Përmbajtja:

• Presidenti Rugova vizitoi Bashkinë e qytetit të Nju-Jorkut dhe takoi guvernatorin e Shtetit të Nju-Jorkut

• Holkeri thotë se për trazirat e marsit përgjegjës janë ekstremistët

• Kofi Anan: "Ne punojmë me kosovarët për t'i ndërtuar institucionet"

• Kuvendi sot miratoi disa ligje projektligje

• Këshilli i NATO-s ka debatuar rreth zhvillimeve të fundit në Kosovë

• Këshilli i Evropës kërkon zbatimin e Planit për Implementimin e Standarteve për Kosovën

• Gazeta "Poughkeepsie Journal" për vizitën e Presidentit Rugova në Nju Jork

• Familjarët e fëmijëve të mbytur në lumin Ibër në fshatin Çabër thonë së raporti i UNMIK-ut favorizon serbët

• Policia e UNMIK-ut ka arrestuar tre ish-drejtuesit e lartë të PTK-së

• Secili i dyshuar për veprime të palejueshme në Kosovë duhet ta dijë se Aleanca nuk do të hezitojë për t'i arrestuar

• Situata në rajonin e Mitrovicës pas ngjarjeve të marsit ka shënuar trende pozitive

• Në Skënderaj dhe në disa qytete të tjera u protestua kundër arrestimit të Sami Lushtakut

• Kryeminsitri Rexhepi beson në pafajësinë e gjeneral Lushtakut

• Kryeministri Rexhepi priti përfaqësuesit Komisionit Ndërkombëtar të Kryqit të Kuq

• Ministrja e Shëndetësisë vizitoi Dobërçanin

• Ministria e Arsimit e Kosovës fillon bashkëpunimin me Institutin për Arsim të Universitetit të Londrës

• KFOR-i i ka shtuar masat e sigurisë në brezin kufitar

• Kryetare e Forumit të Gruas së LDK-së në Dardanë u zgjodh Fahrije Kryeziu

• UNMIK-u ua ka dorëzuar autoriteteve maqedonase Avdyl Jakupin dhe Xhemajl Hysenin

• Sami Lushtaku nuk është arrestuar me urdhër të Tribunalit të Hagës

• Cërvenkovski fiton raundin e dytë të zgjedhjeve presidenciale në Maqedoni

• VMRO-DPMN ka bërë thirrje që zgjedhjet presidenciale në Maqedoni të shpallen të pavlefshme

• Gjatë majit në Prishtinë do të organizohet për herë të gjashtë panairi i librit "Prishtina 2004"

• Në Bagdad janë vrarë 8 ushtarë amerikanë

• SHBA-të ua kanë tërhequr vërejtjen qytetarëve të vet që të mos udhëtojnë në Izrael

• Një gjykatë ruse ka dënuar me burg të përjetshëm një çeçen

• Në Shri Lanka janë vrarë 2 persona

• Në Irak janë vrarë 3 ushtarë të koalicionit amerikan

• Nga përplasja e një buldozeri me një autobus në Kolumbi kanë humbur jetën 21 fëmijë dhe 2 të rritur

• Sulme tokësore dhe ajrore në Falluxha

• Bush dhe Çejni u përgjigjen sot pyetjeve të komisionit që po heton sulmet e 11 shtatorit

• "Washington Post": Koreja e Veriut mund të ketë 8 armë bërthamore

Presidenti Rugova vizitoi Bashkinë e qytetit të Nju-Jorkut dhe takoi guvernatorin e Shtetit të Nju-Jorkut

 

Nju-Jork, 29 prill 2004 - Presidenti Rugova ka vizituar Bashkinë e qytetit të Nju-Jorkut dhe është trakuar me kryetarin e Asamblesë të këtij qyteti Xhoel Miller dhe me këshilltarët e asamblesë.

Presidenti Rugova poashtu është takuar edhe me guvernatorin e Shtetit të Nju-Jorkut, Xhorxh Pataki.

Zoti Rugova i ka njoftoi këshilltarët e qytetit të Nju-Jorkut me zhvillimet e arritura politike dhe demokratike në Kosovë në periudhën e pasluftës si dhe ritheksoi përcaktimin e popullit dhe udhëheqjes së Kosovës për rrugën drejt pavarësisë.

Presidenti Rugova edhe njëherë foli për miqësinë e Kosovës me Shtetet e Bashkuara të Amerikës dhe u falendëruar për ndihmën që ka dhënë dhe po jep shteti dhe populli amerikan për Kosovën. Presidenti gjithashtu falënderoi qytetin e Nju-Jorkut për kontigjentin e policisë amerikane që shërben në kuadër të policisë së UNMIK-ut në Kosovë, si dhe kërkoi një intensifikim marrëdhëniesh në të gjitha fushat ndërmjet qytetit të Nju-Jorkut dhe Prishtinës.

Miller shprehu admirimin e tij për punën që Presidenti Rugova ka bërë për pavarësinë e Kosovës.

"Është unike të kesh një udhëheqës ndërkombëtar në shtëpinë tënde, prandaj kjo është tepër ngazëllyese", tha Miller, i cili poashtu e lavdëroi Rugovën për mbështetjen e SHBA-ve në luftë kludnër terrorizmit.

Presidenti Rugova në mbrëmje ka pasur një takim pune me rreth 20 ambasadorë të shteteve të ndryshme në selinë e OKB-së, në mesin e tyre edhe ambasadorët e vendeve anëtare të të përhershme në Këshillin e Sigurimit në një darkë që për nder të tij e shtroi ambasadori i Shqipërisë në OKB Agim Nesho, përkatësisht Misioni i Shqipërisë në OKB në Nju-Jork.

Të enjtën në Uashington presidenti i Kosovës Ibrahim Rugova do të takohet me senatorë dhe ambasadorë të ndryshëm amerikanë, miqë të Kosovës.

 

 

Holkeri thotë se për trazirat e marsit përgjegjës janë ekstremistët

 

Strasburg, 29 prill 2004 - Shefi i UNMIK-ut Hari Holkeri tha sot në Strasburg se për dhunën e muajit të kaluar në Kosovë janë përgjegjës esktremistët të cilët do të gjykohen.

"Kjo dhunë është grusht i rëndë për stabilizimin dhe normalizimin e rajonit. Mirëpo, e dimë se para së gjithash bëhet fjalë për ekstremistët të cilët nuk përfaqësojnë kosovarët", tha Holkeri para Asamblesë Parlamentare të Këshillit të Evropës.

"Krimi do të ndëshkohet, fajtorët do të sillen para drejtësisë. Do të indetifikojmë udhëheqësit e dhunës dhe në këtë drejtim po na përkrah shumica e pjesëtarëve të moderuar të të gjitha bashkësive etnike", theksoi Holkeri.
Deri më tash janë arrestuar 260 persona që janë të lidhur me dhunën gjatë marsit në të cilën u vranë 19 njerëz, ndërkaq mbi 900 janë plagosur.

 

 

Kofi Anan: "Ne punojmë me kosovarët për t'i ndërtuar institucionet"

 

Nju Jork, 29 prill 2004 - Sekretari i përgjithshëm i OKB-së Kofi Anan, në një konferencë për gazetarë, tha se misioni i OKB-së në Kosovë udhëhiqet në bazë të Rezolutës 1244 të KS. "Ne përpiqemi të punojmë me kosovarët për t'i ndërtuar institucionet, për t'i forcuar institucionet e tyre, dhe kemi caktuar disa standarde në të cilat jemi duke punuar për t'i arritur ato", tha Anan.

 

Ai shtoi se do të punohet me vendorët në zbatimin dhe arritjen e standardeve dhe pastaj do të shqyrtohet çështja e statusit.

"Por, duke marrë parasysh se çka ndodhi në terren, paraqitet nevoja që ta rishikojmë tërë qasjen tonë, të cilën edhe jemi duke e bërë", tha Anan, duke shtuar se "jemi duke rivlerësuar se ku jemi".

Kofi Anan tha se nuk mendon që Kosova po bëhet Bregu Perëndimor i Evropës. "Ne jemi duke e rivlerësuar situatën me partnerët tanë në Evropë dhe në rajon, si dhe me palët e tjera të interesuara, për të parë se çfarë adaptimesh duhet bërë në planet tona, në çfarë drejtimi duhet bërë adaptimet", tha Anan.

"Ju e dini se unë e takova z. Rugova këtu dhe këto ishin disa çështje për të cilat diskutuam. Natyrisht se ai (Rugova) e ngriti çështjen e pavarësisë me mua", tha zoti Anan para gazetarëve.

I pyetur se cila është përgjigjja e tij Anan tha: "Unë i thashë se ne jemi të të kufizuar me Rezolutën 1244 dhe se këto çështje do të diskutohen më vonë. Nuk ekziston pozicioni i caktuar i KB lidhur me këtë. Por, ne duhet të flasim me partnerët tanë për këtë çështje", u përgjegj Anan.

 

 

Kuvendi sot miratoi disa ligje projektligje

 

Prishtinë, 29 prill 2004 - Deputetët e Kuvendit të Kosovës në vazhdim të seancës së djeshme sot miratuan pakon e ligjeve për energjinë Ligjin për standardizim, pastaj Ligjin për materialin fidanor dhe ligjin për njësitë matëse, si dhe Projektligjin për mbrojtjen e konsumatorit të cilat nga deputetët u vlerësuan si bazë e mirëfilltë për përmirësimin e gjendjes në lëmin e furnizimit me energji elektrike në vend.

Parlamenti miratoi në parim edhe Ligjin për mbrojtjen e konsumatorit, prezentimin e të cilit e bëri ministri Ali Jakupi. Ai duke folur për ligji në fjalë tha se ai do të jetë në mbrojtje të konsumatorit dhe do ta plotësojë vakumin ligjor në këtë sferë. "Ky ligj për herë të parë mbron konsumatorët nga abuzimet dhe ndalon reklamimet e duhanit dhe pijeve alkoolike", tha ministri Jakupi dhe theksoi se ligji do të jetë në funksion të mbrojtjes së jetës dhe të shëndetet të konsumatorëve dhe të mjedisit ku jetojnë dhe veprojnë.

Edhe deputeti Gani Prekopuca tha se ligji shumë mirë i parasheh të gjitha ato mangësi, abuzime, keqpërdorime, falsfikimet e mundshme.

Ndërkaq Ethem Çeku tha se çështja e mbindërtimeve dhe ndërtimeve pa leje do të regullohet me një ligj të veçantë. Por deputetët ishin të mendimti se Projektligji mbi ndërtimet ka shumë mangësi deh duhet të evitohen përmes amandamenteve në procedim të mëtejshëm.

Kuvendi debatoi edhe për gjendjen në minierat e Trepçës, për të cilat u tha se është shumë e rëndë. U tha se problemet në miniera nuk janë vetëm ekonomike, por edhe politike dhe u rekomandua të nxirret një ligj për minierat dhe ato të mos privatizohen.

Kuvendi miratoi edhe ligjet për njësitë matëse, për standarizim dhe materialin fidanor.

 

 

Këshilli i NATO-s ka debatuar rreth zhvillimeve të fundit në Kosovë

 

Bruksel, 29 prill 2004 - Këshilli i NATO-s ka diskutuar në Bruksel edhe njëherë për situatën në Kosovë dhe janë analizuar përshtypjet nga vizita që ky organ më i lartë politik i NATO-s i ka bërë Kosovës javën e shkuar. Ambasadorët kanë thënë se vizita u ka shërbyer për të parë gjendjen në terren dhe për t'u njohur nga dora e parë për nevojat e misionit të KFOR-it në Kosovë.

 

Thuhet se në këtë takim të djeshëm është vlerësuar se afër 20 mijë ushtarë sa ka në këtë moment KFOR-i në Kosovë, duhet të kenë mbështetjen e plotë të Këshillit të NATO-s edhe për punën e tyre në vazhdim. NATO-ja mendon se në këtë moment nuk ka hapësirë për të menduar për ndonjë zvogëlim të trupave në Kosovë pasi që situata mbetet ende e brishtë.

 

Këshilli i NATO-së edhe në këtë takim ka nënvizuar se duhet të vazhdohet angazhimi më i gjërë politik i bashkësisë ndërkombëtare në Kosovë dhe në këtë drejtim është përshëndetur takimi në përbërje më të gjërë i Grupit të Kontaktit me NATO-n dhe BE-në që është zhvilluar javën e shkuar për Kosovën, duke shtuar se takimet e këtij grupi duhet të jenë në të ardhmen më të rregullta. Zyrtarët e NATO-s pas këtij takimi kanë përsëritur se të gjithë përgjegjësit për aktet e dhunës në Kosovë duhet të sjellen para drejtësisë.

 

 

Këshilli i Evropës kërkon zbatimin e Planit për Implementimin e Standarteve për Kosovën

 

Strasburg, 29 prill 2004 - Për më shumë se dy orë europarlamentarët e Këshillit të Evropës u përpoqën sot në Strasburg të gjejnë shpjegime për ngjarjet e marsit në Kosovë dhe të propozojnë hapa që do të pamundësonin përsëritjen e ngjarjeve. Në emër të Komitetit Politik të Këshillit të Evropës, eurodeputeti britanik Toni Llojd kërkoi dënimin e atyre që organizuan dhunën.

"Ne të gjithë duhet të jemi të shokuar nga ajo që ndodhi, ne duhet të dënojmë njëkohësisht ata që e nxitën dhunën, por edhe ata që dështuan ta ndalojnë dhunën", tha Llojd.

Incidentet fillestare me fëmijët nuk u ndaluan nga politikanët lokalë të shndërrohen në ngjarjet e 17 dhe 18 marsit, tha ai. Por Toni Llojd tha se puna nuk duhet të jetë vetëm zbulimi i dorasve, por edhe pranimi i përgjegjësive nga të gjithë.

Përfaqësuesi i Komisionit Juridik të Këshillit të Evropës, eurodeputeti rumun Ionel Olteanu tha se në Kosovë përsa i përket ligjeve dhe së drejtës sundon anarkia. Sistemi i deritashëm juridik i Kosovës nuk e justifikon veten. Tek popullata në Kosovë duhet të zgjohet besimi te drejtësia, tha eurodeputeti rumun.

Në fjalën e tij, kryeadministratori ndërkombëtar i Kosovës, Harri Holkeri paraqiti me shifra dëmet e shkaktuara nga trazirat në Kosovë.

"Ne jemi megjithatë të ndërgjegjshëm se dhuna ishte kryesisht rezultat e synimeve të ekstremistëve, të cilët nuk përfaqësojnë popullin e Kosovës. Krimet do të dënohen", tha më tej Holkeri.

 

Holkeri deklaroi se është arrestuar dje njëri nga liderët që qëndron pas trazirave dhe izolime të tilla kanë rëndësi, në mënyrë që organizatorët e trazirave të mos brohoriten si heronj nga popullata. Për këtë ekziston mbështetja e shumicës së popullatës së moderuar të Kosovës, tha ai.

Analiza e tij para Asamblesë nuk përmbante nota autokritike për vetë punën e UNMIK-ut. Në konferencën e shtypit pas debatit Holkeri deklaroi se UNMIK-u nuk kishte informata për atë që po përgatitej në Kosovë, dhe se ata që i patën nuk ia ofruan UNMIK-ut.

Ish-presidenti i Asamblesë Parlamentare të KE, lordi britanik Rasëll Xhonston tha se shqiptarët nuk duhet të harrojnë se "ne i çliruam nga serbët, jo për të ndërmarrë revansh ndaj tyre dhe të tjerëve. Më shumë se studimi i arsyeve për atë që ka ndodhur dhe për dështimin e bashkësisë ndërkombëtare në Kosovë, e rëndësishme është të punohet në drejtim të statusit final të Kosovës", tha Xhonston, njofton "Dojçe vele" nga Strasburgu.

Deputetët serbë në KE thanë se në Kosovë ka spastrim etnik të pastër. "A ka ndonjë popull në Evropë që kur është i pakënaqur me shtetin ku jeton lejohet të formojë një shtet të ri", pyeti eurodeputeti serb Zoran Shami.

 

Deputeti i Partisë Radikale Tomislav Nikoliq, ( i rikthyer si përfaqësues i vendit të tij në KE, pas pezullimit në krye të javës nga Asambleja) tha se fajin për atë që ndodhi në Kosovë e ka administrata e Holkerit.

Ndërsa deputeti nga Shqipëria, Taulant Dedja kërkoi që situata në Kosovë të shihet jo me pesimizëm. Unë jam për shpalljen të pavarur të Kosovës, tha deputeti socialist shqiptar, vullnet që është shprehur nga kosovarët.

Asambleja e miratoi pa ndryshime esenciale projektrezolutën për Kosovën, me të cilën ju kemi njohur dje.

 

 

Gazeta "Poughkeepsie Journal" për vizitën e Presidentit Rugova në Nju Jork

 

Nju Jork, 29 prill 2004 - Kur Elmi Berisha erdhi nga Kosova na Uapingers Falls, para 15 vjetësh, ai e filloi një luftë të gjatë për prosperitetin dhe pavarësinë e vendit të tij. Kjo luftë për paqe e bëri mbrëmjen e së martës të veçantë për Berishën, pasi që zyrtarët lokalë u përshëndetën miqësisht me kryetarin e Kosovës, Ibrahim Rugova, në Hajd Park.

"Ndihem shkëlqyeshëm", tha Berisha, 'sepse presidenti im... vendosi që të vijë në Shtetet e Bashkuara për t'i treguar qeverisë amerikane se sa mirënjohës janë ata për atë që Amerika ka bërë për ta pesë vjet më parë".

Vizita e Rugovës në Qendrën e Vizitorëve dhe të Konferencës "Henry A.Wallace" dhe në vendin historik "ranklin D. Roosevelt" është hera e parë që një udhëheqës i huaj ka qenë në qendër, që nga hapja e saj në nëntor. Ajo poashtu shënon miqësinë e vazhdueshme nëpërmjet Uapingers Fallsit dhe Kosovës - vitin e kaluar fshati Datçes Kaunti u binjakëzua me Klinën.

Ndërkohë që Rugova e mori një stemë nga zyrtarët e fshatit Uapingers Falls, në shenjë nderimi për punën që ai e bëri për pavarësinë e vendit të tij, Rugova dhuroi një gur të vogël të çmueshëm nga mineralet e vendit të tij. Berisha tani shërben si person i veçantë kontaktues në Shtetet e Bashkuara.

Rugova është në mes të vizitës së tij në Shtetet e Bashkuara, gjatë së cilës është takuar edhe me Sekretarin e Përgjithshëm të OKB-së, Kofi Anan. Të hënën, Rugova është takuar edhe me ushtarët e Gardës Kombëtare të Ushtrisë së Pensilvanisë, në luginën Suskuehana, për t=i falënderuar ata për shërbimin e tyre në Kosovë.

Udhëtimi në AWallace Centar@ ishte inspiruar nga admirimi i Rugovës për Frenklin Rusveltin dhe kjo ngjarje mblodhi një numër të zyrtarëve lokalë, të cilët patën një darkë me kryetarin. Kuvendari shtetëror Xhoel Miller, ishte i pranishëm, sikurse edhe prefekti i Bikonit, Klara Lu Gould dhe mbikëqyrësi i qytetit të Hajd Parkut, Jensi MekArthur.

"Ne jemi në shtëpinë e presidentit të njohur amerikan", tha Rugova, përmes zëdhënësit dhe përkthyesit të tij, Muhamet Hamiti. Më herët, ai iu referua marrëdhënies ndërmjet Amerikës dhe Kosovës si një "miqësi e përhershme dhe e qëndrueshme".

Miller tha se ishte nder që është përfshirë në mbrëmje dhe e shprehu admirimin për punën e Rugovës për pavarësinë e Kosovës.

"Është unike të kesh një udhëheqës ndërkombëtar në shtëpinë tënde, prandaj kjo është tejet ngazëllyese", tha Miller, i cili poashtu e lavdëroi Rugovën për mbështetjen e Shteteve të Amerikës në luftën kundër terrorizmit.
Komuniteti i fuqishëm shqiptar në Bikon e nxiti pjesëmarrjen e Gouldit.

"Kjo është për të treguar respekt për ta", tha ajo për vizitën e saj në "Wallace Center".

 

 

Familjarët e fëmijëve të mbytur në lumin Ibër në fshatin Çabër thonë së raporti i UNMIK-ut favorizon serbët

 

Mitrovicë, 29 prill 2004 - Familjarët e fëmijëve të mbytur në lumin Ibër në fshatin Çabër paralajmëruan se do të ankohen tek të gjitha institucionet për raportin e UNNMIK-ut lidhur me mbytjen e fëmijëve, i cili sipas tyre favorizon serbët. Ata paralajmëruan formimin e një grupi të avokatëve nga mbarë Kosova për të kërkuar drejtësi deri në fund.

 

 

Policia e UNMIK-ut ka arrestuar tre ish-drejtuesit e lartë të PTK-së

 

Prishtinë, 29 prill 2004 - Policia e UNMIK-ut bënë të ditur se ka arrestuar Leme Xhemën, ish-drejtoreshë e Postëtelekomit të Kosovës, Bedri Ramën, ish-drejtor i Telekomit të Kosovës, si dhe Uno Nilson ish-punonjës i UNMIK-ut dhe ish-këshilltar i lartë i PTK-së.

 

Këtë lajm e ka bërë të ditur zëdhënësja e UNMIK-ut Metile Heneke, duke shpjeguar se ata u arrestuan nën dyshimin se janë përfshirë në korrupsion me kontrata të dëmshme në emër të ndërmarrjes së Postës dhe Telekomit të Kosovës.

Sipas njoftimit arrestimet janë bërë pas hetimeve të kryera nga njësia e hetimeve financiare në lidhje me prokurimin dhe ekzekutimin e kontratave të nënshkruara për PTK-në. Në hetime ishin përfshirë pjesëtarë të njësisë "Guarda di Financa" nga Italia.

Kryeadministratori i Kosovës Hari Holkeri citohet të ketë thënë se parimi themelor i misionit të OKB-së është toleranca zero ndaj korrupsionit dhe se UNMIK-u është i përkushtuar të vë para drejtësisë këdo që është i përfshirë në korrupsion.

 

 

Secili i dyshuar për veprime të palejueshme në Kosovë duhet ta dijë se Aleanca nuk do të hezitojë për t'i arrestuar

 

Bruksel, 29 prill 2004 - Zyrtarët e NATO-s për veprimet e djeshme të KFOR-it në rajonin e Drenicës, ku forca të mëdha të KFOR-it dhe policisë ndërkombëtare kanë arrestuar komandantin e ish-UÇK-së Sami Lushtakun, nuk ishin në gjendje që të japin ndonjë hollësi.

"Ajo që ne mund të themi është se secili i dyshuar për veprime të palejueshme në Kosovë duhet ta dijë se Aleanca nuk do të hezitojë për t'i arrestuar dhe për t'i sjellë para drejtësisë", ka thënë dje një zyrtar i NATO-s duke komentuar arrestimin e Sami Lushtakut, por duke refuzuar që të jep hollësi të tjera.

 

 

Situata në rajonin e Mitrovicës pas ngjarjeve të marsit ka shënuar trende pozitive

 

Mitrovicë, 29 prill 2004 - Zëvendëskryetari i Kuvendit të Komunës, Mursel Ibrahimi dhe Kryeshefi i Ekzekutivit të Kuvendit të Komunës, Mustafë Pllana, kanë marrë pjesë në një takim që është mbajtur në ambientet e administratës rajonale të UNMIK-ut në Mitrovicë, në të cilin ishin të pranishëm edhe Ksavier Mishel, komandnat i BSHVL-së, Rashid Ahmed, zëvendësadministrator rajonal i UNMIK-ut në Mitrovicë, Beri Pollin, komandant i policisë rajonale të UNMIK-ut në Mitrovicë dhe Rrahman Sylejmani, zëvendëskomandant i policisë rajonale.

Temë e bisedës në këtë takim ishte situata aktuale e sigurisë në rajonin e Mitrovicës, lidhur me të cilën të pranishmit i njoftuan komandanti i BSHVL-së, gjenerali Mishel dhe komandanti i policisë rajonale në Mitrovicë, Pollin.

Pasi që u konstatua se situata e përgjithshme në rajonin e Mitrovicës, pas ngjarjeve të mesmarsit, ka shënuar trende pozitive, pjesëmarrësit në takim vlerësuan se pas komunikimit të rezultateve të hetuesisë nga ana e prokurorit ndërkombëtarë lidhur me mbytjen e tre fëmijve të fshatit Çabër në Lumin Ibër dhe arrestimit të ish komandantit të UÇK-së nga KFOR-i, Sami Lushtaku, ajo në disa mjedise të rajoni është tensionuar dhe mund të eskaloi, andaj edhe u dakorduan që të ndërmirren masa politike me qëllim që diç e tillë të mos ndodh.

Zëvendëskryetari Ibrahimi dhe Kryeshefi i Ekzekutivit, Pllana, pasi që janë shprehur se ka arësye për brengosje, kanë kërkuar nga organet e drejtësisë të vazhdojnë edhe mëtutje punën për ndriqimin e plotë të rrethanave në të cilat humbën jetën tre fëmijtë e Çabrës.

Ibrahimi dhe Pllana janë shprehur qartë se do të angazhohen maksimalisht për të ndërmarrë të gjitha masat në kuadër të mundësive dhe kompetencave që kanë pushtetet lokale, për të parandaluar përsëritjen e ngjarjeve të marsit, të cilat kanë patur pasoja të rënda në komunë.

 

Ata kanë kërkuar bashkëpunim sa më të ngushtë dhe koordinim të veprimeve ndërmjet institucioneve vendore dhe atyre ndërkombëtare, në mënyrë që proceset të qohen përpara.

Të pranishmit në takim kanë konkluduar se të gjitha problemet e paraqitura mund të zgjidhen me dialog, duke përjashtuar dhunën si mundësi për zgjidhjen e tyre, në mënyrë që rajoni i Mitrovicës, por edhe Kosova në përgjithësi të jenë paqësore.

 

 

Në Skënderaj dhe në disa qytete të tjera u protestua kundër arrestimit të Sami Lushtakut

 

Skënderaj, 29 prill 2004 - Sot në mesditë në Skënderaj shoqatat e dala nga lufta organizuan një protestë kundër arrestimit të ish-komandantit të UÇK-së Sami Lushtaku.

Përfaqësuesit e shoqatave të dala nga lufta folën para rreth 2000 protestuesve të tubuar, duke shprehur pakënaqësinë me arrestimin e Lushtakut, dhe e quajtën atë si një fushatë në vazhdimësi kundër luftës çlirimtare të UÇK-së dhe komandantëve të saj.

Në këtë tubim foli edhe kryetari i komunës së Skënderajt Ramadan Gashi dhe deputeti Gani Koci. Protesta kaloi pa incidente.

Protesta të ngjashme janë organizuar sot edhe në disa qytete të Kosovës.

 

 

Kryeminsitri Rexhepi beson në pafajësinë e gjeneral Lushtakut

 

Prishtinë, 29 prill 2004 - Pas informatave fillestare të pranura gjatë ditës së djeshme, sot Kryeministri Rexhepi është njoftuar zyrtarisht nga Gjenerali Kamerhoff dhe nga zëvendësi i PSSP-së, z. Brayshaw për arrestimin e Gjeneral Sami Lushtakut.

"Unë, si Kryeministër i Kosovës, kam konsideratë të madhe për veprën e gjeneral Lushtakut dhe trimërinë e demonstruar gjatë luftës për çlirimin e Kosovës. Besoj në pafajësinë e gjeneral Lushtakut dhe pres që pas shqyrtimit sa më të shpejtë të akuzave që i vehen në barrë ai do t'i kthehet familjes dhe punës.

 

Qëndroj në kontakt të vazhdueshëm me krerët e UNMIK-ut dhe të KFOR-it për t'u informuar lidhur me trajtimin dhe procedurën ndaj Gjeneral Lushtakut. Nga të gjithë qytetarët e Kosovës kërkoj që të ruajnë gjakftohtësinë dhe vetëpërmbajtjen", thuhet në një deklaratë të kryeministrit Rexhepi.

 

 

Kryeministri Rexhepi priti përfaqësuesit Komisionit Ndërkombëtar të Kryqit të Kuq

 

Prishtinë, 29 prill 2004 - Kryeministri Bajram Rexhepi priti në takim Znj. Pascale Meige, shefe e Komisionit Ndërkombëtar të Kryqit të Kuq - KNKK dhe Udo Wagner Koordinator i Mbrojtjes pranë KNKK-së.

 

Në këtë takim Kryeministrit iu prezentua edicioni më i fundit i librit të të zhdukurve në të cilën paraqiten të dhënat e fundit mbi të zhdukurit nga lufta e para 5 viteteve. Kryeministrit iu prezentua fakti se në këtë libër listat e të zhdukurve nuk janë në bazë të përkatësisë etnike, por në bazë të autoritetit që mbahet përgjegjës për zhdukjen e këtyre personave. Ky libër orvatet që të ofrojë një mjet të dobishëm gjatë procesit të dhënies së informatave familjeve të personave të zhdukur.

Kryeministri falenderoi drejtuesit e KNKK Bsë për punën e zellshme në zbardhjen e fatit të personave të pagjetur dhe theksoi se ky proces është i domosdoshëm deri në zbardhjen e fatit të të gjithë personave të pagjetur nga lufta.

 

 

Ministrja e Shëndetësisë vizitoi Dobërçanin

 

Gjilan, 29 prill 2004 - Ministrja e Shëndetësisë Resmie Mumcu me bashkepunetore vizitoi fshatin Doberçan, të komunës së Gjilanit, i banuar me turq dhe shqiptarë.

Ministrja Mumcu me bashkëpunëtorët vizitoi edhe ambulancen e fshatit dhe u takua me udhëheqësit lokalë dhe intelektualët e kësaj ane.

Ministrja u interesua per gjendjen në fshat, kushtet e shkollimit dhe hallet që i preokupojnë banoret e kesaj ane.
Gjatë kësaj vizite Ministrja shfaqi interesimin e veçantë për shëndetin dhe gjendjen e përkujdesjes shëndetesore në këtë mjedis, me nacionalitete te ndryshme.

Mepastaj, Ministrja me bashkepunetore vizitoi edhe shkollen e fshatit "Nazim Hikmet", ku mësojnë nxënës të nacionaliteteve të ndryshme në harmoni të plotë.

Ministrja premtoi se do të shikoje të gjitha mundësitë që shëndetësia dhe sektorët e rëndesishem të jetës në këtëe fshat të ndihmohen dhe perparohen.

 

 

Ministria e Arsimit e Kosovës fillon bashkëpunimin me Institutin për Arsim të Universitetit të Londrës

 

Prishtinë, 29 prill 2004 - Në Prishtinë sot përfundoi seminari dyditor lidhur me temën: "Përvojat në zhvillimin e planprogrameve dhe standardeve".

Seminarin e organizoi Ministria e Arsimit, e Shkencës dhe e Teknologjisë. Në këtë seminar ligjëratën me titull" Vendosja e standardeve të përmbajtjes dhe të arritshmërisë" e mbajti z. Isuf Zeneli, Sekretar i Përhershëm i MASHT.

 

Ndërkaq, z. Euan Rid, ekpert i Institutit për Arsim pranë Universitetit të Londrës ligjëroi temat: "Përgatitja e planprogrameve të reja - përvojat nga vendet e tjera", "Disenjimi i planprogrameve në Angli".

Qëndrimi i z.Euan Rid në Prishtinë shënon fillimin e bashkëpunimit të MASHT me Institutin e Arsimit nga Londra.

Përkitazi me çështjet e zhvillimit të planprogrameve dhe standardeve, MASHT është duke bashkëpunuar edhe me ekspertë nga Shqipëria si dhe nga Fakulteti i Edukimit të Lubjanës.

 

 

KFOR-i i ka shtuar masat e sigurisë në brezin kufitar

 

Dardanë, 29 prill 2004 - Në një mbledhje të Bordit të Drejtorëve të komunës së Dardanës u trajtuan disa çështje që janë me interes për qytetarët.

Drejtori i drejtorisë së administrates lokale, Enver Ajvazi paraqiti problemin e sigurisë së objektit të administratës komunale, duke i përkujtuar përpjekjet e shpeshta të hajnave për ta vjedhur arkën e komunës. Lidhur me këtë çështje, u propozua që të rregullohet urgjentisht sistemi i alarmit. Kështu kjo çështje nxiti debatin e sigurisë së përgjthshme në komunë sidomos në fshatrat e brezit kufitar.

Ndërkaq lidhur me rastin në Karaçevë njoftoi majori Wilson, i cili tha se koloneli Xhonson ka pasur takime me përfaqësuesit ushtarak serbë dhe se po hetohet sjellja e forcave të tyre.

 

Më pastaj ai theksoi se, në shtëpinë e Muharrem Bërnjashit që ndodhet shumë afër me shtëpinë e kryetarit të KK Shaip Surdulli, është gjetur një plumb, kurse hetimet janë duke u vazhduar. Gjithashtu ai theksoi se KFOR-i amerikan i ka shtuar masat e sigurisë duke qenë më i pranishëm në atë zonë.

 

 

Kryetare e Forumit të Gruas së LDK-së në Dardanë u zgjodh Fahrije Kryeziu

 

Dardanë, 29 prill 2004 - Në Dardanë u mbajt Kuvendi i katërt zgjedhor i Forumit të Gruas të Degës së LDK-së. Karakteristikë e këtij kuvendi qe pjesëmarrja masive e delegateve, ku morën pjesë 78 veta si dhe mbizotrimi klimës së tolerancës e të respektit të ndërsjellë.

Kryetarja e deritashme e këtij forumi Nexhmije Kallaba theksoi se pjesëmarrja e grave dhe struktura profilesh të ndryshme e delegateve, është dëshmia më e mirë për vlerat e LDK-së.

Në këtë kuvend me vota të fshehta u zgjodh kryesia prej 11 anëtaresh. Kryetare e Forumit të Gruas të Degës së LDK-së në Dardanë u zgjodh Fahrije Kryeziu, profesoreshë e gjuhës dhe e letërsisë shqipe, nënkryetare Minivere Maka, kurse sekretare, Nafije Ajvazi. Kryetarja e sapozgjedhur u falenderua për besimin e dhënë, e cila kërkoi bashkëpunim prej të gjthave me qëllim të arritjes së rezultateve më të mira.

 

 

UNMIK-u ua ka dorëzuar autoriteteve maqedonase Avdyl Jakupin dhe Xhemajl Hysenin

 

Shkup, 29 prill 2004 - UNMIK-u sot ua ka dorëzuar autoriteteve maqedonase Avdyl Jakupin të quajtur "Çakalla" dhe Xhemajl Hysenin të quajtur Xhemi Shea, të cilët nga gjyqësia maqedonase janë dënuar me nga shtatë vjet burgim, siç thuhet "për sulme terroriste" në Kumanovë.

 

Jakupi dhe Xhemajli në dhjetor të vitit të kaluar u janë dorëzuar vullnetarisht pjesëtarëve të KFOR-it dhe ndodheshin në paraburgim në kampin amerikan Bondstill.

UNMIK-u këta të dy i ka dorëzuar me kërkesë të autoriteteve të Shkupit.

 

 

Sami Lushtaku nuk është arrestuar me urdhër të Tribunalit të Hagës

 

Hagë, 29 prill 2004 - Një nga komandantët e ish-UÇK-së Sami Lushtaku i arrestuar dje nga forcat paqeruajtëse në Kosovë nuk është arrestuar me urdhër të Tribunalit të Hagës, ka deklaruar në Hagë një këshilltar i kryeprokurores Karla del Ponte.

 

Ai megjithatë tha se hetimet në Kosovë po vazhdojnë dhe ka bërë me dije se puna e Tribunalit do të përfundojë deri në fund të këtij viti dhe në këtë aspekt do të ketë edhe aktakuza të reja.

 

 

Cërvenkovski fiton raundin e dytë të zgjedhjeve presidenciale në Maqedoni

 

Shkup, 29 prill 2004 - Në Maqedoni, Komisioni Shtetror i Zgjedhjeve shpalli kryeministrin Branko Cërvenkovski të Partisë Social Demokrate fitues të raundit të dytë të zgjedhjeve presidenciale, që u zhvillua dje.
Pas numërimit të gati të gjitha votave, komisioni shtetror i zgjedhjeve njoftoi se zoti Cërvenkovski fitoi dje 63 përqind të votave. Udhëheqësi i opozitës, Sashko Kedev, fitoi 37 përqind.

Në raundin e dytë të zgjedhjeve morën 53 përqind e elektoratit, duke kaluar 50 përqindëshin e domosdoshëm për ta shpallur rezultatin të vlefshëm. Partia e zotit Kedev është ankuar tashmë për manipulim të zgjedhjeve.
Cërvenkovski do të zëvëndësojë presidentin e ndjerë Boris Trajkovski, i cili humbi jetën si pasojë e rrëzimit të aeroplanit me të cilin ai po udhëtonte.

 

 

VMRO-DPMN ka bërë thirrje që zgjedhjet presidenciale në Maqedoni të shpallen të pavlefshme

 

Shkup, 29 prill 2004 - Vetëm disa minuta para përfundimit të procesit zgjedhor në zgjedhjet e djeshme për presidentin e Maqedonisë, kryetari i Partisë opozitare VMRO-DPMN, Nikolla Gruevski i ka bërë thirrje Komisionit Shtetëror të Zgjedhjeve që ato të shpallen të pavlefshme, siç thuhet për shkak të falsifikimeve të mëdha.

 

Komisoni Shtetëror i Zgjedhjeve ka vlerësuar se zgjedhjet janë zhvilluar në një atmosferë të qetë me disa incdente të izoluara, në njërin prej të cilëve siç thuhet ishin përfshirë zyrtarë të lartë të PDSH-së, gjë që nuk pranohet nga kjo parti.

Ndërkohë Ministria e Rendit të Maqedonisë ka bërë të ditur se në vendvotimin në fshatin Siliçan të Tetovës me dy vetura kamë arritur persona Rafet Elmazi, Ruzhdi Matoshi, deputet në Parlamentin republikan, Enaf Fejzullahu dhe Afrim Ramadani, të cilët ua kanë drejtuar revolen Këshillit votues dhe kanë thyer kutinë e votimeve me ç'rast përkohësisht ishte ndërprerë procesi i votimit, ka deklaruar zëdhënësja e kësaj ministrie Mirjana Kontevska.

Ndërkaq zyrtarë të LSDM-së shprehen të habitur me komentet e drejtuesve të VMRO-DPMN-së. Sipas kësaj partie 99 për qind të vendvotimeve zgjedhjet kanë qenë të drejta dhe të lira.

 

 

Gjatë majit në Prishtinë do të organizohet për herë të gjashtë panairi i librit "Prishtina 2004"

 

Prishtinë, 29 prill 2004 - Nga data 24 deri më 28 maj në Prishtinë do të organizohet për herë të gjashtë panairi i librit "Prishtina 2004", bën të ditur Shoqata e Botuesve të Kosovës.

Panairi mbahet në ambientet e Pallatit të Rinisë dhe Sportit të qytetit të Prishtinës, ku pritet të marrin pjesë mbi 100 botues nga të gjitha hapësirat shqiptare, por edhe nga botues të rajonit si Maqedonia, Mali i Zi dhe diaspora.
Sipas organizatorit, është ky një panair i cili bashkon trinomin magjik: botues - autor - lexues, edhe pse librin e bëjnë edhe përkthyesit, përpiluesit, redaktuesit, tipografët të cilët nuk i kanë munguar asnjëherë këtij panairit.

Për të pasur një rrjedhë sa më spektakulare janë paraparë edhe një sërë veprimtarish, mbi 50, si promovime, debate, paraqitje librash, nënshkrime librash nëpër stendat tejet tërheqëse të shumë botuesve, të cilët në një mënyrë edhe kanë detyrim që t'i bëjnë ditët e panairit sa më të pëlqyeshme, sa më të suksesshme.

Brenda dy panaireve janë botuar vepra kapitale që nga kompletet, botimesh më të ndryshme shkencore, fjalorë, metoda mësimi gjuhësh të huaja, përkthime letrare, autorësh nga tradita dhe bashkëkohorë, letërsi artistike shqiptare, literaturë shkollore, etj.

 

 

Në Bagdad janë vrarë 8 ushtarë amerikanë

 

Bagdad, 29 prill 2004 - Tetë ushtarë amerikanë janë vrarë sot (e enjte) kur një makinë bombë ka shpërthyer në paralagjen jugore Mahmudija të Bagdadit, ka bërë të ditur zëdhënësi ushtrarak amerikan, njofton Rojter.

 

Ky incident ka ndodhur pas një incidenti tjetër, që ndodhi po sot kur një ushtar tjetër amerikan është qëlluar për vdekje nga një predhë raketore gjatë patrullimit në pjesën lindore të Bagdadit, ka thënë zëdhënësi ushtarak.

Po në këtë njoftim bëhet ditur se edhe një ushtar tjetër amerikan është vrarë po sot, kurse një tjetër është plagosur, kur një minë tokësore skaj rrugës ka shpërthyer afër një autokolone në qytetin Bakuba, 24 mila nga Bagdadi.

Vrasja e këtyre ushtarëve ngre në 126 numrin e përgjithshëm të ushtarëve amerikanë të vrarë në aksion gjatë këtij muaji, që ishtë ndër më të përgjakshmit për forcat amerikanë në Irak.

 

 

SHBA-të ua kanë tërhequr vërejtjen qytetarëve të vet që të mos udhëtojnë në Izrael

 

Uashington, 29 prill 2004 - Shtetet e Bashkuara ua kanë tërhequr vërejtjen qytetarëve të vet që të mos udhëtojnë në Izrael dhe të lëshojnë menjëherë Rripin e Gazës, njofton BBCWorld. Në deklatratën e Departmentit të Shtetit thuhet se grupi militant islamik Hamas ka bërë kërcënim kundër interesave amerikane.

 

 

Një gjykatë ruse ka dënuar me burg të përjetshëm një çeçen

 

Moskë, 29 prill 2004 Një çeçen është dënuar me burg të përjetshëm për rolin e tij në rrëzimin e një helikopteri transportues Mi26, njofton BBCWorld. Në këtë incident patën humbur jetën 127 njerëz dhe ka qenë përshkruar si fatkeqësia më katastrofale në historinë ushtarake ruse. Të riun 27-vjeçar Doku Dzhantemirov, një gjykatë ruse e ka shpallur "fajtor për planifikimin dhe kryerjen e këtij akti terrori". Katër të dyshimtë të tjerë të përzier në këtë indcident ende gjenden ende në arrati.

 

 

Në Shri Lanka janë vrarë 2 persona

 

Shri Lanka, 29 prill 2004 Policia ka hapur zjarr në pjesën qendrore të Shri Lankës me qëllim të shuarjes së revoltës së shpërthyer nga tensionet ndërmjet tamilëve lokalë dhe komunitetit sinhalez, njofton BBCWorld. Të pakten dy persona janë vrarë, por nuk është e qartë nga kush.

 

 

Në Irak janë vrarë 3 ushtarë të koalicionit amerikan

 

Bagdad, 29 prill 2004 - Tre ushtarë të forcave të koalicionit amerikan në Irak janë vrarë dje, ka bërë të ditur zëdhënësi ushtarak amerikan, njofton Rojter. Njëri ushtar ka vdekur në vend gjatë sulmit afër Svairahut, në jug të Bagdadit, kurse ushtari tjetër ka vdekur më vonë nga plagët e marra gjatë aksionit.

 

Po kështu, edhe ushtari i tretë ka vdekur në Irakun verior nga plagët e marra më heret. Për asnjërin nga ushtarët e vrarë nuk është treguar nacionaliteti.

 

 

Nga përplasja e një buldozeri me një autobus në Kolumbi kanë humbur jetën 21 fëmijë dhe 2 të rritur

 

Bogota, 29 prill 2004 - Të pakten 21 fëmijë dhe dy të rritur kanë humbur jetën kur një buldozer është përplasur në autobusin e tyre në kryeqytetin kolumbian Bogota, njofton BBCneës.

 

Fatkeqësia ka ndodhur kur buldozeri, që punonte në hapjen e një rruge mbi një kodër, ka rrëshqitur dhe është përplasur përposhtë në autostradë, ku ndodhej autobusi me nxënës shkolle, ka thënë departmenti i shëndetësisë në Bogota. Zyrtarët thonë se 36 fëmijë të tjerë janë lënduar, disa syresh rëndë.

 

 

Sulme tokësore dhe ajrore në Falluxha

 

Falluxha, 29 prill 2004 - Marinsat amerikanë ndërmorën një seri tjetër sulmesh tokësore dhe ajrore kundër kryengritësve në qytetin e Falluxhas.

Luftimet më të fundit shpërthyen dje vonë dhe shirita video nga qyteti tregonin shtëllunga të dendura tymi, që ngriheshin nga disa zona.

Megjithë natën e dytë me radhë të sulmeve, gjenerali amerikan Mark Kimmitt tha se marinsat janë ende të angazhuar në armëpushimin e brishtë, që filluan të respektonin në qytetin me popullsi kryesisht suni dhe po përgjigjen vetëm kur sulmohen. Ai tha se forcat amerikane ende mendojnë se gjendja e krijuar mund të zgjidhet nëpërmjet bisedimeve.

 

 

Bush dhe Çejni u përgjigjen sot pyetjeve të komisionit që po heton sulmet e 11 shtatorit

 

Uashington, 29 prill 2004 - Presidenti Bush dhe nënpresidenti Dik Çejni do t'u përgjigjen sot pyetjeve të 10 anëtarëve të komisionit që po heton sulmet terroriste të 11 shtatorit 2001 kundër Shteteve të Bashkuara. Seanca do të zhvillohet me dyer të mbyllura në Shtëpinë e Bardhë.

Presidenti tha se mezi pret të bisedojë me anëtarët e komisionit. "Ky takim do të jetë një mundësi e mirë për anëtarët e komisionit për t=i ndihmuar që të shkruajnë një raport, i cili shpresoj të ndihmojë presidentët e ardhshëm që të parandalojnë kërcënimet terroriste ndaj vendit tonë", tha Bush.

 

 

"Washington Post": Koreja e Veriut mund të ketë 8 armë bërthamore

 

Uashington, 29 prill 2004 - Gazeta "Washington Post" njoftonte në numrin e saj të sotëm se zyrtarët amerikanë besojnë tani se Koreja e Veriut mund të ketë deri në 8 armë bërthamore në arsenalin e saj.

Gazeta shkruan se ky vlerësim i ri i arsenalit bërthamor të Koresë së Veriut erdhi si rezultat i informacioneve të reja të zbulimit. Informacionet e mëparshme të zbulimit amerikan bënin të ditur se Pheniani kishte material të mjaftueshëm për dy paisje bërthamore.

Zyrtarët amerikanë të cituar nga "Washington Posti" thonë se mes të dhënave të reja janë një analizë e nënprodukteve të plutoniumit të gjetura në veshjet e anëtarëve të një delegacioni privat amerikan që ishte lejuar të vizitonte objektet bërthamore koreanoveriore para disa muajsh.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |