Përmbajtja:

• Presidenti Rugova udhëtoi për në SHBA

• Holkeri nënshkruan urdhërin për hapjen e Zyrës së Kosovës për Bashkëpunim Ndërkombëtar

• Presidenti i Shqipërisë Alfred Moisiu i dha fund vizitës së tij dyditëshe në Kosovë

• Kryeparlamentari Daci merr në një konferencë për Kosovën në Londër

• Në Prishtinë u përkujtua trevjetori i vrasjes së Ismet Rracit

• V.Meurs: Statusi i pazgjidhur problem kyç i zgjidhjes së shumë problemeve në Kosovë

• Gjykata e Gjilanit ka ngritur akuzat ndaj 20 personave për pjesëmarrje në trazirat e marsit

• Në Vushtrri u bë rivarrimi i 11 shqiptarëve të vrarë nga forcat serbe gjatë luftës në Kosovë

• Dy shqiptarëve në Shkup rritet dënimi në 14 vjet burgim

• Koshtunica dhe deputetët e koalicioni serb "Kthimi" biseduan për autonominë e bashkësisë serbe në Kosovë

• Skefer thotë se NATO-ja për shkak të Kosovës do të mbetet në Ballkan

• Nga një predhë raketore apo mortaje në Bagdad, janë vrarë 9 irakianë

• Nga një makinë bombë në Tikrit janë vrarë pakten 4 policë irakianë

• Nga një shpërthim në një fabrikë plastike janë vrarë të pakten 2 vetë

• Ish-ylli i futbollit profesional amerikan është vrarë në Afganistan

• Pesë irakianë janë arrrestuar në lidhje me sulmet vetëvrasëse me bombë në Basra

• Gjatë kontrollit të një burgu në Brazil, policia ka gjetur 5 trupa njerëzish të masakruar

• Dëshmi të reja dramatike për masakrat në Sudan

• SHBA kërkojnë nga Izraeli të mos dëmtojë Jaser Arafatin

• Ekipe të Kombeve të Bashkuara mbërrijnë sot në Korenë e Veriut

• Pauell thotë se SHBA do të përgatisin një rezolutë të re për Irakun

• Al Sadër paralajmëron për sulme vetëvrasëse

• Në Qerbela është vrarë një ushtar bullgar

Presidenti Rugova udhëtoi për në SHBA

 

Prishtinë, 24 prill 2004 - Presidenti i Kosovës Dr.Ibrahim Rugova, mbrëmë udhëtoi për një vizitë disaditëshe në SHBA. Presidenti Rugova, i shoqëruar nga bashkëpunëtorët e tij të ngushtë, gjatë qëndrimit në Amerikë do të vizitojë shtetin federal Pensilvania, pastaj Nju Jorkun dhe Uashingtonin.

Pritet që Presidenti Rugova gjatë qëndrimit në SHBA të ketë disa takime të rëndësishme.

Kjo vizitë e Presidentit Rugova qe paraparë gjatë muajit mars, por për shkak të trazirave të 17 e 18 marsit ajo u shty.

 

 

Holkeri nënshkruan urdhërin për hapjen e Zyrës së Kosovës për Bashkëpunim Ndërkombëtar

 

Prishtinë, 24 prill 2004 - Kryeadministratori i Kosovës Hari Holkeri ka nënshkruar dje pasdite urdhërin administrativ për hapjen e një Zyre për Koordinimi dhe Bashkëpunim Ndërkombëtar brenda zyrës së kryeministrit të Kosovës. Zyra do të veprojë në bazë të autoritetit dhe udhëzimeve politike të Kryeministrit të Kosovës.

 

Veprimtaritë e saj do të jenë të bashkërenduara ngushtë me shefin e UNMIK-ut dhe në mënyrë të përshtatshme ato do të koordinohen edhe me Presidentin e Kosovës. Kjo zyrë do të përbëhet nga tri njësi që do të jenë përgjegjëse për koordinimin e veprimtarive të Qeverisë për bashkëpunimin ndërkombëtar, dialogun rajonal nga pikëpamja teknike dhe çështje protokolli që lidhen me zyrën.

 

Kryeadministratori Holkeri hodhi poshtë mundësinë që hapja tani e kësaj zyre të ketë të bëjë me zhvillimet pas trazirave të marsit. Ai tha se pas ngjarjeve fatkeqe të marsit disa gjëra duhet të vendosen në një mënyrë të re dhe shtoi se hapja e kësaj zyre u bë tash për shkak të disa procedurave ligjore që kërkuan kohë. Holkeri ka thënë se kompetencat në raport me marrëdhëniet me jashtë mbetën përgjegjësi e tij si shef i administratës së UNMIK-ut.

Ndërkaq, kryeministri Rexhepi konfirmoi se është marrë leja edhe për hapjen e një zyre për siguri publike dhe shtoi se pjesa më e madhe e zyrave të tjera që priten të hapen do të hjapen në muajin maj. Ai tha se hapja e kësaj zyre duhet të jetë bërthamë e një ministrie të jashtme të ardhshme.

 

 

Presidenti i Shqipërisë Alfred Moisiu i dha fund vizitës së tij dyditëshe në Kosovë

 

Prishtinë, 24 prill 2004 - Presidenti i Shqipërisë Alfred Moisiu i dha fund vizitës së tij dyditëshe në gjatë së cilës ai u takua me përfaqësuesit më të lartë politikë ndërkombëtarë dhe vendorë. Në fund të kësaj vizite ai tha se Shqipëria do të vazhdojë të mbështesë Kosovën në rrugët diplomatike.

Në një konferencë për shtyp në Prishtinë, presidenti Moisiu u shpreh se Qeveria e Kosovës është duke bërë një politikë energjike për të riparuar dëmet që u shkaktuan gjatë marsit dhe për të ecur përpara drejt realizimit dhe arritjes së objektivave.

"Nga Kosova po largohem me mbresat më pozitive", ka thënë Presidenti i Shqipërisë, Alfred Moisiu, në përfundim të vizitës së tij dyditëshe në Kosovë të cilën ai e vlerësoi të suksessshme. Ai tha se ka parë një Kosovë që synon për të ardhmen e saj.

Presidenti Moisiu tha se Kosova e ka pasur dhe do ta ketë mbështetjen diplomatike të Shqipërisë, duke shtuar se gjatë takimeve që ka pasur në Kosovë ka parë edhe mangësi në marrëdhëniet ndërmjet Shqipërisë dhe Kosovës, veçanërisht në lëmin e arsimit dhe të Akademisë së Shkencave.

 

 

Kryeparlamentari Daci merr në një konferencë për Kosovën në Londër

 

Prishtinë, 24 prill 2004 - Kryetari i Kuvendit, Nexhat Daci, ka udhëtuar në Londër ku do të marrë pjesë në konferencën që ka si temë "Rrethi vicioz i Kosovës - nënzhvillimet, pasiguria dhe krizat qeveritare", e cila i zhvillon punimet prej 23 deri më 26 prill.

Në këtë konferencë do të diskutohen aspekte të ndryshme të zhvillimeve në Kosovë dhe rajon dhe në të do të marrin pjesë përfaqësues të vendeve ballkanike dhe shefat e zyreve diplomatike në Prishtinë.

 

 

Në Prishtinë u përkujtua trevjetori i vrasjes së Ismet Rracit

 

Prishtinë, 24 prill 2004 - Sot në Teatrin Kombëtar në Prishtinë u mbajt një akademi përkujtimore në trevjetorin e vrasjes së Ismet Rracit, kryetar i Asamblesë komunale të Klinës dhe kryetar i degës së LDK-së për këtë komunë.   Merrnin pjesë zyrtarë të lartë të LDK-së, udhehëqës komunalë nga Klina, familjarë dhe qytetarë të Klinës dhe të Kosovës. Ismet Rraci u vra në mëngjesin e 24 prill 2004it të vitit 2001 nga një dorë kriminele.

 

Duke folur në këtë akademi për figurën e Ismet Rracit, nënkryetari i LDK-së Kolë Berisha tha: "Tash tri vjet pothuajse në çdo hap, ne përballemi me mungesën fizike të njërit nga ata që na i mori paqja.

 

Tash tri vjet, në vend se me Ismetin e gjallë, ne takohemi, përshëndetemi, komunikojmë dhe kuvendojmë vetëm përmes kujtimeve, fotografive dhe veprës së tij të rralllë", tha Berisha, duke shprehur dhembje për mikun e bashkëveprimtarin e tij shumëvjeçar Ismet rracin.

 

Por, tha Kolë Bersiha, as familjarët e Ismetit, e as bashkëmendimtarët e tij nuk guxojnë të lejojnë që dhembja ta mundë krenarinë, sepse Ismeti "është dhe do të mbetet përherë i madh, shumë i madh sesa vrasësit e tij".

Ndërkaq, Prenk Gjetaj, nënkryetar i komunës së Klinës dhe kryetar i Degës së LDK-së foli për jetën dhe aktivitetin politik e atdhetar të Ismet Rracit që nga fund vitet e viteve '80 dhe gjatë viteve 90. Ai tha se Ismet Rraci ishte një ndër themeluesit e degës së LDK-së në Klinë dhe sekretar i parë i saj e pastaj edhe kryetar i degës. Gjetaj foli edhe për veprimtarinë arsimore të Ismet Rracit, i cili edukoi shumë breza të rinjsh në frymën patriotike si arsimtar i gjuhës shqipe.

Qëndrimi kombëtar dhe demokratik, tha Gjetaj, e bënte Ismetin Rracin edhe më të dashur në mesin e miqve dhe bashkëveprimtarëve të tij. "Pikërisht para tre vjetëve kriminelët ordinerë, sikurse edhe shumë figura të ndritura të çështjes sonë, kryesisht të LDK-së, e vranë edhe këtë burrë të madh të Kosovës", tha Gjetaj, duke shtuar se "mallkimi i kësaj toke këta vrasëtarë do t'i zërë dhe do t'i ndëshkojë ashpër".

"Ismet Rraci do të mbetet dëshmor i demokracisë, metaforë e fuqishme si shprehje e dashurisë dhe e përkushtimit për liri e demokraci", tha mes tjerash Prenk Gjetaj.

Në fund të kësaj akademie u shfaq një program artistik si dhe u shfaq një videodokumentar.

 

 

V.Meurs: Statusi i pazgjidhur problem kyç i zgjidhjes së shumë problemeve në Kosovë

 

Këln, 24 prill 2004 - Wim Van Meurs, udhëheqës i projektit të fondacionit gjerman Berteslman me titullin "Kosovo's Fifth Anniversary - on the Road to nowhere" ("Përvjetori i pestë i Kosovës - në rrugë për askund"), thotë se statusi i pazgjidhur i Kosovës është problemi kyç, i cili pamundëson zgjidhjen e problemeve të shumta, siç janë papunësia, privatizimi, gjendja ekonomike etj.

"Ngritja e ngadalshme e çështjes së statusit të Kosovës në axhendën e interesimit të opinionit ndërkombëtar dhe vendor, është një prej shkaqeve krysore të shpërthimit të dhunës", tha Meurs për "Dojçe velen". Kjo nuk ishte ndoshta shkasi për shpërthimin e valës më të re të dhunës, thotë Muers, duke shtuar se qëllimi ishte pamundësimi i strategjive të palës kundërshtare dhe saktësimi i pozicioneve të veta.

Sipas këtij projekti, hapi i parë do të ishte të saktësohet edhe një herë se kthimi i Kosovës nën sovranitetin e Serbisë është i pamundëshëm.

Sipas Meursit, problemet do të mbeten nëse sovraniteti mbetet në Beograd apo në Prishtinë. Ai mendon se sovraniteti i OKB-së në Kosovë do të ishte një prej zgjidhjeve më të pranueshme në këtë kohë dhe do të mundësonte një punë më të qetë dhe më normale të përfaqësuesve ndërkombëtarë dhe vendorë në Kosovë.

 

"Mendoj se me propozimin tonë do të eliminoheshin këto mosmarrveshje sikur edhe tendencat e Beogradit për ndalimin e privatizimit dhe çështjet tjera që pamundësojnë zhvillimin ekonomik të Kosovës", thotë Meurs. Ai thekson se statusi i pazgjidhur i Kosovës pamundëson edhe zhvillimet në skenën ndërkombëtare, siç janë ndarja e kredive, privatizimi i pronës në këtë vend etj.

Meurs është i mendimit se ndarja apo kantonizimi i Kosovës nuk do të ishte e pranueshme për Kosovën, sepse gjithmonë do të mbeteshin rajone me pakica. "Ndarja do të kishte pasoja negative edhe për tërë rajonin, sepse kërkesa për ndarjen do të kishte edhe në Maqedoni dhe Bosnje-Hercegovinë", thotë Meurs.

 

 

Gjykata e Gjilanit ka ngritur akuzat ndaj 20 personave për pjesëmarrje në trazirat e marsit

 

Gjilan, 24 prill 2004 - Gjykata komunale e Gjilanit ka ngritur akuzat ndaj 20 personave të arrestuar për shkak të pjesëmarrjes në trazirat e 17 dhe 18 marsit. Sipas burimeve të Gjykatës komunale në Gjilan ka ende raste që po shqyrtohen për akuza të ngjashme.

 

 

Në Vushtrri u bë rivarrimi i 11 shqiptarëve të vrarë nga forcat serbe gjatë luftës në Kosovë

 

Vushtrri, 24 prill 2004 - Në Vushtrri u bë rivarrimi i 11 kufomave të shqiptarëve të vrarë nga forcat serbe gjatë luftës në Kosovë. Kohë më parë eshtrat e këtyre martirëve ishin kthyer nga një varrezë masive në Serbi dhe kufomat e tyre ishin identifikuar në morgun e Rahovecit.

Në ceremoninë e varrimit morën pjesë me mijëra qytetarë nga Vushtria dhe nga Kosova, përfshirë këtu edhe strukturat komunale dhe familjarët e martirëve, të cilët, pas ceremonisë së varrimit kanë vënë shumë kurora lulesh mbi varret e këtyre martirëve.

 

 

Dy shqiptarëve në Shkup rritet dënimi në 14 vjet burgim

 

Shkup, 24 prill 2004 - Gjykata e Apelit e Shkupit i ka dënuar me nga 14 vjet burgim dy shqiptarë nga një fshat i Kumanovës, të cilët janë shpallur fajtorë se në afërsi të fshatit Sopot në muajin mars të vitit të kaluar kanë vendosur një minë ku kanë humbur jetën dy pjesëtarë të kontigjentit polak të NATO-së dhe një përkthyese.

 

Ata ishin dënuar nga një gjykatë e Kumanovës, me nga 10 vjet me akuzën për terorizëm, ndërsa Gjykata e Apelit ka rritur dënimin edhe me nga 4 vjet të tjera.

 

 

Koshtunica dhe deputetët e koalicioni serb "Kthimi" biseduan për autonominë e bashkësisë serbe në Kosovë

 

Beograd, 24 prill 2004 - Kryeministri i Serbisë Vojisllav Koshtunica dhe deputetët e koalicioni serb "Kthimi" në Kuvendin e Kosovës në takimin e tyre të djeshëm në Beograd konkluduan se kërkohet mbështetje e gjërë për planin e Qeverisë serbe për zgjidhjen e situatës në Kosovë, plan i cili parasheh autonomi të bashkësisë serbe në Kosovë. Në kumtesën e Qeverisë së Serbisë theksohet se ky plan duhet të miratohet edhe nga Kuvendi i Serbisë.

 

 

Skefer thotë se NATO-ja për shkak të Kosovës do të mbetet në Ballkan

 

Lubjanë, 24 prill 2004 - Sekretari i Përgjithshëm i NATO-s, ka vizituar dje Slloveninë, vend që është anëtarësuar në NATO në fillim të këtij muaji. Gjatë takimve Skefer ka theksuar se NATO-ja do të mbetet në Ballkan pasi gjendja në Kosovë e kërkon një gjë të tillë. Njëherësh, kreu i Aleancës ka vlerësuar rolin e Sllovenisë në misonet paqeruajtëse në botë.

 

 

Nga një predhë raketore apo mortaje në Bagdad, janë vrarë 9 irakianë

 

Bagdad, 24 prill 2004 - Të paktën nëntë irakianë janë vrarë sot (e shtunë) kur një predhë raketore apo mortaje ka qëlluar në një treg, në një paralagje shiite të Bagdadit, kanë bërë të ditur dëshmitarët dhe burimet spitalore, njofton Rojter. Drejtori i spitalit ka thënë se disa nga të tridhjetë të plagosurit gjenden në gjendje të rëndë. Të paktën dy predha kanë rënë në treg, por nuk është e qartë kush i ka shkrepur.

 

 

Nga një makinë bombë në Tikrit janë vrarë pakten 4 policë irakianë

 

Tikrit, 24 prill 2004 - Një makinë bombë, që mendohet të ketë qenë taksi, ka shpërthyer sot (e shtunë) në qendër të qytetit verior irakian, Tikrit, ku janë vrarë të paktën 4 policë irakianë, njofton Rojter. Shpërthimi ka ndodhur afër bazës kryesore amerikane në Tikrit, i cili ka qenë relativisht i qetë në muajt e fundit. Janë dhënë pamjet televizive të automjetit të djegur dhe të tre trupave të pajetë.

 

 

Nga një shpërthim në një fabrikë plastike janë vrarë të pakten 2 vetë

 

Iliopolis, SHBA, 24 prill 2004 - Një shpërthim ka goditur sot (e shtunë) një fabrikë plastike në qytetin Iliopolis (SHBA), ku janë vrarë të pakten dy vetë dhe janë plagosur edhe katër të tjerë, kanë bërë të ditur autoritetet, njofton Rojter. Dëshmitarët kanë thënë se shpërthimi ka qenë i fuqishëm dhe është dëgjuar pesë mila larg.

 

 

Ish-ylli i futbollit profesional amerikan është vrarë në Afganistan

 

Uashington, 24 prill 2004 - Ish-ylli i futbollit profesional amerikan, Pat Tillman, i cili ka lënë një kontratë sportive në vlerë prej 3.6 milionë dollarë për t'iu bashkuar forcave ushtarake speciale elite, është vrarë në Afganistan, kanë bërë të ditur zyrtarët amerikanë, njofton Rojter. Zyrtarët, që deshën të mbeten anonimë, kanë thënë se Tillman është vrarë në luftimet e të enjtes në juglindje të Afganistanit derisa Armata e tij e Rengjerëve po gjurmonte guerilët talibanë dhe pjesëtarët e Al Kaidës.

 

Ushtari 27-vjeçar, kishte përfunduar karrierën e futbollit në maj 2002, është figura më e shquar publike amerikane që është është vrarë në luiuftimet në Afganistan apo në Irak.

 

 

Pesë irakianë janë arrrestuar në lidhje me sulmet vetëvrasëse me bombë në Basra

 

Bagdad, 24 prill 2004 - Pesë irakianë janë arrrestuar sot (e shtunë) në lidhje me sulmet vetëvrasëse me bombë në Basra, njofton BBCWorld. Në njëoftim thuhet se gjatë arrestimit të dy militantëve, në kamionin e tyre janë gjetur mjete shpërthyuese. Ndërkaq, gjatë arrestimit të tre të tjerëve, policia ka zbuluar në shtëpinë e tyre 20 tona mjete shpërthyese.

 

 

Gjatë kontrollit të një burgu në Brazil, policia ka gjetur 5 trupa njerëzish të masakruar

 

Rio de Zhaneiro, 24 prill 2004 - Gjatë kontrollit të një burgu në Brazil pas kryengritjes së të burgosurve, policia ka gjetur edhe pesë trupa njerëzish të masakruar, njofton BBCWorld. Kështu, numri i përgjithshëm i të mbyturve në kryengritjen pesëditore në burgun Uso Branko në shtetin Amazon, ka arritur në 14 sish.

 

Revolta ka përfunduar të enjten dhe të burgosurit kërkonin ndërrimin e drejtorit dhe pakësimin e numrit shumë të madh të të burgosurve në burg. Të burgosurit kanë liruar 170 pengje.

 

 

Dëshmi të reja dramatike për masakrat në Sudan

 

Darfur, Sudan, 24 prill 2004 - Njoftohet për dëshmi të reja dramatike për masakrat e kryera nga forcat proqeveritare në Sudanin perendimor, njofton BBCWorld. Grupi "Hjumen Rajts Uoç" me seli në Nju Jork ka thënë se milicia proqeveritare ka ekzekutuar 136 burra në një operacion të bashkërenduar në muajin e kaluar.

 

Ndërkaq, gjatë vitit janë mbytur rreth 10 mijë, kurse janë zhvendosur rreth një milion njerëz. Qeveria sudaneze nuk iu ka përgjigjur këtij raporti.

 

 

SHBA kërkojnë nga Izraeli të mos dëmtojë Jaser Arafatin

 

Uashington, 24 prill 2004 - Shtëpia e Bardhë i bëri thirrje kryeministrit izraelit Ariel Sharon që të mbajë fjalën e tij dhe të mos dëmtojë udhëheqësin palestinez, Jaser Arafat. Zyrtarë të administratës së presidentit Bush thanë se fjala është fjalë.

Ata i bënë këto komente pasi kryeministri Sharon tha se nuk ndjehet më i detyruar ndaj premtimit që i bëri presidentit Bush para 3 vjetësh kur pranoi që të mos e dëmtonte fizikisht zotin Arafat.

Një zyrtar i lartë i administratës së presidentit Bush tha se Shtetet e Bashkuara e kanë bërë plotësisht të qartë se do të kundërshtojnë çdo veprim për të dëmtuar Jaser Arafatin dhe se qëndrimi amerikan i është përsëritur autoriteteve izraeite pas komenteve më të fundit të kryeministrit Sharon.

 

 

Ekipe të Kombeve të Bashkuara mbërrijnë sot në Korenë e Veriut

 

Nju Jork, 24 prill 2004 - Ekipe të Kombeve të Bashkuara për vlerësimin e dëmeve dhe agjenci të tjera humanitare mbrrijnë sot në Korenë e Veriut për të vlerësuar dëmet e përplasjes katastrofike të trenave të enjten.

Një zëdhënës i Kombeve të Bashkuara tha se Koreja e Veriut kërkoi zyrtarisht dje ndihmë ndërkombëtare, një ditë pas shpërthimit që tronditi qytetin Ryongchon, 20 kilometra në jug të kufirit me Kinën.

Zyrtarë të Koresë së Veriut thanë se disa qindra njerëz humbën jetën dhe disa mijëra u plagosën.

 

 

Pauell thotë se SHBA do të përgatisin një rezolutë të re për Irakun

 

Uashington, 24 prill 2004 - Zyrtarë të administratës së presidentit Bush nuk kanë qenë të saktë rreth përmbajtjes së rezolutës së Kombeve të Bashkuara. Por ata thanë se qëllimi i saj do të jetë forcimi i legjitimitetit të qeverisë së përkohshme në Irak, ndërkohë që krijohet një bazë politike për pjesëmarrjen e më shumë vendeve në operacionet paqëruajtëse.

Në një intervistë me televizionin hollandez dje, sekretari amerikan i Shtetit Kolin Pauell tha se zyrtarët amerikanë po punojnë për hartimin e një projektrezolutë dhe dhe do ta paraqesin atë sapo sekretari i përgjithshëm i OKB-së, Kofi Anan, të miratojë planin e të dërguarit të tij të posaqëm Lakdar Brahimi, për një qeveri të përkohshme irakiane.

 

 

Al Sadër paralajmëron për sulme vetëvrasëse

 

Naxhaf, 24 prill 2004 - Kleriku radikal shiit, Moktada al-Sadër, kërcënoi se forcat e tij do të fillojnë një valë shpërthimesh vetëvrasëse kundër forcave të koalicionit nëse ato ndërmarrin sulme në qytetet e shenjta myslimane shiite në Irak.

Moktada al-Sadri e bëri këtë paralajmërim sot gjatë lutjeve të së premtes në Kufa, pranë qytetit të shenjtë Naxhaf.
Kleriku al-Sadër vazhdon të qendrojë në Naxhaf në përpjekje për ti shpëtuar kapjes ose vrasjes nga ana e forcave të koalicionit, të cilat kërkojnë shpërndarjen e milicinë e tij të paligjshme.

 

 

Në Qerbela është vrarë një ushtar bullgar

 

Qerbela, 24 prill 2004 - Në qytetin Qerbela të Irakut janë bërë luftime të rrepta në mes të trupave të koalicionit të udhëhequr nga SHBA-të dhe kryengritësve shiit të ashtëquajturit milicë të Mehdiut. Me këtë rast, siç bëhet e ditur nga Sofja, është vrarë një ushtar bullgar.

 

Milicët shiitë po e ndihmojnë udhëheqësin radikal Moktada el Sadër, të cilin trupat amerikane duan ta arrestojnë ose ta vrasin. Ndërkohë kleriku radikal shiit, Moktada al-Sadër, kërcënoi se forcat e tij do të fillojnë një valë shpërthimesh vetëvrasëse kundër forcave të koalicionit nëse ato ndërmarrin sulme në qytetet e shenjta myslimane shiite në Irak.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |