Përmbajtja:

• Presidenti Rugova shpreh keqardhje për incidentin në burgun e Mitrovicës

• Solana tha se nuk ka zgjidhje të statusit përfundimtar të Kosovës para përmbushjes së plotë të standardeve

• Ministri slloven i mbrojtjes po viziton Kosovën

• Rexhepi: Kosova mund të ndërmarrë një lëvizje të njëanshme për shpalljen e një referendumi për pavarësinë

• Reagim i Degës I të LDK-së ndaj letrave kërcënuese drejtuar kryetarit të KK të Prishtinës, Ismet Beqiri

• Në Makoc të Prishtinës u përkujtuan viktimat e terrorit serb

• Mekshejn sot po viziton Zagrebin, nesër vjen në Prishtinë

• Ende mbetet në fuqi ndalimi i tubimeve masive dhe sportive në Prishtnë dhe qendrat e mëdha

• Kosova nuk është multietnike, sepse ajo ka një shumicë të qartë shqiptare, thotë një ekspert gjerman

• Në Prishtinë arritën mbrëmë përfaqësuesit e Grupit të Kontaktit

• Shtefan Feler konfirmoi se në burgun e Mitrovicës janë vrarë dy policë amerikanë, një joradanez, 11 të tjerë janë plagosur

• Incidenti tragjik nuk ka të bëjë me zënkën rreth Irakut, thotë zëdhënësja e policisë në Mitrovicë

• Qeveria jordaneze ka shprehur keqardhje për vrasjen e dy policëve amerikanë në Kosovë

• Në Londër ka filluar takimi vjetor i Bankës Evropiane për Rindërtim dhe Zhvillim

• Banka Evropiane është e përfshirë në disa projekte në Shqipëri dhe në Kosovë

• Në Kosovë do të qëndrojnë edhe më tej dy mijë trupa shtesë të KFOR-it që erdhën pas trazirave të marsit

• Në një aksident komunikacioni ka vdekur Enver Thaçi, pjesëtar i sigurimit të kryetarit të AAK-së

• Në Gjakovë u bë varrimi i 15 martirëve nga viti 1999

• Në Prishtinë u mbajt një seminar për metoda të reja të menaxhimit dhe formave të biznesit

• Në teatrin "Dodona" rifillon skena teatrore studentore

• Gjykata e OKB-së për krime lufte ka konfirmuar se masakra e Srebernicës më 1995 ka qenë gjenocid

• Në qytetin e Fierit zbulohen 68 kg drogë dhe një depo armësh

• Pas trazirave në Kosovë civilët serbë kanë keqtrajtuar edhe pacientët shqiptarë të Luginës së Preshevës

• Izraeli do të investojë dhjetëra miliona dollarë në kibucet në Bregun Perendimor

• Bremer thotë se forcat irakiane nuk munden vetë të mbrojnë vendin

• Është vrarë një arab izraelit dhe një kolon hebrait

• Në një mision amerikano-rus, është nisur një anije kozmike me tre astronautë

• Rais thotë se Amerika nuk do të negociojë me autorët e rrëmbimeve

• Në Irak u vranë 10 ushtarë amerikanë

• Drama e fëmijëve ushtarë

• Kryeministri spanjoll urdhëron largimin e trupave

• Pentagoni paralajmëron Sirinë

• Policia britanike ka arrestuar 10 persona të dyshimtë për akte terroriste

Presidenti Rugova shpreh keqardhje për incidentin në burgun e Mitrovicës

 

Prishtinë, 19 prill 2004 - Presidenti i Kosovës, Ibrahim Rugova, shpreh keqardhjen e thellë për incidentin me pasoja tragjike që ka ndodhur të shtunën në burgun e Mitrovicës në mes të pjesëtarëve të policisë së UNMIK-ut, me ç'rast humbën jetën tre policë, dy amerikanë dhe një jordanez, dhe u plagosën disa policë ndërkombëtarë.

Presidenti Rugova u shpreh ngushëllime të sinqerta familjeve të të vrarëve dhe qeverisë amerikane dhe qeverisë jordaneze, ndërsa të plagosurve u dëshiron shërim të shpejtë.

 

 

Solana tha se nuk ka zgjidhje të statusit përfundimtar të Kosovës para përmbushjes së plotë të standardeve

 

Bruksel, 19 prill 2004 - Përfaqësuesi i lartë i Bashkimit Evropian për Politikë të Jashtme dhe Siguri, Havier Solana, ka deklaruar sot se qëndrimi i bashkësisë ndërkombëtare është plotësisht i qartë - nuk vjen parasysh kurrfarë zgjidhje e statusit përfundimtar të Kosovës para përmbushjes së plotë të standardeve.

Me këtë deklaratë thuhet se Solana ka reaguar ndaj një deklarate të kryeministrit Bajram Rexhepi dhënë gazetës londineze "Fajnenshëll tajms" se vitin e ardhshëm shqiptarët mund të marrin një vendim unilateral për pavarësinë.

Havier Solana këtë deklaratë e bëri pas një takimi të përbashkët me Këshillin e NATO-s në nivel ambasadorësh dhe të komitetit për politikë e siguri të BE në Bruksel, në të cilin në qendër të vemendjes ka qenë qëllimi që BE-ja të marrë përsipër misionin e SFOR-it në Bosnjë deri në fund të vitit, pastaj Kosova, Afganistani dhe Iraku.

Solana bëri të ditur se sot niset për në Uashington ku do të takohet me këshiltaren për Siguri Kombëtare të presidentit amerikan, Kondoliza Rajs dhe me sekretarin e Shtetit, Kolin Pauell, me nënpresidentin Dik Çejni, si dhe me sekretarin e përgjigjtshëm të OKB-së Kofi Anan.

 

Solana ka thënë se në mesin e temave kryesore të bisedave të tij në Uashington dhe në Nju Jork do të jenë Ballkani e posaçërisht Kosova.

 

 

Ministri slloven i mbrojtjes po viziton Kosovën

 

Prishtinë, 19 prill 2004 - Ministri slloven i Mbrojtjes, Anton Grizold, po qëndron sot në Prishtinë, ku u takua me komandantin e KFOR-it, gjeneralin Holger Kamerhof.

Ministri slloven kishte ardhur në Prishtinë për t'u njoftuar me punën dhe kontributin e trupave sllovene në ruajtjen e paqes në Kosovë.

Në komentet e tij në lidhje me qëndrimin e Sllovenisë për statusin e Kosovës, ministri slloven tha se kjo duhet të diskutohet në OKB dhe në BE, sepse, tha ai, Kosova është në Evropë.

Për situatën e sigurisë në Kosovë, ai u shpreh se ajo duhet të përmirësohet në mënyrë që proceset të ecin përpara."Ne kemi rënë dakord që situata e sigurisë në Kosovë duhet të përmirësohet sepse Kosova është në Evropë dhe kjo është e rendësishme për sigurinë evropiane që ne të jemi të suksesshëm këtu", tha ministri slloven.

 

 

Rexhepi: Kosova mund të ndërmarrë një lëvizje të njëanshme për shpalljen e një referendumi për pavarësinë

 

Londër, 19 prill 2004 - Kryeministri i Kosovës Bajram Rexhepi në një intervistë për gazetën "Fajnenshëll tajms ("Financial Times") ka thënë se "nëse Kombet e Bashkuara nuk do të arrijnë të bëjnë ndonjë përparim substancial për të ardhmen e Kosovës deri në shtator të vitit 2005, atëherë Kosova do të ndërmarrë një lëvizje të njëanshme për shpalljen e një referendumi për pavarësinë e Kosovës".

 

Kryeministri Rexepi ka thënë se fillimisht do të ishte e mundshme një pavarësi e mbikëqyrur, transmeton "Evropa e lirë". "Ne jemi për një bartje graduale, por Misioni i Kombeve të Bashkuara po shfaq shenja të mungesës së vullnetit", ka thënë Rexhepi, duke kritikuar disa zyrtarë të OKB-së se duan që kjo gjendje të vazhdojë edhe pesë apo dhjetë vjet.

 

 

Reagim i Degës I të LDK-së ndaj letrave kërcënuese drejtuar kryetarit të KK të Prishtinës, Ismet Beqiri

 

Prishtinë, 19 prill 2004 - Kryesia e Degës së parë të Lidhjes Demokratike të Kosovës në lagjen "Kodra e trimave" në Prishtinë, reagon ashpër ndaj dy letrave kërcënuese të cilat më 2 e 14 prill të këtij viti janë drejtuar në adresë të kryetarit të kësaj dege dhe njëherit kryetar i Kuvendit Komunal të Prishtinës, Ismet Beqiri.

Në këtë reagim thuhet se letrat kërcënuese që vijnë në adresë të Ismet Beqirit, kryetar aktual i KK të Prishtinës dhe kryetar i Degës së parë të LDK-së, i bëjnë ata që sot nuk ia duan të mirën Kosovës. "Ata duhet ta dijnë shumë mirë se populli e di shumë mirë kush janë ata dhe kush janë udhëheqësit e tyre".

"Kryesia e Degës së parë të LDK-së, Forumi i Gruas dhe Forumi Rinor i kësaj Dege, reagojnë ndaj këtyre letrave kërcënuese që vijnë nga e ashtuquajtura Armata Kombëtare Shqiptare (AKSH), sepse janë të paqëndryeshme deklaratat e AKSH-së për djemtë, përkatësisht udhëheqsit e devotshmëm të popullit", thuhet më tutje në këtë reagim dhe theksohet se "Ismet Beqiri gëzon autoritetin e plotë në Kryesi dhe në popull, si dhe gëzon besimin dhe përkrahjen, prandaj i tërë populli është me udhëheqësin e tyre që vet e zgjodhi".

"Brenda dy javësh, kanë arritur dy letra kërcënuese në adresë të z. Ismet Beqiri nga AKSH, por edhe para një viti ka ardhur një letër e këtillë. AKSH ka demantuar se letra kërcënuese nuk është lëshuar nga AKSH-ja në atë kohë, Atëherë, sot cila është e vërteta?", thuhet në fund të reagimit të Kryesisë së Degës së Parë të LDK-së "Kodra e trimave" në Prishtinë.

Më poshtë në këtë reagim përkujtohet se kjo degë ka zhvilluar një aktivitet të denjë politik që nga themelimi i saj e deri tash në krye me udhëheqësit e saj.

"Objektivi i Degës së parë të LDK-së ishte i qartë që nga fillimi që të punojë dhe të angazhohet për lirinë dhe pavarësinë e Kosovës. Dihet që fillimisht LDK ishte lëvizje gjithëpopullore në Kosovë, ndërsa aktiviteti i saj u shtri në çdo shtëpi, shkolla dhe institucione. Ky organizim kombëtar është padyshim rezultat i udhëheqësve të LDK-së së kësaj Dege dhe aktivistëve të tjerë të saj që me guxim e trimëri e organizuan aktivitetin politik, arsimor, shëndetësor e humanitar përballë pushtuesit serbo-jugosllav.

 

Veprimtaria e tyre ishte legale, me adresë të qartë për okupatorin, mirëpo këta udhëheqës të devotshëm, të guximshëm, të menqur dhe me objektiv të qartë e dhanë maksimumin e tyre për kauzën kombëtare dhe për realizimin e aspiratave shekullore për liri e pavarësi të Kosovës.

 

Në atë kohë nuk kishte zëra kërcënues ndaj udhëheqësve dhe për këtë populli e di shumë mirë. Sot, kërcënohen po ata udhëheqës, të cilët me guxim e menquri e udhëhoqën popullin gjatë atyre viteve të okupimit klasik, prandaj populli me krenari i zgjodhi në vendet udhëheqse, pasi gëzojnë respekt", thuhet në reagimine Degë së parë të LDK-së në "Kodrën e trimave" në Prishtinë.

 

 

Në Makoc të Prishtinës u përkujtuan viktimat e terrorit serb

 

Prishtinë, 19 prill 2004 - Me rastin e 5-vjetorit të vrasjes mizore të 161 civilëve të Llapit dhe të pjesës veriore të Gollakut, sot në fshatin Makovc të Prishtinës, anëtarët e familjeve të martirëve, përfaqësues të institucioneve bënë homazhe dhe vunë kurora në Kompleksin memorial.

Pesë vjet më parë, më 19 prill të vitit 1999, në Makoc ishin mbledhur mijëra civilë nga Prishtina, nga Llapi dhe nga pjesa veriore e Gollakut, duke ikur nga forcat serbe. Gjatë atij mëngjesi të 19 prillit u vranë dhe u masakruan 161 civilë, prej tyre 91 martirë u rivarrosën në Komleksin memorial në Makoc.

Poashtu sot familjarët dhe qytëtarë të shumtë bënë homazhe edhe martirëve të fshatit Mramor të Prishtinës.

 

 

Mekshejn sot po viziton Zagrebin, nesër vjen në Prishtinë

 

Prishtinë/Zagreb, 19 prill 2004 - Ministri britanik për Evropën Denis Mekshejn nesër viziton Kosovën, transmetojnë sot mediat e Prishtinës. Ministri Mekshejn pritet të zhvillojë takime me udhëheqësit e institucioneve të Kosovës dhe të UNMIK-ut.

Ndërkohë, ministri britanik sot ndodhet për një vizitë njëditëshe në Zagreb, i cili po diskuton me udhëheqësit e lartë kroatë për përgatitjet e Kraocisë për anëtarësim në Bashkimin Evropian dhe për marrëdhëniet bilaterale.

 

 

Ende mbetet në fuqi ndalimi i tubimeve masive dhe sportive në Prishtnë dhe qendrat e mëdha

 

Prishtinë, 19 prill 2004 - Edhe më tutje mbetet në fuqi ndalimi i tubimeve masive, duke përfshirë edhe aktivitetet sportive në Prishtinë dhe në qendrat e tjera të Kosovës, deklaroi zëdhënësi i policisë rajonale, Malkolm Eshbi.

Ndërkaq, aktivitetet sportive mund të mbahen diku jashtë qendrës në praninë e shikuesve, tha zëdhënësi Eshbi për radion "Blu sky" dhe sipas tij, kjo situatë do të zgjasë deri në fillim të muajit maj, por nuk është i sigurt nëse kjo amsë do të shfiqizohet.

Kjo masë nga KFOR-i dhe policia UNMIK-ut është marrë pas trazirave të 17 e 18 marsit dhe siç thuhet, ka për qëllim parandalimin e ndonjë akti të padëshirueshëm në kryeqytet dhe në qendrat e tjera të mëdha.

 

 

Kosova nuk është multietnike, sepse ajo ka një shumicë të qartë shqiptare, thotë një ekspert gjerman

 

Berlin, 19 prill 2004 - Eksperti gjerman i Ballkanit Jens Rojter duke shfaqur qëndrimin e tij në lidhje me trazirat e fundit në Kosovë, ka thënë se përkrah dëmeve materiale janë shkaktuar edhe dëme politike. "Koncepti i përfaqësuar nga bashkësia ndërkombëtare për një Kosovë multietnike pas ngjarjeve të ndodhura, vështirë se do të jetë i realizueshëm.

 

Mund të thuhet gjithashtu se nocioni multietnik për Kosovën është mjaft i gabueshëm, sepse Kosova nuk është multietnike ashtu si Bosnja apo rajonet tjera, sepse në Kosovë ka një shumicë të qartë shqiptare dhe në Kosovë ka një minoritet të vogël joshqiptar me minoritetin serb në krye", tha Rojter për radion gjermane "Dojçe vele".

Sipas tij, Kosova nuk është ashtu si janë angazhuar BE dhe SHBA-të, të cilat në Kosovë kanë provuar të realizojnë një bashkëjetesë harmonike. "Kjo nuk ka ndodhur, kjo nuk do të ndodhë në të ardhmen dhe ngjarjet e fundit dëshmuan se kjo është një iluzion", tha ai.

Ndërkaq duke shfaqur qëndrimin e tij rreth pikëpamjeve serbe për zgjidhjen e problemit të Kosovës, ky analist gjerman thotë se Koshtunica nuk dëshiron vetëm kantonizimin e Kosovës, por kantonizimin e Kosovës nën sundimin serb dhe kjo do të thotë që Kosova e kantonizuar e ndarë në kantone të bjerë sërish nën sundimin e Beogradit dhe kjo është ajo pika që është tejet larg nga realiteti. Njeriu nuk mundet që 90 për qind të popullsisë së Kosovës t'i detyrojë të pranojnë një zgjidhje që kundërshtojnë me thellësinë e shpirtit, tha analisti Rojter.

 

 

Në Prishtinë arritën mbrëmë përfaqësuesit e Grupit të Kontaktit

 

Prishtinë, 19 prill 2004 - Në Prishtinë mbrëmë kanë arritur përfaqësuesit e vendeve të Grupit të Kontaktit për t'u njohur me zhvillimet më të reja në Kosovë pas trazirave të marsit. Vizita e tyre ka të bëjë me përpjekjet e inicuara nga Qeveria amerikane për formimin e një grupi përkrahës për Kosovën, qëllimi i të cilit është të ndihmojë procesin politik dhe ekonomik.

 

Takimi i këtij grupi do të mbahet të martën dhe ai do të organizohet në mjediset e Zyrës amerikane në Prishtinë. Ky grup pritet të përbëhet nga përfaqësuesit e Grupit të Kontaktit, BE-së, UNMIK-ut dhe të institucioneve të Kosovës.

 

 

Shtefan Feler konfirmoi se në burgun e Mitrovicës janë vrarë dy policë amerikanë, një joradanez, 11 të tjerë janë plagosur

 

Prishtinë, 19 prill 2004 - Komesioneri i policisë së UNMIK-ut, Shtefan Feler, ka konfirmuar se në incidentin e të shtunës në burgun e Mitrovicës janë vrarë 3 policë ndërkombëtarë: dy amerikane dhe një joradanez, ndërkaq 11 të tjerë janë plagosur. Ndërjohë njoftohet se gjendja shëndetësore e dy prej të plagosurve është shumë e rëndë, veçanërisht e një oficere amerikane e cila tashmë është transferuar në Maqedoninë fqinje për trajtim të mëtutjeshëm.

Komesioneri Feler këtë vrasje e cilësoi si incident të tmerrshëm, duke shpjeguar se derisa tri automjete ku ndodheshin këta oficerë, po dilnin nga ndërtesa, të paktën një oficer nga grupi prej pesë policëve të njësisë së veçantë jordaneze, qëlloi me armë zjarri mbi autokolonë.

 

Me këtë rast oficerët nga autokolona i janë përgjigjur zjarrit. Kështu gjatë shkëmbimit të këtij zjarri u vranë tre policë dhe 11 të tjerë u polagosën. Në mesin e të vrarëve janë dy policë femra amerikane dhe një polic jordanez. Ndërkaq një polic austriak dhe dhjetë nga SHBA-të, në mesin e të cilëve pesë janë femra, kanë pësuar plagë të rënda dhe ndodhen për spital për kurim. Ende nuk dihen arsyet e këtij incidenti, tha Feler.

 

Ai bëri të ditur se janë arrestuar katër policë jordanezë dhe se hetimet rreth këtij rasti po vazhdojnë. Feler thotë se është bërë kërkesë në OKB për heqjen e imunitetit të këtyre policëve në mënyrë që ata të mund të merren në pyetje.

 

 

Incidenti tragjik nuk ka të bëjë me zënkën rreth Irakut, thotë zëdhënësja e policisë në Mitrovicë

 

Prishtinë, 19 prill 2004 - Sipas disa spekulimeve një zënkë për Irakun mund të ketë shkaktuar këtë incident tragjikë. Mirëpo, zëdhënësja e policisë së UNMIK-ut në Mitrovicë Trejsi Beker ka thënë se këto pohime nuk janë të vërteta. Ajo tha se sipas një hetimi paraprak nuk duket që vendësit të kishin gisht në incidentin e shtunës në Mitrovicë.

 

 

Qeveria jordaneze ka shprehur keqardhje për vrasjen e dy policëve amerikanë në Kosovë

 

Aman, 19 prill 2004 - Qeveria jordaneze ka shprehur keqardhje për vrasjen e dy policëve amerikanë në Kosovë, të cilët pardje pas një fjalosjeje rreth krizës në Irak i vrau polici jordanez. Burime qeveritare jordaneze njoftuan gjithashtu se qeveria e këtij vendi do t'i ndjekë hetimet në mënyrë që të vërtetohet se si ka ndodhur incidenti.

 

 

Në Londër ka filluar takimi vjetor i Bankës Evropiane për Rindërtim dhe Zhvillim

 

Londër, 19 prill 2004 - Në Londër ka filluar takimi vjetor i Bordit të Guvernatorëve të Bankës Evropiane për Rindërtim dhe Zhvillim ku po bisedohet për mundësitë e përfshirjes së regjioneve në trende të reja dhe në mundësitë e investimeve të bizneseve në Evropën Qendrore dhe në Azinë Qendrore.

Në këtë takim po merr pjesë edhe ministri i Ekonomisë dhe Financave të Kosovës Ali Sadriu.

 

 

Banka Evropiane është e përfshirë në disa projekte në Shqipëri dhe në Kosovë

 

Londër, 19 prill 2004 - Presidenti i Bankës Evropiane për Rindërtim dhe Zhvillim, Zhan Limier i ka deklaruar BBC-së se Banka Evropiane është e përfshirë në disa projekte në Shqipëri dhe në Kosovë. Sipas tij, këto projekte po zbatohen mirë.

Z. Lymier tha se Banka Evropiane është e gatshme që të ndihmojë në krijimin e një mjedisi në Kosovë, ku do të mund të investohet.

I pyetur se sa është kjo bankë e përfshirë në rindërtimin dhe zhvillimin e Kosovës dhe a ka ndikuar dhuna e fundit në projektet e saj, z. Lymier u përgjigj:

"Ne gjithnjë kemi pasur një përfshirje të madhe. Kemi krijuar në Kosovë bankë dhe i japim kredi sektorit privat për aktivitete të ndryshme me qëllim që t'u ndihmojmë njërëzve që të krijojnë bizneset e tyre.

 

Por natyrisht situata dhe tensionet në Kosovë janë serioze. Ne jemi në ndihmë të UNMIK-ut dhe autoriteteve të tjera që të shohim se çfarë mund të bëjmë ne dhe këtë ua kemi bërë të qartë atyre. Ne jemi të gatshëm të veprojmë dhe të krijojmë një mjedis ku investuesit mund të investojnë", tha mes tjerash Lymier.

 

 

Në Kosovë do të qëndrojnë edhe më tej dy mijë trupa shtesë të KFOR-it që erdhën pas trazirave të marsit

 

Prishtinë, 19 prill 2004 - Në Kosovë do të vazhdojnë të qëndrojnë dy trupa shtesë të KFOR-it që erdhën pas trazirave të marsit. Po kështu u mor vendimi që të mos shuhet as Brigada Shumëkombëshe e Qendrës, ka thënë zëdhënësi i kësaj Brigade.

 

Kjo brigadë ishte paraparë që pas 1 majit të shuhet dhe atë ta zëvendësonte një forcë shumëkombëshe, e cila do të udhëhiqej nga Shtabi Qendror i KFOR-it. Por zëdhënësi i kësaj Brigade thotë se tash është e pamundur të ndodhë ky tranzicion, duke marrë parasysh aktivitetet kriminale që ndodhën më 17 dhe 18 mars, andaj do të mbetet struktura e njejtë.

"Trazirat e marsit kanë ndryshuar edhe planet e tjera të KFOR-it", thotë shefi për informim i KFOR-it Holst Piper. Ai shtoi se para trazirave qe paraparë që numri prej 17 mijë ushtarëve të reduktohej dukshëm. Mirëpo në Kosovë tani gjenden rreth 20.000 ushtarë dhe numri i tyre vazhdon të rritet.

 

 

Në një aksident komunikacioni ka vdekur Enver Thaçi, pjesëtar i sigurimit të kryetarit të AAK-së

 

Klinë, 19 prill 2004 - Parmbrëmë në afërsi të fshatit Norë të Klinës në një aksident komunikacioni ka mbetur i vdekur Enver Thaçi 27-vjeç, pjesëtar i sigurimit të kryetarit të AAK Ramush Haradinaj. Në këtë fatkeqësi lëndime të rënda ka marrë edhe Osman Morina, pjesëtar i SHPK-së.

 

 

Në Gjakovë u bë varrimi i 15 martirëve nga viti 1999

 

Gjakovë, 19 prill 2004 - Në Gjakovë dje u bë varrimi i 15 martirëve të identifikuar në morgun e Rahovecit, të cilët ishin sjellë ditë më parë nga varrezat masive të Serbisë. Në ceremoninë mortore që u mbajt në Çabrat, morën pjesë mijëra qytetarë nga vise të ndryshme të Kosovës, drejtues të pushtetit komunalë, si dhe përfaqësues të forcave politike.

 

Të gjithë ata ishin ekzekutuar nga forcat serbe në vitin 1999 dhe trupat e tyre ishin varrosur në një varrezë masive në Serbi.

 

 

Në Prishtinë u mbajt një seminar për metoda të reja të menaxhimit dhe formave të biznesit

 

Prishtinë, 19 prill 2004 - Në Prishtinë u mbajt një seminar për metoda të reja të menaxhimit dhe formave të biznesit. Në këtë seminar përfshihen tri pjesë trajnime dhe vizita afariste të pjesëmarrësve në Austri e cila është pjesë e programit të përgjithshëm për krijimin e lidhshmërisë ndërmjet bizneseve ose ndërmarrjeve kosovare dhe atyre austriake.

 

Nga ky seminar do të marrin njohuri lidhur me metodat bashkëkohore të menaxhimit dhe implementimin e tyre në zhvillimin e bizneseve dhe do të kenë kontakte direkte me kolegët e tyre austriak.

 

 

Në teatrin "Dodona" rifillon skena teatrore studentore

 

Prishtinë, 19 prill 2004 - Sot, në orën 19:30, në teatrin "Dodona", jepet shfaqja "Mundimet e kota të dashurisë". Kjo komedi e Shekspirit është inskenuar nga studenti i regjisë Ben Apolloni dhe në të luajnë studentët e aktrimit: Eshref Durmishi, Labinot Lajçi, Edmond Mehana, Hazir. Sh. Haziri, Alban Makolli dhe Alban Çela.

Me këtë shfaqje rifillon punën skena teatrore studentore e Fakultetit të Arteve, në kuadër të të cilës, çdo të hënë, në teatrin "Dodona", do të shfaqen projektet më të suksesshme të studentëve të regjisë teatrore. Hyrja në shfaqjet e skenës teatrore studentore është 1 euro.

 

 

Gjykata e OKB-së për krime lufte ka konfirmuar se masakra e Srebernicës më 1995 ka qenë gjenocid

 

Hagë, 19 prill 2004 - Gjykata e Kombeve të Bashkuar për krime lufte, duke shqyrtuar ankesën e një gjenerali të dënuar serb të Bosnjës, ka konfirmuar se masakra e Srebernicës më 1995 ka qenë gjenocid, njofton BBCnews.

 

Gjenerali serb i Bosnjës, Radislav Kërstiq, është dënuar me 46 vjet burg më 2001 për rolin e tij në masakrën e Srebernicës, ku kanë qenë vrarë e masakruar mbi 7 mijë burra dhe fqëmijë muslimanë të Bosnjës.

 

 

Në qytetin e Fierit zbulohen 68 kg drogë dhe një depo armësh

 

Tiranë, 19 prill 2004 - Policia shqiptare ka bërë të ditur se gjatë kësaj fundjave ka gjetur 68 kg heroinë dhe një depo të armëve në dy shtëpi të braktizura në qytetin e Fierit.

Njësitët speciale të policisë kanë gjetur një mortajë kundërtankiste me 11 granata, tri revole, tri pushkë automatike, municion, pasaporta të falsifikuara dhe dokumente të tjera, drogë dhe pajisje për përpunimin e drogës, citohet të ketë deklaruar përfaqësuesi i policisë, Florian Serjani.

 

 

Pas trazirave në Kosovë civilët serbë kanë keqtrajtuar edhe pacientët shqiptarë të Luginës së Preshevës

 

Preshevë, 19 prill 2004 - Pas trazirave të rënda të 17 dhe 18 marsit në Kosovë ka pasur një gjendje të tensionuar në Luginë të Preshevës. Si pasojë janë keqtrajtuar disa qytetarëve shqiptarë nga civilët serbë, ka deklaruar Shaip Kamberi, kryetar i KMDNJ-së Luginë të Preshevës.

 

Ai ka shtuar se rastet më drastike janë ato që kanë ndodhur në Qendërn spitalore të Vranjës kur nga grupet militante civile serbe janë keqtrajtuar pacientët shqiptarë, të cilët kanë kërkuar ndihmë mjekësore në Spitalin e Vranjës.

 

 

Izraeli do të investojë dhjetëra miliona dollarë në kibucet në Bregun Perendimor

 

Jerusalem, 19 prill 2004 - Izraeli do të investojë dhjetëra miliona dollarë në kibucet në Bregun Perendimor edhe nëse ato largohen nga Rripi i Gazës dhe nëse disa sosh mbeten atje, ka thënë sot hënë) ministri izraelit i Financave, Benjamin Netanjahu, njofton Rojter.

 

Kryeministri izraelit, Ariel Sharon ka propozuar zhvendosjen e të gjjitha klibuceve në Gaza si dhe katër sosh në bregun Perendimor dhe përfundimin e murit mbrojtës ndarës në Bregun Perendimor.

 

Netanjahu ka shpallur të dielën mbështetjen e planit të Sharonit, kurse sot i ka thënë gjithashtu Radios izraelite se ka vendosur të mbështesë këtë plan pasi presidenti Bush ka thënë se Izraeli nuk duhet të absorbojë refugjatët palestinezë ose të evakuojë shumicën e popullatës izraelite nga qendrat në Bregun Perendimor në rast të çfarëdo marrëveshjeje.

 

 

Bremer thotë se forcat irakiane nuk munden vetë të mbrojnë vendin

 

Bagdad, 19 prill 2004 - Kryeadministratori amerikan në Irak, Pol Bremer ka thënë se forcat irakiane të sigurisë nuk munden që vetë të mbrojnë vendin pas datës së caktuar për kalimin e pushtetit nga forcat aleate te irakianët.

Bremer tha se sulmet e fundit nga kryengritësit treguan se Iraku kishte nevojë për ndihmë për t'u marrë me sigurinë në vend.

Më herët këtë muaj, një batalion irakian refuzoi të luftojë kundër milicëve në qytetin e Faluxhas.

 

 

Është vrarë një arab izraelit dhe një kolon hebrait

 

Jerusalem, 19 prill 2004 - Policia izraelite ka vrarë një arab izraelit në një shkëmbim zjarri dhe një raketë e tipit Kasam, e shkrepur nga Gaza ka vrarë një kolon hebrait, duke ngritur kështu tensionet sot (e hënë) pas vrasjes nga izraelitët të liderit të lartë të Hamasit, Abdel-Aziz al-Rantisi, njofton Rojter.

Në incidentin e parë, policia izraelite ka qëlluar në automjetin e militantëve palestinezë dhe kështu ka vrarë një, kurse ka plagosur një tjetër militant.

 

Ndërkaq, në incidentin e dytë, thuhet se militantët palestinezë kanë shkrepur katër raketa të tipit Kasem dhe kështu kanë plagosur edhe katër kolonë ebrait në vendbanimin ebrait Nisanit. Tri raketat e tjera kanë goditur brenda izraelit, por s'ka pasur viktima dhe as dëme materiale.

 

 

Në një mision amerikano-rus, është nisur një anije kozmike me tre astronautë

 

Bajkonur, Kazakistan, 19 prill 2004 - Në një mision amerikano-rus, nga kozmodromi i Stacionit Ndërkombëtar të Gjithësisë në Bajkonur është nisur sot (e hënë) një anije kozmike me tre astronautë për në orbit, ku do të qendrojë në një një mision gjashtëmujor, njofton Rojter.

 

Në mision do të jenë një amerikan, një rus dhe një holandez. Fluturakja pritet të aterojë të merkurën në stacionin orbitror, të ndërtuar prej 16 vendeve. "Anija kozmike tashmë ka hyrë në orbitë. Gjithçka është mirë dhe po zhvillohet sipas planit", ka thënë zëdhënësi i misionit pas 600 sekondave më kritikë të këtij misioni.

 

 

Rais thotë se Amerika nuk do të negociojë me autorët e rrëmbimeve

 

Uashington, 19 prill 2004 - Këshilltarja e presidentit Bush për Sigurimin Kombëtar thotë se Shtetet e Bashkuara nuk do të negociojnë me personat që kanë marrë peng shtetas amerikanë në Irak.

Kondoliza Rais thotë se administrata e presidentit Bush do të bëjë ç'është e mundur për të lirimin e pengjeve. Por ajo e bëri të qartë se nuk do të ketë negociata me autorët e rrëmbimeve:

"Presidenti i Shteteve të Bashkuara nuk negocion me terroristët", tha zonja Rais.

 

 

Në Irak u vranë 10 ushtarë amerikanë

 

Bagdad, 19 prill 2004 - Dhjetë ushtarë amerikanë dhe një numër i madh kryengritësish irakianë janë vrarë në luftime në gjithë Irakun, përfshirë 5 marinsa amerikanë në një betejë pranë kufirit me Sirinë që zgjati thuajse gjithë ditës së djeshme.

Zyrtarë ushtarakë amerikanë konfirmuan vrasjen e marinsave pranë qytetit Husejbah dhe thanë se deri në 30 kryengritës mbetën të vrarë në betejën 14 orëshe që u nxit nga sulmi kundër një partulle të marinsave amerikanë.

Në shënjestër të sulmeve të kryengritësve ishin edhe përforcime amerikane të mbështetura nga helikopterë. Një stacion televiziv arab njoftoi se marinsat ishin sot në kontroll të të gjitha hyrjeve në qytet.

 

 

Drama e fëmijëve ushtarë

 

Nju Jork, 19 prill 2004 - Kombet e Bashkuara thonë se rreth 300 mijë fëmijë shërbejnë në forca kryengritëse dhe ushtri qeveritare në mbarë botën. Shumica nuk merr pjesë vullnetarisht në këto forca.

Ata rrëmbehen nga fshatrat e tyre për të shërbyer si ushtarë, luftëtarë guerilas ose në role mbështetëse në konflikte të armatosura në më shumë se 50 vende. Studiuesit belgë thonë se nëse një i ri mbijeton një përvojë të tillë të vështirë, ai mbetet me plagë të rënda psikologjike.

Organizata Human Rights Watch thotë se mosha mesatare e fëmijëve ushtarë është 13 deri në17, por disa prej tyre mund të jenë edhe 8 apo 9. Ata përdorin armët në betejë, shërbejnë si detektorë të minave, marrin pjesë në misione vetëvrasëse dhe veprojnë si spiunë apo zbulues.

 

 

Kryeministri spanjoll urdhëron largimin e trupave

 

Madrid, 19 prill 2004 - Kryeministri i ri spanjoll, Hoze Luis Rodrigez Sapatero ka dhënë urdhër që trupat spanjolle në Irak të kthehen "sa më shpejt që të jetë e mundur".

Në një fjalim në televizion, ai tha se nuk mund të injoronte vullnetin e popullit të tij.

Ministri i jashtëm spanjoll i tha gjitashtu homologut të tij egjyptian se trupat do të largoheshin brenda "15 ditësh", thuhej në një deklaratë të ministrisë së jashtme egjyptiane.

Spanja ka afro 1300 trupa të stacionuara në zonat jugore të Irakut.

 

 

Pentagoni paralajmëron Sirinë

 

Uashington, 19 prill 2004 - Pentagoni ka paralajmëruar Sirinë për rreziqet me të cilat do të përballet nëse luftëtarët e huaj vazhdojnë të përdorin territorin e saj për të hyrë në Irak.

Parajmërimi vjen pas luftimesh të ashpra në kufirin e Irakut me Sirinë në fundjavë.

Paralajmërimi i fundit ndaj Sirisë nga administrata e Bushit erdhi nga oficeri më i lartë ushtarak i Amerikës, kryetari i shefave të shtabit, gjenerali Riçard Majer.

Ai tha se Amerika e dinte se shtegu për në Irak, për shumë luftëtarë të huaj, ishte nëpërmjet Sirisë. "Është fakt", tha gjenerali Majer. "Ne e dimë, sirianët e dinë. Sirianët duhet ta marrin situatën seriozisht".

 

 

Policia britanike ka arrestuar 10 persona të dyshimtë për akte terroriste

 

Londër, 19 prill 2004 - Policia britanike ka arrestuar sot 10 persona të dyshimtë për terrorizëm gjatë një opercioni policor të sotëm (e hënë) në qytetin verior britanik, Mançester, njofton Rojter.

 

Ata dyshohen për planifikim, organizim dhe kryerje të akteve terroriste. Informacione më të hollësishme nuk janë dhënë njëherë për njëherë.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |