Përmbajtja:

• Takimi Rugova-Moisiu: Bashkëpunimi ndërmjet Kosovës dhe Shqipërisë të jetë shumë më intensiv

• Takimi Moisiu-Holkeri: statusi i Kosovës të zgjidhet sa më shpejt

• Skefer tha se ka ardhur në Prishtinë për ta shprehur përkushtimin e NATO-s rreth proceseve në Kosovë

• Asambleja komunale e Prishtinës dënon letrat kërcënuese ndaj Ismet Beqirit

• Mitrovicë: Shkallë e ulët inkasimit të tatimit në pronë, pasojnë masat

• Delegacioni i lartë i NATO-s mbërriti në Prishtinë

• Presidenti i Shqipërisë Alfred Moisiu mbërriti sot në Prishtinë

• Një delegacion i lartë i NATO-s në krye me sekretarin e përgjithshëm sot arrin në Kosovë

• Presidenti Rugova priti shefen e re të Zyrës së UNHCR-it në Kosovë

• NATO së shpejti do të caktojë përfaqësuesin special për Kosovën

• Qeveria e Kosovës ka debatuar për politikën e standardeve

• Shkrimtari Riza Sheqiri u takua me ministren e Jashtme të Suedisë

• U bë përurimi i shkollës filllore "Meto Bajraktari" në Prishtinë

• Përfaqësuesit e policisë ndërkombëtare nga SHBA-të dhe nga Jordania të përfshirë në konflikt u pajtuan publikisht

• Novicki vizitoi ashkalinjtë e zhvendosur në kampin e KFOR-it

• Mitrovicë: 26 të burgosur në grevë urie

• U nënshkrua Memorandumi për themelimin e Qendrës informative në Bibliotekën Kombëtare e Universitare

• Në Prishtinë me një tribunë u shënua 80-vjetori i lindjes së Jup Kastratit

• Mekshejn ka dënuar në Beograd shkatërrimin e kishave dhe të xhamive

• Vendet e Evropës Juglindore nënshkruan një deklaratë për bashkëpunim të ngushtë në rajon

• Në Shkup janë promovuar 40 oficerë, në mesin e tyre edhe 13 shqiptarë

• Bashkimi Demokratik për Integrim zyrtarisht përkrah kandidaturën për president të Cërvenkovskit

• Militantët sauditë të Al Kaidës kanë marrë përgjegjësinë për sulmet vetëvrasëse në Rijad

• Janë gjetur nën rrënoja trupat e pa jetë të 8 personave

• Në përleshjet me trupat izraelite janë vrarë 3 liderë lokalë radikalë

• Bush e Çejni më 29 prill para Komisionit të Pavarur

• A do të ketë një kthesë në politikën e SHBA në Lindjen e Mesme?

• Rusia kundërshton rezolutën për Qipron

• Në sulmet e djeshme vetëvrasëse me makina-bombë në Basra janë vrarë 73 vetë

• Njerëzit që qëndrojnë prapa sulmeve vetëvrasëse me makinat-bombë në Rijad do të "digjen në ferr"

• Janë arrestuar 17 vetë për lidhje me militantë islamikë

Takimi Rugova-Moisiu: Bashkëpunimi ndërmjet Kosovës dhe Shqipërisë të jetë shumë më intensiv

 

Prishtinë, 22 prill 2004 - Presidenti i Kosovës Ibrahim Rugova dhe Presidenti i Shqipërisë u takuan sot në mesditë dhe biseduan për situatën aktuale në Kosovë dhe për marrëdhëniet në mes të dy vendeve. Presidenti Rugova pasi shprehu kënaqësinë dhe gëzimin e veçantë për takimin me Presidentin e Shqipërisë Alfred Moisiun, tha se ky është një moment i veçantë për të dhe për gjithë popullin e Kosovës. Ai tha se në këtë takim është biseduar për progresin e arritur në Kosovë gjatë pesë viteve, për fazat e reja të zhvillimit ekonomik, privatizimin, investimet që duhet të bëhen për të siguruar një zhvillim ekonomik.

 

"Biseduam edhe për çështjen e integrimeve të grupeve etnike, pra me shumicën në Kosovë", tha Presidenti Rugova. "Ngjarjet e marsit për ne ishin të papranueshme dhe i gjykojmë, ndërkaq përgjegjësit e tyre duhet të dalin para drejtësisë sepse Kosova është e vendosur në vazhdimin e progresit të vet", theksoi zoti Rugova, duke shtuar se shumica shqiptare dhe institucionet do t'u ofrojnë siguri grupeve etnike e minoriteteve.

Si temë të veçantë të këtij takimi Presidenti Rugova veçoi bashkëpunimin ndërmjet Kosovës dhe Shqipërisë, për të cilin tha se duhet të jetë shumë më intensiv dhe në të gjitha fushat e jetës. "Aspirata e vendeve tona është integrimi në BE, në NATO dhe në miqësi të përhershme me SHBA-të", nënvizoi Presidenti Rugova.

"Njohja formale e pavarësisë së Kosovës duhet të ndodhë sa më shpejt, si element kyç për qetësimin e kësaj pjese të Evropës dhe të botës, e që do të përshpejtonte proceset e brendshme demokratike integruese", theksoi zoti Rugova, duke premtuar se do të vazhdojë bashkëpunimi me Shqipërinë në të gjitha fushat e jetës, si dhe do të bëhen përpjekje që Kosova edhe me fqinjët e saj të ketë marrëdhënie të mira.

Presidenti Rugova tha se kërkon edhe më tutje përkrahjen e Shqipërisë për Kosovën. Në këtë takim, tha ai, konkretisht është biseduar edhe për realizimin e projektit të ndërtimit të rrugës Prishtinë - Durrës, e cila do të jetë një ngjarje e madhe për integrimin ndërshqiptar dhe integrimet në këtë pjesë të Evropës, u shpreh në fund Presidenti Rugova.

Nga ana e tij Presidenti i Shqipërisë, Alfred Moisiu, gjithashtu shprehu kënaqësinë që takoi Presidentin Rugova në Prishtinë, sepse siç tha, "kemi pasur rastin të takohemi në vende të tjera". Për temat që kishin biseduar në këtë takim, zoti Moisiu tha se kishin patur pikëpamje të përbashkëta për këto çështje.

 

"I thashë Presidentit Rugova që miqtë tanë duhet t'i ruajmë sepse asnjëherë më parë nuk kemi pasur miq më shumë dhe është lehtë t'i humbim", tha Presidenti Moisiu. Ai shtoi se duhet pasur kujdes që të bëhet një politikë e tillë që të mos prodhojë kriza, që të ecet përpara, duke bashkëpunuar me njëri tjetrin.

"Kosova nuk ka kthim prapa. Kjo nuk diskutohet dhe këtë ia kam thënë edhe Holkerit edhe Ananit dhe sa më shumë të zgjatet çështja e zgjidhjes së statusit të Kosovës aq më shumë hapësirë u lejohet ekstremistëve të të dy krahëve", u shpreh Presidenti Moisiu, duke shtuar se ky proces ka marrë rrugë dhe do të shkojë deri në fund.

Në lidhje me trazirat e marsit, Presidenti Moisiu theksoi "ngjarjet që ndodhën nuk ishin të mira, por mendoj se ato nuk do të arrijnë ta pengojnë zhvillimin e Kosovës". Nga ato ngjarje duhet të nxirren mësime, tha ai, dhe të gjithë duhet të punojnë dhe veprojnë për të ecur përpara.

Zoti Moisiu tha se është e nevojshme që Qeveria e Kosovës të ketë më shumë kompetenca, duke shprehur bindjen se pas ngjarjeve të marsit do të përshpejtohet zgjidhja e problemeve.

"Me këtë rast unë i dëshiroj popullit të Kosovës ditët më të mirat dhe t'i siguroj se Shqipëria dhe shteti shqiptar gjithmonë do të qëndrojë pranë dhe do të jetë një avokat i kujdesshëm e tepër këmbëngulës për çështjen e Kosovës", nënvizoi në fund të deklaratës para mediave, Presidenti i Shqipërisë Alfred Moisiu.

 

 

Takimi Moisiu-Holkeri: statusi i Kosovës të zgjidhet sa më shpejt

 

Prishtinë, 22 prill 2004 - Presidenti i Shqipërisë, Alfred Moisiu, takimin e parë sot në Prishtinë, në selinë e UNMIK-ut, e pati me kryeadministratorin e Kosovës Hari Holkeri, me ftesë të të cilit po e viziton Kosovën.

Presidenti Moisiu pas takimit me Holkerin tha se vonesa e zgjidhjes së statusit përfundimtar të Kosovës u jep hapësirë veprimi grupeve ekstremiste nga të dyja palët.

 

Zoti Moisiu tha se është më mirë që statusi të zgjidhet më shpejt që është e mundur. Sipas tij, statusi i pazgjidhur mund të jetë mungesë e motivit që njerëzit në Kosovë të punojnë.

Nga ana e tij, Holkeri tha se edhe UNMIK-u është që statusi të zgjidhet, por më parë, tha ai, duhet të përmbushen standardet e përcaktuara nga bashkësia ndërkombëtare.

 

 

Skefer tha se ka ardhur në Prishtinë për ta shprehur përkushtimin e NATO-s rreth proceseve në Kosovë

 

Prishtinë, 22 prill 2004 - Sekretari i përgjithshëm i NATO-s, Jap de Hop Skefer, i shoqëruar nga komandanti i forcave të Aleancës për Evropën, Xhejms Xhons, nga komandanti i krahut jugor të NATO-s, Gregori Xhonson dhe nga 26 ambasadorët e Këshillit të NATO-s, po qëndrojnë sot në Prishtinë.

 

Skefer tha se ka ardhur në Prishtinë për ta shprehur përkushtimin e Aleancës rreth proceseve në Kosovë, duke shtuar se procesi politik është vlerësuar nga NATO si shumë i rëndësishëm.

"NATO ka qenë, është dhe do të jetë e përkushtuar edhe për procesin politik në Kosovë", tha Skefer dhe theksoi nevojën për angazhimin në çështjet siç janë: standardet para statusit, ndërtimi i një Kosove demokratike ku do të respektohen minoritetet dhe vlerat. Skefer tha se spreson që ajo që ka ndodhur në mars "nuk mund, nuk duhet dhe nuk do të përsëritet kurrë më".

Delegacioni i NATO-s kanë vizituar shkollën e shkatërruar gjatë trazirave në Fushë Kosovë, ku nga komandanti i Brigadës shumëkombëshe të Qendrës, Anders Bronstrom, është njohur me rrjedhën e ngjarjeve dhe nevojat aktuale të KFOR-it.

Bronstrom tha se me forcat aktuale mund ta mbrojë shumicën e enklavave serbe, por jo edhe t'i vëzhgojë lëvizjet jashtë këtyre hapësirave dhe t'i kontrollojë elementet kriminale. Ai tha se KFOR-i ka nevojë për forca shtesë për t'i përmbushur detyrat.

Delegacioni i NATO-s pasdite do të takohet me udhëheqësit ndërkombëtarë dhe vendorë.
Pas trazirave të marsit, NATO-ja ka dërguar forca shtesë në Kosovë. Para ardhjes në Kosovë Skefer ka thënë se në këtë moment nuk ka argumente që të ndryshohet forca e KFOR-it në Kosovë.

 

 

Asambleja komunale e Prishtinës dënon letrat kërcënuese ndaj Ismet Beqirit

 

Prishtinë, 22 prill 2004 - Asambleja Komunale e Prishtinës, në mbledhjen e sotme, dënoi njëzëri kërcënimet e marra nga AKSH në adresë të kryetarit të Kuvendit Komunal të Prishtinës, Ismet Beqiri, për Deklaratën e Asamblesë Komunale të Prishtinës për ngjarjet e 17 dhe 18 marsit, në të cilën janë dënuar në mënyrë unanime aktet e dhunës. Deklarata në fjalë është aprovuar më 2 prill të këtij viti, nga të gjithë deputetët e Kuvendit Komunal të të gjitha subjekteve politike.

Njëherësh Asambleja Komunale e Prishtinës distancohet nga etiketimet për kinse veprimtarinë antikombëtare për kryetarin Beqiri. Përkundrazi, përbërja e Asamblesë Komunale konstaton se veprimet e kryetarit ishin dhe vazhdojnë të jenë në vijën kombëtare dhe në interes të qytetarëve të Prishtinës dhe më gjerë, thuhet në një njoftim të Zyrës për informim të KK të Prishtinës.

 

 

Mitrovicë: Shkallë e ulët inkasimit të tatimit në pronë, pasojnë masat

 

Mitrovicë, 22 prill 2004 - Regjistrimi i objekteve të pasurisë së paluajtshme në komunën e Mitrovicës, ka filluar më 10 tetor 2002, kur është startuar me zonën e parë, për të vazhduar pastaj edhe në zonat tjera të tjera dhe ka zgjatur deri kah fundi i qershorit të vitit 2003.

Gjatë punës së vet, zyrtarët e angazhuar në këtë aktivitet kanë hasur në disa vështërsi të ndryshme, siku janë mungesa e dokumentacionit në lidhje me pronën dhe objektet, mungesa e të dhënave kadastrale dhe vjetërsia e hartave kadastrale, situata specifike e komunës etj.

Mirëpo, edhe përkundër vështërsive të pranishme, zyrtarët komunalë kanë arritur që të regjistrojnë 17.744 objekte, prej të cilave 15.335 janë të personave fizikë dhe 268 të personave juridikë.

Pas përfundimit të punëve përgatitore rreth implementimit të pilot programit për inkasimin e tatimit në prone dhe pas certifikimit të komunës nga Ministria për Financa dhe Ekonomi, është punuar në shtypjen dhe shpërndarjen e faturave, kështu që deri më datën 19 dhjetor 2003, janë shpërndarë 14.746 fatura tatimore, ndërkohë që 2.998 objekte të regjistruara nuk i kanë plotësuar kriterët për tu ngarkuar me tatim për vitin 2003.

Shuma e faturave të lëshuara për sipërfaqën prej 1.563.095 metra katrorë, arrin në 747.548 euro.

Mirëpo, interesimi dhe përgjegjja e tatimobliguesve ka qenë shumë e vogël, sepse nga 14.746 sish, obligimet e tyre ndaj komunës i kanë kryer vetëm 1.318 ose 8,9 përqind. Ndërkaq, nga shuma e paraparë për grumbullim nga tatimi në pronë prej 747.548 Euro, janë paguar vetëm 63.104 euro, ose 8,3 përqind.

Në krahasim me buxhetin e paraparë prej 345.000 euro për vitin 2003, nga tatimi në pronë janë realizuar 60.000 euro ose 18 përqind, ndërkohë që pjesëmarrja e të hyrave nga tatimi në pronë në krahasim me të hyrat e tërësishme të realizuara në vitin 2003, është vetëm pesë përqind.

Duke patur parasysh gjendjen e këtillë të pavolitshme në inkasimin e tatimit në pronë, organet kompetente të Kuvendit të Komunës do t'i ndërmarrin të gjitha masat e nevojshme për realizimin e obligimeve të parapara nga tatimobliguesit, duke kushtëzuar madje edhe kryerjen e të gjitha shërbimeve që kanë të bëjnë me pronën, ndaj atyre që nuk i kryejnë këto obligime.

 

 

Delegacioni i lartë i NATO-s mbërriti në Prishtinë

 

Prishtinë, 22 prill 2004 - Delegacioni i lartë i NATO-s, i kryesuar nga sekretari i përgjithshëm, Jap de Hop Skefer, mbërriti sot në Prishtinë. Me të arritur Skefer deklaroi se dhunë në Kosovë më nuk guxon të ketë dhe premtoi se NATO do ta ndihmojë procesin politik.

 

Udhëheqësit e Kosovës kanë përgjegjësi politike që të ndihmojnë dialogun e brendshëm në bisedimet Prishtinë-Beograd dhe respektimin e minoriteteve, tha ai me të arritur në aeroportin e Prishtinës.

Skefer gjatë kësaj vizite shoqërohet nga komandanti i NATO-s për Evropë, gjenerali Xhejms Xhons, komandanti i krahut jugor të forcave aleate për Evropën Juglindore, Gregori Xhonson dhe ambasadorët e 26 vendeve anëtare të NATO-s.

Vizita e këtij delegacioni të NATO-s ka për qëllim vlerësimin e situatës së përgjithshme të sigurisë në Kosovë.

Delegacioni i NATO-s do të ketë takime me udhëheqësit vendorë dhe të UNMIK-ut.

 

 

Presidenti i Shqipërisë Alfred Moisiu mbërriti sot në Prishtinë

 

Prishtinë, 22 prill 2004 - Presidenti i Republikës së Shqipërisë Alfred Moisiu mbërriti sot në Prishtinë për një vizitë dyditëshe. Me të arritur në aeroportin e Prishtinës, Presidenti Moisiu deklaroi se ndiehet i lumtur që po viziton Kosovën dhe ndodhet në mesin e bashkëkombasve të tij.

Presidenti i Shqipërisë po e viziton Koosvën me ftesë të shefit të UNMIK-ut Hari Holkeri.

Zoti Moisiu takimin e parë sot do ta ketë me kryeadministratorin e Kosovës Hari Holkeri. Ndërkaq, në orën 11.40 do të takohet me Presidentin e Kosovës Ibrahim Rugova, e pastaj me kryeparlamentarin Nexhat Daci dhe me Kryesinë dhe shefat e grupeve parlamentare në Kuvendin e Kosovës.

 

 

Një delegacion i lartë i NATO-s në krye me sekretarin e përgjithshëm sot arrin në Kosovë

 

Bruksel, 22 prill 2004 - Një delegacion i lartë i Aleancës Veriatlantike i përbërë nga sekretari i përgjithshëm Jap de Hop Skefer, komandanti i NATO-s për Evropë, gjenerali Xhejms Xhons, komandanti i krahut jugor të forcave aleate për Evropën Juglindore, Gregori Xhonson dhe ambasadorët e 26 vendeve anëtare të NATO-s sot arrijnë për një vizitë njëditore në Kosovë.

 

Qëllimi i kësaj vizite është vlerësimi i situatës së përgjithshme të sigurisë në Kosovë. Delegacioni i NATO-s do të ketë takime me udhëheqësit vendorë dhe të UNMIK-ut.

 

 

Presidenti Rugova priti shefen e re të Zyrës së UNHCR-it në Kosovë

 

Prishtinë, 22 prill 2004 - Presidenti i Kosovës, Dr. Ibrahim Rugova, priti sot në një takim znj. Paskal Moro (Pascale Moreau), shefe e re e Zyrës së UNHCR-së në Kosovë. Në takim ishte i pranishëm edhe shefi i deritashëm i kësaj zyre, z. Moriane.

Presidenti Rugova çmoi punën e misionit të UNHCR-së në Kosovë dhe rolin e shefit të deritanishëm, ndërsa shprehu përkrahjen për punën e mëtejshme të kësaj zyre.

Duke folur për gjendjen aktuale në Kosovë dhe për perspektivën, Presidenti Ibrahim Rugova theksoi se njohja ndërkombëtare e pavarësisë së Kosovës do të qetësonte këtë pjesë të Evropës dhe do të siguronte mundësi për zhvillim më të shpejtë demokratik e ekonomik të vendit tonë. Pavarësia e vendit do të ndihmonte edhe në përshpejtimin e proceseve integruese brenda shoqërisë, duke përfshirë integrimin e plotë të minoriteteve, ka theksuar Presidenti Rugova.

 

 

NATO së shpejti do të caktojë përfaqësuesin special për Kosovën

 

Bruksel, 22 prill 2004 - NATO së shpejti do të caktojë përfaqësuesin e vet special për Kosovën, i cili do të merrej me çështje politike që kanë të bëjnë me Kosovën, citohen të kenë thënë burimet e aleancës në Bruksel.

 

Thuhet se NATO është e interesuar që tash të involvohet më shumë në proceset politike në Kosovë dhe se Këshilli i Përhershëm i NATO-s është seriozisht duke e shqyrtuar mundësinë e emërimit të përfaqësuesit.

 

Ky i dërguar i NATO-s do të merrte pjesë në të gjitha proceset që kanë të bëjnë me aspektin politik, përfshirë këtu punën e Grupit të Kontaktit, ndërkaq komandanti i KFOR-it do të vazhdonte të merret me çështjet e sigurisë.

 

 

Qeveria e Kosovës ka debatuar për politikën e standardeve

 

Prishtinë, 22 prill 2004 - Qeveria e Kosovës në mbledhjen e djeshme ka debatuar për politikën e standardeve, për bashkëpunimin e institucioneve të Kosovës me UNMIK-un me qëllim të krijimit të një ambienti demokratik në Kosovë.

 

Në këtë takim, kryeministri Rexhepi ka njoftuar për zhvillimet aktuale në vend me theks të veçantë rreth planit për implementimin e standardeve, çështjes së bartjes së kompetencave nga institucionet ndërkombëtare tek ato vendore, si dhe për nevojën e vazhdimit të procesit të privatizimit.

 

Rexhepi gjithashtu ka referuar para anëtarëve të Qeverisë rreth takimeve me përfaqësuesit e qeverive të vendeve të Grupit të Kontaktit, të BE-së dhe të NATO-s. Qeveria ka miratuar edhe një varg projektligjesh dhe projektudhëzimesh të tjera.

 

 

Shkrimtari Riza Sheqiri u takua me ministren e Jashtme të Suedisë

 

Stokholm, 22 prill 2004 - Në qytetin Karlskrona të Suedisë, ministrja e Suedisë e Punëve të Jashtme, Laila Freivalds, zhvilloi një takim me përfaqësuesit e mërgimtarëve. Me këtë rast shkrimtari nga Kosova Riza Sheqiri, i cili prej vitesh jeton dhe vepron në Karlskrona, pati një takim me ministren Freivalds.

Shkrimtari Sheqiri e njoftoi ministren Freivalds për punën dhe veprimtarinë e shqiptarëve në qytetin Karlskrona si dhe për synimet e një integrimi më të mirë në shoqërinë suedeze. Kjo, theksoi ai, po bëhet me mësimin e gjuhës, me zënie të punës dhe me zhvillimin e kulturës.

Sheqiri falënderoi ministren suedeze për të gjitha të mirat që Suedia u ka ofruar shqiptarëve, këtu dhe në Kosovë dhe në shenjë falënderimi i dorëzoi librin e vet në shqip e suedisht "Zemër krejt dashuri".

Në fund të këtij takimi shkrimtari Sheqiri i dorëzoi ministres Freivalds një apel ku kërkohet që Suedia të përdorë autoritetin e vet në të gjitha nivelet vendimarrëse ndërkombëtare për të njohur sa më parë pavarësinë e Kosovës.

 

 

U bë përurimi i shkollës filllore "Meto Bajraktari" në Prishtinë

 

Prishtinë, 22 prill 2004 - Me një solemnitet, dje u bë përurimi i godinës së rinovuar të shkollës filllore "Meto Bajraktari" në Prishtinë. Këtë projekt, i cili ka kushtuar 410 mijë euro, e ka investuar Qeveria e Kosovës, në kuadër të një projekti për ndërtimin e shkollave në shtatë qendra të Kosovës.

Përurimin e këtij objekti e bëri Kryeministri i Kosovës Bajram Rexhepi dhe ministri i Arsimit Rexhep Osmani. Drejtori i shkollës Munish Hyseni tha se që nga viti 1954 kur është ndërtuar kjo shkollë nuk ka pasur investime. Ai e falënderoi Qeverinë për këtë investim.

Kryeministri Rexhepi përsëriti edhe njëherë qëndrimin e tij se Qeveria e Kosovës do të ketë prioritet zhvillimin e arsimit, i cili sipas tij do të jetë gradual.

Në këtë përurim mori pjesë edhe kryetari i Komunës së Prishtinës Ismet Beqiri. Është bërë e ditur se së shpejti do të përurohet edhe një shkollë e re në Prishtinë, përkatësisht në "Kodrën e Trimave".

 

 

Përfaqësuesit e policisë ndërkombëtare nga SHBA-të dhe nga Jordania të përfshirë në konflikt u pajtuan publikisht

 

Prishtinë, 22 prill 2004 - Përfaqësuesit e policisë ndërkombëtare nga Shetet e Bashkuara dhe nga Jordania të përfshirë në konfliktin që ndodhi në burgun e Mitrovicës ku janë vrarë tre policë u pajtuan dje publikisht.

 

Pasi kanë shprehur keqardhje për shkak të incidentit, policët janë përqafuar para kamerave dhe kanë porositur se misioni që përbëhet nga 53 vende është një rast unik në botë. Detaje lidhur me konfliktin e policëve nuk janë dhënë as në konferencën e djeshme për gazetarë.

 

 

Novicki vizitoi ashkalinjtë e zhvendosur në kampin e KFOR-it

 

Vushtrri, 22 prill 2004 - Ombudspersoni i Kosovës, Marek Antoni Nowicki me bashkëpuntorët e tij, dje me kërkesën e tyre, vizitoi ashklalinjtë e zhvendosur të cilët gjinden në kampin e KFOR-it Françez në fshatin Novosellë afër Vushtrisë.

Gjatë diskutimit disa orësh në lidhje me situatën e Ashkanlinjvë pas dhunës që shpërtheu në muajin mars, është kuptuar se si pasojë e këtyre trazirave nga Vushtrria ishin zhvendosur 250 ashkalinj, shtëpitë e cilëve janë djegur, kështu që, ata nuk besojnë se do të mund të kthehen në shtëpit e tyre.

Ashkalinjtë kërkuan nga komuniteti ndërkombëtarë që të ua mundësojë emgrimin e përkohshëm nga Kosova, për faktin se ata nuk munden të qëndrojnë gjatë në kampin ushtarak, duke pasur parasysh se në mesin e tyre ka shumë fëmijë dhe njerëzë të sëmur.

Ombudspersoni i Kosovës u premtoi se lidhur me kërkesat e tyre do t'i informoj institucionet kompetente vendore dhe ndërkombëtare, po ashtu do të ua mundësojë takimin me përfaqësuesit e mediave.

 

 

Mitrovicë: 26 të burgosur në grevë urie

 

Mitrovicë, 22 prill 2004 - Zyrtarët e Kombeve të Bashkuara në Kosovë thonë se 26 të burgosur në Mitrovicë janë në grevë urie në shenjë proteste ndaj vonesave në procesin e apelit të dy të burgosurve të shpallur fajtorë nën akuzat për krime lufte.

Një zëdhënës i administratës së Kombeve të Bashkuara në Kosovë thotë se të burgosurit e filluan grevën e urisë të martën në mbrëmje.

Me sa duket ata janë zemëruar nga koha e gjatë që ka kaluar para se Gjykata e Lartë e Kosovës të fillojë procesin e apelit për të dënuarit Miroslav Vukoviq dhe Veselin Beshoviq.

Vukoviq u dënua në vitin 2002 me 12 vjet burgim për krime lufte. Procesi i apelimit të dënimit të tij është planifikuar për në muajin maj. Beshoviq u dënua me shtatë vjet burgim qershorin e kaluar. Gjykata ende nuk ka caktuar datën e apelimit të dënimit të tij.

Zëdhënësi i Kombeve të Bashkuara tha se sistemi gjyqësor i Kosovës është i mbingarkuar dhe shtoi se çështje të tilla të ndërlikuara duhet të shqyrtohen me kujdes.

 

 

U nënshkrua Memorandumi për themelimin e Qendrës informative në Bibliotekën Kombëtare e Universitare

 

Prishtinë, 22 prill 2004 - Dje ka vazhduar manifestimi kulturor "Java e bibliotekës", e organizuar nga Biblioteka Kombëtare e Universitare e Kosovës dhe nga Zyra e Shteteve të Bashkuara të Amerikës në Prishtinë.

 

Me këtë rast dje është bërë nënshkrimi i aktit të Memorandumit ndërmjet UNDP-së, Program për Zhvillim i OKB-së, Kuvendit të Kosovës dhe Bibliotekës Kombëtare Universitare për themelimin e Qendrës informative për qeverisje parlamentare në Bibliotekën Kombëtare Universitare të Kosovës.

 

Ngjarje tjetër e rëndësishme ishte edhe donacioni i librave për Bibliotekën Kombëtare Universitare të Kosovës me ç'rast u dhurua gazeta Rilindja e botuar në Tiranë, pastaj arkivi i shkrimatarit Josip Rela, disa botime të UNDP-së, si dhe disa botime tjera të aktiviteteve të OKB-së.

 

 

Në Prishtinë me një tribunë u shënua 80-vjetori i lindjes së Jup Kastratit

 

Prishtinë, 22 prill 2004 - Dega e gjuhësisë, sektori i dialektologjisë i Institutit Albanologjik në 80-vjetorin e lindjes së Jup Kastratit e mbajti një tribunë shkencore me temë: "Jup Kastrati dhe albanologjia".

 

Në një periudhë prej 60 vjetësh profesor Jup Kastrati ka bërë një punë titaniku në fushën e kërkimeve e të studimeve të albanologjisë me mbi 40 vepra të botuara dhe të ribotuara, pastaj studimeve letrare e historike, bibliografike e të tjera, u tha në këtë tribunë.

 

 

Mekshejn ka dënuar në Beograd shkatërrimin e kishave dhe të xhamive

 

Beograd, 22 prill 2004 - Ministri britanik për Evropën Denis Mekshejn gjatë qëndrimit në Beograd ka dënuar shkatërrimin e kishave në Kosovë dhe të xhamive në Beograd dhe në Nish, duke u bërë thirrje poltikanëve që të mos lejojnë që diçka e tillë të përsëritet.

 

Mekshejn ka vizituar xhaminë e shkatërruar në Beograd dhe ka deklaruar se kishat dhe xhamitë janë pjesë e kulturës dhe e historisë së Evropës dhe patjetër duhet të mbrohen. "Djegia e kishave dhe e xhamive është tragjedi, kurse politikanët që i mbrojnë kryesit e veprave të tilla i bëjnë dëm imixhit të sebëve.

 

Qeveria britanike dhe vendet demokratike evropiane shpresojnë që liderët e Serbisë do të gjejnë mënyrën që ajo të bëhet një vend evropian dhe se do të lërë pas vetes të keqen e viteve '90", ka thënë Mekshejn, njoftojnë mediat serbe.

 

 

Vendet e Evropës Juglindore nënshkruan një deklaratë për bashkëpunim të ngushtë në rajon

 

Sarajevë, 22 prill 2004 - Në përmbyllje të takimit të tyre në Sarajevë, shefat e shteteve apo të qeverive të Procesit për bashkëpunim në Evropën Juglindore e kanë nënshkruar mbrëmë Deklaratën, me të cilën e mbështesin bashkëpunimin e mëtejshëm të shteteve të rajonit në të gjitha segmentet.

 

Sipas fjalëve të kryesuesit të Kryesisë së BeH, Sulejman Tihiq, shtetet e rajonit, individualisht dhe bashkë, kanë treguar se po e ndryshojnë imazhin për rajonin e prapambetur, problematik dhe konfliktuoz të Ballkanit dhe se Evropa Juglindore po bëhet rajon i tolerancës dhe respektimit të ndërsjellë.

 

Shtetet pjesëmarrëse në samit e kanë shprehur përkrahjen e plotë te BeH dhe bashkimit SMZ në rrugën për pranim në Partneritetin për Paqe, gjithashtu është përshëndetur edhe vendimi i Qeverisë së Kroacisë për anëtarësim të plotë në Procesin për bashkëpunim. Gjatë një viti të ardhshëm kryesimin e Procesit për bashkëpunim do ta ushtrojë Rumania.

 

 

Në Shkup janë promovuar 40 oficerë, në mesin e tyre edhe 13 shqiptarë

 

Shkup, 22 prill 2004 - Në Shkup janë promovuar 40 oficerë të Armatës maqedonase. Sipas Ministrisë maqedonase të Mbrojtjes shkollimin për oficerë e kanë mbaruar 30 maqedonas, 13 shqiptarë, 3 serbë, dy vlleh dhe një turk.

 

 

Bashkimi Demokratik për Integrim zyrtarisht përkrah kandidaturën për president të Cërvenkovskit

 

Shkup, 22 prill 2004 - Në Maqedoni Bashkimi Demokratik për Integrim zyrtarisht përkrah kandidaturën për president të Branko Cërvenkovskit. Gëzim Ostreni i tha BBC se për këtë përkrahje nuk është bërë marrëveshje për ndarje të reja të ekzekutivit ndërmjet partisë së tij dhe partnerit të koalicionit LSDM-së, që e kandidon z. Cërvenkovski.

 

Z. Ostreni megjithatë nuk përjashtoi mundësinë që me krijimin e një qeverie të ri BDI të marrë nën drejtim ministri të tjera. Ai tha se nëse Cërvenkovski zgjedhet president, atëherë edhe në këtë institucion do të këtë përfaqësim të drejtë të shqiptarëve prej 25 për qindësh.

 

 

Militantët sauditë të Al Kaidës kanë marrë përgjegjësinë për sulmet vetëvrasëse në Rijad

 

Dubai, 22 prill 2004 - Militantët sauditë të Al Kaidës kanë marrë përgjegjësinë për sulmet vetëvrasëse në kryeqytetin saudit Rijad, që patën në shenjestër ndërtesën e Komandës së forcave qeveritare të sigurimit, ku humbën jetën të pakten katër vetë dhe u plagosën 148 të tjerë, njofton Rojter.

 

Ata janë zotuar edhe për sulme të tjera me bomba kundër simboleve qeveritare. Në deklaratën e grupit Al Haramain Brigades, që e merr përgjegjësinë për këto akte, të publikuar në të pakten dy vebsajte islamiste, thuhet se ata ndjekun rrugën e Osama bin Ladenit kundër autoriteteve qeveritare saudite.

 

 

Janë gjetur nën rrënoja trupat e pa jetë të 8 personave

 

Çikago, 22 prill 2004 - Janë gjetur nën rrënoja trupat e pajetë të tetë personave, të cilët ishin strehuar në bodrum të një ndërtese të një restorani nga tornadot e fuqishme të djeshme, që kanë goditur shtetin Illinois të SHBA-ve, kanë bërë të ditur sot (e enjte) autoritetet, njofton Rojter.

 

 

Në përleshjet me trupat izraelite janë vrarë 3 liderë lokalë radikalë

 

Xhenin, 22 prill 2004 - Tre liderë lokalë radikalë palestinezë të Brigadave të Martirëve Al Aksa janë vrarë në përleshjet e sotme në agim me trupat izraelite në Bregun Perendimor, kanë bërë të ditur burimet e dy palëve ndërluftuese, njofton AFP. Luftimet janë zhvilluar pasi 20 automjete të blinduara, për fshirë edhe tanket, kishin rrethuar një shtëpi në Tulkarem, ku ishin strehuar të tre militantët, ka thënë burimi i sigurimit palestuinez.

 

Vdekja e tyre e ngre në 3,930 numrin e të vrarëve, që kur ka filluar intifada palestineze më 2000, nga të cilët 2961 palestinezë dhe 899 izraelitë.

 

 

Bush e Çejni më 29 prill para Komisionit të Pavarur

 

Uashington, 22 prill 2004 - Presidenti Bush dhe nënpresidenti Dik Çejni do të dalin më 29 prill para Komisionit të Pavarur që po heton sulmet terroriste të 11 shtatorit të vitit 2001. Zëdhënësi i Shtëpisë së Bardhë tha se zoti Bush dhe zoti Çejni do të takohen privatisht të enjten e javës së ardhshme në Shtëpinë e Bardhë, me të gjithë anëtarët e Komisionit.

Në dëshmitë para publikut, ky Komision ka ngritur pyetjen në se administrata e presidentit Bush dhe ajo e presidentit Klinton mund të kenë marrë masat e nevojshme për të parandaluar sulmet e vitit 2001, gjatë të cilave humbën jetën më tepër se 3 mijë njerëz.

 

 

A do të ketë një kthesë në politikën e SHBA në Lindjen e Mesme?

 

Uashingon, 22 prill 2004 - Vendimi i Presidentit Bush për miratimin e planit të kryeministrit izraelit Ariel Sharon për tërheqjen nga Gaza të Forcave izraelite ka ngritur pyetjet se a do të thotë kjo se kemi të bëjmë me një kthesë në politikën e Shteteve të Bashkuara dhe cili do të jetë ndikimi i saj?

 

Në rast se kemi të bëjmë me kthesë, thonë disa ekspertë, kjo mund ta dëmtojë edhe më shumë imazhin e Shteteve të Bashkuara në botën myslimane.

Dhjetra mijëra palestinezë protestuan të dielën nëpër rrugët e Gazës, për të shprehur dëshpërim për vrasjen e udhëheqësit Hamas Abdel Aziz Rantisi, me zotimin se do të hakmerren për vrasjen.

 

Udhëheqësi i sapoemëruar i grupit ekstremist palestinez u vra gjatë një sulmi izraelit me raketa, vetëm disa javë pas vrasjes në të njejtën mënyrë të paraardhësit të tij, Sheikut Ahmed Yassin. Vrasjet janë pjesë e një fushate të vazhdueshme të Izraelit kundër grupit Hamas.

 

 

Rusia kundërshton rezolutën për Qipron

 

Nju Jork, 22 prill 2004 - Russia ka vënë veton kundër një projektrezolute të Këshillit të Sigurimit të Kombeve të Bashkuara, në të cilën paraqiteshin planet e OKB-së në fushën e sigurisë nëse qipriotët do të votojnë pro planit për ribashkimin e ishullit në referendumet e së shtunës.

Rezoluta u mbështet nga 14 anëtarët e KS-së, por jo nga Rusia.

Pas tre ditëve me bisedime, anëtarët e Këshillit të Sigurimit nuk arritën të binin dakord për rezolutën, e cila do të rikonfirmonte hapat që do të ndërmerrte OKB-ja nëse qipriotët do të votonin pro-bashkimit.

 

 

Në sulmet e djeshme vetëvrasëse me makina-bombë në Basra janë vrarë 73 vetë

 

Basra, Irak, 22 prill 2004 - Dhembja dhe zemrata janë të mëdha sot (e enjte) në familjet e 73 personave, të vrarë dje në sulmet me makinat-bombë në qytetin jugor irakian, Basra, njofton Rojter.

 

Pesë nga 99 personat e plagosur në pesë shpërthimet në tri stacionet policore, kanë vdekur gjatë natës, kanë thënë burimet spitalore. Kështu, numri i përgjithshëm i të vrarëve është ngritur në 73 sish.

 

 

Njerëzit që qëndrojnë prapa sulmeve vetëvrasëse me makinat-bombë në Rijad do të "digjen në ferr"

 

Rijad, 22 prill 2004 - Kleriku më i lartë i Arabisë Saudite ka thënë sot (e enjte) se njerëzit që qëndrojnë prapa sulmeve vetëvrasëse me makinat-bombë në Rijad do të "digjen në ferr" për vrasjen e muslimanëve të pafajshëm në këto sulme, të cilat, siç ka thënë vetë, i ka kryer një grup militant i lidhur me Al Kaidën, njofton Rojter.

Fillimisht dëshmitarët dhe personeli mjekësor kishin deklaruar se ishin vrarë 10 vetë, përfshirë edhe dy pjesëtarë të sigurimit, por Ministria saudite e Brendshme pastaj kishte shpallur se janë vrarë 4 vetë, kurse janë plagosur 148. Këto sulme i kanë dënuar edhe shumë qytetarë të njohur të Arabisë Saudite.

 

 

Janë arrestuar 17 vetë për lidhje me militantë islamikë

 

Kabul, 22 prill 200 - Në Kryeqytetin e Afganistanit, Kabul, janë arrestuar 17 vetë të dyshimtë se kanë planifikuar sulme kundër caqeve qeveritare dhe të të huajve, kanë bërë të ditur sot (e enjte) zyrtarët, njofton BBCWorld.

 

Arrestimet janë bërë në dy operacione policore, në të cilat janë zbuluar edhe mjete shpërthyese, kanë bërë të ditur policia vendore dhe paqeruajtësit e NATO-s. Ata janë arrestuar nën dyshimin për lidhje me militantë islamikë dhe tash ndodhen në burg.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |