Përmbajtja:

• Presidenti Rugova priti udhëheqjne komunale të Prishtinës

• Seanca e ardhshme e Kuvendit mbahet më 29 prill

• Tomë Hajdaraj merr pjesë në Kongresin e Veterinerëve të Letonisë

• Plani "Standardet për Kosovën" do të shqyrtohet edhe në seancën e ardhshme të Kuvendit

• Ka filluar takimi i përfaqësuesve të Grupit të Kontaktit, UNMIK-ut dhe institucioneve të Kosovës

• Presidenti Rugova priti zëvendësndihmësen e sekretarit amerikan të Shtetit

• Zëdhënësi i OKB-së thotë se s'dihet asnjë motiv për sulmin e policit jordanez në Mitrovicë

• H. Kamerhof: Siguria në Kosovës nuk mund të arrihet vetëm nga forcat e KFOR-it, por për të duhet të angazhohen edhe qytetarët

• D.Filips: Kombet e Bashkuara të heqin dorë nga gurthemeli i tyre për 'standardet para statusit'

• Oganizohet një trajnim për përgjimet sipas ligjit të ri të procedurës penale

• Sot në Prishtinë takohen përfaqësuesit e Grupit të Kontaktit

• Katër policëve jordanezë të arrestuar u është hequr imuniteti

• Rexhepi dhe Ris vizituan policët e plagosur amerikanë në Bondstill

• Në një akademi u përkujtua Hamdi Gashi

• Kandidatët presidencialë në Maqedoni llogarisin në votat e shqiptarëve

• Ministri britanik beson se Kroacia është më afër BE-së

• Tre nazistë italianë gjykohen për krime të luftës së LDB-së

• Koalicioni arrin marrëveshjen me kryengritësit në Falluxha

• Trupat spanjolle filluan procesin e tërheqjes nga Iraku

• Bushi i kërkon Kongresit të mbajë në fuqi ligjin kundër terrorizmit

• Shtyhet afati i dorëzimit të ektremistëve të Al Kaidës në kufirin pakistanez

• KS i OKB-së diskuton vrasjen e liderit të Hamasit

• Në zgjedhjet e përgjithshme në Indi, militantët kanë vrarë të pakten një ushtar

• Policia suedeze ka arrestuar 4 të dyshimtë për lidhje me militantët islamikë

• Mbi 100 piktura të vjedhura nga ish-Bashkimi Sovjetik gjatë LDB i kthehen Holandës

• Mbreti Abdullah shtyn vizitën në SHBA

• Edhe Hondurasi do të tërheqë 370 trupat nga Iraku

• NASA ka shtyrë lansimin e një sateliti që do të testojë teorinë e relativitetit të Ajnshtajnit

• Bler: Britania do të mbajë një referendum për Kushtetutën e propozuar evropiane

Presidenti Rugova priti udhëheqjne komunale të Prishtinës

 

Prishtinë, 20 prill 2004 - Presidenti i Kosovës Ibrahim Rugova priti sot udhëheqjen komunale të Prishtinës nga të cilët është njoftuar me planin për zhvillimin strategjik të kryeqendrës së Kosovës. Me këtë rast presidenti Rugova mirëpriti dhe vlerësoi pozitivisht Planin e zhvillimit strategjik të qytetit të Prishtinës për periudhën 2004- 2020 dhe këtë këtë dokument e ka vlerësuar si element të pavarësisë dhe shtetit të Kosovës, që në fazat e mëvonshme do të duhej të konkretizohej.

 

Presidenti Rugova shprehu bindjen se së shpejti do të fillojnë punët me planet rregullative dhe do të bëhet legalizimi i objekteve të ndryshme të cilat nuk dëmtojnë funksionalizimin e qytetit. "Në zonat përreth Prishtinës të vendosen disa shenja për të parandaluar ndërtimet pa leje dhe komuna të jetë sa më efikase në caktimin e lokacioneve me leje të veçanta ndërtimi", tha ai. Presidenti Rugova vlerësoi se kjo është një ngjarje me rëndësi të veçantë si edhe diskutimi publik që ka filluar.

"Ky është edhe një element i pavarësisë dhe shtetit të Kosovës, prandaj ju dëshiroj sukses dhe do të keni përkrahjen time në rrugën tuaj të mëtutjeshme", tha Presidenti Rugova.

Kryetari i KK të Prishtinës Ismet Beqiri tha se udhëheqja komunale e kishte njoftuar Presidentin për punën që është bërë rreth planit strategjik për Prishtinën apo siç u shpreh "për shpalosjen e vizionit për Prishtinën".

Ky plan, tha ai, hap perspektivën e zhvillimit të kryeqytetit, duke theksuar se Kuvend komunal, obligohet që ta nxjerrë në diskutim publik ku do të jipen të gjitha vërejtjet, këshillat, sugjerimet të cilat do të inkorporohen në këtë plan që ai të bëhet sa më i dobishëm për Prishtinën.

 

Ai shtoi se gjatë diskutimit publik do të mabhen takime të grupeve punuese të veçanta të ekonomisë, transportit, gjelbërimit, të infrastrukturës me qëllim që në këtë plan të inkorporohet e gjithë elita dhe ekspertët e shoqërisë për të dhënë kontributin e tyre, tha Beqiri.

Ismet Beqiri me këtë rast kërkoi edhe ndihmën e të gjithë qytetarëve, duke apeluar etk ata që të kenë më shumë kujdes si në ndërtim, por edhe në aspektet e tjera të mirëmbajtjes së qytetit.

 

 

Seanca e ardhshme e Kuvendit mbahet më 29 prill

 

Prishtinë, 20 prill 2004 - Deputetët e Kuvendit të Kosovës do të mblidhen më 29 prill (ndoshta edhe një ditë më parë) për të shqyrtuar 11 projektligje, ka vendosur Kryesia në mbledhjen e sotme e drejtuar nga Nexhat Daci, kryetar.

 

Për herë tyë dytë do të shqyrtohen: Projektligji për energjinë, ai për Rregullartorin e energjisë dhe ai për Energjinë elektrike. Do të shqyrtohen edhe Projektligji për njësitë matëse, ai për Standardizimin, Projektligji për materialin fidanor, ai për Marrëveshjet financiare ndërkombëtare dhe ai për Kinematografinë e Kosovës.

Për herë të parë, ndërkaq do të shqyrtohen: Projektligji për parkun Kombëtar Bjeshkët e Nemuna, ai për Mbrojtjen e konsumatorëve dhe Projektligji për ndërtimet.

Në po këtë seancë do të shtrohet propozimi i Komisionit për Bashkëpunim Ndërkombëtar për vënie në rend dite të Standardeve për Kosovën, kurse Kryesia e ka parë të udhës që të krijohet një grup punues për përcjelljen e implementimit të Standardeve.

 

Do të shqyrtohet edhe propozimi i Komnisionit për Tregti dhe Industri për radhitjen në seancë plenare të Raportit për gjendjen në Minierat e Kosovës dhe të Projektliogjit për Odën Ekonomike të Kosovës, i cili, siç u mor vesh nga përfaqësuesi i Qeverisë në këtë mbledhje, do të prezantohet në dy variante.

Kryesia ka vendosur që në seancën e 29 prillit të shqyrtohet edhe rekomandimi për emërimin e gjyqtarëve dhe të prokurorëve dhe vërejtjet e Zyrës Ligjore të UNMIK-ut lidhur me Ligjin për bashkëpunim me Tribunalin Penal të Hagës.

Në këtë seancë ministrat do të përgjigjen në pyetjet e deputetëve të shtruara në seancat e shkuara.

 

 

Tomë Hajdaraj merr pjesë në Kongresin e Veterinerëve të Letonisë

 

Prishtinë, 20 prill 2004 - Me ftesë të Qeverisë së Letonisë, kryetari i Komisionit për bujqësi, pylltari dhe zhvillim rural të Kuvendit të Kosovës , Tomë Hajdaraj do të marrër pjesë në Kongresin e Veterinerëve, që mbahet prej 20 deri 25 prill në qytetin Riga.

 

Hajdaraj do të ketë takime edhe me ministrin e Bujqësisë ëë këtij shteti, me kryetarin e Komisionit parlamentar për bujqësi, me drejtorin e Shërbimit Veteriner, si dhe do të vizitojë disa komplekse agrare.

 

 

Plani "Standardet për Kosovën" do të shqyrtohet edhe në seancën e ardhshme të Kuvendit

 

Prishtinë, 20 prill 2004 - Kuvendi i Kosovës në seancën e ardhshme, që do të mbahet më 29 prill, do të shqyrtojë planin "Standardet për Kosovën" dhe njëmbëdhjetë projektligje, u vendos sot në mbledhjen e Kryesisë së Kuvendit.

Planin "Standardet për Kosovën" do ta parashtrojë Komisioni për Bashkëpunim Ndërkombëtar i Kuvendit, i cili është caktuar për t'u marrë me këtë çështje. Gjithashtu në këtë seancë do të nxirren për shqyrtim të parë tri projektligje: Projektligji për parkun nacional "Bjeshkët e Nemuna", ai për Mbrojtjen e Konsumatorëve dhe si Projektligji për ndërtimet. Ndërkaq për të dytën herë do të shqyrtohen një pako ligjesh.

 

Por ende nuk dihet nëse deputetët serbë do të marrin pjesë në këtë seancë, ndërkohë që Kryesia i ka ftuar ata që të kthehen në Kuvend.

 

 

Ka filluar takimi i përfaqësuesve të Grupit të Kontaktit, UNMIK-ut dhe institucioneve të Kosovës

 

Prishtinë, 20 prill 2004 - Me iniciativë të Qeverisë amerikane, sot rreth orës 14.00, në mjediset e Misionit amerikan në Prishtinë, ka filluar takimi i përbashkët i përfaqësuesve të Grupit të Kontaktit, të UNMIK-ut dhe të institucioneve të Kosovës, ku pritet të formohet grupi pëkrahës për Kosovën. Vendet e Grupit të Kontaktit (Britania, Gjermania, Franca, Italia dhe Rusia) në këtë takim po përfaqësohen në nivel të zëvendësdrejtorëve të ministrive të punëve të jashtme.

 

Në emër të Uashingtonit zyrtar, në këtë takim po merr pjesë Keslin Stifens, zëvendësndihmëse e sekretarit të Shtetit për Evropën. Qëllimi i grupit përkrahës për Kosovën është që të ndihmohet procesi i përmbushjes së standardeve për Kosovën.

 

 

Presidenti Rugova priti zëvendësndihmësen e sekretarit amerikan të Shtetit

 

Prishtinë, 20 prill 2004 - Presidenti Ibrahim Rugiva priti dje pasdite zonjën Keslin Stifens, zëvendësndihmëse e sekretarit amerikan të Shtetit për Evropën Juglindore dhe Qendrore.

Presidenti Rugova fillimisht në këtë takim ka shprehur ngushëllimin e tij dhe të popullit të Kosovës për policët e vrarë amerikanë në incidentin në Mitrovicë gjatë fundjavës së kaluar, duke e quajtur atë një ngjarje tronditëse.

Presidenti Rugova ka thënë pas takimit se institucionet e Kosovës dhe bashkësia ndërkombëtare do të bëjnë përpjekje për t'i përmbushur standardet, që duhet të plotësojë Kosova para se të diskutohet statusi i saj përfundimtar.

 

Njëherit zoti Rugova edhe me këtë rast ka ritheksuar kërkesën për njohjen e pavarësisë së Kosovës dhe ka theksuar se po bëhen përpjekje për kthimin e mirëbesimit ndëretnik pas trazirave të muajit të kaluar.

 

Presidenti i Kosovës po ashtu ka kërkuar që Shtetet e Bashkuara të ndihmojnë qoftë në procesin e kthimit të mirëbesimit ndëretnik qoftë në procesin e plotësimit të standardeve. Ai tha se në këtë takim është biseduar për zhvillimin ekonomik, për privatizimin që duhet të vazhdojë dhe për investimet që duhet t'i garantojmë në Kosovë.

 

Zonja Stifens ka thënë pas takimit me presidentin Rugova se është kthyer në Kosovë për të parë se si udhëheqësit vendës së bashku me përfaqësuesit ndërkombëtarë po punojnë për të rëndërtuar atë që është dëmtuar gjatë dhunës së muajit të kaluar.

 

Zonja Stifens ka konfirmuar gjithashtu takimin e paraparë për sot të Grupit të Kontaktit në Prishtinë me temë qendrore krijimin e kushteve për përmirësim të gjendje në Kosovë.

Ajo shtoi se në takimet që do të zhvillohen me udhëheqësit ndërkombëtarë dhe vendorë do të diksutohet si mund të shtyhet përpara zhvillimi ekonomik dhe politik në Kosovë, gjë për të cilën ka qenë këtu edhe nënsekretari amerikan i Shtetit Mark Grosman.

Zonja Stivens është takuar mbrëmë edhe me kryeadministratorin e Kosovë Hari Holkerin.

 

 

Zëdhënësi i OKB-së thotë se s'dihet asnjë motiv për sulmin e policit jordanez në Mitrovicë

 

Nju Jork, 20 prill 2004 - Zëdhënësi i Kombeve të Bashkuara, Ferhan HaK ka thënë se asnjë motiv për sulmin e policit jordanez në të cilin u vranë dy police amerikane në Kosovë, nuk është i njohur.

 

Ai ka refuzuar të komentojë drejtpërdrejt njoftimet se sulmi ishte i motivuar nga politika amerikane në Lindjen e Mesme. "Ne shpresojmë se incidentet e tilla që kanë ndodhur gjithkund në botë, nuk do të ndikojnë në punën që po bëhet në misionet tona të dnryshme në botë", ka thënë Hak.

Sidoqoftë, tha ai për radion "Evropa e lirë", ky incident ka shtuar shqetësimet e Kombeve të Bashkuara në Kosovë. "Ne shpresojmë se policia e Kombeve të Bashkuara në Kosovë mund të vazhdojë të kryejë punën e saj në mënyrë po aq profesionale sa edhe në të kaluarën", tha Hak, duke vlerësuar se ishte kjo një kohë e rëndë dhe se ky incident është edhe një arsye më shumë për brengosje.

 

 

H. Kamerhof: Siguria në Kosovës nuk mund të arrihet vetëm nga forcat e KFOR-it, por për të duhet të angazhohen edhe qytetarët

 

Prishtinë, 20 prill 2004 - Komandanti i KFOR-it, gjenerali Holger Kamerhof ka thënë se zgjidhjet politike dhe implementimi i standardeve në Kosovë nuk mund të arrihen nëse nuk do të ketë siguri.

 

Ai tha se forcat paqeruajtëse do të vazhdojnë të garantojnë sigurinë në Kosovë, por pa ndihmën e qytetarëvet të saj kjo nuk mund të arrihet. Kamerhof citohet të ketë thënë se dhuna nuk mund të jetë rrugë për arritjen e asnjë qëllimi dhe e vlerësoi shumë të rëndësishme gjetjen e rrugëve për kapërcimin e gjendjes së krijuar pas trazirave të marsit.

 

 

D.Filips: Kombet e Bashkuara të heqin dorë nga gurthemeli i tyre për 'standardet para statusit'

 

Pragë, 20 prill 2004 - Trazirat në Kosovë janë të dënueshme, ato nuk kanë vend në rajonin, i cili përpiqet të integrohet në Evropë dhe ta konsolidojë zhvillimin demokratik, thotë Dejvid Filips, drejtor i Qendrës për Aksion Preventiv në Uashington.

 

Sipas tij, mungesa e progresit për kthimin e pakicës serbe në Kosovë, si dhe drejt përcaktimit të statusit final të Kosovës, i kanë thelluar pozicionet radikale, dhe dhunën pothuajse e bënë të pashmangshme, tha Filips në një intervistë dhënë radios "Evropa e lirë".

Filips mendon se se këto zhvillime e nënvizojnë rëndësinë që Kombet e Bashkuara të heqin dorë nga gurthemeli i tyre për 'standardet para statusit', dhe më me guxim të ecin drejt dorëzimit të sovranitetit republikës së pavarur të Kosovës. "Kuptohet, dhuna nuk mund të shpërblehet, por duhet të ketë disa ndryshime në status-quo-në, sepse kushtet aktuale, thjesht janë të papranueshme për të gjitha palët", thotë Filips.

Ai tha se fjala kantonizim është një fjalë e keqe dhe kanë asociacione skajshmërisht negative, "dhe nuk pijnë ujë kur kanë të bëjnë me zgjidhjen në Kosovë".

Ndërkaq, duke komentuar idenë që Bashkimi Evropian ta marrë përsipër misionin e OKB-së në Kosovë, Dejvid Filips tha se "kosovarët duhet ta marrin përsipër misionin në Kosovë, dhe duhet të ketë hapa të matura drejt vetëqeverisjes".

"Nëse bashkësia ndërkombëtare mund ta ndihmojë këtë proces, aq më mirë. Por bashkësia ndërkombëtare nuk ka ndihmuar sa duhet në ndryshimin e gjendjes së status-quo-së", ka nënvizuar Dejvoid Filips në këtë intervistë.

 

 

Oganizohet një trajnim për përgjimet sipas ligjit të ri të procedurës penale

 

Prishtinë, 20 prill 2004 - Duke pasur parasysh reformat e fundit të sistemit të drejtësisë penale dhe nxjerrjen e ligjit të ri penal dhe atij për procedurën penale, Departamenti i Drejtësisë i Shteteve të Bashkuara, në bashkëpunim me Institutin Juridik të Kosovës do të prezantojë një trajnim njëditor mbi Përgjimin sipas ligjit të ri të procedurës penale për prokurorët, oficerët e policisë dhe gjyqtarët penalë.

 

Seminari do të mbahet me 21 prill 2004 dhe do të përsëritet me 22 prill.

Ky trajnim njëditor do të përqëndrohet në aspektet praktike të përgjimit dhe në hetimet e krimeve sipas ligjit të ri të procedurës penale. Poashtu, trajnimi do të japë një pasqyrë të neneve që kanë të bëjnë në mënyrë specifike me këtë masë të fshehtë.

 

Ky seminar ka për qëllim t'u japë pjesëmarrësve njohuritë themelore të punës për çështjet ligjore dhe kuadrove që nevojiten për të bërë përgjimet gjatë hetimeve penale.

 

 

Sot në Prishtinë takohen përfaqësuesit e Grupit të Kontaktit

 

Prishtinë, 20 prill 2004 - Sot në mesditë (13.30) në mjediset e Zyrës amerikane në Prishtinë mbahet një takim i përbashkët i përfaqësuesve të Grupit të Kontaktit, të UNMIK-ut dhe të institucioneve të Kosovës, ku pritet të formohet grupi pëkrahës për Kosovën. Kjo është iniciativë e Qeverisë amerikane.

Vendet e Grupit të Kontaktit (Britania, Gjermania, Franca, Italia dhe Rusia) në këtë takim do të përfaqësohen në nivel të zëvendësdrejtorëve të ministrive të punëve të jashtme. Përfaqësuesja ameikane në këtë takim do të jetë Keslin Stifens, zëvendësndihmëse e sekretarit të Shtetit për Evropën.

Qëllimi i grupit përkrahës për Kosovën është që të ndihmohet procesi i përmbushjes së standardeve për Kosovën.

 

 

Katër policëve jordanezë të arrestuar u është hequr imuniteti

 

Prishtinë, 20 prill 2004 - Hetuesit e OKB-së po hetojnë vrasjen e dy policëve amerikanë dhe plagosjen e së paku 11 të tjerëve nga policët jordanezë brenda policisë ndërkombëtare.

 

Njoftohet se sekretari i përgjithshëm i OKB-së Kofi Anana ka marrë vendim për heqjen e imunitetit diplomatik katër policëve jordanezë të arrestuar pas incidenti tragjik në burgun e Mitrovicës, ka thënë zëdhënësi i UNMIK-ut, Neraj Sing.

Ai ka thënë se njëri nga policët e plagosur është në gjendje të rëndë shëndetësore dhe mjekët po luftojnë maksimalisht për t'ia shpëtuar jetën.

 

 

Rexhepi dhe Ris vizituan policët e plagosur amerikanë në Bondstill

 

Ferizaj, 20 prill 2004 - Kryeministri i Kosovës Bajram Rexhepi bashkë me shefen e Zyrës amerikane në Prishtinë zonjën Marsi Ris kanë vizituar policët e plagosur amerikanë në kampin amerikan Bondstill. Kryeministri Rexhepi dhe Marsi Ris të shoqëruar nga komandanti i Brigadës së Jugut, gjeneralin Erlandson policëve të lënduar u kanë uruar shërim të shpejtë dhe kthim në krye të detyrës.

 

 

Në një akademi u përkujtua Hamdi Gashi

 

Prishtinë, 20 prill 2004 - Në një akademi të organizuar në Prishtinë u përkujtua Hamdi Gashi, dekan i Fakultetit të Bujqësisë në Prishtinë, i cili u vra para pesë vjetësh nga forcat serbe. Në këtë akademi u tha se ai ka dhënë një kontribut të çmuar në fushën e arsimit, por edhe për çështjen kombëtare.

 

 

PVD-së vlerëson të domosdoshëm konstituimin e Këshillit Nacional të shqiptarëve të Luginës së Preshevës

 

Preshevë, 20 prill 2004 - Kryesia e përgjithshme e Partisë për Veprim Demokratik ka shqyrtuar planin dhe programin për zgjidhjen e krizës në Luginë të Preshevës që dy qeveritë e aprovuan në shkurt të vitit 2001. Me këtë rast është vlerësuar se në tri vitet që ishin të parapara për realizimin e këtij programi u arrijtën rezultatet e para në ndërprerjen e konflikteve të armatosura dhe relaksimin e zonës së sigurisë tokësore, mirëpo më vonë u zhvillua një proces shumë i ngadalshëm politik që arriti rezultate të kufizuara edhe ate vetëm në disa pjesë të detyrave kryesore të programit.

Gjatë tërë kësaj kohe Kryesia e PVD-së në vazhdimësi ka tërhequr vërejtjen në mungesën e gatishmërisë së dy qeverive për ta transformuar Trupin Koordinues, në përbërjen e të cilit dominuan gjeneralët e Ushtrisë jugosllave dhe xhandarmërisë ku nuk pati vend për përfaqësuesit legjitim të shqiptarëve të Luginës.

Gjithashtu në punën e Trupit Koordinues nuk u kyçën as përfaqësuesit e të gjithë ministrive relevante për zgjidhjen e problemeve me rëndësi jetike për qytetarët e këtij rajoni.

Në sigurimin e qarkullimit të lirë të qytetarëve dhe në kthimin e popullatës së zhvendosur vazhdojnë të ekzistojnë probleme serioze, posaçërisht brenda ish-zonës së sigurisë tokësore dhe në zonën kufitare me Maqedoninë sepse këto zona vazhdojnë të kenë prezencë të policisë speciale dhe të forcave ushtarake të angazhuara në mënyrë të jashtëzakonshme. Andaj edhe gjer më tani nuk janë evituar pasojat e pastrimit etnik të kryera në Karadakun e Preshevës, malësinë e Bujanovcit e posaçërisht në Medvegjë.

Kryesia e PVD-së me brengosje të madhe i pranon reduktimet drastike investive që po i paralajmëron Trupi Koordinues i dy qeverive për periudhën vijuese. Madje vlerësohet si shumë shqetësues qëndrimi injorues i qeverisë së re, e cila nuk po tregon as interesimin më të vogël për plotësimin e obligimeve të marra me planin dhe programin për zgjidhjen e krizës në Luginë të Preshevës.

Në këtë mbledhje Kryesia e përgjithëshme e PVD-së e vlerësoi të domosdoshëm konstituimin e Këshillit Nacional të shqiptarëve të Luginës së Preshevës. Andaj edhe u konstatua se, nëse edhe më tutje nga subjektet tjera politike vazhdon kontestimi i këshilltarëve të kuvendeve komunale, e vetmja zgjidhje aktuale është që të fillojnë përgadtitjet për zgjedhje të drejtpërdrejta të anëtarëve të Këshillit Nacional, ku do të merrnin pjesë të gjithë shqiptarët nga Lugina e Preshevës që kanë të drejtë vote, thuhet në një komunikatë të PVD-së me seli në Preshevë.

 

 

Kandidatët presidencialë në Maqedoni llogarisin në votat e shqiptarëve

 

Shkup, 20 prill 2004 - Dy kandidatët e mbetur për president të Maqedonisë, Branko Cërvenkovsk dhe Sashko Keder llogarisin në votat e shqiptarëve në rrethin e dytë të votimeve. Kështu LSDM në pushtet dhe partia opozitare VMRO-DPMN kërkojnë votat e elektoratit shqiptar në rrethin e dytë zgjedhor të cilat do të jenë vendimtare për zgjedhjen e presidentit të ri të Maqedonisë.

Shtabi zgjedhor i kandidatit të LSDM-së për kryetar shteti Branko Cërvenkovski llogarit në votat e partnerit të koalicionit qeveritar - BDI. Mirëpo, BDI ende nuk ka vendosur nëse do ta mështesë Branko Cërvenkovskin në rrethin e dytë zgjedhor.

 

 

Ministri britanik beson se Kroacia është më afër BE-së

 

Zagreb, 20 prill 2004 - Ministri britanik për Evropën, Denis Mekshejn, ka deklaruar se beson që Kroacia do të bëhet anëtare e BE-së para fundit të dekadës. Zoti Mekshejn i bëri këto komente pas takimit me udhëheqës kroatë në Zagreb.

Ai e lavdëroi udhëheqjen e re në Kroaci për përparimin, që e quajti, dramatik në përmirësimin e bashkëpunimit me gjykatën ndërkombëtare për krime lufte në Hagë, një çështje kjo që nga Komisioni Evropian deri vonë është cilësuar si pengesë madhore e aspiratave kroate për anëtarësim.

Në dy muajt e fundit Kroacia i ka dorëzuar dy gjeneralë kroatë dhe gjashtë ish-zyrtarë kroato-boshnjak në Gjykatën e Hagës.

 

 

Tre nazistë italianë gjykohen për krime të luftës së LDB-së

 

La Specia, Itali, 20 prill 2004 - Të shpëtuarit e një masakrave më të rënda të kohës së luftës në Itali dhe të afërmit ë viktimave kanë udhëtuar në qytetin La Specia për të marrë pjesë në një gjykim për krime lufte, njofton BBCWorld.

 

Ata kanë pritur 60 vjet për këtë ditë dhe më në fund shumë syresh do të japin të dhëna për krimet e tre oficerëve SS, të cilët janë akuzuar për vrasjen 560 civilëve në fshatin Sant'Ana di Stacema.

 

 

Koalicioni arrin marrëveshjen me kryengritësit në Falluxha

 

Falluxha, 20 prill 2004 - Zyrtarë amerikanë në Irak thonë se kanë arritur një marrëveshje me udhëheqësit vendorë në qytetin e trazuar Falluxha.

Zëdhënësi amerikan Dan Senor tha se në bazë të marrëveshjes, forcat e koalicionit nuk do t'i rifillojnë operacionet sulmuese nëse të gjithë banorët e Falluxhës dorëzojnë armët e rënda që mbajnë pa leje.

Të dyja palët ranë gjithashtu dakord për nevojën e rifillimit sa më shpejt të patrullave të prëbashkëta të forcave të koalicionit dhe atyre irakiane në qytetin e trazuar. Marinsat do të lejojnë edhe shpërndarjen e lirë të ushqimeve e ilaçeve dhe kujdesin mjekësor në Falluxha.

 

 

Trupat spanjolle filluan procesin e tërheqjes nga Iraku

 

Madrid, 20 prill 2004 - Ministri i mbrojtjes i Spanjës, Hoze Bono, tha se trupat spanjolle kanë filluar procesin e tërheqjes nga Iraku dhe do të arrijnë në atdhe brenda gjashtë javësh, vendim për të cilin Presidenti amerikan Xhorxh Bush shprehu pakënaqësi.

Bono e bëri këtë njoftim të hënën, pas takimit të parë të kabinetit të ri spanjoll. Po dje, kryeministri spanjoll, Sapatero, i telefonoi presidentit Bush për të diskutuar rreth vendimit të tij për t=u tërhequr nga Iraku tani dhe jo në muajin qershor sië ishte njoftuar fillimisht.

Një zëdhënës i Shtëpisë së Bardhë u tha gazetarëve se Presidenti Bush kishte shprehur pakënaqësi ndaj tërheqjes së menjëhershme, por nuk bëri përpjekje të ndryshonte qendrimin e kryeministrit spanjoll. Disa prej aleatëve kryesorë të Shteteve të Bashkuara, përfshirë Britaninë dhe Japoninë, kanë shprehur angazhimin e tyre ndaj Irakut.

 

 

Bushi i kërkon Kongresit të mbajë në fuqi ligjin kundër terrorizmit

 

Uashington, 20 prill 2004 - Presidenti Bush i bëri thirje Kongresit të mbajë në fuqi një ligj kundër terrorizmit, i cili u miratua pas sulmeve të 11 shtatorit 2001.

Në një fjalim që mbajti të hënën në Pensilvani, Bush tha se ligji që nënshkroi në vitin 2001, i njohur si Akti Patriotik, po e bën Amerikën më të sigurtë. Ai tha se ligji, i cili do të skadojë vitin e ardhshëm, ka rrëzuar muret që ndajnë forcat e rendit nga shërbimet e zbulimit.

 

 

Shtyhet afati i dorëzimit të ektremistëve të Al Kaidës në kufirin pakistanez

 

Bagdad, 20 prill 2004 - Autoritetet pakistaneze thanë se e kanë shtyrë afatin e 20 prill 2004it për dorëzimin e të kërkuarve të al Kaidës, talebanëve dhe të atyre që i strehojnë ata në afërsi të kufirit me Afganistanin.

Guvernatori i provincës të kufirit veriperendimor të Pakistanit tha se anëtarëve të armatosur të fiseve do tu jepet më shumë kohë për të ndjekur ekstremistët derisa përpjekjet e tyre të japin rezultate pozitive.

 

Duke folur në kryeqytetin Peshavar të provincës ai tha se qeveria kërkon të mënjanojë përsëritjen e gjakëderdhjes së muajit të kaluar kur më shumë se 100 persona u vranë gjatë ofensivës qeveritare kundër ekstremistëve.

 

 

KS i OKB-së diskuton vrasjen e liderit të Hamasit

 

Nju Jork, 20 prill 2004 - Këshilli i Sigurimit i Kombeve të Bashkuara ka zhvilluar, për herë të dytë brenda këtij muaji, një takim urgjent pas vrasjes së udhëheqësit të grupit militant Hamas.

Vendet arabe, të zemëruara nga vrasja, të shtunën e kaluar, të Abdel Aziz Rantisit planifikojnë që të paraqesin një rezolutë e cila do të dënonte veprimet e Izraelit.

Ambasadori i Izraelit në OKB, Dan Gillerman, i tha Këshillit se vrasja e Rantisit ishte në kuadër të luftës globale kundër terrorizmit dhe jo vetëm një veprim mbrojtës i Izraelit.

Dr. Mahmud al-Zahar është një lider tjetër i Hamasit, i cili deri tani ka arritur të mbijetojë.

Ai thotë se vrasja e Dr. Rantisit do ta bëjë Hamasin edhe më të fuqishëm se më parë.

 

 

Në zgjedhjet e përgjithshme në Indi, militantët kanë vrarë të pakten një ushtar

 

Nju Delhi, 20 prill 2004 - Si rrjedhojë e dhunës gjatë votimeve për zgjedhjet e përgjithshme në Indi, të pakten një ushtar njoftohet të jetë vrarë sot (e martë) dhe gjashtë të tjerë janë plagosur kur militantët e dyshimtë kanë sulmuar dy vendvotime në Xhamu dhe në Kashmir, njofton BBCWorld.

 

Ndër të plagosur janë punëtorë të zgjedhjeve, votues dhe policë. Zgjedhjet e përgjithshme po bëhen në 13 shtete dhe në tri trerritore federale të Indisë.

 

 

Policia suedeze ka arrestuar 4 të dyshimtë për lidhje me militantët islamikë

 

Stokholm, 20 prill 2004 - Policia suedeze ka thënë se ka arrestuar katër vetë të dyshimtë për lidhje me militantët islamikë, njofton BBCWorld. Ata janë arrestuar mbrëmë vonë në një operacion policor në kryeqytet, Stokholm dhe Malmo, ka thënë policia.

 

Policia ka thënë se ata kanë lidhje me ekstremizmin islamik@ jashtë Evropës, por nuk kanë dhënë detaje të tjera.

 

 

Mbi 100 piktura të vjedhura nga ish-Bashkimi Sovjetik gjatë LDB i kthehen Holandës

 

Amstrdam, 20 prill 2004 - Më shumë se 100 piktura të vjedhura nga ish-Bashkimi Sovjetik gjatë Luftës së Dytë Botërore i janë kthyer zyrtarisht Holandës, njofton BBCWoprld. Këto piktura kanë qenë ruajtur në Muzeumin e kryeqytetit ukrainian, Kievit, për më shumë se 50 vjet. Fuillimisht ato kanë qenë vjedhur nga nazistët, kurse më 1947 qenë vjedhur nga Armata e Kuqe.

 

 

Mbreti Abdullah shtyn vizitën në SHBA

 

Aman, 20 prill 2004 - Mbreti i Jordanisë Abdullah, ka shtyrë takimin e planifikuar me presidentin Bush në Washington.

Vizita, e cila ishte paraparë të bëhej të mërkurën, tani do të zhvillohet në fillim të muajit maj.

Në një deklaratë të lëshuar në kryeqytetin jordanez, Amman, thuhet se pala jordaneze dëshiron që të sqarojë qëndrimin amerikan për procesin paqësor në Lindjen e Mesme.

Shtyrja vjen në kohën e rritjes së zemërimit arab ndaj përkrahjes amerikane për planin e Izraelit që të mbajë disa territore palestineze, të pushtuara që nga viti 1967.

Ministri i jashtëm jordanez Marvan Muasher të martën në Uashington do të takohet me sekretarin e Shtetit Kolin Pauell, ka bërë të ditur Departamenti i Shtetit. Muasher do të mbetet në Uashington për të përgatitur vizitën e mbretit Abdulla në SHBA.

 

 

Edhe Hondurasi do të tërheqë 370 trupat nga Iraku

 

Bagdad, 20 prill 2004 - Presidenti i Hondurasit, Rikardo Maduro ka deklaruar sot se vendi i tij do të tërheqë 370 trupat nga Iraku në afatin më të shkurtër të mundshëm. Trupat e Hondurasit kanë shërbyer nën komandën spanjolle në qytetin e Naxhafit.

Ndërkohë, kryeministri i Tajlandës Thaksin Shinawatra ka thënë se ai mund të tëhreqë personelin prej 450 vetash nga Iraku në rast se dhuna e shtuar në Irak do t'i pengojë ata për të kryer misionin.

Australia, Japonia, Koreja e Jugut dhe Filipinet, kanë përsëritur përkushtimin e tyre ndaj koalicionit.

 

 

NASA ka shtyrë lansimin e një sateliti që do të testojë teorinë e relativitetit të Ajnshtajnit

 

Kejp Karanevel, 20 prill 2004 - NASA ka shtyrë për sot pasdite lansimin e një sateliti që do të testojë teorinë e relativitetit të Albert Ajnshtajnit.

Sipas teorisë së Ajshtajnit, objektet e mëdha, si planetet, yjet dhe vrimat e zeza deformojnë kohën dhe hapësirën deri sa rrotullohen.

 

Shkencëtratë thonë se nëse teoria e Ajshtajnit është e vërtetë, prova B e gravitetit e NASA-s do të mund të detektojë se një sasi kohe dhe hapësire aktualisht mungon në orbitat e objekteve të mëdha në gjithësi.

 

Bler: Britania do të mbajë një referendum për Kushtetutën e propozuar evropiane

 

Londër, 20 prill 2004 - Kryeministri britanik, Toni Bler, ka shpallur se Britania do të mbajë një referendum për Kushtetutën e propozuar Evropiane, njofton AFP. Duke folur sot (e martë) në Dhomën e Përfaqësuesve, Bler ka thënë se Kushtetuta pritet të miratohet nga liderët evropianë në qershor, por së pari do të debatohet detajisht në parlament. "Pastaj populli le ta thotë fjalën përfundimtare", ka thënë Bler.

 

Kjo është kthesë e tij e madhe nga pozicioni se Kushtetuta e parë e Bashkimit Evropian s'ka nevojë t'i paraqitet popullit britanik. Bler nuk ka thënë se kur do të mbahet referendumi.

 

 

Në zgjedhjet e sotme në Indi janë vrarë 11 persona

 

Nju Delhi, 20 prill 2004 - Zgjedhjet parlamentare në Indi filluan sot (e martë) me gjakderdhje dhe deri tash njoftohet të jenë vrarë 11 persona, kurse janë plagosur edhe 18 të tjerë, njofton AP. Në këto zgjedhje, koalicioni i kryeministrit Atal Bihari Vaxhpaji shpreson të fitojë një mandat tjetër pesëvjeçar.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |