TURNE E ANSAMBLIT “E. DURAKU” NGA ZHURI NË GJERMANI

Prej 22 prill deri më 3 maj 2004

TURNE E ANSAMBLIT “E. DURAKU” NGA ZHURI NË GJERMANI

16 prill 2004 / TN

- Programet e Ansamblit nga Zhuri do të prezentohen më 23 prill në qytetin e Rottweilit, më 25 prill në Mynih, më 29 prill në Duisburg, më një maj në Sundern dhe në Hanover dhe më dy maj në Augsburg. Do të jet ky rast që bashkatdhetarët tanë të ndjekin koncertet e amatorëve zhurjan me programin e përgatitur në mënyrë profesionale.

Çerkin BYTYÇI

Ka kaluar një kohë e gjatë që kur ndonjë ansambël a shoqëri kulturore artistike nga Kosova a trevat tjera shqiptare, ka organizuar turne për të shfaqur programet para diasporës shqiptare në Gjermani, në mënyrë të organizuar, përveç që kohë më parë Teatri amator i qytetit të Prizrenit prezentoi komedinë “Hotel kashta” të Ymer Shkrelit për publikun në Rottweil, Singen e Sundern.

Ndaj, Ansambli Artistik i Këngëve dhe Valleve „Emin Duraku“ nga Zhuri, në turnen që organizon në Gjermani, nga data 22 prill e deri më 3 maj, do të sjell freski në jetën kulturore dhe përditshmërinë e diasporës shqiptare, e cila kaherë nuk ka shijuar vlerat e mirëfillta të thesarit të pasur folklorik të trevave tona. Shi për këtë, ky ansambël, i mirënjohur për publikun e gjerë, jubileun e 50-vjetorit të veprimtarisë së suksesshme kulturore dhe artistike, e kurorërzon me këtë organizim tejet të rëndësishëm për diasporën tonë në Gjermani, e cila e mirëpret duke shpresuar se është nxitur një punë e mirë për ofrimin e vlerave të mirëfillta kulturore nga Atdheu. Zatën, “Emin Duraku” nga Zhuri, është njëri nga ansamblet e para kulturore artistike amatore që do të qëndroj në mesin e mërgimtarëve, pas luftës në Kosovë, për të prezentuar, jo vetëm para tyre por edhe për publikun e vendit mik gjerman, vallet dhe këngët karakteristike, përshkuar nga dinamika, tonaliteti, niveli i lartë interpretues dhe përkushtueshmëria e amatorëve të zellshëm për interpretim të suksesshëm.

Është e njohur se veshjet karakteristike autoktone dhe koloriti që i jep gjallëri kurdoher programeve të valltarëve nga Zhuri, zgjojnë interesim dhe mirëpriten nga publiku. Kjo u dëshmua edhe në Festivalin e fundit në Gjirokastër ku Ansambli “Emin Duraku” u prezentua me sukses dhe u vlerësua lartë nga publiku e profesionistët.

Dasma e Zhurit, që paraqet një moment specifik shqiptar të ahengut familjar, e që kultivohet edhe sot e kësaj dite me gjithë orgjinalitetin e trashëguar, është nga pikat e programit që tradicionalisht i ofrohet publikut, e edhe kësaj here publikut në Gjermani. Kjo dhe legjenda e dramatizuar “Hana” ngërthen në vehte një moment që zgjon kërshërinë duke rikujtuar traditën, vendosmërinë, mikpritjen dhe tiparet pozitive të njeriut, sakrificën e tij për të mbajtur fjalën e dhënë, respektin ndaj të tjerëve. Të gjitha këto përcillen me këngët solistike dhe të grupit, me vallet koreografike përgatitur enkas për këtë turne dhe pikat e humorit me shije. E veçantë e programit që prezentohet para mërgimtarëve në Gjermani është mundësia e shijimit të këngës së dëgjuar kurdoherë me ëndje nga këngëtarja e mirënjohur Nazmije Hoxha, e cila i bën nder me prezentimin e saj në këtë kuadër, turnes së ditëve të ardhshme.

Këtë turne e inicoi Kemajl Çallaku, Kryetar i Këshillit të Arsimtarëve Shqiptarë në Gjermani “Naim Frashëri” kurse e mbështetën Ministria e Kulturës së Kosovës përkatësisht Departamenti për Çështje jo Rezidente dhe Zotriu Meriman Braha, drejtor i këtij Departamenti, me qëllim që të trasohet një rrugë e prezentimit të ansambleve amatore nga trojet tona para publikut shqiptar dhe jo vetëm atij në mërgim si dhe me qëllim të vendosjes së një forme të favorshme për shkëmbimin e vlerave kulturore. E mbështetën këtë nismë edhe Shoqëria Kulturore Shqiptare “Iliria” në Rottweil dhe shumë veprimtarë- adhurues të vlerave kulturore në disa qytete të Gjermanisë, dashamirë të Ansamblit “E. Duraku, bashkëatdhetarë nga Zhuri, Vlashnja, Muradema, Hoça e Qytetit etj., të cilët u angazhuan për sigurimin e sallave dhe organizimin e shfaqjes së koncerteve të ditëve të ardhshme.

Programet e Ansamblit nga Zhuri do të prezentohen më 23 prill në qytetin e Rottweilit, më 25 prill në Mynih, më 29 prill në Duisburg, më një maj në Sundern dhe në Hanover dhe më dy maj në Augsburg. Do të jet ky rast që bashkatdhetarët tanë të ndjekin koncertet e amatorëve zhurjan me programin e përgatitur në mënyrë profesionale.

- Kemi bërë punë intensive disa muajshe për të përmbushur pritjen e shikuesëve në Gjermani. Jemi të vetëdishëm për rëndësinë e këtij turneu por edhe dëshirën e mirëfillt të mërgimtarëve për vallet dhe këngët tona, ndaj jemi të bindur se suksesi nuk do të mungoj, thot Hajdar Elezkurtaj, kryetar i Ansamblit të Zhurit para nisjes në këtë turne.

Organizatorët e turnesë dhe amatorët zhurjan u janë mirënjohës zyrtarëve të Përfaqësisë gjermane në Prishtinë, të cilët lejuan vizat për udhtimin e interpretëve të Ansmablit “Emin Duraku” dhe kështu mundësuan realizimin e dëshirës së mërgatës shqiptare për të shijuar programin që do të shfaqet.