Përmbajtja:

• Presidenti Rugova u kthye sot në Prishtinë, pas vizitës disaditëshe në SHBA

• Në seancën e radhës Kuvendi shqyrton një projektligj dhe emërimin e gjyqëtarëve dhe të prokurorëve

• Biznesmenët amerikanë janë të interesuar për investime në Kosovë

• Sipas gazetës gjermane "Shpigel", UNMIK-u po i frikëson kritikët e tij

• Në një raport të OSBE-së thuhet se mediat e Kosovës kanë treguar mungesë objektiviteti për ngjarjet e marsit

• Rreth 200 punëtorë të hekurudhave të Kosovës mbesin pa punë

• Gjenerali Riçard Majers qëndron sot në Kosovë

• Manastiri i Deçanit do të regjistrohet në listën e trashëgimisë kulturore botërore të UNESCO-s

• Në Irak janë vrarë 4 ushtarë amerikanë

• Tre shtetas të huaj dhe një filipinase janë vrarë në Filipine

• Të paktën dy të vdekur nga një sulm izraelit

• Sharon do t'i bëjë ndryshime planit për tërheqjen nga Gaza

• Një shpërthim ka tronditur paralagjen perendimore të Bagdadit

• Në jug të Afganistanit janë gjetur trupat e pajetë të 5 ushtarëve qeveritarë

• Të paktën 5 irakianë janë vrarë në sulmin kundër një baze amerikane

• Amnesty International: për hetim të pavarur të akuzave për torturimin e të burgosurve irakianë

• Mbi 50 ish-diplomatë kritikojnë Bushin

• Bush nis turneun elektoral me perëndimin

• Parandalohet sulmi në samitin e NATO-s në Stamboll

• Janë arrestuar 2 pakistanezë, që kishin vranë 3 inxhinier kinezë me sulm me makinë-bombë

• Në përleshjet në Nigeri janë vrarë të pakten 67 njerëz

• Janë arrestuar 34 të dyshimtë në një operacion të pastrimit të parave të fituara me drogë në Kolumbi

• Një ish-ndihmës i Osama bin Ladenit, ka kërkuar "falje"

Presidenti Rugova u kthye sot në Prishtinë, pas vizitës disaditëshe në SHBA

 

Prishtinë, 4 maj 2004 - Presidenti i Kosovës Ibrahim Rugova u kthye sot në Prishtinë, pas vizitës disaditëshe në SHBA.

Me të arritur në aeroportin e Prishtinës, Presidenti Rugova deklaroi se vizita e tij ishte shumë e suksesshme dhe shtoi se te të gjithë bashkëbiseduesit ka hasur në mirëkuptim për zgjidhjen sa më të shpejtë të statusit përfundimtar të Kosovës, ngase njohja e formale e pavarësisë do të qetësonte Kosovën dhe rajonin.

"Ka mirëkuptim për Kosovën dhe po shtohet bindja gjithnjë e më shumë në SHBA që pavarësia e Kosovës, pra njohja formale, duhet të bëhet sa më shpejt, sepse është në të mirë të Kosovës, të qetësimit të gjendjes në këtë pjesë të Evropës e të botës. Një Kosovë e pavarur e integruar në BE, në NATO dhe në miqësi të përhershme me SHBA-të", deklaroi Presidenti Rugova.

 

Ai veçoi takimet që ka pasur me zyrtarët në shtetin Pensilvania, takimin me sekretarin e përgjithshëm të OKB-së Kofi Anan dhe me 20 ambasadorët e vendeve më me ndikim në OKB. Të gjitha këto takime Presidenti i vlerësoi të ngrohta dhe miqësore.

Një nga çështjet për të cilat ka biseduar në OKB, Presidenti Rugova veçoi transferin e kompetencave nga UNMIK-u tek institucionet vendore, duke shtuar se ka marrë përkrahjen që kjo të bëhet sa më shpejt. "Të gjithë janë të mendimit që të fillojnë të barten kompetencat dhe do të punohet në këtë drejtim", theksoi Presidenti Rugova pas kthimit në Prishtinë.

 

 

Në seancën e radhës Kuvendi shqyrton një projektligj dhe emërimin e gjyqëtarëve dhe të prokurorëve

 

Prishtinë, 4 maj 2004 - Në takimin e sotëm Kryesia e Kuvendit të Kosovës, nën drejtimin e Nexhat Dacit, kryetar, ka shqyrtuar rendin e punës për seancën e së enjtes, më 6 maj dhe ka vendosur që ta nxjerrë për shqyrtim të dytë Projektligjin për marrëveshjet finaciare ndërkombëtare dhe Raportin për emërimin e gjyqëtarëve dhe të prokurorëve.

Kryeparlamentari Daci e ka njoftuar Kryesinë se nga Qeveria ka marrë një letër nëpërmjet të së cilës kërkohet që komisionet parlamentare gjatë amendamentimit të mos e ndryshojnë esencën e Projektligjit për marrëveshjet financiare ndërkombëtare.

Në mbledhje pati vërejtje se komisionet funksionale ende nuk e kanë kryer punën pas leximit të parë të projektligjit, kurse pati zëra se nene të veçanta të këtij projektligji, për mosgarantimin nga UNMIK-u të marrëveshjeve të lidhura ndërmjet Qeverisë dhe mekanizmave financiarë dhe ekonomik ndërkombëtarë, do të reflektohet negativisht dhe do të destimulojnë marrëveshjet e tilla dhe investimet në Kosovë.

Duke pasur parasysh se komisionet parlamentare, për arsye të ndryshme po ndodh të mos mblidhen dhe të mos i kryejnë obligimet e tyre për shqyrtimin dhe amendamentimin e ligjeve, Kryesia ka vendosur që në raste të tilla ligjet të miratohen sipas miratimit në parim, pas leximit të parë.

Kryesia ka shqyrtuar edhe kërkesa të komisioneve të veçanta për udhëtime zyrtare dhe nisma për miratimin e ligjeve të veçanta.

 

 

Biznesmenët amerikanë janë të interesuar për investime në Kosovë

 

Prishtinë, 4 maj 2004 - Biznismenët amerikanë janë të interesuar për investime në fusha të të ndryshme të veprimtarisë në Kosovë, thanë anëtarët e një delegacioni të biznesmenëve nga SHBA-ja. Biznesmenët amerikanë gjatë qëndrimit në Prishtinë janë njoftuar lidhur me kushtet për investime në disa fusha si në energjetikë, infrastrukturë rrugore, agrikulturë dhe biznes.

Ndryshe delegacioni i biznesmenëve amerikanë ka zhvilluar takime të veçanta me kryeministrin Bajram Rexhepi, ministrin e tregtisë dhe industrisë Ali Jakupin, si edhe ka vizituar KEK-un, dhe IPKO-netin.

Biznesmeni i Çikagos, Henri Pinkenshtajn ka deklaruar se zhvillimi ekonomik është çelës i suksesit, i paqes dhe stabilitetit në rajon.

 

 

Sipas gazetës gjermane "Shpigel", UNMIK-u po i frikëson kritikët e tij

 

Prishtinë, 4 maj 2004 - Administrata e OKB-së në Kosovë me plan përpiqet të frikësojë kritikët e saj dhe dëshmitarët e rëndësishëm okularë të dhunës së marsit, në vend që fajtorët nga radhët e veta t'i marrë në përgjegjësi ose t'u bjerë në gjurmë esktremistëve, ka vlerësuar përjavshmja gjermane "Shpigel".

 

 

Në një raport të OSBE-së thuhet se mediat e Kosovës kanë treguar mungesë objektiviteti për ngjarjet e marsit

 

Prishtinë, 4 maj 2004 - Në një raport të OSBE-së mbi rolin e mediave në ngjarjet e marsit në Kosovë thuhet se dhuna mund të kishte marrë drejtim tjetër me raportimin e drejtë të mediave gjatë 17 dhe 18 marsit dhe nuk do të kishte arritur nivelin e intensitetit dhe brutalitetit.

 

Përfaqësuesi i OSBE-për Liri të Mediave, Miklosh Harashi, duke e prezentuar raportin në Prishtinë tha se mediat nuk kanë bërë asgjë me qëllim, por se është treguar një nivel i papranueshëm i emocioneve dhe është treguar mungesë objektiviteti.

Mediat, tha ai, kanë përgjegjësinë të reagojnë në mënyrë të duhur dhe profesionale.

Raporti i OSBE-së kritikon në veçanti mbulimin e ngjarjes së 16 marsit nga tri televizionet e Kosovës. Autori i këtij raporti Dardan Gashi thotë se raporti nuk ka për qëllim që fajin për ngjarjet e marsit t'ua lërë mediave në Kosovë.

 

Por, sipas tij, do të ishte fatkeqësi nëse raporti i publikuar do të reflektonte autocensurë në mediat e Kosovës. Ndërka në raportin e OSBE-së rekomandohet të kryehet një hetim i plotë i paraqitjes nga mediat elektronike në gjuhën shqipe dhe serbe, gjatë trazirave të 17 dhe 18 marsit.

 

Raporti ofron rekomandime se si të përmirësohen mediat dhe të japin një pamje të mediave të lira, dhe të balancuara.

Poashtu raporti konstaton mungesën e besimit reciprok ndërmjet zyrtarëve për informin të UNMIK-ut dhe gazetarëve të Kosovës.

 

 

Rreth 200 punëtorë të hekurudhave të Kosovës mbesin pa punë

 

Prishtinë, 4 maj 2004 - Rreth 200 punëtorë të hekurudhave të Kosovës mund të mbesin pa punë në ditët e ardhshme, pas vendimit për reformimin e sistemit të punësimit në hekurudha nga Agjencia Kosovare e Mirëbesimit AKM). Këtë qëndrim të AKM-së si duket e ka pranuar edhe Bordi i menaxherëve të hekurudhave.

Mirëpo, punëtorët thanë se nuk do ta pranojnë vendimin dhe se do të hyjnë edhe në një grevë urie.

Punëtorë nga të gjitha njësitë e hekurudhave të Kosovës janë takuar në një mbledhje të organizuar nga sindikata, proi aty nuk ishte prezent as drejtori, as menaxherët e hekurudhave. Punëtorët kanë akuzuar menaxherët e tyre se po përgatisin lista të fshehta për largimin e disa punëtorëve.

 

 

Gjenerali Riçard Majers qëndron sot në Kosovë

 

Prishtinë, 4 maj 2004 - Kryeshefi i shtatmadhorisë së forcave të armatosura amerikane gjenerali Riçard Majers do të qëndrojë sot në Kosovë, ku pritet të vizitojë edhe ushtarët amerikanë të stacionuar në kampin "Bondstill".

Po sot gjenerali Majers do të vizitojë edhe ushtarët amerikanë në një bazë në Tuzlla të Bosnjës.

 

 

Manastiri i Deçanit do të regjistrohet në listën e trashëgimisë kulturore botërore të UNESCO-s

 

Beograd, 4 maj 2004 - Drejtori i përgjithshëm i UNESC0-s Koiçiro Macura, i cili në krye të një delegacioni të kësaj organizate qëndroi në Kosovë, ka deklaruar në Beograd se në listën e trashëgimisë kulturore botërore së shpejti do të futet edhe manastiri i Deçanit.

 

Pas vizitës që i kishte bërë kishave dhe manastireve ortodokse në Kosovë, Macura tha se UNESC0 do të bëjë ç'është e mundur që të ruhet dhe rindërtohet trashëgimia kulturore e cila ka rëndësi universale.

 

"Dëshiroj të theksoj se ka një lajm të mirë, e kjo është se (manastiri) Deçani së shpejti do të futet në listën e monumenteve të UNESC0-s që janë të rëndësishëm për trashëgiminë kulturore botërore dhe ky do të jetë rasti i parë në Kosovë të regjistrimit të një monumenti serb në listën e trashëgimisë kulturore universale", ka thënë drejtori i UNESC0-s Koiçiro Macura.

 

 

Në Irak janë vrarë 4 ushtarë amerikanë

 

Naxhaf, Irak, 4 maj 2004 - Milicia shiite ka shkrepur sot herët në mëngjes (e martë) disa predha mortajash mbi bazën amerikane në Naxhaf dhe mbi një ndërtesë publike të qytetit, të cilën e ruajnë trupat bullgare në një qytet tjetër shit, njofton AP.

 

Në të njëjtin njoftim thuhet se në një vend tjetër, katër ushtarë amerikanë kanë humbur jetën kur automjeti i tyre "Hamvi" është rrotulluar gjatë një shkëmbim zjarri të patrullës së tyre. Bombardimet sporadike gjatë natës të bazës ushtarake amerikane janë bërë pas sulmeve intensive të së hënës të milicisë lojale të klerikut radikal Muktada al-Sadër.

 

 

Tre shtetas të huaj dhe një filipinase janë vrarë në Filipine

 

Manila, 4 maj 2004 - Tre shtetas të huaj, një gjerman, një zviceran e një britanik si dhe një filipinase janë therrë për vdekje në një shtëpi në ishullin turistik të Filipineve Borakaj, ndërkohë që besohet se janë ata ishin viktimë e grabitësve, ka bërë të ditur policia.

Ndërkaq ambasada gjermane në Manilë thotë se ende është në pritje të të dhënave të policisë. "Me siguri bëhet fjalë për kriminalitet", ka thënë Roland Grafe, zëvendës i shefit të misionit.

Një mik i gjermanit, pronar i shtëpisë, të hënën ka gjetur trupat e tre burrave dhe të një kamariereje filipinase.

 

 

Të paktën dy të vdekur nga një sulm izraelit

 

Gaza, 4 maj 2004 - Të paktën dy të vdekur nga një sulm izraelit Burime mjekësore palestineze thonë se të paktën dy veta u vranë të martën në mëngjes gjatë një sulmi izraelit në një kamp refugjatësh në pjesën veriore të Rripit të gazës.

Banorët të kampit Khan Yunis thonë se një helikopter izraelit qëlloi me raketë një grup palestinezësh të armatosur, të cilët po qëllonin kundër tankeve dhe autoblindave izralite që po shkonin në drejtim të tyre.

Forcat izraelite rrafshuan të mjellat dhe disa ndërtesa përballë një vendbanimi hebraik.

Në Bregun Perëndimor, forcat izraelite zunë pozicione përreth kompleksit të selisë së udhëheqësit palestinez Jaser Arafat në qytetin Ramallah. Por nuk ka pasur njoftime për luftime.

Sipas agjencive të lajmeve, zyrtarë ushtarakë izraelitë thanë se operacioni nuk kishte të bënte me zyrën e zotit Arafat, por kishte për synim arrestimin e ekstremistëve të dyshuar.

 

 

Sharon do t'i bëjë ndryshime planit për tërheqjen nga Gaza

 

Tel Aviv, 4 maj 2004 - Kryeministri izraelit, Ariel Sharon, tha se do t'i bëjë ndryshime planit të tij të mbështetur nga Shtetet e Bashkuara për tërheqjen nga Gaza në mënyrë që të sigurojë mbështetje nga konservatorët.

Sharon u këshillua me disa nga anëtarët kryesorë të Partisë së tij Likud, një ditë pasi partia Likud u shpreh kundër planit të çangazhimit.

Plani i kryeministrit Sharon parashikon evakuimin e të gjithë kolonëve hebrenj nga Gaza dhe nga pjesë të vogla të Bregut Perëndimor, ndërkohë që forcon kontrollin izraelit në zona të tjera të Bregut Perëndimor.

 

 

Një shpërthim ka tronditur paralagjen perendimore të Bagdadit

 

Bagdad, 4 maj 2004 - Një shpërthim ka tronditur sot (e martë) paralagjen perendimore të Bagdadit, ku ndodhet burgu kontraverz Abu Gharib, njofton Rojter nga vendi i ngjarjes. Nuk është e qartë se çka e ka shkaktuar shpërthimin.

 

Ushtarët amerikanë kanë bllokuar rrugën kryesore automobilistike jashtë kryeqytetit në drejtim të Abu Gharaibit, rreth tri mila në lindje të burgut, ku po hulumtojnë shkakun e shpërthimit. Burgu Abu Gharib është famëkeq për dhomat e torturimit në kohën e Sadamit.

 

 

Në jug të Afganistanit janë gjetur trupat e pajetë të 5 ushtarëve qeveritarë

 

Kabul, 4 maj 2004 - Trupat e pa jetë të pesë ushtarëve qeveritarë afganë të rrëmbyer të hënën në distriktin Shah Xhoj të provincës Zabul, janë gjetur sot (e martë) në jug të vendit, njofton BBCWorld. Për vrasjen e tyre, zyrtarët kanë fajësuar militantët e regjimit taliban të përmbysur. Vërehet një shtim i dhunës në jug të Afganistanit. Të dielen atje patën humbur jetën katër ushtarë afganë kur kishin rënë në një minë.

 

 

Të paktën 5 irakianë janë vrarë në sulmin kundër një baze amerikane

 

Bagdad, 4 maj 2004 - Të paktën pesë irakianë mbetën të vrarë kur anëtarë të milicisë besnike të klerikut radikal shiit Moktada al-Sadër, sulmuan të hënën një bazë amerikane në afërsi të qytetit të shenjtë Naxhaf, në jug të Bagdadit. Forcat amerikane kundërsulmuan.

 

Nuk ka njoftime për viktima në radhët e trupave amerikane, por zyrtarë vendorë thonë se 16 veta janë plagosur në atë përleshje.

Ndërkaq, forcat amerikane goditën të hënën në mbrëmje me artileri strofkat e kryengritësve në Bagdad. Sipas një zëdhënësi ushtarak, trupat amerikane qëlluan me disa qindra mortaja kryengritësit irakianë, duke shkaktuar shpërthime që mund të dëgjoheshin në anën tjetër të kryeqytetit.

 

 

Amnesty International: për hetim të pavarur të akuzave për torturimin e të burgosurve irakianë

 

Gjenevë, 4 maj 2004 - Organizata e të drejtave të njeriut, Amnesty International, bëri thirrje për një hetim të pavarur dhe publik të të gjitha akuzave për torturimin e të burgosurve irakianë nga trupat amerikane dhe të koalicionit.

Ky grup me bazë në Londër thotë se ka marrë raporte të shumta për keqtrajtimin e të burgosurve në Irak, duke përfshirë rrahjet dhe mbajtjen për një kohë të gjatë në izolim.

Por, Shefi i Shtatmadhorisë amerikane, Gjenerali Richard Myers, tha se veprimet abuzive janë incidente të ralla në burgun e Irakut, Abu Gharib.

Ushtria amerikane tha të hënën se ka paralajmëruar 6 ushtarë amerikanë të akuzuar për ushtrimin e dhunës në burg.

 

 

Mbi 50 ish-diplomatë kritikojnë Bushin

 

Uashington, 4 maj 2004 - Më shumë se 50 ish diplomatë amerikanë i kanë dërguar një letër presidentit Bush, ku shprehin pakënaqësinë e tyre lidhur me politikën e tij për Lindjen e Mesme.

Këta diplomatë amerikanë të dalë në pension u frymëzuan t'i shkruanin presidentit Bush prej një mesazhi që mori javën e kaluar kryeminstri, Toni Blair, prej një grupi ish diplomatësh britanikë.

Në letrën drejtuar presidentit amerikan, thuhet se politika që po ai po ndjek në Lindjen e Mesme, po bën që Amerika "të humbasë besueshmërinë, prestigjin dhe miqtë në të gjithë botën".

Diplomatët amerikanë kritikuan administratën për mbështetjen e plotë që po i jep udhëheqësit izraelit, Ariel Sharon.

 

 

Bush nis turneun elektoral me perëndimin

 

Uashington, 4 maj 2004 - Në fillim të turneut të tij elektoral me autobus presidenti Bush, u tha zgjedhësve në shtetet e Miçiganit dhe Ohajo, se udhëheqja e tij e kishte çuar Amerikën në rrugën e përparimit ekonomik dhe do të sillte paqe dhe siguri në Irak.

Në turneun e tij të parë për zgjdhjet presidenciale të nëntorit, Bush u tha zgjedhësve se rivali i tij, senatori John Kerry, nuk do të jetë në gjendje të sigurojë adminstratën që ju shkon për shtat amerikanëve.

Presidenti Bush zgjodhi ta fillonte turneun e tij nga Miçigani ku që prej zgjdhjes së tij janë mbyllur rreth 200 mijë vende pune.

 

 

Parandalohet sulmi në samitin e NATO-s në Stamboll

 

Ankara, 4 maj 2004 - Policia turke ka arrestuar të paktën 24 persona që thuhet se po planifikonin të organizonin sulme me bomba gjatë samitit të NATO-s, që do të mbahet në Stamboll në fund të qershorit.

Një grup prej 16 personash u arrestua në qytetin e Bursës. Nëntë persona, që u arrestuan në Stamboll, u liruan më vonë nga gjykata.

Një deklaratë nga policia thotë se personat ishin anëtarë të grupit Ansar-al-Islam, që ka lidhje me Al-Kaidan.
Ky grup militant deri në momentin e pushtimit e kishte bazën në Irakun verior.

 

 

Janë arrestuar 2 pakistanezë, që kishin vranë 3 inxhinier kinezë me sulm me makinë-bombë

 

Karaçi, 4 maj 2004 - Dy pakistanezë janë arrestuar lidhur me një sulm me makin-bombë, me të cilën qenë vrarë tre inxhinierë kinezë, të cilët ndihmonin në ngritjen e një porti detar në jugperëndim të Pakistanit, ka bërë të ditur policia vendore, njofton AFP.

 

Automjeti transportues kishte shpërthyer me deledirigjues. Në këtë incident, përpos që kishin humbur jetën 3 inxhinierë kinezë, ishin lënduar edhe 9 punëtorë të tjerë kinezë, plus shoferi pakistanezë dhe një tjetër punëtor pakistanez.

 

 

Në përleshjet në Nigeri janë vrarë të pakten 67 njerëz

 

Abuja, Nigeri, 4 prill - Policia e Nigerisë ka bërë të ditur se në përleshjet ndërmjet muslimanëve fulanë dhe kristianëve tarok në qytetin Jelva Shendam kanë humbur jetën të pakten 67 njerëz, njofton BBCËorld. Zëdhënësi i policisë ka thënë se edhe shumë trupa të tjerë të pajetë mund të zbulohen më vonë.

 

 

Janë arrestuar 34 të dyshimtë në një operacion të pastrimit të parave të fituara me drogë në Kolumbi

 

Londër, Uashington, 4 maj 2004 - Policia në të dy anët e Atlantikut kanë shpallur se kanë arrestuar 34 të dyshimtë në një operacion të pastrimit të parave të fituara me drogë në Kolumbi, njofton BBCWorld. Autoritetet në SHBA, Kolumbi, Kanada dhe Britani kanë thënë se kanë shkatërruar një rreth "masiv" krimi dhe kanë kapur miliona dollarë.

 

 

Një ish-ndihmës i Osama bin Ladenit, ka kërkuar "falje"

 

Uashington, 4 maj 2004 - Një ish-ndihmës i Osama bin Ladenit ka kërkuar "falje" pasi ishte dënuar me 32 vjet burg, ngase kishte therur në sy rojën e burgut, njofton BBC Ëorld. Mamdouh Mahmud salim, 46-vjeçar, kishte kapur kokën e tij me duar në shenjë keqardhje për viktimën e tij kur ishte ballafaquar me të në gjykatë.

 

Salim, për të cilin prokurorët kanë thënë se është në rangun e lartë të anëtarëve të Al Kaidës po gjykahet në SHBA dhe ishte arrestuar nën dyshimin për përzierje në bombëvëniet në ambasadat amerikane në Keni dhe Tanzani, ku u vranë 224 njerëz.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |