|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

OPINIONE

Koment

Policia e UNMIK-ut…

3 maj 2004 / TN

 

Nëse nuk është goditur krimi në start, duke i vënë kriminelët dhe urdhërënësit e tyre para drejtësisë, duhet të goditet tash. Një, që t’ua lehtësojë sadopak dhimbjen familjarëve të atdhetarëve të vrarë. Dy, për t’ua hequr shqetësimin politikanëve nga kriminelët. Tre, për ta shpëtuar Kosovën nga rritja e përmasës së tij, sepse zhdukja e tij do të thoshte shumë për përshpejtimin e procesit të pavarësisë, për faktin se lindja e tij te ne pas luftës ishte një nga elementët që bukur shumë ka ndikuar negativisht në këtë aspekt…        

 

Shkruan: Nazmi LUKAJ

 

Policia e UNMIK-ut disa herë arrestoi disa persona të dyshuar për implikim në krim, por gati në të gjitha rastet ata i liroi shumë shpejt. Për personat që janë arrestuar prej saj edhe qytetarët e rëndëmtë kanë pasur njohuri si persona shumë të rrezikshëm, prandaj kanë mbetur të çuditur pse ndodh që të arrestohen dhe të lirohen këta. Pse vepron kështu, vetëm policia e UNMIK-ut e di?! Ky veprim i saj po komentohet në kuleare në mënyra të ndryshme. Disa pohojnë se kjo polici, duke i arrestuar dhe lëshuar personat e konsideruar si të implikuar në krim, dëshiron t’u tregojë të dyshuarve për kriminelë se kanë shumë njohuri rreth veprimtarisë së tyre kriminale, për ta frenuar aktivitetin e tyre në këtë drejtim.

 

Ndërsa, në anën tjetër, pret rastin që të grumbullojë sa më shumë informata që, ! kur ta godasë krimin politik, ta godasë si rrjet. Të tjerët e komentojnë në mënyrën më të keqe: se policia e UNMIK-ut nuk është e interesuar ta godasë fare krimin, por vetëm ta luajë rolin se gjoja është duke bërë diçka në këtë drejtim. Kjo e dyta është më pak e besueshme se e para, por edhe nuk mund të mohohet krejtësisht. Mirëpo, po ndalemi tek pohuesit e parë të kuleareve: se policia e UNMIK-ut do ta godasë krimin politik si rrjet. Nëse është ky qëllimi i saj, sa është i mirë ky, aq ka konotacione edhe negative.

 

Pse negative? Sepse kështu dekurajon shpresat e familjarëve të të vrarëve nga kriminelët për arrsetimin e tyre, e kjo shton rrezikun që pastaj vetë këta të bëjnë përpjekje që t’i qërojnë hesapet me të dyshuarit. Kjo do të sillte një krim tjetër dhe krimi do të thellohej edhe më shumë, duke marrë përmasa të vazhdueshme. Mu për këtë, policia e UNMIK-ut duhet ta marrë shumë seriozisht arrestimin e atyre kriminelëve për të cilët kanë njohuri të sakta se janë të implikuar në! krim, para se ta ndërmarrin aksionin e arrestimit. Dhe, të mos i lëshojnë më, por t’i vënë para drejtësisë. Si ka vepruar deri më tash, vetëm sa i ka tensionuar nervat e familjarëve të të vrarëve dhe të popullit. Prandaj, prej një praktike të tillë duhet të heqë dorë.

 

Tash e tutje, kjo atë që e arreston e që ka njohuri të sakta për implikimin në krim, ta nxjerrë para drejtësisë, që kriminelëve më në fund  t’u jepet dënimi i merituar. Kësisoji i ndihmon Kosovës. Se frikësimi i kriminelëve, duke i arrestuar dhe lëshur, për t’u treguar se kanë njohuri për implikimin e tyre në krime, dhe pastaj ta godasë si rrjet krimin, nuk i ndihmon asgjë parandalimit të tij për arsyen e cekur. Po të goditej krimi politik që në start, atij do t’i ishin prerë këmbët atëherë. Ai mori edhe jetëra të tjera atdhetarësh. Përmasa që mori ai, pra krimi, është shqetësim i përhershëm i politikanëve, që u rri mbi krye si shpatë e Demokleut.

 

Shqetësim që e ka mbushur! Kosovën me truproje. Nëse nuk është goditur krimi në start, duke i vënë kriminelët dhe urdhërënësit e tyre para drejtësisë, duhet të goditet tash. Një, që t’ua lehtësojë sadopak dhimbjen familjarëve të atdhetarëve të vrarë. Dy, për t’ua hequr shqetësimin politikanëve nga kriminelët. Tre, për ta shpëtuar Kosovën nga rritja e përmasës së tij, sepse zhdukja e tij do të thoshte shumë për përshpejtimin e procesit të pavarësisë, për faktin se lindja e tij te ne pas luftës ishte një nga elementët që bukur shumë ka ndikuar negativisht në këtë aspekt…