Dega e LDK-së në Gjermani mbajti Akademi përkujtimore në pesëvjetorin e vrasjes së heroit Sali Çekaj

Hazir Krasniqi: Ardhja e Salihut në Gjermani i dha forcë, ide dhe kreativitet organizimit tonë

27 prill 2004 / TN

Sali Çekaj ishte fjalëpak, me vullnet të çelniktë, i durueshëm në momente të rënda, gjakftohtë në rast rreziku, i shpejtë në verpime, i disiplinuar në pasionet e tij. Sali Çekaj kishte besim absolut në idealin e tij, në sistemin e tij politik e ushtarak, në vetën dhe të shokët e tij të politikës e të luftës. Thënë shkurt Sali Çekaj ishte kreshnik, ishte një burrë i rrallë. Si të tillë e dinte vendi ku lindi e u rrit, si të tillë e keni parë ju këtu në dhe të huaj, si të tillë e provoi Kosharja, ku u tregua lama e nami i trimërisë shqiptare. – tha mr. Nimon Alimusaj

Myftar HALILI (Gjermani)


Dega e LDK-së në Gjermani në bashkëpunim me nëndegën e LDK-së në Baden-Württemberg, sikurse për çdo vit, edhe sivjet organizoi Akademinë përkujtimore për koamndantin e UÇK-së e heroin Sali Çekaj, ish-nënkryetar i Degës së LDK-së në Gjermani.

Në këtë akademi që u mbajt në Shtutgart, pos numrit shumë të madh të anëtarëve të LDK-së, simpatizuesve e qyterarëve tjerë si dhe nënës së heroit Nushe Çekaj pastaj vëllezërve të heroit Sali Çekaj, Hasani dhe Smajli, të birit Migjeni e pjesëtarëve tjerë të familjes, morën pjesë edhe mr. Nimon Alimusaj, anëtar i Kryesisë qëndrore të LDK-së dhe deputet në Kuvendin e Kosovës, Halil Ahmeti, deputet i Kuvendit të Kosovës, Ramë Manaj, kryetar i KK të Klinës, Gani Azemi, kryetar, Ramadan Gashi, nënkryetar e Hamdi Halimi, anëtar të Kryesisë së degës së LDK-së për Benelux, Ibrahim Berisha, sekretar i PD të Shqipërisë në Gjermani, Luz Thaçi, kryetar i BD të PSHDK-së në Gjermani, Faze Zemaj, kryetare FR të LDK-ës në Deçan si dhe familjarët e aktivistëve të vrarë: të kolonel Ahmet Kransiqit, i vëllai Behxhet Krasniqi, të Tahir Zemajt, i vëllau Azem Zemaj dhe nipi Astrit Zemaj, të Smajl Hajdarajt, i vëllai Fazli Hajdaraj, të Ismet Rracit, i biri Astrit Rraci, pastaj Gani Geci, ushtar i ditëve të para të luftës e bashkëluftëtar i komandantit Adem Jashari, Pjetër Coli, ish-kryetar i Komisionit të 3% për Gjermani e mysafirë të tjerë.

Akademia u udhëhoq nga Myftar Halili, kurse në emër të Kryesisë së degës së LDK-së dhe të Këshillit organizativ mysafirët dhe të pranishmit i përshëndeti Shpend Shala, anëtar i Kryesisë. Ai pos gjithë atyre mysafirëve, një përshëndetje të veçant i bëri nënës së heroit të kombit Sali Çekaj, Nushe Çekajt e cila, siç tha ai, ia dhuroi kombit dhe neve një shok, mik dhe mbi të gjitha një patriot të vërtetë.

Fjalën e rastit në këtë Akademi përkujtimore e mbajti Hazir Krasniqi, kryetar i Degës së LDK-së në Gjermani. Ai më këtë rast tha se jemi tubuar, sot këtu, të shënojmë pesëvjetorin e rënies heroike në fushën e nderit në Rrasën e Kosharës, të martirit të kombit shqiptar, intelektualit, ushtarit heroik e besnik dhe komandantit legjendar të Ushtrisë Çlirimtare të Kosovës, Heroit të popullit, Salih Çekaj. Emri dhe nami i Salih Çekajt krahas emrave të Adem Jasharit, Fehmi Aganit, Ahmet Krasniqit, Agim Ramadanit, Tahir Zemajt si dhe e shumë kolosëve të tjerë të pavarsisë së Kosovës, sot njihet dhe nderohet kudo në botën shqiptare.


„Një mërgatë e organizuar mirë dhe e bashkuar do të jetë krah i fortë i pavarësisë së Kosovës“ – thoshte Salihu

Dega e LDK-së në Gjermani qysh në fillim të organizimit të saj ishte shumë e vetdijshme se krahas përkrahjes së politikës paqësore dhe të ndihmave që duhej të tubojë për të mbijetuar populli në Kosovë ishte shumë e vetdijshme se Kosovës do t´i duhej një ushtri e mirëfilltë e profesionale për finalizimin e lirisë dhe pavarësisë së Kosovës. Aksioni i „Vetëmbrojtjes“ i vitit 1991-92 ishte aktiviteti i parë, i cili dha të kuptohet se LDK-ja dhe ne seriozisht mendonim për formimin e ushtrisë sonë. Këtë aksion e përkrahu Kryesia e LDK-së në Prishtinë dhe kryetari i Kosovës Dr. Ibrahim Rugova, njeriu që theu në perëndim e botë mitet serbe për Kosovën e shqiptarët dhe e futi vendin në rrugën drejt lirisë e pavarësisë.

Në këtë kohë kryesisë së Degës sonë iu bashkangjit veprimtari dhe ushtaraku, tash Heroi i Kosovës, Salih Çekaj i cili në atë kohë ishte detyruar ta braktiste Kosovën. Ardhja e Salihut në Gjermani i dha forcë, ide dhe kreativitet organizimit tonë. Salihu administroi zyrën e LDK-së në Stuttgart pa kurrëfarë konpenzimi prej vitit 1991 deri në vitin 1998 e që atëherë kjo zyrë luante rolin e një ambasade shtetërore ku pala kombëtare dhe ndërkombëtare informohej për situatën në Kosovë dhe drejtohej e organizohej e gjithë mërgata shqiptare.

Nga kjo zyrë organizoheshin takimet e institucioneve dhe veprimtarëve të Kosovës me palën ndërkombëtare. Salihu ishte një ndër figurat politke më të çmuara dhe të respektuara jo vetëm në Gjermani por edhe në gjithë diasporën shqiptare. Ai kishte aftësi të jashtëzakonshme komunikuese. Pos punës në zyrë Salihu ditët e uikendit i kalonte në mesin e bashkatdhetarëve tanë anë e kënd Gjermanisë e Evropës. Ai ka qenë i mirëpritur nëpër tubimet dhe fjala e tij ka mbetur në kujtesën tonë kur thoshte: „Një mërgatë e organizuar mirë dhe e bashkuar do të jetë krah i fortë i pavarësisë së Kosovës“.

Salih Çekaj ishte një ndër organizatorët dhe kreatorët e të gjitha protestave që organizoi Dega e jonë për „Njohjen e Pavarësisë së Kosovës“ e ku pjesëmarrja e bashkatdhetarëve tanë ishte masovike. Salihu dhe unë i kishim dhënë fjalën Kryesisë së asnjë protestë e jona nuk guxon të dalë më e zbehtë se protesta paraprake. Kështu edhe ndodhi, protesta e fundit e vitit 1998 ishte protesta më madhështore ku moren pjesë mbi 100.000 pjesëmarrës. Çdo gjë shkoi ashtu siç e kishim planifikuar. Protestuesit u shpërndanë dhe nuk ndodhi asnjë incident. Ne morëm komplimente nga policia dhe organet shtetërore gjermane si dhe nga qytetarët tanë.

Salihu kishte titullin e eprorit rezervë dhe kishte njohuri të shumta të artit ushtarak. Ai dhe anëtarët e tjerë të Kryesisë kishin evidentuar gati të gjithë ushtarakët që kishin braktisur ish-ushtrinë jugosllave dhe që ishin të gatshëm t´i dalin zot Kosovës. Ndër ta ishin Ahmet Krasniqi, Tahir Zemaj, Agim Mehmeti, Sylejman Kollçaku, Ibrahim Ukëhaxha, Burhan Jahiu Shpend Shala e shumë e shumë të tjerë. Ne mendonim se duhet të organizojmë një ushtri të mirëfilltë e të përgatitur mirë me kuadër të kualifikuar në lëmin e artit ushtarak. Pas shumë peripetive Dega e jonë arriti një marrëveshje me strukturat e atëhershme udhëheqëse të Shqipërisë, në tetor të vitit 1991, kur na u lejua një vend për stërvitjen e formacioneve të para ushtarake. Salih Çekaj e Zahir Pajaziti ishin të parët që filluan stërvijtjen me 50 luftëtarë. Salihu me grupin e dytë stërvijtjen e filloi në nëntor të vitit 1991 bashkë me legjenden e trimërisë, Adem Jasharin.

Duke evokuar kujtime nga takimet me Sali Çekajn, Hazir Kransiqi, tha se takimin e parafundit e pata me Salihun në Tiranë me rastin e varrimit të ministrit të mbrojtjes, kolonel Ahmet Krasniqit. Vrasja e Ministrit të mbrojtjes kolonel Ahmet Krasniqi, Salihun e kishte tronditur thellë. Ai më priti në Rinas, ishte hera e parë që e shihja me lot në sy. Pasi me shprehi ngushëllime iu drejtova: Salih në Stuttgart do të kthehemi së bashku. Sepse kisha frikë se radhën e kishte ky te likuidohej nga dora e zezë tradhtare që vrau ministrin.

Bac, me tha, bëhu i fortë e na ndihmo që ministrin ta varrosem ashtu si duhet se për të tjera do të bëjmë si të thuash ti. Më shoqëroi tërë kohën sa isha atje dhe biseduam gjërë e gjatë dhe për gjithçka. Kur u ndamë nuk pata forcë t´ i them eja me mua. Ai me tha: Bac, shokët i kam në front dhe u kam thënë se do të kthehem gjithësesi. - edhe pse ai ishte i vetdijshem për rrezikun që i kanosej pas shpine.

Njëherë pas një aksioni të suksesshëm, Salihu na lajmërohet nga Tirana: Shokë punën për çka kam ardhë e kreva. Këto dy ditë shihemi në Stuttgart. Salih ia kthyem: Si është e mundur që disa të pandërgjegjshëm me komunikatë nga Tirana e bëjnë të vetin këtë aksion?

Ai u pergjej: Me rendësi është që unë detyrën e kreva e lë të rrah gjoks kush të dojë, kështu ishte Salihu.

E nderuara familje Çekaj, tha në fund Hazir Krasniqi, jemi krenar dhe mburremi me Salihun e juaj e bashëkpunëtorin tonë. Salihu me veprën e vet do të jetojë sa të jenë shqiptarët. Vepra e tij do të jetë udhërrëfyese për gjeneratat e reja. Figura e Salihut do të jetë shembull për të gjithë shqiptarët se si duhet vepruar për të mirën e popullit, për lirinë, pavarësinë dhe demokracinë e Kosovës.


Sali Çekaj ishte kreshnik. Si të tillë e dinte vendi ku u lind e u rrit, si të tillë e keni parë ju këtu në dhe të huaj e si të tillë e provoi Kosharja, - tha mr. Nimon Alimusaj

Mr. Nimon Alimusaj, anëtar i Kryesisë qendrore të LDK-së dhe deputet në Kuvendin e Kosovës në fjalën e rastit tha se duke përkujtuar në këtë mënyrë, jo për të parën herë, e as për të vetmën herë dëshmorët e kombit, ju po bëni një punë kombëtare, po ngulitni në kujtesën e shqiptarëve edhe jashtë atdheut një periudhë historike e cila nxori figura të mëdha kombëtare më punën dhe gjakun e të cilëve arriti dita e lirisë të cilën po e gëzoni edhe ju jashtë Kosovës.

Gjithashtu, duke kujtuar figurat e tilla me kaq madhështi, ju po përcillni tek breznitë e reja edhe në dhe të huaj testamentin e fuqishëm që u jep atyre martirizimi i tyre në altarin e atdheut: „Ne ramë dhe e bëmë Kosovën të lirë, ju të gjallët, ju brezat e rinj që vini, kudo që jeni, në Kosovë dhe jashtë saj, keni një detyrë akoma më të lartë e më të madhërueshme, duhet të përpiqeni që t´ia sillni Kosovës dritën e qytetërimit të vërtetë, ditën e qytetërimit perëndimor”. Të forcohet kujtesa historike dhe porositë e saj dhe në këtë mënyrë është punë e mirë kombëtare.

Ngjarjet e mëdha kërkojnë njerëz të mëdhenj, njerëz eprorë të cilët në realizimin e idealit të tyre kombëtar mund të bijnë, por vdekja nuk mundet t´ua marrë me vete kurrë emrin. Të tillët janë të pavdekshëm. I tillë ishte Sali Çekaj andaj i pavdekshem është edhe emri i tij.

Sali Çekaj, pra nuk ishte i zakonshëm. Ai kishte karakter të jashtëzakonshëm, virtyte të jashtëzakonshme, sjellje të jashtëzakonshme dhe shokë të idealit kombëtar të jashtëzakonshëm.
Sali Çekaj ishte fjalëpak, me vullnet të çelniktë, i durueshëm në momente të rënda, gjakftohtë në rast rreziku, i shpejtë në verpime, i disiplinuar në pasionet e tij. Sali Çekaj kishte besim absolut në idealin e tij, në sistemin e tij politik e ushtarak, në vetën dhe të shokët e tij të politikës e të luftës. Thënë shkurt Sali Çekaj ishte kreshnik, ishte një burrë i rrallë. Si të tillë e dinte vendi ku u lind e u rrit, si të tillë e keni parë ju këtu në dhe të huaj, si të tillë e provoi Kosharja, ku u tregua lama e nami i trimërisë shqiptare. Ky është portreti i Sali Çekajt.

Po cili ishte kuadri historik në të cilën u shqua kjo figurë e jashtëzakonshme?

Në dekadën e fundit të shekullit të kaluar në Kosovë u paraqitë një levizje e madhe e organizuar për çlirim kombëtar, si vazhdimësi e disa lidhjeve të mëparshme e quajtur LDK.

Kjo parti-lëvizje kishte dy faza, atë paqësore e cila fitoi simpatinë e botës demokratike dhe fazën e cila kulmoi me luftë, me një luftë e cila vërtetoi para botës se shqiptarët nuk janë asnjëherë të lodhur e të ligështuar në mbrojtjen e trojeve të tyre. Në këto dy faza Sali Çekaj u dallua si njeri epror, si profesionist dhe institucionalist rigoroz. Në fazën e parë Sali Çekaj ishte dishepull i shkollës politike të politikanëve të mëdhenj që i dhanë vulën e vet tërë periudhës: i dr. Ibrahim Rugovës dhe i Fehmi Aganit dhe i sistmeit të tyre politik.

Në të gjitha ngjarjet me rëndësi për komb e atdhe që bëri kjo parti levizje, Sali Çekaj ishte në radhën e parë. Pra Sali Çekaj me punën e tij si funksionar i LDK-së, ndihmoi fuqishëm që vullnetin politik të Kosovës ta ngrisë në vullnet institucional.

Bashkatdhetarë të nderuar, tha në vazhdim mr. Nimon Alimusaj, më lejoni të shkoqis edhe pak këtë karakteristikë bazë në jetën politike e ushtarake të Sali Çekajt. Ky ishte kundërshtar rigoroz ndaj një karakteristike që është konsideruar edhe nga të huajt si huq i shqiptarëve, janë negative e natyrës së tij – individualizmin, mungesën e dukurisë së turmës tek shqiptarët, mungesën e frymës së kopesë.

Çekaj e dinte se sa herë shqiptarët kanë humbur në të kaluarën, gjithmonë kjo ka ndodhur për shkak se atyre u ka munguar një qednresë e bashkërenditur. Dhe esenca e verpimtarisë politike të Sali Çekajt e cila përmblidhet pikërisht në këtë konstatim: Sali Çekaj mbi të gjitha, në politikën e tij e kishte nocionin e një bashkimi kombëtar të disiplinuar. Ai e forcoi në diasporë një element të rëndësishëm të platformës politike të LDK-së, integrimin dhe harmonizimin e të gjitha energjive të kombit që e shpiejnë në një bashkim mendor e shpirtëror në përpjekje për pavarësinë e Kosovës. Këtë ai e konsideron si pikën e parë të vijës së urtë politike që ka për të sjellë në dritë popullin e Kosovës.

Ka dy farë heroizmash, heroizmin në jetë dhe heroizmin në luftë. Sali Çekaj i pati të dy. Edhe në luftë, si në politikë, Sali Çekaj e pati për bazë në mënyrë rigoroze nocionin e një bashkimi të disiplinuar, nocionin e një qëndrese të bashkërenditur nën komandën e strukturave të një institucioni të quajtur Ministri e mbrojtjes e që e kishte edhe një komandant suprem. Për fat të keq jo të gjithë ata që u gjenden në këtë luftë vepruan kështu. Dhe kjo pati pasoja.

Në ato ditë të motit të madh Sali Çekajn e gjejmë herë në Isniq e herë në Prapaqan, herë në Llukë e herë në Loxhë e gjithandej Rrafshit të Dukagjinit, herë në male e herë në kufi, për t´u përqendruar me fuqi titanike për thyerjen e kufirit me Betejën e Kosharës. Në ato ditë Sali Çekaj nuk i teproi asnjë minutë kohe, përderisa ra heroikisht si burrë në Koshare, pushka nuk i qëndroi e fjetur për asnjë moment. Sali Çekaj ra, vdiç, pra i shkoi pas si burrë Agim Ramadanit, por pas tij shkoi Tahir Zemaj, të cilin, sa fatkeqësi kombtare e mori paqja, por mbeti gjallë emri dhe kujtesa për ta.

Në këtë Akademi me recitime për Sali Çekajn u paraqitën Behar Buqolli e Qendresa Gashi, kurse Akademinë e përshëndeten edhe Halil Ahmeti, Gani Azemi, Ramë Manaj, Ibrahim Berisha, Luz Thaçi, Emrush Çekaj, Gani Geci, Fazli Hajdaraj, kurse në emër të familjes u falënderua Migjen Çekaj, i biri i heroit Sali Çekaj.

(Fotografitë: Agim KAMERAJ)