Përmbajtja:

• Presidenti Rugova në SHBA: nesër takohet me Sekretarin e Përgjithshëm të OKB-së, Kofi Anan

• Daci shprehet optimist se pavarësia e Kosovës mund të realizohet në vitin 2005

• Në një analizë të Qeverisë thuhet se shkaqet e trazirave të marsit ishin të natyrës politike, ekonomike dhe sociale

• GNK rekomandon ndryshime si te vendorët ashtu edhe te ndërkombëtarët

• Gjilan: Romët janë qytetarë të barabartë me të gjithë të tjerët

• Për pesë vite - 61 raste të uzurpimit të pronës komunale

• Nesër fillon diskutimi publik për Projektplanin Strategjik të qytetit të Prishtinës

• Në takimin e ministrave të BE-së do të shyrtohet situata më e re në Kosovë

• Sot fillon sesioni pranveror i Asamblesë Parlamentare të KE, ku do të diskutohet edhe për Kosovën

• Në Stamboll të Turqisë përfundoi konferenca e ministrave të arsimit të vendeve të rajonit dhe të Evropës Juglindore

• Oda e Avokatëve të Kosovës për kryetar të ri zgjodhi Adem Vokshin

• Mevlyde Saraçi u rizgjodh kryetare Forumit të Gruas së LDK-së në Gjakovë

• Nga aktiviteti i degës së LDK-së në Suedi

• Po zhvillohen hetimet nëse polici nga Jordania ka pasur lidhje me Hamasin

• Izabela Karlovic nuk është më zëdhënëse e administratës së UNMIK-ut

• Tirana zyrtare vlerëson se pjesëmarrja e gjerë në votime do të jetë në shërbim të stabilitetit të Maqedonisë e rajonit

• Bujanoc: PVD nuk po i përmbahet afatit për mbajtjen e zgjedhjeve të parakohshme, thotë LPD

• Sipas Çoviqit, ekziston edhe Grupi i dytë sekret për Kosovën

• Tetë kryengritës janë vrarë dhe katër marinsa amerikanë janë plagosur në Falluxha

• Nga rrëshqitjet e dheut në një fshat në Kirgizistan kanë humbur jetën mbi 33 njerëz

• Forcat kryengritëse kanë vrarë 8 ushtarë rusë në Çeçeni

• Në Shri Lankë janë vrarë 7 kryengritës të Tigrave Tamilë

• Nga një shpërthim në Bagdad janë vrarë 2 ushtarë dhe 4 të tjerë janë plagosur

• Rreth 300 ushtarë amerikanë kanë hyrë në Naxhaf për të zëvendësuar trupat spanjolle në tërheqje

• Tre marinsa amerikanë janë plagosur në një pritë në Afganistan

• Në Irak është sulmuar kolona në të cilën ndodhej edhe presidenti bullgar

• Në luftimet në Indonezi janë vrarë të pakten 14 njerëz

• Në katër sulme të veçanta në Irak janë plagosur 8 ushtarë amerikanë

• Në Irak është vrarë një ushtar amerikan dhe u plagosën dy të tjerë

• Bashkimi Evropian do të diskutojë për Qipron

• Punonjës ndërkombëtarë të ndihmave flasin për një shkatërrim të plotë në Korenë e Veriut

• Takimi vjetor i Bankës Botërore dhe FMN-së

• Fisher presidenti i ri austriak

• Sulmohen rafineritë e Basrës

• Në një sulm të militantëve palestinezë është vrarë një polic izraelit

Presidenti Rugova në SHBA: nesër takohet me Sekretarin e Përgjithshëm të OKB-së, Kofi Anan

 

Nju-Jork, 26 prill 2004 - Presidenti i Kosovës Ibrahim Rugova, i cili ndodhet për një vizitë disaditëshe në Shtetet e Bashkuara të Amerikës, do të ketë takime me zyrtarë të administratës amerikane, ndërkaq të martën do takohet me Sekretarin e Përgjithshëm të OKB-së, Kofi Anan.

Presidenti Rugova pas arritjes në Nju Jork, për nder të tij, komuniteti shqiptar, Dega e LDK-së, pastaj Këshilli Kombëtar Shqiptaro-Amerikan dhe Shoqata Panshqiptare "Vatra" organizuan një darkë në Nju-Xhersi.

Duke folur para shqiptar-amerikanëve, Presidenti Rugova tha se kishte ardhur në SHBA që të takohet dhe të bisedojë miqtë e Kosovës.

 

"Kam ardhur që t'i vizitoj miqtë tanë, t'ju vizitoj juve dhe posaçërisht kam ardhur për Kosovën dhe çështjen e saj, për mundësitë e realizimit të pavarësisë së Kosoëvs, që ne të gjithë e dëshirojmë dhe që të gjithë punojmë për të", theksoi Presidenti Rugova, duke folur në këtë takim.

Pastaj ai foli për progresin e arritur në Kosovë në të gjitha fushat e jetës, si në planin ekonomik, ashtu edhe politik, ndërkohë që, siç tha, Kosova po hyn në një fazë të re të zhvillimit ekonomik, të investimeve, të privatizimit dhe proceseve të tjera që janë të domosdoshme për zhvillimin e Kosovës.

Duke folur për ngjarjet e marsit, Presidenti Rugova tha se ato ishin të dhimbshme, të papranueshme, ishin ngjarje që kishin për qëllim të dëmtojnë imazhin e Kosovës, prandaj të gjitha institucionet e vendit i kanë dënuar ato, tha ai, duke shtuar se ndaj atyre që kanë përdorur dhunën do të merren masa.

 

"Protestat janë pjesë e jetës demokratike, por dhuna dhe sjelljet shkatërrimtare që kishin për qëllim shkatërrimin e Kosovës, nuk do të lejohen kurrsesi", nënvizoi Presidenti Rugova.

Në vazhdim të fjalës së tij, Presidenti Rugova foli për transferin e kompetencave nga UNMIK-u tek institucionet vendore, si dhe për zgjedhjet e ardhshme nacionale gjatë tetorit për të vazhduar me proceset e mëtejshme demokratike.

Kongresisti amerikan Eliot Engëll, pjesëmarrës në këtë darkë, tha se miqtë e Kosovës në Amerikë do të angazhohen edhe mëtutje për jetësimin e pavarësisë së Kosovës, sepse kjo do të ndodhë dhe është një kauzë e drejtë.

 

Ai tha se askund në botë Shtetet e Bashkuara të Amerikës nuk kanë miq më të mëdhenj se tek shqiptarët dhe kjo e obligon Amerikën, që të ketë një përgjegjësi më të madhe si ndaj Kosovës, ashtu edhe ndaj shqiptarëve kudo në Ballkan.

Poashtu në këtë mbrëmje foli edhe profesori Dejvid Filips, i cili u shpreh me fjalë të zgjedhura pë Kosovën dhe duke vlerësuar lart figurën e Ibrahim Rugovës.

Presidentin e Kosovës e përshëndetën në këtë takim edhe kryetari i degës së LDK-së Agim Rexhaj, kryetari i "Vatrës" Agim Karagjozi, përfaqësuesi i Këshillit Shqiptaro-Amerikan, ai i Legalitetit etj.

Presidenti Rugova pati një takim tjetër me zëvendësguvernatoren e shtetit Pensilvania, ndërkaq sot Presidentit Rugova do t'i jipet një mirënjohje e veçantë si mik i Shteteve të Bashkuara të Amerikës.

Të martën presidenti i Kosovës takohet me Sekretarin e Përgjithshëm të OKB-së, z. Kofi Anan, ndërkaq të enjtën dhe të premtën ai do të jetë në Uashington për takim me zyrtarë të Departamentit të Shtetit dhe Shtëpisë së Bardhë.

 

 

Daci shprehet optimist se pavarësia e Kosovës mund të realizohet në vitin 2005

 

Londër, 26 prill 2004 - Kryeparlamentari Nexhat Daci thotë se qëndrimi ndërkombëtar ndaj Kosovës ka filluar të ndryshojë dhe se pritet bartja më e shpejtë e përgjegjësive në duart e kosovarëve, përfshirë edhe ato përgjegjësi që janë të rezervuara për UNMIK-un.

 

Por zoti Daci tha se institucionet e Kosovës duhet që tani të jenë më të kujdesshme ndaj pakicave në veçanti asaj serbe. Daci këto komente i bëri sot për BBC-në në Londër, ku mori pjesë në një konferencë për Kosovën.

"Ka një kthesë shumë pozitive reth vlerësimeve që unë i kam dhënë një vit më parë, dhe çuditërisht ka një përputhje mendimesh rreth zhvillimeve në Kosovë në këto vite", theksoi Daci.

 

Sipas tij, ajo që është premtuese dhe në të mirë të Kosovës ka përafrim të qarqeve rreth përshpejtimit të kalimit të përgjegjësive në duart e institucioneve vendore. "Mua më gëzon fakti se do të rriten kapacitet e qeverisë së Kosovës.

 

Është mendim i përafërt se qeveria jonë duhet të kompletohet me të gjitha organet e saj, do të thotë gati të gjitha ministritë pos asaj të mbrojtjes, të cilën ne nuk e kemi kërkuar ndonjëherë", nënvizoi Daci.

I pyetur nëse pavarësia e Kosovës mund të realizohet në vitin 2005, kryeparlamentari Daci tha se është optimist dhe mendon se po. "Do të duhet një punë më serioze nëpër parti politike. Dhe në qoftë se vërtet e kemi një seriozitet, siç flasim, unë them po", ritheksoi Daci.

 

 

Në një analizë të Qeverisë thuhet se shkaqet e trazirave të marsit ishin të natyrës politike, ekonomike dhe sociale

 

Prishtinë, 26 prill 2004 - Në një propozim analizë të kryeministrisë së Kosovës thuhet se shkaqet e trazirave të marsit ishin të natyrës politike, ekonomike dhe sociale. Në kategorizimin e shkaqeve që i ka nxitur trazirat hynë edhe zhgënjimi me sistemin aktual të qeverisjes dhe pakënaqësinë e thellë për shkak të mungesës së rezultateve të pritura në planin politi.

 

Po ashtu edhe situata e rëndë ekonomike dhe sociale, por edhe mangësitë dhje paqartësitë e Kornizës Kushtetuese dhe Rezolutës 1244 numrohen si shkaqe që nxitën trazirat e marsit, të cilat lanë pas 19 të vdekur, qindra të plagosur dhe shumë dëme materiale.

Në këtë analizë zyra e kryeministrit ka konstatuar se anarkia e dy ditëve të marsit ka sjellë pasoja shkatërruese për vendin si dhe ka arritur të ndryshojë imazhin e Kosovës në arenën ndërkombëtare. Në prani të gjithë botës së civilizuar ne dështuam të tregojmë se jemi pjesë e këtij civilizimi, thuhet në analizën e Qeverisë së Kosovës.

 

 

GNK rekomandon ndryshime si te vendorët ashtu edhe te ndërkombëtarët

 

Prishtinë, 26 prill 2004 - Duke prezentuar sot në Prishtinë raportin e Grupit Ndërkombëtar të Krizave, përfaqësuesi i këtij grupi Aleks Anderson, tha se trazirat e marsit kanë nxjerrë në shesh mungesën e institucioneve, të udhëheqjes dhe mënyrën për absorbimin e pakënaqësive.

 

Në raporton e titulluar "Kolapsi në Kosovë", Anderson vlerësoi se Beogradi vazhdimisht është përpjekur për destabilizmin e Kosovës, e jo të mbrojë monirotetin serb, tha ai. Gjithashtu Anderson tha se trazirat kanë treguar se probleme ka edhe në misionin e KFOR-it, duke shtuar se ka pasur shumjë raste kur trupat paqeruajtëse vetëm janë larguar nga vendi i ngjarjes.

 

Sipas tij, KFOR-i u bë një forcë me komandë më pak unike sesa ishte më parë, ndërkohë që ka lavdëruar qëndrimin e pjesëtarëve të SHPK-së, të cilët, siç tha, megjithëse nuk është i trajnuar për situata të tilla, në të shuntën e rasteve ka vepruar si duhet.

Anderson tha se rrjedhat që çojnë në destabilizimin e situatës janë të paparashikueshme, dhe po qe se nuk ndërmerren masa të mënjehershme, atëherë Kosova rrezikon të bëhet "Bregu Perendimor i Evropës", duke rekomanduar ndryshime si tek vendorët ashtu edhe tek ndërkombëtarët.

Ai tha se Qeveria dhe shoqëria civile duhet të mobilizohen kundër dhunës, duke shtuar se më 17 mars ka pasur një reagim spontan të lidershipit, por që tani mund të bëhen konsolidime.

Anderson porositi që serbët e Kosovës duhet ta kuptojnë se nuk është real besimi i tyre se do të kenë mbrojtjen e forcave serbe të sigurisë. Ata duhet të akomodohen me shumicën shqiptare, e cila, nga ana e vet, duhet t'u ofrojë këtë mundësi, tha ai.

Anderson tha se edhe UNMIK-u duhet të pësojë ndryshime edhe në mandat edhe në strukturë. "Vetë udhëheqja e UNMIK_ut duhet t'i kërkojë këto ndryshime. "Kemi nevojë për më shumë udhëheqësi të UNMIK-ut e jo vetëm për zbatim të vendimeve të marra, nga selia e OKB-së dhe nga kryeqytetet e tjera", tha Anderson.

GNK rekomandon edhe rritjen e rolit të Grupit të Kontaktit për Kosovën dhe një qëndrim më të qartë të bashkësisë ndërkombëtare për statusin përfundimtar të Kosovës. GNK rekomandon rregullimin e strukturave paralele serbe në mënyrë që serbët të shohin në Kosovë një ardhmëri afatgjatë.

Qeverisë së Serbisë i rekomandohet të vazhdojë dialogin me Prishtinën për çështjet teknike.

 

 

Gjilan: Romët janë qytetarë të barabartë me të gjithë të tjerët

 

Gjilan, 26 prill 2004 - Romët në komunën e Gjilanit janë qytetarë të barabartë me të gjithë të tjerët dhe kështu duhet edhe të ndjehen, ka thënë Xhemajl Hyseni, zëvendëskryetar i komunës, në takimin me përfaqësuesit e romëve, të cilët programin e vizitave të komunitetit dhe takimet me institucionet komunale i kanë filluar në Gjilan, ndërsa do t`i vazhdojnë në Ferizaj dhe Obiliq.

Gani Toska tha se dëshiron që romët në Gjilan të kenë trajtim të njëjtë me komunitetet tjera, si në shfrytëzimin e buxhetit komunal të paraparë për pakicat, ashtu edhe në shkollim, punësim dhe mbështetje sociale. Ai tha se është i habitur se si romët nuk janë të përfaqësuar fare në Komitetin për Komunitete dhe Komitetin për Ndërmjetësim.

Ndërkaq, sipas Gazmend Saliloviqit, aktivist nga Graçanica, romët janë të frikësuar pas trazirave të marsit, anipse ato nuk kanë qenë të drejtuara direkt kundër tyre. Ai tha se komuniteti rom është i gatshëm të integrohet në institucionet dhe shoqërinë kosovare.

Xhemajl Hyseni, zëvendëskryetar i komunës, tha se papunësia është një problem i përgjithshëm në Kosovë, ndërsa sa i përket arsimimit të fëmijëve romë, ai tha se komuna ka ofruar për ta hapësirë në shkollën "Thimi Mitko", por është refuzuar. Ai tha se komuna nuk ka bërë aq sa duhet për romët, por ka bërë aq sa ka mundur, pa privilegjuar dhe pa anashkaluar asnjë komunitet.

Edhe kryeshefi ekzekutiv Enver Muja tha se gjendja e romëve në komunën e Gjilanit është më ndryshe, seç e prezentuan përfaqësuesit e këtij komuniteti, ndërsa i ftoi ata që të jenë më aktivë në zyrën e komuniteteve.

 

 

Për pesë vite - 61 raste të uzurpimit të pronës komunale

 

Gjilan, 26 prill 2004 - Uzurpimet e pronës shoqërore nuk janë ndonjë dukuri e re as në Gjilan, por ato janë zhvilluar me një tendencë më të shpejtë pas luftës. Drejtori i pronës, Alban Qerimi thotë se gjatë pesë viteve të kaluara janë regjistruar 61 raste të uzurpimeve, ndërsa nuk e përjashton mundësinë që të ketë edhe më tepër.

Ka filluar aksioni për rikthimin e pronës komunale në Gjilan, e cila në periudha të ndryshme është përvetësuar njëanshëm nga persona të pandërgjegjshëm. Alban Qerimi, ushtrues i detyrës së drejtorit për gjeodezi, kadastër, pronë dhe banim thotë se gjatë javës që vjen do të rikthehen 6 prona të uzurpuara, ndërsa procedura do të vazhdojë edhe me 32 prona tjera, të cilat do të rimerren gradualisht.

Gjatë kësaj jave iu janë shpërndarë vërejtjet gjashtë uzurpatorëve dhe atyre iu është kërkuar që brenda afatit 7 ditor t`i largojnë objektet e tyre nga prona komunale.

Ka keqkuptime edhe sa i përket aerofotogrametrisë, sepse disa qytetarë mendojnë se ky është një rast i mirë për t`i legalizuar uzurpimet. Kjo nuk do të ndodhë asnjëherë, thotë z. Qerimi.

 

 

Nesër fillon diskutimi publik për Projektplanin Strategjik të qytetit të Prishtinës

 

Prishtinë, 26 prill 2004 - Prej nesër në lokalet e Drejtoratit për Shërbime Publike të Kuvendit Komunal të Prishtinës, i cili gjendet në afërsi të hotelit "Grand" në Prishtinë, do të fillojë diskutimi publik për miratimin e Projekt-planit Strategjik Urban të Prishtinës.

Diskutimi publik do të zgjasë 30 ditë që nga dita e nesërme dhe ai fillon çdo ditë prej orës 10:00 dhe përfundon në orën 15:00.

Të përkujtojmë se diskutimi publik lidhur me Projektplanin Strategjik Urban të Prishtinës organizohet nga Drejtorati për Planifikim dhe Urbanizëm i KK të Prishtinës, ndërsa ekspertët e këtij Drejtorati do të kujdestarojnë vazhdimisht për t'i informuar qytetarët çdo ditë gjatë orarit të përcaktuar kohor.

Gjatë diskutimit publik 30 ditësh, qytetarët e Prishtinës mund të informohen detajisht për këtë projektplan, si dhe mund t'i japin vërejtjet dhe sugjerimet rreth tij.

Në mbledhjen e fundit javën e kaluar të Asamblesë Komunale të Prishtinës, me shumicë votash është miratuar vendimi për Projektplanin Strategjik Urban të Prishtinës.

 

 

Në takimin e ministrave të BE-së do të shyrtohet situata më e re në Kosovë

 

Bruksel, 26 prill 2004 - Në Bruksel do të mbahet takimi i ministrave të jashtëm të Bashkimti Evropian. Sipas njoftimeve nga Brukseli në këtë takim ministrat e jashtëm të BE-së do të shqyrtojnë situatën më të re në Kosovë.

 

 

Sot fillon sesioni pranveror i Asamblesë Parlamentare të KE, ku do të diskutohet edhe për Kosovën

 

Strazburg, 26 prill 2004 - Sot në Strazburg fillon sesioni pranveror i Asamblesë Parlamentare të Këshullit të Evropës, në të cilin ndër të tjera do të diskutohet edhe për Kosovën. Njoftohet se raportin mbi gjendjen në Kosovë në këtë sesion më 29 prill do ta paraqes shefi i UNMIK-ut, Hari Holkeri.

 

 

Në Stamboll të Turqisë përfundoi konferenca e ministrave të arsimit të vendeve të rajonit dhe të Evropës Juglindore

 

Stamboll, 26 prill 2004 - Në Stamboll të Turqisë dje ka përfunduar konferenca dyditore e ministrave të arsimit të vendeve të rajonit dhe të Evropës Juglindore në të cilën u diskutuan ndryshimet në fushën e arsimit të lartë.

 

Në këtë takim ka marrë pjesë edhe ministri i Arsimit, Shkencës dhe Teknologjisë së Kosovës Rexhep Osmani, i cili edhepse në cilësin e vëzhguesit në diskutimin e tij në këtë takim tha se Kosova ka arritur përparime të dukshme në zhvillimin e sistemit të arsimit të lartë.

 

Ministri Osmani ka thënë se pjesëmarrja e delegacionit të Kosovës në këtë takim dëshmojë se Kosova po përcjell me kujdes të gjitha ndryshimet dhe proceset e reformave në të gjitha nivelet e arsimit në botë.

 

 

Oda e Avokatëve të Kosovës për kryetar të ri zgjodhi Adem Vokshin

 

Prishtinë, 26 prill 2004 - Oda e Avokatëve të Kosovës në periudhën e ardhshme do të angazhohet për avancimin e veprimtarisë normative, inkurajimin e femrave, minoriteteve dhe të të rinjve për ushtrimin e profesionit të avokatit si dhe në operacionalizimin e standardeve për sundimin e ligjit në Kosovë.

 

Kështu u tha ndër të tjera në Kuvendin vjetor të Odës së Avokatëve të Kosovës, të mbajtur në Prishtinë.

Oda e Avokatëve të Kosovës për kryetar të ri zgjodhi Adem Vokshin.

 

 

Mevlyde Saraçi u rizgjodh kryetare Forumit të Gruas së LDK-së në Gjakovë

 

Gjakovë, 26 prill 2004 - Në Gjakovë u mbajt mbledhja e Kuvendit zgjedhor të FG të LDK-së për këtë komunë, ku mori pjesë edhe Melihate Tërmkolli, kryetare e FG të LDK-së, me bashkëpunëtoret.

Programi i Lidhjes Demokratike të Kosovës është edhe program nacional dhe vetëm me LDK-në dhe me presidentin Ibrahim Rugova Kosova do ta realizojë pavarësinë, tha në këtë kuvend zgjedhor.

Forumi i Gruas është shtylla më e fortë e pavarësisë së Kosovës, sepse edhe 14 vite më parë Forumi i Gruas bashkë me veprimtarët e LDK-së ndërtoi institucionet e Kosovës.

Mbase kjo u dëshmua disa herë me fitoret e njëpasnjëshme të LDK-së dhe do të dëshmohet edhe në zgjedhjet nacionale të tetorit ku LDK do të fitojë shumicën absolute, theksoi në fjalën e saj përshëndetëse kryetarja e FG-së, Melihate Tërmkolli.

Në këtë kuvedn të grave foli edhe kryetari i KK dhe i Degës së LDK-së në Gjakovë Aqif Shehu.

Me këtë rast u lexua raporti i punës mes dy Kuvendeve nga kryetarja Mevlyde Saraçi dhe u aprovua njëzëri.
Kuvendi zgjodhi kryesinë prej 15 anëtarësh dhe dhjetë delegatë për kuvendin qendror të FG të LDK-së.

Kryetare e Degës së FG të LDK-së u rizgjodh, Mevlyde Saraçi.

 

 

Nga aktiviteti i degës së LDK-së në Suedi

 

Malme, 26 prill 2004 - Kryesia e Degës në Suedi dënon të gjitha aktet e dhunës të drejtuara ndaj pjesëtarëve të KFOR-it dhe UNMIK-ut dhe apelon te të gjithë qytetarët e Kosovës, të cilët ia duan të mirën Kosovës, që të mos bien nën ndikimin e atyre individëve, të cilët bëjnë çmos për të prishur imazhin e Kosovës para faktorit ndërkombëtarë dhe për të bllokuar procesin e njohjes formale të pavarësisë së Kosovës.

Kryesia e Degës së LDK-së në Suedi, qysh në javët e ardhshme do ti bëjë disa vizita pjesëtarëve të KFOR-it suedezë, të cilët janë kthyer në Suedi për shkak lëndimeve që kanë pësuar gjatë trazirave të marsit.
Poashtu, këto ditë pritet që të caktohet një takim me dy politikanë suedezë të partisë së Moderatëve, të cilët njëherit edhe janë deputetë në Parlamentin Evropian.

Ndërkaq, për shkak të interesimit jashtëzakonisht të madh për anëtarësim në Lidhjen Demokratike të Kosovës, ndër prioritetet kryesore të kësaj Dege do të jetë riaktivizimi i disa nëndegëve në disa qytete të mëdha në Suedi, të cilat kanë vepruar dhe kontribuar shumë në të kaluarën.

Nga kjo mbledhje, Kryesia e Degës së LDK-së në Suedi, doli me disa konkluzione.

 

 

Po zhvillohen hetimet nëse polici nga Jordania ka pasur lidhje me Hamasin

 

Prishtinë, 26 prill 2004 - Në Kosovë po vazhdojnë hetimet për të vërtetuar nëse polici nga Jordani që ka vrarë tre policë amerikanë në Mitrovicë ka pasur lidhje me lëvizjen palestineze Hamas, i ka deklaruar AP një zyrtar i lartë i NATO-s.

 

Ky polic nga Jordania, i cili u vra në këtë sulm kishte prejardhje palestineze, ndërkaq hetuesit po përpiqen të hetojnë arsyet e qëndrimit të tij në Arabinë Saudite vetëm një muaj para se të vinte në Kosovë.

 

Sipas këtij raporti, burimet zyrtare të OKB-së kanë thënë se një i mbijetuar ka deklaruar se polici jordanez ka qeshur deri sa ka shtënë me armë zjarri ndaj policëve amerikanë.

Zëdhënësi i Departamentit për Polici dhe Drejtësi i OKB-së Neraj Sing nuk përjashtoi mundësinë se po bëhet një hetim i tillë.

 

 

Izabela Karlovic nuk është më zëdhënëse e administratës së UNMIK-ut

 

Prishtinë, 26 prill 2004 - Izabela Karlovic nuk është më zëdhënëse e UNMIK-ut, ka konfirmuar administrata ndërkombëtare në Kosovë. Mirëpo, zëvendësimi ende nuk është gjetur ka bërë të ditur administrata e UNMIK-ut në Prishtinë.

Kohë më parë ishte thënë se kryeadministratori i Kosovës Hari Holkeri e ka shkarkuar zonjën Karlovic nga ky post për disa deklarata të saj që lidheshin me trazirat e 17 e 18 marsit në Kosovë.

 

 

Tirana zyrtare vlerëson se pjesëmarrja e gjerë në votime do të jetë në shërbim të stabilitetit të Maqedonisë e rajonit

 

Tiranë, 26 prill 2004 - Ministria shqiptare e Punëve të Jashtme thekson se ka ndjekur me vëmendje procesin e zhvillimit të zgjedhjeve të parakohshme presidenciale në Maqedoni, si ngjarje me ndikim për zhvillimet e brendshme në vend, por i rëndësishëm edhe për frymën e përgjithshme të proceseve në rajon.

Ajo përshëndet atmosferën e qetë dhe normale në të cilën u zhvillua raundi i parë i zgjedhjeve, duke shprehur bindjen se përmbyllja me sukses dhe në kohë e procesit zgjedhor është shumë e rëndësishme për dinamikën e zhvillimit të reformave, të procesit të integrimeve dhe zbatimit të Marrëveshjes së Ohrit.

 

Ministria e Jashtme shqiptare vlerëson se "pjesëmarrja e gjerë në votime do të jetë shprehje e angazhimit serioz politik dhe qytetar në shërbim të stabilitetit dhe përparimit të Maqedonisë e rajonit".

 

 

Bujanoc: PVD nuk po i përmbahet afatit për mbajtjen e zgjedhjeve të parakohshme, thotë LPD

 

Bujanoc, 26 prill 2004 - Kohëve të fundit Luginën e Preshevës e kanë vizituar diplomatë amerikanë dhe evropianë, por ata janë takuar vetëm me prefektët e komunave, ndonëse spektrin politik shqiptar e përbëjnë katër subjekte politike.

 

"Përfaqësuesit e lartë të organizatave ndërkombëtare nuk e shohin të udhës (jo të gjitha) të takohen me udhëheqësit e këtyre subjekteve, të cilët me siguri se do të kishin dhënë kontributin e tyre në parqitjen reale të situatës në këto komuna të Luginës së Preshevës, thuhet në një komunikatë të Lëvizjes së Progresit Demokratik (LPD) me seli në Bujanoc.

Sipas LPD-së, prefekti i Preshevës atë që e shpalos para ndërkombëtarëve nuk e praktikon edhe për opinionin publik vendor. "Shikuar nga ky prizëm i politikës 'monoetnike' të PVD-së që drejton prefekturat në Preshevë dhe Bujanoc, gjatë takimeve me ndërkombëtarët dhe vizitat si dikur në Norvegji e tashti së shpejti edhe në Amerikë, në rajonin e Luginës së Preshevës paraqiten dy realitete: një për ndërkombëtarët dhe një për opinionin publik vendor!", thekson LPD, duke kritikuar mediat lokale rajonale, për të cilat thuhet se janë bërë zëdhënëse dhe favorizojnë vetëm një subjekt - PVD-në.

PVD nuk po i përmbahet afatit të 11 marsit të këtij viti, kur i ka skaduar mandati Këshillit të Përkohshëm dhe mbajtjes së zgjedhjeve të parakohshme, thekson më tutje LPD.

"Këto kritika që po ia drejtojmë PVD-së, nuk janë qëllimkëqija dhe nuk vuajnë nga pretendimi për ta bllokuar punën e saj drejt realizimit të objektivave të saja programore", duke shtuar se këto dukuri nuk duhet të përsëriten, sepse i dëmtojnë proceset për zgjidhjen e krizës në Luginën e Preshevës, theksohet në këtë komunikatë të LPD-së.

 

 

Sipas Çoviqit, ekziston edhe Grupi i dytë sekret për Kosovën

 

Beograd, 26 prill 2004 - Nebojsha Çoviq ka deklaruar se zgjidhja e statusit përfundimtar të Kosovës ka filluar. Ai tha se me këtë publikisht po merret Grupi Përkrahës për Kosovën, të cilin e përbëjnë Grupi i Kontaktit, Bashkimi Evropian dhe UNMIK-u.

 

Sipas Çoviqit ekziston edhe Grupi i dytë sekret dhe atë e përbëjnë Shtetet e Bashkuara të Amerikës, Bashkimi Evropian dhe NATO në kuptimin, që programet të ndërtohen nga Amerika, e cila udheheqë këtë proces.

 

 

Tetë kryengritës janë vrarë dhe katër marinsa amerikanë janë plagosur në Falluxha

 

Falluxha, 26 prill 2004 - Tetë kryengritës janë vrarë dhe të paktën katër marinsa amerikanë janë plagosur gjatë shkëmbimit të zjarrit me muslimanët sunitë në qytetin e Falluxhës, thanë zyrtarët e forcave amerikane, njofton AFP.
"Njoftimet e para bëjnë të ditur për tetë armniq të vrarë dhe katër marinsa të plagosur", u tha gazetarëve koloneli Xhon Kolman.

 

 

Nga rrëshqitjet e dheut në një fshat në Kirgizistan kanë humbur jetën mbi 33 njerëz

 

Bishkek, Kirgizistan, 26 prill 2004 - Zyrtarët e emergjencës kanë bërë të ditur sot (e hënë) nga rrëshqitjet e dheut në një fshat në Kirgizistan drohet se kanë humbur jetën mbi 33 njerëz. Në njoftim thuhet se dheu ka mbuluar 12 shtëpi në fshatin Budalik, 700 km nga kryeqyteti Bishkek.

 

 

Forcat kryengritëse kanë vrarë 8 ushtarë rusë në Çeçeni

 

Moskë, 26 prill 2004 - Njoftohet se në Republikën e Çeçenisë, forcat kryengritëse kanë vrarë 8 ushtarë rusë dhe kanë plagosur edhe 20 të tjerë, njofton AP. Po në këtë njoftim thuhet se forcat ruse kanë arrestuar 200 njerëz nën dyshimin e bashkëpunimit me guerilët.

 

 

Në Shri Lankë janë vrarë 7 kryengritës të Tigrave Tamilë

 

Batikaloa, Shri Lanka, 26 prill 2004 - Në Shri Lankën lindore janë vrarë sot 7 kryengritës të Tigrave Tamilë, bën të ditur kjo lëvizje kryengritëse, njofton BBCWorld. Në njoftim thuhet se sulmues të paidentifikuar kanë hapur zjarr nga një kombibus në kampin e kryengritësve afër qytetit Batikaloa dhe kështu kanë vrarë kryengritësit e lartpërmendur.

 

 

Nga një shpërthim në Bagdad janë vrarë 2 ushtarë dhe 4 të tjerë janë plagosur

 

Bagdad, 26 prill 2004 - Dy vetë janë vrarë dhe katër të tjerë janë plagosur nga një shpërthim i fuqishëm, që hodhi në erë katër automjete ushtarake amerikane të tipit Hamvi dhe rrënoi një shtëpi në Bagdad, njofton AFP.

 

Menjëherë pas shpërthimit, trupat amerikane janë parë duke bartur me lese dy trupa. Në këtë incident janë lënduar katër civilë, përfshirë dy fëmijë. Banorët kanë thënë se kanë parë në automjete një granatë raketore pas shpërthimit. Zëdhënësi ushtarak amerikan nuk ishte në gjendje të konfirmojë incidentin.

 

 

Rreth 300 ushtarë amerikanë kanë hyrë në Naxhaf për të zëvendësuar trupat spanjolle në tërheqje

 

Naxhaf, 26 prill 2004 - Rreth 300 ushtarë dhe policë ushtarakë amerikanë kanë hyrë në bazën ushtarake në qytetin e shenjtë shiit Naxhaf, për të zëvendësuar trupat spanjolle në tërheqje dhe për të bërë trysni në milicinë radikale shiite antamerikane në kontrollimin e disa pjesëve të qytetit, njofton AP. Baza është rreth tri mila nga vendi i shenjtë shiit, që ndodhet në zemër të Naxhafit. Trupat spanjolle po përgatiten të ikin, kurse forcat amerikane kanë hyrë që të pengojnë që vendi të bjerë në duart e milicisë.

 

 

Tre marinsa amerikanë janë plagosur në një pritë në Afganistan

 

Kabul, 26 prill 2004 - Tre marinsa amerikanë janë plagosur, njëri syresh rëndë, në një pritë në provincën jugore të Afganistanit, Kandahar, që është shenja më e re e shtimit të dhunës në jugun e vendit, ka bërë të ditur sot (e hënë) ushtria amerikane, njofton Rojter. Po kështu, njoftohet për një bombë të shpërthyer dje afër një autokolone në Kandahar.

 

Zëdhënësi ushtarak e përshkroi sulmin si pritë, por s'ka dhënë detaje më të hollësishme për bombën nëse ishte incident, ku janë përzier guerilët talibanë.

 

 

Në Irak është sulmuar kolona në të cilën ndodhej edhe presidenti bullgar

 

Sofje, 26 prill 2004 - Në Irak është hapur zjarr ndaj kolonës në të cilën ndodhej edhe automobili i presidentit bullgar Georgi Përvanov, por gjatë sulmit nuk ka pasur viktima, njoftohet nga Sofja. Presidenti Përvanov ndodhet në një vizitë ushtarëve bullgarë në Irak.

 

Ndaj kolonës është hapur zjarr ndërsa po udhëtonte midis kampeve të ushtarëve bullgarë dhe polakë në pjesën jugore të qytetit Qerbela.

Informacionet para kohe të mediave polake kanë mundësuar sulmin ndaj presidentit Përvanov, thonë zyrtarët bullgarë. "Për fat të keq mediat polake kanë publikuar informacionin për vizitën e tij më herët sesa ishte e nevojshme, gjë që radikalëve shiitë u ka lënë mjaft kohë që të sulmojnë kolonën e tij", ka thënë zëdhënësi i qeverisë bullgare, Dimitar Conev.

 

 

Në luftimet në Indonezi janë vrarë të pakten 14 njerëz

 

Ambon, Indonezi, 26 prill 2004 - Njoftohet se luftime të ashpra kanë shpërthyer sot (e hënë) ndërmjet muslimanëve dhe kristianëve në ujdhesat Molucane të Indonezisë, njofton BBCWorld. Banorët e kryeqytetit provincial, Ambon, kanë njoftuar për luftime, bombardime dhe zjarrvënie sporadike.

 

Burimet spitalore kanë njoftuar për të pakten 9 persona të lënduar. Dhuna e fundit vjen pas përleshjeve të fundjavës, në të cilat janë vrarë të pakten 14 njerëz dhe mbi 100 të tjerë janë plagosur.

 

 

Në katër sulme të veçanta në Irak janë plagosur 8 ushtarë amerikanë

 

Bagdad, 26 prill 2004 - Tetë ushtarë amerikanë janë plagosur në katër sulme të veçanta në pjesën qendrore të Irakut, bëhet e ditur në një kumtesë të sotme (e hënë) të koalicionit të udhëhequr nga amerikanët, njofton AFP. Në njoftim thuhet se ata janë plagosur në sulmet e djeshme.

 

 

Në Irak është vrarë një ushtar amerikan dhe u plagosën dy të tjerë

 

Uashington, 26 prill 2004 - Një ushtar amerikan u vra dhe dy të tjerë u plagosën nga shpërthimi i një bombe në anë të rrugës në kryeqytetin irakian.

Një zëdhënës ushtarak amerikan tha se shpërthimi nxiti një shkëmbim zjarri mes forcave të koalicionit dhe personave të armatosur dhe se në zonën e luftimeve ndodheshin disa fëmijë irakianë. Ende nuk ka njoftime për vitima në radhët e cicilëve.

Ndërkohë, dy sulme me raketa në Mosul lanë 4 irakianë të vdekur dhe të paktën 10 të tjerë të plagosur. Në një incident tjetër, një ushtar amerikan vdiq nga plagët që mori dje në një sulm kundër një objekti nafte në Gjirin Persik.

 

 

Bashkimi Evropian do të diskutojë për Qipron

 

Bruksel, 26 prill 2004 - Ministrat e jashtëm të Bashkimit Evropian po përgatiten të diskutojnë rreth Qipros sopt (të hënën), në takimin e tyre të fundit para zgjerimit të organizatës më një maj.

Zyrtarët thanë se në takimin e tyre në Luksemburg, ministrat do të diskutojnë rreth mënyrave për të shpërblyer qipriotët turq për mbështetjen e një plani të Kombeve të Bashkuara për ribashkimin e ishullit.

 

 

Punonjës ndërkombëtarë të ndihmave flasin për një shkatërrim të plotë në Korenë e Veriut

 

Phenian , 26 prill 2004 - Punonjës ndërkombëtarë të ndihmave që po arrijnë në vendin e shpërthimit katastrofik të ditës së enjte në Korenë e Veriut, flasin për një shkatërrim të plotë.

Punonjësit e Kryqit të Kuq thanë se stacioni i trenit në qytetin Ryongchon dhe zonat përrreth janë shkatërruar nga shpërthimi.

Qeveria e Koresë së Veriut njoftoi për këtë katastrofë dje. Zyrtarë koreanoveriorë thanë se është konfirmuar vdekja e të paktën 154 vetave dhe plagosja e një mijë e 300 të tjerëve. 76 prej viktimave ishin fëmijë, shkolla e të cilëve u shëmb plotësisht nga shpërthimi.

 

 

Takimi vjetor i Bankës Botërore dhe FMN-së

 

Uashington, 26 prill 2004 - Ministrat e Financave të vendeve më të fuqishme ekonomike u takuan dje në Uashington dhe premtuan se do të dyfishojnë përpjekjet për të shpejtuar rritjen ekonomike në botë.

Ministrat e Financave të të ashtuquajturit Grupi i Shtatëshes takohen rregullisht për të vendosur mbi drejtimin e politikës ekonomike të Fondit Monetar Ndërkombëtar ku ata janë anëtarët më të fuqishëm.

 

Në grupin e shtatëshes bëjnë pjesë Shtetet e Bashkuara, Japonia, Gjermania, Franca, Britania, Italia dhe Kanadaja.

 

 

Fisher presidenti i ri austriak

 

Vjenë, 26 prill 2004 - Austriakët kanë zgjedhur social demokratin e opozitës, Hajnc Fisher si presidentin e tyre pasi ai kandidoi përballë ministres së jashtme, konservatores, Benita Ferrero-Valdner sipas rezultateve paraprake.

Hajnc Fisher, një parlamentar i lartë i opozitës do të jetë presidenti i parë social demokrat në 18 vjet. Fitorja e tij përballë ministres së jashtme Benita Ferrero-Valdner tregon pakënaqësinë ndaj qeverisë së koalicionit të krahut të djathtë pas reformave aspak popullore.

 

 

Sulmohen rafineritë e Basrës

 

Basra, 26 prill 2004 - Rafineria kryesore e naftës së Irakut në Basra është mbyllur pas sulmeve vetëvrasëse të koordinuara mbi pajisjet për nxjerrjen e naftës.

Në këto sulme gjetën vdekjen edhe dy marinarë amerikanë ndërsa katër të tjerë u plagosën.

Sulmet janë të para të këtij lloji që nga fillimi i luftës vitin e kaluar dhe ato përkuan më një javë të dhunshme anembanë Irakut. Sulmuesit vetëvrasës këtë radhë kanë përdorur barka për të goditur këto pajisje.

 

 

Në një sulm të militantëve palestinezë është vrarë një polic izraelit

 

Hebron, 26 prill 2004 - Një polic kufitar izraelit është vrarë dje dhe tre të tjerë janë plagosur në një sulm të mbrëmshëm të militantëve palestinezë në Bregun Perendimor, njofton BBCnews. Brigadat e martirëve Al Aksa kanë thënë se sulmin e kanë kryer për hakmarrje për vrasjen e liderit Rantisi të Hamasit.

 

Sulmi ka ndodhur në rrugë jashtë qytetit Hebron dhe policët e palagosur kanë vazhduar rrugën rreth dy km. deri në një postbllok të armatës, ku kanë marrë ndihmën e parë mjekësore.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |