KEK-u inkason 70 mijë Euro për katër orë

Gjilan, 14 prill 2004 / TN / Ilmi MUSLIU - Vebi Salihu, menaxher i KEK-ut në Gjilan thotë se nuk ka ndodhur asnjëherë më parë që për katër orë të inkasohen 70 mijë Euro. Borxhlinjtë i janë përgjegjur masovisht thirrjes për t`i shlyer obligimet për energjinë e shpenzuar.
Paralajmërimi se do të shkyqen nga rrjeti elektrik të gjithë konsumatorët të cilët nuk i kryejnë obligimet e tyre deri më 12 prill dhe atyre do t`iu publikohen emrat në mjetet e informacionit publik, duket se do të ketë efektin e dëshirueshëm. «Nuk na ka ndodhur ndonjëherë tjetër që nëpër sportelet e KEK-ut të ketë pasur kaq shumë njerëz sa sot» tha Vehbi Salihu. Brenda katër-pesë orëve janë inkasuar mbi 70 mijë Euro dhe kjo nuk ka ngjarë deri tani askund tjetër në Kosovë.
Sipas menaxherit të KEK-ut në Gjilan, brengosëse mbeten enklavat serbe, të cilat, as sot nuk i janë përgjegjur thirrjeve, megjithëse ai shpreson që ditëve të ardhshme të ndryshojë gjendja.
Vebi Salihu apelon te konsumatorët e Anamoravës që sa më shpejt t`i përmbushim obligimet që kanë, sepse tolerime nuk do të ketë më as për amvisni dhe as për kompani.