Përmbajtja:

• Holkeri e Rexhepi paraqitën planin për zbatimin e standardeve

• Daci ritheksoi në Pejë se nuk ka luhatje nga përcaktimet për pavarësi

• Qeveria e Kosovës diskutoi për vlerësimin dëmeve pas trazirave të 17 e 18 marsit

• KFOR-i për krijimin e një mjedisi të qetë e të sigurtë

• Nënkoloneli Xhonson tha se ora policore në Dardanë do të pezullohet kur situata të jetë plotësisht e qetë

• Kryetari komunës së Prishtinës vizitoi banesat e serbëve në lagjen Ulpiana

• Holkeri ka formuar një trupë për menaxhimin dhe inspektimin e krizave në Kosovë

• P.Uilliams: Statusi përfundimtar i Kosovës është pavarësia

• Shefi i UNMIK-ut Holkeri dhe kryeministri Rexhepi sot shpallin planin për plotësimin e standardeve në Kosovë

• AKSH dënon kërcënimet ndaj tre veprimtarëve të LDK-së

• Komisioni Evropian thekson se në Kosovë është arritur përparim në disa fusha por ngjarjet e fundit shënuan kthim prapa

• UNMIK-u themelon grupin për hetimin e ngjarjeve të fundit

• Finlanda ndoshta do ta shtyjë reduktimin e planifikuar për forcën e saj në kuadër të KFOR-it

• Kasof thotë se Shtetet e Bashkuara do të vazhdojnë të jenë arbitër ndërmjet serbëve dhe shqiptarëve

• Busek thekson nevojën për angazhim më të madh të institucioneve të Kosovës

• Në Prizren u hap qendra e dializës bashkëkohore

• Dje në fshatin Ruhot afër Pejës me nderime u bë varrimi i Ismajl Kelmendit

• Çoviqi kërkon një administrim ushtarak në Kosovë

• Pauell nuk do të certifikojë ndihmën financiare prej 100 milionë dollarëve për Beogradin

• Ministri i jashtëm shqiptar ka zhvilluar një bisedë telefonike me Nënsekretarin amerikan të Shtetit

• Mark Grosman tha në Beograd se SHBA-të mbeten të përkushtuara për Kosovën shumetnike

• Në Falluxha janë mbytur të paktën 3 persona

• Autoritetet e Sudanit kanë arrestuar liderin opozitar islamist Hasan al-Turabi

• Nga një shpërthim bombe kanë humbur jetën pesë ushtarë amerikanë

• Nga një shpërthim në Bakuba janë plagosur 12 vetë

• Ushtarët izraelitë kanë çmontuar një kibuc ebrait afër Hebronit

• Janë vrarë 5 ushtarë të koalicionit në një sulm me bombë afër Bagdadit

• Një minator bolivian ka hedhur veten në erë me dinamit në ndërtesën e Kongresit nacional në La Paz

• Gjatë tri ditëve të dhunës në Uzbekistan kanë humbur jetën 42 vetë

• Kondoliza Rajs do të dëshmojë publikisht para komisionit hetimor

• Në Irak vritet një ushtar amerikan

Holkeri e Rexhepi paraqitën planin për zbatimin e standardeve

 

Prishtinë, 31 mars 2004 - Shefi i UNMIK-ut Hari Holkeroi dhe kryeministri Bajram Rexhepi paraqitën sot para gazetarëve planin për zbatimin e standardeve për Kosovën. Holkeri tha se dokumenti, që përmban 125 faqe, tani më shumë se kurrë është i rëndësishëm, porse mund të ndryshohet. Plani për zbatimin e standardeve, tha Holkeri në vazhdim, paraqet një plan të hollësishëm në të cilin përcaktohet aksioni dhe politika e arritjes së standardeve të përcaktuara në këtë dokument.

Prej tetë standardeve deri më tash të përcaktuara, dy prej tyre mbeten të rishqyrtohen gjatë muajit të ardhshëm.

 

Standardi për kthimin e personave të zhvendosur dhe ai për lëvizjen e lirë të qytetarëve do të analizohen edhe njeherë për shkak të trazirave të para disa ditëve. U tha se gjatë rishqyrtimit të standardit për kthimin e të zhvendosurve pritet të përcaktohet edhe një afat për rindërtimin e të gjitha objekteve të shkatërruara gjatë trazirave të fundit në Kosovë. Poashtu u tha se përgjegjësit për trazirat do të ndiqen penalisht.

Holkeri u shpreh se standardet do të përmbushen në partneritet me Qeverinë e Kosovës, por ai shtoi se në hartimin e këtij dokumneti nuk kanë marrë pjesë të gjitahë abshëksitë etnike, por ai ka të bëjë me të gjitha.

Nga ana e tij, kryeministri Rexhepi tha se Qeveria është e përkushtuar që t'i përmbushë këto standarde, në mënyrë që në mesin e vitit 2005 të bëhet vlerësimi në përmbushjen e standardeve. Rexhepi tha se vetëm me një partneritet të barabartë mund të arrihet sukses. Njëherit ai ftoi përfaqësuesit serbë të kyçen në pocesin e përmbushjes së këtyre standardeve, sespse, sipas tij, 50 për qind e tyre kanë të bëjnë me mbrojtjen e komuniteteve etnike, e sidomos të atij serb.

Ndërkohë u tha se çdo gjashtë javë përfaqësues të SHBA-ve të BE-së, të Grupit të Kontaktit, të Misionit të OKB-së në Kosovë dhe të Qeverisë së Kosovës do të vlerësojnë progresin në përmbushjen e standardeve. Poashtu gjatë ditëve të ardhshme pritet të përcaktohen prioritetet në standardet që duhet të realizohen deri në vitin 2005.

 

 

Daci ritheksoi në Pejë se nuk ka luhatje nga përcaktimet për pavarësi

 

Pejë, 31 mars 2004 - Kryetari i Kuvendit të Kosovës Nexhat Daci vizizoi sot qytetin e Pejës ku bisedoi me udhëheqjen komunale për situatën aktuale pas trazirave të ditëve të kaluara. Për gjendjen aktuale në Pejë zotin Daci dhe deputetët që e shoqëronin e njoftoi kryetari i komunës Ali Laçi, i cili tha se në këtë komunë gjatë protestave të 17 marsit një person është vrarë dhe 20 të tjerë janë lënduar, ndërkaq janë djegur 20 të shtëpi të serbëve në fshatin Bellopojë.

Kryeparlamentari Daci, pasi konstatoi se qëndrimet e institucioneve të Kosovës janë unike, ai ritheksoi edhe në Pejë se nuk ka luhatje nga përcaktimet për pavarësi, as në përcaktimet e të gjithë qytetarëve që duan të jetojnë në Kosovë dhe se të gjitha minoritetet janë të mirërseardhura në shtëpitë e tyre.

"Nuk do të ketë lëkundje as në afatet e përcaktuara që i kemi, të institucioneve tona me bashkësinë ndërkombëtare. Përacktimet tona janë strategjike të një partneriteti të fuqishëm me bashkësinë ndërkombëtare", tha Daci, duke shtuar se në Kosovë një ka respekt të veçantë për NATO-n, KFOR-in dhe për bashkësinë ndërkombëtare në tërësi.

 

Ai theksoi se pas analizave në nivel komunal e qendror do të shihet se "ku gabuam ne në rrugën tonë". Ndërkaq, tha Daci, bashkësia ndërkombëtare le të vlerësojë vetë se ku gaboi ajo, në mënyrë që para zgjedhjeve të gjithë të jenë më produktivë në realizimin e detyrave që i kanë marrë.

 

 

Qeveria e Kosovës diskutoi për vlerësimin dëmeve pas trazirave të 17 e 18 marsit

 

Prishtinë, 31 mars 2004 - Në mbledhjen e sotme, Qeveria e Kosovës diskutoi për vlerësimin dëmeve në Kosovë pas trazirave të 17 e 18 marsit dhe për zhvendosjen e banorëve të fshatit Hade afër Pishtinës. Udheheqësi i Fondit të emergjencës, ministri Behxhet Brajshori e ka injoftuar qeverinë për menaxhimin e fondit emergjent dhe vlerësimin e dëmeve të shkaktuara para dy javësh dhe pastaj pritet që bilanci përfundimtar të bëhet i ditur në deri më 7 prill, kur do të jepen edhe vlerësimet përfundimtare të dëmeve të shkaktuara.

Sipas zëdhënëses së Qeverisë, Mimoza Kusari, procesi i riparimit të objekteve fetare e kulturore do të bëhet edhe nga eskpertë të UNESKO-s dhe të Këshilit të Evropës.

Ndërkaq lidhur me problemin e 64 familjeave të fshatit Hade, të cilat janë të rrezikuara nga rrëshqitja e dheut, ato do të zhvendosen në një lokalitet tjetër. Kjo do të bëhet sipas parametrave të Agjencionit Evropian të Rindërtimit. Qeveria ka ndarë 4 milionë euro për këtë qëllim dhe tani pritet organizimi i tenderit për ndërtimin e shtëpive për familjet e zhvendosura.

Kryeministri Rexhepi njoftoi se do të marrë pjesë në një konferencë për Ballkanin Perendimor në Tokio të Japoinisë dhe pastaj bashkë me Holkerin në një konferencë të Dublinit të vendeve të BE-së.

 

 

KFOR-i për krijimin e një mjedisi të qetë e të sigurtë

 

Prishtinë, 31 mars 2004 - KFOR-i thotë se dy javë pas trazirave situata duket të jetë e qetë në Kosovë. Mirëpo, zyrtarët e KFOR-it theksojnë se gjendja është shumë larg nga ajo para 17 marsit. Por, KFOR-i edhe më tutje vazhdon të jetë në gjendje gatishmërie.

 

Zyrtarët e KFOR-it njoftuan se paqeruajtësit gjatë dy javëve të fundit janë vënë në ndjekje të ekstremistëve të cilët kanë kryer aktet e dhunës kundër njerëzve të Kosovës, KFOR-it dhe UNMIK-ut.

Bëhet e ditur se disa persona të dyshuar për dhunën e 17-18 marsit janë paraburgosur. Ndërkohë KFOR-i angazhohet se do të veprojë parreshtur derisa nuk rivendoset një mjedis i qetë dhe i sigurtë për të gjithë qyetarët e Kosovës.

 

 

Nënkoloneli Xhonson tha se ora policore në Dardanë do të pezullohet kur situata të jetë plotësisht e qetë

 

Dardanë, 31 mars 2004 - Komandanti i kampit amerikan të KFOR-it "Montith" në Gjilani, nënkoloneli Riçard Xhonson vizitoi Dardanën, ku me udhëheqjen komunlae bisedoi për mosparaqitjen e serbëve në punë dhe mundësinë e pezullimit të orës policore.

Kryetari i komunës Shaip Surdulli e njoftoi kolonelin Xhonson me situanë politike dhe të sigurisë në komunën e Dardanës. Me këtë rast Surdulli e njoftoi nënkolonelin Xhonson se punëtorët serbë të administratës komunale nuk janë kthyer në punë. Ai tha se përgjegjësinë për këtë e ka marrë vetë zv/kryetari i dytë i komunës Ivan Stanojkoviq në një mbledhje të Komitetit të sigurisë.

Nënkoloneli Xhonson tha se për këtë çështje do të bisedojë me Stanojkoviq. Ai u interesua edhe për familjet e zhvendosura nga komuna pas protestave të 17 e 18 marsit. Zv/kryetarja e komunës Nexhmije Kallaba tha se për momentin nuk ka asnjë familje serbe të zhvendosur nga kjo komunë.

Në këtë takim u bisedua edhe për shkurtimin apo pezullimin e plotë të orës policore. Mirëpo, nënkoloneli Xhonson tha se ora policore do të pezullohet vetëm atëhere kur situata në komunë të jetë plotësisht e qetë.

Gjatë ditës së djeshme edhe komandanti i BSHL-së, gjenerali amerikan Rik Erlandson, vizitoi punktit shëndetësor të fshatit Kolloleq ët komunës së Dardanës, i banuar me popullatë serbe. Ai bëri përcjelljen e aktivitetit të mjekëve të ekipit mobil mjekësor të KFOR-it amerikan, të cilët së bashku me mjekët shqiptarë dhe serbë bënë kontrollimin mjekësor të qytetarëve të nacionaliteteve të ndryshme.

 

 

Kryetari komunës së Prishtinës vizitoi banesat e serbëve në lagjen Ulpiana

 

Prishtinë, 31 mars 2004 - Kryetari i Kuvendit Komunal të Prishtinës, Ismet Beqiri dhe përfaqësuesi i administratës ndërkombëtare Anil Vasisht, vizituan apartamentet e qytetarëve serbë në lagjen Ulpiana në Prishtinë, të cilat po meremetohen pas dëmtimeve që pësuan gjatë trazirave të 17 marsit.Ata u njoftuan për mbarëvajtjen e punimeve, të cilat kanë filluar ditë më parë.

Ndërkaq, sa i përket kishës ortodokse, gjithashtu të shkatërruar gjatë trazirave, Beqiri tha se për renovimin e saj janë të interesuara edhe institucionet ndërkombëtare, por më parë do të vlerësohen dëmet e shkaktuara.

 

 

Holkeri ka formuar një trupë për menaxhimin dhe inspektimin e krizave në Kosovë

 

Prishtinë, 31 mars 2004 - Shefi i UNMIK-ut Hari Holkeri ka nënshkruar dje një urdhëresë ekzekutive për formimin e një trupe për menaxhimin dhe inspektimin e krizave në Kosovë. Kjo trupë do të bëjë rishqyrtimin e zhvillimeve të 17 e 18 marsit dhe do të ketë mekanizmat për të paraparë edhe krizat e ngjashme që mund të ndodhin në të ardhmen. Ky mekanizëm do të udhëhiqet nga një gjykatës ndërkombëtar dhe do të përbëhet nga ekspertë ndërkombëtarë për menaxhimin e krizave të cilët do t'i emërojë vetë Holkeri.

Mekanazmi do të fokusohet në identifikimin e masave për të vendosur sigurinë dhe mobilizimin e policisë etj.

 

 

P.Uilliams: Statusi përfundimtar i Kosovës është pavarësia

 

Uashington, 31 mars 2004 - Profesori universitar amerikan Pol Uilliams, i cili ka qenë edhe këshilltar i delegacionit shqiptar në bisedimet e Rambujesë, thotë se ka vetëm një zgjedhje për statusin përfundimtar të Kosovës - një Kosovë plotësisht e pavarur me kufijtë e tanishëm, e cila të veprojë si një shoqëri shumetnike, pluraliste.

Bashkësia ndërkombëtare e ka kuptuar, thotë Uiliams, se qëndrimi "standardet para statusit" ka dështuar, pasi ka penguar zhvillimin politik në Kosovë gjatë katër viteve të fundit. "Për fat të keq, u desh të shpërthente dhuna, që Kombet e Bashkuara dhe Bashkimi Evropian të kuptonin se politikat e tyre ishin të dështuara dhe që Shtetet e Bashkuara të kuptonin se e kanë lënë në harresë Kosovën dhe se kanë shpërdoruar dashamirësinë që ka populli i Kosovës për Shtetet e Bashkuara", tha Pol Uiliams në një intervistë dhënë "Zërit të Amerikës".

 

Por, ai shpreson se do të ketë një rishqyrtim të politikës amerikane. "Amerikanët do të udhëheqin evropianët drejt një procesi më praktik, do të ketë një masë tranferimi të autoritetit dhe caktimin e një afati specifik kohor për pavarësinë", tha ai.

Siaps zotit Uiliams, "e vetmja mënyrë për të normalizuar situatën politike në Kosovë është të përparohet me shpejtësi drejt një lloj përcaktimi të statusit përfundimtar dhe të vendoset Kosova në një rrugë të ngjashme me atë të Sllovenisë, Kroacisë, Maqedonisë, pra pavarësi me mbështetje të fortë ndërkombëtare dhe garanci për sigurim për transformimin e kësaj shoqërie".

Ndërkaq duke komentuar pohimet se evropianëve se përparimi drejt caktimit të statusit përfundimtar do të përbënte shpërblim për dhunën, Uiliams tha se "në fakt kjo përbën shpërblim për elementët e moderuar, të cilët të bashkuar, ngritën zërin kundër dhunës, dhe kanë krijuar një fond për të rindërtuar kishat dhe banesat serbe".

"Statusi përfundimtar është e vetmja mënyrë për të mënjanuar ekstremistët. Vazhdimi i politikës së standardeve para statusit edhe për 2-3 vjet të tjera do të ishte shpërblim për dhunën pasi do të shtonte radhët e këtyre elementëve me pasues të rinj", nënvizon Uiliams, duke shtuar se "udhëheqja e Kosovës njëzëri ka treguar qëndrimin e saj të moderuar, duke dënuar dhunën, prandaj ajo duhet të shpërblehen tani".

Më tutje Pol Uiliams thekson se udhëheqja e Kosovës duhet të forcojë autoritetin e saj, të kufizojë veprimtarinë e ekstremistëve në Kosovë, dhe të mbajë në distancë Beogradin, pasi si rrjedhojë e regjimit nacionalist që është në pushtet atje, Beogradi do të kërkojë çdo arsye për të rivendosur autoritetin e tij në Kosovë. "Beogradi e përdor Kosovën dhe Malin e Zi për të larguar vëmendjen nga problemet e brendshme politike në Serbi. Dhuna në Kosovë i shërben këtij synimi të Beogradit", thotë ai.

"Ka vetëm një zgjedhje për statusin përfundimtar të Kosovës, një Kosovë plotësisht e pavarur me kufijtë e tanishëm, e cila të veprojë si një shoqëri shumetnike, pluraliste", thotë Uiliams duke shtuar se "nuk është e mundur që Kosova të ndahet, së pari si rrjedhojë e enklavave, dhe e dyta si rrjedhojë e shembullit që jep për Serbinë, Bosnjën, Maqedoninë dhe të gjitha vendet në rajon.

"Unë besoj se në Kosovë ekziston kapaciteti, i cili është treguar përballë sfidave gjatë dy viteve të fundit dhe se udhëheqësit e Kosovës do të bëhen anëtarë të përgjegjshëm të bashkësisë ndërkombëtare, po aq shpejt sa disa prej vendeve të tjera fqinje", tha Pol Uiliams në fund të kësaj interviste.

 

 

Shefi i UNMIK-ut Holkeri dhe kryeministri Rexhepi sot shpallin planin për plotësimin e standardeve në Kosovë

 

Prishtinë, 31 mars 2004 - Kryeadministratori Hari Holkeri dhe kryeministri Bajram Rexhepi sot shpallin planin për plotësimin e standardeve në Kosovë. Rexhepi tha se në këtë plan do të bëhen disa ndryshime me qëllim të thjeshtësimit të mëtutjeshëm dhe përmbushjes së standardeve deri në mesin e vitit 2005.

Sipas kryeministrit në kuadër të këtij procesi ka mundësi edhe për një riorganizim të pushtetit lokal, mirëpo çfarëdo tendence për decentralizim në baza etnike do të jetë plotësisht i papranueshëm, tha ai.

Pas trazirave të 17 e 18 marsit administrata e UNMIK-ut si edhe disa qarqe të tjera ndërkombëtare i kanë shtuar kërkesat për fillimin e procesit të decentralizimit të pushtetit, gjë që sipas kryeministrit të Kosovës, decentralizimi nuk është i nevojshëm në këtë fazë.

 

Ai tha se qeveria megjithatë krahas plotësimit të standardeve do t'i angazhojë disa ekpertë ndërkombëtarë që të propozojnë një model të decentralizimit, i cili nuk do të kishte për bazë konceptin e kantonizimit, por modelet evropiane.

 

 

AKSH dënon kërcënimet ndaj tre veprimtarëve të LDK-së

 

Prishtinë, 31 mars 2004 - "Sekretariati Vendimmarrës i Frontit Për Bashkim Kombëtar Shqiptar dhe Shtabi i Përgjithshëm i AKSH-së, shprehin keqardhjen e tyre lidhur me letrat kërcënuese drejtuar anëtarëve të Kryesisë së LDK-së në Besianë nga individë të papërgjegjshëm, të cilët nuk mund të kenë asnjë lidhje me FBKSH dhe AKSH", thuhet në një reagim të shpërndarë përmes e:mailit.

"Ne njohim mirë origjinën dhe frymën e qarqeve antikombëtare, parandaj dënojmë me forcë akte të tilla të paprecedent, ashtu siç kemi dënuar edhe më parë, duke hedhur poshtë me neveri insinuatat se, gjoja pas këtij veprimi kriminal qëndrojnë pjesëtarë të AKSH-së", thuhet në këtë reagim dhe theksohet se "në AKSH nuk mund të ketë asnjë luftëtar lirie, që për objektiv pune do të kishte shpërndarjen e paçavureve të tilla kërcnuese".

 

 

Komisioni Evropian thekson se në Kosovë është arritur përparim në disa fusha por ngjarjet e fundit shënuan kthim prapa

 

Bruksel, 31 mars 2004 - Në Kosovë është arritur përparim në disa fusha por ngjarjet e fundit shënuan kthim prapa thuhet në raportin vjetor për Ballkanin, që dje e bëri publik Komisioni Evropian.

Sipas zyrtarëve të BE-së dhuna në Kosovë është edhe një argument për të nënvizuar rëndësinë e fjalës stabilizim. Në këtë raport thuhet se BE-ja është e zhgënjyer posaçërisht me mosgatishmërinë e liderëve të Kosovës për të pranuar pjesën e përgjegjësisë për atë që ka ndodhur.

Raporti i Komisionit Evropian megjithatë nuk jep ndonjë shpresë të madhe për zhvillimin ekonomik të Kosovës. Mirëpo, në këtë raport nënvizohet se papunësia në Kosovë është e madhe dhe ajo ka rrezik të rritet e edhe mëtej.

 

Duke shpjeguar se si kanë ardhur deri te ky parashkimim pesimist për Kosovën Batli Grok, këshilltar për Ballkanin i komesionerit Kris Paten ka thënë se shkaqet për rritjen e papunësisë duhet të kërkohen në zvogëlimin e mjeteve financiare që vijnë nga diaspora dhe në zvogëlimin e pranisë së personelit ndërkombëtar që ka gjeneruar deri tash edhe zhvilimin e disa bizneseve në Kosovë.

 

Ai tha se zgjidhjen për këtë problem në Kosovë duhet kërkuar në stimulimin e ndërmarrjeve të vogla dhe të mesme, me investime në bujqësi dhe në vazhdimin e privatizimit, ndonëse privatizimi nuk pritet të krijojë menjëherë vende të reja pune në një afat të shkurtër.

 

Në raport po ashtu theksohet se strukturat paralele serbe ende nuk janë shpërbërë në Kosovë edhepse që në raportin e shkuar nga BE-ja ishte kërkuar një gjë e tillë. Nga kosovarët kërkohet edhe angazhim më i madh në luftë kundër krimit të organizuar dhe korrupsionit. Pastaj theksohet se me kujdes duhet të analizohet edhe roli i TMK-së. Partneriteti evropian i është afruar edhe Kosovës.

 

 

UNMIK-u themelon grupin për hetimin e ngjarjeve të fundit

 

Prishtinë, 31 mars 2004 - Kryeadministratori i Kosovës Hari Holkeri ka nënshkruar një urdhëresë ekzekutive për formimin e një trupe për menaxhimin dhe inspektimin e krizave në Kosovë, është bërë e ditur nëpërmjet një kumtese nga zyra e z. Holkeri.

 

Në këtë kumtesë thuhet se kjo grup që do të bëjë edhe hetimin e zhvillimeve të 17 e 18 marsit do të kryesohet nga një jurist ndërkombëtar.

 

 

Finlanda ndoshta do ta shtyjë reduktimin e planifikuar për forcën e saj në kuadër të KFOR-it

 

Helsiki, 31 mars 2004 - Finlanda ndoshta do ta shtyjë reduktimin e planifikuar për forcën e saj paqeruajtëse në kuadër të KFOR-it, duke pasur parasysh dhunën e fundit entike në Kosovë, ka thënë dje kryeministri Mati Vanhanen. Njëherësh presidentja Taria Halonen kishte shpallur se forca aktuale prej 800 ushtarësh do të reduktohej në 550 ushtarë finlandezë në Kosovë gjatë këtij viti.

 

 

Kasof thotë se Shtetet e Bashkuara do të vazhdojnë të jenë arbitër ndërmjet serbëve dhe shqiptarëve

 

Uashington, 31 mars 2004 - Drejtori i Projektit për Marrëdhënie Etnike me seli në Shtetet e Bashkuara të Amerikës, duke folur për trazirat e fundit në Kosovë, ka thënë se ato paraqesin një kthim prapa për të gjithë, për serbët, për shqiptarët, si dhe për komunitetin ndërkombëtar.

Duke komentuar një deklaratë të nënsekretarit amerikan për çështke politike gjatë vizitë së tij në Kosovë, z. Kasof ka thënë se Grosman kishte ndërmend të thoshte se Shtetet e Bashkuara të Amerikës do të vazhdojnë të jenë një prani e dobishme në Kosovë si një arbiter ndërmjet serbëve dhe shqiptarëve.

Sa u përket veçanërisht serbëve në Beograd ata po sillen sikur asgjë nuk u ndodhi shqiptarëve në vitin 1999 dhe po shpresojnë për një kthim në një situatë e cila do të ishte shumë e vështirë për t'u rregulluar, ka thënë z. Kasof për radion "Evropa e lirë". Ai ka nënvizuar se serbët kurrë nuk e kanë pranuar që ka pasur ngjarje të tmerrshme në vitin 1999.

 

Ndëkaq, sa u përket shqiptarëve, edhepse ata vetë ishin viktimë e spastrimit etnik apo të përpjekjeve për spastrim etnik në vitin 1999, nuk u aplikuan ato mësime në sjelljet e tyre ndaj serbëve, të cilët mbetën në Kosovë, por u tërhoqën duke trajtuar çështjen e pavarësisë, si diçka që do të zgjidhte problemet vetvetiu. Kështu sfida e vështirë për çdo palë është që ata vërtetë duhet të përballen me këto çështje, përndryshe do të vazhdojnë të jenë pre e lehtë e nacionalistëve nga të dyja anët, ka thënë Kasof.

 

 

Busek thekson nevojën për angazhim më të madh të institucioneve të Kosovës

 

Bruksel, 31 mars 2004 - Përfshirja më e madhe e Kosovës në bashkëpunimin rajonal dhe në iniciativat e Paktit të Stabilitetit për Evropën Juglindore ishte arsyeja e udhëtimit të koordinatorit të Paktit të Stabilitetit për Kosovë Besim Beqaj në Bruksel.

Erhard Busek, koordinator i Paktit të Stabilitetit për Evropën Juglindore ka theksuar nevojën për një angazhim më të madh të institucioneve të Kosovës që ngjarjet e fundit të mos ndikojnë negativisht në rajon.

Ndërkaq z. Beqaj ka kërkuar që Kosova të mbetet në axhendën rajonale. Sipas tij, injorimi i çështjeve ekonomike i procesit të privatizimit, integrimit dhe liberalizimin e tregut rajonal, i problemeve energjetike është faktor ndikues në stabilitetin e vendit.

 

 

Në Prizren u hap qendra e dializës bashkëkohore

 

Prizren, 31 mars 2004 - Në Prizren u bë hapja solemne e qendrës së dializës e cila posedon kushte bashkëkohore me një sipërfaqe prej mbi 1200 metra katror dhe 26 aparate. Mjekët thanë se kjo do të ndikojë shumë në përmirësimin e kushteve pasi numri i pacientëve që vuajnë nga dializa pas luftës është dyfishuar në këtë rajon.

 

Drejtori i Qendrës Spitalore të Prizrenit Muzafer Kalendari tha se realizimi i objektit të ri të qendrës të dializës është bërë me mbështetjen financiare të Ministrisë për Shëndetësi që për këtë qëllim dhuroi rreth 720 mijë euro.

 

 

Dje në fshatin Ruhot afër Pejës me nderime u bë varrimi i Ismajl Kelmendit

 

Pejë, 31 mars 2004 - Dje në fshatin Ruhot të Pejës me një ceremoni mortore u bë varrimi i drejtorit të Drejtoratit për Ekonomi në komunën e Pejës, Ismajl Kelmendi. Ndërkaq, më parë u mbajt një mbledhje komemorative në të cilën morën pjesë drejtues të Kuvendit Komunal, përfaqësues nga presidenca dhe drejtues të tjerë.

 

Me këtë rast u theksua se Ismajl Kelmendi ishte njëri ndër aktivistët më profesionistë dhe më të dalluar, i cili ka dhënë kontribut jo vetëm në zhvillim ekonomik të qytetit të Pejës, por të gjithë Kosovës.

Me punën dhe veprën e tij ai bëri gjithëqka që ishte e mundur për progresin e shoqërisë kosovare, tha kryetari i komunës se Pejës Ali Lajqi. Në emër të Presidentit Ibrahim Rugova, ngushëllime familjarëve u shprehi këshilltari i tij Berim Ramosaj.

 

Ndërsa, drejtuesit e Odës Ekonomike të Kosovës thanë se kanë humbur një mik dhe një dashamirës të madhe të zhvillimit ekonomik.

 

 

Çoviqi kërkon një administrim ushtarak në Kosovë

 

Beograd, 31 mars 2004 - Kryetari i të ashtuquajturës "Qendër koordinuese për Kosovën", Nebojsha Çoviq, pa bisedimeve me nënsekretarin amerikna të Shtetit Mark Grosman ka thënë se ai ka kërkuar që KFOR-i të marrë tërë pushtetin në Kosovë. Sipas Çoviqit, në Kosovë më nuk ekzistojnë institucionet e përkohshme dhe se asgjë tjetër nuk mund të bëhet derisa nuk çarmatosen të gjithë.

"Kosova është e pjekur për një administrim ushtarak, në të cilën do të bëhet çmilitarizimi i plotë. Dhe pastaj dhuna më nuk do të fitojë, as që do të ketë dhunë", ka thënë Çoviq, sipas të cilit me këtë çmilitarizim përfundimisht do të bëhej qërimi i hesapeve me kriminalitetin e organizuar dhe grupet gangstere në Kosovë.

 

Por, Çoviqi megjithatë pranon se kriminaliteti i organizuar në Kosovë është multietnik, ka thë ai për BBC, pas bisedimeve me nënsekretarin Grosman.

 

 

Pauell nuk do të certifikojë ndihmën financiare prej 100 milionë dollarëve për Beogradin

 

Londër, 31 mars 2004 - Për shkak të miratimit të djeshëm të ligjit për ndihmë të akuzuarve të Hagës në parlamentin e Serbisë, shkruan gazeta e Londrës "Fajnenshëll tajms", sekretari amerikan i Shtetit Kolin Pauell nuk do të certifikojë paketën e sivjeme prej 100 milionë dollarëve të ndihmës financiare për Beogradin.

Duke vlerësuar se skenari i tillë është grusht për qeverinë e Koshtunicës, gazeta citon edhe deklaratën e djeshme të nënsekretarit amerikan Mark Gromaman se kjo nuk do të thotë që ndihma nuk do të lejohet me vonesë.

Ndërkaq gazeta tjetër britanike "Dejli telegraf" thekson se ndihma nuk do të certifikohet, por edhe vlerëson se në bazë të ligjit të ri, taksapaguesit në Serbi do të financojnë gjykimin e Millosheviqit.

 

 

Ministri i jashtëm shqiptar ka zhvilluar një bisedë telefonike me Nënsekretarin amerikan të Shtetit

 

Tiranë, 31 mars 2004 - Ministri i Jashtëm shqiptar Kastriot Islami ka zhvilluar një bisedë telefonike me Nënsekretarin amerikan të Shtetit për Çështje Politike, Mark Grosman, gjatë vizitës që ai i bëri Kosovës.

Z. Grosman është shprehur se vizita e tij në rajon dëshmon dhe një herë angazhimin dhe vëmendjen që SHBA i kushtojnë Kosovës dhe Ballkanit Perëndimor në tërësi.

Nga ana e tij Ministri Islami, bëri të qartë qëndrimin e qeverisë dhe shtetit shqiptar, të cilët në bashkëpunim me UNMIK, përfaqësuesit e institucioneve të Kosovës, KFOR-in, etj, kanë dhënë kontributin e tyre për qetësimin e situatës.

 

Në mesazhet e tyre për zgjidhjen e çështjes së statusit, në themel qëndron bashkëjetesa multietnike në Kosovën e moderuar, respektimi dhe implementimi me shpejtësi i standarteve me qëllim diskutimin e statusit në një periudhë sa më të shpejtë.

Z. Grosman, shprehu dhe një herë falenderimet për rolin konstruktiv dhe kontributin e qeverisë shqiptare për politikën e saj rajonale dhe luftën pa kompromis kundër terrorizmit.

 

 

Mark Grosman tha në Beograd se SHBA-të mbeten të përkushtuara për Kosovën shumetnike

 

Beograd, 31 mars 2004 - Nënsekretari amerikan i Shteti Mark Grosman tha se autorët e dhunës së para dy javëve duhet të çohen para drejtësisë. Ai i bëri këto komente në Beograd në një takim me kryeministrin serb Vojisllav Koshtunica. Grosman ka thënë se SHBA-të mbeten të përkushtuara për një Kosovë shumetnike dhe plotësimit të standardeve, para zgjidhjes së statusit final.

Kryeministri serb Vojisllav Koshtunica gjatë bisedimeve me z. Grosman ka theksuar se me decentralizimin e Kosovës do të mundësohej siguria e serbëve të Kosovës.

Grosman në një konferencë për shtyp është shprehur se gjatë bisedave në Prishtinë dhe Beograd fuqishëm e ka dënuar dhunën e fundit në Kosovë. Ai ka thënë se gjatë bisedave me zyrtarët në Beograd ka fituar një bindje të thellë se ata dëshirojnë t'i përmbushin obligimet e tyre ndërkombëtare lidhur me bashkëpunimin me tribunalin e Hagës.
Nësekretari amerikan i shtetit ka thënë se në Uashington do t'i paraqesë raportin sekretarit Pauell dhe se do të theksojë se obligimet amerikane ndaj paqes, stabilitetit dhe prosperitetit në Ballkan ende janë shumë të rëndësishme.

 

 

Në Falluxha janë mbytur të paktën 3 persona

 

Falluxha, 31 mars 2004 - Irakianë të frustruar kanë tërhequr zvarrë sot (e merkurë) trupin e ndezur të një të huaji nëpër rrugët e qytetit Falluxha dhe i kanë hedhur benzinë një trupi tjetër të shtrirë, që ndizej në rrugë, njofton Rojter. Të paktën tre persona janë mbytur dhe pjesë të trupave të tyre të zhuritur janë varur në hunj afër automjeteve të tyre. Irakianët kanë hedhur gurë në trupat, që ende ndodheshin brenda në një nga amakinat të përfshirë nga flaka në këtë qytet të trazuar.

 

 

Autoritetet e Sudanit kanë arrestuar liderin opozitar islamist Hasan al-Turabi

 

Kartum, 31 mars 2004 - Autoritetet e Sudanit kanë arrestuar liderin opozitar islamist Hasan al-Turabi lidhur me komplotin për përmbysjen e presidentit Omar al-Bashir, njofton BBCWorld. Gjithashtu janë arrestuar edhe një numër politikanësh opozitarë dhe oficerë të armatës. Z. Turabi ka mohuar të jetë përzier partia e tij në komplotin në fjalë. Gruaja e tij ka thënë se ai është arrestuar gjatë natës.

 

 

Nga një shpërthim bombe kanë humbur jetën pesë ushtarë amerikanë

 

Bagdad, 31 mars 2004 - Një bombë ka shpërthyer sot (e mërkurë) nën një automjet ushtarak amerikan në perendim të Bagdadit dhe në këtë rast tragjik kanë humbur jetën pesë ushtarë amerikanë, ka bërë të ditur ushtria amerikane, njofton Rojter. Shpërthimi ka ndodhur kur automjeti ka shkelur mbi mjetin shpërthyes. Incidenti ka ndodhur në provincën Anbar, që përfshin qytetet Falluxha, Ramadi dhe ndonjë qytet tjetër, ku kryengritësit antiamerikanë janë asktivë.

 

 

 

Nga një shpërthim në Bakuba janë plagosur 12 vetë

 

Bakuba, Irak, 31 mars 2004 - Një makinë bombë ka shpërthyer sot (e merkurë) në qytetin Bakuba, në veri të Bagdadit dhe ka plagosur 12 vetë, ka bërë të ditur policia, njofton Rojter. Pesë nga të plagosurit janë truprojet të guvernatorit lokal, ndërsa 7 të tjerët janë civilë. Ende nuk dihet nëse ishte sulm vetëvrasës me autobombë apo makinë me bombë e parkuar. Nga shpërthimi janë dëmtuar disa makina.

 

 

Ushtarët izraelitë kanë çmontuar një kibuc ebrait afër Hebronit

 

Hebron, Bregu Perendimor, 31 mars 2004 - Ushtarët izraelitë kanë çmontuar sot (e merkurë) një kibuc ebrait afër qytetit Hebron në Bregun Perendimor, njofton Rojter. Ky është çmontimi i parë i një vendbanimi të paautorizuar para vizitës së kryeministrit izraelit, Ariel Sharon, në Uashkington. Çmontimi i vendbanimeve të pautorizuara, shpesh të pabanuara, është një nga kushtet e përcaktuara me marrëveshjen amerikane për paqe me palestinezët.

 

 

Janë vrarë 5 ushtarë të koalicionit në një sulm me bombë afër Bagdadit

 

Bagdad, 31 mars 2004 - Pesë ushtarë të koalicionit janë vrarë sot (e merkurë) në një sulm me bombë derisa ata po shkonin me makinë në perendim të Bagdadit, në provincën al-Anbar, ka bërë të ditur zëdhënësi ushtark amerikan, njofton Rojter. Ai s’ka mund të konfirmojë nacionalitetin e ushtarëve.

 

 

Një minator bolivian ka hedhur veten në erë me dinamit në ndërtesën e Kongresit nacional në La Paz

 

La Paz, 31 mars 2004 - Një minator bolivian ka hedhur veten në erë me dinamit të mbështjellë për brezi në ndërtesën e Kongresit nacional në La Paz, në shenjë revolte për pensionin e tij, njofton BBCnews. Eustaquio Picachuri, siç quhej i vetëvrari, i moshës 47-vjeçare, me këtë shpërthim, gjithashtu ka vrarë dy roje të sigurimit dhe ka plagosur edhe disa të tjerë.

 

 

Gjatë tri ditëve të dhunës në Uzbekistan kanë humbur jetën 42 vetë

 

Tashkent, 31 mars 2004 - Në luftimet ndërmjet forcave qeveritare dhe militantëve islamikë, që pasuan pas shpërthimeve të djeshme vetëvrasëse në Uzbekistan, sipas zyrtarëve janë vrarë 20 militantë islamikë dhe tre policë, njofton AP. Ndërsa, gjatë tri ditëve të dhunës në Uzbekistan kanë humbur jetën 42 vetë.

 

 

Kondoliza Rajs do të dëshmojë publikisht para komisionit hetimor

 

Uashington, 31 mars 2004 - Këshilltarja e Shtëpisë së Bardhë për Sigurimin Kombëtar, Kondoliza Rajs, do të dëshmojë publikisht para komisionit që po heton sulmet terroriste të 11 shtatorit 2001. Edhe Presidenti Bush e Nënpresidenti Cheney do të takohen në një sesion të përbashkët me dyer të mbyllura me dhjetë anëtarët e komisionit:

Presidenti thotë se komisioni ka një detyrë të rëndësishme dhe se Shtëpia e Bardhë po bashkëpunon plotësisht duke paraqitur dokumentet përkatëse, duke dhënë intervista me dyer të mbylluara dhe tani me dëshminë publike të zonjës Rajs.

 

 

Në Irak vritet një ushtar amerikan

 

Bagdad, 31 mars 2004 - Ushtria amerikane thotë se një ushtar amerikan u vra dhe një tjetër u plagos në një sulm me bombë në Bagdadin perëndimor. Sulmi ndodhi të martën pranë qytetit Ramadi, i cili pjesë e zonës se tensionuar të njohur si "Trekëndëshi Sunni".

Zyrtarë të ushtrisë thonë se një ushtar u vra të hënën dhe një tjetër u plagos në një sulm të ngjashëm pranë qytetit Al-Habaniaj, i cili shtrihet në të njëjtin rajon.

Në një incident tjetër, shefi i policisë në qytetin Hillah, në jug të Bagdadit, i shpëtoi një sulmi vetëvrasës, kur një person përplasi një makinë me shtëpinë e tij.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |