Kosovë: Ende të paqarta motivet e incidentit në Mitrovicë

Kosovë: Ende të paqarta motivet e incidentit në Mitrovicë

18 prill 2004 / TN

« Zëri i Amerikës », më 18 prill 2004 / Besim Abazi

Dy nga 11 policët e plagosur në incidentin e djeshëm në Mitrovicë, njoftohet se janë në gjendje të rëndë shëndetësore, ndërsa policia ende nuk di cilat ishin shkaqet që çuan në këtë incident, që shkaktoi vdekjen e tre policëve.

Një oficere amerikane në gjendje më të rëndë shëndetësore është transferuar në Maqedoni për trajtim të mëtejshëm, ndësa të tjerët janë transferuar në spitalin ushtarak në kampin e forcave paqëruajtëse amerikane në Bondsteel në Kosovën Lindore.

Komisioneri i policisë së Kombeve të Bashkuara, Stefan Feller, tha sot se incidenti i djeshëm, ku u përfshinë oficerët e tij, paraqet një ditë të rëndë për tërë Kombet e Bashkuara.

Ai tha se incidenti ndodhi kur një autokolonë me 21 oficerë amerikan, një austriak dhe dy nga Turqia, po dilnin nga burgu u Mitrovicës, me c’rast një nga pesë pjestarët e njësisë së posacme të policisë jordaneze që ndodheshin në rojë, qëlloi mbi ta me armë zjarri.

Këta të fundit janë kundërpërgjigjur dhe gjatë shkëmbimit të zjarrit që thuhet se ka zgjatur mëse dhjetë minuta, tre veta u vranë dhe 11 u plagosën.

“Nga të vrarët dy janë policë amerikanë dhe një polic i njësisë së posaçme jordaneze. Një austriake dhe dhjetë oficerë amerikanë nga të cilët pesë femra janë plagosur. Oficerët amerikan kanë ardhur në Kosovë dhjetë ditë më parë dhe aktualisht po kryenin strëvitjet e zakonshme, ndërsa polici i vrarë jordanez kishte arritur vetëm nëntë ditë para tyre”, tha komisioneri Feller.

Ai e quajti ngjarjen e së shtunës si “përvojën më të dhimbshme të jetës së tij dhe një tragjedi për të gjithë”. Zoti Feller tha se ende nuk dihet asgjë për motivet e mundshme që çuan në këtë incident.

“Nuk ka informacione për ndonjë diskutim paraprak që mund t’I ketë prirë incidentit. Katër pjestarë të policisë jordaneze që ndodheshin në vendin e ngjarjes tashmë janë në arrest të përkohshëm”, tha zoti Feller. Nga Kombet e Bashkuara është kërkuar që t’u hiqet imuniteti që gëzojnë policët jordanez në mënyrë që të mundësohet intervistimi dhe hetimi i mëtejshëm.

Zoti Feller tha se ngjarja e djeshme nuk do të ndikojë në misionin e Kombeve të Bashkuara dhe as në përkushtimin e pjestarëve të policisë për vendosjen e paqes dhe sundimit të ligjit në Kosovë.

Afro katër mijë pjestarë të policisë së Kombeve të Bashkuara, nga të cilët rreth 450 polic amerikan, shërbejnë aktulisht në Kosovë së bashku me reth 6 mijë pjestarë të Shërbimit Policor të Kosovës. //kk//