Gjermani: FORUMI GJERMANO-KOSOVAR, KUNDERSHTON TRAJTIMIN E SHQIPTAREVE SI SHTETAS TE ”UNIONIT SERBI-MALI I ZI”

28 prill 2004 / TN

Shkruan: Sheradin BERISHA

Ka më shumë se një vit e gjysmë, që kur se qytetarët e Kosovës të cilët jetojnë dhe punojnë në Gjermani, përballen me problemin e mospranimit të dokumenteve të udhëtimit nga autoritetet gjermane, të lëshuara nga administrata e UNMIK-ut në Kosovë.

Ashtu sikur shumë shtete të Bashkësisë Evropiane edhe Gjermania si anëtare e saj, fillimisht e ka pranuar këtë dokument udhëtimi, mirëpo për çudi pas formimit të shtetit ”Unioni Serbi-Mali i Zi”, autoritetet lokale të disa landeve gjermane, këtë dokument e konsiderojnë si të pa vlerë. Dhe për më tepër bashkëatdhetarët tanë i detyrojnë, që të shkojnë nëpër konsullatat e këtij ”unioni” për t´u paisur me pasaporta! Madje në këtë kontekst,për t´i ”legjitimuar” veprimet e tilla,organet përkatëse gjermane në të gjitha dokumentet e lëshuara,qytetarët e Kosovës i trajtojnë edhe si shtetas të ”Unionit Serbi-Mali i Zi”!

Në qershor të vitit 2003 Shoqata Shqiptare”Iniciativa Qytetare”përmes një Peticioni të nënshkruar nga 18 mijë bashkëatdhetarë tanë,që iu dërgua bundestagut gjerman, e kishte kundërshtruar këtë qëndrim arbitrar të autoriteteve gjermane. Me këtë problem mjaftë serioz, (sidomos për shqiptarët) ka disa muaj që merret edhe “Forumi Gjermano-Kosovarë” që vepron në landin e Baden Württembergut.

Ky forum, i cili drejtohet nga miqtë e njohur shqiptarë, si:znj. Sigrid Godbillon, z.Johannes Flothow, znj.Ursula Kubin...dhe veprimtarët Brahim Halimi, Sylë Hasani, Bujar Zogjani etj, në vitet 1996-2001 aktivitetin e vet e ka zhvilluar me emrin ”Landesarbeitsgemeinschaft / LAG-Kosova” dhe aty qenë inkuadruar organizatat-joqeveritare: Diakonische-Werk, AK-Asyl, Caritas, Amnesty-international, Flüchtlinge und Wir dhe Shoqata Shqiptare “Isa Boletini”.Tani tri vjet pas luftës FGJK-ja zhvillon një aktivitet të larmishëm:kulturor,arsimor - shkencor,informativ etj

Drejtuesit e Forumit Gjermano-Kosovar, duke i njohur mirë rrethanat aktuale në Kosovë si dhe aspiratën e popullit shqiptar për Pavarësi,trajtimin e kosovarëve nga organet gjermane si shtetas të”Unionit Serbi-Mali i Zi” e konsiderojnë të padrejtë dhe të dëmshëm për procesin e ardhshëm politik të këtij vendi. Në vazhdën e aktiviteteve të veta, FGJK-ja ka zhvilluar disa takime me autoritetet lokale gjermane dhe janë shqyrtuar problemet e qytetarëve të Kosovës lidhur me dokumentat e udhëtimit dhe trajtimin e tyre si shtetas të Unionit”Serbi Mali i Zi”. Përveç tjerash FGJK-ja u ka dërguar letra protestuese Ministrisë së Jashtme dhe asaj të Brendshme të Gjermanisë,ku ka kërkuar sqarime për këto çështje.

Dhe qëndrimi i tyre është se:”Autoritetet e landeve dhe ato komunale kanë të drejtë të vendosin vetë rreth rasteve të tilla”duke saktësuar se”kjo e drejtë është e mbështetur në dispozitat juridike,që rregullojnë veprimtarinë administrative të shtetit gjerman”!

Për rrjedhim,FGJK-ja këto ditë e ka shtuar aktivitetin e vetë dhe në një nga takimet e rregullta me anëtarësinë, ka konstatuar me të drejtë se ekziston një fushatë diplomatike e Serbisë,që qytetarët e Kosovës, kudo që janë në Evropë e gjetiu, të trajtohen si shtetas të “Unionit...”, ndërkohë që kundër kësaj fushate ndjellakeqe, s´ka pasur kurrfarë reagimesh nga institucionet vendore të Kosovës.Në këtë kontekst,FGJK-ja kërkon nga Qeveria e Kosovës dhe institucionet tjera,që të merren seriozisht me problemet e qytetarëve të saj jashtë vendit.

Poashtu FGJK-ja apelon dhe kërkon me ngulmë nga bashkëatdhetarët tanë në Gjermani,që të mos shkojnë nëpër konzullatat serbe, në mënyrë që t´i refuzojnë pasaportat dhe shtetësinë e “Unionit Serbi-Mali i Zi”, sepse vetëm kështu do të dëshmohet pjekuria dhe vendosmëria e tyre për Pavarësinë e Kosovës. Në të kundërtën do të identifikohen si shtetas të këtij “unioni”...FGJK-ja për zgjidhjen e këtyre problemeve, shtron edhe mundësinë e organizimit të protestave nëpër disa qytete gjermane, andaj ftohen të gjitha subjektet shqiptare që veprojnë në Gjermani për një bashkëpunim më cilësor.Kontaktet me FGJK-në mund të vihen përmes postave elektronike:
- sigrid@godbillon.de;
- braha001@hotmail.com dhe
- syhas@t-online.de/.