Krahas aktivitetit për sanimin e pasojave, Kosova duhet të shikojë nga e ardhmja e saj

Gjilan, 30 mars/TN/ Ilmi MUSLIU - Ministri i kulturës, rinisë, sporteve dhe çështjeve jorezidente, Behxhet Brajshori ka vizituar të martën Gjilanin, ku nga udhëheqja komunale është njoftuar me përpjekjet dhe planin për sanimin e dëmeve të protestave të 17 e 18 marsit.
Lutfi Haziri, kryetar i komunës tha se edhe në Gjilan protestat u përshkallëzuan në dhunë dhe si pasojë humbi jetën një qytetar, u lënduan dhjetra të tjerë dhe u dëmtuan disa objekte banimi dhe vetura.
Tani gjendja është normalizuar dukshëm dhe angazhimi ynë është përqëndruar në sanimin e pasojave dhe kthimin e të zhvendosurve. Një numër i serbëve mund të kthehen menjëherë, pasiqë 52 shtëpi nuk janë dëmtuar, përderisa të tjerët mund ta bëjnë këtë sapo të sanohen pasojat.
Ka qenë fat i mirë që në komunën e Gjilanit nuk është dëmtuar asnjë kishë ortodokse apo objekt i kulturës, pos infrastrukturës private të banimit dhe përballja me pasojat do të jetë më e lehtë.
Por, këtu ende mbetet në fuqi ora policore, e cila është urdhëruar nga komandanti i Brigadës Shumëkombëshe të Lindjes dhe ne kemi kërkuar që të bëhet një rivlerësim i kësaj mase, në mënyrë që të mund të zhvillohen aktivitetet kulturore, rinore e sportive, meqenëse konsiderojmë se gjendja është normalizuar dukshëm, tha Haziri.
Ai e njoftoi ministrin Brajshori se policia dhe KFOR-i kanë kryer dje një kontrollim edhe në objektin e shtëpisë së kulturës, ku kanë urdhëruar mbylljen e bufesë në hapësirën e teatrit dhe ajo nuk do të lejohet të punojë gjatë disa muajve të ardhshëm, pasiqë organet e sigurisë kishin marrë njoftime se ka ekzistuar një lidhje me protestat. Ndërkaq, kryeshefi ekzekutiv Enver Muja ka thënë se që nga sot, komisioni, i cili përbëhet nga të gjitha komunitetet, ka filluar vlerësimin e dëmeve dhe në fazën e parë do të sanohen ato shtëpi, të cilat janë të dëmtuara më pak, në mënyrë që banuesit të mund të kthehen më shpejt, ndërsa në fazën e dytë do të punohet në objektet e djegura ose të dëmtuara më shumë.
Komuna ka ndarë si ndihmë emergjente nga fondi i saj 10 mijë Euro, të cilat ka planifikuar t`ua ndajë familjeve të zhvendosurve, në mënyër që ato të kenë mundësi vetë të sigurojnë atë që iu duhet më tepër në këtë fazë, por ka thënë se procedurat e prokurimit janë të atilla që e vështirësojnë një gjë të tillë.
Muja tha se është kontaktuar edhe me punëtorët serbë në shërbimin civil të komunës, të cilët duhet të kthehen në punë, pasiqë është siguruar për ta trasnporti dhe jemi të sigurtë se nuk do të kenë asnjë problem me kolegët e tyre shqiptarë në administratë, ku ata punojnë bashkë që nga viti 2000 dhe asnjëherë nuk ka patur mosmarrëveshje ndërmjet tyre.
Ministri Behxhet Brajshori ka përgëzuar udhëheqjen komunale për angazhimet e mëdha që ka bërë për të përballuar gjendjen dhe për të ndaluar shkallëzimin e dhunës dhe ka thënë se tani, krahas përpjekjeve për normalizimin e gjendjes, Kosova duhet t`iu rikthehet edhe aktivitetetve tjera normale dhe kjo, njësoj duhet të vazhdojë edhe në Gjilan.
Ministri Brajshori është pajtuar se hapësirat e teatrit duhet t`iu kthehen institucioneve të kulturës dhe ato të shfrytzëohen për veprimtari përkatëse dhe jo për biznes.
Më tutje, ministri ka thënë se është shumë e nevojshme që në përbërje të komisioneve për vlerësimin e dëmeve të ketë edhe përfaqësues të komunitetit serb, për shkak se kështu mundësohet edhe qasja më e lehtë në shtëpitë e dëmtuara, ndërsa UNMIK-u duhet të mbajë rolin e këshilldhënësit në këto komisione dhe në procesin e sanimit të pasojave, të cilën e ka marrë përsipër Qeveria e Kosovës.
Natyrisht, sipas minsitrit Brajshori, krahas aktiviteteve për normalizimin e jetës, Kosova duhet të shikojë nga e ardhmja dhe nuk duhet assesi të mbyllet vetëm në këtë çka ka ndodhur. Duke qenë i bindur në aftësitë e pushtetit lokal në Gjilan për t`i lëvizur gjerat përpara, Behxhet Brajshori ka premtuar se në këtë rrugë komuna do ta ketë përkrahjen e Qeverisë së Kosovës.