Përmbajtja:

• Presidenti Rugova priti ushtruesin e detyrës së PSSP-së, Çarlz Brajshou

• Kryeparlamentari Daci priti zv.kryeadministratorin Çarls Brajshou

• Sot në Prishtinë u debatua në temën "Për një axhendë të re për Kosovën"

• Bujqësia kosovare nuk gëzon masa subvencionuese

• KFOR-i shkurton orën policore në zonën e sigurisë në Mitrovicë

• Seminar për strategjinë e zhvillimit ekonomik të Kosovës

• Gjilan: Aerofotogrametria nuk është rast për të përvetësuar pronën shoqërore

• Këshilli i Sigurimit sot debaton për gjendjen aktuale në Kosovë

• Holkeri dhe udhëheqësit vendorë do të takohen për të shqyrtuar kthimin e mirëbesimit

• Komandanti i KFOR-it turk thotë se nuk janë të vërteta spekulimet se në Kosovë është tentuar të bëhet spastrim etnik

• Qeveria i dorëzon për miratim parlamentit të Kosovës Ligjin për komisionin e pavarur të mediave

• Insitucionet e Kosovës kanë mirëpritur vendimin e Holkerit për largimin nga detyra të drejtoreshës së AKM-së

• Alfred Moisiu për zgjedhje të lira e të drejta

• Drejtuesit e Muzeut Ushtarak në Beograd shkatërrojnë dy monumente unike të kulturës islame

• Beogradi përmes strukturave paralele organizon zgjedhjet presidenciale serbe edhe në Kosovë

• Në Maqedoni u përmbyll fushata elektorale, më 14 prill mbahen zgjedhjet presidenciale

• Nga Shqipëria u nis kontigjenti i tretë i komandove në Irak

• Në një sulm me bombë është vrarë një ushtar amerikan

• Presidenti izraelit ishte shënjestër e një "akti terrorist"

• Një helikopter amerikan Apash është rrëzuar në perendim të Bagdadit

• Janë liruar 8 inxhinierët rusë dhe ukrainas

• Bush sonte në Shtëpinë e Bardhë do të mbajë një konferencë për shtyp

• Nënpresidenti amerikan ka arritur sot në Pekin

• Pesë ushtarë rusë janë vrarë në Çeçeni

• Dy ushtarë amerikanë dhe 7 kontraktues janë zhdukur pas një sulmi në një autokolonë në Bagdad

• Pesë të vrarë në Moskë nga shpërthimi i bombës

• Në qendër të Bagdadit është vrarë një shofer irakian

• Një militant dhe një polic janë vrarë në një shkëmbim zjarrin në Rijad

• Të pakten 6 vetë janë vrarë gjatë një shkëmbim zjarri në Mogadishu

• Gjendje e qendrueshme në Irakun jugor dhe atë qendror

• Në Irak janë rrëmbyer tetë shtetas rusë

• Sharon tha se Izraeli do të mbajë pesë vendbanime në Bregun Perëndimor

• Bush tha se forcat amerikane do të qëndrojnë të vendosura në Irak

• Në Bagdad është arrestuar këshilltari kryesor i klerikut radikal Moktada Al-Sadër

Presidenti Rugova priti ushtruesin e detyrës së PSSP-së, Çarlz Brajshou

 

Prishtinë, 13 prill 2004 - Presidenti i Kosovës, Dr. Ibrahim Rugova, priti sot në një takim zëvendëskryeadministratorin e Kosovës, z. Çarlz Brajshou (Charles Brayshow), aktualisht ushtrues detyre i Përfaqësuesit Special të Sekretarit të Përgjithshëm (PSSP) në vendin tonë.

Në takim u bisedua për gjendjen aktuale në Kosovë dhe për perspektivën e vendit tonë. Ka shenja të përmirësimit të gjendjes pas trazirave të marsit, vlerësuan bashkëbiseduesit në këtë takim.

Presidenti Rugova vlerësoi pozitivisht fjalimin e shefit të UNMIK-ut Harri Holkeri në Kuvend, ku ai paraqiti pika konkrete për punë të përbashkët në mes të UNMIK-ut dhe institucioneve të Kosovës me qëllim të shtimit të efikasitetit të pushtetit.

 

 

Kryeparlamentari Daci priti zv.kryeadministratorin Çarls Brajshou

 

Prishtinë, 13 prill 2004 - Si të normalizohet jeta në Kosovë dhe të hapen perspektiva të reja të bashkëpunimit të institucioneve vendore dhe atyre ndërkombëtare, për një partneritet të vërtetë dhe funksional, ishte temë bisede e kryetarit të Kuvendit të Kosovës, Nexhat Daci, me zëvendësin e PSSP të OKB-së në Kosovë, Çarls Brajshou.

 

Në takim është shqyrtuar gjendja aktuale në Kosovë dhe janë piketuar masat të cilat duhen ndërmarrë për evitimin e pasojave të protestave të marsit dhe krijimin e besimit dhe të mirëkuptimit ndëretnik.

 

Është thënë se nuk duhet lejuar që pjesëtarët e përkatësisë etnike serbe ta braktisin Kosovën për shkaqe sigurie, por është thënë gjithashtu se serbët e Kosovës duhet të heqin dorë nga ndikimi i Beogradit dhe duhet të angazhohen për stabilitet dhe prosperitet të Kosovës.

Bashkëbiseduesit janë pajtuar që në funksion të arritjes së këtij objektivi të ndërmirren aktivitete të përbashkëta në terren. Kryeparlamentari Daci, ndërkaq është shprehur se duhet të fillohet me kthimin e përfaqësuesve serbë në në Kuvend dhe në Qeveri.

 

 

Sot në Prishtinë u debatua në temën "Për një axhendë të re për Kosovën"

 

Prishtinë, 13 prill 2004 - Në një tryezë të organizuar nga koalicioni i organizatave joqeveritare "Reforma 2015" sot në Prishtinë u debatua në temën "Për një axhendë të re për Kosovën". Morën pjesë drejtues të institucioneve të Kosovës, përfaqësues të administratës ndërkombëtare dhe analistë të ndryshëm.

 

Temat që u shtruan në këtë debati ishin se çfarë duhet ndryshuar pas trazirave të marsit, si duhet përcaktuar raportet mes UNMIK-ut dhe institucioneve të Kosovës etj.

 

Duke propozuar zgjidhje konkrete u tha se për çështjen e sigurisë duhet hapur ministrinë e rendit, zhvillimi ekonomik të bëhet përmes privatizimit që duhet të menaxhohet nga përfaqësuesit vendorë, për kthimin e serbëve të hapet një zyrë koordinuese pranë Zyrës së Presidentit dhe krahas kësaj duhet trajtuar edhe problemin e Mitrovicës.

Poashtu u tha se UNMIK-u duhet marrë rolin e një mekanizmi mbikqyrës dhe ta përgatisë Kosovën si një shtet funksional, kurse institucionet vendore duhet t'i marrin përgjegjësitë.

Kryeparlamentari Nexhat Daci, pasi përkrahu këto qëndrime, tha se nuk ka aktakuzë më të rëndë se një parlament për një mandat të vetin nuk mund të nxjerrë një ligj me të cilin i mbron qytetarët e vet.

 

Por Daci bëri kritika edhe ndaj UNMIK-ut sepse, sipas tij, administrata ndërkombëtare nuk ka asnjë alternativë për përcaktimet e Kosovës. "Mashtrohen ata që mendojnë se me djegiet e kishave nuk do të ketë etni të serbëve në Kosovë, sikurse që mashtrohen edhe ata që mendojnë se Kosova do të kthehet prapa", nënvizoi Daci në diskutimin e tij, duke u shprehur në mënyrë kritike edhe për punën e deritashme të Kuvendit.

Ndërkaq, Kan Ros nga UNMIK-u pasi theksoi domosdoshmërinë për bashkëpunim dhe partneritet, tha se miqtë e Kosovës në botë duke përfshirë edhe UNMIK-un, janë duke bërë shumë përpjekje për ta bindur bashkësinë ndërkombëtare se statusi i Kosovës duhet të zgjidhet dhe kjo duhet të bëhet së shpejti.

Në tryezë po marrin pjesë edhe përfaqësues të institucioneve vendore e ndërkombëtare, përfaqësues të forcave politike, si dhe analistë të ndryshëm.

 

 

Bujqësia kosovare nuk gëzon masa subvencionuese

 

Prishtinë, 13 prill 2004 - Masat stimuluese për zhvillimin e agrokompleksit kosovar janë shumë të ulëta, madje krahasuar edhe me shtetet përreth, siç është Maqedonia. Politika kredituese me afat të shkurtër dhe kamata shumë të larta prej 11-18 për qind gjithashtu është shumë e pavolitshme. Ndërkaq bujqësia kosovare praktikisht nuk gëzon masa subvencionuese.

 

Në rrjedhat bujqësore po reflektohet negativisht mungesa e masave konkrete në politikën fiskale, e ligjit themelor mbi pronën, si dhe mungesa e mjeteve për financimin e programeve të zhvillimit në këtë lëmë. Të gjitha këto kanë keqësuar gjendjen në agrar, megjithë shpresat se pikërisht bujqësia do të jetë një promotor i zhvillimit të Kosovës.

 

Këto ishin disa nga konstatimet e mbledhjes së Komisionit për Bujqësi, Pylltari dhe Zhvillim rural të Kuvendit të Kosovës, që u mbajt sot, e kryesuar nga Tomë Hajdari, kryetar, në të cilën tema themelore shqyrtimi ishin harmonizimi i punëve Parlament-Ministri e Bujqësisë, Pylltarisë dhe Zhvillimit Rural- drejtoratet përkatëse komunale, propozimi për mundësitë e ndryshimit të politikave fiskale në sferën e agrarit, problematika e pylltarisë në Kosovë, si dhe informata për përgatitjet rreth mbjelljeve pranverore.

Në mbledhje merrnin pjesë edhe përfaqësues të Ministrisë së Bujqësisë të Kosovës.

Duke ndier peshën e kësaj gjendjeje jo të favorshme, Ministria e Bujqësisë tashmë ka përgatitur një material për masat që duhet të ndërmerren për përmirësimin e politikës fiskale në lëmin e bujqësisë.

 

Këto masa, që së shpejti do të jenë në tryezë të shqyrtimit edhe në Qeverinë e Kosovës, që shoqëruar me zvogëlimin e doganave dhe një bashkërendim të angazhimeve të të gjitha subjekteve do të mund të ndikonin që ky lëmë i rëndësishëm të vihet në këmbë të mbara.

 

Përfaqësuesit e Fakultetit të Bujqësisë edhe me këtë rast premtuan se do të jenë krah i fortë në të gjitha synimet zhvillimore të agrokompleksit.

 

 

KFOR-i shkurton orën policore në zonën e sigurisë në Mitrovicë

 

Mitrovicë, 13 prill 2004 - Me qëllim të lehtësimit të qarkullimit të banorëve shqiptarë nga veriu në jug në qytetin e Mitrovicës, komanda e KFOR-i ka vendosur ta shkurtojë orën policore në zonën e sigurisë në këtë qytet nga ora 22 deri në orën 5 të mëngjesit.

Sipas një njoftimi, ky vendim është marrë për të lehtësuar qarkullimin e qytetarëveb, mirëpo nëse situata përkeqësohet KFOR-i do të vendosë për hapat e mëtejshëm që do të ndërmarrë.

Deri më tash ora policore në zonën e sigurisë në Mitrovicë është aplikuar nga ora 7 e mbrëmjes deri në orën 6 të mëngjesit.

 

 

Seminar për strategjinë e zhvillimit ekonomik të Kosovës

 

Prizren, 13 prill 2004 - Në organizim të Qeverisë së Kosovës në Prizren po i zhvillon punimet seminari njëditor me temën "Strategjia e gjithëmbarshme e zhvillimit ekonomik".

Në emër të Qeverisë, Besim Beqaj, koordinator i Paktit të Stabilitetit për Kosovën, propozoi hartimin e një plani për vizionin zhvillimor të ekonomisë së Kosovës. Ai tha se ekonomia e vendit ka stagnuar shumë.

Ali Jakupi, ministër i Tregtisë dhe Industrisë, paraqitit disa vërejtje rreth projektit të strategjisë zhvillimore ekonomike të Kosovës.

 

 

Gjilan: Aerofotogrametria nuk është rast për të përvetësuar pronën shoqërore

 

Gjilan, 13 prill 2004 - Projekti për rilevim aerofotogrametrik po pritet me interesim të madh nga qytetarët edhe në komunën e Gjilanit, meqë gjatë gjithë këtyre viteve ka pasur lëvizje të konsiderueshme të mexhdave dhe të titullarëve te pronave, ndërsa pronësia e tyre ka ngelur e padefinuar qartë në dokumetacioin kadastral.

Meqë nga terreni arrijnë njoftime për shenjëzim të pasaktë të ndonjë prone, Drejtoria për Gjeodezi, Kadastër, Pronë dhe Banim ua tërheq me kohë vëmendjen qytetarëve që të jenë të kujdesshëm dhe në asnjë mënyrë të mos bëjnë shenjëzime të pronave, të cilat nuk u përkasin atyre.

Aerofotogrametria nuk është një rast për të përvetësuar në mënyrë arbitrare pronat shoqërore, komunale apo publike dhe ata që provojnë ta bëjnë një gjë tillë, do të dështojnë, sepse nuk do të kenë mundësi për bartje kadastrale të pronësisë. Drejtoria përkatëse i ka në dispozicion gjendjet e mëparshme dhe nuk do të legalizojë asnjë keqpërdorim.

Alban Qerimi, ushtrues i detyrës së drejtorit në këtë Drejtori thotë se me kohë janë formuar grupet gjeodete, të cilat kanë marrë pjesë nëpër tubime publike me qytetarë, për t`i njoftuar ata sa më mirë me këtë proces. Gjatë punës në terren gjeodetët kanë identifikuar dhe vendosur pikat referente.

 

 

Këshilli i Sigurimit sot debaton për gjendjen aktuale në Kosovë

 

Nju-Jork, 13 prill 2004 - Këshilli i Sigurimit të OKB-së për herë të dytë brenda një muaji do të debatojë sot për gjendjen aktuale në Kosovë. Bëhet e ditur se debati do të zhvillohet pa praninë e përfaqësuesve të misionit të OKB-së. Zëdhënësi i këtij misioni ka thënë se raporti për gjendjen në Kosovë do të paraqitet nga Sekretariati i OKB-së.

 

Ai tha se UNMIK-u po punon në kompletimin e grupit për shqyrtimin e krizave, vendimi për themelimin e të cilit pasuan trazirat e muajit të kaluar që lanë pas vetes të vrarë e të plagosur dhe shumë dëme materiale.

Njoftohet se kah fundi i këtij muaji serkretari i përgjithshëm i OKB-së Kofi Anan do të raportojë për gjendjen në Kosovë para një seance të veçantë të Këshillit të Sigurimit, rapprt ky që do të përgatitet nga misioni i tij në Kosovë.

 

 

Holkeri dhe udhëheqësit vendorë do të takohen për të shqyrtuar kthimin e mirëbesimit

 

Prishtinë, 13 prill 2004 - Kryeadministratori i Kosovës, Hari Holkeri dhe udhëheqësit e Kosovës do të takohen së shpejti për të shqyrtuar mënyrat për kthimin e mirëbesimit ndërmjet komuniteteve pas trazirave të marsit, bëri të ditur zëdhënësi i UNMIK-ut, Xhef Billi. Për përkrahjen në parim të nismës së Holkerit përfaqësuesit shqiptarë dhe serbë kanë qëndrime të ndryshme.

 

 

Komandanti i KFOR-it turk thotë se nuk janë të vërteta spekulimet se në Kosovë është tentuar të bëhet spastrim etnik

 

Prishtinë, 13 prill 2004 - Komandanti i KFOR-it turk Sadullah Sadullahogllu ka vlerësuar se në Kosovë përsëri mbretëron qetësia dhe paqja, ndërkaq trazirat e fundit kanë qenë një spontanitet dhe asgjë tjetër, thotë ai.

 

Sipas tij, nuk duhet të komentohen provokimet e shumta të cilat vijnë nga jashtë, ngase nuk kanë të bëjnë më të vërtetën. Ai ka theksuar se për të ardhmen e Kosovës duhet të vendosin vetë qytetarët e saj, duke hedhur poshtë spekulimet se në Kosovë është tentuar të bëhet spastrim etnik.

 

 

Qeveria i dorëzon për miratim parlamentit të Kosovës Ligjin për komisionin e pavarur të mediave

 

Prishtinë, 13 prill 2004 - Qeveria do t'ia dorëzojë së shpejti për aprovim Parlamentit Ligjin për Komisionin e pavarur të mediave dhe transmetimin, ka bërë të ditur Mimoza Kusari, zëdhënëse e Qeverisë. Komisioni i pavarur i mediave që do të formohet në bazë të këtij ligji do të jetë i vetmi organ, i cili do të rregullojë dhe mbikëqyrë të gjitha aspektet e sistemit të transmetimit dhe zbatimin e politikës së transmetimit civil brenda Kosovës, thonë në Qeverinë e Kosovës.

 

 

Insitucionet e Kosovës kanë mirëpritur vendimin e Holkerit për largimin nga detyra të drejtoreshës së AKM-së

 

Prishtinë, 13 prill 2004 - Insitucionet e Kosovës e kanë mirëpritur vendimin e kryeadministratorit Hari Holkeri për largimin nga detyra të drejtoreshës së Agjencisë Kosovare të Mirëbesimit, Maria Fuçi.

 

Qeveria e Kosovës dhe subjektet e tjera këtë vendim të Holkerit e shohin të arsyeshëm dhe vlerësojnëse ky nuk duhet të jetë hap i fundit që duhet të ndërmerret nga ana e Holkerit për rifillimin e procesit të privatizimit në Kosovë.

Rreth 500 ndërmarrje në pronësi shoqërore e shtetërore presin t'i nënshtrohen procesit të privatizimit që vlerësohet shumë i rëndësishëm për zhvillimin ekonomik të Kosovës, i cili është një nga tetë standardet që duhet të përmbushen para fillimit të debatave për zgjidhjen e statusit final të Kosovës.

 

 

Alfred Moisiu për zgjedhje të lira e të drejta

 

Tiranë, 13 prill 2004 - Presidenti i Shqipërisë, Alfred Moisiu ka shprehur shprehur bindjen se klasa politike shqiptare do të gjejë zgjidhje për mbajtjen e zgjedhjeve të lira, të drejta dhe të pakundërshtueshme.

Moisiu ka shfrytëzuar një takim të tij në qytetin e Korçës me rastin e Pashkëve, për të shprehur shqetësimin lidhur me polemikat që vazhdojnë të shoqërojnë prej vitesh proceset zgjedhore në Shqipëri.

Por ai shprehu bindjen se klasa politike shqiptare do të gjejë zgjidhje për këto probleme.
Komuniteti ndërkombëtar i cilësoi si zhgënjyese zgjedhjet e fundit në Shqipëri, ato vendore të 2003.

 

Në një sulm me bombë është vrarë një ushtar amerikan

 

Bagdad, 13 prill 2004 - Në një sulm të sotëm me bombë heret në mengjes (e martë) kundër një konvoji amerikan është vrarë një ushtar amerikan dhe është plagosur një ushtar tjetër dhe një kontraktues civil, ka bërë të ditrur aramta amerikane, njofton Rojter. Në njoftim thuhet se konvoji udhëtonte nga qyteti Bakuba në Naxhaf dhe kishte rënë në një minë të vënë në skaj të rrugës në jug të Bagdadit. Të plagosurit janë dërguar në Naxhaf dhe janë në gjendje stabile.

 

 

Presidenti izraelit ishte shënjestër e një "akti terrorist"

 

Jerusalem, 13 prill - Presidenti izraelit, Moshe Katsav, ishte shënjestër e tre shtetasve arabë të arrestuar sot (e martë) në Hungari, të dyshimtë se kanë planifikuar një "akt tëerrorist", ka bërë të ditur radioja izraelite, njofton Rojter. Katsav po viziton Budapestin dhe do të marrë pjesë në përurimin e Memorialit të Holokaustit, që do të bëhet të enjten.

 

 

Një helikopter amerikan Apash është rrëzuar në perendim të Bagdadit

 

Falluxha, Irak, 13 prill - Një helikopter amerikan i tipit Apash është rrëzuar dhe është përplasur sot (e mërtë) në perendim të Bagdadit, kanë thënë dëshmitarët, të cilët kanë shtuar se ai është goditur nga zjarri tokësor gjatë luftimeve të ashpra në zonë. Ushtria amerikane ka thënë se s'ka informacion për këtë incident dhe për fatin e dy anëtarëve të ekipazhit. Dëshmitarët kanë thënë se helikopteri është rrëzuar në një fshat ndërmjet qytetit Falluxha dhe paralagjes së Bagdadit, Abu Ghraib.

 

 

Janë liruar 8 inxhinierët rusë dhe ukrainas

 

Bagdad, 13 prill 2004 - Zyrtarët rusë kanë thënë sot (e martë) se tre inxhinierët rusë dhe pesë inxhinierët ukrainas, që kryengritëst i kishin marrë peng në Irak, janë liruar, njofton BBCWorld. Ata punonin për një kompani energjetike ruse në riparimin e stacioneve energjetike në Bagdad, ku edhe ishin kidnapuar.

 

 

Bush sonte në Shtëpinë e Bardhë do të mbajë një konferencë për shtyp

 

Uashington, 13 prill 2004 - Presidenti amerikan Xhorxh Bush sonte në Shtëpinë e Bardhë, në terminin kryesor televiziv do të mbajë një konferencë për shtyp në të cilën do të flasë për gjendjen në Irak dhe për politikën amerikane në atë vend. Që nga fillimi i muajit në luftimet me rebelët irakianë janë vrarë mbi 70 ushtarë amerikanë.

 

 

Nënpresidenti amerikan ka arritur sot në Pekin

 

Pekin, 13 prill 2004 - Nënpresidenti amerikan Dik Çenei, ka arritur sot nga Tokioja në Pekin në vizitën e tij të parë në Kinë. Çenei gjatë tri ditëve të ardhshme me zyrtarët më të lartë kinezë duhet të bisedojë për problemin e Tajvanit, për programin koreaniverior bërtamor, për gjendjen e të drejtave të njeriut në Kinë dhe për tregtinë biltarale.

 

 

Pesë ushtarë rusë janë vrarë në Çeçeni

 

Moskë, 13 prill 2004 - Pesë ushtarë rusë janë vrarë, ndërkaq nëntë të tjerë janë plagosur në sulmin e mbrëmshëm ndaj një konvoji të tyre në jug të Çeçenisë, kanë bërë të ditur sot autoritetet ruse.

 

 

Drejtuesit e Muzeut Ushtarak në Beograd shkatërrojnë dy monumente unike të kulturës islame

 

Beograd, 13 prill 2004 - Vetëm disa ditë pasi është djegur xhamia në Beograd dhe ajo në Nish, drejtuesit e Muzeut Ushtarak në Beograd në mënyrë vandale kanë shkatërruar dy 'nishanë shehitë' të shekullit 15 e 16.

 

Drejtuesi i sektorit muzeologjik, koloneli Dragan Nikoliq, me lejen e drejtorit të Muzeut Ushtarak Sërbolub Miletiq dhe me ndihmën e dy punëtorëve, ka shkatërruar plotësisht nishanin nga fshati Borie e Bosnjës dhe me mbetjet e tij ka mbuluar gropat që kanë mbetur nga nxjerrja e tyre.

 

Siç shkruan gazeta "Danas" e Beogradit, në këtë mënyrë koloneli Nikoliq i ka qëruar hesapet me monumetetet që aty ndodheshin prej 44 vitesh në eksterierin e Muzeut Ushtrarak në Kalemegdan.

"Dy nishanët shehitë janë ekzemplarë unikë të këtij lloji të momumenteve islame dhe ekzemplarë të tillë nuk ka më as në Bosnjë", citon gazeta një ekspert të panjëjtësuar.

 

 

Beogradi përmes strukturave paralele organizon zgjedhjet presidenciale serbe edhe në Kosovë

 

Beograd, 13 prill 2004 - Komisioni zgjedhor i Serbisë ka publikuar udhëzimet për zbatimin e procedurës së zgjedhjeve presidenciale serbe në Kosovë, në të cilat, siç thuhet, u janë dhënë autorizime kryeshefave të rretheve, struktura këto paralele serbe, që të caktojnë vendvotimet.

Në këto udhëzime, sipas njoftimeve të mediave serbe, precizohet se zgjedhjet presidenciale të caktuara më 13 qershor, në Koosvë do të mbahen "në disa vendvotime në të cilat janë plotësuar kushtet e parapara me ligj", për zbatimin e zgjedhjeve dhe "sigurinë e të gjithë pjesëmarrësve dhe materialit zgjedhor".

 

 

Në Maqedoni u përmbyll fushata elektorale, më 14 prill mbahen zgjedhjet presidenciale

 

Shkup, 13 prill 2004 - Qytetarët e Maqedonisë do të votojnë më 14 prill për të zgjedhur presidentin e vendit. Rreth 1.7 për qind e qytetarëve me të drejtë vote duhet të vendosin se cilin nga katër kandidatët do të jetë president i ardhshëm. Kandidatët i kanë dhënë dje fund fushatës së tyre me mitingjet elektorale në disa nga qytetet kryesore të Maqedonisë.

Sot në Maqedoni është dita e heshtjes elektorale, ndërkohë që të gjithë shpresojnë për zgjedhje të lira dhe të drejta.

 

 

Nga Shqipëria u nis kontigjenti i tretë i komandove në Irak

 

Tiranë, 13 prill 2004 - Nga Shqipëria u nis kontigjenti i tretë i komandove në Irak prej 71 trupave, i cili do t'u bashkangjiteve forcave paqeruajtëse të aleatëve në luftën kundër terrrorizmit. Kështu ka bërë të ditur Ministria e Mbrotjes së Shqipërisë në Tiranë. Trupat shqiptare do të jenë në përbërje të divizionit 101 amerikan në misionin "Liria e Irakut".

 

 

Dy ushtarë amerikanë dhe 7 kontraktues janë zhdukur pas një sulmi në një autokolonë në Bagdad

 

Bagdad, 13 prill 2004 - Dy ushtarë amerikanë dhe 7 kontraktues janë zhdukur dje pas një sulmi në një autokolonë në perendim të Bagdadit, ndërkohë që vazhdojnë aktet e rrëmbimeve të të huajve, ka bërë të ditur sot (e martë) një komandant amerikan, njofton AP. Më shumë se 40 të huaj nga të pakten 12 vende, përfshirë edhe një person nga Misisipi, fati i të cilit nuk dihet, janë kidnapuar nga kryengitësit në ditët e fundit.

 

Pesë të vrarë në Moskë nga shpërthimi i bombës

 

Moskë, 13 prill 2004 - Nga shpërthimi i një bombe, e cila ka qenë e fshehur në një valixhe të lënë në një automobil në Moksë, janë vrarë pesë persona, në mesin e tyre edhe sulmuesi.

Policia për momentin nuk jep hollësi për identitetin e të vrarëve në automobil.

 

 

Në qendër të Bagdadit është vrarë një shofer irakian

 

Bagdad, 13 prill 2004 - Disa mortaja kanë goditur sot (e martë) qendrën e Bagdadit dhe kështu kanë vrarë një shofer irakian, ndërsa tymi i dendur shkonte lart mbi selinë e administratës amerikane në brigjet e lumit Tigër, që ruhet me forca të mëdha sigurimi, kanë thënë dëshmitarët, njofton Rojter. Njoftohet se ka pasur tri shpërthime mortaje, që kanë krijuar një krater të madh në rrugë.

 

 

Një militant dhe një polic janë vrarë në një shkëmbim zjarrin në Rijad

 

Riad, 13 prill 2004 - Një militant i dyshimtë dhe një polic janë vrarë në një shkëmbim zjarrin në kryeqytetin saudit, Rijad, njofton BBCWorld. Zyrtarët e ministrisë së Brendshme thonë se edhe katër policë sigurimi janë plagosur gjatë luftimeve në distriktin Al Fajha. Disa militantë kanë ikur, thonë ata.

 

 

Të pakten 6 vetë janë vrarë gjatë një shkëmbim zjarri në Mogadishu

 

Mogadishu, 13 prill 2004 - Të pakten 6 vetë janë vrarë gjatë një shkëmbim zjarri ndërmjet plaçkitësve dhe tregtarëve në tregun më të madh në Mogadishu, njofton BBCWorld. Gjatë luftimeve janë shkaktuar dëme në vlerë disa milona dollarë. Të vrarët kanë qenë tregtarë.

 

 

Gjendje e qendrueshme në Irakun jugor dhe atë qendror

 

Bagdad, 13 prill 2004 - Komandantë ushtarakë amerikanë në Irak thonë se sulme sporadike vazhdojnë kundër forcave të koalicionit në Falluxhah, por gjendja në pjesën më të madhe të Irakut qendror dhe atij jugor është e qendnrueshme.

Gjeneralët amerikanë Xhon Abizeid dhe Rikardo Sançez thanë të hënën se koalicioni është përsëri në kontroll në qytetet Kut, Nasirijeh dhe Hillah.

Gjenerali Sançez tha se pjesë të qyteteve Qerbela dhe Naxhaf mbeten nën ndikimin e milicisë së klerikut radikal shiit Moktada al-Sadër, megjithëse sipas disa njoftimeve, luftëtarë besnikë të klerikut Sadër janë tërhequr nga stacionet policore që mbanin në Naxhaf. Sançez tha se është misioni i forcave amerikane të kapin apo të vrasin Moktada al-Sadrin.

 

 

Në Irak janë rrëmbyer tetë shtetas rusë

 

Bagdad, 13 prill 2004 - Në kryeqytetin e Irakut, Bagdad, janë marrë peng nga militantët të paktën tetë shtetas rusë.

Ata janë pengjet e fundit në valën e rrëmbimit të të huajve prej kundërshtarëve të pushtimit amerikan të Irakut.

Rrëmbimi i tyre koincidon me lirimin e shtatë civilëve kinezë që u morrën peng të dielën.
Ndërkaq, nuk dihet fati i tre pengjeve japoneze, për të cilët më herët u njoftua se rrëmbyesit ishin gati t'i lironin.

 

 

Sharon tha se Izraeli do të mbajë pesë vendbanime në Bregun Perëndimor

 

Tel Aviv, 13 prill 2004 - Kryeministri izraelit Ariel Sharon thotë se vendi i tij do të ruajë kontrollin mbi të paktën pesë vendbanime të mëdha hebraike në Pregun Perëndimor. Zoti Sharon tha se vetëm ajo që ai e cilësoi si nsimë izraelite do të sigurojë të ardhmen e vendbanimeve të tilla.

Kryeministri izraelit e bëri këtë koment vetëm pak orë para se të nisej për në Washington për bisedime me Presidentin Bush mbi propozimin e Izraelit për t'u tërhequr nga Rripi e Gazës. Pritet që zoti Sharon të kërkojë mbështetjen e Shteteve të Bashkuara për planin e tërheqjes.

Ai tha se Izraeli do të tërhiqet nga Rripi i Gazës vetëm nëse dështon plani ndërkombëtar për arritjen e paqes midis Izraelit dhe palestinezëve. Mirëpo, palestinezët thonë se planet për tërheqjen nga Rripi i Gazës fshehin synimet izraelite për të mbajtur territor në Bregun Perëndimor.

 

 

Bush tha se forcat amerikane do të qëndrojnë të vendosura në Irak

 

Uashington, 13 prill 2004 - Presidenti amerikan Xhorxh Bush tha se forcat amerikane do të qëndrojnë të vendosura karshi vazhdimit të dhunës në Irak. Ai shtoi se aktet e dhunës janë vepër e pak njerzve, që duan të ndalojnë përparimin drejt demokracisë.

Ngjarrjet në Irak ishin në mëndjen e presidentit ndërsa ai festoi dje Pashkët në shtëpinë e tij në Teksas.

Për të dytin vit me radhë, presidenti amerikan kaloi një pjesë të kësaj feste në Fort Hood, një bazë ushtarake jo shumë larg fermës së familjes Bush.

 

 

Në Bagdad është arrestuar këshilltari kryesor i klerikut radikal Moktada Al-Sadër

 

Bagdad, 13 prill 2004 - Këshilltari kryesor i klerikut radikal mysliman Moktada Al-Sadër është arrestuar në Bagdad. Këshilltari Hasem al-Araxhi është arrestuar nga trupat amerikane deri sa po merrte pjesë në një takim me krerët e fiseve në një hotel të Bagdadit.

 

Një delegacion i klerikëve shiitë po bisedon me al-Sadrin, i cili gjatë javës së shkuar ka bërë thirrje për kryengritje të përgjakshme kundër koalicionin, ndërsa ushtria amerikane mbetet e vendosur në misionin e saj për ta vrarë ose arrestuar al-Sadrin.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |