Përmbajtja:

• Presidenti Rugova në një takim me komandantin e KFOR-it tha se gjendja në Kosovë po përmirësohet

• Kryqi i Kuq Ndërkombëtar boton librin me emrat e të zhdukurve në Kosovë

• Banka Botërore i dhuron Kosovës 15 milionë dollarë

• Rexhepi u bëri thirrje qytetarëve të paguajnë obligimet ndaj KEK-ut

• Ndryshime në QKU: zgjedhet bordi i ri drejtues

• F.Sejdiu: "Iniciativat nga zeroja nuk janë shumë të nevojshme"

• Në trazirat e 17 e 18 marsit u shkaktuan dëme në vlerë prej 11 milionë e 900 mijë euro

• LDK në Dardanë bën evidentimin e anëtarëve të saj

• Nesër mbahet një organizon për metodologjinë e zhvillimit të kornizave për shkollat profesionale

• Kosova do të jetë një nga temat kryesore në takimin e sotëm të ministrave të jashtëm të BE-së

• Zgjedhjet presidenciale në Maqedoni shkojnë drejt balotazhit

• Tornadot në Bangladesh kanë lënë të vdekur të pakten 66 njerëz

• Të paktën 18 veta kanë humbur jetën në dy aksidente trafiku në Turqi

• Shtatë veta janë vrarë në një shpërthim në Meksikë

• Takimi Bush - Bler në Shtëpinë e Bardhë pritet të tregojë frontin unik në Irak

• Në luftimet në Falluxha janë vrarë 15 irakianë dhe janë plagosur edhe 20 të tjerë

• SHBA-të kanë reduktojnë numrin e ushtarwve në Afganistan pasi të mbahen zjedhjet

• SHBA do të zgjasin shërbimin ushtarak për 20 mijë trupa amerikane që ndodhen në Irak

• Audiokaseta e re duket se është regjistruar nga Osama Bin Ladeni

• Irak: Vritet një diplomat iranian

• Bler pro planit të paqes në Lindjen e Mesme

• Shqetësime për sigurinë në Arabinë Saudite

• Në qytetin Kufa janë dëgjuar një sërë shpërthimesh

• Irak: Një danez i zhdukur, një kinez i liruar

Presidenti Rugova në një takim me komandantin e KFOR-it tha se gjendja në Kosovë po përmirësohet

 

Prishtinë, 16 prill 2004 - Presidenti i Kosovës, Ibrahim Rugova, priti sot komandantin e KFOR-it, gjeneralin Holger Kamerhof.   Në këtë takim është biseduar për gjendjen në Kosovë, e cila siç u tha, ka filluar të përmirësohet. Presidenti Rugova tha pas takimit se në këtë takim është biseduar për gjendjen e cila ka filluar të përmirësohet dhe që dhuna të dënohet. "Me dhunë ne nuk mund të arrijmë qëllimet tona dhe zhvillimin tonë", u shpreh Presidenti Rugova.

 

Në vazhdim ai tha se është biseduar për një bashkëpunim edhe më të ngushtë me KFOR-in, dhe vlerësoi se KFOR-i ka bërë një punë të shkëlqyeshme dhe po vazhdon ta bëjë edhe më tutje, duke falenderuar trupat paqeruajtëse që ndihmuan gjatë ngjarjeve të marsit të qetësohet gjendja në Kosovë dhe të cilat po kujdesen vazhdimisht për mbrojtjen dhe sigurinë e Kosovës.

"Biseduam edhe për vazhdimin e procesit të rindërtimit të asaj që është dëmtuar gjatë marsit dhe të shikojmë mundësinë e pajtimit ndëretnik, të komunikimit ndëretnik, por që të gjitha palët duhet të tregojnë vullnet (si shumica ashtu edhe pakica) që të vazhdojnë këtë proces në Kosovë", tha Presidenti Rugova, duke shtuar që së bashku me UNMIK-un do të bëhen përpjekje që të vazhdojë ky proces.

 

Zoti Rugova ritheksoi edhe me këtë rast aspiratën e popullit të Kosovës për t'u integruar në NATO, në BE e në miqësi të përhershme në SHBA-të. "Një vend i pavarur, por për këtë ne duhet të punojmë dhe, siç po thonë miqtë tanë, pavarësia nuk mund të arrihet me dhunë, por ne të gjithë duhet të punojmë kundër dhunës dhe të hapim rrugën dhe perspektivën për integrime evropiane të Kosovës", nënvizoi Presidenti Rugova.

Gjenerali Holger Kamerhof tha se me Presidentin Rugova kishin shkëmbyer pikëpamjet e përbashkëta. "KFOR-i kujdeset për sigurinë në Kosovë dhe vlerësuam ato që ndodhën gjatë marsit. Biseduam për rikononsolidimin dhe rindërtimin e asaj që ishte shkatërruar gjatë këtyre ngjarjeve. Është vlerësim se dhuna e fundit ka shkaktuar dëme të mëdha", u shpreh Kamerhof, duke shtuar se ngjarjet e tilla kthejnë prapa.

 

"Ne duhet të ecim përpara dhe të gjejmë rrugët se si t'i plotësojmë standardet", tha ai dhe vërejti se privatizimi po ecën ngadalë, por theksoi se duhet menduar se çfarë të bëhet që ky proces të mos ndalet.

 

"Kjo nuk është në duar të KFOR-it apo të NATO-s, por megjithatë ne do të vazhdojmë punën së bashku me komunat, sepse pa siguri nuk mund të ketë investime të duhura këtu", tha komandanti Kamerhof, duke theksuar se siguria nuk mund të bëhet vetëm nga ushtarakët, ngase, sipas tij, kjo është përgjegjësi edhe e të gjithë qytetarëve.

"Unë jam shumë i kënaqur që kemi objektiva të përbashkëta. Të gjithë duhet të jemi përgjegjës për situatën. Nuk mund t'u shmangemi atyre që ndodhën gjatë marsit. Do të keni mbështetjen e trupave të mia për sigurinë", porositi në fund gjenerali Kamerhof.

 

 

Kryqi i Kuq Ndërkombëtar boton librin me emrat e të zhdukurve në Kosovë

 

Prishtinë, 16 prill 2004 - Kryqi i Kuq Ndërkombëtar ka botuar edicionin e tretë të librit me emrat e personave që janë zhdukur si pasojë e luftës në Kosovë.   Në këtë libër ndodhen 3272 emra të personave të zhdukur. Përfaqësuesit e kësaj organizate thanë se janë të shqetësur që ky numër ka lëvizur shumë pak në krahasim me dy botimet e para të viteve 2000 dhe 2001.   Gjithashtu shprehën keqardhjen dhe shqetësimin për procesin shumë të ngadalshëm të kthimit të kufomave nga Serbia, si dhe të identifikimit të tyre në Kosovë.

 

Ata thanë se të gjitha të dhënat e mbledhura nga Kryqi i Kuq Ndërkombëtar u janë dërguar qeverisë së Beogradit dhe autoriteteve të Kosovës. Njëherit ata theksuan se në burgjet e Serbisë, me gjithë kërkimet që po bën organizata e tyre, nuk është gjetur asnjë person, emri i të cilit ndodhet në librin e të zhdukurve.

 

 

Banka Botërore i dhuron Kosovës 15 milionë dollarë

 

Uashington, 16 prill 2004 - Banka Botërore i dhuron Kosovës 15 milionë dollarë që do të zbatohen deri më 30 qeshor të vitit 2005. Kështu ka vendosur Bordi i udhëheqësve ekzekutivë të kësaj banke në bazë të një programi të hartuar të një strategjie të mëbshtetjes së tranzicionit për Kosovën.

 

Aktivitetet e Bankës Botërore do të fokusohen në mbështetjen e autoriteteve të Kosovës në zhvillimin e politikës ekonomike dhe në planifikimin e kapacatiteteve, përmirësimin e mjedisit të biznesit për nxitjen e zhvillimit dhe hapjen e vendeve të reja të punës, ristrukturimin e minierave dhe të sektorit të energjetikës.

Që nga përfundimi i konfliktit në Kosovë, Banka Botërore i ka dhënë Kosovës 80 milionë dollarë, ndihmë kjo që ka luajtur rol të rëndësishëm në ndërtimin e institucioneve dhe reformimin e ekonomisë. Në të ardhmen kjo bankë mund të ndihmojë në arritjen e stabilitetit në vend dhe zhvillimet në mes të të gjitha komuniteteve.

 

 

Rexhepi u bëri thirrje qytetarëve të paguajnë obligimet ndaj KEK-ut

 

Kastriot, 16 prill 2004 - Kryeministri Bajram Rexhepi vizitoi sot termocentralin "Kosova B" në Kastriot dhe bisedoi me strukturat drejtuese. Ai tha se qeveria do të financojë projektet emergjente për KEK-un me mjetet e sificiti buxhetor.

Por me këtë rast Rexhepi u bëri thirrje qytetarëve të paguajnë obligimet ndaj Koorporatës Elektroenergjetike të Kosovës (KEK) që kjo koorporatë të mbijetojë nga të hyrat e veta. Rexhepi tha se qeveria do ta mbështesë KEK-un që të t'i mbledhë paratë nga borxhlinjtë.

 

"Nuk do të ketë kurrfarë pardoni. KEK-u do të ketë përkrahjen e plotë si nëpërmjet gjykatës, policisë, qeverisë që të gjithë t'i bëjnë pagesat e tyre, në mënyrë që KEK-u të mos jetë barrë e buxhetit të Kosovës", tha Rexhepi, duke shtuar se ky është obligim që kryhet në tërë botën, prandaj nuk ka justifikime.

Ndërkaq në lidhje me problemin e zhvendosjes së banorëve të fshatit Hade, Rexhepi tha se ajo bëhet për shkak të rrezikut nga rrëshqitja e dheut dhe për arsye se KEK-ut i nevojitet thëngjilli. Ai tha se vendimi i qeverisë do të zbatohet me përpikmëri.

Gjiathashtu kryeministri paralajmëroi ristrukturimin e KEK-u, i cili sipas tij, është i domosdoshëm, ndonëse edhe i dhimbshëm ngase një pjesë ponëtorëve mund të mbesin pa punë.

Menaxheri ndërkombëtar i KEK-ut Pit Fajll tha se detyrë e parë e drejtuesve e kësaj koorporate është të përmiësojnë cilsinë e furnizimit me energji elektrike ndaj konsumatorëve e pastaj do të përqendrohen në riorganizimin e KEK-ut. Por ai shtoi se kjo nuk mund të bëhet nëse qytetarët nuk i paguajnë shpenzimet e energjisë së harxhuar.

 

 

Ndryshime në QKU: zgjedhet bordi i ri drejtues

 

Prishtinë, 16 prill 2004 - Ministria e Shëndetësisë për shkak të mospunës dhe shpërdorimit të detyrës shkarkoi Afrim Lokun nga posti i drejtorit operativ të Qendrës Klinike Universitare.

 

Ndërkaq, drejtori ekzekutiv i kësaj qendre ka dhënë dorëheqje nga ky post. Këto ndryshime janë bërë për shkak të menaxhimit të dobët dhe mosrealizimit të buxhetit sipas planit e programit, tha ministrja Resmie Mumxhi, duke refuzuar të japë vlerësime nëse ka pasur korrupsion në këtë qendër.

Pas këtyre ndryshimeve në QKUK, Ministria e Shëndetësisë ka marrë vendim që të themelojë bordin e përkohshëm menaxhues për këtë qendër, bëri të ditur ministrja Mumxhi. Mandati i bordit do të jetë 3 deri në 6 muaj, thotë zonja Mumxhi, me shpresë se pas këtyre ndryshimeve gjendja do të përmirësohet në këtë qendër.

 

Bordi përbëhet nga Dr.Skënder Murati, kryetar i bordit, Çerkin Bytyçi, Adnan Bozaliu, Arsim Çavdërbashi, Bajram Ajeti dhe Jahir Muholli.

Zonja Mumxhi tha se riorganizimi i QKUK-së është i domosdoshëm.

 

 

F.Sejdiu: "Iniciativat nga zeroja nuk janë shumë të nevojshme"

 

Prishtinë, 16 prill 2004 - Duke komentuar një iniciativë jozyrtare që misionin e OKB-së në Kosovë ta zëvendësojë një mision i Bashkimit Evropian, anëtari i Kryesisë së Kuvendit të Kosovës Fatmir Sajdiu tha se "iniciativat nga zeroja nuk janë shumë të nevojshme".

Zoti Sejdiu tha për radion "Evropa e lirë" se Kosova ka një mision të rëndësishëm ndërkombëtar dhe ai beson që Kombet e Bashkuara kanë marrë atë mandat.

"Në këtë proces ne dëshirojmë një rol të posaçëm të Shteteve të Bashkuara të Amerikës dhe kjo besoj se do të ndodhë. Natyrisht në përpjekjet e përgjithshme edhe Bashkimi Evropian e ka rolin dhe duhet ta kryejë atë në kuadrin e mekanizmave të përgjithshëm ndërkombëtarë", tha Sejdiu.

 

 

Në trazirat e 17 e 18 marsit u shkaktuan dëme në vlerë prej 11 milionë e 900 mijë euro

 

Prishtinë, 16 prill 2004 - Sipas Komisionit ndërministror për dëmet e shkaktuara nga trazirat e 17 e 18 marsit, ato vlerësohen në 11 milionë e 913 mijë euro.

 

Gjatë këtyre trazirave në 17 komuna janë shkatërruar ose dëmtuar 610 shtëpi, tri shkolla, dy objekte shëndetësore dhe katër objekte publike, thuhet në raportin e përgatitur nga komisioni në krye të të cilir është ministri Behxhet Brajshori.

 

Ndërkaq, për objektet fetare ende nuk janë bërë vlerësimet e dëmeve dhe kjo çështje do të mbetet për grupin tjetër të punës, tha Brajshori. Sipas tij, këto janë vlerësime preliminare.

Siç dihet, qeveria për sanimin e objekteve paraprakisht ka ndarë 5 milionë euro, pra nevojiten edhe mjete të tjera shtesë për rinovimin e tyre dhe se për këtë do të vendosë qeveria. Brajshori me këtë rast tha se edhe faktori ndërkombëtar duhet të ndihmojë në sanimin e këtyre dëmeve.

Komuna e cila ka pësuar më së shumti dëme është Mitrovica, pastaj Fushë Kosova, Przireni e kështu me radhë. Tani mbetet të shqyrtohet edhe dinamika e rinovimit të objekteve, tha Brajshori, ndërkohë që më 26 e 27 prill pritet të vijnë ekspertët e UNESKO-s që bashkë me ata vendorë të vlerësojnë dëmet e shkaktuara në objektet e kulteve fetare.

 

 

LDK në Dardanë bën evidentimin e anëtarëve të saj

 

Dardanë, 15 prill 2004 - Në një takim të Kryesisë së Degës së LDK-së në Dardanë me përfaqësuesit e nëndegëve dhe disa drejtorëve të drejtorive komunale, u debatua për aktivitetin e kësaj partie. Nga shumë diskutime u rikonfirmua informacioni i mëparshëm për përkrahjen e gjerë që aktualisht e ka LDK-ja në Dardanë.

 

Kjo u dëshmua nga takimet e zhvilluara nëpër nëndegë dhe aktiva si dhe frymës optimiste që e përshkuan këto takime.

Nga evidentimi i anëtarësisë së LDK-së dhe listat e sjella nga shumica e nëndegëve, deri më tash janë konfirmuar mbi tetë mijë anëtarë të LDK-së dhe është partia më masive në këtë komunë. Pritet që pas kompletimit të listave të disa në nëndegëve dhe të tri tjerave që ende nuk i kanë dorëzuar, numri i anëtarëve do të jetë shumë më i madh.

Të gjithë të pranishmit kërkuan që aktiviteti partiak të zgjerohet edhe më shumë, sidomos pati vërejtje në pasivitetin e Forumit të Gruas. Lidhur me këtë çështje u vendos që në një afat brenda dy javësh të mbahet një kuvend, ku do të bëhej konsolidimi i këtij forumi.

Të pranishmit u informuan edhe me punën shumë të suksesshme që po e bëjnë institucionet komunale. Dëshmia më e mirë është realizimi i disa projekteve në lëmin e infrastrukturës si dhe projektet tjera të realizuara prej se ka filluar të qeverisë LDK-ja në komunë.

 

 

Nesër mbahet një organizon për metodologjinë e zhvillimit të kornizave për shkollat profesionale

 

Prishtinë, 16 prill 2004 - Instituti për Menaxhim dhe Inxhinierig të Ndërmarrjes (IEME) që udhëheq projektin e hartimit të kornizave dhe kurrikulit për 47 profile të ndryshme të shkollave profesionale në Kosovë organizon nesër një seminar intensiv njëditor për ekspertët vendorë që punojnë në hartimin e kurikulit në temën:

"Metodologjia e zhvillimit të kornizave dhe kurrikulit për shkollat profesionale".

Në këtë seminar do të ligjërojë Dr. Herbert Winkler, ekspert për arsimin profesional nga Ministria e Arsimit, Shkencës dhe Kulturës e Austrisë. Zoti Winkler është udhëheqës në Departamentin për kurrikulat mësimore të arsimit profesional në Ministrinë e Arsimit të Austrisë.

 

Ai ka qenë udhëheqës i shumë projekteve për zhvillimin e kurikuleve dhe në harmonizimin e tyre në nivel evropian dhe rajonal. Aktualisht është i angazhuar si ekspert ndërkombëtar i IEME-s për kurrikule mësimore të arsimit profesional.

 

 

Kosova do të jetë një nga temat kryesore në takimin e sotëm të ministrave të jashtëm të BE-së

 

Talmor, 16 prill 2004 - Kosova bashkë me Irakun do të jenë dy temat kryesore në takimin ministrave të jashtëm të Bashkimit Evropian, që fillon sot në qytetin Talmor të Irlandës.

Diplomatët thanë se nga takimi pritet t'i dërgohet një mesazh i qartë shumicës shqiptare të Kosovës se pavarësia nuk mund të arrihet përmes dhunës.

 

Sipas burimeve nga Brukseli zyrtar mbështetje do t'i jepet dhe politikës standardet para statusit. Bashkimi Evropian, Shtetet e Bashkuara dhe Kombet e Bashkuara do të shohin zbatimin e standardeve para përcaktimit të statusit final.

 

 

Zgjedhjet presidenciale në Maqedoni shkojnë drejt balotazhit

 

Shkup, 16 prill 2004 - Kryeministri i Maqedonisë, Branko Cërvenkovski, do të përballet me konservatorin pak të njohur në raundin e dytë të zgjedhjeve të 28 prillit.

Kryeministri Cërvenkovski i partisë socialdemokrate fitoi numrin më të madh të votave në zgjedhjet e së mërkurës me 42 përqind të votave. Anëtari i opozitës Seshko Kedev fitoi 33 përqind të votave.

 

Që të dy konkurojnë të zëvëndësojnë presidentin Boris Trajkovski, i cili humbi jetën në një aksident ajror në muajin shkurt.

 

Vëzhguesit evropianë thanë se zgjedhjet ishin kryesisht të lira.

Departamenti amerikan i Shtetit e uroi Maqedoninë për atë që u cilësua një votim i organizuar mirë brënda një kohe kaq të shkurtër pas vdekjes tragjike të presidentit Trajkovski.

 

 

Tornadot në Bangladesh kanë lënë të vdekur të pakten 66 njerëz

 

Daka, Bangladesh, 16 prill 2004 - Tornadot e fuqishme, që e kanë goditur Bangladeshin që prej të mërkurës, kanë lënë të vdekur të pakten 66 njerëz dhe rreth 1.000 të lënduar, njofton BBCworld.

 

Më së shumti janë goditur fshatrat në dy distriktet Mymensing dhe Netrokona. Atje janë nisur shumë ekipe shpëtimi, mjekësore dhe ndihma humanitare. Shirat e rrëmbyeshme dhe erërat e fuqishme kanë lënë pa strehë mijëra njerëz.

 

 

Të paktën 18 veta kanë humbur jetën në dy aksidente trafiku në Turqi

 

Ankara, 16 prill 2004 - Të paktën 18 veta kanë humbur jetën në dy aksidente trafiku në Turqi. Në përplasjen e autobusit me një kamion të paktën 11 veta kanë humbur jetën në vendin e quajtur Merzifon në veri të Turqisë.

 

Autobusi që transportonte pasagjerë pas përplasjes me kamionin është ndezur, njoftojnë mediat turke. Shkaku i aksidentit nuk dihet.

Në një aksident tjetër që ka ndodhur afër Ankarasë të paktën shtatë veta kanë humbur jetën në përplasjen e trenit mbi një minibus me nxënës, 50 km larg Ankarasë. Treni ekspres me një shpejtësi të plotë është përplasur për minibusin që në atë moment po kalonte rrugën hekurudhore.

 

 

Shtatë veta janë vrarë në një shpërthim në Meksikë

 

Meksiko Siti, 16 prill 2004 - Të paktën shtatë veta janë vrarë të enjtën në mbrëmje në një shpërthim të prodhimeve piroteknike në qytetin meksikan Guadalahara, kanë bërë të ditur autoritetet e atjeshme.

Shkaqet e shpërthimit nuk dihen, kurse hetimet po zhvillohen. Sipas dëshmitarëve, trupat e të vrarëve ishin hedhur 30 metra përreth depos.

 

 

Takimi Bush - Bler në Shtëpinë e Bardhë pritet të tregojë frontin unik në Irak

 

Uashington, 16 prill 2004 - Takimi në Shtëpinë e Bardhë i presidentit Bush dhe i kryeministrit Bler pritet të tregojë frontin unik në Irak, me shpresë se do të përfitojnë mbështetjen publike për koalicionin ushtarak, njofton Rojter.

 

Dy liderët pritet të kenë sot (e premte) një takim prej 90 minutash, të mbajnë një konferencë të përbashkët shtypi dhe pastaj do të kenë një drekë private njëorëshe.

Takimi i tyre i fundit sy më sy ishte para pesë muajsh. Në këtë takim, pritet që dy liderët të caktojnë 30 qershorin si afat për t'ia dorëzuar pushtetit politik një qeverie të përkohshme irakiane.

 

Britania ka njoftuar se ka pasur rreth 60 ushtarë të vrarë në Irak, kurse SHBA-të rreth 700, përfshirë edhe 88 ushtarë të vrarë në këtë muaj. SHBA-të kanë rreth 130 mijë trupa në Irak, ndërsa Britania ka 12 mijë ushtarë atje.

 

 

Në luftimet në Falluxha janë vrarë 15 irakianë dhe janë plagosur edhe 20 të tjerë

 

Falluxha, 16 prill 2004 - Trupat amerikane dhe guerilët irakianë kanë pasur luftime të ashpra gjatë natës në qytetin perendimor Falluxha, në të cilat janë vrarë 15 irakianë, kurse janë plagosur edhe 20 të tjerë, kanë bërë të ditrur sot (e premte) dëshmitarët dhe burimet mjekësore, njofton Rojter.

 

Aeroplanët luftarakë amerikanë kanë sulmuar caqet në qytet dhe gjatë luftimeve është shkatërruar një automjet amerikan i blinduar, kanë thënë dëshmitarët.

 

 

SHBA-të kanë reduktojnë numrin e ushtarwve në Afganistan pasi të mbahen zjedhjet

 

Kabul, 16 prill 2004 - Shtetet e Bashkuara, që kanë shtuar trupat në Afganistan për të kapur Osama bin Ladenin dhe militantët e Al Kaidës, do të reduktojnë numrin e tyre pasi të mbahen zjedhjet në vend, ka bërë të ditur sot (e premte) një oficer i lartë ushtarak amerikan.

 

Ai tha gjithashtu se 15,500 ushtarë amerikanë janë sjellë në Afganistan vetëm për të asgjësuar Al Kaidën, aleatët e talibanëve dhe shkaktarët e dhunës para zgjedhjeve të shtatorit në Afganistan.

 

 

SHBA do të zgjasin shërbimin ushtarak për 20 mijë trupa amerikane që ndodhen në Irak

 

Uashington, 16 prill 2004 - Sekretari amerikan i Mbrojtjes Donald Ramsfeld miratoi një kërkesë të komandantëve në Irak për të fuqizuar nivelin e trupave amerikane të dislokuara atje në rreth 135 mijë. Rreth 1 e katërta e 20 mijë amerikanëve që kanë marrë urdhër të mos largohen nga Iraku janë trupa të Gardës Kombëtare ose të forcave rezervë.

"Ne parashikojmë që ata të qëndrojnë në Irak edhe për deri në 90 ditë të tjera", tha Ramsfeld.

Tashmë që lufta ka hyrë në vitin e dytë, disa rezervistë kanë më shumë se një vit që janë larguar nga punët e tyre të rregullta, duke u bërë shkas që disa pjesëtarë të familjeve të tyre të ngrenë zërin kundër luftës.

 

Duke përshkruar gjendjen aktuale si një provë për vullnetin e koalicionit në Irak, sekretari Ramsfeld pohoi dje se një vit më parë nuk e kishte parashikuar që dhuna në Irak, veçanërisht ndaj forcave të koalicionit, do të arrinte nivele të tilla.

 

 

Audiokaseta e re duket se është regjistruar nga Osama Bin Ladeni

 

Bagdad, 16 prill 2004 - Zyrtarë amerikanë thonë se kaseta e re audio, që u transmetua nga rrjete televizive arabe duket se është regjistruar nga Osama Bin Ladeni, ashtu siç u njoftua. Zyrtarët mirëpritën kundërshtimin e njëzëshëm të ofertës së udhëheqësit terrorist ndaj asaj që u cilësua si "armëpushim" ndaj vendeve të Evropës që tërheqin trupat nga vendet myslimane.

Reagimi ndaj zërit, që pretendoi të ishte i Osama Bin Ladenit, erdhi nga sekretari amerikan i Shtetit Kolin Pauell, i cili u tha gazetarëve se është mirënjhohës që aleatët e Amerikës dënuan atë që u shikua si përpjekje për të përçarë vendosmërinë e vendeve perëndimore në luftën kundër terrorizmit.

 

 

Irak: Vritet një diplomat iranian

 

Bagdad, 16 prill 2004 - Zyrtarët iranianë thanë se një prej diplomatëve të tyre të lartë u vra në Bagdat. Agjencia shtetërore iraniane e lajmeve IRNA tha se diplomati i vrarë ishte atasheu kulturor dhe i shtypit i ambasadës.
Ai u vra kur persona të panjohur hapën zjarr kundër makinës së tij pranë ambasadës iraniane. Askush nuk e ka marrë përgjegjësinë për vrasjen.

 

 

Bler pro planit të paqes në Lindjen e Mesme

 

Londër, 16 prill 2004 - Kryeministri britanik Toni Bler ka zhvilluar bisedime në Nju Jork me Sekretarin e Përgjithshëm të OKB-së, Kofi Annan.

Ky takim bëhet vetëm disa orë pas kritikave të zotit Annan për planin e njëanshëm të Izraelit për t'u tërhequr nga Gaza në shkëmbim të mbajtjes së disa pjesëve të Bregut Perëndimor.

Duke folur me gazetarët, zoti Bler tha se ai nuk ishte i zhgënjyer nga mbështetja e gjerë e propozimit izraelit nga presidenti  Bush.

Ai mohoi se kështu ishte anashkaluar plani i paqes i mbështetur nga bashkësia ndërkombëtare.

 

 

 

Shqetësime për sigurinë në Arabinë Saudite

 

Rijad, 16 prill 2004 - Sekretari amerikan i Shtetit, Kolin Pauell, ka njoftuar se ka urdhëruar largimin e stafit jo të domosdoshëm diplomatik nga Arabia Saudite për shkak të shtimit të frikës për sigurinë e tyre.

Ky urdhër do të jetë edhe për familjet e të gjithë personelit të ambasadës amerikane në kryeqytetin saudit Riad, dhe dy konsullatave në Xhedah dhe Dahram.

Deklaratat e zotit Pauell vijnë dy ditë pasi ambasada tha se kishte informacione për një kërcënim të ri terrorist.

 

 

Në qytetin Kufa janë dëgjuar një sërë shpërthimesh

 

Kufa, Irak, 16 prill 2004 - Dëshmitarët kanë thënë se në qytetin e shenjtë shiit Kufa janë dëgjuar sot (e premte) një sërë shpërthimesh, njofton Rojter. Në paralagjet e këtij qyteti, gjithashtu janë parë duke vrapuar edhe dhjetëra milicë të armatosur.

 

Ata janë përleshur me trupat e huaja. Të pakten katër ushtarë janë vërejtur të jenë pjesëtarë të armatës së klerikut radikal Moktada al Sadër, për të cilin trupat amerikane janë zotuar se do ta zënë apo do ta vrasin.

 

 

Irak: Një danez i zhdukur, një kinez i liruar

 

Kopenhagë, 16 prill 2004 - Një qytetar danez i zhdukur duket me siguri të jetë zënë peng në Irak, ka bërë të ditur sot (e premte) ministri i Jashtëm i Danimarkës, njofton BBCWorld. Askush deri tash s'ka kontaktuar me të, ka shtuar ai. Ndërkohë një lider klerik sunit ka thënë se kidnapuesit kanë liruar një kinez, por autoritetet kineze ende nuk e kanë konfirmuar raportin.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |