Përmbajtja:

• Presidenti Rugova priti ministrin flaman Tavernie

• Qeveria ka shqyrtuar raportin në lidhje me dëmet e shkaktuara nga trazirat e marsit

• Zyrtarët e Durrësit promovuan ofertën turistike në Prishtinë

• Banorët shqiptarë të pjesës veriore të qytetit të Mitrovocës kanë protestuar para Kuvendit komunal

• Vendkalim i ri kufitar Shqipëri-Kosovë

• Policia e UNMIK-ut dhe KFOR-i pohojnë se i kanë filluar hetimet kundër AKSH-së

• Këshilli i Sigurimit të OKB-së debatoi për gjendjen në Kosovë

• Admirali Xhonson theksoi mbështetjen e NATO-s për arrestimin e përgjegjësve të dhunës në trazirat e marsit

• Paraqitja publike e AKSH-së për NATO-n nuk paraqet ndonjë kërcënim tha admirali Xhonson

• Ministria e Ekonomisë dhe Financave thotë se suficiti i vitit të kaluar është 74 milionë euro

• Bler dhe Klinton në listën e dëshmitarëve

• Përfaqësuesit politikë serbë pajtohen me planin e Beogradit për Kosovën

• Sot në Maqedoni mbahen zgjedhjet e treta presidenciale me katër kandidatë

• Kleriku radikal shit Al-Sadër ka propozuar marrëveshje të paqes

• Shumë njerëz kanë vdekur nga përmbytjet në Afrikën Lindore

• Në perendim të Bagdadit janë gjetur 4 trupa të masakruar

• Militantët islamikë kanë vrarë 4 policë në incidente të veçanta në Rijad

• SHBA ofrojnë 10 milionë dollarë për kapjen e personit të dyshuar si strateg i Al-Kaidës

• Raport kritik i komisionit "11 shtatori"

• Bush i vendosur për Irakun

Presidenti Rugova priti ministrin flaman Tavernie

 

Prishtinë, 14 prill 2004 - Presidenti i Kosovës Ibrahim Rugova priti ministrin e Mjedisit të Flandrisë (Belgjikë), Xhef Tavernie, i cili në krye të një delegacioni ndodhet për një vizitë në vendin tonë. Ministri flaman e njoftoi Presidentin Rugova lidhur me disa projekte të përbashkëta me institucionet kosovare që kanë të bëjnë me mbrojtjen e mjedisit, planifikimit hapësinor etj. Presidenti Rugova në këtë takim foli për progresin e arritur në Kosovë, për zhvillimin ekonomik si dhe për nevojën e investimeve që do të mundësonin hapjen e vendeve të reja.

 

Poashtu ai foli rreth trazirave të marsit dhe për përpjekjet që po bëhen për sanimin e gjendjes.
 

Presidenti ritheksoi edhe më këtë rast se njohja më e shpejtë e pavarësisë së Kosovës do t'i përshpejtonte proceset e brendshme të Kosovës, integrimin në BE, në NATO, dhe miqësi me SHBA-të.

Ndërkaq, ministri i flaman, Tavernie, theksoi miqësinë e vjetër ndërmjet Flandrisë dhe Kosovës. Me këtë rast ai njoftoi Presidentin se kishte ardhur për të nisur një projekt konkret në Pejë, por edhe në komuna të tjera të Kosovës që ka të bëjë me mjedisin, planifikimin hapësinor dhe trajtimin e mbeturinave.

Duke folur për këtë projekt, ai tha se është shumë social, është për mjedisin, por ka mundësi të krijimit edhe të disa vendeve të punës. Ministri flamana u shpreh se mbështet çdo nismë që ka të bëjë me bashkëjetesën e komuniteteve në Kosovë, duke theksuar se zhvillimi ekonomik luan rol të veçantë në këtë drejtim.

Presidenti Rugova përshëndeti dhe mirëpriti projektin e mysafirëve flamanë për Pejën dhe për zhvillimin e bashkëpunimit të mëtejshëm midis Kosovës dhe Flandrisë.

Presidenti i Kosovës Ibrahim Rugova priti sot pasdite edhe një delegacion të Ministrisë së Punëve të Jashtme të Italisë, të kryesuar nga Xhovani di Vietri, ministër fuqiplotë - drejtor i përgjithshëm për shtetet e Evropës.

 

 

Qeveria ka shqyrtuar raportin në lidhje me dëmet e shkaktuara nga trazirat e marsit

 

Prishtinë, 14 prill 2004 - Në mbledhjen e sotme të rregullt Qeveria e Kosovës ka diskutuar veç tjerash për problemin e banorëve të fshatit Hade të Kastriotit dhe variantat që mund të zgjedhin fshatarët që duhet të zhendosen nga ky fshat. U tha se zhvendosja e tyre do të fillojë menjeherë.

Gjithashtu në takimin e sotëm qeveria ka shqyrtuar planin nacional për barazi gjinore, si dhe masat që duhet ndërmarrë për përmirësimin e politikës fiskale dhe tregtare në fushën e bujqësisë. Ndërkaq në mbledhjen e nesërme të Komisionit fiskal do të mbështetet nga qeveria sugjerimi që bujqit të ndihmohen duke u liruar nga tatimet doganore për pajisje bujqësore dhe lëndë të parë.

Qeveria ka shqyrtuar edhe raportin e paraqitur nga ministri Behxhet Brajshori në lidhje me dëmet e shkaktuara nga trazirat e marsit. Mirëpo, raporti nuk është përfundimtar sepse vlerësimet ende nuk kanë përfunduar për të gjitha komunat.

 

Zëdhënësja e Mimoza Kusari tha se qeveria me fondin prej 5 milionë eurosh prioritet do t'i japë ndërtimit të shtëpive dhe banesave dhe pastaj mund të hyjë në procesin e meremetimit të objekteve të tjera kulturore dhe fetare.

Qeveria ka miratuar në këtë mbeldhje edhe disa projektligje të cilat do t'i përcillen kuvendit për procedurë të mëtejshme.

 

 

Zyrtarët e Durrësit promovuan ofertën turistike në Prishtinë

 

Prishtinë, 14 prill 2004 - Përfaqësuesit qytetit të Durrësit promovuan sot në Prishtinë ofertën e tyre turistike për sezonin e sivjet shëm. Në këtë promovim zyrtarët e qarkut të Durrësit thanë se zona e tyre turistike është shumë atraktive për turistët e Kosovës, dhe sipas tyre kushtet e infrastrukturës janë përmirësuar dukshëm.

 

Niveli i sigurisë për turistët do të jetë i lartë, thanë mysafirët nga Durrësi, duke shtuar se janë bërë të gjitha përgatitjet që pritja e pushuesve nga Kosova të jetë më e mirë se viteve të kaluara.

Prefektja e Durrësit, Ingrid Shuli, tha se kosovarët tashmë i njohin bukuritë e plazhit të Durrësit si dhe mikpritjen e këtij qyteti. "Qeveria shqiptare ka vlerësuar turizmin si degë prioritare të ekonomisë dhe i kushton vemendje të posaçme", tha zonja Shuli, duke shtuar se po zhvillohen politika të tilla zhvillimi që plotësojnë kërkesat e çdo turisti.

 

Ajo tha se janë harmonizuar programet e disa ministrive, si për infrastrukturë, në ruajtjen e rendit, të shëndetit, mjedisit, sigurimin e lehtësisë së hyrjes së turistëve në Shqipëri nëpër pikat doganore etj.

Ndërkaq kryetari Bashkisë së Durrësit Lefter Koka tha se zona turistike do të zgjerohet dhe do të bëhet rritja e cilsisë së shërbimeve publike, ngritja e kontrollit të ushqimit, përmirësimi i gjendjes me ujë të pijshëm etj.

Drejtori i drejtorisë së policisë së qarkut të Durrësit Milto Korda përkujtoi se gjatë vitit të kaluar nuk është shënuar asnjë incident, duke premtuar se niveli i sigurisë edhe gjatë këtij viti do të jetë i lartë ngase janë marrë një sërë masash.

 

 

Banorët shqiptarë të pjesës veriore të qytetit të Mitrovocës kanë protestuar para Kuvendit komunal

 

Mitrovicë, 14 prill 2004 - Banorët shqiptarë të pjesës veriore të qytetit të Mitrovocës kanë protestuar sot në mënyrë të qetë në pjesën jugore të qytetit para Kuvendit komunal, duke kërkuar nga autoritetet vendore dhe administratës ndërkombëtare që t'u mundësohet kthimi i tyre nëpër shtëpi e benesa në pjesën veriore të qytetit.

 

Përfaqësuesit e kësaj proteste janë takuar me zv.kryetarin e komunës së Mitrovicës Mursel Ibrahimi, i cili ka thënë se kërkesa e protestuesve do t'u përcillet instancave më të larta për zgjidhjen e problemeve të tyre.

Para protestuesve është lexuar edhe një letër drejtuar institucioneve vendore dhe ndërkombëtare në të cilën kërkohet kthimi i të gjithë personeve të zhvendosur në pronat e tyre. Po ashtu kërkohet rindërtimi i shtëpive të tyre, lëvizja e lirë e të gjithë qytetarëve pa dallim feje e kombësie. Protesta ka kaluar pa incidente.

 

 

Vendkalim i ri kufitar Shqipëri-Kosovë

 

Tiranë, 14 prill 2004 - Qeveria shqiptare ka miratuar hapjen e një vendkalimi të ri kufitar me Kosovën, në Dobrunë të rrethit të Hasit.

Ky vendkalim i ri e çon në gjashtë numrin e këtyre pikave në gjatësinë prej 150 kilometrash të kufirit të përbashkët, katër prej të cilave të hapura pas konfliktit në Kosovë.

I njejti vendim pritet edhe nga UMNIK-u.

Por, në shumicën e këtyre pikave ka probleme serioze të funksionimit, pasi në to mungon infrastruktura më elementare.

Banorët dhe autoritetet vendore kërkojnë nga qeveria që këto pika të vihen në efiçensë të plotë, gjë që do të krijonte një shtysë për zhvillmin ekonomik të rajonit dhe integrimin ndërkufitar.

Qeveria shqiptare thotë se ka gati një strategji për përmirësimin rrënjësor të infrastrukturës dhe statusit të këtyre pikave, thuhet në një njoftim të BBC-së.

Pak kohë më parë është rehabilituar e vetmja pikë doganore mes dy vendeve, ajo e Morinit.

Kryeministri i Shqipërisë, Fatos Nano, thotë se tashmë kjo punë do të vazhdojë edhe për pikat e tjera në kufi edhe madje dhe për hapjen e pikave të reja si dhe për përmirësimin e statusit të tyre.

"Objekti më i rëndësishëm për ne mbetet modernizimi edhe i pikave të tjera të kalimit kufitar dhe doganor, pajisja e tyre me shërbime të plota dhe thellimi i flukseve të mallrave dhe të njerëzve," thotë zoti Nano.

Përmirësimi i infrastrukturës në pikat kufitare ka nisur dhe në anën tjetër të kufirit me financime të qeverisë së Kosovës dhe të donatorëve të tjerë.

 

 

Këshilli i Sigurimit të OKB-së debatoi për gjendjen në Kosovë

 

Nju-Jork, 14 prill 2004 - Këshilli i Sigurimit të OKB-së debatoi dje për gjendjen në Kosovë. Me një fjalim të paraqitur nga nënsekretari i përgjithshëm për operacionet e ruajtjes së paqes, Zhan Mari - Geno, janë kritikuar liderët shqiptarë si dhe njoftimet nxitëse dhe të njëanëshme mbi dy incidentet që çuan në shpërthimin e dhunës në Kosovë.

Zoti Geno tha se demonstratat që pasuan incidentet që fillimisht ishin spontane, por menjëherë u shfrytëzuan nga elementë të organizuar, qëllimi i të cilëve ishte dëbimi i serbëve nga Kosova dhe kërcënimi i forcave paqeruajtëse ndërkombëtare atje.

Zoti Geno tha se dhuna e ushtruar nga shqiptarët ndaj serbëve dhe romëve ishte e organizuar në shkallë të gjerë dhe me objektiva të caktuara. Ai tha se më shqetësuese ishte djegia e kishave ortodokse serbe dhe objekteve të tjera të feve të ndryshme, dy prej të cilave i përkisnin Uneskos. Zoti Geno tha se këto nuk ishin vetëm sulme kundër objekteve fetare, por kundër objekteve kulturore të Kosovës.

 

Ai tha se dhuna ka shënuar një kthesë prapa për procesin e kthimit të refugjatëve në Kosovë dhe shtoi se prej andej janë shpërngulur edhe banorë të tjerë.

Zoti Geno tha se megjithëse kryeministri i Kosovës Bajram Rexhepi bëri thirrje për t'i dhënë menjëherë fund dhunës, Qeveria e Kosovës lëshoi një deklaratë, në të cilën përqëndrohej në mbytjen e fëmijëve shqiptarë, deklaratë e cila nuk mbështetej në fakte.

Zoti Geno kritikoi gjithashtu shoqërinë civile të Kosovës, kur tha se nuk u mor përgjegjësi për shpërthimin e dhunës etnike. Zoti Geno vuri në dukje se ish-anëtarë të Ushtrisë Clirimtare të Kosovës morën pjesë në dhunë.
Ai bëri thirrje për marrjen e masave konkrete nga ana e udhëheqësve të Kosovës dhe popullit të Kosovës, për të shqyrtuar shkaqet që çuan në dhunën e motivuar etnikisht.

Në diskutimet që pasuan në KS zëvendësambasadori britanik Adam Tompson tha se nëse Kosova bëhet demokraci e vërtetë, liderët e saj duhet të mësojnë si të qeverisin. "Ne duhet të marrim parasysh që atyre t'u japim një rol më të madh në çështje si energjia, ekonomia dhe drejtësia. Ndërkaq politikanët e Kosovës duhet ta bëjnë të qartë se pranojnë këtë proces", tha Tomson. Ai i ka bërë thirrje UNMIK-ut që të ndërtojë partneritet të qëndrueshëm me institucionet e Kosovës në mënyrë që kjo situatë të tejkalohet.

Përfaqësuesi amerikan, ambasadori Xhejms Kanigen tha se dhuna në Kosovë nuk duhet të shpërblehet dhe nuk do të ketë shqyrtim të statusit në Kosovë pa një bindje nga vetë kosovarët se duan të ndërtojnë një shoqëri demokratike dhe tolerante.

Përfaqësuesja e Unionit Serbi - Mali i Zi Roksanda Ninçiq tha se ajo që po ndodh në Kosovë nuk është mbrojtje e të drejtave të komunitetit serb, por më tepër sigurim i mbijetesës fizike. Sipas saj në rrethana të tilla është vështirë të paramendohet zbatimi i konceptit të shoqërisë demokratike dhe shumetnike.

Ndërkaq ambasadori i Shqipërisë në OKB Agim Nesho shprehu shqetësime për strukturat paralele serbe në Kosovë.

"Ngjarjet e marsit në Kosovë ishin të dënueshme dhe jotolerante, por ato nuk duhet të keqpërdoren për t'i justifikuar strukturat paralele e as justifikim për politikën nacionaliste, apo për t'iu shmangur problemeve të brendshme politike", tha ambasadori i Shqipërisë.

 

 

Admirali Xhonson theksoi mbështetjen e NATO-s për arrestimin e përgjegjësve të dhunës në trazirat e marsit

 

Prishtinë, 14 prill 2004 - Komandanti Krahut Jugor të NATO-s, admirali Gregori Xhonson, ka theksuar dje në Prishtinë mbështetjen e NATO-s për institucionet e Kosovës dhe të UNMIK-ut për arrestimin e të gjithë përgjegjësve që shkaktuan dhunë gjatë trazirave të marsit. Veprimet e dhunshme janë të papranueshme dhe si të tilla ato nuk do të tolerohen nga NATO-ja, tha admirali Xhonson.

 

Ai ka çmuar ndarjen e pesë milionë euro nga Qeveria e Kosovës për riparimin e objekteve të shkatërruara të serbëve. Ai po ashtu ka inkurajuar udhëheqësit e Kosovës për rikthimin e besimit ndërmjet komuniteteve. Këto deklarata, admirali Xhonson i bëri në Prishtinë pas takimit me kryeministrin Rexhepi.

Komandanti i NATO-s për Evropën Jugore Gregori Xhonson është takuar me shefen e Zyrës amerikane në Prishtinë, Mersi Ris, ndërkaq gjatë ditës së djeshme është takuar edhe me komandantin e KFOR-it, gjeneralin Holger Kamerhof, me një delegacion të serbëve të Kosovës, si dhe ka vizituar kampin amerikan "Bondstill".

 

Paraqitja publike e AKSH-së për NATO-n nuk paraqet ndonjë kërcënim tha amdirali Xhonson

 

Prishtinë, 14 prill 2004 - Paraqitja publike e AKSH-së për NATO-n nuk paraqet ndonjë kërcënim, por dalja e saj publike në këtë kohë pas trazirave të marsit, dikton aksione që duhet ndërmarrë kundër saj. Kështu është shprehur dje në Prishtinë admirali Gregori Xhonson.

 

Ai tha se ishte i njoftuar me paraqitjen publike të AKSH-së në rajonin e Drenicës, duke vlerëuar se po të mos kalonte Kosova në një situatë të tillë çfarë është pas trazirave të marsit, paraqitja publike e AKSH-së, sipas tij, nuk do të paraqiste ndonjë kërcënim serioz. Me këtë rast ai ka paralajmëruar aksione kundër AKSH-së.

 

 

Policia e UNMIK-ut dhe KFOR-i pohojnë se i kanë filluar hetimet kundër AKSH-së

 

Prishtinë, 14 prill 2004 - Lidhur me paraqitjen publike të tre personave të maskuar në Drenicë që veten e identifikuan si pjesëtarë të Armatës Kombëtare Shqiptare (AKSH), policia e UNMIK-ut dhe KFOR-i kanë pohuar se i kanë filluar hetimet, pasi që sipas tyre AKSH paraqet një organizatë ilegale që vepron kundër rendit publik dhe që është shpallur tashmë nga ish-shefi i UNMIK-ut si organizatë terroriste.

 

 

Ministria e Ekonomisë dhe Financave thotë se suficiti i vitit të kaluar është 74 milionë euro

 

Prishtinë, 14 prill 2004 - Ministria e Ekonomisë dhe Fiancave të Kosovës thotë se suficiti i vitit të kaluar është 74 milionë euro. Kjo shifër është arritur pas nënshkrimit nga kryeadministratori Hari Holkeri për bartjen e fondeve nga viti viti 2003 në 2004 në shumë prej 240 milionë eurosh. Në fondet e bartura nuk kanë hyrë të gjitha mjetet e zotuara që kanë qenë në Qeverinë qendrore, u tha në një konferencë me gazetarë në Ministri.

Udhëzimet kanë paraparë që të bartin mjetet për punët e kontraktuara që duhet të vazhdojnë në kontinuitet në këtë vit në fondet e bartura, tha drejtoresha e a thesarit Hanife Statofci.

Ligji i ri mbi prokurimin ka siguruar pozitë shumë më të mirë për këtë vit të Departamentit të buxhetit të Kosovës, u shprehën zyrtarët e Ministrisë së Ekonomisë dhe Financave.

 

 

Bler dhe Klinton në listën e dëshmitarëve

 

Hagë, 14 prill 2004 - Ish-diktatori jugosllav, Sllobodan Millosheviq do që të thërrasë si dëshmitarë, kryeministrin britanik, Toni Bler dhe ish presidentin amerikan, Bill Klinton kur të paraqesë mbrojtjen e tij në Gjykatën e Hagës.

Lista e dëshmitarëve ka mbi 1600 emra, pesë herë më shumë se lista e dëshmitarëve të palës paditëse. Midis emrave të tjerë është dhe ish-sekretarja amerikane e shtetit, Madlin Olllbrajt. Ajo ka qenë ambasadore në OKB gjatë luftës së Bosnjës.

Dëshmitarë të tjerë të ftuar janë edhe ish sekretari i jashtëm britanik, Robin Kuk dhe homologi i tij francez, Yber Vedrin që së bashku drejtuan bisedimet për paqe në Francë në 1999.

Tani janë gjykatësit ata që do të vendosin se cilët dëshmitarë do të vinë në gjyq. Këshilltari ligjor i Millosheviqit tha se ka besim se Gjykata do të vendosë që disa dëshmitarë kyç të listës të thërriten.

 

 

Përfaqësuesit politikë serbë pajtohen me planin e Beogradit për Kosovën

 

Beograd, 14 prill 2004 - Disa përfaqësues politikë serbë të Kosovës janë takuar dje në Beograd me kryeministrin e Serbisë Vojisllav Koshtunicën dhe janë pajtuar plotësisht rreth politikës së Beogradit për Kosovën, duke mbështetur njëherit Projektvendimin për përcaktimin e planit për zgjidhjen politike të situatës në Kosovë.

 

Siç deklaruan pas takimit përafqësuesit serbë të Kosovës, plani për "autonominë territoriale", nënkupton mundësinë që serbët ta organizojnë administratën e vet në të gjitha fushat. Koshtunica i ka njoftuar ata se për projektplanin për zgjidhjen politike të Kosovës së shpejti do të debatohet në Kuvendin e Serbisë.

Në këtë takim me Koshtunicën kanë marrë pjesë kryetari i "këshillit nacional serb për veriun e Kosovës", Milan Ivanoviq, kryetar i ashtuquajturave "bashkësi të komunave dhe lagjeve të banuara me serbë në Kosovë , Marko Jakshiq, përfaqësuesja e "KNS të Kosovës qendrore", Rada Trajkoviq dhe Rangjel Nojkiq, kryetari i Lëvizjes së Rezistencës Serbe, Momçilo Trajkoviq, nënkryetari i SR për Kosovën, Milorad Laketiq, si edhe anëtarët e Koaliconit "Kthimi" Dragisha Kërstoviq, Sokol Gjorgjeviq dhe Oliver Ivanoviq.

 

 

Sot në Maqedoni mbahen zgjedhjet e treta presidenciale me katër kandidatë

 

Shkup, 14 prill 2004 - Sot në Maqedoni mbahen zgjedhjet e treta presidenciale në të cilat marrin pjesë katër kandidatë të katër partive politike. Rreth 1.695.000 qytetarë me të drejtë vote prej orës 7.00 të mëngjesit deri në orën 19.00 pritet të dalin në votime për të zgjedhur presidentin e ri të Maqedonisë, ku do të hapen 2973 vendvotime.

Zgjedhjet e treta presidenciale në Maqedoni janë të parakohshme pas vdekjes tragike të ish-presidentit Boris Trajkovski në një aksident ajror më 26 shkurt. Zgjedhjet do t'i ndjekin 300 vëzhgues të jashtëm dhe rreth 4000 nga vendi.

Rezultatet e para të zgjedhjeve pritet të shpallen në orët e vona të mbrëmjes, ndërkaq ato zyrtare 24 orë pas mbylljes së vendvotimeve.

 

 

Kleriku radikal shit Al-Sadër ka propozuar marrëveshje të paqes

 

Bagdad, 14 prill 2004 - Një emisar irakian, i caktuar nga Moktada al-Sadër, ka thënë sot (e merkurë) se kleriku shiit ka kërkuar prej tij t'ua paraqesë zyrtarëve amerikanë propozimet për marrëveshje të paqes, njofton Rojter. Mbështetësit e Sadrit qenë ngritur kundër forcave amerikane në pjesën jugore dhe qendrore të Irakut.

 

SHBA-të janë zotuar se do të vrasin apo do ta zënë Sadrin dhe do ta shkatërrojnë milicinë e tij. Për këtë qëllim kanë sjellë trupa shtesë në paralagjet e Naxhafit, ku besohet të jetë kleriku radikal. "Sajid Moktada ka bërë propozime pozitive për t'i dhënë fund krizës. Unë nuk mund të jap detaje. Ai e ka kuptuar se një konfrontim i armatosur nuk është në interesin e askujt", ka thënë Abdelkarim al-Anzi, emisar i klerikut Sadër.

 

 

Shumë njerëz kanë vdekur nga përmbytjet në Afrikën Lindore

 

Nairobi, 14 prill 2004 - Shumë njerëz kanë humbur jetën dhe qindra të tjerë kanë lënë shtëpitë e tyre nga përmbytjet në Afrikën Lindore, të shkaktuara nga shirat e rrëmbyeshme të disaditshme, njofton BBCnews. Të pakten 16 vetë kanë vdekur në Keni, në zonën e lumit Niando, ku kanë qenë përmbytjet më të mëdha.

 

Po kështu, të pakten 30 vetë janë mbytur në Xhibuti kur lumi Ambouli shpërtheu brigjet e veta në kryeqytet. Rreth katër mijë njerëz kanë ikur nga shtëpitë dhe janë shpërngulur në vende më të larta. Pesë persona kanë humbur jetën kur minibusi i tyre kishte rrrëshqitur nga rruga dhe kishte rënë në det afër qytetit bregdetar Mombasa.

 

 

Në perendim të Bagdadit janë gjetur 4 trupa të masakruar

 

Bagdad, 14 prill 2004 - Katër trupa të masakruar janë gjetur në perendim të Bagdadit, ka bërë të ditur një zyrtar i departmentit shtetëror amerikan, njofton BBCWorld. Trupat janë identifikuar, por ka spekulime se ata mund të jenë të kontraktuesve amerikanë, të zhdukur që kur autokolona e tyre me lëndë djegëse kishte rënë në një pritë javën e kaluar.

 

 

Militantët islamikë kanë vrarë 4 policë në incidente të veçanta në Rijad

 

Rijad, 14 prill 2004 - Militantë të dyshimtë islamikë kanë vrarë sot (e mërkurë) katër policë në incidente të veçanta në veri të kryeqytetit Rijad, njofton BBCWorld. Ata janë vrarë në një pikë kontrolli në rrugë që shpie në provincën Kasim pasi i kishin urdhëruar të ndalen. Sulmuesit kanë ikur me dy automjetet e vjedhura të policisë. Policia ka thënë se sulmuesit duhet të jenë të përzier në shkëmbimin e zjarrrit, që ndodhi të hënën në Rijad, ku u vranë një militant dhe një polic.

 

 

SHBA ofrojnë 10 milionë dollarë për kapjen e personit të dyshuar si strateg i Al-Kaidës

 

Uashington, 14 prill 2004 - Një zyrtar i Kombeve të Bashkuara në Bagdad thotë se personi që mendohet të jetë strategu i al-Qaidës, Abu Musab al-Zarqawi, ka shumë mundësi të jetë brenda, apo në afërsi të qytetit të trazuar të Falluxhës.

Shtetet e Bashkuara kanë ofrur 10 milionë dollarë si shpërblim për kapjen e al-Zarqawit, i cili dyshohet si organizatori i disa sulmeve të kryengritësve në Irak, duke përfshirë edhe shpërthimin e 17 marsit në një hotel të Bagdadit, ku u vranë 7 vetë.

 

 

Raport kritik i komisionit "11 shtatori"

 

Uashington, 14 prill 2004 - Komisioni i pavarur që po heton sulmet terroriste të 11 shtatorit 2001 në Nju Jork e Uashington, nxori një raport tepër kritik ndaj punës së agjencive të antikrimit në Shtetet e Bashkuara, gjatë periudhës para sulmeve.

Komisioni "11 shtatori" nxori një raport paraprak, ku vë para përgjegjësisë Departamentin e Drejtësisë dhe Zyrën Federale të Hetimeve që nuk e kishin terrorizmin ndër përparësitë më kryesore gjatë muajve para sulmeve të 11 shtatorit.

Një ditë para 11 shtatorit, Prokurori i Përgjithshëm, Xhon Ashkroft, refuzoi një kërkesë të FBI-së për më shumë fonde në përpjekjet kundër terrorizmit. Komisioni "11 shtatori" thotë se FBI-ja ishte e kufizuar në përpjekjet e saj për mbledhjen e të dhënave të zbulimit në lidhje me kërcënimet terroriste brenda Amerikës.

 

 

Bush i vendosur për Irakun

 

Uashington, 14 prill 2004 - Presidenti amerikan, Xhorxh Bush ka thënë se nuk ka ndonjë alternativë më të sigurtë në Irak përveç veprimit të vendosur, duke i përshkruar si të paimagjinueshme pasojat e ndonjë dështimi të Amerikës atje.

Në një konferencë të rrallë shtypi të transmetuar drejtpërdrejtë, zoti Bush tha se do të dërgonte më shumë trupa në Irak nëse kjo do të duhej për të vendosur lirinë dhe demokracinë.

Në seancën e pyetjeve dhe përgjigjeve që zgjati më shumë se një orë, presidenti Bush u përpoq të paraqiste një vendosmëri të qetë. "Shtetet e Bashkuara do të ndjekin kursin në Irak, tha ai. Transferimi i sovranitetit tek irakianët do të bëhet më 30 qershor sipas planifikimit. "

Nëse do të nevojiteshin më shumë trupa, Shtetet e Bashkuara do t'i dërgojnë ato, por zoti Bush tha se çdo krahasim me Vietnamin ishte i gabuar dhe i rrezikshëm.

Presidenti u pyet vazhdimisht nëse kishte bërë ndonjë gabim ose në Irak, ose në luftën kundër terrorit. Ai nuk dha ndonjë shembull. "A gaboi ai atëhere në mënyrën se si e paraqiti pozicionin e tij? Këtë i takon votuesve ta vendosin", tha ai.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |