Përmbajtja:

• Në lidhje me trazirat e marsit në Pejë është arrestuar Nexhmi Lajçi, kurse në Istog Naser Shatri

• Policët serbë në Shtëprcë i kthehen shërbimit

• Gjenerali Mejers nesër viziton Kosovën

• Kaçanik: Ura e vjetër i le vendin urës së re

• Familjarët e imigrantëve pakistanezë të likuiduar nga policia maqedonase do të kërkojnë dëmshpërblim

• Ministri serb mohon se Beogradi më 1999 ka bërë pastrim etnik në Kosovë

• Në Nish është shkruar: "E kemi djegur xhaminë, tani do t'ju djegim edhe ju"

• Organizatori i atentatit ndaj Gjingjiqit iu dorëzua policisë serbe

• Iraku është vendi më i rrezikshëm për gazetarët

• 11 anëtarë të personelit të ushtrisë amerikane vriten në Irak

• Sharoni sfidues pas votimit për Gazën

• Zemërim nga fjalimi i Kastros

Në lidhje me trazirat e marsit në Pejë është arrestuar Nexhmi Lajçi, kurse në Istog Naser Shatri

 

Pejë,Istog, 3 maj 2004 - Forcat e KFOR-it dje në Pejë kanë arrestuar Nexhmi Lajçin, ish-pjesëtar i UÇK-së dhe aktualisht kryetar i Shoqatës së Veteranëve të Luftës për rajonin e Pejës. Gjatë arrestimit janë konfiskuar dy kompjuterë dhe disa fotografi. Ndërkaq në Istog është arrestuar Naser Shatri dhe gjatë bastisjes atij i janë kofiskuar disa gjëra personale.

Përmes një komunikate policia e UNMIK_ut ka konfrmuar arrestimin e tyre, duke mos përmendur emrat. Në kuadër të hetimeve të vazhdueshme lidhur me trazirat e 17 e 18 marsit, policia e UNMIK-ut të dielën ka ekzekutuar urdhërarrestet për pesë lokalitete të ndryshme në qytetine Pejës, Istogut dhe në komunën e Pejës, thuhet në këtë komunikatë të policisë së UNMIK-ut. Gjatë këtyre operacioneve janë arrestuar dy persona sepse kanë luajtur një rol aktiv bë demostratat e dhunshme në rajonin e Pejës më 17 e 18 mars.

Sipas policisë, arrestimet janë kryer pas lëshimit të udhërdhërarresteve, duke sqaruar se personat e arrestuar mund të jenë anëtarë të ndonjë organizate, por këto arrestime janë bërë në bazë të veprimeve të tyre individuale dhe nuk kanë të bëjnë me organizatat, në të cilat ata bëjnë pjesë. Policia thotë se hetimet kundër këtyre dy personave të arrestuar janë duke u zhvilluar.

 

 

Policët serbë në Shtëprcë i kthehen shërbimit

 

Shtërpcë, 3 maj 2004 - Grupi i pjesëtarëve serbë të SHPK-së, të cilët para dy ditësh në shenjë proteste e kanë braktisur këtë shërbim, kanë vendosur që përkohësisht të kthehen në punë. Grupi prej 54 deputetëve të Shërbimit Policor të Kosovës, të shtunën në mëngjes e kanë braktisur stacionin e policisë në Shtërpcë, duke protestuar për shkak të fshehjes së të vërtetës për kinse implikimin e policëve shqiptarë në dhunën e marsit në Kosovë.

Njoftohet se vendimin për kthimin në punë pjesëtarët serb të SHPK e kanë marrë pas takimit me një pjesëtar amerikan të Komandës së UNMIK-ut. Sipas mediave serbe, pjesëtari i komandës së UNMIK-ut ua ka paraqitur ultimatimin policëve serbë, sipas të cilit do të largohen nga puna nëse sot nuk kthehen në punë, ndërkohë që ai i ka plotësuar disa kërkesa të policëve serbë për t'u kthyer në punë.

 

 

Gjenerali Mejers nesër viziton Kosovën

 

Prishtinë, 3 maj 2004 - Shefi i shtabit të bashkuar të Ushtrisë amerikane, gjenerali Riçard Mejers nesër do ta arrijë për një vizitë në Kosovë. Zëdhënësi i kontigjentit amerikan të forcave paqëruajtëse në Kosovë, majori Kris Kol, ka bërë të ditur se gjenerali Mejers do të qëndrojë në kampin Bondstill, të martën më 4 maj, ku do të mbajë edhe një konferencë me gazetarë.

Sipas zëdhënësit, i vizitës së kreut të ushtrisë amerikane është të takojë paqëruajtësit amerikanë në bazën më të madhe ushtarake amerikane në Ballkan. Kjo është hera e dytë që gjenerali Meyers viziton Kosovën, pasi herën e parë kishte qenë në vjeshtën e vitit të shkuar.

 

 

Kaçanik: Ura e vjetër i le vendin urës së re

 

Kaçanik, 3 maj 2004 - Dje është shkatërruar ura në Kaçanik, për t'i lënë vend ndërtimit të urës së re me fonde të përbashkëta të Kosovës, Bashkimit Evropian dhe KFOR-in e NATO-s. Ura mbi lumin Lepenc, rreth 1 km nga qyteti i Kaçanikut, është ura më e gjatë në rrugën M2, e cila nis prej Prishtinës deri në kufirin me IRJ të Maqedonisë.

 

Rruga M2 është një arterie e rëndësishme tregëtare e cila shfrytëzohet shumë nga veturat dhe automjetet e rënda. Një rrugë anësore e përkohshme u mundëson vozitësve që të vazhdojnë shfrytëzimin e rrugës.

Në vitin 2003, BE-ja bëri studimin për qëndrueshmërinë e disa urave përgjatë rrugës M2 nga e cila rezultoi se duhej të ndërrmirej diçka urgjentisht. Nën menaxhimin e Agjencisë Evropiane për Rindërtim, BE-ja ndau 3 milion euro për projektin e forcimit dhe zëvendësimit të tetë urave, duke përfshirë këtu edhe urën në Kaçanik. Ndërsa KFOR-i ndau 1. 2 milion euro dhe Ministria e Transportit 1.8 milion euro.

Vitin e kalur, BE-ja poashtu rehabilitoi pjesën prej 12 kilometërshe në rrugën M2 dhe vendosi një varg elementesh për siguri, duke përfshirë këtu edhe rrjetin që të pengojë gurët të bien në rrugë dhe ngjyrë reflektuese në tunele.

 

BE-ja ka shpenzuar 47 milion euro për përmirësimin e infrastrukturës së transportit të Kosovës, duke përfshirë këtu edhe punën emergjente ne sanimin e rrugëve, rehabilitimin e 400 km rrugë kryesore, rindërtimin e katër urave të dëmtuara, të binarëve hekurudhore që mundësoi shtimin e vëllimit të transportit javor përmes hekurudhës për 300%; zgjërimin e vendkalimit të frekuentueshëm Bllace me IRJ të Maqdonisë, dhe riparimin e rrugëve në disa bashkësi të minoriteteve Tani është duke u punuar në rrugën e re për aeroport.

 

 

Familjarët e imigrantëve pakistanezë të likuiduar nga policia maqedonase do të kërkojnë dëmshpërblim

 

Shkup, 3 maj 2004 - Familjarët e imigrantëve ilegalë pakistanezë, të cilët para dy vjetëve i kishte likuiduar policia maqedonase, kanë paralajmëruar se do të kërkojnë dëmshpërblim, pasi autoritetet e Shkupit pranuan fajin.

 

Gjashtë pakistanezë, të moshës midis 22 e 29 vjeç, janë vrarë në mars të vitit 2002 në periferi të Shkupit. Ata, siç ishte njoftuar atëherë nga autoritetet e Shkupit, kishin planifikuar sulme ndaj ambasadave të huaja. Pakistanezët, siç mësohet tani, ishin vrarë në një incident të kurdisur, jo lorg ambasadës amerikane në Shkup.

 

 

Ministri serb mohon se Beogradi më 1999 ka bërë pastrim etnik në Kosovë

 

Beograd, 3 maj 2004 - Ministri i Mbrojtjes së Serbisë dhe Malit të Zi, Përvosllav Daviniq e ka kontestuar deklaratën e ministrit të Punëve të Jashtme të SMZ, Vuk Drashkoviq se serbët në Kosovë kanë bërë spastrim etnik ndaj shqiptarëve. Sipas tij, ishin serbët ata që ishin viktima të spastrimit etnik. "Në Serbi nuk e njoh askënd personalisht që do ta mbështeste idenë e bashkëkombasit të vet për përndjekjen etnike", ka thënë Daviniq.

Vlerësimin e ministrit të Mbrojtjes, Daviniq, se në Kosovë nuk ka pasur spastrim etnik ndaj shqiptarëve, Vuk Drashkoviq e ka vlerësuar të turpshme. "Kujt ai po i vardiset, cilës gënjeshtër po i vardiset, keni punë me tregtarë, politikanë manipulantë, mendimet PRS, gënjeshtrave, mënyrës së mendimit të Milosheviqit, ndonjë patriotizmi të mjerë, të bazuar në të pavërtetën, në dyftyrësi. Kjo askund nuk do të na shpjerë", ka thënë Drashkoviq.

 

 

Në Nish është shkruar: "E kemi djegur xhaminë, tani do t'ju djegim edhe ju"

 

Nish, 3 maj 2004 - Në një shkollë fillore në qytetin e Nishit janë gjetur të shkruara grafitet prej 25 metrash: "E kemi djegur xhaminë, tani do t'ju djegim edhe ju, do të fillojmë nga më të rinjtë".

 

Sipas mediave serbe, në tabelat e basketbollit janë vizatuar kryqat. Byroja e Nishit për Integrime multietnike dhe multikulturale ka njoftuar se tërë kjo është e drejtuar kundër fëmijëve romë të cilët e vijojnë këtë shkollë.

 

 

Organizatori i atentatit ndaj Gjingjiqit iu dorëzua policisë serbe

 

Beograd, 3 maj 2004 - Personi që akuzohet se ka organizuar vrasjen e ish-kryeministrit serb, Zoran Gjingjiq, i është dorëzuar policisë në Beograd.

Milorad Lukoviq, që njihet si Legija dhe që ka shërbyer si komandant i grupit paraushtarak famëkeq "Beretat e kuqe", ka qenë i fshehur për më shumë se një vit.

Ministria e Brendshme e Serbisë ka konfirmuar se rreth orës 21.00 me orën lokale, Milorad Lukovic iu dorëzua policëve në rrethinë të Beogradit.

Ata e kanë kërkuar Lukoviqin, që njohet më shumë me pseudonimin Legija, për më shumë se një vit. Ai është i dyshuari kryesor për vrasjen e kryeministrit serb, Zoran Gjingjiq, në mars të vitit 2003 në Beograd.

Gjatë arrestimit të Lukoviqit nga rojet e tij është sulmuar një gazetar i B92, të cilit është shkatërruar kamera.

 

 

Iraku është vendi më i rrezikshëm për gazetarët

 

Bagdad, 3 maj 2004 - Me rastin e "Ditës botërore të lirisë së medias", "Reporterët pa kufij" sot do të publikojnë të dhënat më të reja për shkeljen e lirisë së mediave anembanë botës. Organizatat ndërkombëtare për mbrojtjen e gazetarëve theksojnë se viti 2003 për sigurinë e gazetarëve ka qenë një nga vitet më të këqija në decenien e kaluar.

 

Iraku është vendi më i rrezikshëm për gazetarët, e menjeherë vijnë Kuba dhe Zimbabve, ka vlerësuar Komiteti për mbrojtjen e gazetarëve. Në Irak që nga fillimi i luftës në mars të vitit të kaluar, janë vrarë 25 gazetarë, e shmë prej tyre kanë pësuar ose janë rrëmbyer edhe pas përfundimit ët shpallur zyrtar të luftës.

 

 

11 anëtarë të personelit të ushtrisë amerikane vriten në Irak

 

Bagdad, 3 maj 2004 - 11 anëtarë të personelit të ushtrisë amerikane u vranë në Irak, përfshirë 6, që humbën jetën nga një sulm me mortaja në perëndim të qytetit të Falluxhas.

Zyrtarë ushtarakë amerikanë thanë se një seri mortajash goditën dje një bazë të ushtrisë amerikane në periferi të Falluxhas, duke plagosur të paktën 30 veta.

Në një operacion tjetër, një ushtar amerikan u vra nga një shpërthim bombe në anë të rrugës afër qytetit Kirkuk në veri të Irakut. Po dje më parë, 4 ushtarë amerikanë u vranë në dy sulme, njëri në Bagdad dhe tjetri në qytetin jugor të Amaras.

Këto akte dhune ndodhën ndërkohë që një punëtor amerikan i rrëmbyer u iku rrëmbysve të tij pa u dëmtuar, 3 javë pasi ishte rrëmbyer. Zyrtarë ushtarakë amerikanë thanë se shoferi i kamjonit, Thomas Hamill, doli me vrap nga një godinë në jug të Tikritit dhe e identifikoi veten tek ushtarët amerikanë.

 

Punëtori 43 vjeçar u rrëmbyer dhe prej tij nuk kishte dëgjuar njeri që kur autokolonës së tij iu zu pritë.

 

 

Sharoni sfidues pas votimit për Gazën

 

Tel Aviv, 3 maj 2004 - Kryeministri izraelit, Ariel Sharon ka deklaruar se nuk do të japë dorëheqjen pavarësisht nga fakti se partia e tij, Likud, votoi kundër planit të tij për tërheqjen e trupava dhe vendbanuesve izraelitë nga Gaza.

Sharon shprehu keqardhje, por tha se e respekton rezultatin e votimit të së dielës. Megjithatë, duket se ka pësuar një disfatë politike shkatërruese.

Tani ai po konsultohet me këshilltarët e vet për të vendosur se cili do të jetë hapi tjetër që do të bëjë.

Anëtarë të partisë së tij djathtiste Likud, kanë votuar në shumicë kundër planit të tij për tërheqjen e forcave izraelite dhe evakuimin e vendbanuesve izraelitë nga Rripi i Gazës.

 

 

Zemërim nga fjalimi i Kastros

 

Meksiko, 3 maj 2004 - Dy vende të Amerikës Latine, Meksika dhe Peruja, po tërheqin ambasadorët nga Kuba për shkak të disa deklaratave të presidentit kubanez, Fidel Kastro. Meksika ndërkohë, i ka kërkuar ambasadorit kubanez që të largohet menjëherë nga qyteti i Meksikës.

Ministri i Jashtëm I vendit, Luis Ernesto Derbez, u ankua se Kuba kishte ndërhyrë në punët e brendshme të Meksikës.

Ai tha se kritikat ndaj vendit të tij, që z. Kastro bëri në një fjalim që mbajti me rastin e 1 Maj-it, nuk mund të anashkalohen.

Duke njoftuar tërheqjen nga Kuba të ambasadorit të vet atje, edhe qeveria peruane u ankua për fjalimin e z. Kastro.

Presidenti kubanez i kritikoi të dy vendet për mbështetjen që ato i dhanë një rezolute në Komisionin e OKB-së për të Drejtat e Njeriut, ku Kuba kritikohej.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |