Përmbajtja:

• "Ne dëshirojmë që populli i Kosovës të akseptojë vlerat dhe normat evropiane", tha Mekshejn pas takimit me Presidentin Rugova

• Më 23 e 24 prill mbahet një konferencë ndërkombëtare për arsimin e lartë të Kosovës

• Deklaratë e përbashkët e Grupit të Kontaktit për Kosovën

• Në Prishtinë u krijua Grupi përkrahës për Kosovën

• Grupi i Kontaktit është takuar edhe me përfaqësuesit e minoriteteve në Kosovë

• Shefi i UNMIK-ut përsëriti kërkesën për largimin e Maria Fuçit nga AKM-ja

• Gjilan: Prioritet i angazhimit të grave është çështja kombëtare

• Tre policët e plagosur amerikanë u transferuan jashtë bazës ushtarake amerikane në Bondstill

• Presidenti i Shqipërisë Alfred Moisiu nesër arrin për një vizitë dyditore në Kosovë

• Sekretari i përgjithshëm i NATO-s Shefer viziton të enjtën Kosovën

• Denis Mekshejn thotë se dëshiron të shohë një Kosovë me një ekonomi të zhvilluar

• Sot hapet panairi i librit shqip "Shkupi 2004"

• Policia italiane ka arrestuar pronarin e televizionit "Shijak" me akuzë për trafikim të drogës

• Denis Mekshejn tha se Britania mbështet zbatimin e Marrëveshjes së Ohrit

• Ka edhe shqiptarë në mesin e 13 të arrestuarve në Itali

• Në Sarajevë sot po takohen shefat e shteteve apo të qeverive të të nëntë vendeve të Evropës Juglindore

• Në Rijad janë dëgjuar shpërthime të fuqishme

• Në një seri sulmesh vetëvrasëse në Basra janë vrarë 68 njerëz

• Gjatë luftimeve në Falluxha kanë humbur jetën 6 civilë

• Dy avionë gjermanë përplasen në ajër - dy të vdekur

• Gjykata turke ka vërtetuar dënimin me burg të veprimtares kurde, Lejla Zana

• Tornadot në SHBA kanë shkaktuar vdekjen e të pakten 4 personave

• Përkundër përpjekjeve për armëpushim në Falluxha vazhdojnë luftimet

• Franca dëbon një klerik musliman nga Lioni

• Në një seri shpërthimesh në Basra - 58 të vrarë

• Ngritet një gjykatë e posaçme për Sadam Huseinin dhe anëtarët e regjimit të tij

• Bush: Misioni i trupave amerikane në Irak nuk do të ndryshojë

• Nuk ka probleme midis Uashingtonit dhe Amanit

• Trupat izraelite vrasin pesë palestinezë në Rripn e Gazës

• Në Itali sekuestrohen 7 mijë e 500 kallashnikovë me destinacion SHBA

• Libri "Plani i sulmit" ngjall diskutime në Washington

"Ne dëshirojmë që populli i Kosovës të akseptojë vlerat dhe normat evropiane", tha Mekshejn pas takimit me Presidentin Rugova

 

Prishtinë, 21 prill 2004 - Presidenti i Kosovës Ibrahim Rugova priti sot ministrin britanik për Evropën Denis Mekshejn, i cili prej dje ndodhet në një vizitë në Kosovë. Në këtë takim u bisedua për zhvillimet aktuale në Kosovë pas ngjarjeve të marsit si dhe për perspektivën e zhvillimit ekonomik të Kosovës. Pas takimit të dy bashkëbiseduesit nuk dhanë ndonjë deklaratë, por shkuan për të vizituar kishën ortodokse serbe.   Gjatë vizitës kishës së shkatërruar gjatë trazirave të marsit, Presidenti Rugova tha se këto akte të dhunshme janë dënuar nga institucionet e Kosovës dhe janë marrë masa që aktet e tilla të mos përsëriten më. "Të gjitha objektet fetare e kulturore janë pjesë e traditës së Kosovës, të popullit, të qytetarëve të saj dhe ne kemi marrë qëndrim t'i rindërtojmë së shpejti.   Do të respektojmë traditën tonë shekullore që kurrë nuk kemi shkatërruar tempuj fetarë religjiiozë, po flas për popullin shqiptar", tha Presidenti Rugova. Shqiptarët, tha ai, i kanë tri fec dhe kanë pasur tolerancë mes vete dhe kanë arritur të mbijetojnë në histori, duke shtuar se shqiptarët kanë pasur tolerancë edhe ndaj feve të tjera dhe ndaj serbëve në Kosovë.

 

Zoti Rugova premtoi se do të bëhet çmos që kultet fetare të kthehen në gjendjen e mëparshme, që të jenë traditë e Kosovës dhe e Evropës, duke cituar burrë shtetasin e madh britanik Çerçill, i cili ka thënë se në këtë pjesë të botës ka shumë histori si pasojë e zgjidhjeve të këqija historike.

Presidenti Rugova theksoi se me ministrin Mekshejn kishte biseduar për progresin që duhet të vazhdojë në Kosovë. Ai u shpreh se "edhe pavarësinë tonë nesër sa më shpejt ta bartim në Evropë, siç kanë bërë edhe vendet e tjera më të mëdha, si Britania e Madhe, dhe kjo do t'i kënaqte njerëzit dhe do të bënte që të ecnim shumë më shpejt".

Ministri Mekshejn pasi konstatoi se kisha është shkatërruar tmerrësisht, ai shprehu bindjen se së shpejti ajo do të rindërtohet. Ai tha se se nesër do të shkojë në Beograd dhe do të vizitojë xhamitë të cilat janë demoluar atje, sepse siç u shpreh, diferencat që janë shkaktuar nga urrejtja nuk duhet të shprehen në këtë lloj të dhunës.

"Pikërisht në 5-vjetorin e intervenimit ushtarak të NATO-s ne dëshirojmë që Kosova të jetë Kosovë, Serbia të jetë Serbi. Ne dëshirojmë që populli i Kosovës dhe serbët të akseptojnë vlerat dhe normat evropiane të cilat do të bëjnë të mundur, do të lejojnë që të jetojnë së bashku dhe ky është mesazhi ynë i qartë", nënvizoi Mekshejn.

Ai theksoi se kjo vizitë është një hap i madh dhe një mesazh i qartë para botës se liderët e Kosovës janë të gatshëm të garantojnë respektimin e traditës serbe në Kosovë, traditës së kishës ortodokse-kristiane, se ajo do të respektohet, do të mbrohet dhe kurrë më në këtë pjesë të Evropës nuk do të sulmohet asnjë kishë, asnjë xhami, asnjë sinagogë.

I pyetur si i komenton këto sulme, me motive etnike apo religjioze, Mekshejn tha:

"Unë i aksceptoj këto si probleme të shkaktuara si pasojë e diferencave. Unë nuk kërkoj që njerëzit të dashurohen në mes veti unë nuk jam i shenjtë. Unë jam politikan.

 

Unë thjesht dëshiroj që të shoh një vend me sistem, institucione e qeveri sipas normave dhe standardeve evropiane, e cila do të bënte që njerëzit të jetojnë të qetë, pa dhunë, pa kthime mbrapa. Kosova e ka të ardhmen e saj, Shqipëria të sajën, Maqedonia të sajën dhe i gjithë rajoni e ka një të ardhme dhe kjo është rruga drejt Evropës dhe kjo është rruga në të cilën unë dëshiroj të shoh Kosovën", tha ministri Mekshejn.

Ministri britanik sot ka pasur takime të veçanta edhe me kryeparlamentarin Nexhat Daci, kryeministrin Bajram Rexhepi, liderët politikë të AAK-së dhe PDK-së, Haradinaj dhe Thaçi, si dhe me përfaqësuesit serbë të Kosovës.

 

 

Më 23 e 24 prill mbahet një konferencë ndërkombëtare për arsimin e lartë të Kosovës

 

Prishtinë, 21 prill 2004 - Më 23 e 24 prill, në mjediset e hotelit "Grand" në Prishtinë do të mbahet Konferenca Ndërkombëtare për Arsimin e Lartë, të cilën e organizon Ministria e Arsimit, e Shkencës dhe e Teknologjisë e Kosovës.

Në Konferencë janë ftuar të marrin pjesë rreth 250 ekspertë vendorë e ndërkombëtarë dhe zyrtarë të MASHT.

Pjesë tematike nga kjo konferencë janë tema që trajtohen në strategjinë për arsimin e lartë dhe pritet që rezultatet e Konferencës do të inkorporohen në draftin e strategjisë së arsimit të lartë në Kosovë.

Konferenca organizohet si një forum për diskutime dhe këmbime opinionesh ndërmjet ekspertëve vendorë e ndërkombëtarë përkitazi me realitetet e reja, sfidat dhe drejtimin e zhvillimeve të mëtutjeshme në fushën e arsimit të lartë dhe hulumtimeve shkencore ne Kosovë.

 

 

Deklaratë e përbashkët e Grupit të Kontaktit për Kosovën

 

Prishtinë, 21 prill 2004 - Me rastin e takimit të parë në Prishtinë, Grupi i Kontaktit shpall qëllimin e saj për të intensifikuar angazhimin e saj në Kosovë. Grupi i Kontaktit do të takohet periodikisht në Prishtinë dhe aktivisht do të përkrahë punën e UNMIK-ut, KFOR-it, Institucioneve të Përkohshme të Vetëqeverisjes (IPVQ), dhe ka për qëllim që të inkurajojë një bashkëpunim më të madh mes tyre. Gjatë kësaj vizite të parë Prishtinës, Grupi i Kontaktit ka pasur diskutime me UNMIK-un, IPVQ-në, dhe me udhëheqësit e komuniteteve të shqiptarëve dhe serbëve të Kosovës.

Ne jemi duke u takuar në hijen e sulmeve të dhunshme mbi njerëzit dhe pronën e cila i kushtoi Kosovës 19 jetë dhe shkatërroi apo dëmtoi qindra shtëpi, kisha, manastire, spitale dhe shkolla. Ne e dënojmë fuqimisht dhunën që u krye kundër njerëzve të Kosovës, KFOR-it dhe UNMIK-ut.
Dhuna e muajit të kaluar ishte një pengesë e madhe për vizionin që ne e kemi për ardhmërinë e Kosovës.

 

Ky vizion vazhdon të jetë një Kosovë shumetnike në të cilën të gjithë qytetarët e saj jetojnë në paqë dhe siguri. Grupi i Kontaktit e rikonfirmon përkushtimin e saj për politikën e "Standardeve para statusit" dhe për procesin e vlerësimit të standardeve, që do të thotë edhe caktimin e një date të vlerësimit të plotë nga mesi i vitit 2005, ashtu siç është përcaktuar në deklaratën presidenciale të Këshillit të Sigurimit të Kombeve të Bashkuara me 12 dhjetor 2003.

 

Dhuna e fundit ka kthyer prapa Kosovën dhe procesin e standardeve. Disa standarde të rëndësishme janë shkelur. Tani mbetet në institucionet dhe udhëheqësit e Kosovës që të punojnë në një partneritet të vërtetë me UNMIK-un për të krijuar kushtet për një Kosovë shumetnike dhe demokratike.

 

Prandaj, ne e mirëpresim shpalljen e Planit për Implementimin e Standardeve të Kosovës, dhe vëjmë në pah orientimin e dokumentit se disa pjesë të tij do të kenë nevojë për modifikim dhe përforcim në fushat kyçe, duke pasur parasysh dhunën e marsit.

 

Grupi i Kontaktit i jep përparësi të veçantë elementeve që kanë të bëjnë me shumetnicitetin, në të gjitha standardet, e sidomos në sundimin e ligjit, lirinë e lëvizjes, kthimet dhe riintegrimin, si dhe në zhvillimin e iniciativave për një qeverisje efektive në nivelin qendror dhe lokal.

Grupi i Kontaktit përshëndet "Letrën e udhëheqësve institucionalë dhe politikë drejtuar popullit të Kosovës me 2 prill". Ne e lavdërojmë lidershipin që kryeministri Bajram Rexhepi e ka treguar në reagimin e tij ndaj dhunës si dhe për faktin se ia ka zgjatur dorën komuniteteve të prekura. Në afatin e shkurtër është shumë e rëndësishme që të riparohen dëmet që janë shkaktuar në trazira ashtu që gjendja të kthehet ashtu si ka qenë para dhunës.

 

Një kompenzim gjegjës duhet paguar. Duhet të formohet një plan gjithëpërfshirës i kthimeve. Grupi i Kontaktit mirëpret vendimin e Qeverisë për ndarjen e disa milionë Eurove nga buxheti i konsoliduar i Kosovës që do të përdoren për rindërtime. Duhet të bëhen aranzhimet e nevojshme me Kishën Ortodokse Serbe për të filluar riparimin e kishave dhe manastireve që janë shkatërruar apo dëmtuar.

Grupi i Kontaktit kërkon nga institucionet politike të Kosovës që të punojnë me UNMIK-un dhe KFOR-in që të ketë siguri për të gjitha komunitetet. Çmojmë faktin se janë arrestuar rreth 200 persona, duke përfshirë këtu edhe disa që janë akuzuar për organizimin e dhunës.

 

Populli dhe institucionet e Kosovës duhet të bashkëpunojnë në mënyrë që të kapen dhe gjykohen kryesit e shumë vrasjeve të pazgjidhura në Kosovë. Shërbimi Policor i Kosovës ka nevojë për më tepër trajnim, sidomos për kontrollimin e trazirave, dhe ka nevojë për më shumë përgjegjësi.

 

Pala shqiptare e Kosovës mori mbi vete që të bëjë një raport për UNMIK-un dhe Grupin e Kontaktit lidhur me aksionet që kanë ndërmarrë.

Grupi i Kontaktit i dëgjoi deri në hollësi atë që thanë udhëheqësit e serbëve të Kosovës. Grupi i Kontaktit kërkoi nga serbët e Kosovës që t'i ribashkohen plotësisht procesit politik dhe të hyjnë prap në institucionet politike qendrore dhe komunale prej të cilave u tërheqën më parë.

 

Ardhmëria e tyre është në Kosovë. Çfarëdo që të jetë statusi përfundimtar i Kosovës, është në interesin e të gjithëve që të marrin pjesë në institucionet që janë themeluar zyrtarisht në Kosovë nga ana e bashkësisë ndërkombëtare. Kjo në masë të madhe do të lehtësojë përparimin në të gjitha standardet dhe do të përmirësojë jetesën e pjesëtarëve të të gjitha komuniteteve.

 

Grupi i Kontaktit poashtu kërkoi edhe nga këta udhëheqës të serbëve të Kosovës që të bëjnë një raport për UNMIK-un dhe Grupin e Kontaktit.

Ekonomia e Kosovës mbetet një fushë e shqetësimit të madh. Kosova urgjentisht ka nevojë për krijimin e vendeve të punës. Reforma e ekonomisë së tregut po shkon shumë ngadalë. Grupi i Kontaktit kërkon nga UNMIK-u dhe IPVQ-ja që të përmirësojnë bashkëpunimin ashtu që të lëvizë privatizimi.

Grupi i Kontaktit sheh se Kosova ka ndërmarrë hapa fundamentalë për të themeluar institucione demokratike funksionale - ka një Presidencë, Qeveri dhe Kuvend funksional, të gjitha këto të zgjedhura përmes disa zgjedhjeve që janë vlerësuar të lira dhe të drejta.

 

Një segment që i përket këtij standardi e ku dhuna e fundit vuri në pah sjelljen joadekuate ishin mediumet, ku raportimi sensacionalist i disa gazetave dhe televizioneve mund t'i ketë kontribuar dhunës. Grupi i Kontaktit apelon në UNMIK-un që të jetë më i ashpër ndaj gazetarisë së papërgjegjshme, qoftë e shkruar apo elektronike.

Grupi i Kontaktit shpreson se institucionet dhe populli i Kosovës, me pjesëmarrjen e të gjitha komuniteteve që jetojnë atje, do t'i përgjigjen kësaj sfide, riparojnë dëmet e shkaktuara nga dhuna e muajit të kaluar dhe të rifillojnë projektin e krijimit të "Një Kosove ku të gjithë - pa marrë parasysh prejardhjen etnike, racore apo përkatësinë fetare - janë të lirë për të jetuar, punuar dhe udhëtuar pa frikë, armiqësi apo rrezik, dhe ku ka tolerancë, drejtësi dhe paqë për të gjithë, - thuhet në fund të deklaratës së Grupit të Kontaktit të lëshuar nga Zyra amerikane në Prishtinë.

 

 

Në Prishtinë u krijua Grupi përkrahës për Kosovën

Prishtinë, 21 prill 2004 - Përfaqësuesit e Grupit të Kontaktit, Bashkimit Evropian, krerët e UNMIK-ut dhe të institucioneve të Kosovës, si dhe përfaqësuesit e NATO-s zhvilluan një takim në mjediset e Misionit amerikan në Prishtinë, ku edhe themeluan Grupin përkrahës për Kosovën.

 

Grupi përkrahës, i cili ka për qëllim të ndihmojë Kosovën në sferën politike dhe ekonomike, të takohet çdo gjashtë javë që të gjejë forma për përshpejtimin e përmbushjes së standardeve dhe hapjen e diskutimeve për statusin përfundimtar të Kosovës në mesin e vitit 2005.

Pas këtij takimi, kryeministri i Kosovës, Bajram Rexhepi tha se krijimi i Grupit përkrahës për Kosovën në një mënyrë është forcimi i rolit amerikan, por edhe forcimi i Grupit të Kontaktit, i cili është i domosdoshëm për proceset në Kosovë.

"Ky grup është shumë më operative dhe mund t'i identifikojmë edhe prioritetet mbi prioritetet, të cilat janë për Kosovën dhe sa më shpejt të shkojmë drejt synimit, drejt implementimit të standardeve dhe që mesi i vitit 2005 mos të jetë vetëm dëshirë, por relitet dhe të fillojë definimi i statusit përfundimtar të Kosovës", ka thënë kryeministri Rexhepi.

 

Sipas tij, të gjithë përfaqësuesit e Grupit të Kontaktit janë pajtuar se duhet bërë një transfer më i shpejtë i përgjegjësive në shumë fusha nga UNMIK-u tek institucionet e Kosovës. Përveç ministrisë së mbrojtjes, qeveria e ardhshme mund t'i ketë të gjitha ministritë e tjera që i mungojnë aktualisht.

Ndërkaq përfaqësuesi i BE-së Stefan Lehne shprehu mbështetjen që i është dhënë UNMIK-ut dhe institiucioneve vendëse në përmbushjen e standardeve.

"Qëllimi kryesor është ta mbështesim UNMIK-un në punën e tij, veçanërisht në standardet për Kosovën. Grupi i Kontaktit do të vijë rregullisht këtu dhe do të marrim raporte lidhur me përparimet e bëra në përmbushjen e standardeve. Ata do të kenë bisedime me udhëheqësit shqiptarë dhe serbë të Kosovës për të identifikuar prioritetet", ka thënë z. Lehne.

Takimi i djeshëm për herë të parë në Prishtinë i Grupit të Kontaktit, ndërkaq ishte iniciativë e qeverisë amerikane për krijimin e Grupit përkrahës për Kosovën.

 

 

Grupi i Kontaktit është takuar edhe me përfaqësuesit e minoriteteve në Kosovë

 

Prishtinë, 21 prill 2004 - Grupi i Kontaktit është takuar dje edhe me përfaqësuesit e minoriteteve në Kosovë. Anëtarët e Grupit të Kontaktit kanë kërkuar nga minoritetet që edhe ata të luajnë rol të rëndësishëm për krijimin e një Kosove shumetnike.

 

Shefi i Zyrës gjermane në Prishtinë Peter Randorf ka thënë se Grupi i Kontaktit po i shikon ngjarjet në Kosovë me shumë kujdes. Ai shtoi se kolegët e tij nga Grupi i Kontaktit do të kthehen në Kosovë pas dy muajsh për të parë progresin.

 

 

Shefi i UNMIK-ut përsëriti kërkesën për largimin e Maria Fuçit nga AKM-ja

 

Prishtinë, 21 prill 2004 - Përkundër vendimit të shefit të UNMIK-ut për largimin e Maria Fuçit nga posti i menaxheres së AKM-së, ajo nuk ka pranuar të largohet dhe ka pohuar se ende është në krye të AKM-së.

 

Mirëpo, dje shefi i UNMIK-ut Hari Holkeri, Marie Fuçit ia ka përsëritur kërkesën që të largohet nga kjo detyrë, ndërkaq shefit të Shtyllës së Katërt, Nikolas Lamsdorf i ka sugjeruar ta fillojë procedurën për zëvendësimin e saj.

 

 

Gjilan: Prioritet i angazhimit të grave është çështja kombëtare

 

Gjilan, 21 prill 2004 - Forumi i Gruas së LDK-së në Gjilan mbajti kuvendin e katërt, në të cilin zgjodhi kryesinë e re 15 anëtarëshe, ndërsa detyrën e kryetares ia besoi për herë të dytë zonjës Drita Maliqi. Në punimet e Kuvendit morën pjesë edhe Melihate Tërmkolli, kryetare e këtij asociacioni të grave të LDK-së, me bashkëpunëtoret.

Duke shprehur kënaqësinë e saj që gjendet në mesin e grave të Gjilanit, zonja Melihate Tërmkolli tha se ato nuk janë kursyer asnjëherë që ta japin kontributin e tyre në projektin madhor për realizimin e pavarësisë së Kosovës dhe falë këtij angazhimi të përbashkët rruga jonë drejt këtij synimi po ecën përpara. Për Forumin e Gruas dhe LDK-në, esenciale është çështja kombëtare, tha zonja Tërmkolli.

Gratë janë të kënaqura që përfaqësimi i tyre në strukturat politike të Kosovës është ngritur në 30 për qind dhe tani ato kanë hapësira më të mëdha për të dëshmuar veteveten në proceset e përgjithshme nëpër të cilat po kalon Kosova, thanë Xhylshene Berisha dhe Sanije Zeqiraj.

Xhemajl Hyseni, kryetar i Degës së LDK në Gjilan theksoi se kuvendi zgjedhor është edhe një zotim i gruas se ajo do të jetë e angazhuar deri në fund në çështjen madhore të Kosovës.

Kryetarja e Forumit të Gruas, Drita Maliqi, duke u falënderuar për besimin e dhënë, tha se dëshira e grave të Gjilanit dhe Kosovës është që ky asosciacion ta shënojë në pavarësi pesëmbëdhjetë vjetorin e punës dhe angazhimit.

 

 

Tre policët e plagosur amerikanë u transferuan jashtë bazës ushtarake amerikane në Bondstill

 

Prishtinë, 21 prill 2004 - Tre policë amerikan që u plagosën në incidentin në qendrën për paraburgim në Mitrovicë u transferuan jashtë bazës ushtarake amerikane në Bondstill, ka njoftuar zëdhënësi i paqeruajtësve amerikanë në Kosovë Kris Koll.

 

Thuhet se kjo gjë është bërë meqë ushtarët e plagosur u duhet trajtim më i avancuar mjekësor. Nuk është bërë e ditur për vendin se ku janë dërguar ushtarët e plagosur.

 

 

Presidenti i Shqipërisë Alfred Moisiu nesër arrin për një vizitë dyditore në Kosovë

 

Prishtinë, 21 prill 2004 - Presidenti i Shqipërisë Alfred Moisiu nesër më 22 prill arrin për një vizitë në Kosovë. Ai gjatë qëndrimit dyditor do të takohet me përfaqësuesit e institucioneve vendore dhe ndërkombëtare. Moisiu në Kosovë vjen me ftesë të shefit të UNMIK-ut, Hari Holkeri, që ia bëri gjatë vizitës në Shqipëri.

 

 

Sekretari i përgjithshëm i NATO-s Shefer viziton të enjtën Kosovën

 

Bruksel, 21 prill 2004 - Sekretari i përgjithshëm i NATO-s Jap de Hop Skefer viziton nesër Kosovën. Ai do të marrë pjesë pjesë në kuadër të një delegacioni të NATO-s, ku do të jenë të gjithë ambasadorët e vendeve të Aleancës. Ky lajm është konfirmuar nga selia e NATO-s në Bruksel. Kjo është vizita e tij e dytë në Kosovë brenda një muaji.

 

 

Denis Mekshejn thotë se dëshiron të shohë një Kosovë me një ekonomi të zhvilluar

 

Prishtinë, 21 prill 2004 - Ministri i Britanisë së Madhe për Evropë Denis Mekshejn ka arritur mbrëmë në një vizitë dyditore në Kosovë. Mekshejn tha pas një takimi me kryeadministratorin e Kosovës Hari Holkeri se e ardhmja e Kosovës është në Bashkimin Evropian.

"Dëshirojmë të shohim më shumë lëvizje, të shohim një Kosovë me shumë vende të punës, më shumë investime, me ekonomi të zhvilluar dhe më shumë përgjegjësi të lidershipit të Kosovës", tha ai.

 

Eshtë koha, tha ai, që të gjithë liderët si serbë, ashtu edhe ata të shumicës në Kosovë, të thonë se dhuna duhet të eliminohet. Kosova do të shkojë drejtë Evropës si një vend, apo si një etnitet, i cili do t'i lejojë kosovarët të marrin frymë lirisht, tha ministri britanik.

 

Përmbushja e standardeve në Kosovë varet drejtëpërdrejt nga qytetarët e veçanërisht nga të rinjtë e vendit, të cilët duhet më shumë të kyçen në zhvillimin e këtij vendi, ngase kjo është shumë e rëndësishme për të ardhmen e Kosovës, tha z.Mekshejn.

Gjatë ditës së sotme diplomati britanik Mekshejn do të zhvillojë takime me komanadantin e KFOR-it, gjeneralin Holger Kamerhof,si me përfaqësuesit kryesorë institucional e partiak të Kosovës.

 

 

Sot hapet panairi i librit shqip "Shkupi 2004"

 

Shkup, 21 prill 2004 - Në Shkup është hapur panairi ndërkombëtar i librit: "Libri dhe librografia 2004". Në këtë panair po marrin pjesë rreth 150 shtëpi botuese nga vende të ndryshme të Evropës.

 

Hapjen e panairit e ka bërë akademik Luan Starova, i cili është shqiptari i parë që bëri hapjen solemne të këtij panairi ndërkombëtar. Ndërkaq, sot do të hapet edhe panairi i librit shqip "Shkupi 2004" të cilin e organizon Shoqata e Botuesve Shqiptarë. Ky panair do të qëndrojë i hapur deri më 5 prill.

 

 

Policia italiane ka arrestuar pronarin e televizionit "Shijak" me akuzë për trafikim të drogës

 

Romë, 21 prill 2004 - Policia italiane ka arrestuar në qytetin Piza pronarin e Televizionit privat "Shijak" të Shqipërisë, Gëzim Ismailin, me akuzë për trafikim ndëkombëtar të drogës. Ismaili është arrestuar katër ditë më parë pas një urdhër arresti të lëshuar nga Prokuroria e këtij qyteti.

 

Arrestimi i tij ka ndodhur pas dy vjet përgjimi bisedash të Gëzim Ismailit dhe birit të tij nga ana e Prokurorisë italiane për të vërtetuar nëse pronari i TV Shijakut ishte implikuar në trafikimin e paligjshëm të drogës apo jo, njoftuan mediat e Shqipërisë.

 

 

Denis Mekshejn tha se Britania mbështet zbatimin e Marrëveshjes së Ohrit

 

Shkup, 21 prill 2004 - Gjatë qëndrimit të djeshëm në Shkup, ministri britanik për Evropën, Denis Mekshejn deklaroi se Britania mbështet zbatimin e Marrëveshjes së Ohrit që mundëson bashkëjetesën e komuniteteve në këtë vend.

 

Gjatë vizitës së tij z. Mekshejn u takua me zyrtarë të lartë dhe liderë politikë në Maqedoni, ku është biseduar edhe për rrjedhën e zgjedhjeve të parakohshme presidenciale. Njoftohet se diplomati britanik i ka trimëruar zyrtarët maqedonas që të vazhdojnë rrugën e filluar drejt reformave të cilat Maqedonisë i sigurojnë integrimin në strukturat evroatlantike.

Ministri britanik po ashtu ka përshëndetur përfundimin e raundit të parë të zgjedhjeve presidenciale në Maqedoni, të cilat do t'i vlerësojë si të lira dhe demokratike.

 

 

Ka edhe shqiptarë në mesin e 13 të arrestuarve në Itali

 

Romë, 21 prill 2004 - Njoftimet nga Italia bëjnë të ditur se policia ka arrestuar së paku 13 anëtarë të një bande në rajonin veriperëndimor të Piemontit pasi dyshohen se kanë organizuar prostitucion dhe martesa të rreme.

Njoftime të medias thonë se mes atyre të arrestuar kishte shtetas italianë dhe shqiptarë.
Besohet se ata kanë siguruar leje banimi fallco për vajza të reja nga Evropa Lindore, kryesisht Rumania, Ukraina dhe Moldavia nëpërmjet martesave jo të vërteta me shtetas italianë të cilët janë paguar secili 500 dollarë për martesë nga banda.

 

 

Në Sarajevë sot po takohen shefat e shteteve apo të qeverive të të nëntë vendeve të Evropës Juglindore

 

Sarajevë, 21 prill 2004 - Në Sarajevë sot po i zhvillon punimet takimi i shtatë i shefave të shteteve apo të qeverive të nëntë vendeve të Evropës Juglindore, i cili po mbahet në kuadër të Procesit të bashkëpunimit në Evropën Juglindore (SEECP).

Në këtë takim po marrin pjesë presidentët e Bullgarisë, Rumanisë, Serbisë e Malit të Zi dhe ushtruesi i detyrës së presidentit të Maqedonisë dhe Bosnjës e Hercegovinës, si dhe kryeministrat e Shqipërisë, Greqisë dhe Turqisë.

Temat më të rëndësishme në takimin e Sarajevës do të jenë ato të që kanë të bëjnë me bashkëpunimin rajonal, para së gjithash në luftën kundër krimit të organizuar, në fushën e liberalizimit dhe harmonizimit të regjimit të vizave si dhe në fushën e qarkullimit, telekomunikacionit dhe energjetikës.

Punën e samitit të Sarajevës po e përcjell edhe koordinatori i Paktit të Stabilitetit të Evropës Juglindore Erhard Busek dhe sekretari i përgjithshëm të Këshillit të Evropës Valter Shvimer.

 

 

Në Rijad janë dëgjuar shpërthime të fuqishme

 

Rijad, 21 prill 2004 - Shpërthime të fuqishme janë dëgjuar sot (e merkurë) në kryeqytetin saudit, Rijad, kanë thënë dëshmitarët, njofton Rojter. Shpërthimet kanë ndodhur në afërsi të ndërtesës së Sigurimit të përgjithshëm, që është i lidhur me Ministrinë e Brendshme në qendër të Rijadit, kanë thënë dëshmitarët. Një zyrtar i policisë ka konfirmuar shpërthimet, por s'ka dhënë detaje të tjera.

 

Shpërthimet kanë thyer xhamat e dritareve dhe kanë dëmtuar muret në ndërtesat e afërme. Nuk dihet ende nëse ka pasur viktima.

 

 

Në një seri sulmesh vetëvrasëse në Basra janë vrarë 68 njerëz

 

Basra, 21 prill 2004 - Në një seri sulmesh vetëvrasëse, që ndodhen sot (e merkurë) në qytetin irakian Basra dhe Zubair, sipas njoftimeve më të reja kanë humbur jetën 68 njerëz, shumë syresh fëmijë, njofton Rojter.

 

Sulmet vetëvrasëse me autobombë në katër stacionet policore në Basra dhe Zubair ishtin të bashkërenduara. Për këto sulme, zyrtarët kanë fajësuar rrjetin Al Kaida të Osama bin Ladenit.

 

 

Gjatë luftimeve në Falluxha kanë humbur jetën 6 civilë

 

Falluxha, 21 prill 2004 - Gjatë luftimeve të sotme ndërmjet forcave amerikane dhe kryengritëse në Falluxha, që kanë filluar në mengjes dhe ende po vazhdojnë, njoftohet të kenë humbur jetën gjashtë civilë. Siç është njoftuar edhe në edicionet e mëhershme, ndërmjet palëve ndërluftuese ka shkëmbim zjarri automatik, mortajash dhe garanatash.

 

 

Dy avionë gjermanë përplasen në ajër - dy të vdekur

 

Tarp, Gjermani, 21 prill 2004 - Dy avionë luftarakë gjermanë Tornado janë përplasur sot mbi shtetin federal Shlezvig Holshtajn, ku humbi jetën një pilot dhe anëtari i akuipazhit, ndërsa dy anëtarë të tjerë të ekuipazhit janë lënduar, ka bërë të ditur policia.

Ndërkaq stacioni televiziv N-TV ka njoftuar se dy persona kanë shpëtuar duke kërcyer me parashutë.
Të dy avionët kanë qenë nga baza Torp në shtetin e njëjtë federal, ndërkaq për momentin nuk dihet se cili është shkaku i përplasjes së avionëve mbi ishullin Ajdershted.

 

 

Gjykata turke ka vërtetuar dënimin me burg të veprimtares kurde, Lejla Zana

 

Ankara, 21 prill 2004 - Një gjykatë turke i ka vërtetuar dënimin me burg veprimtares, Lejla Zana dhe të tre ish-anëtarëve të tjerë të Parlamentit turk në një rigjykim të urdhëruar nga Gjykata Evropiane e të Drejtave të Njeriut, njofton BBCWorld.

 

Ky verdikt është një grusht për aspiratat e Turqisë për anëtarësim në Bashkimin Evropian. Që të katër të dënuarit duhet të vuajnë në burg edhe 14 muaj. Ata janë dënuar më 1994.

Gjykata turke ka vërtetuar dënimin e mëparshëm me akuzën për anëtarsim në një organizatë rebele kurde, përkundër asaj se Gjykata Evropiane e të Drejtave të Njeriut ka konstatuar se akuza është e pabazë.

 

Turqia përpiqet të fillojë negociatat për anëtarësim në BE, por ky vendim do të zemërojë shumë politikanë evropianë që kanë bërë thirrje haptas për lirimin e znj. Zana.

 

 

Tornadot në SHBA kanë shkaktuar vdekjen e të pakten 4 personave

 

Utica, Illinois, 21 prill 2004 - Tornadot e fuqishme e kanë goditur që dje dhe kanë vazhduar edhe sot (e merkurë) pjesën qendrore dhe veriore të shtetit Illinois të Shteteve të Bashkuara dhe kështu kanë shkaktuar vdekjen e të pakten katër personave, kanë shkatërruar pullazin e një shkolle dhe kanë rrënuar dhjetëra ndërtesa, kanë bërë të ditur autoritetet vendore, njofton AP.

 

Tre fëmijë dhe një grua janë nxjerrë nga rrënojat dhe janë dërguar në spital. Ekipet e shpëtimit po bëjnë çmos për kërkimin e njerëzve që eventualisht kanë pësuar nga kjo fatkeqësi natyurore. Dëmet më të mdha janë shkaktuar në qytetin Utica, që ka njëmijë banorë dhe gjendet 90 mila në jugperendim të Çikagos.

 

 

Përkundër përpjekjeve për armëpushim në Falluxha vazhdojnë luftimet

 

Falluxha, Irak, 21 prill 2004 - Forcat amerikane dhe kryengritësit irakianë kanë shkëmbyer sot (e merkurë) zjarr automatik, mortajash dhe granatash në qytetin e trazuar Falluxha përkundër përpjekjeve për armëpushim, kanë thënë dëshmitarët, njofton Rojter.

 

Përleshjet kanë filluar heret në mëngjes dhe ende (edhe pas tri orësh) po vazhdojnë. Aeroplanët ushtarakw amerikanë vazhdojnë të fluturojnë mbi zonë, thonë dëshmitarët. Njëherëpërnjëherë s=ka njoftime për viktima, kurse ushtria amerikane s=i ka komentuar ngjarjet.

 

 

Franca dëbon një klerik musliman nga Lioni

 

Paris, 21 prill 2004 - Ministri francez i Brendshëm ka urdhëruar dëbimin e një kleriku musliman, i cili ka mbrojtur rrahjen e femrave, njofton Rojter. Kleriku quhet Abdelkader Bouziani, është imam në Lion dhe është me prejardhje algjeriane.

 

Ai i ka thënë një revisteje se Kurani lejon rrahjen dhe gurëzimin (vrasjen në muranë) të femrave madhore. Ai gjithashtu ka thënë se shpreson që Ambarë bota do të bëhet muslimane. Liderët muslimanë në Francë kanë dënuar thëniet e këtij imami dhe kanë thënë se islami nuk pajtohet me dhunën në familje.

 

 

Në një seri shpërthimesh në Basra - 58 të vrarë

 

Basra, 21 prill 2004 - Të paktën 58 vetë kanë humbur jetën dhe shumë të tjerë janë plagosur gjatë një serie shpërthimesh në zonën e Basrës, në jug të Irakut, njoftojnë R ojter dhe AP. Ndërkaq, AFP njofton për 61 të vrarë.

Shpërthimet e para ndodhën në mëngjes në qendër të Basrës. Të paktën 44 vetë humbën jetën gjatë tre sulmeve mbi tre stacione policie.

Njoftohet se një autobus që transportonte fëmijët për në shkollë, u shkatërrua pas njërit prej shpërthimeve.

Gjatë një shpërthimi tjetër, të katërt, të paktën dy vetë humbën jetën në Zubair, në jug të Basrës.
Një ushtarak britanik tha se shpërthimet në Basra u kryen me bomba-makina.

Në lagjen Saudia të Basrës, shihen skeletet e katër makinave, mes tyre dhe dy autobusët e shkollave.
Një kolonel i policisë tha se dhjetë nxënës të shkollës fillore janë mes viktimave. Autobusi me të cilin ata po udhëtonin, u ndodh pranë vendit ku ndodhi njëri nga shpërthimet.

Doktorët irakjanë thonë se kanë numëruar deri 44 të vdekur dhe rreth 200 të plagosur.

 

 

Ngritet një gjykatë e posaçme për Sadam Huseinin dhe anëtarët e regjimit të tij

 

Bagdad, 21 prill 2004 - Irakianët ngritën një gjykatë për gjykuar Sadam Huseinin dhe anëtarë të tjerë të regjimit të tij. Një zëdhënës i Kongresit Kombëtar Irakian tha se gjykata do të kryesohet nga Salem Çelebi, nipi i kreut të Këshillit Qeverisës, Ahmed Çelebi.

Zëdhënësi tha se Salem Çeçebiu ka emëruar një komision prej 7 gjyqëtarësh dhe katër prokurorësh dhe se të tjerë do të emërohen më vonë. Ende nuk është caktuar data për gjyqin e Sadam Huseinit, i cili mbahet nga autoritetet amerikane që kur u kap në dhjetor.

 

 

Bush: Misioni i trupave amerikane në Irak nuk do të ndryshojë

 

Uashington, 21 prill 2004 - Presidenti amerikan Xhorxh Bush tha se nuk do të ketë sprapsje në luftën ndaj atyre që kundërshtojnë praninë amerikane në Irak. Bush po bën fushatë në shtetin e Nju Jorkut dhe anketat e opinionin publik tregojnë se ai kryeson ndaj rivalit të tij të mundshëm demokrat.

Presidenti Bush tha se trupat amerikane kanë shumë për të bërë në Irak, por misioni i tyre atje nuk do të ndryshojë, për shkak të shtimit të luftimeve ditët e fundit.

"Ata nuk mund të na frikësojnë dhe as të na bëjnë të ndryshojmë parimet tona thellë në shpirt. Ata po përpiqen të vrasin për të lëkundur vullnetin tonë. Por ne jemi shumë të fuqishëm, shumë të fortë dhe shumë të vendosur dhe nuk lëkundemi para kriminelëve dhe terroristëve", tha Presidenti Bush.

 

 

Nuk ka probleme midis Uashingtonit dhe Amanit

 

Aman, 21 prill 2004 - Ministri i jashtëm i Jordanisë, Marvan Mausher, tha se nuk ekzistojnë probleme midis vendit të tij dhe Shteteve të Bashkuara, megjithë vendimin e Mbretit Abdullah për të shyrë një takim me Presidentin Bush.

Zoti Muasher tha se Amani dhe Uashingtoni vazhdojnë të bashkëpunojnë ngushtë për arritjen e paqes në Lindjen e Mesme dhe theksoi se Mbreti Abdullah dhe Presidenti Bush do të takohen muajin tjetër.

 

Mbreti jordanez e anuloi papritur takimin që ishte planifikuar për të merkurën dhe Pallati i tij Mbretëror tha se është e nevojshme të sqarohet qendrimi amerikan lidhur me statusin përfundimtar të territoreve palestineze.

 

 

Trupat izraelite vrasin pesë palestinezë në Rripn e Gazës

 

Gaza, 21 prill 2004 - Trupat izraelite vranë pesë palestinezë në përleshjet që shpërthyen të martën gjatë një operacioni ushtarak në veriun e Rripit të Gazës.

Palestinezë të armatosur me pushkë automatike dhe bomba zjarrvënëse vunë në shenjestër trupat që u futën në një zonë pranë qytetit Beit Lahia.

Zyrtarë të ushtrisë izraelite thonë se operacioni kishte për qëllim të parandalonte përdorimin e zonës nga ekstremistët për të qëlluar me raketa vendbanimet hebraike aty pranë. Ekstremistët kanë qëlluar me të paktën 15 raketa objektet izraelite këtë javë, duke plagosur mbi 7 izraelitë.

 

 

Në Itali sekuestrohen 7 mijë e 500 kallashnikovë me destinacion SHBA

Romë, 21 prill 2004 - Autoritetet italiane sekuestruan të paktën 7 mijë e 500 kallashnikovë që po dërgoheshin për në Shtetet e Bashkuara. Zyrtarët e doganave njoftuan sot se i kishin gjetur armët gjatë javës së kaluar në portin Gioia Tauro të Italisë së jugut. Ato ishin fshehur në konteinerët e një anijeje që kishte ardhur nga Rumania.

Dokumentet e ngarkesës së paligjshme tregonin se ajo po i dërgohej një kompanie në shtetin amerikan të Georgias. Armët, me vlerë prej miliona dollarësh, u gjatën gjatë një kontrolli doganor rutinë.

 

 

Libri "Plani i sulmit" ngjall diskutime në Washington

 

Uashington, 21 prill 2004 - Sekretari amerikan i shtetit Kolin Pauell thotë se mbështet pa rezerva vendimin e Presidentit Bush për të ndërhyrë ushtarakisht në Irak. Sekretari Pauell i bëri komentet dje, pas daljes në qarkullim të librit "Plani i sulmit", i shkruar nga ndihmës kryeredaktori i gazetës "Uashington Post", Bob Uoduord (Woodward).

 

Pauell hedh poshtë aludimet e gazetarit Uoduord se Presidenti kishte vendosur që në janar të vitit të kaluar për të ndërhyrë ushtarakisht në Irak, ndërkohë që ende vazhdonin negociatat në Këshillin e Sigurimit. Sekretari Pauell hodhi poshtë edhe pohimin se aktualisht marrëdhëniet e tij me nënpresidentin janë shumë të ftohta.

Për Shtëpinë e Bardhë dje ishte një ditë mohimesh, pas aludimeve të bëra në librin e zotit Bob Uodurod, "Plani i Sulmit". Autori e përshkruan administratën si të përçarë rreth çështjes së luftës në Irak. Sipas tij, Sekretari Pauell qëndronte në krye të atyre që e kundërshtonin planin.

"Ai kishte rezerva të mëdha ndaj luftës dhe e kishte paralajmëruar presidentin se Iraku mund t'i mbetej në dorë",- thotë Uoduord.

Autori thotë se zoti Pauell ishte lënë i painformuar, aq sa Presidenti as që i kishte kërkuar mendim për ndërhyrjen në Irak, pohim që Sekretari i Shtetit e mohon.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |