Mitrovicë : Kryeshefi i Ekzekutivit, M. Pllana, ua ka bërë me dije anëtarëve të Bordit të Drejtorëve, se do të kërkoj llogari dhe përgjegjësi për kryerjen e obligimeve

Mitrovicë, 13 prill 2004 / TN / H. SLYA - Bordi i Drejtorëve të Administratës Komunale, kryesuar nga Mustafë Pllana, kryeshef i Ekzekutivit, pas emrimit të drejtorëve të drejtorive nga Kuvendi i Komunës, më 6 prill 2004, ka mbajtur mbledhjen e parë në përbërje të re.

Në këtë mbledhje, kryeshefi i Ekzekutivit, Mustafë Pllana, i ka njoftuar drejtorët e rinj të posaemruar (tre sish) dhe ata të riemrur (tetë sish) me punët që i presin në periodën e ardhshme, si dhe u ka folur atyre për përgjegjësitë dhe obligimet që kanë për organizimin e punëve në drejtorit që i udhëheqin.

Kryeshefi Pllana ka kërkuar nga drejtorët e drejtorive që të kenë një tjetër çasje dhe të përdorin metoda të tjera në realizimin e programeve të punës, në mënyrë që Bordi të mos mirret vetëm me kërkesa dhe parashtresa, por të realizojë objektivat e parapara me programin e punës.

Poashtu, kryeshefi i Ekzekutivit, Mustafë Pllana, ua ka bërë me dije anëtarëve të Bordit të Drejtorëve, se do të kërkoj llogari dhe përgjegjësi për kryerjen e obligimeve që kanë marrë përsipër, duke kërkuar njëkohësisht nga ata ligjshmëri, efikasitet dhe disiplinë në punë.

Kryeshefi i Ekzekutivit, Mustafë Pllana, drejtorëve të drejtorive të administratës të cilën ai e udhëheq, u ka folur edhe për domosdoshmërinë e ristrukturimit në aspektin funksional të hapësirës punuese në ndërtesën e Kuvendit të Komunës, duke theksuar se shërbimet nga fusha e kulturës dhe sportit, do të kalojnë në objektet përkatëse jashtë ndërtesës së Kuvendit të Komunës, me çka do të krijohen kushte më të mira pune për drejtoritë tjera.

Në fund, kryeshefi i Ekzekutivit të Kuvendit të Komunës, Mustafë Pllana, ka folur edhe për domosdonë e angazhimit dhe shfrytëzimit adekuat të potencilait kadrovik të punësuar nëpër drejtoritë ekzistuese, duke theksuar se mundësia për punësimin e kuadrove të nevojshme është shumë e kufizuar.