Përmbajtja:

• Presidenti Rugova u takua në Nju Jork me Sekretarin e përgjithshëm të OKB-së, Kofi Anan

• Presidenti Rugova vizitoi Shtëpinë muze të presidentit të dikurshëm amerikan, Franklin Ruzvelt

• Presidenti Rugova sot viziton Bashkinë e qytetit të Nju Jorkut dhe takohet me 20 ambasadorë të OKB-së

• Projektrezoluta e Këshillit të Evropës për Kosovën nesër do të debatohet në Strasburg

• Sot në mëngjes në Skënderaj është arrestuar Sami Lushtaku, ish-komandant i UÇK-së

• Një delegacion i AKK-së merr pjesë në Kongresin inaugurues të qyteteve dhe qeverive lokale të bashkuara

• Urdhëresë e Bordit të drejtorëve të Qeverisë Komunale të Prishtinës për festën e 1 Majit

• Kroacia është pjesë e përpjekjeve të komunitetit ndërkombëtar për të krijuar një ambient të qëndrueshëm në Kosovë

• Prokurori ndërkombëtar ka kompletuar hetimet rreth mbytjes së fëmijëve në lumin Ibër

• Afër Prishtinës dyshohet për një varrezë masive

• Holkeri thotë se bazë për fillimin e decentralizimit të Kosovës është propozimi i Këshillit të Evropës

• Një delegacion i qytetit të Fierit po qëndron për vizitë disaditëshe në komunën e Mitrovicës

• Ministria e Shëndetësisë ndërpren pranimin e kërkesave të reja për trajtim jashtë vendit

• Komisioni Parlamentar për të drejtat dhe interesat e komuniteteve vizitoi Kuvendin Komunal të Prishtinës

• Deputetët i thanë po standardeve, por kërkojnë kalimin e kompetencave në institucionet vendore

• Policia thotë se deklarata e fëmijës që mbijetoi tragjedinë në lumin Ibër është e paqëndrueshme

• Sipas KFOR-it, Lushtaku dyshohet të jetë i përfshirë në ngjarjet e marsit dhe në keqtrajtimin e civilëve shqiptarë

• Ministria e Arsimit: më 30 prill nuk punohet, punohet më 3 maj

• Nesër Prishtinës organizohet një akademi përkujtimore për aktoren Katarina Josipi, në 34-vjetorin e vdekjes

• AKM-në përkohësisht do ta udhëheqin një vendor dhe një ndërkombëtar

• Me një akademi përkujtimore në Gjermani u shënua trevjetori i vrasjes së Ismet Rracit

• Partitë që nuk publikojnë financimet do të paditen në gjykatë

• Sot në Maqedoni po zhviilohet procesi zgjedhor

• Policia italiane ndaloi një shqiptar me drogë

• Nga një shpërthim i një xhipi-bombë janë plagosur 4 ushtarë izraelitë

• Policia izraelite ka arrestuar një zyrtar të lartë palestinez

• Në luftimet Tajlandë janë vrarë të pakten 127 njerëz

• Forcat amerikane kanë vrarë 64 kryengritës në Naxhaf

• Presidenti qipriot sulmoi ashpër Shtetet e Bashkuara

• Kërkohet të bëhen publike të dhënat e punës së nënpresidentit Çejni mbi një strategji kombëtare të energjisë

• Bler zbraps kritikat për emigracionin

• Në një aksident ajror të një helikopteri amerikan kanë humbur jetën 3 ushtarë

• Në luftimet në Tajlandë janë vrarë 85 njerëz

• Janë vrarë 2 persona të armatosur gjatë një sulmi në kuartin diplomatik të Damaskut

• Autoritetet siriane kanë zbuluar një depo të fshehtë armësh dhe mjetesh shpërthyese

• Në një sulm me granatë në Kashmir janë vrarë 3 persona

Presidenti Rugova u takua në Nju Jork me Sekretarin e përgjithshëm të OKB-së, Kofi Anan

 

Nju Jork, 28 prill 2004 - Presidenti i Kosovës Ibrahim Rugova, në selinë e OKB-së në Nju Jork, u takua me sekretarin e përgjithshëm të Kombeve të Bashkuara, Kofi Anan, me të cilin bisedoi për situatën aktuale në Kosovë pas trazirave të marsit, si dhe për raportet ndërmjet UNMIK-ut dhe institucioneve të Kosovës.

 

Në këtë takim është biseduar edhe për transferin e kompetencave nga UNMIK-u tek institucionet vendore, për procesin e privatizimit, për vlerësimin e standardeve etj.

Presidenti Rugova pas takimit tha se kishte pasur një bisedë shumë miqësore me sekretarin e përgjithshëm, zotin Kofi Anan, me të cilin kanë diskutuar për shumë çështje aktuale në Kosovë. "E njoftova z. Anan që situata ka filluar të normalizohet, për masat që kanë marrë institucionet për normalizimin e gjendjes pas ngjarjeve të marsit, si dhe për progresin e arritur gjatë pesë vjetëve të kaluara", tha zoti Rugova.

Presidenti theksoi se një nga temat e takimi ishte edhe bartja e kompetencave sa më të mëdha nga ana e UNMIK-ut tek institucionet e Kosovës, duke shtuar se ka kërkuar nga zoti Anan që sa më parë të fillojnë bisedimet për çështjen e standardeve dhe për vlerësimin e tyre.

 

Presidenti tha poashtu se nga z. Anan kishte insistuar për njohjen sa më parë të pavarësisë së Kosovës dhe theksoi se në këtë drejtim ka hasur në mirëkuptim, por, siç tha, duhet të punohet në këtë aspekt.

"Njohja e pavarësisë së Kosovës do ta stabilizonte Kosovën, Shqipërinë, Maqedoninë, Malin e Zi dhe mbarë rajonin e Evropës Juglindore. Kosova e pavarur e inkuadruar në Bashkësinë Evropiane, në NATO dhe në miqësi të përhershme me Amerikën është zgjidhja më e mirë për rajonin", deklaroi Presidenti Rugova.

Në fund të deklaratës para mediave, Presidenti Rugova falenderoi përzemërsisht z. Anan për angazhimin e tij personal rreth zgjidhjes së problemit të Kosovës.

Ky ishte takimi i katërt i Presidentit Rugova me sekretarin e përgjithshëm të OKB-së, Kofi Anan, që nga viti 1998.

 

 

Presidenti Rugova vizitoi Shtëpinë muze të presidentit të dikurshëm amerikan, Franklin Ruzvelt

 

Nju Jork, 28 prill 2004 - Presidenti Rugova gjatë qëndrimit në Nju Jork, vizitoi Shtëpinë muze të presidentit të dikurshëm amerikan, Franklin Ruzvellt, njeriut që ka sjellë amandamentin e Kartës së Atlantikut për vetëvendosjen e popujve, ku u nënshkrua në librin e këtij muzeu.

Një porosi e shkruar në gjuhën shqipe, e nënshkruar nga Presidenti Rugova, gjendet në mesin e porosive të 100 personaliteteve të shquara botërore, në librin e kujtimeve, në bibliotekën e Presidentit Ruzvellt.

Bashkëpunëtorët që e shoqërojnë Presidentin Rugova në këtë vizitë, e kanë vlerësuar shumë të suksesshëm dhe shpresëdhënës takimin e djeshëm me sekretarin e përgjithshëm të Kombeve të Bashkuara, Kofi Anan. Ata kanë thënë se në takim është vlerësuar se shumë shpejt duhet të fillojë vlerësimi i plotësimit të standardeve, pa i lënë anash statusin final të Kosovës.

 

 

Presidenti Rugova sot viziton Bashkinë e qytetit të Nju Jorkut dhe takohet me 20 ambasadorë të OKB-së

 

Nju Jork, 28 prill 2004 - Presidenti Rugova gjatë ditës së sotme (e mërkurë) do të vizitojë Bashkinë e qytetit të Nju Jorkut, ku do të takohet me përfaqësues të qytetit, ndërsa në mbrëmje do të ketë një takim me 20 ambasadorë të shteteve të ndryshme në Kombet e Bashkuara.

Ndërkaq, të enjtën e të premtën, Presidenti Rugova do të vizitojë Uashingtonin, ku do të ketë takime në Deparmentin e Shtetit dhe në Shtëpinë e Bardhë.

 

 

Projektrezoluta e Këshillit të Evropës për Kosovën nesër do të debatohet në Strasburg

 

Strasbugr, 28 prill 2004 - Në projektrezolutën e përgatitur nga Asambleja Parlamentare e Këshillit të Evropës konstatohet se shpërthimi i dhunës etnike në mars 2004 ilustron se Kosova ka ende rrugë të gjatë përpara derisa të bëhet territor multietnik dhe demokratik.

 

Ngjarjet e marsit karakterizohen si një `kthim tragjik prapa në procesin e pajtimitA të pesë viteve të fundit midis shumicës shqiptare dhe pakicës serbe, pajtim i cili mbetet jo i vërtetë. Mbi 4 mijë personat e zhvendosur me këtë rast e kanë kthyer prapa procesin e kthimit të të gjithë të zhvendosurve.

 

Asambleja i dënon me forcë nxitësit e ngjarjeve të fundit që solli 19 të vdekur, kërkon që ata të hetohen dhe të nxirret para gjyqeve të paanshme.

Përgjegjës kryesor për situatën e krijuar, sipas Këshillit të Evropës, është nacionalizmin etnik që vazhdon te komunitetet në Kosovë. Por edhe "bashkësia ndërkombëtare duhet fajësuar pjesërisht", sepse që prej rrëzimit të Milosheviqit më 1999, zhvillimeve dhe mungesës së progresit në Kosovë u është kushtuar vëmendje ndërkombëtare e pamjaftueshme, konstatohet në Strasburg.

 

UNMIK-ut Këshilli i Evropës i njeh përparime të konsiderueshme që prej marrjes së Kosovës nën kontroll, dhe këtu përmend edhe transferimin e një pjese të kompetencave tek Institucionet Provizore të Vetëqeverisjes.

Por projektrezoluta kërkon të lihen mënjanë iluzionet: progresi i dëshiruar nuk mund të arrihet, siç thuhet, "pa një plan të qartë dhe angazhim pa kushte të bashkësisë ndërkombëtare për t'i bërë me shpejtësi politikanët vendorë përgjegjës për të ardhmen e tyre politike".

Çelësin për arritjen e stabilitetit dhe për ta sjellë Kosovën më pranë Evropës, Këshilli i Evropës e sheh tek zbatimi i plotë i "Standarteve për Kosovën", të fiksuara nga KS i OKB-së në dhjetor 2003.

 

Pavarësisht nga statusi i ardhshëm i Kosovës, plani për implementimin e këtyre standarteve duhet mbështetur me veprime konkrete dhe progres të matshëm, për të shmangur kthimin e tij në artificial, kërkon Këshilli i Evropës.

Organizata e Strasburgut pranon se ngjarjet e fundit e kanë vështirësuar arritjen e konsensusit për strategjinë e decentralizimit në Kosovë. Por në dokument theksohet se megjithatë, reforma e vetëqeverisjes lokale dhe e administratës publike, në bazë të propozimeve të Këshillit të Evropës do të kontribuonte në forcimin e Institucioneve Provizore të Vetëqeverisjes.

Këshilli i Evropës i kërkon bashkësisë ndërkombëtare dhe vecanërisht shteteve të Bashkimit Evropian t=i rishikojnë prioritetet e tyre për Kosovën.

Asambleja kërkon nga UNMIK-u të gjejë shkaqet se pse ekstremistët vazhdojnë të luajnë një rol qendror në Kosovë dhe të marrë masa kundër tyre. Nga udhëheqësit politikë shqiptarë të Kosovës ajo kërkon të demonstrojnë angazhimin e sinqertë për mbrojtjen e minoriteteve dhe të ndërpresin mbështetjen aktive apo pasive për grupet ekstremiste.

Nga qeveria e Serbisë dhe e Malit të Zi ajo kërkon shkrirjen e të gjitha strukturave paralele që mbështet në Kosovë dhe bashkëpunim në planin e implementimit të standarteve, thuhet në një raport të "Dojçe veles" nga Strasburgu.

 

 

Sot në mëngjes në Skënderaj është arrestuar Sami Lushtaku, ish-komandant i UÇK-së

 

Skënderaj, 28 prill 2004 - Sot në orët e hershme të mëngjesit është arrestuar Sami Lushtaku, ish-komandant i UÇK-së në zonën e Drenicës. Jozyrtarisht mësohet se forca të mëdha të kombinuara të KFOR-it dhe policisë së UNMIK-ut, pasi kishin rrethuar shtëpinë e Sami Lushtakut, e kishin arrestuar atë.
Pas arrestimit një helikopter i KFOR-it qarkullon ende mbi lagjen ku ndodhet shtëpia e Sami Lushtakut në Skënderaj, e cila ende mbahet e rrethuar nga forcat e mëdha të KFOR-it.

 

 

Një delegacion i AKK-së merr pjesë në Kongresin inaugurues të qyteteve dhe qeverive lokale të

 

Prishtinë, 28 prill 2004 - Një delegacion i Asociacionit të Komunave të Kosovës (AKK), i kryesuar nga kryetari Lutfi Haziri do të marrë pjesë nga data 2 deri më 5 maj në Kongresin themelues të organizatës së re botërore të emërtuar "Qytetet dhe Qeveritë Lokale të Bashkuara" që do të mbahet në Paris, Francë.

Në këtë Kongres, bashkë me kryetarë të komunave dhe përfaqësues të shoqatave të qeverive lokale, nga të pesë kontinentet, do të paraqiten rreth 150 pjesëmarrës, si dhe përfaqësues nga Kombet e Bashkuara dhe agjenci të ndryshme ndërkombëtare, Banka Botërore, UNDP, Habitati, UNESCO-, dhe përfaqësues të shoqërisë civile.

Pjesëmarrësit do të shqyrtojnë një varg të gjerë çështjesh, duke përfshirë: rolin e qeverisë lokale në një botë që po globalizohet, varfërinë dhe përfshirjen shoqërore, zhvillimin ekonomik, mundësimin e shërbimeve themelore dhe atyre shëndetësore, menaxhimin e mjedisit, ringjalljen dhe thellimin e demokracisë lokale dhe të drejtat e njeriut.

 

 

Urdhëresë e Bordit të drejtorëve të Qeverisë Komunale të Prishtinës për festën e 1 Majit

 

Prishtinë, 28 prill 2004 - Bordi i drejtorëve të Qeverisë Komunale të Prishtinës përmes Kryeshefit Ekzekutiv në mbledhjen e mbajtur sot, lëshon këtë urdhëresë, në të cilën thuhet:

Ndalohet qarkullimi i të gjitha automjeteve përveç autobusëve të trafikut urban, automjeteve të SHPK-së, KFOR-it, UNMIK-ut dhe automjeteve emergjente gjatë festës së 1 Majit, përkatësisht më 30 prill dhe 1, 2 dhe 3 maj të këtij viti në drejtim të Parkut të Gërmisë.

Pika përfundimtare për lëvizjen e automjeteve (përveç banorëve të lagjes Normale, Sefali, Tauk Bashqe) do të jetë:

Kryqëzimi i rrugëve "1 Tetori", "Nazim Gafurri" dhe "Ymer Paçarizi".

Kryqëzimi i rrugëve "Nazim Gafurri", "Xhavit Ahmeti" dhe "Dr. Lec Gradica"

Kryqëzimi i rrugëve "Dr. Shpëtim Robaj" me atë të Sefalisë në drejtim të Pishinës dhe parkut "Gërmia".

Transporti publik i qytetarëve për në parkun "Gërmia" deri te Pishina, do të bëhet ekskluzivisht me autobusë të Kompanisë "Trafiku Urban".

 

 

Kroacia është pjesë e përpjekjeve të komunitetit ndërkombëtar për të krijuar një ambient të qëndrueshëm në Kosovë

 

Strazburg, 28 prill 2004 - "Ne mendojmë se dialogu ndërmjet Prishtinës dhe Beogradit është i nevojshëm për të sqaruar të ardhmen e Kosovës. Kroacia është pjesë e përpjekjeve të përbashkëta të komunitetit ndërkombëtar për të krijuar një ambient të qëndrueshëm". Kështu ka thënë përfaqësuesi i Kroacisë në Këshillin e Evropës në Srazburg.

Kroacia mendon se prania ndërkombëtare në Kosovë është edhe mëtutje e nevojshme për të arritur një zgjidhje për të ardhmen e Kosovës, ka thënë kryeministri i Kroacisë Ivo Sanader para Asamblesë Parlamentare të Këshillit të Evropës në Strazburg.

 

Ai ka shtuar se Kroacia ndjek me vëmendje dhe preokupim zhvillimet në Kosovë. Ai ka shtuar se vendi i tij ka dënuar trazirat e fundit në Kosovës dhe ka bashkëpunuar me komunitetin ndërkombëtar për të ndaluar shkallëzimin e mëtejshëm,ka thënë kryeministri i Kroacisë.

Kryeministri i Kroacisë, Ivo Sanader u shpreh se duhet të jetë e qartë se programi i politikës së Serbisë së Madhe nuk ka të ardhme. Të pranishmëve në këtë sesion të Asamblesë Parlamentare të Këshillit të Evropës u është riparaqitur letra e hapur që presidenti i Asamblesë Parlamentare të KE Peter Sherer ia ka drejtuar kryeministrit të Kosovës Bajram Rexhepit në lidhje me trazirat e marsit.

 

 

Prokurori ndërkombëtar ka kompletuar hetimet rreth mbytjes së fëmijëve në lumin Ibër

 

Prishtinë, 28 prill 2004 - Prokurori ndërkombëtar ka kompletuar hetimet rreth mbytjes së fëmijëve në lumin Ibër. Zëdhënësi i Departamentit për Polici dhe Drejtësi, Neraxh Sing thotë se raporti i hetimeve tash për tash nuk do të bëhet publik. Ai ka shtuar se për rezultatet e hetimeve për incidentin e 16 marsit së pari do të informohen familjarët e tre fëmijëve të mbytur.

Megjithatë në një raport të transmetuar nga Televizioni i Serbisë thuhet se RTS e ka siguruar raportin sekret me lëndën me numër 2004 DH 038. Në këtë raport thuhet se prokuroi ndërkombëtar në raportin e hetimeve përfundon se nuk ka fakte se serbët janë përgjegjës për mbytjen e fëmijëve në lumin Ibër.
Zëdhënësi Sing nuk është i sigurt nëse raporti i emituar në RTS është autentik.

 

 

Afër Prishtinës dyshohet për një varrezë masive

 

Prishtinë, 28 prill 2004 - Në fshatin Kishnicë afër Prishtinës janë gjetur eshtrat e së paku dy kufomave, të cilat menjëherë janë transferuar në njësitin për persona të zhdukur në kryeqytet.

Një njësit do të fillojë hetimet përreth vendit ku janë gjetur eshtrat. Një banor i këtij fshati, i cili i ka gjetur këto eshtra, dyshon se në atë vend ekziston një varrezë masive.

Në këtë vend thuhet se dy javë më herët barinjtë kanë gjetur eshtrat e një kufome tjetër. Sipas banorëve në këtë fshat të Prishtinës janë zhdukur dhjetë persona.

 

 

Holkeri thotë se bazë për fillimin e decentralizimit të Kosovës është propozimi i Këshillit të Evropës

 

Beograd, 28 prill 2004 - Kryeadministratori i Kosovës Hari Holkeri ka thënë se bazë e mirë për fillimin e punës rreth decentralizimit të Kosovës është propozimi i Këshillit të Evropës, i cili po punon në konceptin e realizimit të saj. Ai ka shtuar se UNMIK-u do të bëjë përpjekje maksimale për zbatimin e këtij koncepti, i cili do të jetë adekuat për të gjitha bashkësitë etnike në Kosovë.

Holkeri citohet të ketë thënë për një televizion serb se nuk e ka parë planin e kryeministrit të Serbisë, Vojisllav Koshtunica për kantonizimin e Kosovës, por ka theksuar se popullata e Kosovës këtë propozim po e sheh si mundësi që një pjesë e saj të ndahet nga territori i Kosovës dhe konsideron se ndaj këtij planki duhet pasur kujdes të madh.

Në lidhje me çështjen se kur do të vendoset për statusin final të Kosovës, Hari Holkeri ka thënë se Kosova sot është protektorat i Kombeve të Bashkuara dhe Këshilli i Sigurimit vendosë për këtë, kurse UNMIK-u është këtu për t'i ndërtuar institucionet demokratike.

 

 

Një delegacion i qytetit të Fierit po qëndron për vizitë disaditëshe në komunën e Mitrovicës

 

Mitrovicë, 28 prill 2004 - Zëvendëskryetari i Kuvendit të Komunës, Mursel Ibrahimi, me bashkëpunëtorë, priti një delegacion të qytetit të Fierit nga Shqipëria, që po qëndron për vizitë disaditëshe në komunën e Mitrovicës, kryesuar nga zëvendëskryetari i Bashkisë, Vilson Gjoni.

Ibrahimi i ka njoftuar ata shkurtimisht me historikun e qytetit të Mitrovicës, me gjendjen e përgjithshme aktuale në komunë, me mënyrën e funksionimit të pushtetit legjitim në pjesën jugore dhe pushtetit të UNMIK-ut në pjesën veriore të qytetit, si dhe me përpjekjet që po i bënë pushteti lokal për tejkalimin e problemeve të shumta me të cilat po ballafaqohen qytetarët e komunës.

Zëvendëskryetari Ibrahimi ka falenderuar Gjonin dhe qytetarët e Fierit, të cilët, ashtu sikur edhe mbarë qytetarët e Shqipërisë, kanë strehuar qytetarët e komunës së Mitrovicës gjatë luftës, kur ishin përndjekur nga forcat serbe.

Zëvendëskryetari i Bashkisë së Fierit, ka falenderuar për pritje vëllazërore dhe për respektin e treguar ndaj delegacionit nga Fieri, duke shprehur njëkohëisht kënqësinë që gjendet në qytetin e Mitrovicës dhe për ate që kanë parë gjatë vizitave të bëra.

Edhe zëvendëskryetari i Bashkisë së Fierit, i ka njoftuar nikoqirët me mënyrën e organizimit e të funksionimit të pushtetit dhe administratës në Bashkinë e tij.

Gjoni poashtu ka shprehur respekt për bashkëkombasit e tij nga Kosova dhe ka thënë se gjatë luftës në Kosovë, në Bashkinë e Fierit janë strehuar mbi 10.000 persona të përndjekur nga Kosova, në mesin e të cilëve, madje në shtëpinë e tij, ka patur edhe qytetarë nga Mitrovica.

Bashkëbiseduesit janë dakorduar për vazhdimin dhe thellimin e bashkëpunimit ndërmjet dy qyteteve.

 

 

Ministria e Shëndetësisë ndërpren pranimin e kërkesave të reja për trajtim jashtë vendit

 

Prishtinë, 28 prill 2004 - Ministria e Shëndetësisë njofton qytetarët se Zyra e programit për trajtim jashtë vendit pranë kësaj ministrie, ndërpren pranimin e kërkesave të reja për trajtim jashtë vendit.

Programit për trajtim jashtë vendit i mungojnë mjetet financiare andaj edhe nuk po mund të ekzekutohen vendimet e Bordit për trajtim jashtë vendit.

Ministria e Shëndetësisë është duke punuar që të sigurohen mjetet sa më parë që është e mundur për vazhdimin e Programit.

"Kërkojmë mirëkuptim dhe konsideratë nga qytetarët se jemi duke punuar maksimalisht në këtë drejtim, në favor të të gjithë atyre që kanë nevojë për trajtim jashtë vendit", theksohet në një njoftim dhe theksohet se për çdo risi në këtë drejtim, qytetarët do të njoftohen nëpërmjet mediave.

 

 

Komisioni Parlamentar për të drejtat dhe interesat e komuniteteve vizitoi Kuvendin Komunal të Prishtinës

 

Prishtinë, 28 prill 2004 - Komisioni për të drejtat dhe interesat e komuniteteve i Kuvendit të Kosovës, kryesuar nga z. Mahir Yagcilar, nënkryetar i parë i komisionit, vizitoi Kuvendin Komunal të Prishtinës, ku u pritën nga kryetari Ismet Beqiri dhe nënkryeshefi ekzekutiv, Arsim Janova.

 

Me këtë rast anëtarët e komisionit u njoftuan për gjendjen e komuniteteve në këtë komunë.Duke folur për strukturën e Kuvendit Komunal, Ismet Beqiri theksoi se në këtë Kuvend janë të përfshira të gjitha komunitetet. Pas ngjarjeve të marsit, vetëm komuniteti serb është ai që nuk po merr pjesë.

 

Në strukturën e organizimit është edhe Zyra e komuniteteve, që i ka lokalet në Graçanicë, ndërsa drejtori i kësaj zyre është në nivelin e njëjtë me drejtorët e drejtorateve komunale. Në administratën komunale janë të punësuar rreth 40 punëtorë serbë e të komuniteteve tjera. Në projektet e dedikuara për komunitete, gjithmonë, me qëllimin më të mire, iu është dhënë përparësi projekteve për pakica.

Mahir Yagcilar foli për rëndësinë që i kushtohet çështjes së komuniteteve. Të gjitha ligjet në procedurë të Kuvendit kalojnë edhe në këtë komision, me qëllim që të shikohet se a cenohen apo jo të drejtat dhe interesat e komuniteteve.

 

Sadudin Berisha theksoi se nga të gjitha vizitat që iu janë bërë komunave të Kosovës, vlerësimi i komisionit është se ekziston gatishmëria e shumicës shqiptare dhe minoriteteve tjera joserbe për integrimin e komunitetit serb.

 

 

Deputetët i thanë po standardeve, por kërkojnë kalimin e kompetencave në institucionet vendore

 

Prishtinë, 28 prill 2004 - Deputetët e Kuvendit të Kosovës në seancën e sotme të rregullt diskutuan mbi Standardet për Kosovën, ndërkohë që pritet të shqyrtohen edhe disa projektligje. Mirëpo nga rendi i ditës u hoq shqyrtimi i tri projektligjeve: shqyrtimi i dytë i Projektligjit për marrëveshjet financiare ndërkombëtare, i atij për kinematografi dhe shqyrtimi i parë i Projektligjit për Bjeshkët e Nemuna Park Nacional. Në fillim Grupi parlamentar i PDK-së ka dënuar dhe ka kundërshtuar arrestimin e Sami Lushtakut nga ana e KFOR-it.

Në fillim shefat e grupeve parlamentare i kanë hedhur një vështrim kritik programit standardet për Kosovën dhe kanë bërë vlerësimin e tyre për këto standarde të përcaktuara nga bashkësia ndërkombëtare.

"Zgjedhje të drejta demokratike, me përfaqësim proporcional që do të prodhojnë një përfaqësim efektiv në të gjitha institucionet e Kosovës, sundimi i ligjit, zbatimi i të drejtave të barabarta në jetën dhe në veprimtarinë e çdo qytetari, respektimni i të drejtave të njeriut, mosdiskriminimi, por edhe mosprivilegjimi i askujt, zhvillimi i ekonomisë së tregut me parakusht privatizimin, lëvizja e lirë e qytetarëve, garantimi i pronës individuale të çdokujt, ndërtimi i politikës dhe i qëllimeve politike përmes dialogut - të gjitha këto janë premisa të një shoqërie demokratike të cilën e synon Kosova dhe programi i LDK-së, bile edhe programi i të gjitha partive politike në parlament", tha në fillim të diskutimit të tij Sabri Hamiti, kryetar i Grupit parlamentar të LDK-së.

Të gjitha këto janë premisa për krjimin e një shoqërie, përkatësisht të një shteti demokratik, tha deputeti Hamiti, të cilave ai tha se u thotë po.

Sabri Hamiti në vazhdim shtroi pyetjen sesi të zbatohen këto stabdarde, meqë me këtë rast, siç tha, dalin disa probleme për të cilat duhet të debatohet në parlament për zbatimin e këtyre standardeve.
Ai përmendi çështjen e përgjegjësive për fushat që mbulojnë këto standarde, duke shtuar se shumicën e kompetencave të pushtetit i ka rezervuar në mënyrë dogmatike UNMIK-u.

 

Prandaj Hamiti kërkoi të bëhet ridefinimi i raporteve mes institucioneve të Kosovës dhe UNMIK-ut, në mënyrë që institucionet vendore të marrin kompetenca që të ndikojnë te këto standarde të zhvillohen me kohë, në mënyrë që këtë program ta bëjnë edhe të qytetarëve dhe të mos jetë vetëm program i deklaruar. Nëse nuk bëhet program i të gjithë qytetarëve të Kosovës vështirë realizohet, tha ai.

Sabri Hamiti në vazhdim theksoi se nuk ka nevojë që në tekste të tilla programore të krijohen implikime politike të ditës, sepse vetëm bëjnë dëm, tha ai.

Brenda hartimit të detyrave, ai tha se sheh edhe dy probleme shumë themelore që duhet të definohen në nivel të institucioneve para se të merren përgjegjësitë për zbatimin e tyre. Problemi numër një, tha ai, është i strukturave paralele dhe numër dy i të ashtuquajturit decentralizim, duke shtuar se këto janë dy probleme madhore dhe politike të cilat nuk mund të kalohen dhe të zgjidhen në hap e sipër.

"Pa shpërbërjen e strukturave paralele nuk mund të zbatohen katër standarde, të gjith ato që lidhen me integrimin e minoriteteve në jetën dhe në institucionet e Kosovës, më konkretisht me integrimin e serbëve, sepse të tjerët po integrohen në të gjitha nivelet", tha Hamiti.

Edhe pse nuk është standard përshkruhet një që quhet decentralizim, i cili nuk është elaboruar fare, tha ai. "LDK mendon se pa qendërsimin e pushtetit, pa efektizimin e pushtetit të Kosovës nuk mund të bëhet kurrfarë decentralizimi", nënvizoi Hamiti.

Ai në vazhdim theksoi problemin e ekonomisë, duke thënë sa pa i pasur përgjegjësitë për zhvillimin ekonomik, pa u zhbllokuar procesi i privatizimit, pa u prishur rendi i nivelit të qeverisjeve: UNMIK- Qeveria e Kosovës - AKM, nuk ka shansë të përparohet ekonomia.

Duke shprehur qëndrimin e LDK-së, deputeti Hamiti tha se qeveria nuk plotësohet me sub-zyre, apo subinstitucione. "Ne kërkojmë plotësimin e qeverisë me ministri", u shpreh ai. Në fund tha se Grupi parlamentar i LDK-së i përkrah standardet për Kosovën, si standarde për krijimin e një shoqërie demokratike dhe të një Kosove si shtet demokratik dhe të pavarur Arsim Bajrami, shef i Grupit të PDK-së tha se standardet për Kosovën janë një projekt nacional për pavarësinë e Kosovës.

 

"Këto standarde janë mbi nivelin e shteteve në transicion, por ne u japim mbështetje politike meqë mendojmë se ne nuk synojmë vetëm një Kosovë të pavarur, por edhe demokratike dhe euroatlantike", tha Bajrami. Ai shtoi se të gjitha institucionet e Kosovës duhet të japin maksimumin e tyre për arritjen e një progresi në plotësimin e këtyre standardeve dhe të gjitha institucionet veçmas parlamenti duhet të angazhohen për arritjen e këtyre stadardeve. Ai në vazhdim bëri disa vërejtje parimore ndaj standardeve.

Bajram Kosumi foli në këtë temë në emër të AAK-së, i cili bëri shumë vërejtje në këto standarde. Ndërkaq në emër të komuniteteve foli Gani Sadik.

 

 

Policia thotë se deklarata e fëmijës që mbijetoi tragjedinë në lumin Ibër është e paqëndrueshme

 

Prishtinë, 28 prill 2004 - Zëdhënësi i UNMIK-ut për Polici dhe Nerazh Sing bëri publik raportin e parë të hetimeve lidhur me tragjedinë në fshatin Çabër, ku në lumin Ibër u mbytën tre fëmijë. Policia thotë se deklarata e dhënë nga një fëmijë i mbijetuar është e paqëndrueshme.

Në raport thuhet se hetimet janë zhvilluar nga gjykatësi hetues i Gjykatë së Qarkut në Mitrovicë dhe Prokurori Ndërkombëtarë, Piter Tinsli, si dhe nga policia hetuese. Pas intervistimit të dëshmitarëve dhe fëmijës që mbijetoi tragjedinë, Fitim Veseli, se dy të rinj serbë së bashku me qenin e tyre i kanë detyruar fëmijët të futen në ujërat e Ibrit, ku edhe janë mbytur tre prej tyre, dhe hetimeve në vendin e ngjarjes, policia ka dalë me raportin e parë.

 

Në të thuhet se deklarata e dhënë nga i mbijetuari është e paqëndrueshme. Sipas raportit madje edhe deklaratat e dhëna më 17 dhe pastaj më 22 mars nga fëmija Fitim Veseli janë të ndryshme. Megjithatë, rreth kërij rasti do të hulumtohet edhe më tutje, duke pas parasysh se trupi i fëmijës së tretë ende nuk është gjetur.

Në lidhje me lajmin e publikuar në Radio televizionin e Serbisë për këtë raport, zyrtarët e UNMIK-ut nuk dhanë përgjigje sesi ky raport ka përfunduar në duart e Nebojsha Çoviqit, si dhe si ka arritur të plasohet në RTS.

 

 

Sipas KFOR-it, Lushtaku dyshohet të jetë i përfshirë në ngjarjet e marsit dhe në keqtrajtimin e civilëve shqiptarë

 

Prishtinë, 28 prill 2004 - Në lidhje me arrestimin e ish-komandantit të UÇK-së në rajonin e Drenicës, Sami Lushtaku, zëdhënësi i KFOR-it Xhim Moran ka deklaruar për media se arrestimi është kryer pa incidente. "Ne e arrestuam atë rreth orës 7 e 20 të mëngjesit.

 

Ai u arrestua me dyshimin se është i përzier në ngjarjet e 17 dhe 18 marsit dhe për keqtrajtime të civilëve shqiptarë si dhe për reketim të qytetarëve".

Sami Lushtaku ka qenë pjesëtar i TMK_së, por ishte suspenduar nga ana e UNMIK-ut.
Ndaj arrestimit të Sami Lushtakut ka reaguar edhe komandanti i TMK-së Agim Çeku, si dhe tri shoqatat e dala nga lufta, të cilat e kanë dënuar këtë akt.

 

 

Ministria e Arsimit: më 30 prill nuk punohet, punohet më 3 maj

 

Prishtinë, 28 prill 2004 - Ministria e Arsimit, e Shkencës dhe e Teknologjisë i njofton të gjitha institucionet edukativo-arsimore se është bërë ndërrim lidhur me ditën e pushimit për festën e 1 Majit. Në vend të ditës së pushimit për festën e 1 Majit, të parashikuar më 3 maj (e hënë), nuk do të punohet ditën e premte, më 30 prill 2004.

 

Nesër Prishtinës organizohet një akademi përkujtimore për aktoren Katarina Josipi, në 34-vjetorin e vdekjes

 

Prishtinë, 28 prill 2004 - Nesër mbrëma, më 29 prill, në orën 18:00, në Teatrin Kombëtar të Prishtinës, Drejtorati për Kulturë e Gjini i Kuvendit Komunal të Prishtinës organizon një akademi përkujtimore për aktoren e madhe shqiptare Katarina Josipi - Kati, në 35-vjetorin e vdekjes së saj, njofton Mustafë Halili, drejtor i Drejtoratit për Kulturë të KK të Prishtinës.

Në këtë akademi përkujtimore do të flitet për jetën dhe veprimtarinë e aktores Katarina Josipit, ndërsa SHKA "Katarina Josipi" nga Zymi i Hasit të Thatë, do t'i shfaqë "Ritet e kulaçit", "Këngë të grishtarit" etj.

 

 

AKM-në përkohësisht do ta udhëheqin një vendor dhe një ndërkombëtar

 

Prishtinë, 28 prill 2004 - Agjencinë Kosovare të Mirëbesimit (AKM) do ta udhëheqin Ahmet Shala dhe hungarezi Sabol Sekerez deri sa të emërohet drejtori i ri i saj, i cili do të zgjidhet me anë të konkursit, ka thënë zëdhënësja e Shtyllës së Katërt të UNMIK-ut, Monik Degrut.

 

Por ekspertët ekonomikë thonë që procesi i privatizimit të ecë përpara nuk mjafton vetëm ndërrimi i kreut të AKM-së, por duhet bërë një transformim të tërë udhëheqjes së kësaj angjencie dhe i Shtyllës së Katërt të UNMIK-ut.

Por zëdhënësja e Shtyllës së Katërt të UNMIK-ut thekson se privatiziki është çështje urgjente që duhet të lëvizë përpara.

 

 

Me një akademi përkujtimore në Gjermani u shënua trevjetori i vrasjes së Ismet Rracit

 

Frankfurt, 28 prill 2004 - Në Ofenbah të Gjermanisë, organizuar nga qytetarët klinas që jetojnë këtu dhe nëndegës së LDK-së në Hessen, u mbajt një akademi përkujtimore për Ismet Rracin, ish-kryetar i KK të Klinës i dhe për shumë vjet kryetar i degës së LDK-së.

Ramë Manaj, kryetar i Kuvendit komunal të Klinës, duke folur për figurën e Ismet Rracit, tha se krahas punës arsimore Ismeti vihet në funksion të organizimit legal të Lëvizjes kombëtare e për ta zgjuar më fuqishem ndërgjegjen kombëtare dhe për të shtrirë proceset e reja demokratike në Kosovë.

 

Ishte nismëtar dhe ndër themeluesit e parë të LDK-së në Klinë në vitin 1990, anëtar i Këshillit komunal për pajtimin e gjaqeve, anëtar i Këshillit të përgjithshëm të LDK-së dhe për shumë vite kryetar i Degës së LDK-së në Klinë, tha Manaj, duke shtuar se veprimtaria e kombëtare e politike e Ismet Rracit ishte e pandalshme dhe e cila çmohej e respektohej nga populli.

Zoti Manaj përkujtoi se në zgjedhjet e para lokale të fundvitit 2000 Ismet Rraci zgjedhet kryetar i parë i Asamblesë komunale në Klinë, në të cilin funksion e gjeti vdekja mizore e tradhtare më 24 prill të vitit 2001, tha ai.

"Një dorë e zgjatur prej atyre që shqiptarëve dhe Kosovës i duan vetëm errësirën, një dorë vrastare shoi jetën e njeriut i cili të terën e kaloi me përpjekjet, sakrificën dhe mundin e pakursyer për ardhmëninë e lirë e të ndritur të popullit e vendit të tij", theksoi Manaj. Ai tha se moszbulimi i krimeve dhe i aktorëve të tyre në një shoqëri, i stimulon ato dhe vazhdimësinë e tyre.

Me vrasjen e Ismetit Rracit, tha Manaj, u vra demokracia, u vra besimi i popullit, vota e tij dhe kjo domosdo se mbetet nga veprat me makabre dhe më qyqare të armiqve të shqiptarëve dhe vet Kosovës.

 

"Ndërkaq, jeta dhe vepra, fytyra patriotike e Ismet Rracit një fanar i pashuar i patriotizmit dhe sakrificës, i përkushtimit dhe kontributit, i vetëdijes së lartë prej intelektuali e burri që nuk kurseu asgjë asnjëherë për interesat madhore të popullit që i takoi", tha Manaj, duke e quajtur Ismet Rracin përjetësisht Dëshmor i demokracisë, vlerë dhe çmim që do të shprehë dashurinë dhe përkushtimin e sakrificën për lirinë, tha mes tjerash në këtë tubim përkujtimor Ramë Manaj, duke folur për jetën dhe vepren e Ismet Rracit.

Akademinë e përshëndetën edhe Hazir Krasniqi, Gani Azemi e Maxhun Smajli të cilët në pika të shkurtëra folën për veprimtarinë atdhetare të Ismet Rracit.

 

 

Partitë që nuk publikojnë financimet do të paditen në gjykatë

 

Tiranë, 28 prill 2004 - Zyra për Mbrojtjen e Qytetarëve (CAO) bëri të ditur se ka vendosur të paditë në gjykatë ato parti politike që nuk kanë bërë transparente burimet e financimit. Organizata joqeveritare filloi procesin e ankimit për 5 parti politike që nuk iu përgjigjën kërkesës për të publikuar financat e tyre dhe më pas do t'i drejtohet gjykatës për këtë shkelje të ligjit mbi të drejtën e informimit.

Në qendër të kritikave është vendosur Partia Socialiste, më e madhja mes atyre që nuk pranojnë publikimin e financave partiake. Disa parti të koalicionit qeveritar si dhe PD e opozitës sapo kanë paraqitur raportet mbi burimet e tyre financiare. 6 parti politike i pranuan të publikojnë plotësisht ose pjesërisht të ardhurat e tyre, ndërkohë që 5 të tjera ende refuzojnë transparencën ndaj publikut.

Forcat politike në Shqipëri nuk kanë publikuar dhe nuk kanë lejuar asnjëherë transparencën mbi të ardhurat, shpenzimet, donacionet, sponsorizimet, dhuratat me të cilat ato organizojnë fushatat zgjedhore.

 

 

Sot në Maqedoni po zhviilohet procesi zgjedhor

 

Shkup, 28 prill 2004 - Sot në Maqedoni po zhviilohet procesi zgjedhor, ku rreth 1 milion e 700 mijë votues do të duhet të zgjedhin Presidentin e ri të vendit.

Gara në këtë raund të dytë të zgjedhjeve zhvillohet mes Branko Cërvenkovskit nga Lidhja Socialdemokrate Maqedonase dhe Sashko Kedevit nga VMRO-DPMNE-ja.

Që një kandidat të jetë zgjedhur president do të duhet që në rreth tre mijë vendvotimet të dalin mbi 50 për qind e elektoratit.

 

 

Policia italiane ndaloi një shqiptar me drogë

 

Romë, 28 prill 2004 - Policia italiane ka ndaluar të martën një shtetas shqiptar, që kishte zbarkuar nga Durrësi në Bari duke transportuar 11.5 kg heroinë.

Sipas policisë italiane, heroina e gjetur ishte fshehur në automjetin tip frigofer me targa të Shqipërisë, të cilin e drejtonte një shqiptar 30 vjeçar.

Të hënën një sasi e njëjtë heroine u bllokua nga policia shqiptare në portin e Durrësit, para nisjes për në Itali.

Muajt e fundit policia shqiptare ka shënuar disa suksese në luftën kundër trafikut të drogës.

 

 

Nga një shpërthim i një xhipi-bombë janë plagosur 4 ushtarë izraelitë

 

Gaza, 28 prill 2004 - Katër ushtarë izraelitë janë plagosur sot (e merkurë) pas një shpërthimi të një xhipi-bombë afër kibucit izraelit Kfar Darom në Rripin e Gazës, njofton BBCËorld.

 

Në njoftim thuhet xhipi-bombë-palestinez ka kaluar nëpër postblliok të kibucit dhe është ndjekur nga ushtarët dhe me të shpërthyer është parë se është makinë-bombë. Grupi Hamas ka thënë se pjesëtarët e tij e kanë kryer këtë sulm.

 

 

Policia izraelite ka arrestuar një zyrtar të lartë palestinez

 

Jerusalem, 28 prill 2004 - Policia izraelite ka arrestuar zyrtarin e lartë palestinez, Sari Nuseibej, në Jerusdalemin lindor, njofton BBCËorld. Z. Nuseibej është arrestuar dje në mengjes kur ka mbërritur në Univeerrsitetin Al-Kuds, president i të cilit është. Ai është dërguar në burg, por nuk dihet pse ka thënë zëdhënësi i Universitetit.

 

 

Në luftimet Tajlandë janë vrarë të pakten 127 njerëz

 

Bankog, Tajlandë, 28 prill 2004 - Sipas njoftimeve më të reja, në përleshjet ndërmjet forcave të sigurimit tajlandez dhe kryengritësve të dyshimtë islamikë në jug të Tajlandës janë vrarë sot (e merkurë) të pakten 127 njerëz, njofton AFP.

 

Kjo është dita më e përgjakshme në historinë e këtij rajoni, kanë thënë zyrtarët. Ata kanë thënë gjithashtu se kryengritësit kanë sulmuar që në agim 10 stacione policore dhe postblloqe sigurimi në provincën Jala, Patani dhe Songhla afër kufirit me Malejzinë.

 

 

Forcat amerikane kanë vrarë 64 kryengritës në Naxhaf

 

Naxhaf, Irak, 28 prill 2004 - Një zyrtar ushtarak amerikan në Irak tha se 64 ekstremistë u vranë në përleshje të ashpra gjatë natës me forcat e koalicionit në afërsi të qytetit të shenjtë Naxhaf.

Gjenerali amerikan, Mark Kimmit, tha se ushtria beson se shumica e tyre ishin anëtarë të miliciës ilegale të klerikut shiit, Moqtada al-Sadër. Koalicioni thotë se milicia po përdor xhamitë e Naxhafit dhe vendet e shenjta si baza dhe depo armësh dhe municioni.

 

 

Presidenti qipriot sulmoi ashpër Shtetet e Bashkuara

 

Nikozia, 28 prill 2004 - Presidenti qipriot Tassos Papadopoulos sulmoi ashpër Shtetet e Bashkuara për kritikat ndaj veprimeve të qeverisë së tij pas referendumit të së djelës mbi planin e Kombeve të Bashkuara për ribashkimin e ishullit.

Zoti Papadopulos u tha gazetarëve sot në Nicosia se shpreh keqardhje për deklaratat e djeshme të bëra nga zëdhënësi i Departamentit të Shtetit Riçard Bauçer. Ai tha se udhëheqësit e qipriotëve grekë manipuluan agjencitë e lajmeve para votimit dhe përdorën shkollat për propagandë kundër referendumit.

 

 

Kërkohet të bëhen publike të dhënat e punës së nënpresidentit Çejni mbi një strategji kombëtare të energjisë

 

Uashington, 28 prill 2004 - Gjykata e Lartë e Shteteve të Bashkuara po dëgjon sot argumente për të vendosur në se administrata e presidentit Bush duhet të bëjë publike të dhënat e punës së nënpresidentit Dik Çejni mbi një strategji kombëtare të energjisë.

Kjo çështje buron nga një aktpadi e ngritur nga disa grupe të mbrojtjes së mjedisit, të cilat kërkojnë që qeveria të publikojë punën e grupit të posaçëm të energjisë, e drejtuar nga zoti Çejni, për të parë se çfarë ndikimi kishin firmat e energjetikës në hartimin e politikës kombëtare të energjisë.

 

 

Bler zbraps kritikat për emigracionin

 

Londër, 28 prill 2004 - Kryeministri, Toni Bler, ka mbajtur një fjalim siç thuhet për të sqaruar politikën e tij të emigracionit që është kthyer në një mit.

"Ne nuk do të bëhemi as fortesë, dhe as han pa porta," ka thënë zoti Bler.

Tre ditë përpara se dhjetë vendet e reja të hyjnë zyrtarisht në Bashkimin Evropian, zoti Bler kërkoi me këmbëngulje të tregojë se ka një politikë koherente emigracioni.

"Emigracioni," ka thënë kryeminitri Toni Blair "është absolutisht themelor për ekonominë britanike.

 

 

Në një aksident ajror të një helikopteri amerikan kanë humbur jetën 3 ushtarë

 

Uashington, 28 prill 2004 - Një helikopter ushtarak amerikan i tipit Blek Hawk (Petriti i Zi), që transportonte tre ushtarë është përplasur në një breg lumi në Karolinën e Jugut gjatë një ushtrimi nëpër mot të keq, ka bërë të ditur zëdhënësi ushtarak, njofton Rojter. Në njoftim thuhet se s=ka shpëtuar asnjëri, ndërsa janë gjetur trupat e tre anëtarëvë të ekipazhit.

 

 

Në luftimet në Tajlandë janë vrarë 85 njerëz

 

Bankog, Tajlandë, 28 prill 2004 - Militantët e dyshimtë islamikë janë përleshur sot (e mërkurë) me policinë, duke lënë kështu të pakten 85 njerëz të vdekur në luftimet e ashpra në rajonin jugor problematik të Tajlandës, të dominuar nga muslimanët, kanë bërë të ditur zyrtarët, njofton Rojter.

 

Në njoftim thuhet se pjesa dërrmuese e të vrarëve janë të rinj, që ishin përpjekur të rrëmbejnë armë nga bazat policore dhe ushtarake. Luftimet janë bërë pothuajse të përditshme në Tajlandë dhe vetëm sivjet janë vrarë gjatë përleshjeve të tilla rreth 150 njerëz.

 

 

Janë vrarë 2 persona të armatosur gjatë një sulmi në kuartin diplomatik të Damaskut

 

Damask, Siri, 28 prill 2004 - Persona të armatosur kanë sulmuar mbrëmë vonë një ish-zyre të Kombeve të Bashkuara në kuartin diplomatik në Damask, duke luftuar kështu përreth ndërtesave me policinë, njofton AP. Qeveria ka thënë se janë vrarë dy sulmues, një polic dhe një civil.

 

Në Siri nuk ka ndodhur ndonjë dhunë që nga viti 1980, kur qe përmbysur qeveria nga kryuengritja e militantëtëve islamikë.

 

 

Autoritetet siriane kanë zbuluar një depo të fshehtë armësh dhe mjetesh shpërthyese

 

Damask, 28 prill 2004 - Autoritetet siriane kanë zbuluar një depo të fshehtë armësh dhe mjetesh shpërthyese, që i përkasin një grupi që ka kryer sot (e merkurë) një sulm me bombë në Damask, ku siç është thënë edhe në edicionet e mëhershme, janë vrarë katër persona, ndër të cilët dy sulmues, një polic dhe një grua këmbësore, ka bërë të ditur agjencia zyrtare e lajmeve SANA, njofton BBCnews.

Kjo depo armësh është zbuluar në fshatin Khan Al-Shih, 25 km në jug të Damaskut.

 

 

Në një sulm me granatë në Kashmir janë vrarë 3 persona

 

Kashmir, 28 prill 2004 - Në një sulm me granatë gjatë një fushate zgjedhore në Kashmirin e administruar nga India janë vrarë tre persona dhe janë plagosur edhe 59 të tjerë, kanë bërë të ditur sot (e merkurë) autoritetet, njofton BBCnews. Granata është hedhur në një fshat të distriktit Doda, 160 km në verilindje të qyteti Xhamu. Zgjedhjet do të bëhen më 10 Maj.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |