Përmbajtja:

• Presidenti Rugova ka kërkuar njohjen formale të pavarësisë së Kosovës dhe hapjen e Zyrës së Kosovës në OKB

• President Rugova kërkoi të transferohen më shumë përgjegjësi ekzekutive tek institucionet e Kosovës

• Presidenti Rugova tha se pavarësia e Kosovës është një përcaktim i popullit dhe i të gjitha forcave politike

• S. Kelli: Unë kam punuar me presidentin Rugova një kohë të gjatë sepse qëllimi ynë është Kosova e pavarur

• Pasi paguan kaucionin prej 50 mijë eurosh, u liruan nga paraburgimi dy ish-zyrtarët e lartë të PTK-së

• Institucionet e Kosovës dhe UNMIK-u planin serb për Kosovën e cilësojnë të pavlefshëm

• Parlamenti i Serbisë ka miratuar planin për Kosovën

• Këshilli i Evropës kërkon nga Shqipëria të luftojë korrupsionin dhe krimin e organizuar

• Tërheqje e trupave amerikane nga Falluxha

• Bush dhe Çejni dëshmuan para Komisionit

• Hetohen për abuzime oficerë amerikanë

• Policia indoneziane ka arrestuar sërish klerikun Abu Bakar Bashir për terrorizëm

• Trupat e Çadit pas përleshjeve kanë hyrë në Sudan

• Talibanët kanë vrarë 5 ushtarë afganë

• Policia indoneziane ka arrestuar sërish klerikun Abu Bakar Bashir për terrorizëm

Presidenti Rugova ka kërkuar njohjen formale të pavarësisë së Kosovës dhe hapjen e Zyrës së Kosovës në OKB

 

Nju-Jork, 30 prill 2004 - Presidenti Rugova ka kërkuar njohjen formale të pavarësisë së Kosovës dhe hapjen e Zyrës së Kosovës në OKB. Këto kërkesa Presidenti i ka paraqitur në një darkë pune me ambasadorët e 20 vendeve në këtë organizatë, ku ishin të pranishëm edhe asesisteni i Sekretarit të Përgjithshëm të OKB-së Hedi Anabi dhe shefja e kabinetit të z. Anan, Elizabet Lindenmajer.

 

Në darkën e organizuar nga misioni i Republikës së Shqipërisë në OKB, përkatësisht nga ambasadori Agim Nesho, presidenti Rugova ambasadorët e KS i njoftoi edhe me zhvillimet e fundit në Kosovë, duke theksuar domosdoshmërinë e bartjes të sa më shumë kompetencave nga UNMIK-ut tek insitucinet e Kosovës.

Duke elaboruar kërkesën për njohjen formale të pavarësisë së Kosovës, Presidenti Rugova, mes tjerash, tha se Kosova e pavarur do të qetësonte rajonin dhe do të përshpejtonte proceset demokratike në vend.

Ambasadori gjerman pranë OKB-së tha se të gjitha opsionet për statusin final të Kosovës janë të hapura dhe nuk përjashtoi mundësinë e hapjes së Zyrës së Ndërlidhjes së Kosovës në Kombet e Bashkuara. Por, ai theksoi se për këtë çështje institucionet e Kosovës do të duhej të diskutonin me administratën e UNMIK-ut, e cila aktualisht e përfaqëson Kosovën në KS dhe në OKB.

 

 

President Rugova kërkoi të transferohen më shumë përgjegjësi ekzekutive tek institucionet e Kosovës

 

Uashington, 30 prill 2004 - Në një intervistë që i dha "Zërit të Amerikës" në Uashington, Presidenti i Kosovës Ibrahim Rugova, tha se me njohjen e pavarësisë së Kosovës, do të jetë shumë më i lehtë edhe integrimi i pakicës serbe dhe pakicave të tjera.

Duke folur për takimet që pati në Nju Jork me Sekretarin e Përgjithshëm të OKB-së, Kofi Annan si dhe me zyrtarët amerikanë rreth ngjarjeve të marsit, Presidenti Rugova tha se të gjithë janë të prekur dhe të habitur me ato ngjarje, sepse në Kosovë kishte një trend shumë pozitiv.

 

Por është edhe përkushtimi, edhe i zotit Kofi Annan dhe i OKB-së dhe sidomos i Shteteve të Bashkuara, që të tejkalohet gjendja dhe përkushtimi se do të vazhdojnë të përkrahin Kosovën dhe qendrimet pozitive në Kosovë, tha ai.

"Ne e kemi kryer pjesën tonë politike, por ngjarjet ndodhën shumë papritur, filluan shumë ashpër, diçka që nuk mund ta imagjinoje që do të reagohej ndaj policisë së UNMIK-ut, ndaj KFOR-it por edhe ndaj policisë së Kosovës", tha Presidenti Rugova.

Ndërkaq kritikat nga bashkësia ndërkombëtare për udhëheqjen e Kosovës i cilsoi si kritika pozitive për insitucionet vendore. Pir theksoi se duhet të fillojë transferimi i përgjegjësive ekzekutive nga UNMIK-u tek vendorët.

Duke folur për realizimin e standardeve, ai tha se ngjarjet e marsit mund të ngadalësojnë pak gjendjen, por ato do të vazhdojnë të prëmbushen, kurse një pjesë e tyre është përmbushur.
"Duhet të fillojmë me vlerësimin e tyre gradual, kjo është e rëndësishme dhe të shikojmë çka mund të realizojmë këtë vit", tha ai.

 

"I kemi edhe zgjedhjet nacionale në vjeshtë dhe çdo parti politike, çdo grup do të shikojë interesat e veta, por ne nuk do të bëjmë një fushatë të gjatë... sepse jemi vend i vogël dhe duhet të punojmë, t'i kryejmë detyrat, institucionet dhe të tjerat".

Në lidhje me problemin delikat, siç është çështja e pakicës që lidhet ngushtë me standardet, Presidenti Rugova ritheksoi se me njohjen e pavarësisë së Kosovës do të jetë shumë më i lehtë edhe integrimi i pakicës serbe dhe pakicave të tjera. "Do të ishte shumë më i lehtë edhe integrimi ekonomik i tyre, demokratik, sepse edhe ata që janë sot aty, edhe ata kërkojnë punë.

 

Ne kemi bërë sa kemi mundur që në vendbanimet serbe, kemi financa të veçanta, kemi shkolla, ambulanca. Atje ku janë ata shumicë shqiptarët marrin pjesë në Asamble Komunale, nuk hapin probleme", duke shtuar se një pjesë e serbëve ende mendojnë me logjikën e vjetër.

Ndërkaq në lidhje me dialogun e mundshëm me Beogradin, Presidenti tha se duhet të pritet pak pas ngjarjeve të marsit dhe në kuadrin e zhvillimeve në rajon, por do të bëhen përpjekje edhe në këtë drejtim. "Është në interesin tonë të kemi marrëdhënie të mira me të gjithë fqinjët tanë.

 

Me Shqipërinë i kemi të mira, me Maqedoninë kanë filluar më mirë, me Malin e Zi, dhe po ashtu me Serbinë, por janë probleme më të rënda dhe ata derisa ata të pranojnë realitetin e ri që ka ndodhur pas ndërhyrjes së NATO-s dhe pas pesë vjetësh progresi në Kosovë", theksoi mes tjerash Presidenti Rugova në këtë intervistë.

 

 

Presidenti Rugova tha se pavarësia e Kosovës është një përcaktim i popullit dhe i të gjitha forcave politike

 

Uashington, 30 prill 2004 - Presidenti Ibrahim Rugova bashkë me Ambasadorin e nderit të Kosovës në SHBA, Bob Doll, dhanë një konferencë shtypi për media në Uashington.

Presidenti Rugova vlerësoi me këtë rast se Kosova ka pasur një progres shumë të mirë gjatë këtyre pesë vjetëve. "Ngjarjet e marsit na kanë tronditur të gjithëve, por gjendja po normalizohet.

 

Do të marrim masa ndaj të gjithë atyre që kanë përdorur dhunën", tha ai duke shtuar se janë duke u shikuar raportet me UNIMK-un, që të bëhet transferi i pushtetit në institucionet e Kosovës.

"Dëshiroj të them me këtë rast se të gjithë duhet të mendojmë që nga Shtetet e Bashkuara të Amerikës, që është vendi që na ka ndihmuar më së shumti, OKB-ja e BE-ja që të bëhet njohja formale e pavarësisë së Kosovës, sepse kjo do t'i përshpejtonte proceset e brendshme demokratike, integrimin e minoriteteve nga shumica shqiptare, si dhe do ta qetësonte atë pjesë të botës, Shqipërinë, Maqedoninë, ku ka shumë shqiptarë, Malin e Zi e edhe vetë Serbinë, edhe pse ajo tash për tash mendon ndryshe", thaksoi para mediave Presidenti Rugova, duke nënviziuar se pavarësia do ta shpejtonte zhvillimin ekonomik, sepse në këtë mënyrë Kosova do të kishte qasje në Bankën Botërore, fondet monetare të tjera ndërkombëtare.

Ndërkaq, ish-senatori Bob Doll, deklaroi se pavarësia e Kosovës nuk është çështje se a do të ndodhë, por se kur do të ndodhë kjo. "Mendoj se kjo duhet të ndodhë sa më parë, sepse tash pesë vjet njerëzit po presin.

 

Unë gjithnjë kam thënë edhe në Senat, edhe kudo tjetër, në biseda me demokratë ose republikanë, që sa më parë duhet të ndodhë pavarësia e Kosovës, normalisht duke mbrojtur të drejtat e minoritetit serb",- tha zoti Doll. Ai deklaroi se ndiehej shumë krenar që është Ambasador nderi i Kosovës në SHBA.

Pyetjes se cili ishte qëndrimi i bashkëbiseduesve gjatë takimeve, si me Kofi Ananin dhe të tjerët, dhe nëse do të ndodhë së shpejti pavarësia e Kosovës dhe hapja e zyrës së Kosovës në OKB, Presidenti Rugova u shpreh se e ka shtruar këtë çështje dhe është shumë optimist se këto të dyja do të ndodhin shumë shpejt. "Duhet të kemi një zyrë ndërlidhëse në OKB, ani pse ne tashmë e kemi UNMIK-un, por duhet ta kemi edhe një zyrë të institucioneve të Kosovës", tha ai.

 

"Po qe se pavarësia e Kosovës do të njihej nga SHBA-të dhe Unioni Evropian, do të pranohet edhe nga fqinjët tanë", teksoi z. Rugova.

Edhe zoti Doll tha se me këtë çështje pajtohej plotësisht me Presidentin Rugova - që ka ardhur koha optimale që OKB-ja dhe SHBA-të ta shqyrtojnë çështjen e statusit të Kosovës.

"Institucionet ndërkombëtare në Kosovë duhet të përkujdesen dhe të përqendrohen më shumë në popullin e Kosovës dhe në këtë janë të përfshirë edhe amerikanët, të cilët duhet të punojnë dhe të veprojnë në këtë drejtim, t'i marrin në konsideratë qëndrimet e popullit të Kosovës", tha Doll, duke shtuar se ndonëse Amerika është e përqendruar në rajone të tjera të krizës, ka obligim të veçantë ndaj Kosovës.

Ndërkaq, në pyetjen se Kosova e pavarur a do të jetë stabilizuese e rajonit, Presidenti Rugova tha se është i sigurt se po. "Kjo së pari vetë popullit të Kosovës do t'ia hiqte frikën për të ardhmen, pastaj integrimet e brendshme në Kosovë do të ndodhin më shpejt dhe kjo do ta qetësonte Shqipërinë, Maqedoninë, Malin e Zi dhe vetë Serbinë, edhe pse kjo e fundit mendon ndryshe",- u shpreh Presidenti. "Statusi i pazgjidhur do të krijojë probleme, sepse fqinjët tanë po manipulojnë me këtë",- konstatoi Presidenti.

I pyetur nëse pavarësia eventuale e Kosovës do t'i nxitte serbët e Bosnjës për një gjë të tilë, zoti Rugova u shpreh se pavarësia e Kosovës do ta stabilizonte rajonin dhe se çështja e Kosovës nuk lidhet me Bosnjën, sepse ajo ka një argument të Dejtonit.

 

"Unë them se kjo nuk do t'i provokonte serbët e Bosnjës dhe koncepti im është se Kosova e Pavarur dhe vendet e tjera, si Shqipëria, Maqedonia, Bosnja, Serbia, Kroacia etj., të gjitha, do të hyjnë në Unionin Evropian", tha ai, duke shtuar se "definitivisht pavarësia e Kosovës do ta qetësonte rajonin".

Ndërkaq, duk u ndërlidhur në këtë temë, senatori Dole theksoi se një gjë ishte e qartë se kthimi Kosovës aty ku ka qenë nuk do të jetë i pranueshëm nga populli i Kosovës, prandaj duhet gjetur një rrugë për ruajtjen e të drejtave të pakicave dhe të ecet përpara me pavarësinë e Kosovës. "Mendoj se Amerika duhet të shtojë fokusimin në rajon dhe një konferencë ndërkombëtare për këtë çështje do të ishte më se e dobishme",- theksoi Doll.

Pyetjes së një gazetari se çfarë po bëhet për ndalimin e trafikimit të qenieve njerëzore, pasi Kosova është qendër e këtij trafiku, Presidenti Rugova kategorikisht mohoi një gjë të tillë, duke thënë se kjo nuk ishte aspak e vërtetë.

Duke iu përgjigjur pyetjes për decentralizimin dhe kërkesën e serbëve për autonomi të serbëve brenda Kosovës, Rugova theksoi se është në favor të decentralizimit vertikal e jo në vija etnike, sepse kjo do të përfshinte tërë rajonin dhe mund të hapte konflikte të reja.

 

"Ndërsa ajo tjetra që thatë ju (autonomia, shënim i redaksisë), të cilën fjalë nuk dua as ta përmend",- u shpreh qartë Presidenti i Kosovës, duke shtuar se pakica serbe do t'i ketë të gjitha të drejtat.

 

 

S. Kelli: Unë kam punuar me presidentin Rugova një kohë të gjatë sepse qëllimi ynë është Kosova e pavarur

 

Uashington, 30 prill 2004 - Presidenti Rugova është takuar edhe me kongresisten Sju Kelli, e cila kryeson grupin e kongresistëve për Kosovën.

Pas këtij takimi z. Rugova tha se me zonjën Kelli kishte biseduar për gjendjen në Kosovë pas trazirave të marsit, që ka filluar të stabilizohet, si dhe përmasat që janë marrë për sanimin e gjendjes. Ndërkaq ata që kanë përdorur dhunën duhet të dalin para drejtësisë, tha ai. "Ligji dhe drejtësia do të sundojnë në Kosovë", ka thënë Presidenti Rugova, duke shtuar se kongresistja Kelli e përcjell shumë mirë gjendjen në Kosovë, progresin që është arritur për këto vite.

"Unë shtrova edhe kërkesën se duhet të mendojmë së bashku që sa më parë të njihet pavarësia e Kosovës, sepse kjo do të hapte shumë procese pozitive të brendshme me një integrim të Kosovës në bashkësinë ndërkombëtare, si dhe një integrimi i minoriteve në shoqërinë kosovare, në shtetin e Kosovës", nënvizoi Presidenti i Kosovës. Ai edhe me këtë rast falenderoi zonjën Kelli për angazhimet e saj për Kosovën.

Kongresistja Sju Kelli pas takimti me Presidentin Rugova, tha: "Unë kam punuar me Presidentin një kohë të gjatë sepse qëllimi ynë është Kosova e lirë dhe e pavarur". Kjo, tha ajo do të arrihet kur Kosova të kalojë disa mandate të ndryshme drejt një shteti të pavarur.

 

Zonja Kelli theksoi se Presidenti ka folur fuqishëm rreth asaj që siguron se ligji dhe drejtësia, drejtësia e ndershme dhe e barabartë do të ekzistojnë në Kosovë dhe ai është duke punuar në këtë drejtim. Z. Rugova e ka pranuar përgjegjësinë morale për të udhëhequr popullin e tij", tha kongresistja Sju Kelli.

Presidenti Rugova është takuar edhe shumë senatorin Bill Klif që është kryetari i shumicës së republikanëve në Senat, pastaj me ish-kryetarin po të njëjtën pozitë senatorin Tretllof, senatorin tjetër Xhorxh Vojnoviq, pastaj me anëtarët tjerë të Senatit Elizabet Doll dhe kongresisten Sju Kelli, Eliot Engëll dhe Xhim Moran.

 

 

Pasi paguan kaucionin prej 50 mijë eurosh, u liruan nga paraburgimi dy ish-zyrtarët e lartë të PTK-së

 

Prishtinë, 30 prill 2004 - Dy ish-zyrtarët e lartë të PTK-së Leme Xhema, Bedri Rama u liruan dje pasdite nga paraburgimi pasi paguan secili një kaucion prej 50 mije eurosh. Këtë lajm e konfirmoi zëdhënësja e misionit të OKB-së Matilde Heneke.

 

Ata u arrestuan pardje në Prishtinë dhe u mbajtën në arrest 12 orë nën dyshimin për korrupsion. Megjithatë, hetimet ndaj tyre do të vazhdojnë, ndërkohë që mësohet se hetimet për korrupsion në këtë komapani janë duke u zhvilluar edhe ndaj dy zyrtarëve të lartë të UNMIK-ut Gerald Fisher, ish-zëdhënës i shefit të UNMIK-ut dhe Rajner Lesar ish-shef i Departamentit të Telekomunikacionit në Kosovë.

 

 

Institucionet e Kosovës dhe UNMIK-u planin serb për Kosovën e cilësojnë të pavlefshëm

 

Prishtinë, 30 prill 2004 - Institucionet e Kosovës dhe UNMIK-u këtë këtë plan serb e cilësojnë si të pavlefshëm. Theksohet se ky plan është një hap i gabuar i cili nuk do t'i ndihmojë marrëdhënieve ndërmjet Kosovës dhe Serbisë, por as vetë pozitës së serbëve në Kosovë.

Ramush Tahiri, këshilltar politik i kryeparlamentarit Daci, thotë se miratimi i planit për Kosovën nga ana e Qverisë serbe është përzierje në punët e brendshme të Kosovës, pasi që Serbia sikurse asnjë shtet tjetër nuk ka jurisdikcion mbi Kosovën.

Nga ana tjetër zyrtarë të administratës ndërkombëtare në Kosovë mohojnë ta kenë parë një plan të tillë. Shefja për informim e kësaj administrate Hua Xhiang thotë se për këtë plan ka dëgjuar vetëm nga mediat serbe. Ajo ka thënë se qëndrimi i administratës ndërkombëtar është se çdo vendim duhet të merret në pajtueshmëri ndërmjet të gjitha komuniteteve.

Kjo zëdhënëse ka thënë se kantonizimi dhe ndarja nuk kanë qenë kurrë objektiva të administratës ndërkombëtare dhe kjo është thënë shumë qartë edhe në të kaluarën, tha Hua Xhiang.

 

 

Parlamenti i Serbisë ka miratuar planin për Kosovën

 

Beograd, 30 prill 2004 - Parlamenti i Serbisë ka miratuar dje njëzërit planin e Qeverisë së Serbisë për Kosovën me të cilin, siç thuhet "nëpërmjet autonomisë territoriale, kulturore dhe personale parashihet mbrojtja e serbëve në Kosovë". Plani parasheh formimin e pesë rajoneve autonome për serbët në Kosovës.
Kryeministri i Serbisë, Vojisllav Koshtunica deklaroi se plani i Qeverisë serbe për zgjidhjen e situatës në Kosovë parasheh decentralizimin e pushtetit si mundësi për zgjidhjen politike në Kosovë.

 

Ai shtoi se ky plan nuk e paragjykon statusin final të Kosovës dhe kjo nuk është çështje me të cilën Serbia duhet të merret, duke shtuar se ky plan nuka angazhohet as për ndarjen entnike të Kosovës, edhe pse siç u shpreh, "ndarja etnike e Kosovës është më e mirë se Kosova etnikisht e pastër".

Sipas planit të Qevrisë serbe, autonominë territoriale do ta përbënin pesë rrethe, por siç thuhet për një autonomi të tillë duhet Rezolutë e KS të OKB-së.

 

 

Këshilli i Evropës kërkon nga Shqipëria të luftojë korrupsionin dhe krimin e organizuar

 

Strasburg, 30 prill 2004 - Në Shqipëri ka përparim tri vitet e fundit përsa i përket funksionimit të demokracisë pluraliste dhe të shtetit juridik. Por të gjitha arritjet kërcënohen nga ndikimi i krimit të organizuar dhe ndikimi i një pjese të biznesit të ligjshëm në jetën publike. Këtë diagnozë i bën gjendjes aktuale në Shqipëri Këshilli i Evropës, i cili publikoi dje pasdite një rezolutë për zhvillimet në Shqipëri.

Përparimet konsistojnë në forcimin e ndikimit të parlamentit në jetën politike në Shqipëri, si dhe në përpjekje deri tani të paprecedenta për dialog dhe bashkëpunim midis partive politike. Ndonëse jetëshkurtra, përpjekjet kanë treguar se ka alternativë përballë konfrontimit dhe bllokimit që ka dominuar politikën shqiptare, konstatohet në Strasburg.

Qeverisë së Shqipërisë i llogaritet më tej pozitivisht miratimi i shumë ligjeve në fusha bazë të reformave si dhe reduktimi i nivelit të trafikut ilegal të qënieve njerëzore përmes Adriatikut. Përmirësimi i vazhdueshëm i marrëdhënieve me fqinjët dhe roli e ndihma konstruktive për përpjekjet ndërkombëtare në Kosovë cilësohen gjithashtu si arritje të autoriteteve shqiptare.

Megjithatë ka ende shumë për të bërë, tha në emër të Komitetit për Plotësimin e Detyrimeve për Shtetet Anëtare të KE raportuesi, eurodeputeti polak Jezhi Smoravinski:

Sistemin gjyqësor në Shqipëri ata e shohin të dobët dhe jo efektiv. Personeli i tij është i përgatitur jo si duhet dhe duket se të paktën pjesërisht është i korruptuar, konstatohet në Strasburg.

Eurodeputetët shqiptarë në KE e pranuan faktin se vendi i tyre ka ende probleme. Por socialistët i kujtuan Asamblesë hapin e madh që për mendimin e tyre ka bërë Shqipëria në shtatë vitet e fundit. Kryetari i delegacionit shqiptar në KE, Petro Koçi përshëndeti optikën e KE të fiksuar në rezolutë, që të dyja partitë kryesore politike, PD dhe PS të mbajnë së bashku përgjegjësi për problemet dhe difektet e vendit.

Ndryshe e vlerësoi gjendjen në Shqipëri, përfaqësuesja e PD në delegacionin shqiptar në KE, Jozefina Topalli, duke thënë se "46% e shqiptarëve jetojnë nën nivelin zyrtar të varfërisë, investimet e huaja për disa vite janë vetëm gjysma e atyre të Maqedonisë. Çdo vit 100 mijë shqiptarë largohen nga vendi. Krimi i organizuar shqiptar është deklaruar nga Europoli më i rrezikshmi i Evropës. Dhe mungon dëshira e vërtetë për ta luftuar atë," tha Topalli.

Parlamentarët e Këshillit të Evropës i kërkuan Shqipërisw të bëjë përpjekje serioze për të vënë në jetë legjislacionin themelor, pasi test për qeverinë është zbatimi në praktikë dhe jo vënia në letër. (A.Dodi).

 

 

Tërheqje e trupave amerikane nga Falluxha

 

Falluxha, 30 prill 2004 - Autoritetet ushtarake amerikanë në Irak po negociojnë me ish-gjeneralë të ushtrisë së Sadam Huseinit për t'i dhënë fund rrethimit të Falluxhas.

Sipas një plani, marinsat do të tërhiqen nga pozicionet në Falluxha dhe katër ish gjeneralë të ushtrisë së Sadam Huseinit me 1 mijë e 100 trupa irakiane do të hyjnë në qytet për të marrë nën kontroll sigurinë.

Një komandant i marinsave jashtë qytetit tha se tërheqja amerikane do të fillojë sot. Por Pentagoni tha se bisedimet po vazhdojnë dhe nuk është arritur një marrëveshje përfundimtare.

 

 

Bush dhe Çejni dëshmuan para Komisionit

 

Uashington, 30 prill 2004 - Presidenti Bush dhe nënpresidenti Dik Çejni u takuan dje privatisht me 10 anëtarët e komisionit, që po heton sulmet terroriste të 11 shtatorit 2001.

Komisioni dëshiron të dijë se çfarë dinte Shtëpia e Bardhë para sulmeve kundër Shteteve të Bashkuara dhe si iu përgjigj ajo kërcënimit terrorist.

Presidenti tha se iu përgjigj çdo pyetjeje të anëtarëve të komisionit. "Ishte një bisedë shumë e përzemërt. Më lanë përshtypje me pyetjet që më bënë", tha Bush.

Seanca, e cila u zhvillua në Zyrën Ovale të presidentit, zgjati më shumë se 3 orë. Zoti Bush e përshkroi takimin si të rëndësishëm dhe me një gamë të gjerë çështjesh, madje zoti Bush la të kuptohet se toni ishte ndër-partiak.

"Mendoj se kjo seancë i ndihmoi anëtarët e komisionit që të kuptojnë se si punoj unë, si e drejtoj Shtëpinë e Bardhë dhe si veprojnë në rast kërcënimesh", tha Presidenti Bush.

 

 

Hetohen për abuzime oficerë amerikanë

 

Bagdad, 30 prill 2004 - Një hetim që është urdhëruar nga ushtria amerikane ka rekomanduar marrjen e masave disiplinore ndaj disa oficerëve të ushtrisë që kanë punuar në një burg në Irak.
Ata janë pezulluar nga detyra për arsye se akuzohen se kanë abuzuar dhe janë sjellë në mënyrë të egër me të burgosurit.

Televizioni amerikan CBS transmetoi një numër fotografish të marra prej ushtarëve, fotografi, të cilat janë shokuese dhe tronditëse.

Megjithëse se ushtarakët këmbëngulin se bëhet fjalë vetëm për një rast të izoluar, fakti që amerikanët kanë abuzuar dhe janë talluar me irakianët në të njëjtin burg ku regjimi i Sadam Huseinit torturoi shumë të burgosur, nuk do të kalohet qetësisht jo vetëm në Irak, por në të gjithë rajonin.

 

 

Policia indoneziane ka arrestuar sërish klerikun Abu Bakar Bashir për terrorizëm

 

Xhakartë, 30 prill 2004 - Pas lirimit nga një burg i Xhakartës, policia indoneziane e ka arrestuar sërish klerikun militant Abu Bakar Bashir nën dyshimin për terrorizëm, njofton BBCnews. Policia ka thënë se ka të dhëna të reja që dëshmojnë se ai ishte lider i lartë i grupit militant Xhama Islamiah, të akuzuar për bombëvëniet në Bali më 2002. Bashir ka mohuar të jetë lider shpirtëror i këtij grupi dhe ka vuajtur 18 muaj burg për delikt emigrimi.

 

 

Trupat e Çadit pas përleshjeve kanë hyrë në Sudan

 

Nxhamena, 30 prill 2004 - Trupat e Çadit kanë depërtuar kufirin e tyre pas përleshjeve me forcat sudaneze kanë hyrë në Sudan, njofton BBCnews. Zëdhënësi i qeverisë së Çadit ka thënë se trupat do të mbrojnë civilët lokalë dhe refugjatët nga konfliktet në rajonin e Dafurit të Sudanit, që po strehohen në rajon. Kombet e Bashkuara vlerësojnë se 10 mijë njerëz kanë humbur jetën në këto konflikte dhe një milion të tjerë kanë braktisur shtëpitë.

 

 

Talibanët kanë vrarë 5 ushtarë afganë

 

Kabul, 30 prill 2004 - Autoritetet në Afganistanin jugor kanë thënë se të pakten pesë ushtarë afganë janë vrarë në një sulm të luftëtarëve të dyshimtë talibanë, njofton BBCnews. Sulmi thuhet se ka ndodhur në distriktin Panxhavi në provincën jugore Kandahar. Në këtë sulm është plagosur edhe një ushtar tjetër. Trupat qeveritare kanë rrethuar pozicionet talibane.

 

 

Policia indoneziane ka arrestuar sërish klerikun Abu Bakar Bashir për terrorizëm

 

Xhakartë, 30 prill 2004 - Pas lirimit nga një burg i Xhakartës, policia indoneziane e ka arrestuar sërish klerikun militant Abu Bakar Bashir nën dyshimin për terrorizëm, njofton BBCnews.

 

Policia ka thënë se ka të dhëna të reja që dëshmojnë se ai ishte lider i lartë i grupit militant Xhama Islamiah, të akuzuar për bombëvëniet në Bali më 2002. Bashir ka mohuar të jetë lider shpirtëror i këtij grupi dhe ka vuajtur 18 muaj burg për delikt emigrimi.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |