Përmbajtja:

• Presidentit Rugova iu dorëzua mirënjohja "Mik i SHBA-ve" në shtetin Pensilvania

• Presidenti Rugova sot takohet me Kofi Ananin

• Kryeparlamentari Daci priti Besnik Mustafajn

• Sabri Hamiti bisedoi me Besnik Mustafajn

• Kryeministri Rexhepi vizitoi sot Fushë Kosovën

• Nesër i zhvillon punimet seanca e rregullt e Kuvendit të Kosovës

• Ombudspersoni i Kosovës formon Grupin për të Drejtat e Fëmijëve

• Shirer thotë se Evropa duhet t'i kushtojë vëmendje më të madhe çështjes së Kosovës

• Ministrat e jashtëm të BE-së edhe për zhvillimet e fundit në Kosovë

• Në Shtutgart me një akademi u shënua 5-vjetori i rënies heroike të komandantit Sali Çekaj

• Paskal Moro, shefe e re e UNHCR-it në Kosovë

• Në Uashington u zhvillua një konferencë mbi të ardhmen e Kosovës

• Dy deputetë serbë në Këshillin e Evropës u suspenduan nga Asambleja Parlamentare

• Mbrëmë në Maqedoni ka filluar heshtja parazgjedhore

• Në Tiranë është mbajtur edhe një protestë e të përndjekurve politikë

• Një snajperist ka vrarë të pakten dy policë në qytetin indonezian Ambon

• Në Naxhaf janë vrarë 43 pjesëtarë të forcave antikoalicion

• Trupat izraelite kanë vrarë 2 palestinezë dhe një tjetër e kanë plagosur rëndë

• Patrulla të përbashkëta amerikano irakiane në Falluxha

• Gjashtë urdhëra të tjerë arresti në lidhje me shpërthimet e Madridit

• Ministrat e jashtëm të BE-së do të vazhdojnë debatet mbi projekt-kushtetutën

• Pauell kërkon delegim të pushtetit

• Diplomatët britanikë kanë kritikuar politikën e Blerit

• Afganistani ka kryer ekzekutimin e parë me vdekje që kur është përmbysur regjimi i talibanëve

• Në një aksident në Indi kanë humbur jetën të pakten 12 fëmijë

• Gadafi ka filluar vizitën e tij të parë pas 15 vjetësh në Evropë

Presidentit Rugova iu dorëzua mirënjohja "Mik i SHBA-ve" në shtetin Pensilvania

 

Filadelfia, 27 prill 2004 - Presidenti i Kosovës Ibrahim Rugova ka vizituar shtetin federal amerikan Pensilvania, me ftesë të zv.guvernatores së këtij shteti, Ketrin Bejker Noll. Me këtë rast presidenti Rugova me bashkëpunëtorët, pati takime me zyrtarë civilë dhe ushtarakë të Pensilvanisë.

Në një ceremoni të zhvilluar me këtë rast, Presidentit Rugova iu dorëzua mirënjohja "Mik i SHBA-ve" dhe "njeriu që punon për ta përmbyllur kornizën ligjore për pavarësinë e Kosovës".

Zv.guvernatorja e Pensilvanisë znj. Katrin Bejker Noll, në një darkë të organizuar për nder të Presidentit Rugova, tha se miqësia e Ibrahim Rugovës ndaj SHBA-ve ka qenë jo vetëm në të mirë të Kosovës, por edhe të SHBA-ve.

 

"Fryma juaj e ngrohtë e bashkëpunimit është një ideal drejt të cilit aspirojnë të gjithë njerëzit", tha zonja Noll. Ajo në emër të gjithë qytetarëve të Pensilvanisë i shprehu falënderim Presidentit të Kosovës për miqësinë ndaj Shteteve të Bashkuara të Amerikës.

"Në emër të 12 milionë qytetarëve të Pensilvanisë, dua t'ju shpreh lavdatë për arritjet tuaja të jashtëzakonshme dhe t'ju falënderoj për miqësinë tuaj ndaj Shteteve të Bashkuara. Vazhdofshi me suksese të mëdha dhe paqe në gjithë përpjekjet tuaja në të ardhmen", tha mes tjerash në fjalën e saj, zonja Ketrin Bejkër Noll (Catherine Baker Knoll).

Ndërkaq, Presidenti Rugova, duke u falenderuar për këtë miërnjohje tha se "roli i Amerikës ishte i pazëvendësueshëm edhe në jetësimin e aspiratës shekullore të shqiptarëve".

"Njohja sa më e shpejtë e pavarësisë së Kosovës do ta qetësonte këtë pjesë të Evropës dhe tërë botën",- tha Presidenti Rugova.

Në këtë ceremoni mori pjesë edhe shefja e Gardes Civile të Pensilvanisë gjeneralja Vajt.
Pastaj Presidenti Rugova vizitoi selinë qendrore të Gardës Civile të Pensilvanisë, trupat e së cilës kanë pjesëtarë të forcave amerikane në Kosovë, të cilët i falënderoi për kontributin e tyre në Kosovë.

Presidenti Rugova deklaroi se në Kosovë duhet të qëndrojnë ushtarët amerikanë. Konkretisht, tha ai, kampi "Bondstill" duhet të mbetet pjesë e Kosovës, ngase Kosova do të bëhet pjesë e Bashkimit Evropian, e NATO-s dhe e bashkësisë ndërkombëtare në përgjithësi.

 

"Pa ndihmën e ushtarëve amerikanë", tha Presidenti Rugova, "nuk do të kishim lirinë dhe nuk do ta gëzonim paqen. Shtetet e Bashkuara të Amerikës kanë qenë vendi i cili më së shumti e ka ndihmuar Kosovën dhe kosovarët nuk i harrojnë miqtë e tyre".

Presidenti Rugova pati një takim edhe me gjeneralin Xheri Bek, i cili ka qenë komandant i forcave amerikane në kuadër të KFOR-it në Kosovë, takim ky shumë i përzemërt, ku Presidenti Rugova falënderoi gjeneralin Bek për kontributin e tij në Kosovë.

 

 

Presidenti Rugova sot takohet me Kofi Ananin

 

Nju Jork, 27 prill 2004 - Presidenti i Kosovës Ibrahim Rugova, i cili gjendet për vizitë disaditëshe në Shtetet e Bashkuara të Amerikës, sot do të qëndrojë në Nju-Jork, ku do të takohet me Sekretarin e Përgjithshëm të OKB-së, Kofi Anan.

 

Të enjtën dhe të premtën presidenti Rugova do të qëndrojë në Uashington ku do të ketë takime me zyrtarë të Departamentit të Shtetit dhe të Shtëpisë së Bardhë.

 

 

Kryeparlamentari Daci priti Besnik Mustafajn

 

Prishtinë, 27 prill 2004 - Kryetari i Kuvendit të Kosovës, Nexhat Daci, priti sot nënkryetarin e Partisë Demokratike, Besnik Mustafaj, i cili është edhe kryesues i Komisionit parlamentar për Politikë të Jashtme në Kuvendin e Shqipërisë dhe ka biseduar me te për zhvillimet në të dy vendet.

Zoti Mustafaj e njoftoi gjerësisht kryeparlamentarin Daci për aktivitetet e Partisë Demokratike dhe analizën e saj për ndryshime pozitive në Shqipëri, për vizionin e saj për konsolidimin e demokracisë në Shqipëri dhe për angazhimet për një sistem proporcional të zgjedhjeve në vend.

 

Në këtë dritë ai ka folur edhe për fillimin e negociatave me Bashkimin Evropian për marrëveshjen e asociim-stabilizimit.
Kryeparlamentari Daci është shprehur se sistemi proporcional i zgjedhjeve është shumë më i drejtë dhe më praktik për vendet në të cilat nuk është konsoliduar plotësisht demokracia.

 

Ai theksoi rëndësinë e bashkëpunimit ndërmjet të dy vendeve në interes të qytetarëve dhe të ardhmërisë më të mirë. Daci ka vënë në pah edhe rolin e veprimit institucional për mbarëvajtjen e proceseve pozitive në shoqëri, kurse të dy bashkëbiseduesit janë pajtuar se informimi reciprok i institucioneve të Kosovës dhe Shqipërisë është i rëndësishëm për të dyja vendet, thuhet në një njoftim të Kuvendit të Kosovës.

 

 

Sabri Hamiti bisedoi me Besnik Mustafajn

 

Prishtinë, 27 prill 2004 - Kryetari i Grupit parlamentar të LDK-së në Kuvendin e Kosovës Sabri Hamiti bisedoi sot në Prishtinë me zotin Besnik Mustafaj, nënkryetar i Komisionit për Politikë të Jashtme të Kuvendit të Shqipërisë për zhvillimet aktuale në Kosovë dhe në Shqipëri.

 

Po ashtu në këtë takim bashkëbiseduesit e konsideruan të rëndësisë së veçantë bashkëpunimin ndërmjet Grupit parlamentar të LDK-së në Kuvendin e Kosovës dhe të Grupit parlamentar të Partisë Demokratike në Kuvendin e Shqipërisë.

Gjatë takimit u theksua nevoja e intensifikimit dhe forcimit të bashkëpunimit institucional ndërmjet Kosovës dhe Shqipërisë, që nënkupton takime të veçanta në Prishtinë dhe në Tiranë.

 

 

Kryeministri Rexhepi vizitoi sot Fushë Kosovën

 

Fushë Kosovë, 27 prill 2004 - Kryeministri Bajram Rexhepi vizitoi sot Fushë Kosovën në një takim që pati me udhëheqjen komunale bisedoi për gjendjen aktuale, dhe ku ishin të pranishëm edhe pjesëtarë të minoriteteve.

Rexhepi tha se përkundër dëmeve të mëdha, me angazhimin e strukturave komunale dhe përfaqësuesve të komunitetit serb është ruajtur ajo që ka qenë më së vështiri - besimi në njëri tjetrin, duke premtuar ndihmën për të filluar rehabilitimi i dëmeve.

 

Ai tha se në 24 banesa banorët mund të kthehen, ndërkaq shtëpitë e tjera, sipas prioriteteve, do të rindërtohen. "Do ta kenë përkrahjen të gjitha ato komuna që dinë çka duan dhe i ndërtojnë raportet ndërnjerëzore", the Rexhepi.

Ndërkaq, kryetari i komunës së Fushë Kosovës Skënder Zogaj tha se e kishte njoftuar kryeministrin për dëmet e shkaktuara dhe punën që po bëhet aktualisht në sanimin e gjendjes.

 

Ai tha se kishte marrë për përkrahjen që shumë shpejt të riparohen dëmet, duke shtuar se kjo pjesë është shkatërruar dukshëm, por nuk janë shkëputur lidhjet mes njerëzve.

 

 

Nesër i zhvillon punimet seanca e rregullt e Kuvendit të Kosovës

 

Prishtinë, 27 prill 2004 - Deputetët e Kuvendit të Kosovës do të mblidhen nesër, më 28 prill (e jo siç ishte paraparë më 29 prill), në një seancë të rregullt për të shqyrtuar 11 projektligje. Për herë tyë dytë do të shqyrtohet Projektligji për energjinë, ai për Rregullartorin e energjisë si dhe për Energjinë elektrike.

 

Poashtu do të shqyrtohet edhe Projektligji për njësitë matëse, ai për Standardizimin, Projektligji për materialin fidanor, ai për Marrëveshjet financiare ndërkombëtare dhe ai për Kinematografinë e Kosovës.

Për herë të parë, ndërkaq do të shqyrtohen: Projektligji për parkun Kombëtar Bjeshkët e Nemuna, ai për Mbrojtjen e konsumatorëve dhe Projektligji për ndërtimet.

Në po këtë seancë do të shtrohet propozimi i Komisionit për Bashkëpunim Ndërkombëtar për vënie në rend dite të Standardeve për Kosovën, si dhe disa çështje të tjera.

 

 

Ombudspersoni i Kosovës formon Grupin për të Drejtat e Fëmijëve

 

Prishtinë, 27 prill 2004 - Institucioni i Ombudspersonit në Kosovë (IOK) ka formuar Grupin për të Drejtat e Fëmijëve (GDF), të përkrahuar financiarisht nga ana e UNICEF-it. IOK është i përkushtuar për mbrojtjen e të gjitha të drejtave të njeriut në Kosovë, mirëpo GDF në mënyrë të veçantë do të funksionojë për të monitoruar, hetuar dhe promovuar një vetëdijësim për çfarëdo shkelje të të drejtave të fëmijëve nga ana e autoriteteve publike, thuhet në një njoftim të Ombudspersonit të Kosovës.

Formimi i Grupit për të Drejtat e Fëmijëve i mundëson IOK-së të ketë përqëndrim të veçantë në mbrojtjen e të drejtave të fëmijëve në pajtim me Konventën e të Drejtave të Fëmijës të Kombeve të Bashkuara dhe Konventën Evropiane për të Drejtat e Njeriut, duke e bërë mbrojtjen e këtyrë të drejtave në Kosovë më efektive dhe duke e përmirësuar situatën e përgjithshme për fëmijët.

Aktivitetet parësore të GDF-së do të përfshijnë zhvillimin e hetimeve mbi aspekte të ndryshme të përgjithshme të shkeljeve të të drejtave të fëmijës dhe punën me ankesat individuale të fëmijëve apo të atyre që përfaqësojnë fëmijët, në mënyrë që të ndërmerren veprimet përkatëse.

 

 

Shirer thotë se Evropa duhet t'i kushtojë vëmendje më të madhe çështjes së Kosovës

 

Strazburg, 27 prill 2004 - Në Strazburg dje pasdite ka filluar sesionin e saj të rregullt Asambleja Parlamentare e Këshillit të Evropës, ku do të debatohet për zhvillimet e fundit në Kosovë. Në prag të fillimit të sesionit, kryetari i AP, Peter Shirer ka deklaruar se Evropa duhet të ketë më shumë përgjegjësi dhe t'i kushtojë vëmendje më të madhe çështjes së Kosovës.

Po ashtu u bë e ditur se për Kosovën pritet mbajtja e një debati urgjent të nxitur nga trazirat e marsit, kurse për Shqipërinë do të analizohen zhvillimet në vitet e fundit atje.

 

 

Ministrat e jashtëm të BE-së edhe për zhvillimet e fundit në Kosovë

 

Luksemburg, 27 prill 2004 - Ministrat e jashtëm të Bashkimit Evropian në takimin e djeshëm në Luksemburg kanë diskutuar edhe për gjendjen në Kosovë.

 

Me këtë rast është përsëritur mbështetja për politikën standardet para statusit, për dialogun ndërmjet bashkësive etnike në Kosovës, si dhe për vazhdimin e dialogut Prishtinë - Beograd për çështje me interes të përbashkët. Këshilli i ministrave i BE-së nënvizon se është i përkushtuar për të krijuar një Kosovë të sigurtë demokratike dhe prosperuese.

 

BE-ja nënvizon se dhuna e fundit në Kosovë ka shënuar një kthim prapa dhe ka rrezikuar përparimin e arritur në vitet e fundit. Këshilli i Ministrave rikonfirmon se pas kësaj dhune prioritet duhet të jetë siguria, ndihma për kthimin e të zhvendosurëve, rindërtimi i objekteve të shaktërruar dhe sjellja para drejtësisë të atyre që janë përgjegjës për këtë dhunë.

 

Këshilli kërkon nga të gjithë liderët e Kosovës, posaqërisht ata shqiptarë që të bashkëpunojnë n gushtë me UNMIK-un dhe KFOR-in që të krijohet një siguri fizike për pakicat dhe mbrojtje e plotë e të drejtave të të tyre, thuhet në konkluzat nga takimi i Këshillit të ministrave të BE-së.

Njëherësh iu bë thirrje institucioneve të Kosovës që ato të demonstrojnë përkushtim dhe përgjegjësi për të arritur një përparim konkret në implementimin e standardeve.

 

Shefat e diplomacive evropiane gjithashtu nënvizuan rëndësinë e dialogut ndërmjet komuniteteve në Kosovë, sikurse edhe ndërmjet Prishtinës dhe Beogradit për të adresuar çështje të rëndësishme në interes të përbashkët, ndërkaq Bashkimi Evropian shprehet se është i gatshëm të ndihmojë një dialog të tillë.

 

 

Në Shtutgart me një akademi u shënua 5-vjetori i rënies heroike të komandantit Sali Çekaj

 

Shtutgart, 27 prill 2004 - Në pesëvjetorin e rënies heroike të komandantit të UÇK-së Sali Çekajt, në Shtutgart ë Gjremanisë, u mbajt një akademi përkujtimore.

Merrnin pjesë familjarë, në mesin e të cilëve edhe nëna e heroit, Nushe Çekaj, bashkëlufëtarë dhe bashkëpunëtorë të Sali Çekajt, përfaqësues të partive politike të Kosovës dhe të Shqipërisë dhe familjarë të dëshmorëve të Kosovës.

Mysafirët fillimisht i përshëndeti Shpend Shala, anëtar i kryesisë së LDK në Gjermani.

Në fjalen e tij, Hazir Krasniqi, kryetar i degës së LDK në Gjermani, theksoi se Sali Çekaj është ndër figurat më markante në historinë më të re të Kosovës. Ai ishte kreator dhe realiziues i thyrjes së kufirit shqiptaro-shqiptar në Betejen e Kosharës. Sali Çekaj ishte njëri ndër organizatorët e të gjitha protestave që organizoi Dega e LDK në Gjermani për "Njohjen e Pavarësisë së Kosovës".

Ai ishte i mirëpritur nëpër tubimet me bashkatdhetarët dhe fjala e tij ka mbetur në kujtesë: "Një mërgatë e organizuar mirë dhe e bashkuar, do të jetë krah i fortë i pavarësisë së Kosovës".

Ndërkaq, në emër të Kryesisë qendrore të LDK-së, foli Nimon Alimusaj i cili tha se "Sali Çekaj ishte i jashtzakonshëm, ishte njeri fjalëpak, i durueshëm në momente të rënda, i shpejtë në veprime dhe i disiplinuar".

 

Alimusaj theksoi se Sali Çekaj kishte besim në idealin e tij, në vendin dhe në shokët e tij politik e ushtarak. Salih Çekaj ka bërë luftë institucionale dhe profesionale, nënvizoi Alimusaj.

Të pranishmit në këtë akademi përkujtimore, në emër të familjarëve i përshëndeti Migjen Çekaj, i biri i komandantit Sali Çekaj.

LDK në Gjermani ka bërë të ditur për themelimin e çmimit vjetor me emrin Sali Çekaj, i cili do t'u ndahet individëve, organizatave dhe institucioneve që japin kontribut për lirinë, pavarësinë dhe demokracinë e Kosovës.
Në fund të akademisë u shfaq filmi dokumentar "Gurëthemeli i pavarësisë", kushtuar figurës heroike të Sali Çekajt.

 

 

Paskal Moro, shefe e re e UNHCR-it në Kosovë

 

Prishtinë, 27 prill 2004 - Zonja Paskal Moro iu bashkua UNHCR-së në Kosovë, duke marrë postin e shefes së misionit, pasi që z. Ualter Airvin, pas dy vjet pune është emëruar përfaqësues i UNHCR-së në Itali.

Me formim profesional në drejtësi dhe marrëdhënie ndërkombëtare, znj. Moro, në 15 vitet e kaluara kreu shumë detyra në UNHCR, e më së shumti në Evropën Qendrore, atë të Lindjes dhe atë Juglindore, duke përfshirë edhe Kosovën ndërmjet 1999-2000. Tani, ajo vjen nga Strasburgu i Francës, ku punonte si përfaqësuese e UNHCR-së në institucionet evropiane.

 

 

Në Uashington u zhvillua një konferencë mbi të ardhmen e Kosovës

 

Uashington, 27 prill 2004 - Në javën e kaluar Qendra "Udro Vilson" në Uashington zhvilloi një konferencë mbi të ardhmen e Kosovës gjatë secilës ekspertë dhe analistë ranë dakord në përgjithësi se rajoni i Ballkanit mund të hyjë në një fazë më të vështirë paqëndrueshmërie.

 

Në konferencë u shpreh pak optimizëm se zgjidhja e statusit përfundimtar të Kosovës do të kontribuonte për qëndrueshmëri në rajon. Komentet më pesimiste i bëri analisti i çështjeve të sigurimit, Dejvid Kenin, i cili argumentoi se përpjekjet e mira të komunitetit ndërkombëtar nuk do të jenë të suksesshme po qe se fraksionet rivale etnike të rajonit nuk dëshirojnë një zgjidhje paqësore të konfliktit.

Z. Kenin shprehu bindjen se nuk do të ketë zgjidhje afatgjate nëse njerëzit në rajon nuk vendosin të marrin përgjegjësi për të ardhmen e tyre. "Nëse trupat tona largohen, nëse pushtimi de fakto merr fund ashtu do të marrë fund edhe situata e tanishme.

 

Nuk do të ketë më Bosnje, do të ketë diçka tjetër dhe çdo gjë do të jetë e lakmueshme për t'u rrëmbyer përsëri, ka thënë analisti Kenin. Ai tha se pavarësia e Kosovës do të zgjidhte pak probleme, por mund të nxiste shpërbërje të etniteteve të tjera në ish-Jugosllavi.

Ndërkaq Gert Ahrens diplomat gjerman në pension me një eksperiencë 15-vjeçare në Ballkan tha se Serbia është dobësuar ndjeshëm nga humbjet që ka pësuar gjatë shpërbërjes dhjetëvjeçare. Vendi tha ai është dobësuar aq shumë psikologjikisht sa që situata atje është e ngjashme me atë në Gjermani pas Luftës së Parë Botërore.

 

Ai vuri theksin në lidhjet historike të Serbisë në Kosovë dhe realitetin zhgënjyes që Serbia nuk do të riafirmojë sundimin e saj mbi rajonin e përbërë nga 90 për qind shqiptarë. Z. Ahrens favorizoi pavarësinë e Kosovës, por shprehu shqetësim se një zhvillim i tillë mund të përshpejtojë shpërbërjen e Maqedonisë, ku gati një e treta e popullësisë është shqiptare. Sipas tij Marrëveshja e Ohrit për ndarjen e pushtetit në Maqedoni nuk po funksionon.

Folësit tjerë në konferencë mbështeten një propozim nga Instituti Amerikan i Paqes për të parandaluar dështimet tjera në rajon. Ky institut po i bënë thirrje Shteteve të Bashkuara të Amerikës dhe Bashkimit Evropian të shtojnë përpjekjet për të nxitur paqen dhe qëndrushmërinë në Ballkan, transmeton Z.A.

 

 

Dy deputetë serbë në Këshillin e Evropës u suspenduan nga Asambleja Parlamentare

 

Strazburg, 27 prill 2004 - Dy deputetë që përfaqësojnë Serbinë dhe Malin e Zi në Këshillin e Evropës u suspenduan dje nga Asambleja Parlamentare e Këshillit të Evropës deri me një vendim të dytë.

 

Propozimi për këtë u bë nga një eurodeputet nga Sllovenia. Në të vërtetë eurodeputeti slloven Roman Jakiç i kërkoi kryetarit të Asamblesë Parlamentare të Këshillit të Evropës Peter Shirer që të mos ua njohë letrat kredenciale dy anëtarëve të delegacionit të Serbisë dhe Malit të Zi, pasi udhëheqësit e partive ku ata bëjnë pjesë proçedohen nga Tribunali i Hagës për krime lufte.

 

Fjala është për Vojisllav Sheshelin dhe Sllobodan Millosheviqin. Peter Shirer e hodhi në votë propozimin e eurodeputetit slloven, i cili mori mbështetjen e 10 kolegëve të tij në sallë.

Eurodeputetët serbë nuk do të kenë as të drejtën e votës derisa Komiteti politik i Këshillit të Evropës të shqyrtojë gjendjen dhe të marrë një vendim përfundimtar.

 

 

Mbrëmë në Maqedoni ka filluar heshtja parazgjedhore

 

Shkup, 27 prill 2004 - Mbrëmë në mesnatë në Maqedoni ka filluar heshtja parazgjedhore. Kandidatët presidencial Branko Cërvenkovski nga Lidhja Socialdemokrate dhe Sashko Kedev nga VMRO-DPMN vetëm disa orë do të agjitojnë qytetarët që të fitojnë votën e tyre në raundin e dytë të zgjedhjeve presidenciale të caktuara për 28 prill.

 

 

Në Tiranë është mbajtur edhe një protestë e të përndjekurve politikë

 

Tiranë, 27 prill 2004 - Në Tiranë edhe dje është mbajtur një protestë e të përndjekurve politikë në kohën e diktaturës komuniste. Gjatë protestave që u organizuan para Kuvendit të Shqipërisë pati edhe incidente ndërmjet policisë dhe protestuesve.

 

Njëherësh në Kuvendin e Shqipërisë zhvillohej debat i ashpër. Protestuesit kërkojnë miratimin e ligjit për kompensimin e tyre. Përreth godinës së parlamentit ishi ndërmarrë masa të larta sigurie. Opozita shqiptare ka kërkuar në seancën e djeshme përfundimin e punimeve për sa kohë që Kuvendi ishte i rrethuar me policë dhe protestues.

Opozita kërkoi që në rendin e ditës të diskutohet Ligji për kompensimin e ish të përndjekurëve politikë.

 

 

Një snajperist ka vrarë të pakten dy policë në qytetin indonezian Ambon

 

Ambon, Indonezi, 27 prill 2004 - Një snajperist ka vrarë sot (e martë) të pakten dy policë në qytetin indonezian Ambon, ku dhuna ndërmjet muslimanëve dhe kristianëve ka shpërthyer që prej të dielës, njofton BBCWorld.

 

Rreth njëmijë policë janë dërguar në ujëdhesat Molucane, por përkundër tyre, të pakten 24 njerëz janë vrarë brenda dy ditëve. Mbi pesë mijë njerëz kanë humbur jetën në rajon që kur ka shpërthyer konflikti ndërfetar më 1999.

 

 

Në Naxhaf janë vrarë 43 pjesëtarë të forcave antikoalicion

 

Naxhaf, Irak, 27 prill 2004 - Forcat amerikane të mbështetura nga aeroplanët kanë vrarë në përleshjet gjatë natës 43 pjesëtarë të forcave antikoalicion afër qytetit të shenjtë irakian, Naxhaf, kanë bërë të ditur sot (e martë) banorët dhe ushtria amerikane, njofton Rojter.

 

Po kështu, bëhet e ditur se një sistem kundërajror i forcave antikoalicion është shkatërruar nga forcat ajrore të koalicionit amerikan. Zëdhënësja ushtarake amerikane nuk ka dhënë detaje më të hollësishme për incidentin.

 

 

Trupat izraelite kanë vrarë 2 palestinezë dhe një tjetër e kanë plagosur rëndë

 

Nablus, 27 prill 2004 - Trupat izraelite kanë vrarë sot (e martë) dy palestinezë dhe një tjetër e kanë plagosur rëndë në një shkëmbim zjarri në një kamp refugjatësh në Bregun Perendimor, njofton AP.

 

Të vrarët kanë qenë pjesëtarë të grupit islamik Hamas, kanë thënë zyrtarët e sigurimit palestinezë. I plagosuri është dërguar në një spital izraelit, kanë thënë dëshmitart. Nuk është e qartë nëse i plagosuri ka qenë këmbësor.

 

 

Patrulla të përbashkëta amerikano irakiane në Falluxha

 

Bagdad, 27 prill 2004 - Trupat amerikane dhe forcat irakiane të sigurimit kanë në plan të follojnë stë martën patrullat e përbashkët në qytetin e trazuar të Falluxhës, një ditë pas përleshjeve të fundit vdekjepurëse.

Të paktën 8 kryengritës irakianë dhe një marins amerikan u vranë të hënën në luftimet që shpërthyen atje, megjithëse në qytetin kryesisht mysliman ishte shpallur armëpushimi.

Nënkomandanti i operacioneve të koalicionit në Irak, Gjenerali Mark Kimmitt, tha se marinsat u sulmuan nga kryengritësit, që hapën zjarr me armë të lehta dhe granada nga dritaret e minaresë së një xhamie.

 

 

Gjashtë urdhëra të tjerë arresti në lidhje me shpërthimet e Madridit

 

Madrid, 27 prill 2004 - Spanja nxori gjashtë urdhëra të tjerë arresti në lidhje me shpërthimet e 11 marsit në trenat e Madridit. Autoritetet kanë përhapur afishe me emrat, fotografitë dhe datëlindjet e personave të dyshuar. Në afishe është identifikuar vetëm kombësia e marokenit Said Berraxh.

Autoritetet spanjolle mendojnë se ekstremistë myslimanë të lidhur me al-Kaidën mbajnë përgjegjësinë për shpërthimet e 11 marsit në katër trena të Madridit që shkaktuan vdekjen e 191 vetave.

15 të dyshuar, 13 marokenë, një spanjoll dhe një sirian, mbahen në burg nën akuza, duke filluar nga pjesëmarrje në shpërthime deri te bashkëpunimi me një organizatë terroriste.

 

 

Ministrat e jashtëm të BE-së do të vazhdojnë debatet mbi projekt-kushtetutën

 

Bruksel, 27 prill 2004 - Ministrat e jashtëm të Bashkimit Evropian ranë dakord të vazhdojnë debatet mbi projekt-kushtetutën e organizatës me synimin që të zgjidhen mosmarrëveshjet deri në mes të qershorit.

Bisedimet do të rifillojnë më 17 maj. Më 17 dhe 18 qershor do të organizohet një takim i nivelit të lartë në Bruksel. Ky takim do të përfshijë drejtuesit e qeverive dhe të shteteve nga 10 vendet e reja anëtare që do të hyjnë në Bashkimin Evropian të shtunën, më 1 maj.

Bisedimet mbi projektrezolutën e Bashkimit Evropian dështuan në dhjetor pas mosmarrjeshjeve lidhur me rregullat e reja të votimit.

 

 

Pauell kërkon delegim të pushtetit

 

Uashington, 27 prill 2004 - Sekretari amerikan i shtetit, Kolin Pauell ka thënë se qeveria e përkohshme irakiane që do të marrë pushtetin pas 30 qershorit duhet t'i kalojë një pjesë të sovranitetit përsëri SHBA-së.

Pyetja që ngrihet tani pas këtyre fjalëve është se sa pushtet të vërtetë duhet të ketë më 1 korrik qeveria e re e përkohshme irakiane. Zyrtarët amerikanë kanë thënë se pushteti duhet të jetë i kufizuar, megjithëse kjo është diçka kontradiktore. Tani Pauell ka ofruar një formulë të re.

 

Ai thotë se qeveria irakiane do të marrë sovranitetin e plotë të Irakut dhe pastaj t'i japë një pjesë amerikanëve, kështu që SHBA të vazhdojnë të mbeten në komandën e trupave të veta në vend.

 

 

Diplomatët britanikë kanë kritikuar politikën e Blerit

 

Londër, 27 prill 2004 - Më shumë se 50 ish diplomatë britanikë kanë kritikuar ashpër kryeministrin Toni Bler si dhe kanë sulmuar politikën amerikane dhe britanike në Irak dhe Lindjen e Mesme.

Në një letër drejtuar zotit Bler, ish ambasadorët dhe diplomatë të tjerë të rangut të lartë thanë se kryeministri duhet ose të influencojë mbi atë që ata e përshkruan si politikë e Uashingtonit e destinuar për të humbur, ose të mos e përkrahë më atë.

Ata thanë se ishte e qartë se nuk kishte patur plane për drejtimin e Irakut pas Sadam Huseinit. Diplomatët i përshkruan njoftimet e fundit të presidentit Bush dhe kryeministrit izraelit, Ariel Sharon mbi Gazën dhe Bregun Perëndimor si të njëanshme dhe ilegale.

 

 

Afganistani ka kryer ekzekutimin e parë me vdekje që kur është përmbysur regjimi i talibanëve

 

Kabul, 27 prill 2004 - Afganistani ka kryer ekzekutimin e parë me vdekje qëkur është përmbysur regjimi i talibanëve para dy vjetëve, njofton BBCnews.

 

Një ish-komandant ushtarak, i akuzuar për vrasje, është vrarë javën e kaluar me një të shtënë në kokë në një burg jashtë Kabulit, bëhet e ditur sot (e martë). Presidenti Karzai e ka nënshkruar vendimin me vdekje, por, siç ka thënë zëdhënësja e tij, me gjysmë zemre.

 

 

Në një aksident në Indi kanë humbur jetën të pakten 12 fëmijë

 

Kalkuta, 27 prill 2004 - Të paktën 12 fëmijë indianë kanë humbur jetën, kurse 20 të tjerë janë lënduar, disa syresh rëndë, në një aksident kur autobusi i shkollës është përplasur me një tren në shtetin e Bengalit Perendimor, afër qytetit Xhalpaiguri, rreth 450 km në veri të Kalkutës, ka bërë të ditur policia, njofton BBCnews. Në autobus ndodheshin 40 nxënës.

 

 

Gadafi ka filluar vizitën e tij të parë pas 15 vjetësh në Evropë

 

Bruksel, 27 prill 2004 - Lideri libian, Muamer Gadafi, ka filluar vizitën e tij të parë pas 15 vjetësh në Evropë dhe ka mbërritur sot (e martë ) në Bruksel për një vizitë dyditëshe, njofton BBCWorld.

 

Vizita shënon fazën më të re në rihyrjen e Libisë në bashkësinë ndëkombëtare pas përjashtimit shumëvjeçar. Kjo vizitë përmbyll një muaj të suksesshëm për liderin libian pas vizitës së kryeministrit britanik Toni Blder në Tripoli.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |