Përmbajtja:

• Presidenti Rugova priti dje pasdite një delegacion të Ministrisë së Jashtme të Italisë

• Ministrja Mumxhi vizitoi komunën e Dragashit

• U përuruan banesat e rinovuara të serbëve në një lagje të Prishtinës

• Si të luftohet trafikimi me njerëz

• Në Hamburg në qershor do të mbahet një akademi përkujtimore për disa figura të shquara kombëtare shqiptare

• Udhëheqja e komunës së Prishtinës vizitoi stacionin verior të SHPK-së

• Në Gjakovë e shtuna dhe e diela janë shpallur ditë zie në nderim të rrivarimit të 21 viktimave të luftës

• Zëdhënësi i KFOR-it thotë se Al Kaida nuk paraqet kërcënim për Kosovën

• Mitrovicë: Lirohet palestra e sporteve "Minatori" dhe pjesa e objektit të Shtëpisë së Kulturës

• Brajshori e Xhentilini për sanimin e dëmeve gjatë trazirave të marsit

• Komuna e Prizrenit ka ndarë 230 mijë euro për rindërtimin e tri shtëpive të kulturës

• Ministrat e mbrojtjes së vendeve të Evropës Juglindore po diskutojnë në Sarajevë për bashkëpunmin në rajon

• Serbia nuk do të heqë dorë nga Kosova për shkak të resursve të mëdha ekonomike, u tha në një tryezë të rrumbullakët

• Cërvenkovski kryeson në zgjedhjet presidenciale në Maqedoni

• Talibanët kanë vrarë një shef policie dhe 9 truproje të tij në një pritë në Afganistan

• Arafat: Palestinezët do të vazhdojnë luftën e tyre për shtet të pavarur

• Britania ka refuzuar ofertën për zjarrpushim, të ofruar nga lideri i Al Kaidës

• Italia dhe Japonia e ripërsëritën përkushtimin për mbetjen e trupave të tyre në Irak

• SHBA dhe Britania kanë premtuar ndihmë financiare për rindërtimin e Qipros së bashkuar

• Dy ushtarë amerikanë janë vrarë në dy sulme të veçanta në Irak

• Në luftimet izraelito-palestineze janë plagosur 20 palestinezë

• Talibanët kanë vrarë me armë zjarri 7 persona në Afganistan

• Në qendër të Bagdadit kanë ndodhur dy shpërthime afër selisë amerikane

• Një peng italian vritet në Irak

• Miler: FBI dhe CIA janë integruar thuajse në çdo nivel që prej 11 shtatorit 2001

• Ambasadori amerikan në OKB mund të emërohet ambasador në Irak

• Bush mbështet planet e Sharonit

• Bin Laden i ofron zjarrpushim Evropës

Presidenti Rugova priti dje pasdite një delegacion të Ministrisë së Jashtme të Italisë

 

Prishtinë, 15 prill 2004 - Presidenti i Kosovës Ibrahim Rugova priti dje pasdite një delegacion të Ministrisë së Punëve të Jashtme të Italisë të kryesuar nga Xhovani di Vietri. Me mysafirët nga Italia Presidenti Rugova bisedoi për situatën aktuale në Kosovë dhe për përpjekjet që po bëhen për përmirësimin e gjendjes, duke velrësuar se ka shenja pozitive pas ngjarjeve të marsit.   Ai tha se nuk do të lejohet që dhuna të përsëritet më në Kosovë dhe duhet të vazhdojë progresi i mëtejshëm dhe të rindërtohen shtëpitë e shkatërruara dhe objektet e tjera për të cilat qeveria ka formuar një fond të veçantë.

 

Poashtu ai theksoi se të gjithë qytetarët që janë zhvendosur do të kthehen në shtëpitë e tyre. Presidenti theksoi me këtë rast rëndësinë e zhvillimit ekonomik dhe proceset e tjera në të mirë të Kosovës, si dhe integrimin e grupeve etnike në shoqërinë kosovare.

Poashtu zoti Rugova u angazhuar për forcimin e marrëdhënieve bileterale mes Kosovës e Italisë në interes të dy vendeve. Gjithashtu në këtë takim është folur edhe për çështjen e standardeve, të cilat siç tha Presidenti, janë caktuar për integrimin e Kosovës në BE në NATO, sepse kjo është e ardhmja e Kosovës, tha ai.

Presidenti falenderoi mysafirët italianë për prezencën ushtarake, administrative dhe humanitare të Italisë në vendin tonë, duyke shtuar se pret edhe më tutje që Italia të vazhdojë përpjekjet e mëtejshme për integrimin e Kosovës në Evropë.

Mysafirët nga Italia thanë se kishin ardhur në Kosovë për të dëshmuar se komuniteti ndërkombëtar është i interesuar për një stabilitet të Kosovës, ndërkaq Italia punon nga afër për të pasur një Ballkan stabil.

"Ne kemi qëndrimin tonë se ju duhet të arrini së pari standardet të cilat i hapin rrugën Kosovës për të zgjidhur problemet në perspektivë. E ardhmja e rajonit është në Evropë.

 

Kjo do të thotë se duhet të arrini të gjitha standardet evrpiane", tha zoti Xhovani di Vietri. Ai u shpreh se dhuna nuk është rruga për t'i zgjidhur problemet, duke shprehur njëherit shqetësimet në liddhje me dhunën e marsit. "Perspektiva që ne ofrojmë është progresi dhe moderimi", tha ai.

 

 

Ministrja Mumxhi vizitoi komunën e Dragashit

 

Dragash, 15 prill 2004 - Ministrja e Shëndetësisë Dr.Resmije Mumxhi, me bashkëpunëtorë, vizitoi sot komunën e Dragashit, ku bisedoi me kryetarin e komunës Halim Shemsedini, për çështjet e ndryshme që e preokupojnë popullatën e kësaj ane.

Pastaj ministrja Mumxhi së bashku me kryetarin e komunës Shemsedini, vizituan edhe Shtëpinë e Shëndetit dhe u njoftuan nga afër për problemet, gjendjen dhe përkujdesjen shëndetësore që ofron ky institucion shëndetësor.
Zonja Mumxhi dhe z. Shemsedini vizituan edhe disa fshatra të komunës së Dragashit, mes të cilave edhe Restelicën.

Ministrja Mumxhi premtoi se komuna e Dragashit do të ketë përkrahjen e plotë të Ministrisë së Shëndetësisë për përmirësimin e infrastrukturës shëndetësore dhe ngritjes së cilësisë së shërbimeve shëndetësore për banorët e kësaj ane, në veçanti banorëve ruralë.

 

 

U përuruan banesat e rinovuara të serbëve në një lagje të Prishtinës

 

Prishtinë, 15 prill 2004 - Kryeministri Bajram Rexhepi dhe zv.kryeadministratori i Kosovës Çarls Brajshou përuruan sot banesat e rinovuara të serbëve në lagjen Ulpiana në Prishtinë, të cilat u dëmtuan gjatë trazirave të marsit.

 

Në këtë ceremoni merrnin pjesë edhe përfaqëuesit e vendeve të "Kuintit", ndërkaq përfaqësuesit serbë bojkotuan.

Çarls Brajshou tha se është shumë i kënaqur me intervenimin e shpejtë të Qeverisë për krijimin e kushteve që njerëzit të kthehen në shtëpitë e tyre. Gjithashti ai tha se UNMIK-u po bashkëpunon me trupat e KFOR-it që njerëzit që kthehen në banesat e tyre të ndiehen të sigurt.

Ndërakq kryeministri Rexhepi tha se qeveria po dëshmon se është e aftë për më shumë përgjegjësi në të gjitha fushat. Ai shprehu kënaqësinë që banorët e komunitetit serb që jetojnë në Prishtinë mund të kthehen në banesat e tyre.

 

Rexhepi kërkoi nga BE-ja dhe SHBA-të që të inkurajojnë serbët që problemet e tyre të zgjidhen në Prishtinë e jo në Beograd. Serbët, tha Rexhepi, askush nuk i pengon që të kenë marrëdhënie konstruktive me Beogradin, duke ritheksuar se problemet zgjidhen në Prishtinë për të gjitha komunitetet.

Edhe shefja e Zyrës amerikane në Prishtinë, Marsi Ris, përgëzoi Qeverinë për angazhimin drejt rikthimit të besimit ndërmjet komuniteteve.

Për renovimin e këtyre banaseve qeveria ka dhënë 75 mijë euro.

 

 

Si të luftohet trafikimi me njerëz

 

Prishtinë, 15 prill 2004 - Në një seminar të organizuar nga Instituti Gjyqësor i Kosovës për luftën kundër trafikimit të njerëzve, u tha se trafikimi është një dukuri e shëmtuar dhe vepër penale me pasoja të rënda për shoqërinë. Qeveria e Kosovës dhe UNMIK-u, u tha në këtë seminar, duhet të bëjnë edhe më shumë për krijimin e kushteve për parandalimin dhe luftimin e krimit të organizuar.

Në debat morën pjesë prokurorë dhe gjyqtarë vendorë, të cilët folën për sanksionet dhe mjetet hetimore për parandalimin e krimit të organizuar.

Këshilltari ligjor pranë Zyrës amerikane në Prishtinë, Mark Miler, tha se prokuroria duhet ta mbikqyrë punën e policisë hetimore.

Mazllum Baraliu nga Institutit Gjyqsor i Kosovës, tha se vendi ynë ka kuadro që të përballet me trafikimin, një dukuri kjo e re në Kosovë. Mirëpo, sipas tij, mungojnë kushtet për ta luftuar trafikimin.

 

 

Në Hamburg në qershor do të mbahet një akademi përkujtimore për disa figura të shquara kombëtare shqiptare

 

Hamburg, 15 prill 2004 - Në Hamburg të Gjermanisë më 12 dhe 13 qershor do të organizohet një akademi përkujtimore me rastin e 100-vjetorit të lindjes së atdhetarit Xhafer Deva dhe 58-vjetorit të vrasjes së udhëheqësit të luftës për Shqipërinë etnike, kapidan Mark Gjon Markut.

Në këtë akademi përkujtimore do të flitet për këto dy figura heroike të kombit shqiptar me argumente shkencore, si dhe për veprimtarinë atdhetare të Ndue Përlleshit, të Besës Kombëtare -konkretisht për udhëheqësin e saj Ymer Berishën, për jetën dhe veprën e Midhat Frasherit, të Pater Anton Harapit, për luftën e Drenicës dhe Shaban Polluzhen e Mehmet Gradicen, për jetën dhe veprën e Heroines Shkodrane e cila u flijua për Kosovën, Marije Shllakun, për Gjon Sereçin dhe Ajet Gergurin, për Xhemë Gostivarit, Prek Calin, Aziz Zhilivodëns, Muharrem Bajraktarin etj.

Në këtë akademi do të bëhet edhe promovimi i gjashtë librave të autorëve shqiptarë që jetojnë në diasporë dhe me një ekspozitë do të paraqitet edhe maestro i artit shqiptar në bote, Gjelosh Gjokaj, thuhet në një njoftim të Këshillit organizativ.

 

 

Udhëheqja e komunës së Prishtinës vizitoi stacionin verior të SHPK-së

 

Prishtinë, 15 prill 2004 - Kryetari i komunës së Prishtinës Ismet Beqiri, me bashkëpunëtorët, vizitoi sot stacionin verior të SHPK-së. Kapiten Ali Kllokoçi, komandant i këtij stacioni policor, i informoi udheqësit komunalë për punën dhe aktivitetin e këtij stacioni policor.

Kryetari i Kuvendit Komunal të Prishtinës, Ismet Beqiri, çmoi punën dhe aktivitetin e këtij stacioni policor, i cili me sukses po lufton krimin dhe rastet devijante, duke bërë që lagjja "Kodra e trimave" të jetë më e qeta në Prishtinë.
Beqiri kërkoi një bashkëpunim edhe më të ngushtë midis komunës dhe këtij stacioni policor.

Komandanti i këtij stacioni të SHPK-së, Ali Kllokoçi, tha se territori ku veprojnë pjesëtarët e këtij stacioni është mjaft i hapur si në qytet dhe në fshatra përreth, por ai shtoi se ekziston një bashkëpunim i mirë me të gjitha institucionet si dhe me popullatën.

Ndërkaq Jaser el Hadidy, oficer i stafit ndërkombëtar, tha se stafi vendor dhe ai ndërkombëtar është shumë i motivuar për krijimin e qetësisë jo vetëm në këtë pjesë të Prishtinës, por edhe më gjerë.

 

 

Në Gjakovë e shtuna dhe e diela janë shpallur ditë zie në nderim të rrivarimit të 21 viktimave të luftës

 

Gjakovë, 15 prill 2004 - Me vendim të kryetarit të Kuvendit komunal të Gjakovës e shtuna dhe e diela e kësaj jave janë shpalllur ditë zie në këtë komunë. Kështu u bë e ditur në takimin e Komitetit komunal për të zhdukur. Të shtunën në orën 13.00 në "Lëndinën e pikëllimit" në fshatin Mejë do të rivarrosën 6 trupa, ndërkaq të dielën në Gjakovë në orën 14.00 do të bëhet rivarrimi i 15 të vrarëve në "Kodrën e Çabratit".

 

 

Zëdhënësi i KFOR-it thotë se Al Kaida nuk paraqet kërcënim për Kosovën

 

Prishtinë, 15 prill 2004 - Zëdhënësi i KFOR-it Xhim Moren ka thënë dje në Prishtinë se Al Kaida nuk paraqet kërcënim për Kosovën, siç spekulohet në disa media të Beogradit.

 

Ndërkaq ai ka përsëritur qëndrimin se AKSH-ja konsiderohet si nga NATO-ja ashtu edhe nga KFOR-i si grup terrorist.

 

Ai ka shtuar se KFOR-i dhe policia e UNMIK-ut po i shqyrtojnë masat lidhur me raportimet se kjo organizatë është paraqitur publikisht në Kosovë.

Ndërkohë, autoritetet e UNMIK-u kanë pohuar se janë në përfundim e sipër bisedimet me udhëheqësit e Kosovës, shqiptarë e serbë për t'i bindur ata që së shpejti të ulen në një tavolinë bisedimesh për të kthyer, siç thuhet, besimin e humbur ndërmjet komuniteteve pas trazirave të 17 e 18 marsit.

 

 

Mitrovicë: Lirohet palestra e sporteve "Minatori" dhe pjesa e objektit të Shtëpisë së Kulturës

 

Mitrovicë, 15 prill 2004 - Drejtori i Drejtorisë për Kulturë, Rini dhe Sport, Xhemajl Syla, ka arritur marrëveshjen me përfaqësuesit e KFOR-it për lirimin e palestrës së sporteve "Minatori" dhe të pjesës së objektit të Shtëpisë së Kulturës, ku është i vendosur Arkivi Historik, por me disa kushtëzime.

Marrëveshja u mundëson punëtorëve të këtyre institucioneve që të fillojnë punën pa pengesa, por me kusht që ata më parë të sigurojnë bexhat nga zyrtarët e BSHVL-së, në bazë të të cilëve do tu lejohet hyrja në objektet ku punojnë.

Palestra e sporteve, në bazë të marrëveshjes do të mund të shfrytëzohet për ushtrime nga sportistët që nga dita e premtë, 16.04.2004. Hyrja në palestër do të lejohet vetëm në bazë të listës, të cilën duhet ta bëjnë zyrtarët komunal.
 

Takimet e ndryshme sportive në Palestrën e sporteve do të lejohen që nga uikendi i kësaj jave, por fillimisht pa shikues. Që nga java e ardhshme do të lejohet edhe hyrja e shikuesve në palestër për përcjelljen e takimeve sportive, por numri i tyre nuk guxon të jetë mbi 1.500.

 

 

Brajshori e Xhentilini për sanimin e dëmeve gjatë trazirave të marsit

 

Prishtinë, 15 prill 2004 - Ministri i Kulturës, Rinisë dhe Sportit Behxhet Brajshori ka biseduar me përfaqësuesin special të Bashkimit Evropian në Kosovë, Fernando Xhentilini lidhur me punën që po bën Komisioni për sanimin e dëmeve të trazirave të marsit.

 
Ndërkaq Xhentilini ka vlerësuari se fillimi i këtij procesi është shumë i rëndësishëm dhe i ka dhënë mbështetje institucioneve të Kosovës që ky proces të zhvillohet sa më shpejt.

 

 

Komuna e Prizrenit ka ndarë 230 mijë euro për rindërtimin e tri shtëpive të kulturës

 

Prizren, 15 prill 2004 - Bordi i Drejtorëve i Kuvendit komunal të Prizrenit ka ndarë shumën prej 230 mijë euro për rindërtimin e tri shtëpive të kulturës në Prizren, në Zhur dhe në fshatin Gjonaj. Shuma më e madhe e këtyre mjetëve janë të dedikuara për shtëpinë e kulturës "Xhemajli Berisha" në Prizren për nxehje qendrore që deri më tash ishte problem shumë i madh për çdo lloj manifestimin në stinën e dimrit.

 

 

Ministrat e mbrojtjes së vendeve të Evropës Juglindore po diskutojnë në Sarajevë për bashkëpunmin në rajon

 

Sarajevë, 15 prill 2004 - Ministrat e mbrojtjes së vendeve të Evropës Juglindore, të mbledhur në një konferencë në Sarajevë, po diskutojnë sot për bashkëpunimin në përforcimin e paqes dhe të stabilitetit në rajon dhe për përfshirjen e tij në integrimet euroatlantike. 

 

Në këtë takim po marrin pjesë ministrat e mbrojtjes së Shqipërisë, Bosnjës e Hercegovinës, Bullgarisë, Greqisë, Kroacisë, Maqedonisë, Rumanisë dhe Serbisë e Malit të Zi, si dhe përfaqësuesit e NATO-s, Bashkimit Evropian dhe të disa organizatave ndëkombëtare.

 

 

Serbia nuk do të heqë dorë nga Kosova për shkak të resursve të mëdha ekonomike, u tha në një tryezë të rrumbullakët

 

Beograd, 15 prill 2004 - Sipas ministrit serb të Minierave dhe Energjetikës Radomir Naumov në Kosovë "ekzistojnë resurse ekonomike për shkak të të cilave brezat e sotëm nuk mund të heqin dorë nga pjesa e territorit të Serbisë". Këto komente ministri serb i bëri në një tryezë të rrumbullakët me temën "Fshehtësitë e resurseve të Kosovës".
 

Ndërkaq, profesori i Fakultetit Xehetaro-Metalurgjik Radomir Simiq ka thënë në këtë tryezë se "një vend të veçantë në strukturën e lëndëve minerale të Kosovës zë thëngjilli, rezervat gjeologjike të të cilit janë jashtëzakonisht të mëdha, madje aq të mëdha që me rezerva të tilla nuk mund të lavdërohet asnjë vend evropian".

 

 

Cërvenkovski kryeson në zgjedhjet presidenciale në Maqedoni

 

Shkup, 15 prill 2004 - Rezultatet jozyrtare të zgjedhjeve presidenciale në Maqedoni tregojnë se kryeministri aktual Branko Crvenkovski kryeson, por ka marrë më pak se 50 për qind të votave, minimalja e kërkuar për të siguruar presidencën.

Thuajse të gjitha votat janë numëruar dhe partitë politike në Maqedoni njoftojnë se Cërvenkovski ka marrë afro 48 për qind të votave, ndërsa konkurrenti i tij Sashko Kedev i partisë VMRO renditet në vend të dytë me afro 40 për qind të votave.

Nëse këto rezultate konfirmohen zyrtarisht, dy kandidatët do të konkurrojnë në një raund të dytë pas dy javësh.

Dy kandidatët shqiptarë nuk morën një numër të mjaftueshëm votash për të sfiduar Crvenkovskin. Rezultatet jozyrtare tregojnë se Gëzim Ostreni ka marrë rreth 14 për qind të votave, ndërsa Zydi Xhelili ka marrë vetëm 8 për qind të votave.

 

 

Talibanët kanë vrarë një shef policie dhe 9 truproje të tij në një pritë në Afganistan

 

Kabul, 15 prill 2004 - Talibanët kanë vrarë një shef policie dhe 9 truproje të tij në një pritë në jug të Afganistanit, bëjnë të ditur sot (e enjte) zyrtarët vendorë, njofton BBCWorld. Po kështu, bëhet e ditur se gjatë shkëmbimit të zjarrit është vrarë edhe një nga sulmuesit. Incidenti ka ndodhur të merkurën në zonë të largët të provincës Kandahar, rreth 400 km në jug të kryeqytetit Kabul.

 

Në njoftim thuhet gjithashtu se në tri ditët e kaluara janë vrarë rreth 20 vetë, përfshirë edhe ekzekutimin e një familjeje 7-anëtarëshe, për të cilën kemi njoftuar në edicionet e mëhershme.

 

 

Arafat: Palestinezët do të vazhdojnë luftën e tyre për shtet të pavarur

 

Ramallah, 15 prill 2004 - Presidenti Jaser Arafat ka deklaruar sot (e enjte) se palestinezët do të vazhdojnë luftën e tyre për shtet të pavarur dhe do të insistojnë në të drejtën e refugjatëve palestinezë të kthehen në trojet e tyre në Izraelin e tashëm, njofton Rojter. Kjo deklaratë e Arafatit është reagimi i parë zyrtar pas deklaratës së presidentit Bush për mbështetjen e Izraelit të mbajë pjesë të Bregut Perendimor me çfarëdo marrëveshjeje paqësore.

 

Arafati, duket qartë i zemruar, nuk iu ka referuar drejtpërdrejt deklaratës së Bushit, që e ka transmetuar televizioni palestinez, por ka thënë: "Qeveritarët fanatikë izraelitë e kanë gabim dhe gabojnë edhe mbështetësit e tyre dhe ju e dini se në kë mendoj", ka thënë ai.

 

 

Britania ka refuzuar ofertën për zjarrpushim, të ofruar nga lideri i Al Kaidës

 

Londër, 15 prill 2004 - Britania ka refuzuar ofertën për zjarrpushim me vendet evropiane, të cilën e ka ofruar lideri i Al Kaidës, Osama bin Laden, me motivacion se armëpushimi me terroristët është "një absurditet", njofton AFP. Oferta për paqe vendeve evropiane me kusht të tërheqin trupat nga vendet muslimane, dhënë në një audiokasetë nga Bin Ladeni, është një "dredhi cinike", ka thënë zëdhënësi i Forin Ofisit.

 

 

Italia dhe Japonia e ripërsëritën përkushtimin për mbetjen e trupave të tyre në Irak

 

Bagdad, 15 prill 2004 - Italia dhe Japonia e ripërsëritën përkushtimin për mbetjen e trupave të tyre në Irak përkundër vrasjes së një pengu italian dhe rrëmbimit të 2 japonezëve tjerë.

Kryeministri italian Silvio Berluskoni tha se vrasja nuk do të ndikojë në përpjekjet paqësore të Italisë në Irak, ku janë vendosur rreth 3.000 trupa italiane, ndërsa kryeministri japonez Juniçiro Koizumi u zotua se nuk do t'i kthejë trupat në shtëpi.

Ndëkaq, në Manila, presidenti i Filipineve Gloria Arrojo tha se e ka pezulluar dërgimin e trupave shtesë në Irak, ndërsa nga Moska njoftohet se një aeroplan rus është nisur për të evakuar grupin e parë të specialistëve rusë nga Iraku.

 

 

SHBA dhe Britania kanë premtuar ndihmë financiare për rindërtimin e Qipros së bashkuar

 

Bruksel, 15 prill 2004 - Shtetet e Bashkuara dhe Britania kanë premtuar sot (e enjte) ndihmë financiare për të ndihmuar rindërtimin e Qipros së bashkuar në kuadër të një plani paqësor të Kombeve të Bashkuara, ku parashihet një referendum javën e ardhshme, më 24 prill, njofton Rojter.

 

Në një konferencë donatorësh, që pritet të mbahet për nxitjen e grekëve dhe turqve qipriotë të votojnë për bashkim, Uashingtoni ka premtuar se do të ofrojë 400 milionë dollarë për rindërtimin e kësaj ujdhese mesdhetare. Opinioni i turqve, është për bashkim, ndërsa ai grek është kundër dhe pritet të injorojnë trysninë politike dhe karrotën financiare, ngase janë të sigurt se gjithsesi do të bashkohen në Bashkimin Evropian më 1 Maj.

 

 

Dy ushtarë amerikanë janë vrarë në dy sulme të veçanta në Irak

 

Bagdad, 15 prill 2004 - Dy ushtarë amerikanë janë vrarë në dy sulme të veçanta gjatë 24 orëve të fundit në qytetet veriore irakiane Samara dhe Mosul, ka bërë të ditur sot (e enjte) zëdhënësi ushtarak amerikan, duke mos dhënë detaje të tjera, njofton Rojter. Sipas të dhënave më të reja, të pakten 93 ushtarë amerikanë janë vrarë gjatë aksioneve në luftimet në Irak gjatë prillit.

 

 

Në luftimet izraelito-palestineze janë plagosur 20 palestinezë

 

Gaza, 15 prill 2004 - Ushtarët izraelitë dhe palestinezët e armatosur kanë zhvilluar sot (e enjte) luftime në Gazën jugore, kur Izraeli ndërmori një sulm vetëm disa orë pasi presidenti Bush mbështeti largimin e Izraelit nga territori palestinez, njofton Rojter. Në këto luftime janë plagosur 20 palestinezë, përfshirë edhe plagosjen e 11 vetëve, që u goditën nga një predhë e shkrepur nga helikopteri, e cila ka goditur një ndërtesë, ku fshiheshin palestinezët e armatosur, kanë thënë burimet palestineze.

 

Ushtria izraelite ka thënë se predha nga helikopteri është shkrepur në një grup personash të armatosur, që po kontrabandonin armë në kufi me Egjiptin dhe që po luftonin kundër ushtarëve izraelitë.

 

 

Talibanët kanë vrarë me armë zjarri 7 persona në Afganistan

 

Kabul, 15 prill 2004 - Militantët e dyshimtë talibanë kanë vrarë me armë zjarri në Afganistanin Juglindor shtatë persona, njofton BBCWorld. Zyrtarët lokalë të sigurimit kanë thënë se ata janë ekzekutuar me pushkatim dhe ndër të vrarët janë edhe një grua dhe një fëmijë.

 

Ata janë vrarë pasi automjeti i tyre është ndalur afër kufirit pakistanez në provincën Paktika në juglindje të Kabulit. Të shtatë të vrarët kanë qenë nga një familje dhe të pakten tre syresh kanë qenë zyrtarë lokal qeveritarë.

 

 

Në qendër të Bagdadit kanë ndodhur dy shpërthime afër selisë amerikane

 

Bagdad, 15 prill 2004 Dy shpërthime, që janë dëgjuar sot (e enjte) në qendër të Bagdadit ishin të largdirigjuara, ka bërë të ditur një zëdhënës ushtarak amerikan, njofton BBCWorld.

 

Ai nuk dha detaje tjera, por një ushtar në selinë "Zona e gjelbër" të administratës amerikane, që ruhet shumë, ka thënë se shpërthimet janë të lidhura me ceremoninë në kopshtin e afërm zologjik. "Zona e gjelbër" ka qenë shpesh cak i sulmeve raketore dhe të mortajave të guerilës që lufton kundër ndërhyrjes amerikane.

 

 

Një peng italian vritet në Irak

 

Bagdad, 15 prill 2004 - Kryengritësit në Irak vranë njërin prej 4 pengjeve italiane që ata rrëmbyen kohët e fundit.
Ministri i jashtëm Franco Frattini konfirmoi vrasjen e 36 vjeçarit Fabricio Kuatroçi, një prej 4 rojeve italiane të sigurimit, të cilët u rrëmbyen të hënën në Irak.

 

Ai tha se ambasadori italian në Doha e kishte parë vrasjen në video kasetë. Ministri i jashtëm italian, Franco Frattini konfirmoi vrasjen disa orë pasi rrjeti televiziv Al-Xhazira njoftoi se kishte marrë një video-kasetë nga rrëmbyesit në të cilën tregohej vrasja.

Rrjeti televiziv arab Al-Xhazira e njoftoi me anë të një mesazhi nga rrëmbyesit, një grup që e quan veten Batalioni i Gjelbërt. Mesazhi përfshin edhe një kërcënim se në qoftë se Italia nuk përmbushte kërkesat e këtij grupi, edhe 3 pengjet e tjerë do të ekzekutohen.

 

 

Miler: FBI dhe CIA janë integruar thuajse në çdo nivel që prej 11 shtatorit 2001

 

Uashington, 15 prill 2004 - Drejtori i Byrosë Federale të Hetimeve, Robert Mueller, tha se agjencia e tij dhe agjencia tjetër e lartë e zbulimit amerikan, CIA, janë integruar thuajse në çdo nivel që prej sulmeve terrroiste të 11 shtatorit.

Duke dëshmuar dje para komisionit që po heton mbi sulmet e 11 shtatorit, zoti Mueller tha gjithashtu se pengesat ligjore që parandaluan bashkëpunimin e sektorëve të ndryshëm të FBI-së janë hequr.

Po dje, kreu i Agjencisë Qendrore të Zbulimit, CIA-s, tha se do të duhen edhe pesë vjet për të ngritur atë lloj shërbimi zbulimi që u nevojitet Shteteve të Bashkuara për t'u mbrojtur nga al-Qaida dhe grupe të tjera terroriste. Zoti George Tenet i bëri komentet gjatë dëshmisë që dha dje përpara të njëjtit komision.

 

 

Ambasadori amerikan në OKB mund të emërohet ambasador në Irak

 

Uashington, 15 prill 2004 - Mjetet amerikane të informimit njoftojnë se ambasadori i Shteteve të Bashkuara në OKB, Xhon Negroponte mund të emërohet ambasadori i ri amerikan në Irak.

Gazeta "New York Times" dhe agjencia Associated Press citojnë zyrtarë të administratës së presidentit Bush që nuk pranojnë të identifikohen, sipas të cilëve Negroponte është kandidati kryesor për këtë post kur sovraniteti të ketë kaluar në duart e irakianëve.

 

 

Bush mbështet planet e Sharonit

 

Uashington, 15 prill 2004 - Presidenti amerikan Xhorxh Bush i ka dhënë mbështetje të fuqishme planeve të kryeministrit izraelit, Ariel Sharon, për të tërhequr trupat dhe kolonët nga Gaza dhe pjesë të Bregut Perëndimor.

Duke folur pas bisedimeve me zotin Sharon në Shtëpinë e Bardhë, ai e quajti planin "një akt histroik dhe kurajoz" që mund t'i japë fund konfliktit të gjatë në rajon.

Zoti Bush tha gjithashtu se refugjatët palestinezë nuk duhet të vendosen në Izrael, kundërshtoi një rikthim në kufijtë e vitit 1949 të vendit, dhe ju afrua shumë pranë pranimit të pjesës më të debatueshme të planit të Sharonit - mbajtja e disa vendbanimeve të mëdha në Bregun Perëndimor.

Duket se zoti Bush i ka dhënë zotit Sharon atë që ka kërkuar si dhe ndryshuar hartën e përpjekjeve të ardhme për paqe në Lindjen e Mesme.

 

 

Bin Laden i ofron zjarrpushim Evropës

 

Bagdad, 15 prill 2004 - Një rrjet televiziv arab ka transmetuar një audiokasetë që thuhet se është nga Osama Bin Laden në të cilën ai i ofron Evropës zjarrpushim, nëse ajo ndalon sulmet ndaj myslimanëve.

Megjithatë në kasetë, të transmetuar nga kanali satelitor al-Arabiya, zëri njoftohet të thotë se zjarrpushimi nuk i shtrihet dhe SHBA-së.

Personi në kasetë gjithashtu betohet të hakmerret për vrasjen e udhëheqësit shpirtëror të Hamasit, Ahmed Sheik Jasin.

Autenticiteti i kasetës nuk mund të verifikohet menjëherë.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |