Përmbajtja:

• Nesër në Prishtinë pritet të arrijnë përfaqësuesit e Grupit të Kontaktit

• BE: Qetësia është kthyer në Kosovë, rikthimi i dhunës nuk mund të përjashtohet

• Daci: Institucionet e Kosovës kanë qenë unike në dënimin e dhunës dhe në qetësimin e situatës gjatë marsit

• Server: Gjendja në Kosovë mund të keqësohet, nëse nuk zhduken burimet e dhunës

• Ali Sadriu merr pjesë në takimin vjetor në Londër të Bordit të Bankës Evropiane për Rindërtim dhe Zhvillim

• Dje në Pejë dhe në fshatrat përreth u varrosën shtatë shqiptarë që u vranë në vitin 1999

• Nesër në Zvicër mbahet një akademi përkujtimore në 5-vjetorin e rënies heroike të Agim Ramadanit dhe Sali Çekajt

• Ushtarët amerikanë të bllokojnë autostradën në veri dhe në jug të Bagdadit

• Nga një shpërthim në Kinë kanë humbur jetën 9 vetë

• Një yll filmi indian dhe 4 bahkëudhëtarët e saj kanë humbur jetën në një fatkeqësi ajrore

• Ripozicionim i trupave amerikane në Falluxhah

• Takim i rallë i drejtpërdrejtë amerikano-iranian

• Bush dhe Bler thamnë se plani i Izraelit është mundësi për përparimin e paqes

• Autoritetet spanjolle arrestuan edhe tre të dyshuar lidhur me 11 marsin

• Ushtari amerikan mbahet peng në Irak

Nesër në Prishtinë pritet të arrijnë përfaqësuesit e Grupit të Kontaktit

Prishtinë, 17 prill 2004 - Nesër në Prishtinë duhet të arrijnë përfaqësuesit e Grupit të Kontaktit për t'u njohur me zhvillimet më të reja në Kosovë, pas trazirave të marsit.

Vizita e tyre ka të bëjë me përpjekjet e inicuara nga qeveria amerikane për formimin e një grupi përkrahës për Kosovën, qëllimi i të cilit është të ndihmojë procesin politik dhe ekonomik.

Takimi i këtij grupi pritet të mbahet të martën e ardhshme dhe, siç njofton "Evropa e lirë", ai organizohet në mjediset e Zyrës amerikane në Prishtinë. Ky grup pritet të përbëhet nga përfaqësuesit e Grupit të Kontaktit, BE-ja, UNMIK-u dhe institucionet e Kosovës.

 

BE: Qetësia është kthyer në Kosovë, rikthimi i dhunës nuk mund të përjashtohet

 

Bruksel, 17 prill 2004 - Ministrat e BE-së në takimin e tyre në Irlandë kanë përkrahur një Kosovë shumëkombëshe dhe janë angazhuar për t'i dhënë shtytje të re politikës së standardeve para statusit.

Ministrat diskutuan një dokument katërfaqësh, i cili u shpërnda nga mikpritësi Irlanda, kryesuese e radhës e BE-së, e ku ishin përcaktuar sugjerime konkrete. Dokumenti fillon me pohimin se megjithëse qetësia është kthyer në Kosovë, rikthimi i dhunës nuk mund të përjashtohet dhe se ka një bazë për grupet ekstreme të cilat duan të shfrytëzojnë situatën në Kosovë.

 

Një nga përparësitë që vë në pah dokumenti janë mbrojtja më e mirë e pakicave si dhe përparimi në rindërtimin e shtëpive dhe kishave të shkatërruara. Gjithashtu thuhet se kryerësit e dhunës duhet të sillen para drejtësisë. Përparësi kryesore është shtytja përpara e politikës së standardeve para statusit. Kjo politikë sipas presidencës Irlandeze, duhet t'i kthejë serbët në procesin politik.

 

Sugjerimi është që dialogu i ri rreth shqetësimeve të sigurisë për serbët e Kosovës dhe të drejtat e pakicave, dhe një qeverisje efektive mund ta bindin bashkësinë serbe në Kosovë të riangazhohet. Ka një propozim në dokument që të forcohen shqiptarët e moderuar në institucionet e përkohshme duke forcuar rolin dhe instrumentet në dispozicion të kryemnistrit dhe duke shikuar mundësinë e bartjes së përgjegjësive dhe kjo sipas dokumentit do të ishte pjesë përbërëse e decentralizimit.

 

Gjithashtu në një pjesë të dokumentit kërkohet qëndrim më i ashpër ndaj atyre që përkrahin dhunën dhe mbase edhe ndalesa të udhëtimit në BE- të perosnave përgjegjës për dhunë, siç ishte rasti në Maqedoni. Ka disa fjalë për edhe për siç thuhet "shtypin e papërgjegjshëm". Në dokument kërkohet një dialog ndëretnik dhe krjimi i një mekanizmi efektiv vlerësues për zbatimin e standardeve. Ka propozime konkrete edhe për angazhimin e Beogradit në dialogun konstruktiv.

Ka pasur diskutime edhe për UNMIK-un dhe është thënë se prania e UNMIK-ut nuk korrespondon më me kërkesat dhe se duhet rishikuar struktura e tij. Gjithashtu ka patur edhe diskutime se si të forcohet roli i BE-së në Kosovë. Siç dihet BE-ja nuk e ka një zyrë në Prishtinë, meqë Kosova ende nuk njihet si shtet, por është i pranishëm përmes një shtylle të UNMIK-ut. Ka disa ide që të shtrihet prania e BE-së atje.

 

 

Daci: Institucionet e Kosovës kanë qenë unike në dënimin e dhunës dhe në qetësimin e situatës gjatë marsit

 

Prishtinë, 17 prill 2004 - Presidenti, Parlamenti dhe Qeveria që nga dita e parë e protestave të marsit kanë qenë tok si institucione dhe kanë kërkuar qetësimin e situatës dhe e kanë dënuar dhunën, tha kryeparlamentari Nexhat Daci. "Në të njëjtën mënyrë fare nuk e kemi përkrahur vlerësimin e bashkësisë ndërkombëtare.

 

Fajësimi i të voglit, i të dobëtit, që nuk ka pasur kompetenca, as në drejtësi, as në siguri, më së ulti që mund të thuhet, janë qesharake", thotë zoti Daci për numrin e sotëm të gazetës "Pavarësia".

 

Bashkësia ndërkombëtare shumë shpejt e ka kuptuar dhe janë bërë korrigjime brenda tyre, "por kjo nuk do të thotë se ne duhet ta shfajësojmë vetveten", tha ai.

 

Daci tha se fajson ato institucione që s'kanë qenë të përgjegjshme ndaj qytetarëve, të cilat nuk i kanë ushtruar detyrat dhe nuk kanë paraqitur projekte e programe për të ndihmuar qytetarët në sferën sociale.

 

 

Server: Gjendja në Kosovë mund të keqësohet, nëse nuk zhduken burimet e dhunës

 

Uashington, 17 prill 2004 - Ekspert për çështjet e Ballkanit Daniel Server thotë se për të parandaluar përsëritje të dhunës si ajo e muajit të kaluar në Kosovë, duhen goditur burimet që e ushqyen këtë dhunë. Daniel Server, ekspert i Institutit Amerikan të Paqes tha se strategjia e standardeve para statusit për Kosovën nuk është e mjaftueshme për zgjidhjen e problemeve.

Server tha se ajo që ndodhi më 17 deri më 19 mars ishte shumë e rëndë, por paralajmëroi se ngjarje edhe më të rënda mund të ndodhin nëse nuk zgjidhen problemet që shqetësojnë Kosovën.

"Nëse mendoni se kjo ishte më e keqja që mund të ndodhte në Kosovë, mendoj se gaboheni", tha ai. "Mund të ndodhin ngjarje shumë më të rënda, gjendja mund të ashpërsohet shumë më tepër".

Server theksoi se ajo që duhet bërë tani është goditja e burimeve që ushqejnë dhunën, të cilat sipas tij janë ekstremizmi, dëshprimi dhe izolimi i rinisë dhe vonesat për statusin përfundimtar të Kosovës.

"Nëse nuk zgjidhen këto probleme", tha ai, "në të ardhmen mund të pritet përsëri dhunë që do të shkaktonte një katastrofë, më të keqe edhe nga ajo që ndodhi".

Ai paralajmëroi se nëse ndodh një një e tillë mund të kërcënohej vetë ekzistenca e operacioneve ndërkombëtare atje.

Në një dokument që ia ka shpërndarë anëtarëve të Kongresit, zyrtarëve të administratës dhe organizatave të interesuara për Ballkanin, ai propozon inkurajimin e të moderuarve, si edhe hapa intensive për të kapur shkaktarët e dhunës, riparimin e dëmeve dhe inkurajimin e serbëve të zhvendosur për t'u kthyer në shtëpitë e tyre, krijimin e ministrive të brendshme dhe të drejtësisë në Kosovë, si edhe të një sekretariati për çështje ndërkombëtare.

Server theksoi se ndërsa për shembull Uashingtoni dhe Brukseli janë të përfaqësuar në Prishtinë, Prishtina nuk është e përfaqësuar në këto kryeqytete dhe kjo sjell izolim për Kosovën.

Zoti Server mendon gjithashtu se ka ardhur koha për një rezolutë të re të Këshillit të Sigurimit të OKB-së për Kosovën. Ai tha se megjithëse nuk pret që kjo të ndodhë menjëherë, beson se tashmë është diçka e domosdoshme për të përcaktuar paramentrat për statusin përfundimtar. Zoti Serwer, që ka propozuar që shefi i UNMIK-ut të jetë amerikan, këmbënguli përsëri tek forcimi i pranisë amerikane.

- Kjo është ajo që mungon, - tha zoti. - Çështja e Kosovës nuk mund të zgjidhet nëse nuk dëgjohet fort zëri i Shteteve të Bashkuara.

Ai theksoi se megjithëse Shtetet e Bashkuara janë tani të përqendruara në çështje të tjera të politikës së jashtme dhe mund të mos jenë shumë të vëmendshme ndaj asaj që ndodh në Ballkan, ato nuk mund të injorojnë dy probleme kryesore atje: Të ardhmen e Kosovës, dhe atë të Serbisë.

Server tha se megjithëse për momentin Amerika nuk ka interesa aq të mëdha strategjike në Kosovë, ajo nuk do të humbë atë që ka arritur atje, duke çliruar një popull dhe duke investuar aq shumë me luftën dhe trupat pas luftës.

Sipas tij arsyeja tjetër e domosdoshmërisë së angazhimit amerikan është se Shtetet e Bashkuara nuk do të donin të braktisnin një popullsi kryesisht të besimit mysliman, gjë që mund të bënte të pakënaqur myslimanët në pjesë të tjera të botës.

Server nuk i dha shumë rëndësi çështjes së dialogut mes Prishtinës dhe Beogradit në kuadrin e parandalimit të ngjarjeve të tjera të dhunshme. Ai tha se ky dialog nuk ka ndonjë rol në shmangien e ekstremizmit, madje nëse pjesëmarrësit atje marrin qëndrime të ashpra, mund ta nxisin atë.

Në dokumentin e hartuar nga zoti Serwer, nuk përjashtohet ndarja e Kosovës. Ai tha se një gjë e tillë mund të diskutohet me kushtin që të mos jetë si precendent për diskutime për ndarjen e Bosnjës dhe Maqedonisë, transmeton "Zëri i Amerikës".

 

 

Ali Sadriu merr pjesë në takimin vjetor në Londër të Bordit të Bankës Evropiane për Rindërtim dhe Zhvillim

 

Prishtinë, 17 prill 2004 - Me ftesë të Xhoni Ekerholm, sekretar i përgjithshm i Bankës Evropiane për Rindërtim dhe Zhvillim (BERZ), ministri i Ekonomisë dhe i Financave Ali Sadriu ka udhëtuar për në Londër ku do të marrë pjesë në takimin vjetor të Bordit të Guvernatorëve të kësaj banke.

Forumi do t'i zhvillojë punimet në Londër nga datat 18 dhe 19 prill. Tema e këtij takimi të vitit është gjetja e mundësive të përfshirjës së regjioneve në trendet e reja dhe në mundësitë e investimeve të bizneseve në Evropën Qendrore dhe në Azinë Qendrore.

Në këtë Forum, i cili në fushën bankare paraqet ngjarjen më të madhe në Evropë, marrin pjesë 2000 pjesëmarrës përfshirë këtu përfaqësues të lartë të qeverive të vendeve të ndryshme, afaristë të shquar, njerëz të biznesit të korporatave të njohura në botë si dhe investitorë të fushave të ndryshme dhe përfaqësues të lartë të bankave dhe të institucioneve të njohura financiare ndërkombetare.

 

 

Dje në Pejë dhe në fshatrat përreth u varrosën shtatë shqiptarë që u vranë në vitin 1999

 

Pejë, 16 prill 2004 - Dje në Pejë dhe në fshatrat përreth, pesë vjet pas vrasjes dhe zhdukjes së kufomave, janë varrosur: Blerim Shala, Besnik Isufi, Vehbi Hoxha, Ali islami, Çun Morna e Cenë Brahimi, kufomat e të cilëve janë kthyer ditë më parë në Kosovë nga Serbia. Në palestrën e sportve viktimave u janë bërë homazhe nga familjarët, miqtë, ushëheqësit e pushtetit lokal, partive politike dhe qindra qytetarë të Pejës.

Kryetari i komunës së Pejës, Ali Lajçi, duke u shprehur ngushëllime familjarëve të të ndjerëve, i cilësoi ata si martirë të lirisë. Ndërsa në emër të familjeve të të vrarëve foli Elhame Haradinaj, e cila tha se dhembja është e madhe.

Pas homazheve, arkivolet e Blerim Shalës, Besnik Lokajt, Vehbi Hoxhës dhe Bashkim Lokajt i cili u rivarros pranë vëllait, Besnikut, u varosën në varrezat e qytetit të Pejës, ndërkaq Ali Islami Çun Morina dhe Cenë Brahimi u varrosën në vendlindjet e tyre përkatësisht në Raushiq, Lybeniq dhe Lutogllavë.

 

 

Nesër në Zvicër mbahet një akademi përkujtimore në 5-vjetorin e rënies heroike të Agim Ramadanit dhe Sali Çekajt

 

Gjenevë, 17 prill 2004 - Në 5-vjetorin e rënies heroike në luftën e Koshares të Agim Ramadanit dhe Sali Çekajt, organizuar nga dega e LDK-së në Zvicër, nesër, më 18 prill, mbahet një akademi përkujtimore kushtuar këtyre dy dëshmorëve të njohur të kombit.

Për jetën dhe veprimtarinë patriotike të Agim Ramadanit dhe Sali Çekajt do të flasin Hysen Gërvalla, kryetar i degës së LDK-së në Zvicër dhe Nimon Alimusaj, anëtar i Kryesisë qendrore të LDK-së.

Akademia përkujtimore mbahet në orën 13.00, në qytetin Brugg, në Turnhalle Freudestein, Museumstrasse 20.

 

 

Ushtarët amerikanë të bllokojnë autostradën në veri dhe në jug të Bagdadit

 

Bagdad, 17 prill 2004 – Sulmet guerile kanë nxitur ushtrinë amerikane të bllokojnë sot (e shtunë) autostradën në veri dhe në jug të Bagdadit, fill pasi presidenti Bush dhe kryeministri Bler u zotuan t’i japin fund dhunës në Irak, njofton Rojter. Sikur për t’u tallur me ta, kryengritësit demonstruan ushtarin e zënë amerikan, i cili qe zënë në një sulm në një konvoj javën e kaluar.

Por, armët kanë heshtur në Falluxha, në perendim të Bagdadit, ku goditjet ajrore dhe përleshjet e ashpra kanë qenë të shpeshta dhe e kanë tronditur armëpushimin ndërmjet marinsave amerikanë dhe guerilëve sunitë. “Për herë të parë që prej shumë ditësh, Falluxha është plotësisht e qetë”, ka thënë një banor.

 

 

Nga një shpërthim në Kinë kanë humbur jetën 9 vetë

 

Peking, 17 prill 2004 – Nga rrjedhja e gasit klorik ka shpërthyer një fabrikë kimike në jugperendim të Kinës dhe kështu kanë humbur jetën nëntë vetë, kurse janë detyruar të lënë shtëpitë 150 mijë njerëz, ka bërë të ditur sot (e shtunë) një zyrtar i qeverisë, njofton AP.

 

Shpërthimi ka ndodhur mbrëmë në Fabrikën kimiko-industriale në Tianjuan në qytetin Çongçing. Ai ka thënë se 7 persona është konfirmuar se kanë vdekur, kurse dy të tjerë janë zhdukur. Mbi nëntëmijë njerëz janë mjekuar nga lëndimet.

 

 

Një yll filmi indian dhe 4 bahkëudhëtarët e saj kanë humbur jetën në një fatkeqësi ajrore

 

Nju Delhi, 17 prill 2004 - Një yll filmi indian, që ishte kandiduar për zgjedhjet e ardhshme, ka humbur jetën në një fatkeqësi ajrore, kur aeroplani, me të cilin udhëtonte, u rrëzua sapo ishte nisur nga toka, njofton BBCWorld.

 

Aktresha Soundarya, një yll i industrisë filmike në gjuhën telugu, po shkonte në një fushatë zgjedhore, thuhet në njoftim. Policia ka thënë se edhe katër bahkëudhëtarët e saj në aeroplan kanë humbur jetën. Soundarya, veterane e kinemave të Indisë jugore ishte kandidate e partisë qeveritare Xhanata.

 

 

Ripozicionim i trupave amerikane në Falluxhah

 

Falluxha, Irak, 17 prill 2004 - Ushtria amerikane ka rënë dakord të ripozicionojë trupat në qytetin e trazuar irakian Falluxhah pas bisedimeve të drejtërdrejta me zyrtarë lokalë me qëllim që t'i jepet fund dhunës dy javore në atë qytet.

Përfaqësuesit në bisedime thanë se trupat po lëvizen për t'u bërë të mundur banorëve që të shkojnë në spitalin kryesor të qytetit. Një takim tjetër midis zyrtarëve amerikanë, anëtarëve të Këshillit Qeverisës të Irakut dhe përfqësuesve të Falluxhas është planifikuar për sot.

 

 

Takim i rallë i drejtpërdrejtë amerikano-iranian

 

Teheran, 17 prill 2004 - Një diplomat amerikan zhvilloi një takim të rallë të drejtpërdrejtë me një zyrtar iranian në përpjekje për të ndërmjetësuar në përfundimin e një kryengritjeje të luftëtarëve shiitë, të udhëhequr nga një klerik rebel.

Takimi u zhvillua ndërkohë që udhëheqësit e Shteteve të Bashkuara dhe të Britanisë u zotuan që të mos e lejojnë këtë kryengritje të dëmtojë planet për kalimin e pushtetit politik irakianëve më 30 qershor.

Zëdhënësi i koalicionit, Dan Senor, u tha gazetarëve se qeveria iraniane kërkoi dhe pati një takim me një diplomat amerikan në Bagdad, por qeverisë së Teheranit iu tha që të mos ndërhynte në këtë krizë.

"Ne patëm një mesazh të vendosur për iranianët pa përjashtim për sa i përket rolit të tyre në Irak, që të jenë konstruktivë e jo destruktivë. Nga pikpamja jonë, iranianët nuk kanë ndonjë rol për të luajtur në situatën e krijuar nga kleriku Al-Sadër dhe në fakt ne mendojmë se çështja e klerikut dhe milicisë së tij duhet të zgjidhet nga irakianët", tha zëdhënësi.

 

 

Bush dhe Bler thamnë se plani i Izraelit është mundësi për përparimin e paqes

 

Uashington, 17 prill 2004 - Presidenti amerikan Bush dhe Kryeministri britanik Bler thanë në një konferencë shtypi të përbashkët se po shqyrtojnë planin e Izraelit për t'u tërhequr nga Gaza, i cili njëkohësisht parashikon mbajtjen e disa pjesëve të Bregut Perëndimor, si një mundësi për përparimin e paqes në Lindjen e Mesme.

Presidenti Bush tha se plani i Izraelit është një mundësi shumë e mirë për Lindjen e Mesme. "Ai u jep palestinezëve mundësinë të krijojnë një qeveri të lirë, të reformuar dhe të drejtë. Udhëheqja palestineze duhet të tregojë se është e aftë ta shfrytëzojë këtë sfidë", tha Bush.

Kryeminisitri Bler, tha se plani i tërheqjes i jep komunitetit ndërkombëtar një mundësi të ndihmojë palestinezët të krijojnë institucione të qëndrueshme politike.

 

 

Autoritetet spanjolle arrestuan edhe tre të dyshuar lidhur me 11 marsin

 

Madrid, 17 prill 2004 - Autoritetet spanjolle arrestuan tre të dyshuar të rinj në lidhje me sulmet e 11 marsit në trena në Madrid, në të cilat gjetën vdekjen 191 vetë.

Policia i arrestoi tre personat, një saudit, një egjiptian dhe një maroken, mbrëmë në Madrid. Hetuesit po i marrin ata në pyetje dhe javën e ardhshme ata do të dalin para një gjykatësi.

Sot gjykatësi liroi gjashtë marokenë që ishin arrestuar më parë nën dyshimet për rol në shpërthime. Zyrtarët e gjykatës thane se ata u liruan, pasi rezultoi që nuk kishin lidhje me sulmet.

 

 

Ushtari amerikan mbahet peng në Irak

 

Bagdad, 17 prill 2004 - Rrejti televiziv arab, Al Xhazira, ka transmetuar pamje të një ushtari amerikan - që ishte shpallur i zhdukur në Irak,- i cili mbahej peng nga persona të armatosur.

Ushtari dukej në këto pamje i rrethuar nga persona të armatosur dhe të maskuar, të cilët thoshin se donin ta këmbenin atë me irakianë që mbahen në burg.

Komanda Qendrore e Shteteve të Bashkuara nuk e ka identifkuar ende këtë ushtar, por thotë se emri i dhënë përputhet me emrin e njërit prej dy ushtarëve të zhdukur që prej ditës së premte.

Megjithatë familjarë dhe miq të ushtarit konfirmuan se ai ishte Keith Matthew Maupin dhe thanë se ishin të kënaqur që ai dukej shëndoshë.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |