|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Pjesë nga fjalimi i Presidentit Moisiu mbrëmë në Universitetin e Prishtinës

Prishtinë, 23 prill 2004 / TN / QIK - "Jam i emocionuar dhe i nderuar që kam rastin të flas përpara një auditori të respektuar. Kosova është me fat që ka një rini të gjallë dhe një elitë akademike, që i janë gjendur asaj pranë në ditët më të vështira.

 

Ju asnjëherë nuk e drejtuat popullin dhe politikën drejt luftrave, siç ndodhi në ndonjë kryeqytet tjetër të rajonit, por u orientuat gjithmonë nga paqja, liria dhe vlerat demokratike", tha Presidenti i Shqipërisë Alfred Moisiu, duke folur mbrëmë para profesorëve, akademikëve, intelektualëve dhe studentëve të Universitetit të Prishtinës.

 

- Jam këtu - tha Presidenti Moisiu - në emër të shtetit shqiptar dhe qytetarëve të Shqipërisë, t’ju sjell ju dhe popullit të Kosovës përshëndetjet më të përzemërta, mirënjohjen e thellë, mbështetjen e gjithanshme për ecjen tuaj përpara dhe urimin që e kaluara të mos përsëritet kurrë më.

"Kosova sot është një Kosovë tjetër. Banorët e saj, dikur viktima të dhunës dhe genocidit, tani po punojnë për të ndërtuar një të ardhme të përbashkët në liri; diktatori që urdhëroi genocidin po mban përgjegjësi përpara Tribunalit të Hagës.

 

Me vullnet e vendosmëri proçesi demokratik po ecën në rrugën e pakthyeshme të ndërtimit të një shoqërie demokratike, të bazuar në respektimin e ligjit dhe në bashkëjetesën paqësore midis komuniteteve.

 

Arritjet janë të pamohueshme, por ende ka probleme që duhet zgjidhur. Përvoja na tregon se nuk mjaftojnë vetëm meritat e të kaluarës për të përballuar sfidat e së ardhmes. Falë NATO-s, SHBA-ve dhe perëndimit, Kosovës dhe rajonit iu dha një shans historik zhvillimi në rrugë demokratike", tha Moisiu në vazhdim të fjalës së tij.

Presidenti shqiptar tha se ngjarjet e muajit të kaluar në Kosovë janë përcjellë me dhimbje e shqetësim të thellë në të gjithë Shqipërinë. "Ne e kemi dënuar dhunën dhe e konsiderojmë atë të papranueshme. Ajo bie ndesh dhe një farë mënyrë kompromenton progresin e arritur në Kosovë, dhe ka një kosto të lartë politike e kohore.

 

Bashkëkombasit e Nënë Terezës, humanistes të madhe të shekullit të 20-të, nuk kanë asgjë të përbashkët me ata që cënuan institucionet fetare dhe bashkëjetesën e brishtë në Kosovë", duke shtuar se është e domosdoshme që personat përgjegjës të dalin përpara drejtësisë dhe që klasa politike e Kosovës të ndërmarrë një proces të gjerë pajtimi midis komuniteteve.

Ai tha se në Kosovë po rritet një brez i ri me energji të mëdha krijuese, por me mundësi të kufizuara për t'i realizuar ato. Kosovarët, tha ai, kanë nevojë të shohin dhe ndjejnë realisht opinimizëm dhe një vizion të qartë për të ardhmen e tyre. "Në asnjë rast nuk duhet lejuar që qytetarët të bien pre e provokimeve të të tjerëve. Ju jeni një popull që ka sakrifikuar shumë për lirinë; tani është koha të punoni për ta ruajtur dhe forcuar atë", tha Moisiu.

Presidenti Moisiu tha se Shqipëria mendon se është me rëndësi jetike përcaktimi i statusit përfundimtar të Kosovës. "Koha provoi se çdo shtyrje pafund e këtij statusi krijon terren për pakënaqësi, pesimizëm dhe u jep hapësirë elementëve ekstremistë nga të gjitha krahët. Zgjidhja e statusit do të ndërgjegjësonte kosovarët për përgjegjësitë e tyre të mëdha për të marrë vendime të rëndësishme për problemeve të tyre; do të qetësonte rajonin dhe do të izolonte ekstremistët", nënvizoi Moisiu.

"Jam këtu për të shprehur mbështetjen e plotë të shtetit shqiptar për përpjekjet e popullit dhe institucioneve të Kosovës në rrugën e tranformimeve të mëdha ku është futur ajo. Bashkë me institucionet e Kosovës duhet të punojmë për një rol më aktiv në përfaqësimin tuaj në të gjitha nismat rajonale dhe më gjërë; në rritjen e shkëmbimeve politike dhe në zgjerimin e bashkëpunimit shumëplanësh me vendet fqinje", theksoi Presidenti shqiptar.

"Takimi me ju dhe bisedimet që sot pata rastin të zhvilloj me udhëheqësit vendor e ndërkombëtar të Kosovës, më shtuan bindjen se pavarësisht nga vështirësitë, Kosova europiane po ecën vetëm në një kahje - atë të së ardhmes. Në këtë rrugë Shqipëria ka qenë e do të jetë gjithmonë pranë jush", tha mes tjerash Presidenti Alfred Moisiu duke folur para një auditori të zgjedhur në Universitetit e Prishtinës.