|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Mitrovicë / Samba Sane: Ka vështirësi që të kthehen njerëzit në pronat e tyre, në të dyja anët e qytetit, por kjo nuk do të thotë se duhet ndejur duarëryq

 

Mitrovicë, 21 prill 2004 / TN / H. SYLA - Komiteti për Politikë dhe Financa i Kuvendit të Komunës në mbledhjen e vetë të rregulltë, ka shqyrtuar edhe kërkesat e qytetarëve të lagjeve veriore të qytetit, të shtruara në protestën e mbajtur më 14.04.2004, duke përmbushur kështu një nga kërkesat e protestuesve.

 

KPF ka vlerësuar se protestat e banorëve joserbë të lagjeve veriore ishin dinjitoze, si dhe ka përkrahur në tërësi kërkesat e paraqitura në protestë, për të cilat u tha se ishin të drejta dhe humane, e sig dihet, kërkesë kryesore ishte kthimi i pakusht në pronat e tyre në pjesën veriore të qytetit.

 

Anëtarët e KPF-së janë shprehur se janë të gatshëm që të angazhohen maksimalisht dhe të mobilizojnë të gjitha institucionet e pushtetit lokal për t’iu ndihmuar qytetarëve të lagjeve veriore në realizimin e kërkesave të tyre.

 

Përveç kësaj, anëtarët e KPF-së u dakorduan që, edhepse kanë patur biseda telefonike, t’u drejtohen me shkrim përfaqësuesve të institucioneve kryesore shtetërore të vendit, që t’i pranojnë në bisedë përfaqësuesit e qytetarëve të lagjeve veriore të Mitrovicës, në mënyrë që drejtpërejt t’u thonë se çfarë janë mundësitë për realizimin e kërkesave të tyre, meqë ato janë jashtë kompetencave të autoriteteve lokale.

 

Duke u ndërlidhur më këtë çështje të shtruar në rendin e ditës të KPF-së, zëvendësadministratori komunal, Samba Sane, ka thënë fjalë të mira për organizatorët  dhe protestuesit, duke vlerësuar lartë sjelljen e protestuesve dhe  organizimin e protestës, për të cilën tha se ishte e qetë dhe ashtu si u ka hije qytetarëve të protestojnë.

 

Samba Sane ka premtuar se, posa institucionet ndërkombëtare t’i marrin kërkesat e protestuesve, do të organizojë takimin me përfaqësuesit e banorëve për t’i shqyrtuar ato,  në mënyrë që të ndihmohet në realizimin e tyre.

 

Në fund, zëvendësadministratori komunal, Samba Sane, është shprehur se ka vështirësi që të kthehen njerëzit në pronat e tyre, në të dyja anët e qytetit, por kjo nuk do të thotë se duhet ndejur duarëryq, përkundrazi, duhet të punohet shumë në këtë drejtim.