Përmbajtja:

• Holkeri i ka urdhëruar që sa më shpejt të bëhet evakuimi i banorëve të fshatit Hade

• Kryeparlamentari Daci vizitoi sot qytetin e Ferizajit dhe të Gjilanit

• Institucionet duhet të kenë më shumë mirëkuptim për Akademinë e Kosovës

• Tim Xhuda: Pavarësia e Kosovës është pjesë e zgjidhjes dhe nuk mendon se kjo gjë është në dyshim

• Forcat e KFOR-it filluan në rajonin e Mitrovicës operacionin për zbulimin e personave të implikuar në trazira

• Nga rajoni i Klinës deri më tash nga 135 të zhdukur janë kthyer vetëm gjashtë kufoma

• Mospajtime rreth emërimit të zëvendësmenaxherit të ri në aeroportin e Prishtinës

• Rreth 6.000 banorë të lagjes së Spitalit në Prishtinë tash 15 ditë janë pa ujë të pijshëm

• Në Albanik është arrestuar një serb i dyshuar për pjesëmarrje në sulmin e 24 marsit

• Komandanti i KFOR-it Kamerhof dhe ministri serbo-malazez i Mbrojtjes u takuan afër Merdarit

• Sot në qytetin Il Sen-Deni, afër Parisit, fillon Festivali kushtuar kulturës së Kosovës

• Grosman bisedon në Beograd me autoritetet serbe për Kosovën

• Hajdaraga në Moskë bisedoi me Llavrovin

• Shqiptarët e Amerikës protestojnë kundër Kryeministrit Nano

• Burzan: Unioni Serbi-Mali i Zi nuk do të mbijetojë

• Militantët islamikë kanë vrarë dy ushtarë pakistanezë

• Në një shpërthim në Uzbekistan kanë humbur jetën 3 policë dhe një fëmijë

• Vritet kandidadit tamil për zgjedhjet e së premtes së ardhshme

• Kontrollori i marinës ka fajësuar ushtrinë për një incident, kur patën humbur jetën deri në 10 marinsa

• Forcat filipinase kanë evituar një sulm me bombë në caqet civile si në sulmet në Madrid

• Presidenti Bush u uroi zyrtarisht 7 vendeve mireseardhjen në NATO

• Forcat amerikane marrin përgjegjësinë për vrasjen e dy gazetarëve irakianë

• Arrestohen dy të dyshuar për sulmet

• Anan shkarkon koordinatorin e OKB-së për siguri

• Policia e Londrës ka arrestuar 8 persona të dyshimtë për përgatitje të sulmeve terroriste

• Në Sudan janë arrestuar disa opozitarë dhe oficerë për përpjekje për grushtshtet

Holkeri i ka urdhëruar që sa më shpejt të bëhet evakuimi i banorëve të fshatit Hade

 

Prishtinë, 30 mars 2004 - Kryeadministratori i Kosovës Hari Holkeri i ka nënshkruar një vendim ekzekutiv për institucionet e përkohshme vetëqeverisëse të Kosovës që menjëherë të implementojnë planin për evakuimin e banorëve të fshatit Hade të Kastriotit (Obiliq).

 

Z. Holkeri i është drejtuar policisë ndërkombëtare dhe KFOR-it që me përkrahjen e TMK-së të ofrojë ndihmën e nevojshme për evakuim. Komuna e Kastriotit në bashkëpunim me Ministrinë e Shërbimeve Publike ka hartuar planin për evakuimin e 300 banorëve nga zonat e rrezikuara.

 

Institucionet e Kosovës kanë ndarë 4 milionë euro për këtë qëllim. Institucioneve vendore adminisrtatori Holkeri u është drejtuar nëpërmjet zyrës së kryeminmistrit ku ka kërkuar që deri më 2 prill të kryhet evakuimi dhe për rrjedhën e procesit rregullisht të njoftohet UNMIK-u.

 

Mirëpo banorët e fshatit Hade nuk pajtohen me largimin nga shtëpitë e tyre përkundër vendimit që është nënshkruar nga kryeadministratorin Hari Holkeri.

Banorët e kësaj ane thonë se nuk dinë ku të shkojnë, duke shtuar se pas gjithë këtyre viteve që kanë investuar në shtëpitë e tyre, është mjaft e vështirë të evakuohen. Sipas tyre kjo është në interes të KEK-ut.

Kryetari i Komunës së Kastriotit, Ismet Hashani thotë se i kupton plotësisht shqetësimet e banorëve të fshatit Hade, sepse përvoja e kaluar tek ata është e hidhur me KEK-un.

 

 

Kryeparlamentari Daci vizitoi sot qytetin e Ferizajit dhe të Gjilanit

 

Ferizaj/Gjilan 30 janar 2004 - Kryeparlamentari Nexhat Daci, bashkë me një delegacion të Kuvendit të Kosovës, vizitoi sot qytetin e Ferizajit dhe të Gjilanit. Daci në Ferizaj bisedoi me udhëheqjen e komunës për situatën aktuale.

 

Ai me këtë rast është shprehur se të drejtat e minoriteteve nuk kanë alternativë, sikurse nuk ka alternativë as pavarësia e Kosovës. Daci tha se në Kosovë ka vend për të gjithë kosovarët dhe të gjithë duhet të jenë përgjegjës ndaj Kosovës.

Ndërkaq për situatën aktuale në komunën e Ferizajit dhe për ngjarjet e 17 e 18 marsit Dacin e njoftoi njeriu i parë i komunës Adem Salihaj. Ai tha se do të punohet bashkarisht me Kuvendin e Kosovës që të ndërtohen me sukses proceset.

Daci gjatë qëndrimit në Ferizaj vizitoi edhe kishën ortodokse në të qytetit.

Ndërkaq, delegacioni i Kuvendit të Kosovës në Gjilan bisedoi me udhëheqjen komunale, e cila e njoftoi për gjendjen aktuale pas protestave të 17 e 18 marsit. Me këtë rast Daci bashkë me anëtarët e delegacionit vizitoi edhe kishën ortodokse dhe disa shtëpi të dëmtuara gjatë trazirave dhe bisedoi me disa përfaqësues serbë.

 

Daci tha se të gjitha dëmet do të sanohen, ndërkaq policia dhe KFOR-i do t'u ofrojnë siguri për të gjithë banorët. Daci u tha serbëve kurrë dhe askush nuk mund të marrë pronën e huaj. "E grabitura është e nemun dhe për këtë do të keni mbrojtje ligjore", tha Daci.

 

 

Institucionet duhet të kenë më shumë mirëkuptim për Akademinë e Kosovës

 

Prishtinë, 30 mars 2004 - Kryetari i Kuvendit Komunal të Prishtinës, Ismet Beqiri, vizitoi sot Akademinë e Shkencave dhe Arteve të Kosovës, dhe përgëzoi kryetarin e Akademisë, Rexhep Ismajlin, me rastin e pranimit në Federatën e Akademive të Evropës ditë më parë në Bruksel.

Z.Beqiri premtoi ndihmën e komunës për ndërtimin e një objekti të ri të Akademisë së Shkencave dhe Arteve të Kosovës, por njëherit kërkoi që edhe Qeveria e Kosovës të bëjë më shumë në këtë drejtim. Ai u shpreh se institucionet përgjegjëse të kulturës duhet të ndihmojnë më shumë Akademinë e Shkencave dhe Arteve të Kosovës.

 

Beqiri theksoi se është e pakuptimtë që Akademia të mbijetojë me një buxhet të vogël dhe fare simbolik. Akademia është sinonim i shtetit, tha Beqiri, duke shpresuar në mirëkuptimin e organeve përkatëse që institucioni ynë më i lartë shkencor të ketë mundësi, hapësirë dhe kushte minimale për veprimtarinë e saj shkencore.

Nga ana e tij, akademik Rexhep Ismajli, pasi falendëroi kryetarin e komunës për interesimin dhe ndihmën e vazhdueshme, kërkoi nga Qeveria ndryshimin në qasjen e saj ndaj kulurës. "Mendoj se institucionet një qëndrim tjetër duhet ta kenë për veprimtarinë shkencore, sidomos për të rinjtë. Investimi tek të rinjtë, të cilët janë e ardhmja e një vendi, është shumë i vogël dhe jo gjithmonë drejt i orientuar", tha akad. Ismajli.

Në fund të takimit të dy bashkëbiseudesit dënuan dhunën e shfaqur gjatë protestave të fundit.

 

 

Tim Xhuda: Pavarësia e Kosovës është pjesë e zgjidhjes dhe nuk mendon se kjo gjë është në dyshim

 

Pragë, 30 mars 2004 - Duke folur për pasojat që do të kenë zhvillimet e fundit për të ardhmen e Kosovës, analisti anglez Tim Xhuda thotë se "kjo është një kambanë alarmi për politikanët serbë dhe politikanët shqiptarë, për të vepruar në mënyrë që të bëhet e mundur që radikalët të mos marrin situatën në kontroll për ta keqësuar më tej".

 

Njëkohësisht, thotë ai, "kjo do të shërbejë edhe për ndërkombëtarët që të fillojnë të mendojnë seriozisht për të ardhmen e Kosovës".

Ndërkaq, duke folur për zgjidhjen e situatës aktuale në Kosovë, analisti Xhuda tha për radion "Evropa e lirë" se momentalisht duhet të fillojnë negociatat formale për çështjen e statusit, por ai mendon se duhen konsideruar seriozisht opsionet që ekzistojnë.

 

"Mendoj se pavarësia është pjesë e zgjidhjes dhe nuk mendoj se kjo gjë është në dyshim. Por, çështja është se çfarë lloj pavarësie, si do të jetë organizimi i brendshëm në Kosovë, ç'mbrojtje do të ketë për minoritetet. Këto gjëra nuk ka dyshim se duhen shqyrtuar dhe konsideruar seriozisht", thotë Xhuda.

Sa i përket çështjes së minoritetit serb në Kosovë, analisti Tim Xhudanuk thotë se serbët "nuk besojnë se kryeqyteti i tyre është Prishtina dhe nuk duan të jenë pjesë e një shteti ku shumica janë shqiptarët".

 

 

Forcat e KFOR-it filluan në rajonin e Mitrovicës operacionin për zbulimin e personave të implikuar në trazira

 

Mitrovicë, 30 mars 2004 - Përgjegjësit e KFOR-it në Mitrovicë kanë paralajmëruar fillimin e aksionit në bashkëpunim me policinë me qëllim të identifikimit të të gjithë të dyshuarve, të cilët janë të implikuar në trazirat e ditëve të shkuara.

 

Në një njoftim të lëshuar nga KFOR-i, thuhet se ky aksion ndërmerret në pajtim me përgjegjësitë e Brigadës Shumëkombëshe të Lindjes, pjesëtarët e së cilës gjatë 72 orëve të ardhshme do të ndërmarrin aksione kërkimi në rajonin e përgjegjësisë. Megjithatë, ky operacion, sipas tyre mund të zgjasë edhe 30 ditë, varësisht prej rezultateve të kërkimeve.

Operacioni i tillë është autorizuar nga komandanti i KFOR-it me qëllim të stabilizimit të situatës.

 

 

Nga rajoni i Klinës deri më tash nga 135 të zhdukur janë kthyer vetëm gjashtë kufoma

 

Klinë, 30 mars 2004 - Në Klinë është mbajtur tubimi i familjarëve të zhdukur dhe sërish u kërkua nga institucionet vendore që të bëjnë më shumë ndriçohet fati i të zhdukurve. Në këtë takim është theksuar se Kosovës i mungojnë edhe 3.520 qytetarë. Kështu nga rajoni i Klinës nga 135 robër lufte, deri më tash janë kthyer vetëm gjashtë kufoma.

 

 

Mospajtime rreth emërimit të zëvendësmenaxherit të ri në aeroportin e Prishtinës

 

Prishtinë, 30 mars 2004 - Në aeroportin e Prishtinës vazhdojnë mospajtimet, që lidhen me emërimin e Afrim Hazirit, zëvendësmenaxher i përgjithshëm i kësaj ndërmarrjeje publike të Prishtinës.

 

Derisa stafi vendor kundërshton këtë emërim, duke konstatuar se për këtë vend pune nuk është shpallur kurrëfarë konkursi, menaxheri ndërkombëtar në këtë aeroport thotë personi i emëruar i plotëson të gjitha kushtet dhe se ai është emëruar në këtë post nga Agjencioni Kosovar i Mirëbesimit në mënyrë që të përgatitet për marrjen e detyrës së drejtorit të aeroportit të Prishtinës.

 

 

Rreth 6.000 banorë të lagjes së Spitalit në Prishtinë tash 15 ditë janë pa ujë të pijshëm

 

Prishtinë, 30 mars 2004 - Banorët e lagjës së Spitalit të Prishtinës tash 15 ditë janë pa ujë të pijshëm për shkak të punimeve për ngritjen e sistemit të ujësjellësi të sistemit në këtë lagje. Fjala është për mbi 6000 banorë të cilët po përballen me këtë problem ekzistencial.

 

Sipas banorëve kompania që e ka fituar tenderin nga komuna e Prishtinës i ka vendosur gypat e ujësjellësit me kohë, por mbikëqyrësi që është caktuar nga komuna ka vërejtje serioze në punëkryesit. Gypat që po përdoren për lidhje anësore dhe në unazat lidhëse janë të kualitetit të dobët dhe 50 për qind më të lira, thonë zyrtarët e Batllavës.

Komuna ka investuar 129 mijë euro, ndërkaq banorët kanë participuar me rreth 40 mijë euro. Megjithëkëtë banorët e kësaj lagje ende nuk kanë ujë të pijshëm.

 

 

Në Albanik është arrestuar një serb i dyshuar për pjesëmarrje në sulmin e 24 marsit

 

Mitrovicë, 30 mars 2004 - Zyrtarët e policisë ndërkombëtare në Mitrovicë kanë bërë të ditur dje se në Albanik, (ish-Leposaviq) është arrestuar një person i dyshuar për pjesëmarrje në sulmin e 24 marsit në ushtarë të KFOR-it mbi urën e lumit Ibër në Mitrovicë.

 

Burimet jozyrtare bëjnë të ditur se i arrestuari është Zoran Gjokoviq me vendbanim në Kragujevc. Më 24 mars është arrestuar edhe sulmuesi i drejtpërdrejtë i ushtarëve francezë Zhivorad Cvetkoviq nga Prishtina, i cili në vitin e kaluar kishte ikur nga një burg në Serbi dhe kishte gjetur strehim në pjesën veriore të Mitrovicës.

 

Sipas burimeve nga veriu i Kosovë, Zhivorad Cvetkoviq është pjesëtar i formacionit "rojat e urës" dhe ai nuk ka arritur të hedhë edhe granatën e dytë në drejtim të ushtarëve të KFOR-it meqë ata kanë reaguar me shpejtësi bashkë me pjesëtarët e SHPK-së dhe kanë arritur të kapin sulmuesin.

 

 

Komandanti i KFOR-it Kamerhof dhe ministri serbo-malazez i Mbrojtjes u takuan afër Merdarit

 

Merdar/Podujevë, 30 mars 2004 - Komandanti i KFOR-it, gjenerali Holker Kamerhof dhe ministri i Mbrojtjes Serbi - Mali i Zi Boris Tadiq janë takuar dje në bazën ushtarake serbe afër Merdarit në zonën tokësore të sigurisë.

 

Në këto bisedime ka marrë pjesë edhe shefi i shtatmadhorisë së Serbisë dhe Malit të Zi, koloneli Branko Kërga. Ky është takimi i parë i komandantit Kamerhof me ministrin Tadiq prej se gjenerali gjerman është në këtë funksion.

 

 

Sot në qytetin Il Sen-Deni, afër Parisit, fillon Festivali kushtuar kulturës së Kosovës

 

Paris, 30 mars 2004 - Sot në qytetin Il Sen-Deni, afër Parisit në Francë, fillon Festivali kushtuar kulturës së Kosovës. Në këtë festival do të marrin pjesë mbi 80 artistë, shumica e tyre janë shqiptarë. Hapja solemne bëhet në orën 20.30.

 

Por më parë, në orën 16.00, çelen ekspozitat e piktorit Ismail Bozhlani dhe e fotografes Mari Ponshële (fotografi me motive shqiptare). Ndërkaq, në orën 20.45, shfaqet drama "Shoku im paranoik" (Mon ami paranoique) të autorit Nikson Pitaqaj, i cili e ka bërë edhe regjinë e dramës.

 

 

Grosman bisedon në Beograd me autoritetet serbe për Kosovën

 

Beograd, 30 mars - Nënsekretari amerikan i Shtetit për çështje politike Mark Grosman ka biseduar sot në Beograd me ministrin e punëve të jashtme të Unionit serbo-malazez Goran Svilanoviq.

 

Sipas mediave serbe, Grosman citohet të ketë thënë se SHBA-të mbeten të përkushtuara ndaj politikës standardet para statusit dhe ka shprehur gatishmërinë që bashkë me OKB-në, BE-në dhe Grupin e Kontaktit të vazhdojnë dialogun me autoritetet e Beogradit për modalitetet e decentralizimit të Kosovës që do të mundësonte një vetëqeverisje më efikase lokale dhe siguri për popullsinë serbe në Kosovë.

Me Grosmanin ka biseduar edhe ministri serbo-malazez i Mbrojtjes Boris Tadiq për situatën aktuale në Kosovë pas ngjarjeve të ditëve të fundit në Kosovë.

Grosman është takuar edhe me koordinatorin e të ashtuquajturës "Qendër koordinuese serbe për Kosvën", Nebojsha Çoviq. Çoviq citohet të ketë thënë se nuk beson më në Kosovën multietnike, as në standarde e përcaktuara, por është shprehur për ndarje.

Grosman pritet të takohet edhe me kryeministrin serb Koshtunica dhe kryetarin e Unionit Serbi-Mali i Zi Svetozar Maroviq.

 

 

Hajdaraga në Moskë bisedoi me Llavrovin

 

Moskë, 30 mars 2004 - Ministri i jashtëm rus Sergej Llavrov në një bisedë me zëvendësministrin e jashtëm të Shqipërisë, Luan Hajdaraga, ka shprehur shqetësimin serioz për shkak të, siç thuhet, përndjekjes së popullsisë serbe nga Kosova, njofton agjencia ruse, RIA Novosti.

 

 

Shqiptarët e Amerikës protestojnë kundër Kryeministrit Nano

 

Uashington, 30 mars 2004 - Ndërkohë që në oborrin e Shtëpisë së Bardhë zhvillohej ceremonia e pranimit të vendve të reja në NATO, ku merrte pjesë edhe kryeministri shqiptar, Fatos Nano, një grup shqiptaro amerikanësh kishin dalë për të protestuar kundër kryeministrit, të cilin ata e mbajnë përgjegjës për korrupsionin dhe krimin e organizuar në Shqipëri.

Shqiptaro amerikanë të ardhur nga shumë qytete të Shteteve të Bashkuara mbanin parulla të shumta në shqip e anglisht ku bëhej thirrje për largimin e kryeministrit Nano nga pushteti dhe pastrimin e Shqiqërisë nga korruëpsioni dhe krimi i organizuar.

Nënkryetari i shoqatës mbarë shqiptare Vatra, Gjon Buçaj, thotë se Shqipëria sot ka nevojë për një qeveri teknike që do ta përgatiste për zgjedhje të reja të lira e të drejta. Veprimtari veteran shqiptaro amerikan fajëson socialistët dhe kryeministrin Fatos Nano për prapambetjen e vendit, varfërinë e korrupsionin që sipas tij morën përmasa të papara që nga viti 1997 me rrëzimin e qeverisë demokratike.

Protesta e së hënës u organizua nga Gjenerata e re Shqiptare, një nga organizatat më të reja shqiptaro amerikane më degë në New York, New Jersey, Washington D.C., Teksas e shtete të tjera.

 

 

Burzan: Unioni Serbi-Mali i Zi nuk do të mbijetojë

 

Uashington, 30 mars 2004 - Unioni Serbi-Mali i Zi nuk do të mbijetojë, sepse struktura e tillë është treguar e pamjaftueshme për Serbinë dhe Malin e Zi, ka vlerësuar ministri malazez i punëve të jashtme Dragisha Burzan në Uashington.

Burzan citohet të ketë thënë se "bashkësia shtetërore është treguar jofunksionale në kuptimin e procesit të asociicimit serbo-malazez në Bashkimin Evropian".

 

 

Militantët islamikë kanë vrarë dy ushtarë pakistanezë

 

Vana, Pakistan, 30 mars 2004 - Militantët islamikë kanë vrarë dy ushtarë pakistanezë, që ishin zënë peng, në kufirin afgan, ka thënë sot (e martë) një zyrtar qeveritar, njofton Rojter. Vrasja e këtyre ushtarëve ka shtuar tensionet në kufirin pakistanezo-afgan, ku rreth 5000 trupa kanë sulmuar rreth 400 deri në 500 luftëtarë të Al Kaidës dhe të tjerë në një operacion 12-ditësh, që përfundoi të dielen dhe ku humbën jetën mbi 100 njerëz.

 

 

Në një shpërthim në Uzbekistan kanë humbur jetën 3 policë dhe një fëmijë

 

Tashkent, 30 mars 2004 - Dy femra e kanë hedhur sot (e martë) veten në erë tek një shitore për fëmijë dhe një stacioni autobusash në kryeqytetin e Uzbekistanit, Tashkent, njofton AP. Nga ky shpërthiim, përpos dy sulmueseve vetëvrasëse, kanë humbur jetën edhe tre policë dhe një fëmijë dhe janë plagosur disa njerëz.

 

Fill pas shpërthimit ka pasur shkëmbim zjarri ndërmjet policisë dhe, siç thuhet, terroristëve. Uzbekistani është aleat i SHBA-ve në Azinë qendrore, që ka dënuar sulmet e 11 shtatorit 2001. Në Uzbekistan janë mirëpritur qindra trupa amerikane në një bazë afër kufirit me Afganistanin.

 

 

Vritet kandidadit tamil për zgjedhjet e së premtes së ardhshme

 

Batikola, Sri Lanka, 30 mars 2004 - Vëzhguesit ndërkombëtarë të zgjedhjeve kanë dënuar vrasjen e kandidatit tamil për zgjedhjet e së premtes së ardhshme, njofton BBCWorld. Rajan Sathijamurthi dhe shoferi i tij janë vrarë në qytetin lindor Batikola, kurse një person i tretë është plagosur. Këtë akt të dhunës duket ta ketë kryer grupi i Tigrave Tamilë.

 

 

Kontrollori i marinës ka fajësuar ushtrinë për një incident, kur patën humbur jetën deri në 10 marinsa

 

Nasiria, Irak, 30 mars 2004 - Kontrollori i marinës ajrore ka fajësuar ushtrinë amerikane për një incident, që ishte më i rëndi në një të ashtuquajtur "zjarr miqësor" gjatë gjithë luftës në Irak, njofton BBCWorld.

Deri në 10 marinsa amerikanë mund të kenë humbur jetën gabimisht në një shkëmbim zjarri ndërmjet ushtarëve amerikanë në qytetin Nasiria, thuhet në një raport të ri të Pentagonit. Ky incident ka ndodhur katër ditë pas fillimit të luftës në Irak, më 23 mars në vitin e kaluar.

 

 

Forcat filipinase kanë evituar një sulm me bombë në caqet civile si në sulmet në Madrid

 

Manila, 30 mars 2004 - Forcat filipinase kanë evituar një sulm me bombë, në shenjestër të të cilit kanë qenë caqet civile të shkallës së njëjtë si në sulmet në Madrid, ka thënë presidentja e vendit, njofton BBCWorld.

 

Forcat e presidentes, Gloria Macapagal Arrojo, kanë kapur mjetet shpërthyese, të cilat kanë qenë destinuar të përdoren për bombardimin e trenave dhe të qendrave tregtare në kryeqytetin Manila. Janë arrestuar disa njerëz në lidhje me këtë kpomplot. Ata kanë qenë të lidhur me grupin Abu Sajafit, ka thënë ajo.

 

 

Presidenti Bush u uroi zyrtarisht 7 vendeve mireseardhjen në NATO

 

Uashington, 30 mars 2004 - Aleanca e Natos ka tani 7 anëtarë të rinj, nga Evropa Veriore dhe Qendrore duke u shtrirë deri pranë kufijve të Rusisë. Ceremonia e zyrtare e pranimit të tyre u organizua të hënën në Shtëpinë e Bardhë. Të ftuar në ceremoni ishin edhe tre vendet ballkanike që shpresojnë të anëtarësohen sa më shpejt në aleancën e Atlantikut Verior.

Presidenti Bush tha se 7 vendet e reja e njohin mirë çmimin e lirisë dhe si rezultat i tyre aleanca e Natos do të bëhet më e fortë.

"Si dëshmitarë të disa prej krimeve më të mëdha të shekullit të kaluar, anëtarët e rinj do t'i sjellin qartësi morale qëllimit të aleancës. Ata, tha Presidenti Bush e kuptojnë kauzën tonë në Afganistan dhe Irak, pasi tirania është ende e freskët në kujtesën e tyre".

Presidenti Bush i bëri këto komente në Shtëpinë e Bardhë vetëm disa orë pasi 7 vendet e reja dorëzuan dokumentet zyrtare të anëtarësimit.

Shtatë vendet e reja që u pranuan të hënën janë Bullgaria, Rumania, Sllovenia, Sllovakia, dhe tre vendet balltike Estonia, Lituania dhe Letonia.

Kryeministri i Shqipërisë Fatos Nano, i tha Zërit të Amerikës pas ceremonisë se kjo ishte një ditë e rëndësishme për gjithë shqiptarët. Duke u shprehur optimist për anëtarësimin e vendit të tij në NATO, kryeministri Nano tha se Shqipëria ka tani përpara detyrën e rëndësishme të thellimit të reformave.

 

 

Forcat amerikane marrin përgjegjësinë për vrasjen e dy gazetarëve irakianë

 

Bagdad, 30 mars 2004 - Forcat amerikane në Irak kanë pranuar zyrtarisht përgjegjësinë për vrasjen e dy gazetarëve irakianë të televizionit më 18 mars. Forcat amerikane thonë në një deklaratë të lëshuar dje se gazetarët e televizionit al-Arabija, Ali Abdul Azizi dhe Ali al-Khatibi, ishin qëlluar aksidentalisht gjatë një incidenti tek një postbllok ushtarak amerikan.

Zyrtarë ushtarakë shprehën keqardhje për incidentin, i cili zemëroi gazetarët arabë të vendosur në Bagdad. Ndrëkohë, koalicioni mbrojti mbylljen të dielen për 60 ditë të gazetës së përjavshme shiite al-Havza.

 

 

Arrestohen dy të dyshuar për sulmet

 

Madrid, 30 mars 2004 - Edhe dy të dyshuar të tjerë, një sirian dhe një maroken janë akuzuar lidhur me bombën në Madrid, ku më 11 mars u vranë më shumë se 200 vetë.

Siriani akuzohet për përfshirje në sulm dhe se bën pjesë në një organizatë terroriste, ndërsa marokeni akuzohet se ka bashkëpunuar me terrorizmin.

Gjykatësi, Huan del Olmo, në Gjykatën e Lartë në kryeqytetin e Spanjës, liroi nga burgu tre persona të tjerë që nuk ishin akuzuar nga drejtësia.

Deri tani, pesëmbëdhjetë persona po mbahen në paraburgim në lidhje me sulmet ndaj trenave në Madrid.

 

 

Anan shkarkon koordinatorin e OKB-së për siguri

 

Nju Jork, 30 mars 2004 - Sekretari i Përgjithshëm i Kombeve të Bashkuara, Kofi Annan, ka liruar nga detyra koordinatorin për sigurinë, Tun Myat, pas publikimit të një raporti që kishte të bënte me rrethanat që çuan në bombën shkatërruese që u vu vitin e kaluar në selinë e Kombeve të Bashkuara në Irak.

Bomba vrau atëherë 22 persona, përfshirë edhe shefin e misionit të OKB-së në Baghdad, Serzho de Melo.

Annan nga ana tjetër refuzoi dorëheqjen e zëvendëses së zotit Tun Myat, Luiz Freçet, e cila drejton një grup pune që merret me çështjen e Irakut.

Raporti që çojë në masat në fjalë, ndër të tjera thotë se përpjekjet për të gjetur arsyet e kthimit të OKB-së në Irak, kanë dështuar.

 

 

Policia e Londrës ka arrestuar 8 persona të dyshimtë për përgatitje të sulmeve terroriste

 

Londër, 30 mars 2004 - Policia ka arrestuar sot (e martë) tetë persona dhe ka kapur një gjysmë tone të nitratit të amoniumit, që mund të shërbejë për prodhimin e bombave për sulme terroriste, ka bërë të ditur policia e Londrës, njofton AP. Të gjithë të arrestuarit kanë shtetësi britanike dhe janë arrestuar gjatë një operacioni të sotëm policor.

 

Policia ka thënë gjithashtu se operacioni s’ka lidhje me sulmet me bombë në trenat e Madridit dhe as me terrorizmin e IRA-s.

 

 

Në Sudan janë arrestuar disa opozitarë dhe oficerë për përpjekje për grushtshtet

 

Kartum, 30 mars 2004 - Autoritetet e Sudanit kanë arrestuar sot (e martë) një numër politikanësh opozitarë dhe oficerësh të armatës për përpjekje për grushtshtet, me të cilin do të përmbysnin presidentin Omar al-Bashir, njofton BBCnews.

 

Të gjithë të arestuarit supozohet të jenë pjesëtarë të Partisë islamiste të Kongresit Popullor. Ata gjithashtu supozohet të jenë përzier në kryengritjen në rajonin perëndimor Darfur.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |