Për herë të parë bashkëpunimi me shoqatën Egjiptiane për Studime Historike

18 prill 2004 / TN

Nga Vedat G.SAHITI / Kajro (EGJIPT)

Edhe Kosova, ky vend i lartësuar, që gjithmonë është krenuar me personalitetet dhe figurat e shquara që ka nxjerrë në fushën e mendimit, bashkohet sot me këtë shoqatë nëpërmjet njërit prej bijve të saj, një prej figurave të shquara, fisnikun, studiuesin, mendimtarin Prof. Dr. Beqir Ismaili. Ky personalitet ka luajtur dhe luan një rol të shkëlqyer në shërbim të kauzes shqiptare por, në mënyrë të veçantë, roli i tij është i ndjeshëm në përpjekjet e tij për sensibilizimin dhe përkrahjen që meriton vendi i tij, Kosova.

Ky pionier i botës së mendimit dhe të kulturës është dhe autor i mjaft veprave të shquara letrare, historike, kulturore dhe gjuhësore, duke pasuruar kështu bibliotekën gjuhësore me një sërë studimesh të reja të vlefshme për të gjithë brezat. Pikërisht, për këtë kontribut të çmuar, jo vetëm për vendin e tij por për mbarë botën , si dhe pas një vlerësimi të lartë nga shumë personalitete të botës së shkencës dhe të kulturës “Shoqata Egjiptiane për Studime Historike” e ka zgjedhur Prof. Dr. Ismailin anëtar të saj, duke shpresuar që të përfitojë nga dituria dhe nga studimet e tij, që kanë furnizuar për një kohë të gjatë lëvizjen përparimtare të mendimit, kulturës e historisë, në nivel ndërkombëtar.

Prof. Dr. Beqir Ismaili është personaliteti i parë Kosovar, që nderohet me këtë anëtarësim, duke u bërë kështu edhe kontribuesi i parë nga Kosova që do të japë ndihmesën e tij për të njesuar idetë dhe synimet e Shoqatës, me nevojat historike, studimore dhe kulturore në Kosovë.

Shoqata Egjiptiane për Studime Historike është themeluar në Korrik të vitit 1945, me një Dekret Mbretëror për krijimin e shoqatës së 30^{- të}mbretërore për studime historike. Një rrol të rëndësishëm për daljen në skenë të kësaj Shoqate ka patur Dr. Hasan Hosni Basha, i cili në atë kohë ka qenë Sekretar Personal i Mbretit Faruk.

Një nga qëllimet kryesore që duhej të përmbushte Shoqata ishte ringjallja e studimeve historike si dhe sensibilizimi i i çështjes së historisë në mes rinisë dhe masave.

Pas kryengritjes së Korrikut të vitit 1952 (ku u rrëzua sistemi mbretëror i cili u zëvendësua me atë republikan) emri i kësaj shoqate u bë “Shoqata Egjiptiane për studime historike”

Aktiviteti i kësaj shoqate ka qenë i vazhdueshëm deri në vitin 1999, vit ky kur ajo mori një hov të ri në aktivitetet që filloi të zhvillojë. Kështu përveç simposiumeve, sesoneve kulturore, konferencave vjetore, shoqata ka organizuar tryeza debati dhe seminare për studiuesit e rinj në lidhje me historinë osmane. Përveç këtyre aktiviteteve gjatë pesë viteve te fundit shohim një hov të madh të Shoqatës dhe në fushën e botimit. Kështu përveç revistës së saj të njohur “Revista Egjiptiane e Historisë” janë botuar dhe tre libra me studime të referuara në konferenca apo simpoziume.

1- Reformë apo përtëritje? Egjipti në periudhën e Muhamed Aliut.

2- Takimi i qytetërimeve në këtë botë të ndryshme; bashkëjetesë apo konflikt.

3- Feja dhe shteti në vendet arabe.

Po ashtu janë botuar dhe dy libra me punimet e seminarit të historisë osmane:

1- Esnafët profesionalë dhe shoqërorë në Egjipt në periudhën osmane.

2- Drejtësia në mes Sheriatit dhe aktualitetit në periudhën osmane.

Duke parë zhvillimin e hovshëm të kësaj qendre këto tre vitet e fundit shumë media kanë treguar interes të madh në mbulimin informativ të veprimtarive të saj. Po kështu një numër i madh qendrash të njohura shkencore kanë ofruar bashkëpunimin e tyre për veprimtari të përbashkëta. Nga këto qendra mund të përmendim:

- Qendra kërkimore e arkitekturës – Universiteti i Kairos.

- Qendra e kërkimeve shoqërore – Universiteti i Kairos.

- Qendra e kërkimeve dhe e studimeve arabe dhe afrikane.

- Qendra e studimeve shoqërore, ekonomike dhe ligjore.

E veçanta është se vazhdimisht, në krye të saj, Shoqata ka patur njerëz të përkryer dhe mjaft të aftë, duke filluar nga Prof. Muhamed Tahir Pasha në vitin 1946 e deri tek Prof. Rauf Abas Hamid.

Një nga projektet që synon të realizojë Shoqata në ndihmë të anëtarëve të saj dhe të shtresës intelektuale, është krijimi i një biblioteke elektronike si dhe projekti i skedarit të plotë të bibliotekës. Por qëllimi kryesor i kësaj Shoqate është që, të përcjellë tek brezat mesazhin e saj në shërbim të historisë Islame, të historisë së Egjiptit dhe të asaj arabe. Për të realizuar qëllimin e saj ajo kryen një sërë aktivitetesh kulturore nga të cilat mund të përmendim:

- Organizimi dhe nxitja e studimeve historike, veçanërisht ato që kanë të bëjnë me historinë e Egjiptit dhe të kombit arab.

- Grumbullimi i dokumentave, burimeve dhe kujtimeve historike, veçanërisht ato që kanë të bëjnë me historinë e Egjiptit dhe të kombit arab.

- Krijimi i një skedari të plotë që ka të bëjë me të gjitha studimet historike në përgjithësi.

- Krijimi i tablove me fotografi të Egjiptit në periudha të ndryshme kohore si dhe krijimin e një skedari të plotë me emra e mundësisht dhe me fotografi të personaliteteve të shquar gjatë periudhave të ndryshme historike.

- Botimi i një reviste periodike që të përmbajë studimet e kryera nga kjo Shoqatë, revistë e cila do të shërbejë njëkohësisht edhe si regjistrues i studimeve dhe i kërkimeve historike.

- Dhënia e ndihmës së mundëshme për nxitjen e studimeve historike.

- Organizimi i konferencave dhe i udhëtimeve që i shërbejnë këtyre studimeve.

- Organizimi i cikleve me ligjërata të një niveli të lartë në çështje të ndryshme historike.

- Dhënia e kontributit për shoqërinë dhe zhvillimin e saj, përsa i përket fushave që lidhen me studimet historike.

- Organizimi i kurseve për ngritjen profesionale në fushën e kompjuterave dhe të gjuhëve të huaja.

Kjo është një panoramë e shkurtër e Shoqatës së Studimeve Historike dhe e rolit të saj në shërbim të studimeve historike dhe në ngritjen e nivelit të tyre. Shoqata është një burim i mendimit historik që i vlen umetit në shumë fusha, por njëkohësisht ajo ka një ndikim të shkëlqyer tek personalitetet Historike.