës me institucione që nuk janë kompatibile me strukturën qeverisëse në Kosovë, nuk do të jetë në linjë me vizionin tonë të përbashkët për një shoqëri multietnike dhe reforma e qeverisjes lokale do të jetë çështje e diskutimeve të mëtutjeshme të palëve të interesuara të Kosovës, thuhet në komunikatën e lëshuar nga UNMIK u.

 

 

Gjenerali Majers thotë se Shtetet e Bashkuara mbesin të përkushtuara në Kosovë

 

Ferizaj, 5 maj 2004 - Shefi i Shtabit të Ushtrisë amerikane, gjenerali Riçard Majers, i cili qëndroi dje në Kosovë, ku ka vizituar kampin amerikan "Bondstill", që është baza më e madhe ushtarake amerikane në Ballkan. Majers me këtë rast ka dekoruar edhe disa ushtarë.

Gjenerali Majers në një konferencë me gazetarë ka thënë se vazhdimësia ndaj demokracisë për miqtë në Kosovë dhe siguria e Ballkanit mbeten pëparësi ushtarake e Shteteve të Bashkuara të Amerikës. Ai ka shtuar se SHBA-të janë të përkushtuara për suksesin e NATO-s në Ballkan. Ai tha se situata në Irak nuk do të ndikojë në misionin trupave amerikane në Kosovë, pavarësisht nga angazhimet e SHBA-ve në vatra të tjera të krizës.

Gjenerali Majers ka thënë trazirat e marsit ishin befasuese edhe për forcat amerikane dhe një sfidë e madhe për të gjithë në Kosovë. Ai ftoi të gjitha palët të ndajnë përgjegjësitë për sfida të tilla. Gjenerali Majers tha se Serbia më nuk paraqet kërcënim për Kosovën, ndërkaq vendet e Ballkanit tashmë janë orientuar për t'u integruar në Bashkimin Evropian dhe në NATO, tha Majers.

 

 

Komuna e Prishtinës ka ndarë 79 bursa për studentë

 

Prishtinë, 5 maj 2004 - Një komision i Kuvendit Komunal të Prishtinës në bazë të të aplikacioneve që kanë arritur në konkursin e shpallur ka marrë vendim për ndarjen e bursave studentëve të UP-së per vitin akademik 2004 në profile të ndryshme.

Komisioni aktualisht ka ndarë 79 bursa si vijon: për studentët e Fakultetit të Edukimit 9 bursa, Fakultetin e SHMN 5, Fakultetin Filozofik 20, Fakultetin Filologjik 9, Fakultetin e Mjekësisë 10, Fakultetin e Arteve 3, Fakultetin Juridik 4, Fakultetin Ekonomik 6, Fakultetin Teknik 12 dhe për studentë të Fakultetit të Bujqësisë 1 bursë.
Lartësia e bursave është 50 euro në muaj. Këto mjete janë siguruar nga buxheti i KK të Prishtinës me qëllim që t`u ndihmohet sadopak studentëve me kushte të veshtira ekonomike dhe atyre me sukses te lakmueshem.

Ndërkohë edhe disa bursa të tjera do të ndahen për studentë gjatë ditëve të ardhshme.

 

 

Punëtorët e Ngrohtores dhe të Tertores së KEK-ut protestuan edhe dje

 

Prishtinë, 5 maj 2004 - Punëtorët e Ngrohtores dhe të Tertores, njësi punuese që deri para disa muajve kanë vepruar në kuadër të KEK-ut, protestuan për të pesëmbëdhjetën ditë me radhë, duke shprehur pakënaqësitë me kushtet e vështira.

 

Atyre policia ua kishte ndaluar të depërtonin në drejtim të Prishtinës për të biseduar me kompetentët, ndërkaq që policia nuk lejonte as ekipet e gazetarëve të shkonin në drejtim të protestuesve.

Zyrtarët e policisë deklaruan se nuk po i lejojnë punëtorët për të marshuar drejt Prishtinës, sepse dëshirojnë të sigurojnë një ambient të qetë.

"Punëtorët prej disa ditësh kanë kërkuar që të negociojnë me menaxherët e KEK-ut dhe kjo është refuzuar. Për këtë arsye për të siguruar një ambient të qetë ne nuk i kemi lejuar punëtorët që të marshojnë drejt Prishtinës", ka deklaruar Malkolm Eshbi, zëdhënës për informim i Policisë së UNMIK-ut, për rajonin e Prishtinës. Protesta kaloi pa incidente, ndërsa punëtorët u shpërndanë të qetë.

 

 

UNESKO për rindërtimin e monumenteve fetare e kulturore serbe në Kosovë

 

Paris, 5 maj 2004 - Agjencia kryesore e OKB-së për kulturën, UNESKO bën të ditur se do të kërkojë ndihmë ndërkombëtare për rindërtimin e monumenteve fetare e kulturore serbe që u shkatërruan gjatë dhunës etnike të kohëve të fundit në Kosovë.

Drejtori i UNESKO-s, Koiçiro Macura, tha të martën se do të punojë për rindërtimin e 29 manastireve dhe kishave serbe që u dogjën gjatë dhunës së muajit të kaluar nga e cila gjetën vdekjen të paktën 19 vetë.
Ai i bëri këto komente në Beograd, ndërsa ekspertë të UNESKO-s vizituan Kosovën për të vlerësuar dëmet dhe bënë rekomandime për mbrojtjen e objekteve sërbe në të ardhmen.

Gjatë dhunës tri-ditëshe në muajin mars në Kosovë mbi 600 vetë u plagosën dhe rreth 4 mijë të tjerë mbetën pa strehë. Kjo është cilësuar si dhuna më e rëndë në Kosovën e administruar nga Kombet e Bashkuara që prej vitit 1999.

 

 

Banka Botërore do të vazhdojë ta ndihmojë Kosovën

 

Uashington, 5 maj 2004 - Që nga koha e përfundimit të luftimeve, në vitin 1999, Banka Botërore ka patur një sërë projektesh në Kosovë, me synim rindërtimin e vendit të shkatërruar nga lufta, si dhe mbështetjen e institucioneve demokratike në vend. Kohët e fundit Banka Botërore miratoi shumën e 15 milionë dollarëve si ndihmë financiare falas për Kosovën. I ngarkuari i Bankës Botërore për Kosovën, Robert Xhonsi (Jauncey), tha se edhe në të ardhmen, Banka Botërore do të vazhdojë ta ndihmojë Kosovën.

Sipas tij, strategjia për Mbështetjen e Tranzicionit për Kosovën gjatë 18 muajve të ardhshëm, element kryesor ka një angazhim të Bankës për t'i dhënë 15 milionë dollarë mbështetje financiare falas për Kosovën, në kuadër të ndihmës prej 80 milionë dollarësh që i janë dhënë Kosovës që nga vitit 1999, pas përfundimit të luftimeve.

"Mendoj se në të ardhmen, do të jemi të aftë të fillojmë një program për dhënien e kredive, duke krijuar kështu mundësinë që ndihma e Bankës për Kosovën të shtohet", tha Xhonsi, duke shtuar se bashkësia ndërkombëtare ka dhënë gjithsej 2 miliardë dollarë që nga viti 1999, për Kosovën. Ai tha se në këtë drejtim ka pasur sukses për shkak të programeve të rindërtimit, si edhe në saje të përkushtimit të vetë palës kosovare: janë ndërtuar më tepër se 50 mijë shtëpi, mijëra kilometra rrugë, janë bërë përmirësime në shërbimin shëndetësor.

Xhonsi theksoi se Banka punën e saj e përqëndron në fuqizimin e polikave ekonomike dhe në punën me insitucionet e Kosovës, për të ndërtuar këtë kapacitet drejtues në fushën ekonomike, në mënyrë që Kosova të përparojë drejt përmbushjes së standarteve, si dhe drejt pakësimit të varfërisë në vend, tha përfaqësuesi i Bankës Botërore.

"Dua të shtoj se Banka Botërore ka mbi 4 vjet që po punon në Kosovë. Ne jemi shumë të kënaqur me përkushtimin që kanë treguar institucionet e Kosovës; mund të them se ne kemi patur një program shumë të suksesshëm: në kushte të vështira, 19 nga 20 projektet që kemi mbështetur kanë qenë të suksesshëm; ne jemi tepër të kënaqur me nivelin e përkushtimit, si dhe që programi i rindërtimit ka qenë shumë i sukseshëm në Kosovë; dhe ne do të vazhdojmë ta ndihmojmë Kosovën", theksoi përfaqësuesi i Bankës Botërore, Robert Xhonsi në një intervistë dhënë "Zërit të Amerikës".

 

 

Bashkëpunimi midis Serbisë dhe gjykatës së Hagës thuajse nuk ekziston

 

Hagë, 5 maj 2004 - Kryegjyqtari i Gjykatës së Hagës thotë se bashkëpunimi midis Serbisë e Malit të Zi dhe kësaj gjykate thuajse nuk ekziston.

Gjyqtari Theodor Meron shprehu e pikëpamjen e tij në një letër drejtuar Këshillit të Sigurimit të Kombeve të Bashkuara.

Letra e gjyqtarit Meron mbështet një raport të kryeprokurores së Gjykatës së Hagës, Carla del Ponte, ku theksohet se autoritetet e Serbisë dhe Malit të Zi në mënyrë të përsëritur nuk i kanë arrestuar të kërkuarit dhe nuk kanë ndihmuar përpjekjet e gjykatës për të intervistuar dëshmitarë dhe kontrolluar dokumenta.

Gjyqtari tha se mungesa e bashkëpunimit nga ana e autoriteteve të Serbisë dhe Malit të Zi kërcënon realizimin e objektivit të gjykatës për të përfunduar punën e saj nga fundi i këtij dhjetëvjeçari.

 

 

Autoritetet maqedonase lëshuan fletarrest për ish-ministrin e brendshëm Lube Boshkovski

 

Shkup, 5 maj 2004 - Policia maqedonase ka lëshuar urdhërarrestin për ish-ministrin e brendshëm Lube Boshkovski, nën akuzën se ka planifikuar vrasjen e gjashtë pakistanezëve dhe të një indiani në territorin e Maqedonisë në mars të vitit 2002. Boshkovski i kishte shpallur këta emigrantë të paligjshëm si terroristë, që kinse kishin për qëllim të sulmojnë ambasadat perëndimore në Shkup.

 

Avokatët e Boshkovskit thanë se ai është kapur dje nga policia, por Ministria e Brendshme maqedonase e mohon këtë njoftim, duke theksuar se megjithatë po bën përpjekje për arrestimin e tij. Ndërkaq, Parlamenti i Maqedonisë ka caktuar për sot një seancë urgjente ku do të debatohet në lidhje me imunitetin e deputetit Lube Boshkovski.

Vrasja e këtyre emigrantëve ka ndodhur me shpjegimin se ata ishin terrorist. Ndërkaq, policia maqedonase ka pranuar se vrasja e tyre kishte për synim fitimin e mbështetjes amerikane.¨

Pakistani ka përshëndetur autoritetet e Maqedonisë për angazhimin e tyre lidhur me ndriçimin e vrasjes së shtetasve të tij, ndërkohë që familjarët e viktimave kërkojnë nga Maqedonia 12 milionë dollarë dëmshpërblim.

 

 

Ministri i jashtëm shqiptar Kastriot Islami sot do të vizitojë Shkupin

 

Shkup, 5 maj 2004 - Ministri i Jashtëm i Shqipërisë, Kastriot Islami sot do të vizitojë Shkupin, ku do të zhvillojë takime me homologen e tij maqedonase Ilinka Mitreva, kryeministrin Branko Cërvenkovski, kryetarin e Kuvendit Lubço Jordanovski si dhe me kryetarin e Komsionit për Politikë të Jashtme të Kuvendit të Maqedonisë, Teuta Arifi.

 

 

Në Ulqin është shpallur aksioni humanitar për vendosjen falas të 200 fëmijëve bonjakë nga Kosova

 

Ulqin, 5 maj 2004 - Koordinatori i Shoqatës së Biznismenëve të Ulqinit Skënder Karamanaga tha se ky asociacion ka shpallur aksionin humanitar për vendosjen falas të 200 fëmijëve bonjakë nga Kosova dhe po aq nga Srebrenica. Vëtëm në orët e paraditës së djeshme në selinë e kësaj shoqate, thotë ai, janë lajmëruar 30 pronarë të shtëpive për të vendosur gratis bonjakët nga Kosova dhe Srebrenica.

 

 

Branko Cërvenkovski pas zgjedhjes së tij për president shteti ka braktisur postin e kryeministrit

 

Shkup, 5 maj 2004 - Kryeministri maqedonas Branko Cërvenkovski pas zgjedhjes së tij për president shteti në mbledhjen e djeshme të qeverisë ka braktisur dje postin e kryeministrit. Ai me këtë rast ka falënderuar anëtarët e kabinetit të tij për bashkëpunimin e deritashëm.

Pas largimit të Cërvenkovskit nga ky post, pritet të formohet kabineti i ri qeveritar, i cili do të drejtohet sërish nga radhët e LSDM-së, por do të ketë ndryshime në funksionet ministrore. Njfotohet se BDI pritet të udhëheqë edhe një ministri shtesë: Ministrinë e Punëve të Brendshme ose atë të Mbrojtjes.

 

 

Parlamenti maqedonas sot po debaton për heqjen e imunitetit të Lube Boshkovskit

 

Shkup, 5 maj - Parlamenti maqedonas sot po debaton për marrjen eventuale të mandatit të deputetit Lube Boshkovskit. Ish-ministri i Brendshëm maqedonas është i dyshuar si një nga iniciatorët kryesorë për ekzekutimin e shtatë emigrantëve ekonomikë në rastin e njohur të "Vreshatve të Rashtakut".

 

Boshkovski nuk është prezent në mbledhje e parlamentit. Nëse parlamenti ia merr imunitetin menjeherë hyn në fuqi urdhërarresti i gjykatës për arrestimin e Boshkovskit. Por ai edhe ashtu po u ik organeve të ndjekjes ndonëse avokatët e tij pohojnë se ai dje është ndaluar nga policia dhe është dërguar në një vend të panjohur.

 

 

Nano e Karamanlis biseduan në Athinë për legalizimin e imigrantëve dhe çështjen çame

 

Athinë, 5 maj 2004 - Në takimin e sotëm ndërmjet kryeministrit të Greqisë, Kostas Karamanlis dhe atij të Shqipërisë, Fatos Nano u diskutuan çështja e legalizimit të imigrantëve, çështja çame dhe bashkëpunimi në kuadër të luftës kundër terrorizmit.

 

Krymeinistri karamanlis vlerësoi se imigrantët si një faktor të rëndësishëm në zhvillimin ekonomik të Greqisë dhe tzë Shqipërisë dhe u shpreh për legalizimin sa më të shpejtë të dokumenteve. Zoti Nano pas takimit përmendi ekzistimin e marrëdhënieve të mira të partneritetit me Greqinë.

 

 

Grafite naciste antishqiptare dhe antisemite në Novi Sad

 

Novi Sad, 5 maj 2004 - Në disa mure të ndërtesave të Novi Sad janë shkruar grafite shoveniste dhe antisemite.

Sipas mediave serbe në to shkruan: "Shqiptarë (shiptari) shporruni jashtë", "Serbia serbëve, jashtë me hungarezët", është vizatuar dhe është shkarravitur ylli i Davidit dhe janë shkruar sharje në llogari të shtetit izraelit. Gjithashtu bëhet e ditur se disa të rinj të dehur kanë hyrë me dhunë në kishën adventiste dhe kanë sulmuar priftërinjtë.

Poashtu ditë më parë në qytetin e Nishit ishte shkruar një parullë naciste.

 

 

Forcat izraelite kanë vrarë një palestinez në një sulm në Gaza

 

Gaza, 5 maj 2004 - Forcat izraelite kanë vrarë sot (e merkurë) një palestinez në një sulm në Gaza, njofton Rojter. Sulmi ka ndodhur në një kohë kur bashkësia ndërkombëtare po bën trysni për planin për evakuimin nga territoret palestineze. Këtë plan e ka mbështetur kryeministri izraelit, Ariel Sharon, por e ka kundërshtuar partia e tij Likud dhe kolonët izraelitë në Gaza.

 

Dëshmitarët kanë thënë se trupat izraelite, që kanë hyrë në Deir al-Balah kanë vrarë një kapiten të policisë palestineze dhe kanë plagosur edhe 15 të tjerë në përleshjet me kryengritësit gurëhedhës. Armata izrelite ka rrënuar edhe 10 shtëpi në kampin Khan Junis.

 

 

Në Afganistan janë vrarë të pakten 2 perendimorë dhe përkthyesi i tyre

 

Kabul, 5 maj 2004 - Të paktën dy perëndimorë dhe përkthyesi i tyre afganë janë vrarë në një sulm të militantëve të dyshimtë në provincën Nuristan të Afganistanit lindor, ka bërë të ditur sot (e mërkurë) një zyrtar afgan, njofton Rojter.

 

Trupat e tyre të pajetë i kanë zbuluar autoritetet vendore, ka thënë zyrtari i Ministrisë së Brendshme. Për këto vrasje, ai ka fajësuar militantët e regjimit të përmbysur të talibanëve.

 

 

Në Qerbela janë vrarë 3 luftëtarë të al-Sadërit

 

Qerbela, 5 maj 2004 - Forcat e koalicionit amerikan kanë zhvilluar luftime kundër milicisë lojale shite të Moktada alCSadër në qytetin e shenjtë, Qerbela, ku kanë vrarë tre luftëtarë, kurse nëntë të tjerë janë plagosur, kanë bërë të ditur dëshmitarët dhe zyrtarët spitalorë, njofton Rojter.

 

Luftimet janë bërë disa orë pasi liderët politikë shitë i kanë bërë thirrje Sadërit që të çarmatoset. Ushtria amerikane ende nuk ka dhënë komente për këto incidente.

 

 

Tri shpërthime tronditën sot në mëngjes Athinën

 

Athinë, 5 maj 2004 - Autoritetet greke thonë se tri bomba shpërthyen sott në mëngjes pranë një stacioni policie në Athinë.

Nuk ka pasur njoftime për viktima nga shpërthimet që ndodhën pak para aktiviteve me rastin e fillimit të periudhës 100 ditë para Lojrave Olimpike Verore që do zhvillohen në kryeqytetin grek.

Policia thotë se një person anonim i telefonoi një gazete për të paralajmëruar për shpërthimet, por nuk dha ndonjë mitiv ose se kush mund të marrë përgjegjësinë për shpërthimet në distriktin Klithea të Athinës, i cili është rrethuar nga forcat policore.

Dy nga bombat shpërthyen brenda pak minutash, kurse e treta rreth një gjysmë ore më pas. Të paktën një ndërtesë është dëmtuar nga shpërthimet.

 

 

Guerilasi më i lartë në Kolumbi është dënuar me 35 vjet burg

 

Bogota, 5 maj 2004 - Guerilasi më i lartë, që është zënë deri tash në Kolumbi, është dënuar me 35 vjet burg, njofton BBCWorld. Rikardo Palmera, 35-vjeçar, i njohur më shumë me pseudonimin Simon Trinidad, ishte figurë publike në bisedimet e dështuara paqësore me qeverinë. Ai është akuzuar për kidnapime dhe kryengritje dhe ngarkohet me krimet për vrasje dhe terrorizëm.

 

 

Pentagoni heq dorë nga planet për të pakësuar forcën e tij në Irak

 

Uashington, 5 maj 2004 - Departamenti amerikan i Mbrojtjes thotë se ka hequr dorë nga planet për të pakësuar forcën e tij ushtarake në Irak dhe se do të ruajë të paktën nivelin e tanishëm të trupave atje deri në fund të vitit 2005.

Zyrtarët thonë se plani është tani që në Irak të mbahen deri në 138 mijë trupa amerikane për shkak të asaj që ata e cilësojnë si periudhë pasigurie ndërkohë që afrohet afati i 30 qershorit për kalimin e sovranitetit në duart e irakianëve.

Pantogoni kishte në plan ta ulte efektivin e tij ushtarak në Irak në 115 mijë trupa, por i ndryshoi planet pas shkallëzimit të ndjeshëm të dhunës atje.

 

 

Miller: do të shqyrtohen teknikat e marrjes së të ndaluarve në pyetje

 

Bagdad, 5 maj 2004 - Kreu i sapoemëruar i sistemit të burgjeve ushtarake amerikane në Irak tha se do të shqyrtojë teknikat e marrjes në pyetje dhe do të shkurtojë në masën 50 përqind numrin e të ndaluarve në burgun ku ushtarët amerikanë abuzuan të burgosurit irakianë.

Gjeneral-majori Xhefri Miller tha dje se kërkon të pakësojë nga 3 mijë e 800 në 2 mijë numrin e të burgosurve që mbahen në burgun Abu Ghraib.

 

 

Katër fuqitë e mëdha afirmojnë angazhimin për planin e paqes

 

Bruksel, Uashington, 5 maj 2004 - Katër fuqitë që mbështesin planin e paqes për Lindjen e Mesme afirmuan angazhimin e tyre ndaj këtij plani por thanë gjithashtu se e shikojnë pozitivisht propozimin e kryeministrit izraelit Ariel Sharon për tërheqjen e vendbanimeve hebraike nga Gaza.

Shtetet e Bashkuara, Kombet e Bashkuara, Rusia dhe Bashkimi Evropian thanë në një deklaratë se plani i zotit Sharon është një rast i rrallë për ta çuar përpara çështjen e Lindjes së Mesme por shtojnë se kjo duhet të rezultojë në një tërheqje të plotë izraelite nga të gjitha vendbanimet në Gazë dhe nga disa të tilla në Bregun Perëndimor.

 

 

Ramsfeld: "Do të marr masa ndaj amerikanëve të ndërlikuar në keqtrajtimin e të burgosurve irakianë"

 

Uashington, 5 maj 2004 - Sekretari amerikan i Mbrojtjes premtoi se do të marrë çdo masë të nevojshme për të vënë para përgjegjësisë personelin ushtarak amerikan të implikuar në keqtrajtimin e të burgosurve irakianë.

Në një konferencë shtypi, Ramsfeld tha se ai ka qenë në dijeni të shkeljeve që nga muaji janar duke shtuar se aktualisht janë po zhvillohen 6 procese hetimore për këtë çështje.

Ai i quajti "në kundërshtim me vlerat amerikane dhe thellësisht shqetësuese" fotografitë e ushtarëve amerikanë duke poshtëruar të burgosurit irakianë në burgun Abu Gharib.

 

 

Dhjetra të plagosur në Batumi të Axharisë

 

Batumi, 5 maj 2004 - Forcat e sigurisë në Batumi, kryeqendra e Axharisë kanë shpërndarë me forcë një protestë të studentëve dhe mësuesve ndaj udhëheqësit lokal, Aslan Abashidze.

Njerëzit filluan të bërtasin dhe të vrapojnë kur persona të armatosur, besnikë të udhëheqësit lokal Aslan Abashidze shpërndanë mitingun.

Ata përdorën pompat e ujit dhe i ndoqën demonstruesit nga pas duke i qëlluar me shufra hekuri dhe shkopinj druri. Dhjetra vetë janë shtruar në spital, dhe disa, sipas njoftimeve, janë në gjendje kritike.

Demonstruesit kishin dalë për të protestuar kundër vendimit të zotit Abashidze për të mbyllur shkollat dhe universitetet në të gjithë krahinën.

 

Ata kërkonin gjithashtu që zoti Abashidze të çarmatosë forcat e tij paraushtarake, të heqë gjendjen e jashtëzakonshme në krahinë dhe të rivendosë lidhjet rrugore me pjesën tjetër të Gjeorgjisë.

 

 

Në luftimet e sotme në Irak janë vrarë 12 kryengritës

 

Qerbela, 5 maj 2004 - Sipas njoftimeve më të reja, në luftimet e sotme (e mërkurë) ndërmjet forcave të koalicionit amerikan dhe milicisë shite në qytetet jugore Qerbela dhe Divanjah, janë vrarë 12 kryengritës, kanë bërë të ditur burimet e koalicionit dhe ato irakiene, njofton AFP.

 

Zëdhënësi i klerikut kryengritës Moktada al-Sadër në Naxhaf ka thënë se 9 pjesëtarë të milicisë janë vrarë në luftimet në Divanjah. Zëdhënësi ushtarak amerikan ka vërtetuar luftimet, por s=ka dhënë detaje të tjera.

 

 

Bush premton të ndëshkojë abuzuesit në Irak

 

Uashington, 5 maj 2004 - Këshilltarja amerikane për Sigurinë Kombëtare, Kondoliza Rajs, tha se presidenti Bush garanton se trupat që janë përgjegjëse për keqtrajtimin e të burgosurve irakianë do të japin llogari.

Duke folur për një televizion në gjuhën arabe, zonja Rajs tha se njerëzit duhet të shikonin vendosmërinë e qeverisë amerikane për të nxjerrë në shesh të vërtetën.

Shtëpia e Bardhë tha se Presidenti do të japë intervista për televizionet Al Hurra, (rrjet televiziv që sponsorizohet prej amerikanëve dhe transmeton në të gjithë botën arabe) dhe Al Arabija, ku do të përcjellë këtë mesazh.

Ndërkohë anëtarët e Kongresit amerikan kanë kritikuar mënyrën se si Pentagoni po trajton çështjen e supozimeve për abuzime të të burgosurve irakianë prej ushtarëve amerikanë.

Disa kongresistë po kërkojnë fillimin e një hetimi në lidhje me këtë çështje.

 

 

Qeveria e Berluskonit më jetëgjatë në histori

 

Romë, 5 maj 2004 - Qeveria e kryeministrit Silvio Berluskoni është qeveria me jetën më të gjatë në Itali që prej përfundimit të luftës.

Ajo ka tre vjet që qëndron në pushtet me të njëjtin koalicion.

Dhe kjo në fakt është një arritje për vendin, i cili që prej vitit 1945 ka përjetuar 59 ndërrime të qeverive.

Por 'festimet' kanë mbetur në hije për shkak të ligjit të debatueshëm për mediat dhe dorëheqjes së Drejtoreshës së Përgjithshëm të televizionit shtetëror RAI.

Luçia Anunciata, tha se jepte dorëheqjen "për arsye të ndërhyrjes nga jashtë në punët e brendshme të RAI-t dhe për mungesë pluralizmi".

Kjo ngarje padyshim që la në hije faktin që qeveria e kryeministrit Berluskoni ka vendosur një rekord në histori.

Por qëndrimi i zotit Berluskoni në pushtet kanë qënë i rrethuar nga debate të shumta që ka të bëjnë me konflikte interesash.

Zoti Berluskoni është personi më i pasur në Itali dhe biznesi që ai ka dominon mediat në Itali.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |